Yakob-Israel

Ora el a bai for di Laban, pronto Yakob tabatin un otro eksperensia ku Dios. Sabiendo ku su ruman hòmber, Esou, ta biniendo, i ku “kuatershen hòmber” (Gen. 32:6), tambe, Yakob ta hasi orashon fervientemente na Señor, aunke el a rekonosé ku “ ‘Mi no ta meresé tur e kariño i fieldat ku Bo a demostrá mi’ ” (Gen. 32:10). Yakob, berdaderamente, tabata komprondiendo mihó di kiko grasia tabata trata.

I kon Señor a respondé?

Lesa Génesis 32:22–31 i Oseas 12:3, 4. Kiko ta e nifikashon spiritual di e storia asombroso akí?

Yakob ta angustiá, i esei ta komprendibel, pa loke tabata pasando i, despues di a hasi loke e por pa protegé su famia, e ta kampa pa e anochi. E ora ei, di ripiente, “un Hòmber” ta atak’é (Gen. 32:24). Esaki ta un tèrmino ku por tin implikashonnan spesial, ku ta invoká e presensia divino (lesa Isa. 53:3). Daniel a us’é pa referí na e saserdote selestial Miguel (Dan. 10:5); e tabata tambe e palabra usá pa Hosue pa deskribí e “Kapitan di e ehérsito di SEÑOR”, ken Hosue ta yama SEÑOR YHWH Mes (Hos. 5:13–15).

Enbèrdat, meimei di e luchamentu, mester a bira opvio pa Yakob ku e tabata luchando ku Dios Mes, manera su palabranan “ ‘Mi no ta laga bo bai si bo no bendishoná mi’ ” (Gen. 32:26) a revelá. Sinembargo, su pegamentu na Dios, su rechaso pa laga bai, tambe ta revelá su deseo pashoná pa pordon i pa ta bon ku Su Señor.

“E eror ku a hiba na Yakob su piká ora el a optené e primogenitura a traves di froude awor ta kla su dilanti. E no a konfia Dios Su promesanan, sino a purba pa medio di su propio esfuersonan pa logra loke Dios lo a logra den Su mes tempu i forma.”—Ellen G. White, Patriarchs and Prophets, p. 197, 198.

I e evidensia ku Dios a pordon’é tabata e kambio di su nòmber, for di e rekordatorio di su piká, te na un ku a konmemorá su viktoria. “E ora ei e hòmber a bis'é: ‘Lo bo no yama Yakob mas; pero Israel pasobra bo a lucha ku Dios i ku hende i bo a sali ganadó’ ” (Gen. 32:28).

For di Peniel, “e kara di Dios” (lesa Gen. 32:30), e lugá kaminda e tabatin e eksperensia akí ku Dios, Yakob ta move awor pa topa ku su ruman hòmber. Despues di 20 aña di separashon, Yakob ta mir’é biniendo huntu ku 400 hòmber (Gen. 33:1). Yakob ta preokupá, i p’esei e ta prepará su mes i su famia pa loke sea lo por a sosodé.

Lesa Génesis 33. Ki konekshon tin entre Yakob su eksperensia di mira e kara di Dios na Peniel i e eksperensia di Yakob di mira e kara di su ruman hòmber? Kiko ta e implikashon di e konekshon akí relashoná ku nos relashon ku Dios i nos relashon ku nos “rumannan hòmber”, ken sea nan por ta?

Yakob ta bùig shete bia dilanti di su ruman hòmber (Gen. 33:3) ken e ta yama vários bia “ ‘mi señor’ ” (Gen. 33:8, 13, 15, NKJV) i ta identifiká su mes komo su “ ‘sirbidó’ ” (Gen. 33:5; kompará ku Gen. 32:4, 18, 20, NKJV). Notablemente, Yakob su shete bùignan ta eko e shete bendishonnan di su tata (Gen. 27:27–29); ademas, ora e bùig, e ta anulá spesífikamente e bendishon di su tata, tokante “ ‘nashonnan [ku lo bùig] pa bo’ ” (Gen. 27:29).

Ta manera kos ku Yakob su intenshon tabata pa paga su debe na su ruman hòmber i duna e bendishon bèk ku el a hòrta for di dje (lesa Gen. 33:11). Ora Esou a mira su ruman hòmber, kontra tur espektativa, el a kore bai serka Yakob i, na lugá di mat’é, el “a sunch’e. Di alegria tur dos a yora” (Gen. 33:4).

Despues, Yakob a komentá na Esou: “ ‘Mira bo en persona ta pa mi, manera para kara kara ku Dios’ ” (Gen. 33:10). E rason pa e deklarashon ekstraordinario di Yakob ta su komprondementu ku Esou a pordon’é. E verbo hebreo ratsah, “kariño” (Gen. 33:10) ta un palabra teológiko ku ta referí na kualke sakrifisio ku ta “agradabel”, “aseptá” pa Dios, kua e ora ei ta impliká pordon divino (Lev. 22:27, Amos 5:22).

Yakob su eksperensia di e pordon di Dios na Peniel, kaminda el a mira e kara di Dios, awor ta ripití den su eksperensia di e pordon di su ruman hòmber, kua e ta identifiká manera kos ku el a mira e kara di Dios. Yakob ta biba un segundo Peniel, esun di promé preparando pa esun di dos. Dios, i su propio ruman hòmber, a pordoná Yakob. Realmente awor e mester a komprondé, ainda mas ku promé, e nifikashon di grasia.

Awor ku Yakob a rekonsiliá ku su ruman hòmber, e ker establesé den e tera di Kánaan na pas. E palabra shalem, “salvo” (Gen. 33:18), for di e palabra shalom, “pas”, pa promé bia ta karakterisá su biahe.

Despues di a kumpra un pida tera for di e habitantenan (Gen. 33:19), e ta lanta un altar einan, demostrando su fe i su realisashon tokante kon dependiente riba Señor e ta realmente. Pa kada un di e sakrifisionan ofresé, tabatin un akto di adorashon.

Sinembargo, pa promé bia den su bida, Yakob-Israel ta eksponé na e problemanan di stablesé den e tera. Meskos ku Isaak na Gerar huntu ku Abimelek (Gen. 26:1–33), Yakob ta purba haña akomodashon ku e kanaanitanan.

Lesa Génesis 34. Kiko a pasa pa konfundí su plannan di un eksistensia pasífiko?

E storia di e insidente baho akí ta enfatisá e ambigwedat di e personahenan i di nan akshonnan. E Shikem sensual, ku ta violá Dina, ta karakterisá tambe komo sinsero i ku ta stima Dina i ku ke purba hasi kambionan. E ta asta dispuesto pa pasa dor di e rito di pakto di sirkumsishon.

Mientrastantu, Simeon i Levi, ku ta presentá nan mes komo e defensornan di Dios i Su mandamentunan, i ku ta resistí matrimonio miksto ku e kanaanitanan (Lev. 19:29), ta akudí na mentiranan i engaño (Gen. 34:13) i ta kla pa mata i sakia (Gen. 34:25–27). Nan akshonnan no tabata solamente sensurabel (pa kiko no kastigá esun hòmber ku a hasié?) sino tabatin e potensial pa kousa hopi mas problema.

Pa loke ta trata Yakob, e ta preokupá solamente ku pas. Ora nan a reportá e violashon di su yu muhé na dje, e no ta bisa nada (Gen. 34:5). Sinembargo, despues ku el a tende tokante loke su yunan hòmber a hasi, e ta reprendé nan abiertamente pa motibu di loke por a sigui: “ ‘Boso a hinka mi den pèrtá. Awor e habitantenan di e lugá akí, e kanaanitanan i e perizitanan, lo haña rabia riba mi. Nan lo uni forsa i ataká mi, i komo nos ta muchu poko hòmber, nan lo mata ami i mi famia’ ” (Gen. 34:30).

Lesa Génesis 34:30–35:15. Ki lèsnan nos por saka tokante berdadero adorashon for di loke a sosodé aki?

Inmediatamente despues di Yakob su keho ku nan a komprometé su pas ku e kanaanitanan (Gen. 34:30), i despues ku nan a reprendé su dos yu hòmbernan (Gen. 34:31), Dios ta urgi Yakob pa bandoná Shikem i bai bèk na Betel pa asina renobá su pakto. En realidat, Señor ta bis’é ku, unabes e yega aya, e mester traha un altar.

Mientrastantu, e promé kos registrá despues di e mandato di Dios ta ku Yakob mester bisa su pueblo pa pone e ídolonan kanaanita un banda, ku nan a kue den e sakeo di e stat di Shikem i e diosnan di kas ku Raquel a hòrta (Gen. 31:19, 32). Tur esaki, tambe, ta krusial na e idea di e aliansa ku Dios.

Nan a tene e ídolonan akí i, probablemente, a adorá nan apesar di Yakob su kompromiso ku Dios. No tabata sufisiente pa Yakob bandoná Shikem pa asina skapa di e influensia kanaanita. Yakob mester a deshasí di e ídolonan denter di e kampamentu i den kurason di su pueblo.

E proseso di arepentimentu ta konsistí di mas ku un mudansa físiko di un lugá pa un otro, òf un mudansa di un iglesia pa un otro. Mas importante ainda, ta ku nos ta trata, pa grasia di Dios, pa saka e idolatria den nos kurason, apesar di unda nos ta biba, pasobra nos por traha ídolonan for di kasi kualke kos.

Ora Yakob obedesé Dios i sigui di akuerdo ku e mandato di Dios, Dios ta intervení finalmente i “e miedu di Dios” (Gen. 35:5) ta afektá tur e hendenan rònt di nan, i nan no ta riska ataká Yakob. Yakob, anto, ta kla pa adorá ku “tur e hendenan ku tabata serka dje” (Gen. 35:6), sugeriendo ku a restourá e unidat familiar. Yakob ta duna e lugá akí e nòmber El Bethel, un rekordatorio di su soño di e trapi, un señal ku awor a restourá e rekonekshon entre shelu i tera, kua tabata kibrá pa algun tempu.

E énfasis ta, e bia akí, riba e Dios di Betel mas bien ku riba e lugá mes. E nota personal akí ta resoná atrobe, ora Dios ta kòrda Yakob riba su nòmber “Israel” (Gen. 35:10), ku e promesa dòbel ku su bendishon ta impliká. E bendishon di Yakob, na promé lugá, ta nifiká fertilidat, e transmishon di e simia mesiániko i e generashon di hopi nashon (Gen. 35:11); i na di dos lugá, e ta mustra na e Tera Primintí (Gen. 35:12).

Lesa Génesis 35:15–29. Ki otro aflikshonnan Yakob a enfrentá denter di su famia disfunshonal?

Tan pronto ku Yakob bandoná Betel, tres insidente relashoná ku otro ta marka e último paso di su biahe den direkshon di e Tera Primintí: e último yu hòmber di Yakob a nase; Raquel a muri; i Ruben, Yakob su promé yu hòmber ku Lea, a drumi ku Yakob su konkubina. Aunke e teksto no ta bisa dikon e hóben lo a hasi algu asina malu, por tabata ku e tabata ke, di un manera òf otro, mancha e nasementu di Yakob su último yu hòmber i pa humiá e memoria di Raquel. Simplemente nos no sa.

E nasementu di Yakob su último yu hòmber ta konektá na Betlehèm (Gen. 35:19), kua ta denter di e fronteranan di e Tera Primintí. E nasementu akí, anto, ta e promé kumplimentu di Dios Su promesa pa e futuro di Israel. E partera, profétikamente, ta dirigí su mes na Raquel ku e mes palabranan ku Dios a usa pa trankilisá Abraham: “ ‘No tene miedu’ ” (Gen. 35:17, kompará ku Gen. 15;1).

Konsiderablemente, Yakob ta kambia e nòmber ku e Raquel ku tabata muriendo a duna su yu hòmber, Bèn-Oni, ku ta nifiká “yu di mi tristesa”, pa indiká su doló, den Benhamin, ku ta nifiká “yu di e man drechi”, kisas pa impliká e direkshon di sùit pa asina ekspresá su speransa den e Tera Primintí i tur loke Dios a bisa ku E lo a hasi pa Su pueblo despues ku nan a establesé aya.

Sinembargo, durante e tempu akí Ruben tabatin relashonnan seksual ku Bilha, konkubina di su tata i tambe Raquel su kriá (Gen. 35:25, Gen. 30:3). Nos no sa dikon el a hasi e akto skandaloso akí, si no ta komo un otro ehèmpel di perversidat humano.

Asombrosamente, Yakob no ta reakshoná riba e violashon horibel akí, aunke nan a bis’é di esaki (Gen. 35:22). Kisas na e punto akí den su bida, Yakob ta konfia Dios ku E lo kumpli ku Su palabra apesar di e piká i maldat ku tin bia ta sosodé rònt di dje.

Ta e lès eksakto akí di fe ku ta impliká den e lista di Yakob su 12 yunan hòmber, ku lo ta e antepasadonan di Israel (Gen. 35:22–26). No e hendenan di mas dushi i di mas amabel, manera nos lo mira. Sinembargo, apesar di tur e problemanan, tur e disfunshon, asta maldat total, manera Ruben ku Bilha, e boluntat di Dios tabata bai kumpli a traves di e famia akí, no importá kon desordená e famia akí tabata realmente.