Lès 4

*15 – 21 di òktober

E Speransa di Tèstamènt Bieu

15 di òktober

Lesa pa e Estudio di e Siman Akí:

Job 19:25-27; 1 Tim. 6:16; Salmo 49; Salmo 71; Isa. 26:14,19; Daniel 12.

Teksto di Memoria:

“Pa medio di fe Abraham, ora ku el a ser poné na prueba, a ofresé Isaak. E ku a risibí e promesanan tabata kla pa ofresé su úniko yu. ... El a konsiderá e echo ku Dios ta kapas asta pa lanta un hende for di morto; i figurativamente bisá, el a risibié bèk” (Hebreonan 11:17,19, NRSV).

E speransa di Tèstamènt Bieu ta fundá, no riba ideanan griego tokante e inmortalidat natural di e alma, sino riba e siñansa bíbliko di e resurekshon final di e mortonan.

Pero kon lo por trese un kurpa humano ku no ta eksistí mas, kremá hasí shinishi òf destruí pa otro medionan, bèk na bida? Kon un hende ku tabata morto, kisas pa siglonan òf asta milenionan, por rekobrá su identidat atrobe?

E preguntanan akí ta hiba nos pa reflekshoná riba e misterio di bida. Nos ta na bida i ta disfrutá di e bida ku Dios yen di grasia ta otorgá na nos tur dia. Asta sin a kuminsá komprendé e orígen sobrenatural di bida, nos sa ku na prinsipio Dios a trese bida na eksistensia for di nada, pa medio di e poder di Su palabra (Génesis 1; Salmo 33:6, 9). Asina, si Dios tabata kapas di krea bida riba tera pa promé biaha for di nada (latin ex nihilo), dikon nos mester duda di Su kapasidat pa krea bida humano di nobo i restourá su identidat original?

E siman akí nos ta reflekshoná riba kon e noshon di e resurekshon final a desaroyá den tempunan di Tèstamènt Bieu, ku enfoke spesial riba e deklarashonnan di Job, algun Salmista, i e profetanan Isaias i Daniel.

*Studia e lès di e siman akí pa prepará pa Sabat, 22 di òktober.

Djadumingu

16 di òktober

“Lo Mi Mira Dios”

Lesa Job 19:25-27 i kompar’é ku Juan 1:18 i 1 Timoteo 6:16. Ki ora i bou di kua sirkunstansianan e tabata spera di "mira Dios"?

Bida no ta hustu. Nos ta mira esaki spesialmente ora nos ta mira esnan "bon" sufriendo i esnan "inhustu" prosperá (lesa Salmo 73:12–17, Mal. 3:14–18). Por ehèmpel, Job tabata "perfekto i rekto". i tabata "teme Dios i tabata evitá maldat. (Job 1:1, NKJV). Tòg, Dios a permití Satanas pa aflihié den vários forma desastroso. Físikamente, su kurpa destrosá pa enfermedat doloroso (Job 2:1–8). Materialmente, el a pèrdè porshonnan grandi di su bestianan i propiedatnan (Job 1:13–17). Den su hogar, el a pèrdè su sirbidónan i asta su propio yunan (Job 1:16,18). I emoshonalmente, e tabata rondoná pa amigunan ku a akus’é di ta un pekador impenitente, ku tabata meresé loke e tabata enfrentando (Job 4:1–5:27, Job 8:1–22, Job 11:1–20, etc.). Hasta su mes kasá a deklará: “Ainda bo ta tene duru na bo integridat? Maldishoná Dios i muri!" (Job 2:9).

Job no a realisá ku el a bira e episentro di un luchá kósmiko profundo entre Dios i Satanas. Aflihí pa e luchanan ei, Job a lamentá su propio nasementu i a deseá ku nunka el a nase (Job 3:1–26). Sinembargo, su fieldat inkondishonal na Dios ta bon ekspresá den e palabranan: "Aunke E mata mi, tòg lo mi konfia den djE" (Job 13:15, NKJV). Asta imaginando ku pronto su bida lo a kaba, el a mantené su siguransa ku morto lo no tabatin e último palabra. Ku konvikshon fuerte el a deklará ku aunke e muri, Su Redentor un dia lo a lanta i e, Job mes, lo a mira Dios den su propio karni. (Job 19:25–27). "Esaki ta un persepshon inekibokabel di resurekshon.”—The SDA Bible Commentary, tomo 3, p. 549.

Ki un speransa glorioso meimei di un tragedia asina! Rondoná pa malesa i doló, kaida ekonómiko, reproche sosial, i krísis emoshonal, Job ainda por a antisipá e dia ku e lo lanta for di morto i kontemplá su Redentor stimá. En realidat, Job su deklarashon tokante resurekshon tabata yená ku e mesun siguransa ku siglonan despues Marta a ekspresá na Hesus: "Mi sa ku e (Lazaro) lo lanta atrobe den e resurekshon riba e último dia” (Juan 11:24, NKJV). Job, meskos ku Marta, mester a reklamá e promesa akí pa medio di fe, aunke, diferente for di Job, Marta pronto lo a haña evidensia empíriko poderoso pa su kreensia.

Kon nos por siña konfia Dios asta meimei di e inhustisianan duru di bida?

Djaluna

17 di òktober

For di e Poder di e Graf

Lesa Salmo 49. Kiko a hiba e salmista na ta asina sigur di su resurekshon final (Salmo 49:15), kontrali na esnan ku a peresé sin e siguransa ei (Salmo. 49:6–14)?

Salmo 49 ta papia tokante e konfiansa falsu di e bobonan "ku ta konfia den nan rikesa i ta broma ku e multitut di nan rikesanan" (Salmo 49:6, NKJV), ku "ta yama nan teranan na nan propio nòmbernan" (Salmo. 49:11, NKJV), i ku ta biba solamente pa bendishoná nan mes (Salmo 49:18). Nan ta aktua komo si fuera nan kasnan i nan propio gloria lo a dura pa semper (Salmo. 49:11,17).

Pero e bobonan ta lubidá ku nan honor ta disparsé i ku nan ta peresé meskos ku e animalnan (Salmo 49:12, NKJV). "Manera karnénan ta pone nan den graf; morto lo alimentá nan; ... i nan bunitesa lo ta konsumí den graf, leu for di nan lugá di biba" (Salmo 49:14, NKJV).

Pero tin un kontraste radikal entre nan. Na un banda tin esnan bobo ku ta peresé, aunke e ta purba haña seguridat den su propio posishonnan i logronan transitorio. Kontrali na esei, e sabí ta kontemplá, mas ayá di e historia humano i e prizòn di e graf, e glorioso rekompensa ku Dios tin reservá pa nan (1 Pe. 1:4). Ku e persepshon akí den mente, e salmista por a bisa ku konfiansa: "Ma Dios lo redimí mi alma for di e poder di graf, pasobra lo E risibí mi" (Salmo 49:15, NKJV).

Di akuerdo ku e speransa di Tèstamènt Bieu, e deklarashon akí no ta sugeriendo ku na momento di su morto, e alma di e salmista lo a bula bai shelu inmediatamente. E salmista simplemente ta bisando ku e lo no a permanesé pa semper den graf. E tempu ta yega ku Dios lo a redimié for di morto i hib’é na e kortenan selestial.

Atrobe, e ta deskribí e siguridat di e futuro resurekshon, tresiendo speransa, siguransa, i nifikashon na e eksistensia presente akí. Asina, e sabínan lo risibí un rekompensa muchu mas glorioso i eterno ku loke e bobonan por a reuní pa nan mes durante e bida kòrtiku akí.

Kua ta e formanan ku bo tabata kapas pa mira e lokura di esnan ku ta konfia den nan propio rikesa i logronan? Kon mantené bo bista riba e krus por protehá bo di kai den e mesun eror?

Djamars

18 di òktober

“For di e Profundidatnan di Tera”

Lesa Salmo 71. Kiko David tabata impliká ora el a pidi Dios pa tres’é ariba "atrobe for di e profundidatnan di tera" (Salmo 71:20, NKJV)?

Den Salmo 49 nos a haña un ekspreshon konmovedor di speransa den e resurekshon, kontrali na e garantia falsu di e bobo ku tabata konfia den su rikesa. Den salmo 71, David ta buska siguridat i speransa di Dios miéntras e ta rondoná pa enemigu i akusadónan falsu ku ta bisa ku Dios a bandon’é (Salmo 71:10, 11).

Meimei di su pruebanan, David ta haña konsuelo i siguransa rekordando kon Dios a kuid’é den pasado. Promé, e ta realisá ku Dios tabata sosten’é for di nasementu i asta a sak’é for di barika di su mama (Salmo 71:6). Despues, e ta rekonosé ku Dios a siñ'é for di su hubentut (Salmo 71:17).

Ku e siguransa ku Dios tabata su baranka i su fòrti, David ta suplik’E: "Sea mi refugio fuerte, na kua mi por rekurí kontinuamente" (Salmo 71:3, NKJV). "No tira mi afó den tempu di mi behes; no bandoná mi ora mi forsa ta faya" (Salmo 71:9, NKJV). "O Dios, no keda leu fo'i mi; O mi Dios, hasi lihé yuda mi!” (Salmo 71:12, NKJV). I despues David ta agregá: "Abo, kende a mustra problemanan grandi i severo, lo bolbe rebibá mi for di e profundidatnan di tera" (Salmo 71:20, NKJV).

Por a komprendé e ekspreshon "for di e profundidatnan di tera" literalmente komo un alushon na e futuro resurekshon físiko di e salmista. Pero e konteksto parse ta faboresé un deskripshon metafóriko di David su kondishon di depreshon profundo komo si fuera tera tabata guliendo e (kompará ku Salmo 88:6 i Salmo 130:1). Asina, nos lo por bisa ku "ta prinsipalmente lenguahe figurativo, pero tambe ta insinuá un resurekshon físiko." — Andrews Study Bible, p. 726, nota riba Salmo 71:20.

Na final, loke ta importante pa gara ta ku, loke sea ta nos situashon, Dios t’ei, e ta preokupá, i finalmente, no ta haña nos speransa den e bida akí sino den e bida benidero, e bida eterno ku nos tin den Hesus despues di nos resurekshon na su regreso.

Nos tur a yega di tin momentonan teribel di deskurashamentu. Kon, sinembargo, enfoká riba e formanan ku Señor tabata ku bo den pasado por yuda bo primi padilanti den fe i konfiansa den e momentonan ku E ta parse di ta leu?

Djárason

19 di òktober

“Bo Mortonan Lo Biba”

Lesa Isaias 26:14 i 19. Kua ta e kontraste entre esnan ku lo peresé pa semper (Isa. 26:14; lesa tambe Mal. 4:1) i esnan ku lo risibí bida eterno (Isa. 26:19)?

E buki di Isaias ta presentá un kontraste grandi entre e mahestat di Dios i nos fragilidat humano (lesa Isaias 40). Aunke nos ta manera e yerba ku ta seka i e flor ku ta marchitá, e palabra di Dios ta permanesé pa semper (Isa. 40:6–8). Apesar di nos pekaminosidat humano, sinembargo, e grasia salbador di Dios, ta disponibel pa tur ser humano i ta bira efektivo asta pa e paganonan ku ta brasa Su pakto i ta warda e Sabat (Isaias 56).

Den e buki di Isaias, e speransa di resurekshon ta keda ampliá di forma signifikativo. Miéntras tabata ekspresá alushonnan bíbliko anterior na e resurekshon mas for di perspektivanan personal (Job 19:25–27, Salmo 49:15, Salmo 71:20), profeta Isaias ta papia di dje komo inkluyendo e mes i e komunidat di pakto di kreyentenan (Isa. 26:19).

Isaias 26 ta kompará e distinto destinonan di e malbadonan i e hustunan. Na un banda, e malbadonan lo permanesé morto, sin hamas trese nan na bida, a lo ménos despues di e "di dos morto" (Rev. 21:8). Lo destruí nan kompletamente, i tur nan rekuerdo lo peresé pa semper (Isa. 26:14). E pasashi akí ta suprayá e siñansa ku lo no tin almanan ku ta sobrebibí òf spiritunan ku ta permanesé bibu despues di morto. Papiando tokante e destrukshon final di e malbadonan, ku ta bini despues, Señor ta deklará otro kaminda ku e malbado lo kima kompletamente, lagando nan sin "rais ni taki" (Mal. 4:1, NKJV).

Na otro banda, lo lanta e mortonan hustu for di morto pa risibí nan rekompensa bendishoná. Isaias 25 ta enfatisá ku Señor Dios "lo guli morto pa semper" i “lo seka lágrimanan for di tur kara" (Isa. 25:8, NKJV). Den Isaias 26 nos ta haña e siguiente palabranan: "Bo mortonan lo biba; huntu ku mi kurpa morto nan lo lanta. Spièrta i kanta, boso ku ta biba den stòf; pasobra boso serena ta manera e serena di yerbanan, i e tera lo tira e mortonan afó" (Isa. 26:19, NKJV). Tur e hustunan resusitá lo partisipá na e fiesta gososo ku Señor lo prepará pa tur hende (Isa. 25:6). E resurekshon final lo trese huntu tur e hustunan di tur siglo, inkluyendo boso sernan kerí ku ya a muri den Kristu.

Imaginá si nos no tabatin ningun speransa, ningun siguransa, ningun rason pa pensa ku nos morto tabata nada otro sino e fin di tur kos pa nos. I despues, pió ainda, kualke hende ku a yega di konosé nos lo a bai, i pronto lo tabata manera kos ku nunka nos a eksistí i ku nos bida nunka a nifiká nada ètòl. Kon e destino akí ta kontrastá ku e speransa ku nos tin?

Djaweps

20 di òktober

Esnan ku Drumi den Stòf

Manera nos lo mira, Tèstamènt Nobo ta papia hopi tokante e resurekshon di e mortonan; i, manera nos a mira kaba, e idea di e resurekshon di e mortonan ta aparesé den Tèstamènt Bieu tambe. E hendenan akí, den tempu di Tèstamènt Bieu, tabatin e speransa di e resurekshon final ku nos tin. Marta, bibando den tempu di Hesus, ya tabatin e speransa akí (Juan 11:24). No tin duda, asta e tempu ei, e hudiunan tabatin algun konosementu di e resurekshon den e último dianan, asta si no tur tabata kere esei (Lesa Echonan 23:8).

Lesa Daniel 12. Kua speransa di resurekshon ta haña aki, den e eskritonan di e gran profeta akí?

Daniel 12:1 ta referí na Miguel, "e gran prens”, ku su identifikashon tabata hopi diskutí. Pa motibu ku kada un di e gran vishonnan den e buki di Daniel ta kulminá ku e manifestashon di Kristu i Su reino, e mesun kos mester ta e kaso respekto e pasashi spesífiko akí. Den e buki di Daniel nos ta haña alushonnan na e mesun Ser Divino komo "e Prens di e ehérsito" (Dan. 8:11, NKJV), "e Prens di prensnan” (Dan. 8:25, NKJV), "Mesias e Prens" (Dan. 9:25, NKJV), i finalmente komo "Miguel, e gran prens" (Dan. 12:1, NASB). Asina, nos mester identifiká Miguel tambe komo Kristu.

E pasashinan di Tèstamènt Bieu konsiderá te asina leu (Job 19:25–27, Salmo 49:15, Salmo 71:20, Isa. 26:19), tur ta papia di e resurekshon di esnan hustu. Pero Daniel 12 ta papia di un resurekshon di tantu e hustu komo e inhustu. Ora Miguel lanta para, "hopi di esnan ku ta drumi den stòf di tera lo lanta, algun pa bida eterno, algun pa bèrgwensa i despresio eterno" (Dan. 12:2, NKJV).

Hopi ta mira ku e versíkulo akí ta papia tokante un resurekshon spesial di sierto hendenan, tantu esnan fiel komo esnan infiel, na Kristu Su regreso.

"Grafnan ta habri, i ‘hopi di nan ku ta drumi den stòf di tera ... ta lanta, algun pa bida eterno, i algun pa bèrgwensa i despresio eterno.' Daniel 12:2. Tur ku a muri den e fe di e mensahe di e di tres angel ta sali for di graf glorifiká, pa tende Dios Su pakto di pas ku esnan ku a warda su Lei. ‘Tambe esnan ku a traspas'E' (Revelashon 1:7), esnan ku a chèrcha i a ridikulisá Kristu Su agonia di morto i e opositornan di mas violento di Su bèrdat i Su pueblo, ta lanta pa kontempl’E den Su gloria i pa mira e honor poné riba esnan leal i obediente.” — Ellen G. White, The Great Controversy, p. 637.

Djabièrnè

21 di òktober

Mas Estudio:

Lesa Ellen G. White, “Visions of Future Glory,” p. 722-733, den Prophets and Kings.

Siensia moderno ta siña ku tur materia ta komponé di atomnan, nan mes trahá di dos partíkula mas chikitu, quarks i leptones, ku ta kere di ta e komponentenan di tur realidat físiko. Si, anto, den sentro di e mundu físiko tin quarks i leptones, e Dios ku no solamente a krea i ta sostené e mundu ei lo no por simplemente konfigurá e quarks i leptones di nobo ora e momento yega pa resusitá nos? Burlando di e resurekshon, e ateista Bertrand Russel a puntra kiko ta pasa ku esnan ku kanibalnan a kome, pasobra nan kurpa awor ta parti di esun di e kanibal, i pues ken ta risibí kiko na resurekshon? Pero suponé ku Señor simplemente ta kue quarks i leptones e último komponentenan di eksistensia, for di unda ku ta, i, basá riba e informashon ku E ta poseé tokante kada un di nos, ta rekonstruí nos for di e quarks i leptones ei bai ariba? E no tin mester nos original; kualke lo sirbi. Of, de echo, E por djis papia quarks i leptones nobo na eksistensia i kuminsá for di einan. Kon ku E hasié, e Dios ku a kreá e universo akí, por kreá nos di nobo, loke El a primintí di hasi na resurekshon di e mortonan.

"E Dunadó di bida lo yama Su poseshon ku El a kumpra den e promé resurekshon, i te na e ora triunfante ei, ora e último trompèt lo zona i e ehérsito enorme lo sali pa viktoria eterno, tur santu ku ta drumi lo keda mantené den siguridat i lo ta wardá manera un hoya presioso, ku ta konosí pa Dios na nòmber. Pa medio di e poder di e Salbador ku tabata biba den nan miéntras nan tabata biba i pasobra nan tabata partísipe di e naturalesa divino, ta tresé nan for di entre e mortonan.” — Ellen G. White Comments, The SDA Bible Commentary, tomo 4, p. 1143.

Preguntanan pa Diskushon:

pregunta 1 Tin masoménos 2 triyón galaksia eifó, kada un trahá di bion i bionnan di strea. I algun di e streanan akí tin planeta ta drai rònt di nan, meskos ku e planetanan den nos sistema solar ta drai rònt di solo. Awor, pensa riba e poder inkreibel di Dios, ku no solamente a krea tur e streanan akí, sino ku ta sostené nan i konosé nan na nòmber (Salmo 147:4). Aunke e realidat asombroso akí no ta proba ku e mesun Dios akí por òf lo lanta e mortonan, kon e ta revelá na nos e mesun poder asombroso ku e tin i dikon, siguramente, algu manera resurekshon lo no ta mas ayá di Su poder?

pregunta 2 Hebreonan 11 ta enfatisá e fieldat i espektativanan di hopi di e asina yamá "héroenan di fe" di tempunan antiguo. Kon e kapítulo akí por enrikesé nos komprendementu di e speransa ku e personahenan den Tèstamènt Bieu tabatin, asta promé ku e resurekshon di Hesus?