Kain i Su Herensia

Lesa Génesis 4:1, 2. Kiko nos ta siña for di e pasashinan akí tokante e nasementunan di e dos mucha hòmbernan?

E promé evento registrá pa e outor bíbliko inmediatamente despues di e ekspulshon di Adam for di e Hòfi di Eden ta un nasementu. Den e frase hebreo den Génesis 4:1, e palabranan “SEÑOR” (YHWH) ta direktamente konektá na e palabranan “un hòmber”, manera e siguiente tradukshonnan literal ta indiká: “Mi a atkerí un hòmber, en realidat SEÑOR Mes”. E International Standard Version ta present’é komo: “Mi a duna lus na un yu hòmber—SEÑOR”.

E tradukshon literal akí ta sugerí ku Eva ta kòrda e profesia mesiániko di Génesis 3:15 i ta kere ku el a duna lus na su Salbador, SEÑOR. “A pronostiká e binida di e Salbador den Eden. Ora Adam i Eva a tende e promesa pa promé bia, nan a wak pa su pronto kumplimentu. Yen di goso nan e duna bonbiní na nan promé yu hòmber, sperando ku kisas e por tabata e Libertadó.”—Ellen G. White, The Desire of Ages, p. 31.

De echo, Kain ta okupá mayoria di e storia. E no ta solamente e promé yu, un yu hòmber ku e mayornan tabata kasi “adorá”; den e kapítulo, e ta e úniko ku, den e teksto di Génesis, ta papia. Miéntras Eva, yen di eksitashon, ta komentá riba nasementu di Kain, e no ta bisa nada di Abel, a lo ménos nada ku ta registrá den e teksto, kontrali na nasementu di Kain. E naradó simplemente ta reportá ku el “a duna lus atrobe” (Gen. 4:2, NKJV).

E nòmber Kain mes ta derivá di e verbo hebreo qanah, ku ta nifiká “atkerí” i ta denotá e atkisishon, e poseshon di algu presioso i poderoso. Na otro banda, e nòmber hebreo Hebel, na ingles Abel, ta nifiká “vapor” (Salmo 62:9), òf “rosea” (Salmo 144:4) i ta indiká elusivo, bashí, falta di supstansia; ta usa e mesun palabra, hebel (Abel), bes tras bes den Eklesiastés pa “banidat”. Aunke nos no ke lesa mas den e tekstonan kòrtiku ku tin ei, kisas e idea ta ku e speransa di Adam i Eva tabata sosegá, nan a kere, solamente den Kain, pasobra nan tabata kere ku e, no su ruman, tabata e Mesias primintí.

E kontraste entre Kain i Abel, manera reflehá den nan nòmbernan, no tabata djis konserní nan personalidat; e tabata manifestá tambe den nan respektivo okupashonnan. Miéntras Kain tabata “un kultivadó di tera” (Gen. 4:2, NKJV), un profeshon ku ta rekerí trabou físiko duru, Abel tabata “un wardadó di karné” (Gen. 4:2, NKJV), un profeshon ku ta impliká sensitividat i kompashon.

Kain tabata e produktor di fruta. Abel e wardadó di karné. E dos okupashonnan akí no solamente ta splika e naturalesa di e dos diferente ofrendanan (fruta di Kain i un karné di Abel)—nan ta konta tambe pa e dos diferente aktitutnan i mentalidatnan sikológiko asosiá ku e dos ofrendanan: Kain tabata traha pa “atkerí” e fruta ku e lo a produsí, miéntras Abel tabata kuidadoso pa “warda” e karnénan ku el a risibí.

Lesa Génesis 4:1–5 i Hebreonan 11:4. Dikon Dios a aseptá e ofrenda di Abel i a rechasá e ofrenda di Kain? Kon nos mester komprondé loke a pasa aki?

“Sin dramamentu di sanger no por tabatin pordon di piká; i nan [Kain i Abel] mester a mustra nan fe den e sanger di Kristu komo e ekspiashon primintí dor di ofresé e primogénitonan di e tou den sakrifisio. Ademas di esaki, mester a presentá e promé frutanan di tera dilanti di Señor komo un ofrenda di gradisimentu.”—Ellen G. White, Patriarchs and Prophets, p. 71.

Miéntras Abel a kumpli ku e instrukshonnan di Dios i a ofresé e ofrenda vegetal ademas di e ofrenda kimá animal, Kain a neglishá di hasi esei. E no a trese un animal pa sakrifiká, sino solamente un ofrenda di “e fruta di tera”. E tabata un akto di desobedensia habrí, kontrali na e aktitut di su ruman. Hopi bia a mira e storia akí komo un kaso klásiko di salbashon pa medio di fe (Abel i su ofrenda di sanger) kontrali na un intento pa gana salbashon pa medio di obranan (Kain i su fruta di tera).

Aunke e ofrendanan akí mester tabatin nifikashon spiritual, nan no tabatin niun balor mágiko den nan mes. Nan tabata semper simplemente símbolonan, imágennan, mustrando na Dios kende a proveé e pekador no solamente mantenshon sino tambe redenshon.

Lesa Génesis 4: 3–8. Kiko ta e proseso ku a hiba Kain na mata su ruman hòmber? Lesa tambe 1 Juan 3:12.

Kain su reakshon ta dòbel: “Kain tababa hopi rabiá, i su kara a kai” (Gen. 4:5, NKJV). Kain su rabia tabata dirigí, parse, na Dios i na Abel. Kain tabata rabiá ku Dios pasobra e tabata pensa ku e tabata víktima di un inhustisia i rabiá ku Abel pasobra e tabata yalurs riba su ruman. Yalurs di kiko? Djis e ofrenda? Seguramente, mas kos tabata tumando lugá tras di kortina ku loke ta revelá den e par di tekstonan akí. Loke sea e problema tabata, Kain tabata deprimí pasobra Dios no a aseptá su ofrenda.

E dos preguntanan di Dios den Génesis 4:6 ta relatá na e dos kondishonnan di Kain. Nota ku Dios no ta akusá Kain. Manera ku Adam, Dios ta hasi pregunta, no pasobra E no sa e kontestanan, sino pasobra E ke pa Kain wak su mes i despues komprondé e rason pa su mes kondishon. Manera semper, Señor ta trata na redimí Su pueblo kaí, asta ora nan fay’E abiertamente. E ora ei, despues di hasi e preguntanan akí, Dios ta konsehá Kain.

Promé, Dios ta urgi Kain pa “hasi bon” pa komportá na e forma korekto. E ta un yamada pa arepentimentu i pa kambia su aktitut. Dios ta primintí Kain ku E lo “asept’é” i pordon’é. Den un sentido e ta bisando ku Kain por tin aseptashon ku Dios, pero mester hasié bou kondishonnan di Dios, no di Kain.

Na otro banda, “si bo no hasi bon, piká ta na bo porta. I su deseo ta pa bo, ma abo lo goberná riba dje” (Gen. 4:7, NKJV). Dios Su konseho a revelá e rais di piká, i ta hañ’é den Kain mes. Aki, atrobe, Dios ta konsehando Kain, tratando na gui’é den e kaminda ku e mester bai.

E di dos palabra di konseho di Dios ta konserní e aktitut pa tuma pa ku e piká akí, kua ta na porta i ken su “deseo ta pa bo”. Dios ta rekomendá dominio propio: “Abo lo goberná riba dje”. E mesun prinsipio ta resoná den Santiago, ora e ta splika ku “kada un ta ser tentá ora e ser halá bai pa su propio deseonan i pashon” (Santiago 1:14, NKJV). E evangelio ta ofresé nos e promesa di no solamente e pordon di piká sino viktoria riba dje tambe (Lesa 1 Kor. 10:13). Al final, Kain no tabatin niun hende pa kulpa pa su piká sino su mes. Generalmente no ta asina ku nos tur tambe?

Lesa Genesis 4:9–16. Dikon Dios ta hasi e pregunta “Unda Abel bo ruman ta?” Kiko ta e konekshon entre e piká di Kain i di e birando “un fugitivo i un bagamundu . . . riba tera” (Gen. 4:12, NKJV)?

E pregunta di Dios na Kain ta eko Su pregunta na Adam den Eden: “Unda bo ta?” E eko akí ta sugerí e konekshon entre e piká den Eden i e piká akí awor: E último piká (di Kain) tabata resultado di esun promé (di Adam).

Kain, sinembargo, lo no rekonosé su piká; e ta ning’é, algu ku Adam no a hasi, aunke el a purba pone e kulpa otro kaminda. Kain, al kontrario, abiertamente ta desafiá Dios, kende no ta pèrdè niun tempu pa konfrontá Kain ku su krímen. Ora Dios hasi e di tres pregunta: “Kiko bo a hasi?” E no ta ni sikiera warda riba un kontesta. E ta kòrda Kain ku E sa tur kos, pasobra e bos di Abel su sanger a alkans’é for di suela (Gen. 4:10), un imágen ku ta nifiká ku Dios sa tokante e asesinato i lo reakshoná riba dje. Abel ta den suela, un konekshon dirèkt bèk na e Kaida i na loke Señor a bisa ku lo a sosodé ku Adam (lesa Gen. 3:19).

Lesa Génesis 4:14. Kiko ta nifikashon di e palabranan di Kain ku “lo mi ta skondí for di Bo kara” (NKJV)?

Ta pasobra e sanger di Abel tabata bashá riba suela ku e suela awor tabata maldishoná, atrobe (Gen. 4:12). Komo resultado, Kain ta kondená e ora ei pa bira un refugiado, leu for di Dios. Solamente ora Kain a tende e sentensia di Dios e ta rekonosé e nifikashon di Dios Su presensia; pasobra sin dje, e ta teme pa su propio bida. Asta despues di Kain su asesinato ku sanger friu di su ruman i su desafio den bista di esei, Señor ainda ta mustra miserikòrdia na dje, i aunke “Kain a sali for di presensia di SEÑOR” (Gen. 4:16, NKJV), Señor ainda a prove'é ku algun tipo di protekshon. Eksaktamente kiko e “marka” ei tabata (Gen. 4:15), no a bisa nos, pero loke sea e tabata, el a bin solamente pa motibu di e grasia di Dios na dje.

Lesa Génesis 4:17–24. Kiko tabata e herensia di Kain, i kon e krímen di Kain a habri kaminda pa e maldat kresiente di humanidat?

Kain su ñetu, Lamek, ta referí na e krímen di Kain den konteksto di esun di e mes. E komparashon entre e krímen di Kain i e krímen di Lamek ta instruktivo. Miéntras Kain ta keda ketu tokante su úniko krímen registrá, Lamek parse ta bromando ku esun di dje, ekspresando esaki den un kantika (Gen. 4:23, 24). Miéntras Kain ta pidi pa e miserikòrdia di Dios, no ta registrá Lamek pidiendo pa esaki. Miéntras Dios ta venga Kain shete bia, Lamek ta kere ku Dios lo veng’é setentishete bia (lesa Gen. 4:24), un señal ku e ta bon konsiente di su kulpabilidat.

Tambe, Kain ta monógamo (Gen. 4:17); Lamek ta introdusí poligamia, pasobra Skritura ta bisa spesífikamente ku el “a tuma pa su mes dos esposa” (Gen. 4:19, NKJV). E intensifikashon i eksaltashon di maldat akí definitivamente lo afektá e siguiente generashonnan di kainitanan.

Inmediatamente despues di e episodio di maldat akí den e famia di Kain, e teksto bíbliko ta registrá un evento nobo ku ta kontrali na e tendensia kainita (di pueblo di Kain). “Adam a konosé su esposa” (Gen. 4:25), i e resultado ta nasementu di Sèt, ken Eva ta duna su nòmber pa indiká ku Dios a pone “un otro simia” na lugá di Abel.

De echo, e historia di e nòmber Sèt ta bin promé ku Abel. E nòmber Sèt ta derivá for di e verbo hebreo ‘ashit, “lo Mi pone” (Gen. 3:15), kua ta introdusí e profesia mesiániko. E simia mesiániko lo keda transmití den e liña di Sèt. E teksto bíbliko ta duna, e ora ei, e registro di e liña mesiániko kuminsando ku Sèt (Gen. 5:3), i inkluyendo Enòk (Gen. 5:18), Matusalen, i terminando ku Noe (Gen. 6:8).

E frase “yu hòmbernan di Dios” (Gen. 6:2) ta referí na e liña di Sèt pasobra nan ta designá pa preservá e imágen di Dios (Gen. 5:1, 4). Na otro banda, e “yu muhénan di hende” (Gen. 6:1) parse tin un implikashon negativo, kontrastando e desendientenan di esnan den e imágen di Dios na esnan den imágen di hende. I ta bou di influensia di e “yu muhénan di hende” ku e yunan hòmber di Dios “a tuma esposanan pa nan mes di tur esnan ku nan a skohe” (Gen. 6:2, NKJV), indikando e direkshon robes ku humanidat tabata bayendo.