Lès 9

*20 – 26 di ougùstùs

Un Bida di Alabansa

Sabat 20 di ougùstùs

Lesa pa e Estudio di e Siman Akí:

Fil. 4:4–7; Hos. 5:13–6:20; Salmo 145; Echonan 16:16–34; 2 Kron. 20:1–30.

Teksto di Memoria:

"Regosihá den Señor semper; atrobe lo mi bisa, regosihá!" (Filipensenan 4:4, NKJV).

Semper ta fásil pa grita ku goso na Señor ora nos ta sinti goso. No ta asina fásil, sinembargo, ora kosnan ta malu, ora nos ta den e situashonnan di mas malu posibel, ora e krisol keinta. Tòg, e ta presisamente e ora ei e loke nos tin mester, kisas mas ku nunka, pa alabá Dios, pasobra alabansa ta un medio di yuda nos sostené fe.

Enbèrdat, alabansa por transformá asta nos sirkunstansianan di mas skur, kisas no den sentido ku e ta kambia e echonan rònt di nos, ma den sentido ku e por kambia nos, i esnan rònt di nos, di un forma ku ta yuda nos enfrentá desafionan.

Alabansa ta fe den akshon. Kisas no semper e ta natural pa nos, pero ora nos praktiká alabansa pa asina e bira un parti natural di nos bida, e tin poder pa tantu kombertí komo konkistá.

Un Bista Riba e Siman:

Kiko ta alabansa? Kon alabansa lo por ta un arma spiritual asina poderoso den sirkunstansianan difísil? Kon alabansa por transformá nos i e situashon rònt di nos?

*Studia e lès di e siman akí pa prepará pa Sabat, 27 di ougùstùs.

Djadumingu

21 di ougùstùs

Kader pa Alabansa

Nan a sentensiá e gran eskritor ruso Fyodor Dostoyevski na morto, solamente pa kambia e sentensia na último momento. El a pasa añanan den prizòn en kambio. Papiando tokante su eksperensia di prizòn, el a skirbi: “Kere te na fin, asta si tur hende dual i bo a keda e úniko fiel; trese bo ofrenda asta e ora ei i alabá Dios den bo soledat.”

Den e lèsnan akí ya nos a mira kon Pablo a soportá oposishon i persekushon inkreibel. Pero awor e ta sintando den un prizòn romano. I tòg e no ta depresivo; en kambio, e ta skirbiendo ku anhelo pa kurashá e kreyentenan na Filipo.

Lesa Filipensenan 4:4–7. Kon bo ta kere ku Pablo lo por a skirbi kosnan asina ora e mes tabata sintando den un prizòn? Den e pasashi akí, kiko ta e klavenan pa haña e “pas di Dios”?

Ta un kos pa alegrá ora tur kos ta bayendo bon. Pero Pablo ta atvertí nos pa alegrá semper. Esei por zona straño. Si nos tuma loke Pablo ta skirbi literalmente, tin dos implikashon krítiko pa nos.

Di promé, si nos mester alegrá semper, e mester nifiká ku nos mester alegrá asta ora sirkunstansianan no ta parse di ta duna nos kualke rason pa alegrá. Di dos, si nos mester alegrá semper, e mester nifiká tambe ku nos mester bai siña alegrá na momentonan ku nos no tin gana.

Pablo ta yamando nos pa alabá Dios aunke hopi bia por parse bastante innatural pa nos. E por asta parse irashonal. Pero manera nos lo mira, ta presisamente pasobra tin momentonan ora e ta parse irashonal ku ta yama nos pa alegrá. Den otro palabra, alabansa ta un akto di fe. Meskos ku fe ta basá no riba nos sirkunstansianan sino mas bien riba e bèrdat tokante Dios, asina alabansa ta algu ku nos ta hasi, no pasobra nos ta sinti bon, sino pa motibu di e bèrdat di ken Dios ta i loke El a primintí nos. I asombrosamente, ta un fe asina ku ta kuminsá forma nos pensamentunan, sintimentunan, i sirkunstansianan.

Kiko ta e bèrdat tokante Dios ku Pablo ta identifiká den e pasashi di awe, bèrdat ku ta kapasitá nos pa alegrá, asta den prizòn? Skirbi un lista kòrtiku di loke bo sa ku ta e bèrdat tokante Dios. Pasa dor di e lista i alabá Dios pa kada item. Kon esaki ta kambia e manera ku bo ta sinti tokante i ta mira bo sirkunstansianan?

Djaluna

22 di ougùstùs

Basha Murayanan Abou Resando

Tin un ekspreshon na papiamentu: “hinká den un huki”. Imaginá bo ta fèrf e flur di un kamber pero ta realisá e ora ei ku bo a resultá den un huki i no por Sali, eksepto dor di kana riba e fèrf fresku. Bo tin ku keda einan te ora e seka!

Tin bia ta parse ku nos fe ta hinka nos den un huki. Nos ta yega na un situashon, i, meskos ku e fèrf muhá riba flur, nos fe ta “kue nos den trampa”. Nos ta wak e situashon, i sea nos tin ku rechasá Dios, fe, i tur kos ku nos a kere aden, òf nos fe ta obligá nos pa kere loke ta parse imposibel.

Dios a trese e israelitanan den un huki. Despues ku nan a dual pa 40 aña den desierto, Dios no a guia Su pueblo na lugánan di yerba bèrdè pasífiko i bashí. Dios a hiba nan na un di e statnan mas fuerte fortifiká di den henter e área. Despues nan mester a kana rònt di Yeriko den silensio pa seis dia. Riba e di shete dia Dios a bisa nan pa grita, i e gritamentu ei, huntu ku e trompètnan, lo a trese viktoria.

Lesa Yozue 5:13–6:20. Kiko Dios ta tratando di siña e israelitanan?

Grita duru no tabata bai kousa vibrashonnan pa provoká e murayanan pa kolèps. Ora Dios a yama e israelitanan pa “grita”, tabata e mesun gritamentu ku David ta skirbi di dje den Salmo 66: “Grita di alegria na Dios, mundu henter; kanta e gloria di Su nòmber; hasi Su alabansa glorioso.” (Salmo 66:1,2, NIV). E gritamentu akí tabata alabansa! Despues di seis dia di wak e murayanan enorme, nan mester a konkluí ku nan no tabatin un chèns di basha nan abou nan mes.

Kon e idea akí ta yuda nos komprondé e nifikashon di Hebreonan 11:30?

Ora Dios ta na punto di hasi algu nobo den nos bida, E por trese nos na un Yeriko, pasobra E por tin mester di siña nos ku e poder pa triunfá no ta bin den nos mes forsa i strategianan. Tur loke nos mester ta bin for di pafó di nos mes. Asina, no importá kiko tin nos dilanti, no importá kon insuperabel e por parse, nos ròl ta pa alabá Dios, e fuente di tur loke nos mester. Esaki ta fe den akshon.

Djamars

23 di ougùstùs

E Bida di Alabansa

Alabá Señor kisas no por ta natural pa nos, asta den sirkunstansianan bon. Pues, kuantu mas difísil pa hasié den esnan malu? Sinembargo, Ta esei ta loke nos ta yamá pa hasi. Alabansa ta algu ku nos mester praktiká te ora e kambia di ta un aktividat hasí na un momento partikular na un atmósfera den kua nos ta biba. Alabansa no mester ta tantu un akto spesífiko sino un forma spesífiko di bida mes.

Lesa Salmo 145. Kiko ta e motibunan ku David ta duna pa alabá Dios? Den ki formanan e palabranan di e salmo akí lo mester ta propio di bo?

E gran predikador britániko Charles Haddon Spurgeon a skirbi un buki yamá The Practice of Praise. E ta basá riba versíkulo 7 di e salmo di awe. Den e versíkulo kòrtiku akí, Spurgeon ta yama nos atenshon na tres kos importante ku por yuda den desaroyá alabansa den nos bida.

Nos ta praktiká alabansa ora nos wak rònt di nos. Si nos no wak rònt di nos pa mira e grandesa di Dios, nos lo no tin motibu pa alab’E. Kiko bo por mira den e mundu kreá ku ta digno di alabansa, manera e bunitesa di Dios su kreashon? Kiko bo por mira den e mundu spiritual ku ta digno di alabansa, manera e fe kresiente den un kristian hóben?
Nos ta praktiká alabansa ora nos kòrda loke nos a mira. Si nos ke biba den un atmósfera di alabansa, nos mester ta kapas pa kòrda e rason p’e. Den ki formanan nos por kòrda e gran kosnan tokante Dios (manera dor di desaroyá ritualnan òf símbolonan nobo ku ta kòrda nos riba Su bondat), pa asina Su bondat i e bèrdat tokante djE no slep for di nos mente?
Nos ta praktiká alabansa ora nos ta papia di dje. Alabansa no ta algu ku nos ta hasi den nos kabes. Ta e intenshon pa e sali for di nos boka, pa esnan rònt di nos tend’é. Ki motibunan bo por pensa pa alabá Dios verbalmente? Kiko e efekto di un alabansa asina lo ta, i riba ken?

Kue un pèn i papel i pasa algun tempu traha a traves di e tres puntonan akí. Kiko bo por hasi pa desaroyá e kustumber di alabansa den bo bida?

Djárason

24 di ougùstùs

Un Testigu Ku ta Konvensé

Den e buki di Echonan, alabansa tabatin un efekto asombroso riba esnan ku tabata tend’é. Lesa Echonan 16: 16–34. Despues ku nan a sker nan paña kita for di nan kurpa i a bati nan duru, nan a tira Pablo i Silas den prizòn. No tabatin niun hende einan pa pone ungwento riba nan lombanan ku tabata mal kòrtá i gòlpiá. Den gran doló físiko i ku nan pianan den blòki, nan a pone nan den e skuridat di e parti di mas paden di e prizòn. Pero miéntras e otro prizoneronan tabata sinta ta skucha, Pablo i Silas a kuminsá hasi orashon i kanta.

Despues di e teremoto, i despues ku e wardadó di prezu a deskubrí ku ni Pablo ni Silas ni niun di e otro prizoneronan a skapa, “temblando di miedu, el a tira su kurpa abou dilanti di Pablo i Silas, i despues ku el a hiba nan pafó, el a bisa: "Señornan, kiko mi mester hasi pa ta salbá?” (Echonan 16:29,30, NIV).

Dikon e evento akí a pone e wardadó di prezu focus riba su propio nesesidat di salbashon? Ki ròl bo ta kere ku e orashonnan i kantikanan di Pablo i Silas a hunga den e echo ku e prizoneronan no a kore bai, i den e kombershon di e hòmber akí i henter su famia?

Ta asombroso pa pensa ku nos alabansa por transformá e destinonan eterno di esnan rònt di nos. Si Pablo i Silas a sinta den sukú murmurando i kehando manera prizoneronan ta hasi hopi bia, bo ta kere ku kualke hende lo a salba e anochi ei?

Nos no sa kiko a sosodé ku e wardadó di prezu i su famia mas despues, pero bo por imaginá bo ku nan ta lesando e palabranan ku Pablo a skirbi despues for di un otro prizòn na Roma: “Pasobra na boso esaki a ser duná pa kousa di Kristo, no solamente pa kere den djE, ma tambe pa sufri pa Su motibu, ya ku boso ta pasando dor di e mesun lucha ku boso a mira den mi, i awor ta tende ku ta den mi.” (Fil. 1:29,30, NIV). Si nan a lesa esaki i a reflekshoná riba kon Pablo su sufrimentu a trese goso pa nan, siguramente e mester a trese un kantika riba nan kurason i un desafio fresku pa keda fiel, no importá e preis.

Ken bo ta kere lo por a wòrdu influensiá pa Dios a traves di un kantika di alabansa, ku lo por a bin for di bo kurason? Hasi un esfuerso kordiná pa ta mas habrí i entusiasmá den bo alabansa na Dios rondó di otronan. Bo no sa e efekto positivo ku e lo por tin.

Djaweps

25 di ougùstùs

Un Arma Ku ta Konkistá

Lesa 2 Krónikanan 20:1–30. Manera Yoshafat a deskubrí, alabansa ta un arma poderoso. Despues di a risibí e rapòrt ku un “ehérsito grandi” tabata biniendo kontra dje, Yoshafat no a bula den akshon militar inmediatamente, sino “... i a disidí di buska SEÑOR ...” (2 Kron. 20:3, NIV). Ora e pueblo di Huda a bin Herusalèm pa un ayuno, Yoshafat a atmití e realidat di e situashon, bisando ku “... nos ta sin forsa dilanti di e multitut grandi aki ku ta bini kontra nos; ni nos no sa kiko pa hasi, ma nos wowo ta riba Bo” (2 Kron. 20:12, NIV).

Ora bo mira un “ehérsito grandi” ta aserkando, kiko ta bo reakshon instintivo? For di Yoshafat su reakshon den 2 Krónikanan 20:3–12, kiko bo por siña tokante dil ku oposishon aplastante?

Ora e Spiritu di Señor a bin riba Yahaziel, el a anunsiá sin miedu: “Boso no tin mester di bringa den e bataya aki; stashoná boso mes, para i mira e salbashon di SEÑOR na boso fabor, O Juda i Jerusalèm. No tene miedu ni desmayá; sali mañan pa enfrentá nan, pasobra SEÑOR ta ku boso.” (2 Kron. 20:17, NIV). Despues di esei, nan a adorá Dios i a kanta alabansanan na djE “na bos masha fuerte mes” (2 Chron. 20:19, NIV). Aunke Dios tabata bai bringa pa nan, ainda nan mester a sali bai ba enfrentá e enemigu.

Pero esaki no tabata un marcha ordinario pa guera. Yoshafat a apuntá un koro pa kanta alabansanan na Señor segun ku nan tabata marcha sali bai. “I ora nan a kuminsá kanta i alabá, SEÑOR a prepará atakenan di sorpresa kontra e yu hòmbernan di Amon, Moab i Seru Seir, kendenan a bin kontra Juda; asina nan a wòrdu derotá.” (2 Kron. 20:22, NIV). Di akuerdo ku e outor, Dios a intervení na mes momento ku nan a ehersé nan fe den Su promesa, miéntras nan a kuminsá “... alab'E bistí na paña santu” (2 Kron. 20:21, NIV).

Lesa 2 Krónikanan 20:1–30 atrobe. Ki prinsipionan spiritual bo por haña ku por apliká na bo propio relashon ku Dios, spesialmente den tempunan di prueba i strès?

Djabièrnè

26 di ougùstùs

Mas Estudio:

Lesa Ellen G. White, “Jehoshaphat,” p. 190–203, den Prophets and Kings; “The Fall of Jericho,” p. 487–498, den Patriarchs and Prophets.

“E ora ei, laga nos eduká nos kurason i lepnan pa papia e alabansa di Dios pa Su amor inkomparabel. Laga nos eduká nos almanan pa ta yen di speransa i pa keda den e lus ku ta bria for di e krus di Kalvario. Nos no mester lubidá nunka ku nos ta yunan di e Rei selestial, yunan hòmber i muhé di e Señor di ehérsitonan. Ta nos privilegio pa mantené un deskanso kalmu den Dios.”—Ellen G. White, The Ministry of Healing, p. 253.

“I miéntras mi ta adorá i engrandes’E, mi ke pa bo engrandes’é huntu ku mi. Alabá Señor asta ora bo kai den skuridat. Alab’E asta den tentashon. ‘Keda semper kontentu den Señor,’ e apòstel ta bisa, ‘Mi ta ripití: Keda kontentu!’ Esei lo trese melankolia i skuridat den bo famianan? Nò, enbèrdat; e lo trese un rayo di solo. Por lo tantu, lo bo reuní rayonan di lus eterno for di e trono di gloria i plama nan rònt di bo. Laga mi kurashá bo pa okupá bo mes ku e trabou akí, plama e lus akí i bida rònt di bo, no solamente den bo mes kaminda, ma den e kamindanan di esnan ku ken bo ta asosiá. Lag’e ta bo opheto pa hasi esnan rònt di bo mihó, pa elevá nan, pa mustra nan na shelu i gloria, i guia nan pa buska, riba tur kos terenal, e sustansia eterno, e herensia inmortal, e rikesanan ku ta indestruktibel.”—Ellen G. White, Testimonies for the Church, tomo 2, p. 593, 594.

Preguntanan pa Diskushon:

pregunta 1 Ki ròl alabansa di komunidat tin den bida di e kristian? Kon lo bo a deskribí e alabansa den boso sirbishinan di Sabat? E ta elevador? E ta kurashá miembronan pa mantené fieldat meimei di prueba i trouma? Si no ta asina, kiko por hasi?

pregunta 2 Kiko ta nifiká “alabá Señor asta ora bo kai den skuridat” òf “alab’E asta den tentashon”? Kon alabansa por yuda nos a traves di e situashonnan akí?

pregunta 3 Laga miembronan duna testimonionan riba kon alabansa a afektá nan bida. Kiko boso por siña for di otro su eksperensianan?

pregunta 4 Komo klas, skohe un salmo di alabansa i pasa tempu lesando e. Kiko e ta siña bo tokante alabansa? Ki impakto alabansa tin riba bo fe?