Lès 13

*17 – 23 di sèptèmber

Kristu den e Krisol
Sabat 17 di sèptèmber
Lesa pa e Estudio di e Siman Akí:

Lukas 2:7, 22–24; Mat. 2:1–18; Juan 8:58,59; Lukas 22:41–44; Mat. 27:51,52; Rom. 6:23; Tito 1:2.

Teksto di Memoria:

“I banda di tres or di atardi Hesus a sklama na bos haltu, bisando: "Eli, Eli, Lama Sabaktani?" ku ta nifiká: "Mi Dios, Mi Dios, pakiko Bo a bandonáMi?'" (Mateo 27:46).

Ki ora ku nos wak e asuntu di sufrimentu, e pregunta ta bin: Kon piká i sufrimentu a surgi pa promé bia? Pa medio di revelashon divino nos tin bon kontestanan: Nan a surgi pasobra sernan liber a abuzá di e libertat ku Dios a duna nan. Esaki ta hiba na un otro pregunta: Dios tabata sa di antemano ku e sernan akí lo a kai? Sí, pero opviamente El a pensa ku tabata, manera C. S. Lewis a skirbi, “bal e riesgo.”

Bal e riesgo? Pa ken? Pa nos, miéntras Dios ta sinta den shelu riba Su trono? No eksaktamente. E libertat di tur Su kriaturanan inteligente ta asina sagrado ku, mas bien ku nenga nos libertat, Dios a skohe pa karga den Su mes e impakto di e sufrimentu kousá pa nos abuzu di e libertat ei. I nos ta mira e sufrimentu akí den e bida i morto di Hesus, kende, dor di a sufri den nos karni, a krea lasonan entre shelu i tera ku lo dura a lo largu di eternidat.

Un Bista Riba e Siman:

Kiko Hesus a sufri na nos fabor? Kiko nos por siña di Su sufrimentu?

*Studia e lès di e siman akí pa prepará pa Sabat, 24 di sèptèmber.

Djadumingu

18 di sèptèmber

E Promé Dianan

Skritura ta duna nos tiki informashon tokante e promé añanan di Hesus. Un par di versíkulo, sinembargo, ta bisa nos algu tokante e kondishonnan ei i e tipo di mundu ku e Salbador a drenta aden.

Lesa Lukas 2:7, 22–24 (lesa tambe Lev. 12:6–8) i Mateo 2:1–18. Kiko nos ta mira den e versíkulonan akí ku ta duna nos un indikashon di e tipo di bida ku Hesus a enfrentá for di kuminsamentu?

Naturalmente, Hesus no tabata e promé persona ku a biba den pobresa òf ku a enfrentá esnan ku ker a mat’E, asta for di un edat trempan. Tin, sinembargo, un otro elemento ku ta yuda nos komprondé e singularidat di loke Kristu a sufri for di e tempunan di mas promé.

Lesa Juan 1:46. Ki elemento esaki ta añadí pa yuda nos komprondé ki sufrimentunan e Hesus hóben a enfrentá?

Ku eksepshon di Adam i Eva promé ku e Kaida, Hesus tabata e úniko persona sin piká ku hamas a biba riba tera. Den Su puresa, den Su impekabilidat, E tabata sumergí den un mundu di piká. Ki un tortura e mester tabata, asta komo mucha, pa Su alma puru mester tabata konstantemente den kontakto ku piká. Asta den nos duresa pa motibu di piká, nos mes hopi bia ta hala atras for di eksposishon na piká i maldat ku nos ta haña repugnante. Imaginá bo kon lo tabata pa Kristu, kende Su alma tabata puru, kende no tabata niun tiki manchá pa piká. Pensa riba e kontraste skèrpi entre E mes i otronan rònt di djE den e sentido ei.Mester tabata ekstremadamente doloroso p’E.

Puntra bo mes, “Kon sensitivo mi ta na e pikánan ku ta eksistí tur rònt di nos? Nan ta molestiá mi, òf mi a bira duru pa ku nan?” Si bo a bira duru pa ku nan, lo por ta pa motibu di e kosnan ku bo ta lesa, wak, òf asta hasi? Pensa riba dje.

Djaluna

19 di sèptèmber

Despresiá i Rechasá pa Hende

Lesa e siguiente versíkulonan, i tur e ratu teniendo den mente e echo ku Hesus tabata divino, e Kreador di shelu i tera, i ku El a bin pa ofresé Su mes komo un sakrifisio pa e pikánan di henter mundu (Mat. 12:22–24; Lukas 4:21–30; Juan 8:58,59). Kon e versíkulonan akí ta yuda nos komprondé e sufrimentunan ku Hesus a enfrentá aki riba tera?

Sea lidernan, òf asta e hendenan komun, tabata komprondé Hesus Su bida, aktonan, i siñansanan robes konstantemente, kua a hiba na rechaso i odio dor di hendenan ku El a bin pa salba. Den un sierto sentido mester tabata manera un mayor ku ta mira un yu rebelde den nesesidat di ayudo, i aunke e mayor ta dispuesto pa duna tur kos pa e yu ei, e yu ta rechasá e mayor, akumulando menospresio i rechaso riba kisas e úniko persona ku por spar e yu ei di ruina total. Esei ta loke Hesus a enfrentá miéntras E tabata aki riba tera. Ki doloroso e mester tabata p’E.

Lesa Mateo 23:37. Kiko e ta bisa nos tokante kon Kristu a sinti tokante rechaso? Miéntras bo ta lesa, puntra bo mes, tambe, “E tabata sinti malu pa E mes (manera nos hopi bia ora nos ta enfrentá rechaso), òf tabata pa otro rason?” Si tabata pa otro rason, kiko e tabata?

Nos tur a yega di sinti e pui di rechaso, i kisas nos doló tabata similar na esun di Kristu den sentido ku e tabata altruista: Nos tabata den doló, no pasobra a rechasá nos, sino pa motibu di loke e rechaso lo a nifiká pa esun ku tabata rechasando nos (kisas un hende ku nos ta preokupá p’e ku ta rechasá salbashon den Kristu). Imaginá bo, sinembargo, kon mester tabata pa Hesus, kende tabata kompletamente konsiente di loke E tabata bai enfrentá pa asina salba nan, i na mes momento kompletamente konsiente di kiko e konsekuensianan di nan rechaso lo tabata. “Tabata pa motibu di Su inosensia ku E [Kristu] a sinti e atakenan di Satanas asina skèrpi.”—Ellen G. White, Selected Messages, tomo 3, p. 129.

Kiko bo por siña di Kristu ku por yuda bo dil mihó ku e doló di rechaso? Kiko Su ehèmpel ta mustra bo? Kon bo por aplik’é na bo propio bida?

Djamars

20 di sèptèmber

Hesus den Getsémani

"I El a bisa nan: 'Mi alma ta masha tristu mes, te na morto; keda akinan i vigilá.'" (Marko 14:34).

Loke sea Hesus a sufri a lo largu di Su 33 añanan aki riba tera, nada por tabata kompará ku loke El a kuminsá enfrentá den e último oranan promé ku e krus. For di siglonan eterno (Efe. 1:1–4; 2 Tim. 1:8,9; Tito 1:1,2) e sakrifisio di Hesus komo e ofrenda pa piká di e mundu tabata planiá, i awor tur tabata pasando.

Kiko e siguiente versíkulonan ta bisa nos tokante e sufrimentu di Kristu den Getsémani? Mat. 26:39, Marko 14:33–36, Lukas 22:41–44.

“El a bai un tiki distansia for di nan, no dje leu ei ma pa nan por a tantu mira komo tend’E, i a kai ku Su kara abou riba suela. E tabata sinti ku pa piká E tabata separá for di Su Tata. E abismo tabata asina hanchu, asina skur, asina profundo, ku Su Spiritu tabata tembla su dilanti. E no mester a ehersé Su poder divino pa skapa di e agonia akí. Komo hende E mester a sufri e konsekuensianan di hende su piká. Komo hende E mester a soportá e furia di Dios kontra transgreshon.

“Kristu awor tabata pará den un aktitut diferente for di esun den kua hamas El a para promé. Por deskribí Su sufrimentu mihó den e palabranan di e profeta: 'Spièrta, O spada, kontra Mi Wardadó, i kontra e Hòmber, Mi Kompañero, e SEÑOR di ehérsitonan ta deklará.' Zak. 13:7. Komo e supstituto i garantia pa hende pekaminoso, Kristu tabata sufriendo bou di hustisia divino. El a mira kiko hustisia tabata ke men. Te awor E tabata komo un intersesor pa otronan; awor E tabata anhelá di tin un intersesor pa E mes.”—Ellen G. White, The Desire of Age, p. 686.

Meditá riba loke tabata sosodiendo ku Hesus den Getsémani. Ya e pikánan di mundu tabata kuminsá kai riba djE. Purba imaginá bo kon esei lo mester tabata. No a yega di yama niun ser humano pa pasa dor di nada manera esaki promé òf for di e tempu ei. Kiko esaki ta bisa nos tokante e amor di Dios pa nos? Ki speranso bo por saka for di esaki pa bo mes?

Djárason

21 di sèptèmber

E Dios Krusifiká

Morto pa medio di krusifikashon tabata un di e kastigunan di mas kruel ku e romanonan a parti pa kualke hende. Tabata konsider’é e forma di mas pió pa muri. Por lo tantu, kon hororoso pa mata kualke hende di e forma ei, en partikular e Yu di Dios! Hesus, nos mester kòrda semper, a bin den karni humano meskos ku di nos. Entre e batimentu, e sutamentu, e klabunan klabá den Su mannan i pianan, e peso doloroso di Su propio kurpa ku tabata sker e heridanan, e doló físiko mester tabata insoportabel. Esaki tabata kruel, asta pa e kriminalnan di mas malu; ki inhustu, anto, ku Hesus, inosente di tur kos, mester a enfrentá un destino asina.

Sinembargo, manera nos sa, e sufrimentunan físiko di Kristu tabata leve kontrali na loke realmente tabata pasando. Esaki tabata mas ku solamente e matamentu di un hòmber inosente.

Ki eventonan rondó di e morto di Hesus a mustra ku mas kos tabata tumando lugá ku mayoria hende einan tabata komprondé na e momento ei? Ki nifikashon nos por haña den kada un di e eventonan akí ku por yuda revelá loke a sosodé einan?

Klaramente, algu muchu mas tabata tumando lugá aki ku solamente e morto, kon inhustu ku e tabata, di un hòmber inosente. Di akuerdo ku Skritura, Dios a basha Su rabia kontra piká, nos piká, riba Hesus. Hesus riba e krus a sufri e indignashon hustu di un Dios hustu kontra piká, e pikánan di henter mundu. Komo tal, Hesus a sufri algu mas profundo, mas skur, i mas doloroso ku kualke ser humano hamas por a konosé òf eksperensiá.

Miéntras bo ta pasa a traves di kualke luchanan ku bo ta enfrentando, ki speransa i konsuelo bo por saka for di e realidat di Hesus sufriendo pa bo riba e krus?

Djaweps

22 di sèptèmber

E Dios ku ta Sufriendo

Nos por bien kustumá kuné: tanten ku nos ta aki, den e mundu akí, nos ta bai sufri. Komo kriaturanan kaí, e ta nos destino. Nada den Beibel ta primintí nos algu diferente. Al kontrario . . .

Kiko e siguiente versíkulonan tin di bisa nos tokante e tópiko ku nos ta studia? Echonan 14:22, Fil. 1:29, 2 Tim. 3:12.

Sinembargo, meimei di nos sufrimentu, nos mester tene dos kos den mente.

Di promé, Kristu, nos Señor, a sufri pió ku kualke di nos hamas por a sufri. Na e krus, “ta nos enfermedatnan El a karga i ta nos doló El a soportá” (Isa. 53:4); loke nos sa solamente komo individuonan, El a sufri kolektivamente, pa nos tur. E kende tabata sin piká a bira “piká pa nos tur” (2 Kor. 5:21), sufriendo den un forma ku nos, komo kriaturanan pekaminoso, no por a kuminsá imaginá nos mes.

Ma di dos, ora nos ta sufri, nos mester kòrda e resultadonan di Hesus Su sufrimentu, es desir, kiko a primintí nos a traves di loke Kristu a hasi pa nos.

Lesa Juan 10:28, Romanonan 6:23, Tito 1:2, i 1 Juan 2:25. Kiko a primintí nos?

Loke sea ta nos sufrimentunan aki, danki na Hesus, danki na Su kargamentu den Su mes e kastigu di nos piká, danki na e gran provishon di e evangelio, ku pa medio di fe nos por para perfekto den Hesus aworakí mes, nos tin e promesa di bida eterno. Nos tin e promesa ku, pa motibu di loke Kristu a hasi, pa motibu di e plenitut i totalidat di Su bida perfekto i sakrifisio perfekto, nos eksistensia aki, yen di doló, desapunto, i pèrdida, no ta mas ku un instante, un flèsh, pasahero, kontrali na e eternidat ku ta spera nos, un eternidat den un shelu nobo i un tera nobo, unu sin piká, sufrimentu, i morto. I tur esaki ta primintí na nos i hasí sigur pa nos solamente pa motibu di Kristu i e krisol ku El a drenta aden pa asina un dia, pronto, E lo a mira “e angustia di Su alma, i lo keda satisfecho” (Isa. 53:11).

Djabièrnè

23 di sèptèmber

Mas Estudio:

Lesa Ellen G. White, “Gethsemane,” p. 685–697, i “Calvary,” p. 741–757, den The Desire of Ages.

“Tres bia El a ekspresá e orashon ei. Tres bia humanidat a kremp di e sakrifisio último i di koronashon. Pero awor e historia di e rasa humano ta subi dilanti di e Redentor di mundu. E ta mira ku e transgresornan di lei, si laga nan pa nan kuenta, nan mester peresé. E ta mira e impotensia di hende. E ta mira e poder di piká. E aflikshonnan i lamentashonnan di un mundu kondená ta lanta Su dilanti. E ta kontemplá su destino inminente, i E ta tuma Su desishon. E lo salba hende na kualke kosto pa Su mes. E ta aseptá Su boutismo di sanger, pa a traves di djE miónes ku ta peresé por gana bida eterno. El a bandoná e kortenan di shelu, kaminda tur kos ta puresa, felisidat, i gloria, pa salba esun karné pèrdí, esun mundu ku a kai pa medio di transgreshon. I E lo no bira for di Su mishon. E lo bira e propisiashon di un rasa ku tabata dispuesto na peka. Su orashon awor ta respirá solamente sumishon: ‘Si e kopa akí no por pasa bai for di Mi, eksepto si Mi beb’é, Bo boluntat sea hasí.’”—Ellen G. White, The Desire of Ages, p. 690, 693.

Preguntanan pa Diskushon:

pregunta 1 Kon e ta yuda nos den nos propio sufrimentunan, e konosementu akí ku Dios Mes, den persona di Kristu, a sufri mas ku kualke di nos hamas lo tabata por? Kiko e sufrimentunan di Kristu na nos fabor mester nifiká pa nos? Ki konsuelo nos por saka for di e bèrdat asombroso akí? Miéntras bo ta pensa riba bo kontesta, tene e siguiente sita di Ellen G. White den mente: “A basha tur e sufrimentu ku ta resultado di piká den skochi di e Yu di Dios sin piká.”—Selected Messages, tomo 3, p. 129.

pregunta 2 Komo klas, pasa riba e sufrimentunan di Kristu ku nos a wak den e lès di e siman akí. Kiko tabata e krisolnan ku Hesus a enfrentá? Den ki formanan nan ta meskos ku esnan di nos mes, i den ki formanan nan ta diferente? Kiko nos por siña for di kon El a hèndel e desafionan akí, ku por yuda nos meimei di nos propio krisolnan?

pregunta 3 Kiko ta algun di bo promesanan di Beibel faborito, promesanan ku bo por tene na dje meimei di fèdrit i doló? Skirbi nan, reklamá nan pa bo mes, i kompartí nan den klas.

pregunta 4 Skirbi un paragraf di resúmen, enfatisando kualke puntonan prinsipal ku bo a saka for di e lès di e kuartal akí. Ki preguntanan a resolvé pa bo? Ki asuntunan ainda ta keda sin kontesta? Kon nos un por yuda otro haña un solushon pa e kosnan ei ku ainda ta konfundí i molestiá nos?