Lès 3

*9–15 di yüli

E Kouchi di Para

Sabat 9 di yüli

Lesa pa e Estudio di e Siman Akí:

Eksodo 14; Eks. 15:22–27; Eks. 17:1–7; Proverbionan 3; Lukas 4:1–13; 1 Pe. 1:6–9.

Teksto di Memoria:

“Den esaki boso ta regosihá grandemente, ounke ku awor pa un tempu kòrtiku, si ta nesesario, boso a wòrdu afligí pa medio di varios prueba” (1 Pedro 1:6).

Den e pleno lus di dia, i den tendementu di e músika di otro bosnan, e para den kouchi lo no kanta e kantika ku su doño ta trata na siñ’é. E ta siña un pik di esaki, un trel di esaya, pero nunka un melodia separá i kompletu. Pero e doño ta tapa e kouchi, i ta pon’é kaminda e para lo skucha esun kantika ku e mester kanta. Den sukú, e ta purba i bolbe purba kanta e kantika ei te ora e para siñ’é, i e kuminsá den perfekto melodia. E ora ei e ta saka e para, i pa semper despues e por kanta e kantika ei den lus. Asina Dios ta trata ku Su yunan. E tin un kantika pa siña nos, i ora nos a siñ’é meimei di e sombranan di aflikshon, nos por kant’é semper despues di esei.”—Ellen G. White, The Ministry of Healing, p. 472.

Nota ku esun ku ta hiba e para den skuridat ta e doño mes.

Ta fásil pa komprondé ku Satanas ta kousa doló, pero Dios Mes lo a tuma parti aktivamente den hiba nos den krisolnan kaminda nos ta eksperensiá konfushon òf doló?

Un Bista Riba e Siman:

Ki ehèmpelnan bo por pensa riba dje den Beibel den kua Dios Mes ta hiba hende den eksperensianan ku E sa ku lo inkluí sufrimentu? Kiko bo ta kere tabata e kantikanan nobo ku E tabata ke pa nan kanta?

*Studia e lès di e siman akí pa prepará pa Sabat, 16 di yüli.

Djadumingu

10 di yüli

Na e Tera Primintí via un Kaya Sin Salida

“I ora Farao a yega serka, e yunan di Israel a hisa kara wak, i mira, e egipsionan tabata marcha bin nan tras, i nan a spanta mashá, i e yunan di Israel a sklama na SEÑOR.” (Eks. 14:10).

Hende a yega di hiba bo den un trampa òf na un kaya sin salida? Tin biaha e por ta agradabel, manera kana drenta ònferwagt den un kamber ku amigunan wardando, ku tur ta grita “Sorpresa! Pabien!” Otro biahanan por ta un shòk, asta unu hopi desagradabel. E por tabata tentadónan ora bo tabata na skol, òf un kolega di trabou ku inesperadamente a purba laga bo keda malu.

For di e dia ku e israelitanan a bandoná Egipto te ora nan a yega na e Tera Primintí, “I di dia SEÑOR tabata bai nan dilanti den un pilar di nubia pa guia nan riba kaminda, i anochi den un pilar di kandela pa duna nan lus, pa nan por a biaha di dia i anochi.” (Eks. 13:21). Dios Mes tabata guia tur parti di e biaha. Pero wak na unda El a hiba nan promé: na un lugá kaminda laman tabata nan dilanti, serunan tabata na kada banda, i e ehérsito di fárao tabata denter di bista nèt nan tras!

Lesa Eksodo 14. Dikon Dios ta trese e israelitanan na un lugá kaminda E tabata sa ku nan lo tabata morto spantá?

Siguiendo “e pilá” no ta sigurá nos di ta felis henter ora. E por ta tambe un eksperensia duru, pasobra training den hustisia ta hiba nos na lugánan ku ta tèst nos kurason, kua ta asina engañoso di naturalesa (Yer. 17: 9). Durante e difikultatnan akí, e klave pa sa ki ora nos ta siguiendo Dios berdaderamente no ta nesesariamente e ousensia di pruebanan òf doló sino, mas bien, un frankesa na Dios Su instrukshon i un sumishon kontinuo di nos mente i kurason na Su guiansa.

Ki lès e israelitanan a siña for di e eksperensia akí? Eks. 14:31

Dikon tin biaha konfia Dios ta asina difísil, aunke nos por konosé hopi di e promesanan maravioso ku E tin pa nos? Menshoná algun situashon difísil ku bo ta kere Señor a hiba bo den dje pa asina siña bo “kere” den djE i “tem’E”.

Djaluna

11 di yüli

Awanan Marga

“E ora ei henter e kongregashon di e yunan di Israel a sigui biaha di un lugá pa otro bai for di e desierto di Sin, segun e òrdu di SEÑOR, i nan a kampa na Refidim; ma no tabatin awa pa e pueblo bebe.” (Eks. 17:1).

Kisas nos lo no por haña for di Dios tur kos ku nos ke, pero nos lo no por spera di haña tur loke nos mester? No loke nos ta kere ku nos mester sino loke nos mester berdaderamente?

Tabatin un kos ku e israelitanan siguramente tabatin mester, i esei tabata awa. Djis despues ku Dios den e nubia a guia e israelitanan dor di Laman Kòrá, nan a siguiE a traves di e desierto kayente i sin awa pa tres dia. Partikularmente den desierto, kaminda haña awa ta asina krítiko, nan desesperashon ta komprendibel. Ki ora nan lo a haña e awa ku nan tabatin mester?

Asina anto, na unda Dios a hiba nan? E pilá ta bai Mara, kaminda, por lo ménos, tin awa. Nan mester tabata eksitá. Pero ora nan a purba e awa, nan a skupié afó inmediatamente pasobra e tabata marga. “I e pueblo tabata murmurá kontra Moisés, bisando: 'Kiko nos mester bebe?’ ” (Eks. 15:24).

Despues, un par di dia mas despues, Dios ta bolbe hasié. E biaha akí, sinembargo, e pilá realmente ta para kaminda no tabatin awa ètòl (Eks. 17:1).

Lesa Eksodo 15:22–27 i Eksodo 17:1–7. Kiko Dios a revelá na Israel tokante E mes na Mara i na Refidim? Ki lèsnan nan mester a siña?

Na Refidim, ki pregunta e yunan di Israel a hasi? Eks. 17:7. Bo a yega di hasi e mesun pregunta? Si ta asina, dikon? Kon bo a sinti, i ki lèsnan bo a siña despues ku bo a hañ’é kontestá? Kuantu biaha nos mester hañ’é kontestá promé ku nos stòp totalmente di puntr’é?

Djamars

12 di yüli

E Gran Kontroversia den Desierto

“I Jesus, yen di Spiritu Santu, a bolbe for di Jordan i a wòrdu hibá dor di e Spiritu den desierto pa kuarenta dia, i El a wòrdu tentá dor di diabel. I E no a kome nada durante di e dianan ei; i ora ku e dianan a pasa, El a haña hamber.” (Lukas 4:1,2).

Lesa Lukas 4:1–13. Ki lèsnan bo por siña for di e relato akí tokante kon vense tentashon i no sede na piká?

Tentashonnan por ta asina difísil pasobra nan ta apelá na kosnan ku nos ta deseá realmente, i nan ta parse di ta bin semper na nos momentonan di mas débil.

Lukas 4 ta prinsipio di e storia di Hesus Su tentashon pa Satanas, i e ta trese algun asuntunan difísil na nos atenshon. Na promé bista, ta parse manera Spiritu Santu ta hibando Hesus den tentashon. Sinembargo, Dios nunka ta tenta nos (Sant. 1:13). Mas bien, manera nos a bin ta mira, Dios ta guia nos na krisolnan di tèstmentu. Loke ta notabel den Lukas 4 ta ku Spiritu Santu por guia nos na momentonan di tèstmentu ku ta envolví ku ta eksponé nos na Satanas su tentashonnan fuerte. Na momentonan asina, nos ta sinti e tentashonnan akí asina fuerte, ku nos por mal komprondé i pensa ku nos no a bin ta sigui Dios korektamente. Pero esaki no ta nesesariamente bèrdat. “Hopi biaha ora pone nos den un posishon di prueba, nos ta duda ku e Spiritu di Dios tabata guia nos. Pero tabata e guiansa di e Spiritu ku a trese Hesus den desierto pa Satanas tent’E. Ora Dios trese nos den prueba, E tin un propósito pa kumpli pa nos bon. Hesus no a presumí riba Dios Su promesanan dor di bai sin pidi den tentashon, ni E no a entregá na deskurashamentu ora tentashon a bin riba djE. Nos tampoko no mester hasi esei.”—Ellen G. White, The Desire of Ages, p. 126, 129.

Tin biaha, ora nos ta den e krisol, nos ta kima mas bien ku purifiká. Ta p’esei ta di hopi konsuelo pa sa ku ora nos ta machiká bou di tentashon, nos por spera atrobe pasobra Hesus a para firme. E bon notisia ta ku pasobra Hesus ta nos Kargadó di Piká, pasobra El a paga e kastigu pa nos fayo pa soportá e tentashon ei (loke sea e tabata), pasobra El a pasa dor di un krisol pió ku kualke un di nos hamas lo enfrentá, Dios no ta tira nos afó òf bandoná nos. Tin speransa, asta pa e “hefe” di pekadornan (1 Tim. 1:15).

Ki tentashonnan bo ta enfrentando awor? Pasa algun tempu den orashon, puntrando Señor pa siña bo kon apliká e lèsnan for di Hesus Su ehèmpel den bo propio bida. Kòrda, bo no tin ku sukumbí na tentashon, hamas! Kòrda, tambe, ku si bo sukumbí mes, bo tin un Salbador.

Djárason

13 di yüli

Un Herensia Duradero

Lesa 1 Pedro 1:6,7. Kiko Pedro ta bisando?

Pedro ta skirbiendo na hendenan ku tabata batayando a traves di difikultatnan i hopi biaha tabata sinti nan mes hopi so. E tabata skirbiendo “pa esnan skohí pa Dios, strañero den e mundu akí, i ku ta biba plamá rònt e provinsianan di Ponto, Galasia, Kapadosia, Asia i Bitunia” (1 Pe. 1:1). Esaki ta e área ku nos konosé awe komo Turkia oksidental. Un par di versíkulo despues, Pedro ta bisa ku e sa ku nan ta eksperensiando “tristesa pa motibu di tur sorto di prueba” (1 Pe. 1:6).

Kiko Pedro ke men ora e bisa ku nan ta “eksiliadonan” i “plamá”? Kon esei lo por añadí na nan pruebanan?

Siendo un kristian durante e tempunan ei tabata un kos nobo; kreyentenan tabata chikitu na kantidat i den vários lugá kaminda nan tabata un minoria disidí ku hopi biaha tabata komprondé nan malu, den e mihó kaso, i persiguí den e kaso di mas serio. Pedro ta sigurá nan, sinembargo, ku e pruebanan akí no ta kasualidat òf kaótiko (1 Pe. 1:6,7). Fe genuino ta e meta di esnan ku perseverá a traves di “tur tipo di prueba”.

Lesa 1 Pedro 1:6–9. Ki último siguransa Pedro ta purba duna e hendenan akí meimei di nan pruebanan? Kiko e speransa akí ta nifiká pa nos tambe?

Loke sea nan pruebanan tabata, loke sea nan tabata sufri, kon por kompar’é ku e eternidat ku ta spera nan ora Kristu bin bèk? E palabranan di Pedro na nan ta Dios Su palabranan na nos, apesar di loke sea nos ta enfrentando. Maske kon difísil òf doloroso nos pruebanan ta, nos no mester pèrdè nunka for di bista e final, bida eterno den un shelu nobo i tera nobo, sin doló, sufrimentu, òf morto. Ku un promesa asina nos dilanti, un promesa garantisá na nos a traves di e morto di Hesus, kon importante ta pa nos no pèrdè fe, sino en kambio, meimei di nos pruebanan, pidi Señor pa limpia nos di tur kos i kualke kos ku ta para den kaminda di nos fe.

Djaweps

14 di yüli

Prueba pa Kandela

Tabatin un hóben ku nos lo yama Alex. El a bin di un hubentut hopi problemátiko: droga, violensia, asta algun tempu den prizòn. Pero despues, pa medio di e amabilidat di un miembro di iglesia lokal (ku Alex a hòrta for di dje), Alex a haña sa tokante Dios i a duna su kurason na Hesus. Aunke ainda e tabatin su problemanan i luchanan, i aunke elementonan di su pasado ainda tabata kologá, Alex tabata un persona nobo den Hesus. E tabata stima Dios i tabata trata di ekspresá e amor ei dor di obedesé Su mandamentunan (1 Juan 5:1,2). Na un dado momento Alex a sinti su mes impreshoná ku e mester bira un pastor. Tur kos tabata mustra na esei. E tabata kontestando e yamada di Dios, no tabatin duda tokante esei.

Na universidat kosnan tabata bai bon na prinsipio. Despues un kos tras di otro a bai robes, i su bida a kuminsá kai den otro. Su fuente di plaka a kuminsá seka; un amigu será a bira kontra dje, hasiendo akusashonnan tokante dje ku tabata falsu pero ku a daña su reputashon. Despues, el a keda ta bira malu; niun hende tabata sa kiko e ta, pero el a impaktá su estudionan te na e punto kaminda e tabatin miedu ku e tabata bai tin ku kita skol kompletamente. Riba tur esaki, e tabata bringando tentashonnan fuerte ku droga, kua tabata fásilmente disponibel den e komunidat lokal. Na un punto el a asta kai den e área ei. Alex no por a komprondé dikon tur esaki tabata pasando, spesialmente pasobra e tabata sigur ku Señor a gui’é na e skol akí, pa kuminsá. Alex tabata robes tokante esei? Si ta asina, henter su eksperensia ku Dios tabata un eror grandi? Asta e elementonan di mas básiko di su fe tabata bin bou di duda.

Imaginá bo ku, meimei di e krísis akí, Alex bin serka bo i pidi pa konseho. Kiko lo bo a bisa? Ki eksperensianan di bo mes bo tabatin ku lo por yuda un hende manera e? Ki versíkulonan di Beibel lo bo por usa? Kon útil e siguiente versíkulonan lo por ta den un situashon asina? Proverbionan 3, Yer. 29: 13, Rom. 8: 28, 2 Kor. 12: 9, Hebr. 13: 5.

Kasi tur hende ku ta sigui Señor a yega di tin krísisnan durante kua a tenta nan pa duda e guiansa di Señor. E kos importante den situashonnan asina ta pa gara na e promesanan, rekordá Dios Su guiansa den pasado, i hasi orashon pa fe i perseveransia. Señor nunka lo bandoná nos. E pregunta pa nos ta: Kon nos no ta sukumbí na e tentashon di bandon’E?

Djabièrnè

15 di yüli

Mas Estudio:

Lesa Ellen G. White, “The Exodus,” p. 281–290; “From the Red Sea to Sinai,” p. 291-302, den Patriarchs and Prophets; “The Temptation,” p. 114–123, den The Desire of Ages.

Di tempunan bieu Señor a guia Su pueblo na Refidim, i E por skohe pa guia nos einan tambe, pa tèst nos lealtat. No semper E ta hiba nos na lugánan plasentero. Si E tabata hasi esei, den nos dependensia propio nos lo a lubidá ku E ta nos yudadó. E ta anhelá pa manifestá Su mes na nos, i pa revelá e suministronan abundante na nos disposishon, i E ta permití pruebanan i desapunto bin na nos pa nos por realisá nos impotensia, i siña yama riba djE pa ayudo. E por pone riunan refreskante kore for di e baranka di kandela. Nos lo no sa nunka, te ora nos ta kara kara ku Dios, ora nos lo mira manera ta mira nos, i konosé manera konosé nos, kuantu karga El a karga pa nos, i kuantu karga E lo tabata kontentu pa karga, si, ku fe manera di un mucha, nos a trese nan p’E.”—Ellen G. White, “Rephidim,” Advent Review and Sabbath Herald, 7 di aprel 1903.

Preguntanan pa Diskushon:

pregunta 1 Nos ta papia hopi biaha di tentashon komo un kos individual, kua, naturalmente, e ta. Na mes momento, tin kualke tentashon kolektivo, kosnan ku nos komo iglesia òf un famia di iglesia lokal kisas mester warda nos mes kontra dje komo grupo? Si ta asina, kiko?

pregunta 1 Pidi esnan ku ta dispuesto pa papia tokante kualke di e “lugánan desagradabel” ku a hiba nan na dje. Dikon esakinan tabata desagradabel? Si nan mester a bolbe bishitá e eksperensianan ei awe, nan lo a mira nan di algun forma diferente?

pregunta 1 Nos tur ta komprondé e prinsipio tras di ku Dios ta permití pruebanan purifiká i refiná nos. Kon, sinembargo, nos ta komprondé e situashon den kua pruebanan ta parse di no tin balor, por ehèmpel, un hende a muri instantáneamente den un aksidente di outo? Komo klas, purba bin ku posibel kontestanan.

pregunta 1 Komo klas, tuma tempu huntu pa resa un pa otro, pa kada un por haña fortalesa pa soportá pruebanan i keda fiel.

pregunta 5 Bo klas konosé kualke hende ku, despues di a enfrentá pruebanan, a pèrdè e kaminda? Si ta asina, kiko boso por hasi komo klas, den un forma hopi tangibel, pa yuda guia e persona ei bèk?