“Un Ser bibu”

Lesa Génesis 1:24–27 i Génesis 2:7,19. Ki similaridatnan i diferensianan bo por mira entre e manera ku Dios a krea e animalnan i humanidat? Kiko Génesis 2:7 ta bisa nos tokante naturalesa humano?

E relato di Génesis ta deklará ku riba e di seis dia di e siman di Kreashon Señor Dios a trese animalnan di tera i e promé sernan humano, un pareha, na bida (Gen. 1:24–27). Ta bisa nos ku El a “forma for di tera tur e animalnan salbahe i tur e paranan den shelu” (Gen. 2:19, NIV). Tambe El a “forma un hòmber for di e stòf di tera” (Gen. 2:7, NIV).

Aunke tantu animal komo hende igualmente tabata trahá for di “tera,” e formashon di hende tabata distinto for di esun di animal den dos forma prinsipal. Di promé, Dios a forma e hòmber físikamente, i despues a “supla den su nanishi e rosea di bida, i e hòmber a bira un ser bibu” (Gen. 2:7, NIV). E tabata un entidat físiko promé ku el a bira unu bibu. Di dos, Dios a krea humanidat tantu maskulino komo femenino den e imágen mes i semehansa di e Deidat (Gen. 1:26,27).

Génesis 2:7 ta splika ku e infushon di e “rosea di bida” den e kurpa físiko di Adam a transform’é den “un ser bibu” (hebr. Nephesh chayyah) òf literalmente “un alma bibu” (KJV). E ta nifiká ku kada un di nos no tin un alma ku por eksistí separá for di e kurpa. Mas bien, kada un di nos ta un ser bibu òf un alma bibu. E afirmashon ku e “alma” akí ta un entidat konsiente ku por eksistí separá for di e kurpa humano ta un idea pagano, no bíbliko. Komprendiendo e naturalesa berdadero di humanidat ta prevení nos di aseptá e noshon popular di un alma spiritual i tur e erornan peligroso konstruí riba e kreensia ei.

No tin un eksistensia konsiente di niun parti isolá di e ser humano separá for di e persona komo un totalidat. Dios a krea nos di un manera temeroso i maravioso, i nos no mester spekulá mas ayá di loke Skritura en realidat ta bisa tokante e asuntu spesífiko akí. De echo, no solamente e naturalesa mes di bida ta un misterio (sientífikonan ainda no por ta di akuerdo riba eksaktamente kiko ta nifiká pa un hende ta na bida), ainda mas misterioso ta e naturalesa di estado konsiente. Kon e poko liber di tehido material (sèlnan i kímikonan) den nos kabes, e seleber, ta tene i krea kosnan inmaterial manera pensamentu i emoshon? Esnan ku ta studia e idea akí ta atmití ku realmente nos no sa.

Ki un milager bida ta! Dikon nos mester regosihá den e don di no solamente bida, sino di bida eterno tambe, un milager ainda mas grandi?

“E Alma ku Peka Lo Muri”

Lesa Ezekiel 18:4,20 i Mateo 10:28. Kon e versíkulonan akí por yuda nos komprendé e naturalesa di e alma humano?

Bida humano den e mundu pekaminoso akí ta frágil i transitorio (Isa. 40:1–8). Nada infektá ku piká por ta eterno pa naturalesa. “P’esei, meskos ku a traves di un hende piká a drenta mundu, i morto a traves di piká, i asina morto a plama na tur hende, pasobra tur a peka” (Rom. 5:12, NKJV). Morto ta e konsekuensia natural di piká, ku ta afektá tur bida akinan.

Riba e asuntu akí, tin dos konsepto bíbliko importante. Unu ta ku sernan humano i animalnan tur dos ta muri. Manera Rei Salomon a deklará: “ ‘Siguramente e destino di sernan humano ta meskos ku esun di e animalnan; e mesun destino ta spera tur dos: Manera esun ta muri, asina e otro ta muri. Tur tin e mesun rosea; hende no tin bentaha riba animalnan. . . . Tur ta bai mesun kaminda; tur a bini di stòf, i na stòf tur ta bolbe’ ” (Ekl. 3:19,20, NIV).

E di dos konsepto ta ku e morto físiko di un persona ta impliká e suspenshon di su eksistensia komo un alma bibu (Hebr. nephesh). Den Génesis 2:16,17, Dios a spièrta Adam i Eva ku si algun bia nan mester peka, komiendo for di e palu di konosementu di bon i malu, nan lo a muri.

Ripitiendo e spièrtamentu akí, Señor a reforsá e punto den Ezekiel 18:4,20: “E alma ku peka lo muri” (NKJV). E deklarashon akí tin dos implikashon prinsipal. Unu ta ku ya ku tur ser humano ta pekador, nos tur ta bou di e proseso inevitabel di bira bieu i muri (Rom. 3:9–18,23). Un otro implikashon ta ku e konsepto bíbliko akí ta anulá e noshon popular di un supuesto inmortalidat di e alma. Si e alma ta inmortal i ta eksistí bibu den un otro esfera despues di morto, e ora ei nos no ta muri realmente despues di tur kos, bèrdat?

Kontrali na esei, e solushon bíbliko pa e dilema di morto no ta un alma sin kurpa ku ta dual drenta sea den paraiso òf den purgatorio, òf asta den fièrnu. E solushon ta enbèrdat e resurekshon final di esnan ku a muri den Kristu. Manera Hesus a deklará den Su sermon riba e Pan di Bida, “ ‘tur hende ku mira e Yu i kere den djE por tin bida eterno; i lo Mi lant’é riba e último dia’ ” (Juan 6:40, NKJV).

Dikon e garantia di e Segundo Binida, ku Kristu a hasi sigur pa medio di Su promé binida (i despues di tur kos, ki bon e promé binida di Kristu tabata sin e Segundo?), ta asina krusial pa tur ku ta kere? Ki speransa nos lo tabatin sin e promesa di Su regreso?

“E Spiritu ta Bolbe na Dios”

Lesa Génesis 2:7 i Eklesiastes 12:1–7. Ki kontraste bo por mira entre e dos pasashinan bíbliko akí? Kon nan por yuda nos komprendé mihó e kondishon humano den morto? Lesa tambe Génesis 7:22.

Manera nos a mira kaba, Beibel ta siña ku e ser humano ta un alma (Gen. 2:7), i e alma ta stòp di eksistí ora e kurpa muri (Ezek. 18:4,20).

Pero ke tal di e “spiritu”? E no ta keda konsiente asta despues di morto di e kurpa? Hopi kristian ta kere esei, i nan ta asta purba hustifiká nan punto di bista sitando Eklesiastes 12:7, ku ta bisa: “E ora ei e stòf lo bolbe na tera manera e tabata, i e spiritu lo bolbe na Dios kende a dun’é” (NKJV). Pero e deklarashon akí no ta sugerí ku e spiritu di e mortonan ta keda konsiente den presensia di Dios.

Eklasiastes 12:1–7, den términonan bastante dramátiko, ta deskribí e proseso di bira bieu, kulminando ku morto. Versíkulo 7 ta referí na morto komo e retroseso di e proseso di kreashon menshoná den Génesis 2:7. Manera ya a deklará, riba e di seis dia di e siman di Kreashon “Señor Dios a forma hende di e stòf di tera i a supla e rosea di bida den su nanishi; i hende a bira un ser bibu” (Gen. 2:7, NKJV). Pero awor, Eklesiastes 12:7 ta bisa nos ku “e stòf lo bolbe na tera manera e tabata, i e spiritu lo bolbe na Dios kende a dun’é” (NKJV). Asina, e rosea di bida ku Dios a respirá den nanishi di Adam, i ku El a proveé tambe pa tur otro ser humano, ta bolbe na Dios òf, den otro palabra, simplemente ta stòp di kore den i a traves di nan.

Nos mester tene den mente ku Eklesiastes 12:7 ta deskribí e proseso di muri di tur ser humano i ta hasi esei sin distinguí entre e hustu i e malbado. Si e presunto spiritunan di tur ku muri sobrebibí komo entidatnan konsiente den presensia di Dios, e ora ei e spiritunan di e malbadonan ta serka Dios? E idea akí no ta den harmonia ku e siñansa general di e Skrituranan. Pasobra e mesun proseso di murimentu ta tuma lugá ku tantu sernan humano komo ku animalnan (Ekl. 3:19,20), morto no ta nada mas ku stòp di eksistí komo sernan bibu. Manera e salmista a deklará: “Bo ta skonde Bo kara, nan ta preokupá; Bo ta kita nan rosea, nan ta muri i ta bolbe na nan stòf” (Salmo 104:29, NKJV).

Hopi biaha nos ta bisa ku morto ta djis parti di bida. Dikon esei ta asina robes? Morto ta kontrali di bida, e enemigu di bida. Ki gran speransa, anto, nos ta haña den e versíkulo akí: “E último enemigu ku lo ta destruí ta morto” (1 Kor. 15:26, NKJV)?

“E Mortonan No Sa Nada”

Sosegá Serka e Antepasadonan

Mas Estudio:

Lesa Ellen G. White, “The First Great Deception,” p. 531–550, den The Great Controversy.

Si bo a yega di ta den sirugia i a manda bo leu ku anestesia general, kisas bo por tin un idea vago di kon lo ta pa e mortonan. Pero asta e ora ei, ora bo ta bou di anestesia, bo seleber ainda ta funshoná. Imaginá bo kon lo ta pa e mortonan, ora tur funshon selebral, tur kos, a stòp totalmente. Nan eksperensia den morto, e ora ei, ta di sera nan wowo i, asina leu ku ta konserní kada persona morto ku algun bia a biba, e siguiente kos ku nan lo sa ta sea e segundo binida di Hesus òf Su regreso despues di e milenio (lesa Rev. 20:7–15). Te e momento ei, tur esnan morto, esnan hustu i esnan malbado, ta sosegá, pa loke lo parse pa nan di ta un instante. Pa esnan di nos ku keda bibu, morto ta parse manera kos ku e ta dura pa largu tempu. Pa esnan bibu e ta; pero pa esnan morto e ta parse di ta dura djis un instante.

“Si tabata bèrdat ku e alma di tur hende tabata pasa direktamente pa shelu na ora di disolushon, e ora ei nos por bien kudishá morto mas bien ku bida. E kerensia akí a hiba hopi na pone un fin na nan eksistensia. Ora nan ta aplastá ku problema, konfushon, i desapunto, ta parse un kos fásil pa kibra e hilu frágil di bida i zueif bai den e felisidat di bida eterno.”—Ellen G. White, The Great Controversy, p. 539.

“Niun kaminda den e Sagrado Skrituranan ta haña un deklarashon ku esnan hustu ta bai na nan rekompensa òf e malbadonan na nan kastigu ora nan muri. E patriarkanan i profetanan no a laga un siguransa asina. Kristu i Su apòstelnan no a duna niun indisio di dje. Beibel klaramente ta siña ku e mortonan no ta bai shelu inmediatamente. Ta representá nan komo drumiendo te na resurekshon.”—p. 549, 550.

Preguntanan pa Diskushon:

Kon e noshon bíbliko di e ser humano komo un totalidat, ku ta keda konsiente solamente komo un persona integral, ta yuda nos komprendé e naturalesa di morto mihó?

E teoria di inmortalidat natural di e alma a tuma e mundu akí over, ku tur su ramafikashon inkontabel. Dikon, anto, nos mensahe tokante estado di e mortonan ta asina krusial? Dikon, tambe, asta meimei di kristiannan, nos ta haña oposishon asina fuerte na loke realmente ta un siñansa maravioso?

Kon un komprendementu di e estado di e mortonan mester protegé nos di loke kisas por “aparesé” dilanti di nos bista? Es desir, dikon nos no por kere semper loke nos mira, spesialmente si loke nos mira, òf kere ku nos ta mira, ta spiritu di un miembro di famia morto, manera algun hende a reportá di a mira?