E Kaida

Lesa Génesis 3:1,2 Korintionan 11:3, i Revelashon 12:7–9. Ken e kolebra ta, i kon e ta gaña Eva?

E teksto ta kuminsá ku “e kolebra”. E sintáksis di e frase ta sugerí énfasis: e palabra: “kolebra” ta e promé palabra di e frase. Tambe, “e kolebra” tin e artíkulo definí, indikando ku esaki ta un figura bon konosí, manera kos ku e lesadó mester sa kaba ken e ta. Ta afirmá e realidat di e ser akí, pues, for di e promé palabra di e kapítulo.

Naturalmente, e Skrituranan ta identifiká e kolebra komo e enemigu di Dios (Isa. 27:1) i ta yam’é eksplísitamente “Diabel i Satanas” (Rev. 12:9, NKJV). Di mes manera, den Oriente Serkano antiguo, e kolebra tabata personifiká e poder di maldat.

“Pa kumpli ku su trabou iripará, Satanas a skohe pa usa e kolebra komo su medium—un máskara bon adaptá pa su propósito di engaño. E kolebra tabata e tempu ei un di e kriaturanan di mas sabí i di mas bunita riba tera. E tabatin ala, i miéntras e tabata bula den laira e tabata presentá un aparensia di brio sumamente bunita, teniendo e koló i splendor di oro di pòlish.”—Ellen G. White, Patriarchs and Prophets, p. 53.

Ora Beibel ta papia tokante diabel, den kualke forma ku e ta aparesé, e no ta papiando simplemente metáfora. Den Skritura ta deskribí Satanas komo un ser literal i no djis un símbolo retóriko òf un prinsipio apstrakto pa deskribí maldat òf e banda skur di humanidat.

E kolebra no ta presentá su mes komo un enemigu di Dios. Al kontrario, e kolebra ta referí na e palabranan di Dios, ku e ta ripití i parse ta sostené. Es desir, for di prinsipio, nos por mira ku Satanas ta gusta sita Dios i, manera nos lo mira despues, asta ta sita e Palabra di Dios mes (Mat. 4:6).

Nota tambe ku e kolebra no ta argumentá inmediatamente ku e muhé, sino e ta hasi un pregunta ku ta impliká ku e ta kere den loke Señor a bisa nan. Despues di tur kos, el a puntra: “Enbèrdat Dios a bisa . . .” (Gen. 3:1, NKJV)? Pues, asta for di kuminsamentu nos por mira kon astuto i engañoso e ser akí tabata. I, manera nos lo mira, el a funshoná tambe.

Lesa Génesis 2:16, 17 i Génesis 3:1–6 (lesa tambe Juan 8:44). Kompará e palabranan di Dios Su mandato na Adam ku e palabranan di e kolebra na e muhé. Kiko ta e diferensianan entre e spichnan, i kiko ta nifikashon di e diferensianan akí?

Nota e paralelonan entre e kombersashon di Dios ku Adam (Gen. 2:16, 17) i e kombersashon di Eva ku e kolebra. Ta manera kos ku e kolebra awor a remplasá Dios i sa asta mihó ku E sa. Na prinsipio el a simplemente hasi un pregunta, implikando ku e muhé, kisas, a komprondé Dios malu. Pero despues Satanas a kuestioná e intenshonnan di Dios abiertamente i asta a kontradisiE.

E atake di Satanas ta konserní dos asuntu, morto i e konosementu di bon i malu. Miéntras Dios klaramente i enfátikamente a deklará ku nan morto lo tabata sigur (Gen. 2:17), Satanas a bisa ku, al kontrali, nan lo no a muri, tur implikando ku hende tabata inmortal (Gen. 3:4). Miéntras Dios a prohibí Adam di kome di e fruta (Gen. 2:17), Satanas a enkurashá nan pa kome e fruta pasobra dor di kome di dje nan lo tabata manera Dios (Gen. 3:5).

Satanas su dos argumentonan, inmortalidat i ta manera Dios, a konvensé Eva pa kome e fruta. Ta alarmante ku tan pronto ku e muhé a disidí di desobedesé Dios i kome e fruta prohibí, el a komportá manera kos ku Dios no tabata presente mas i e mes a remplasá Dios. E teksto bíbliko ta aludí na e kambio di personalidat akí. Eva ta usa Dios Su lenguahe: Eva su evaluashon di e fruta prohibí, “a mira ku . . . e tabata bon” (Gen. 3:6), ta rekordá Dios su evaluashon di Su kreashon, “a mira . . . ku e tabata bon” (Gen. 1:4, etc.).

E dos tentashonnan akí, esun di ta inmortal i di ta manera Dios, ta na rais di e idea di e inmortalidat den religionnan egipsio i griego. E deseo pa inmortalidat, ku nan tabata kere tabata un atributo divino, a obligá e hendenan akí pa buska status divino tambe, pa asina (nan tabata spera) atkerí inmortalidat. Kuchikuchi, e forma di pensa akí a infiltrá kulturanan hudiu-kristian i a duna lus na e kreensia den e inmortalidat di e alma, kua ta eksistí asta awe den hopi iglesia.

Lesa Génesis 3:7–13. Dikon Adam i Eva a sinti e nesesidat di skonde dilanti di Dios? Di kon Dios a hasi e pregunta “Unda bo ta?” Kon Adam i Eva a trata na hustifiká nan komportashon?

Despues ku nan a peka, Adam i Eva a sinti nan mes sunú pasobra nan a pèrdè nan bistínan di gloria, kua tabata reflehá e presensia di Dios (lesa Salmo 8:5, kompará ku Salmo 104:1,2). Piká a afektá e imágen di Dios. E verbo “traha” den e frase “a traha ko’i tapa pa nan mes” (Gen. 3:7, NKJV) a apliká te asina leu solamente na Dios e Kreador (Gen. 1:7,16,25, etc.). Ta manera kos ku nan a remplasá e Kreador ora nan a purba tapa nan piká, un akto ku Pablo ta denunsiá komo hustisia pa medio di obranan (Gal. 2:16).

Ora Dios ta aserká E ta hasi nan e pregunta retóriko: “Unda boso ta?” (Gen. 3:9, NKJV), e mesun tipo di pregunta ku Dios lo hasi Kain (Gen. 4:9). Naturalmente, Dios tabata sa e kontestanan riba e preguntanan. El a hasi Su preguntanan pa benefisio di esnan kulpabel, pa yuda nan realisá loke nan a hasi i sinembargo, na mes momento, pa hiba nan na arepentimentu i salbashon. For di momento ku hende a peka, Señor tabata obrando pa nan salbashon i redenshon.

De echo, henter e senario ta reflehá e idea di e huisio investigador, kua ta kuminsá ku e hues, kende ta interogá esun kulpabel (Gen. 3:9) pa asina prepar’é pa e sentensia (Gen. 3:14–19). Pero E ta hasi esei tambe pa kousa arepentimentu, kua lo hiba finalmente na salbashon (Gen. 3:15). Esaki ta un konsepto ku nos ta mira a lo largu di henter Beibel.

Na prinsipio, manera ta asina komun ku pekadornan, Adam i Eva tur dos a purba evadí e akusashon, tratando pa kulpa otronan. Riba e pregunta di Dios, Adam ta respondé ku tabata e muhé ku Dios a dun’é (Gen. 3:12), el a hib’é na hasié. Tabata su falta (i, impliká, tabata di Dios tambe), no di dje.

Eva ta kontestá ku tabata e kolebra ku a gañ’é. E palabra hebreo nasha’, “gaña” (den Gen. 3:13), ta nifiká duna hende speransanan falsu i pone nan kere ku nan ta hasiendo e kos korekto (2 Reinan 19:10, Isa. 37:10, Jer. 49:16).

Adam ta kulpa e muhé, bisando ku el a dun’é e fruta (algun bèrdat den esaki), i Eva ta kulpa e kolebra, bisando ku el a gañ’é (algun bèrdat den esaki tambe). Pero al final, nan tur dos tabata kulpabel.

“I lo Mi pone enemistat entre abo i e muhé, i entre bo desendiente i esun di dje; e lo aplastá bo kabes, i abo lo dal su hilchi” (Gen. 3:15, NIV). Kiko Señor a bisa e kolebra aki, i ki speransa tin impliká den e versíkulonan akí?

Dios ta kuminsá Su huisio ku e kolebra pasobra e ta esun ku a inisiá henter e drama. Tambe e kolebra ta e úniko ser ku Dios ta maldishoná den e narativo akí.

Nos ta alkansá aki un “retroseso” di Kreashon. Miéntras Kreashon a hiba na bida, e apresio di bon, i bendishonnan, huisio ta hiba na morto, maldat, i maldishonnan, pero tambe, na e speransa i promesa di salbashon. Konektá na e kuadro skur di e kolebra maldishoná komiendo stòf (Gen. 3:14) ta bria e speransa di e salbashon di humanidat, kua ta aparesé den forma di un profesia. Asta promé ku e kondenashonnan di Adam i Eva, kua lo sigui, Señor ta duna nan e speransa di redenshon (Gen. 3:15). Sí, nan a peka; sí, nan lo sufri pa motibu di nan piká; i, sí, nan lo muri tambe, pa motibu di nan pikánan. Pero apesar di tur esei, tin e speransa final, e speransa di salbashon.

Kompará Génesis 3:15 ku Romanonan 16:20, Hebreonan 2:14, i Revelashon 12:17. Kon e tekstonan akí ta revelá e plan di salbashon, komo tambe e gran kontroversia?

Nota e paralelonan entre Génesis 3:15 i Revelashon 12:17: e dragon (kolebra), furioso (enemistat); e simia (desendiente); i e muhé den Eden i e muhé den Revelashon 12:17. E bataya (e gran kontroversia) ku a muda bai Eden, huntu ku e Kaida, lo sigui te na final di tempu. Sinembargo, Dios a duna e promesa di e derota di Satanas ya kaba den Eden, den sentido ku lo a aplastá su kabes, un tema mas eksplísitamente revelá den Revelashon, kua ta deskribí su morto final (Rev. 20:10). Es desir, for di prinsipio, Dios a duna humanidat speransa ku lo tin un kaminda pa sali for di e problema teribel ku a bin for di konosementu di malu, un speransa ku nos tur por kompartí den dje aworakí.

Lesa Génesis 3:15–24. Komo resultado di e Kaida, kiko a sosodé ku Adam i Eva?

Miéntras Dios Su huisio di e kolebra ta eksplísitamente identifiká komo un maldishon (Gen. 3:14), Dios Su huisio di e muhé i di e hòmber no ta. E úniko bia kaminda ta usa e palabra “maldishon” atrobe, e ta apliká na e “tera” (Gen. 3:17). Es desir, Dios tabatin otro plannan pa e hòmber i e muhé, kontrali na e kolebra. Dios a ofresé nan un speransa ku E no a ofresé e kolebra.

Pa motibu ku e piká di e muhé ta debí na su asosiashon ku e kolebra, e versíkulo ku ta deskribí Dios Su huisio di e muhé tabata relatá na e huisio di e kolebra. No solamente Génesis 3:16 ta sigui Génesis 3:15 inmediatamente, sino e paralelonan entre e dos profesianan ta indiká klaramente ku mester lesa e profesia enkuanto di e muhé den Génesis 3:16 den konekshon ku e profesia mesiániko den Génesis 3:15. Por lo tantu, mester komprondé Dios Su huisio di e muhé, inkluyendo parto, den e perspektiva positivo di salbashon (kompará ku 1 Tim. 2:14,15).

Pa motibu ku e piká di e hòmber ta debí na su skuchamentu di e muhé na lugá di skucha Dios, Dios a maldishoná e tera for di kua El a tum’é (Gen. 3:17). Komo resultado, hòmber mester traha duru (Gen. 3:17–19), i despues e lo “bolbe” na e tera for di unda e ta bin (Gen. 3:19), algu ku no mester a sosodé nunka, i ku nunka tabata parti di e plan original di Dios.

Ta signifikante ku kontra e prospekto sin speransa akí Adam ta bira, e ora ei, na e muhé, kaminda e ta mira e speransa di bida dor di su dunamentu di lus (Gen. 3:20). Es desir, asta meimei di e sentensia di morto, e ta mira e speransa di bida.

Mientrastantu, manera kualke mayor amoroso lo a hasi, Dios tabata ke solamente bon pa nan, no malu. Pero awor ku nan a konosé malu, Dios tabata bai hasi tur loke E tabata por pa salba nan for di dje. Asina, asta meimei di e huisionan akí, tur speransa no tabata pèrdí pa nos promé mayornan, apesar di nan desobedensia habrí i opvio na Dios; aunke nan, bibando realmente den paraiso, no tabatin niun motibu pa duda di Dios, pa duda di Dios Su palabranan, òf pa duda di Su amor pa nan.