E Speransa di Tèstamènt Nobo

12 di novèmber

Lesa pa e Estudio di e Siman Akí:

1 Kor. 15:12–19; Juan 14:1–3; Juan 6:26–51; 1 Tes. 4:13–18; 1 Kor. 15:51–55.

Teksto di Memoria:

“I esaki ta e testimonio: ku Dios a duna nos bida eterno, i e bida akí ta den Su Yu. Esun ku tin e Yu tin bida; esun ku no tin e Yu di Dios no tin bida” (1 Juan 5:11,12, NKJV).

Aunke nan tabata skibi na Griego, tur e eskritornan di Tèstamènt Nobo, eksepto Lukas, tabata hudiu, i nan naturalmente tabata aserká e naturalesa di sernan humano for di e perspektiva hebreo holístiko, no for di esun griego pagano.

Por lo tantu, pa Kristu i e apòstelnan, e speransa kristian no tabata un speransa nobo, mas bien, e despliegue di e speransa antiguo ku e patriarkanan i profetanan ya tabata nutri. Por ehèmpel, Kristu a menshoná ku Abraham a antisipá i a regosihá pa mira Su dia (Juan 8:56). Hudas a deklará ku Enok a profetisá tokante e Segundo Binida (Hudas 14,15). I e buki di Hebreonan ta papia di e héroenan di fe ku a spera un rekompensa selestial ku nan lo no a risibí te ora ku nos risibí esun di nos (Hebr. 11:39,40). E deklarashon akí lo tabata sin sentido si nan alma ya lo tabata huntu ku Señor den shelu.

Enfatisando ku solamente esnan ku ta den Kristu tin bida eterno (1 Juan 5:11,12), Juan ta refutá e teoria di inmortalidat natural di e alma. Berdaderamente, no tin bida eterno sin un relashon di salbashon ku Kristu. E speransa di Tèstamènt Nobo, pues, ta un speransa kristoséntriko, i e úniko speransa ku e eksistensia mortal akí un dia lo bira unu inmortal.

*Studia e lès di e siman akí pa prepará pa Sabat, 19 di novèmber.

E historiadó antiguo griego Herodotus (siglo 5 P.K.) a skibi tokante un tribu ku, na un nasementu, tabata kuminsá un periodo di rou pasobra nan tabata antisipá e sufrimentu ku e yuchi lo a enfrentá si e lo a biba te na edat adulto. Aunke e ritual kisas por ta mustra straño pa nos, tin algun lógika kuné.

Milenionan despues, un anunsio na Merka na prinsipio di siglo 20 tabata bisa: "Pakiko biba, si por dera bo pa 10 dòler?”

Bida por ta bastante difísil, nos sa, asta si nos ta kere den Dios i den e speransa di eternidat. Imaginá bo, sinembargo, kon difísil ta pa esnan ku no tin speransa di nada mas ayá di e eksistensia kòrtiku i hopi bia problemátiko akinan. Mas ku un eskritor sekular a komentá riba e falta di sentido di eksistensia humano, komo ku nos tur no solamente ta muri, sino nos tur ta biba ku e realisashon ku nos ta bai muri. I e realisashon akí ta loke ta hasi henter e proyekto di bida humano, ku hopi biaha ta duru i doloroso den i di su mes, parse nulo i sin efekto. Un pensadó a referí na sernan humano komo nada mas ku "pidanan di karni putrí riba wesunan desintegrá." Mas bien ta duna hende rel, pero, atrobe, ta difísil pa argumentá ku e lógika.

Naturalmente, kontrali na tur esaki, nos tin e promesa bíbliko di bida eterno den Hesus. I esei ta e klave: Nos tin e speransa akí den Hesus i loke Su morto i resurekshon ta ofresé nos. Di otro forma, kua speransa nos tin?

Lesa 1 Korintionan 15:12–19. Kiko Pablo ta bisando akinan tokante kon djaserka relashoná e resurekshon di Kristu ta ku e speransa di nos mes resurekshon?

Pablo ta eksplísito: nos resurekshon ta mará di forma inseparabel ku e resurekshon di Kristu. I si nos no resusitá, e ora ei ta nifiká ku Kristu no a resusitá, i si Kristu no a resusitá, e ora ei, kiko? "Boso fe ta inútil; ainda boso ta den boso pikánan!" (NKJV). Den otro palabra, ora nos muri nos ta keda morto, i pa semper tambe, i por lo tantu, tur kos ta sin sentido. Pablo no ta bisa esei den 1 Korintionan 15:32 (NKJV), “Si e mortonan no ta resusitá, 'laga nos kome i bebe, pasobra mañan nos ta muri!' ”

Si nos eksistensia aktual komo protoplasma basá riba karbon ta tur loke tin, i nos “setenta añanan” (si nos tin suèltu; mas si nos no ta huma ni kome demasiado hamburger di McDonald) ta tur loke nos ta haña, mas ku nunka, nos ta den un situashon bastante fèrfelu. Nada straño ku Ellen G. White ta agregá: "Shelu ta bal tur kos pa nos, i si nos pèrdè shelu nos a pèrdè tur kos.”—Sons and Daughters of God, p. 349.

Pensa riba kon presioso nos speransa i fe ta. Dikon nos mester hasi tur loke nos por, pa grasia di Dios, pa konserv’é?

Lesa Juan 14:3. Ya a pasa mas ku 2.000 aña desde ku Hesus a primintí di bin atrobe. Kon nos por yuda otronan mira ku, apesar di e gran kantidat di tempu, ku realmente no ta importá, e promesa akí ta relevante asta te na nos propio generashon, asina leu for di e tempu ora Hesus a pronunsi’é?

Kuater biaha den e Buki di Revelashon Hesus a deklará, " ‘Mi ta bini pronto!' " (Rev. 3:11; Rev. 22:7,12,20, NIV). E espektativa di Su pronto binida a stimulá e mishon di e iglesia apostóliko i a yena bida di inkontabel kristiannan, a lo largu di e siglonan, ku speransa. Pero generashon tras generashon a muri, i e evento primintí akí ainda no a tuma lugá. I asina, hopi ta puntra nan mes: Kuantu tempu mas nos lo tin ku prediká ku "Hesus ta bini pronto”? E palabranan akí a generá un espektativa irealístiko? (lesa 2 Pe. 3:4)

Hopi Kristian ta keha tokante e "tardansa" largu (kompará ku Mat. 25:5). Pero kon nos, de echo, sa ku e ta un "tardansa" largu? Kua lo tabata e momento “korekto” pa Kristu a regresá? Lo tabata 50 aña pasá, 150, 500? Loke realmente ta importá ta e promesa bíbliko ku "Señor no ta tarda pa kumpli ku Su promesa, manera algun hende ta komprendé tardansa. En kambio, E tin pasenshi ku boso, i no ke pa niun hende peresé, ma pa tur hende bin na arepentimentu” (2 Pe. 3:9, NIV).

Apesar di e siglonan largu desde ku Hesus a asendé, e promesa di Su binida ta keda relevante, asta awe. Dikon? Pasobra tur loke nos tin ta nos propio bida kòrtiku (Salmo. 90:10), siguí pa un sosiegu inkonsiente den graf (Ekl. 9:5,10), i despues e resurekshon final, sin niun oportunidat despues pa kambia nos destino. (Hebr. 9:27). Te asina leu ku ta konserní kada un di e mortonan, manera a indiká den lès 3, pasobra tur e mortonan ta na soño i inkonsiente, e segundo binida di Kristu ta nada mas ku un momento òf dos despues ku nan muri. Pa bo, den bo propio eksperensia personal, meskos ku pa henter e pueblo di Dios di tur époka, Kristu su regreso no ta mas ku un momento despues di bo morto. Esei ta mashá pronto, no ta asina?

Kada dia ku pasa ta trese nos un dia mas serka na e aparishon glorioso di nos Señor Hesu-Kristu den e nubianan di shelu. Aunke nos no sa ki dia E lo bin, nos por ta sigur ku E lo bin, i esei ta loke realmente ta importá.

Un pastor a prediká un sermon, argumentando ku e no tin kunes ki dia Kristu ta bini bèk. E úniko kos ku ta importá p'e ta ku Kristu ta bini bèk! Kon e lógika ei ta funshoná pa bo, i kon e lo por yuda, si bo ta deskurashá pasobra ainda Kristu no a bini bèk?

Den un di Su milagernan, Hesus a alimentá sinku mil hende ku solamente un kantidat chikitu di pan i piská (Juan 6:1–14). Persibiendo ku e multitut tabatin intenshon di proklam’E rei (Juan 6:15), Hesus a nabegá ku Su disipelnan na e otro banda di Laman di Galilea. Pero e siguiente dia e multitut a siguiE te aya, kaminda El a pronunsiá Su sermon poderoso riba e Pan di Bida, ku énfasis spesial riba e don di bida eterno (Juan 6:22–59).

Lesa Juan 6:26–51. Kon Hesus a asosiá e don di bida eterno ku e resurekshon final di e hustunan?

Den su sermon, Hesus a enfatisá tres konsepto básiko di bida eterno. Na promé lugá, El a identifiká su Mes komo "e pan ku ta baha for di shelu i ta duna bida na e mundu" (Juan 6:33,58, NIV). Deklarando ku "Ami ta [griego egō eimi] e pan di bida" (Juan 6:35,48), Hesus a presentá su mes komo e Gran “AMI TA” di e Tèstamènt Bieu. (Eks. 3:14). Na di dos lugá, Hesus a splika ku bida eterno por ser sigurá den Dje: "esun ku bini serka Mi" i "esun ku kere den MI" lo tin e bendishon akí (Juan 6:35, NKJV). I finalmente, Hesus a vinkulá e don di inmortalidat ku e resurekshon final, i a sigurá Su oudiensia tres bia: "i lo Mi resusit’é riba e último dia" (Juan 6: 40,44,54, NKJV).

Hesus a duna tambe e promesa asombroso akí: "Di bèrdat, di bèrdat, Mi ta bisa boso, ken ku kere, tin bida eterno" (Juan 6:47). Por lo tantu, e don di bida eterno ya ta un realidat aktual. Pero esaki no ta nifiká ku e kreyente nunka lo muri, pasobra e mesun ekspreshon "resusit’é" (Juan 6:40, NKJV) ta impliká bolbe bèk na bida despues ku un hende a muri.

E kuadro ta kla. Sin Kristu, un hende no tin bida eterno. Pero, asta despues di aseptá Kristu i tin e siguransa di bida eterno, pa awor nos ta sigui ta mortal i, pa e motibu ei, suheto na morto natural. Na e Segundo Binida, Hesus lo resusitá nos i, na mes momento, E lo duna nos e don di inmortalidat ku ya tabata di nos. E don ta sigurá, no pa motibu di un supuesto inmortalidat natural di e alma, sino, mas bien, pa motibu di e hustisia di Hesus ku ta bin na nos pa medio di fe den djE.

Meditá riba e palabranan di Hesus ku, si bo Kere den djE, bo tin, aworakí mes, bida eterno! Kon e promesa maravioso akí por yuda bo trata ku e realidat doloroso di nos mortalidat aktual, aunke e ta solamente temporal?

E tesalonisensenan tabata konvensí ku lo a duna bida eterno eksklusivamente na esnan ku lo a keda na bida te na e Segundo Binida. "Nan a protegé kuidadosamente e bida di nan amigunan, pa nan no muri i pèrdè e bendishon ku nan tabata spera di risibí na binida di nan Señor. Pero un tras di otro a kita nan sernan kerí for di nan, i ku angustia e tesalonisensenan a wak e kara di nan mortonan pa último bia, riskando apénas di spera di topa nan den un bida futuro.”—Ellen G. White, The Acts of the Apostles, p. 258.

Lesa 1 Tesalonisensenan 4:13–18. Kon Pablo a koregí e konsepto eróneo akí?

Tin un tendensia históriko pa lesa den e ekspreshon "trese huntu kunE esnan ku ta drumi den Hesus” (1 Tes. 4:14, NKJV) mas ku e teksto ta bisando. Hopi ku aseptá e teoria di inmortalidat natural di e alma ta sugerí ku Kristu, na Su Segundo Binida, lo trese huntu kunE for di shelu e almanan di e mortonan hustu ku ya ta den shelu huntu ku Dios. E almanan ei por reuní ku nan respektivo kurpanan resusitá. Pero un interpretashon asina no ta den harmonia ku e siñansanan general di Pablo riba e tópiko.

Lesa e palabranan di e teólogo no atventista akí riba e nifikashon berdadero di e versíkulo akí: "E rason pakiko e kristiannan tesalonisense por tin speransa miéntras nan ta yora pa e miembronan morto di nan iglesia ta ku Dios ‘lo trese’ nan, es desir, E lo resusitá e kreyentenan defuntu akí i laga nan ta presente na Kristu Su regreso, di manera ku nan lo ta ‘huntu kunE.’ E implikashon ta ku e kreyentenan defuntu akí lo no tin niun tipo di desbentaha na e aparishon glorioso di Kristu sino lo ta ‘huntu kunE’ di tal manera ku nan ta kompartí igualmente ku kreyentenan bibu den e gloria asosiá ku Su regreso.”—Jeffrey A. D. Weima, 1-2 Tesalonisensenan, Baker Exegetical Commentary on the New Testament (Grand Rapids, MI: Baker Academic, 2014), p. 319.

Si e almanan di e mortonan hustu ya tabata huntu ku Señor den shelu, Pablo no tabatin mester di menshoná e resurekshon final komo e speransa kristian; e por a djis menshoná ku e hustunan ya tabata huntu ku Señor. Pero, en kambio, e ta bisa ku “esnan ku ta drumi den Hesus” (1 Tes. 4:14, NKJV) lo a resusitá for di morto na fin di tempu.

E speransa den e resurekshon final a trese konsuelo pa e tesalonisensenan ku tabata aflihí. E mesun speransa por yuda nos enfrentá e momentunan doloroso ku konfiansa, ora e gara friu di morto tuma nos sernan kerí for di nos.

Lesa 1 Korintionan 15: 51–55. Kua "misterio" (1 Kor. 15:51) Pablo ta splikando?

Algun predikadó popular ta sugerí ku e "misterio" (1 Kor. 15:51) akí ta e "rapto sekreto" di e iglesia, ku lo tuma lugá shete aña promé ku e segundo binida glorioso di Kristu. Den e "rapto sekreto" akí ta saka kristiannan fiel di ripiente, silensioso i sekreto, hiba shelu miéntras tur otro hende ta keda akinan puntrando nan mes kiko a sosodé ku nan. Hende kisas lo por haña nan di ripiente den un outo sin shofùr, pasobra a ranka e shofùr bai shelu kuné, i tur loke ta "sobra ta nan pañanan." E Left Behind seri di 16 tomo mas mihó bendí, a kombertí su mes den kuater pelíkula, i a promové e siñansa falsu akí, eksponiendo miónes na dje.

Naturalmente, ningun pasashi bíbliko ta respaldá un distinshon artifisial asina entre e rapto i e Segundo Binida. E "misterio" ku Pablo ta referí na dje ta simplemente e transformashon di e hustunan bibu pa uni ku e hustunan resusitá na Kristu su segundo binida. Esaki ta e "rapto." No tin "rapto sekreto" pasobra e Segundo Binida lo ta visibel pa tur ser humano bibu (Rev. 1:7), i tantu e resurekshon di e mortonan komo e transformashon di esnan bibu lo tuma lugá na zonido di e trompèt na e regreso di Kristu. (1 Kor. 15:51,52).

Kristu su segundo binida lo produsí e enkuentro di mas asombroso ku hamas a eksistí. E hustunan bibu ta keda transformá "den un momento, den un fregá di wowo" (1 Kor. 15:52). Na e bos di Dios, nan ta glorifiká; awor nan ta bira inmortal i huntu ku e santunan resusitá ta tuma nan pa topa ku nan Señor den laira. Angelnan ta "reuní su eligínan for di e kuater bientunan, for di un ekstremo di shelu te na e otro" (Mat. 24:31, NKJV).

"Angelnan santu ta karga muchanan chikitu hiba den brasa di nan mama. Amigunan ku morto a separá pa largu tempu ta reuní, pa no separá nunka mas, i ku kansionnan di alegria nan ta subi huntu bai na e Siudat di Dios.”—Ellen G. White, The Great Controversy, p. 645.

Esaki ta un promesa asina maravioso, algu asina diferente for di tur loke nos a eksperensiá, ku e ta difísil pa komprondé. Pero pensa riba e inmensidat di e kòsmòs, komo tambe e komplehidat inkreibel di bida akinan. Kreashon mes ta testifiká di e poder asombroso di Dios. Kiko tur esaki ta siña nos tokante e poder di Dios pa trasladá e bibunan i resusitá e mortonan na Hesus Su segundo binida?

Lesa Ellen G. White, “The Thessalonian Letters,” p. 255–268; “Called to Reach a Higher Standard,” p. 319–321, den The Acts of the Apostles.

"E romanonan," Stephen Cave a skibí, "tabata bon konsiente di e kreensia di e kristiannan ku un dia nan lo a resusitá físikamente for di graf i nan a hasi tur loke nan tabata por pa hasi chèrchi i stroba e speransanan ei. Un informe di un persekushon na Gaul na aña 177 D.K. ta registrá ku promé tabata mata e mártirnan, despues tabata laga nan kadavernan sin dera, putri pa 6 dia promé ku a kima nan i tira e shinishinan den riu Rhône. 'Laga nos wak awor si nan lo resusitá atrobe,' a reportá ku e romanonan a bisa.”— Stephen Cave, Immortality: The Quest to Live Forever and How lt Drives Civilization (New York: Crown Publishers, 2012), p. 104, 105.

E lès ophetivo chikitu akí den eseptisismo teológiko, aunke e ta dramátiko, ta fuera di lugá; e no a proba nada tokante e promesa bíbliko di resurekshon. E Poder ku a lanta Hesus for di morto por hasi e mesun kos pa nos tambe, no importá e estado di nos kurpa. Despues di tur kos, si e mesun Poder ei a krea i ta sostené henter e kòsmòs, seguramente E por trasladá e bibunan i resusitá e mortonan.

" ‘Meskos tambe Dios lo trese huntu kunE esnan ku a muri den Hesus’ [1 Tes. 4:14], Pablo a skibi. Hopi ta interpretá e pasashi akí manera e ta nifiká ku esnan ku ta drumi lo bini huntu ku Kristu for di shelu; pero Pablo tabata ke men ku mesun kos ku Kristu a lanta for di morto, asina Dios lo yama e santunan ku ta drumi for di nan graf i hiba nan huntu kunE na shelu. Ki konsolashon presioso! Ki speransa glorioso! No solamente pa e iglesia di Tesalónika, sino pa tur kristian unda ku nan ta.”—Ellen G. White, The Acts of the Apostles, p. 259.

Preguntanan pa Diskushon:

Un hende a bisa: "Morto ta kaba ku bo. . . . Kaba ku bo kompletu, ku pista i tur, ta rekurí un kaminda largu den direkshon di destruí e nifikashon di un hende su bida." E tin rason. Ki speransa, e ora ei, nos tin kontra algu sin sentido asina den nos bida?

Kon nos por harmonisá e nesesidat di krese pa yega na perfekshon (Fil. 3:12–16) ku e echo ku solamente na Kristu su segundo binida nos lo risibí un naturalesa inkoruptibel i sin piká (1 Kor.15:50–55)?

Kon nos por yuda un hende atrapá den e idea di e "rapto sekreto" pa mira dikon e siñansa akí ta robes?

Bolbe lesa 1 Korintionan 15:12–19. Kiko den e versíkulonan akí ta presentá un evidensia asina poderoso pa e siñansa ku e mortonan ta drumi, kontrali na nan ta ariba den shelu ku Hesus? Ki sentido e versíkulonan akí tin si e mortonan hustu ta, enbèrdat, den shelu huntu ku Hesus aworakí?