Engañonan di Tempu di Fin

3 di desèmber

Lesa pa e Estudio di e Siman Akí:

Mat. 7:21–27; Juan 11:40–44; 1 Pe. 3:18; 1 Sam. 28:3–25; Efe. 6:10–18.

Teksto di Memoria:

“I no ta straño! Asta Satanas ta disfrasá su mes komo un angel di lus. Pues no ta straño si su ministernan tambe ta disfrasá nan mes komo ministernan di hustisia. Nan fin lo pas ku nan aktonan” (2 Korintionan 11:14,15, NRSV).

Nos mundu kontemporáneo a bira un krisol di loke ta sobrenatural i loke ta místiko, yudá pa Hollywood, ku no tin problema pa traha pelíkulanan ku temanan religioso i místiko ku un meskla di eror i engaño. E mentira bieu: “Seguramente boso lo no muri!” (Gen. 3:4, NASB) tambe a inspirá algun di e bukinan mas lesá i e pelíkulanan mas mirá di e último dékadanan, i hopi weganan di vidio tambe. Indudablemente, nos ta eksponé na i tentá pa e tereno enkantá di Satanas, ku por aparesé den gran kantidat di forma i asta, den algun kaso, por bin skondí den e kapa di siensia.

Un di e fenómenonan di mas engañoso tabata loke ta yama eksperensianan "serka di morto" (ESM), kaminda esnan ku a "muri" a bin bèk na bida ku storianan di un bida despues di morto. Hopi hende a mira e eventonan akí komo un prueba di un alma inmortal!

Durante e siman akí, nos lo konsiderá algun engaño di tempu di fin, inkluyendo mistisismo, eksperensianan serka di morto, reenkarnashon, nigromansia i adorashon di antepasado, i otronan. Esakinan ta temanan peligroso ku nos mester ta konsiente di dje pero sin eksponé nos mes na nan influensianan.

*Studia e lès di e siman akí pa prepará pa Sabat, 10 di desèmber.

Olanan fuerte di mistisismo a inundá nos mundu. E palabra "mistisismo" ta un término kompleho ku ta enserá un gran variedat di ideanan. For di un perspektiva religioso, e palabra ta impliká e union di e individuo ku esun Divino òf Apsoluto den algun tipo di eksperensia spiritual òf trans. Esaki ta karakterisá e eksperensia di adorashon di asta sierto iglesianan. E fenómenonan por varia den forma i intensidat, pero e tendensia semper ta pa remplasá e outoridat di e Palabra Skirbí di Dios pa hende su propio eksperensianan suphetivo. En todo kaso, Beibel ta pèrdè hopi di su funshon doktrinal, i e kristian ta permanesé vulnerabel pa su propio eksperensianan. E tipo di religion suphetivo akí no ta proveé un protekshon kontra niun engaño, spesialmente esnan di tempu di fin.

Lesa Mateo 7:21–27. Den lus di Hesus Su propio palabranan, kiko ta nifiká traha nos kas spiritual "riba e baranka" i trah’é "riba santu"?

Tin un tendensia fuerte den e mundu kristian posmoderno pa minimisá e relevansia di doktrinanan bíbliko, konsiderando nan komo ekonan laf di un forma opsoleto di religion. Den e proseso akí, e persona di Kristu ta remplasá e siñansanan di Kristu artifisialmente, argumentando, por ehèmpel, ku algun storia bíbliko òf otro no por ta bèrdat pasobra Hesus, manera nan ta persibiE, nunka lo a permití esei sosodé manera e ta skirbí. Sintimentunan i gustu personal ta terminá siendo e kriterio pa interpretá e Skrituranan òf asta pa rechasá totalmente loke Beibel klaramente ta siña, hopi biaha tokante obediensia na Dios, loke, manera Hesus a bisa, ta asina esensial pa traha un hende su kas riba e baranka.

Esnan ku ta pensa ku no ta importá loke nan ta kere den doktrina, kontal ku nan ta kere den Hesukristu, ta riba tereno peligroso. E inkisidornan romano, ku a kondená un kantidat inkontabel di protestantnan na morto, tabata kere den Hesukristu. Esnan ku a “saka demoñonan" den nòmber di Kristu (Mat. 7:22, NKJV) tabata kere den djE. “E posishon ku no tin niun konsekuensia loke hende ta kere, ta un di e engañonan di mas eksitoso di Satanas. E sa ku e bèrdat, risibí den su amor, ta santifiká e alma di esun ku ta risibié; p'esei e ta trata konstantemente na sustituí, teorianan falsu, fábulanan i un otro evangelio.”—Ellen G. White, The Great Controversy, p. 520.

Kon nos por lucha kontra e tendensia humano pa laga nos emoshonnan i deseonan pone nos hasi kosnan kontrali na e Palabra di Dios?

Algun di e argumentonan di mas popular i moderno pa "proba” e teoria di inmortalidat natural di e alma ta "eksperensianan serka di morto". Den su buki Life After Life: The Investigation of a Phenomenon¬Survival of Bodily Death (Atlanta, GA: Mockingbird, 1975), Raymond A. Moody Jr. a presentá e resultadonan di su estudio di sinku aña na mas ku shen hende ku a eksperensiá "morto klíniko" i a rebibá. E individuonan akí a afirmá di a mira un ser di lus amoroso i kaluroso promé ku el a bin bèk na bida. A konsiderá esaki komo "evidensia eksitante di sobrebibensia di e spiritu humano mas ayá di morto" (portada patras). Ku añanan, a publiká hopi otro buki similar, promoviendo e idea akí. (Lesa lès 2.)

Lesa e relatonan di resurekshon di 1 Reinan 17:22–24, 2 Reinan 4:34–37, Marko 5:41–43, Lukas 7:14–17, i Juan 11:40–44. Kuantu di nan ta papia tokante kualke tipo di eksistensia konsiente miéntras esnan resusitá tabata morto, i dikon e kontesta ei ta importante?

Tur eksperensia serka di morto reportá den literatura moderno ta di hendenan konsiderá klínikamente morto, pero no realmente morto, kontrali na Lázaro, ku tabata morto pa kuater dia i ku su kadaver tabata putriendo (Juan 11:39). Ni Lázaro ni niun di esnan resusitá for di morto den tempunan bíbliko a yega di menshoná algun eksperensia despues di morto, sea den paraiso, den purgatorio òf den fièrnu. Esaki ta, berdaderamente, un argumento di silensio, pero e ta den kompleto akuerdo ku e siñansanan bíbliko riba e estado inkonsiente di e mortonan!

Pero ke tal di e eksperensia "serka di morto" asina komunmente relatá awe? Si nos aseptá e siñansa bíbliko di inkonsiensia di e mortonan (Job 3:11–13, Salmo. 115:17, Salmo 146:4, Eklesiastes 9:10), e ora ei nos ta keda ku dos posibilidat prinsipal: sea e ta un halusinashon sikokímiko natural bou di kondishonnan ekstremo, òf e por ta un eksperensia satániko engañoso sobrenatural (2 Kor. 11:14). Engaño satániko bèrdat por ta e splikashon, spesialmente pasobra den algun kaso e hendenan akí ta afirmá ku nan a papia ku nan famianan morto! Pero e por ta un kombinashon di ámbos faktor.

Ku e engaño predominante akí, i asina konvisente pa hopi, ta krusial ku nos ta pega firmemente na e siñansa di e Palabra di Dios, apesar di kualke eksperensia ku nos òf otronan kisas lo por tin ku bai kontra di loke Beibel ta siña.

Ki fasinante ku ESM hopi biaha awor ta bin ku e aprobashon di “siensia”. Kiko esaki ta siña nos tokante kon kuidadoso nos mester ta asta di kosnan ku siensia supuestamente ta "proba"?

E noshon pagano di un alma inmortal ta proveé e fundeshi pa e teoria no bíbliko di reenkarnashon òf transmigrashon di e alma. Algun di e religionnan prinsipal di mundu a adoptá e teoria akí. Miéntras mayoria kristian ta kere den eksistensia di un alma inmortal, ku ta biba den un shelu permanente òf fièrnu despues di morto, esnan ku ta kere den reenkarnashon ta sostené ku un alma inmortal asina ta pasa den hopi siklo di morto i renasementu aki riba tera.

Algun hende ta pensa ku reenkarnashon ta un proseso di evolushon spiritual ku ta permití e spiritu alkansá nivelnan ainda mas grandi di konosementu i moralidat riba su kaminda den direkshon di perfekshon. Hindúnan ta kere ku e alma eterno ta pasa a traves di un seri di konsiensia òf "samsara" den seis klase di bida: akuátiko, mata, reptil i insekto, para, animalnan i sernan humano, inkluyendo e siudadanonan di shelu.

Lesa Hebreonan 9:25–28 i 1 Pedro 3:18. Si Hesus a muri solamente "un biaha" (Hebr. 9:28, 1 Pe. 3:18, NKJV) i di mes manera tur ser humano ta muri solamente "un biaha", dikon asta algun supuesto kristian ta kere den algun forma di reenkarnashon?

Hopi hende ta kere no den loke nan mester kere, sino den loke nan ke kere. Si un teoria ta trese pas eksistensial i konsuelo pa nan, esei ta sufisiente pa resolvé e diskushon pa nan. Pero pa esnan ku ta tuma Beibel na serio, no tin ningun manera pa aseptá e teoria di reenkarnashon.

Na promé lugá, e teoria akí ta kontradesí siñansanan bíbliko di mortalidat di e “alma” i resurekshon di e kurpa (1 Tes. 4:13–18).

Na di dos lugá, e ta nenga e doktrina di salbashon pa grasia pa medio di fe den e obra redentor di Hesukristu (Efe. 2:8–10) i ta remplas’é pa obranan humano.

Na di tres lugá, e teoria ta kontradesí e siñansa bíbliko ku e desishonnan ku nos ta tuma den e bida akí ta disidí destino eterno pa semper (Mat. 22:1–14, Mat. 25:31–46).

Na di kuater lugá, e teoria akí ta minimisá e nifikashon i relevansia di e segundo binida di Kristu (Juan 14:1–3).

I na di sinku lugá, e teoria ta proponé oportunidatnan despues di morto pa un hende ku ainda tin ku superá e trampanan di su propio bida, lokual no ta bíbliko (Hebr. 9:27).

Den resúmen, no tin lugá pa e idea di reenkarnashon den e fe kristian.

E palabra "nigromansia", ta derivá for e términonan griego nekros (morto) i manteia (adiviná). Praktiká for di tempunan antiguo, nigromansia ta un forma di konvoká e supuesto spiritunan aktivo di e mortonan pa asina haña konosementu, hopi biaha di eventonan futuro. Adorashon di antepasadonan, mientrastantu, ta e kustumber di venerá antepasadonan ku a muri pasobra ainda ta konsiderá nan famia i nan spiritu por, nan ta kere, influensiá e asuntunan di esnan bibu. E práktikanan pagano akí por ta hopi atraktivo pa esnan ku ta kere den un alma inmortal i ku tambe ta sinti falta di nan sernan kerí ku a muri.

Lesa 1 Samuel 28:3–25. Ki lèsnan spiritual kontra kualke supuesto komunikashon ku e mortonan por saka for di e eksperensia di Saul ku e muhé montadó na Endor?

Beibel a deklará klaramente ku tur spiritista, medium, hasidó di brua, i nigromante, den teokrasia israelita antiguo, tabata abominashon na Señor i mester a muri pa medio di piedramentu (Lev. 19:31; Lev. 20:6, 27; Deut. 18:9–14). Di akuerdo ku e lei akí, Saul a destruí tur medium i spiritista di Israel (1 Sam. 28:3,9).

Pero despues, despues ku Señor a rechasá Saul, e mes a bai e stat kananeo di Endor pa konsultá un muhé montadó (1 Sam. 28:6,7,15; kompará ku Hosue 17:11, Salmo. 83:10). El a pidié pa lanta e profeta Samuel ku a muri, ku supuestamente a subi den un aparishon nigromántiko i a papia ku Saul (1 Sam. 28:13–19). E spiritu gañadó, ku a pretendé di ta Samuel, a bisa Saul: “mañan abo i bo yu hòmbernan lo ta huntu ku mi" (1 Sam. 28:19, NKJV). Miéntras el a predesí Saul su morto, e spiritu gañadó ei, ku simplemente a asumí e forma di Samuel, a konfirmá e teoria no bíbliko di inmortalidat natural di e alma. Tabata un engaño poderoso, i Saul mester tabata sa mihó ku bira enbolbí ku loke el a kondená anteriormente.

Mas ku dos siglo despues, profeta Isaias a skirbi: “I ora nan bisa bo, ‘Buska esnan ku ta medium i mago, ku ta papia kuchikuchi i papia den djente,’ un pueblo no mester buska su Dios? Nan mester buska e mortonan na fabor di e bibunan? Na e lei i na e testimonio! Si nan no ta papia di akuerdo ku e palabra akí, ta pasobra no tin lus den nan" (Isa. 8:19, 20, NKJV; tambe Isa. 19:3).

Kuantu biaha, bou di strès, nos ta hasi kosnan ku nos sa ku ta robes? Dikon fe, orashon, i obediensia na e Palabra di Dios ta nos úniko defensa sigur kontra nos mes?

Similar na nigromansia tin e personifikashonnan diabóliko di e mortonan i otro aparishonnan diabóliko. E personifikashonnan por ta den forma di un miembro di famia, amigu, òf kualke hende ku a muri. Tantu e aparishon físiko komo e stèm ta hopi similar na esnan di esun ku a muri. Lo usa tur e engañonan satániko akí pa gaña esnan ku no ta firmemente ankrá riba e Palabra di Dios. Ellen G. White ta spièrta: "E apòstelnan, personifiká pa spiritunan mentiroso akí, ta kontradisí loke nan a skirbi bou di inspirashon di Spiritu Santu ora nan tabata riba tera.”—The Great Controversy, p. 557. I ademas, "Komo e akto ku lo koroná e gran drama di engaño, Satanas mes lo personifiká Kristu.”—The Great Controversy, p. 624.

Lesa 2 Korintionan 11:14,15 i Efesionan 6:10–18. Kiko mester ta nos protekshon kontra engañonan demoniako asina?

Apòstel Pablo ta atvertí nos ku "nos lucha no ta kontra enemigunan di karni i sanger, sino kontra e gobernantenan, kontra e outoridatnan, kontra e podernan kósmiko di skuridat aktual akí, kontra e forsanan spiritual di maldat den e lugánan selestial" (Efe. 6:12, NRSV). Nos por ta protegé kontra e engañonan akí solamente si nos ta bistí ku "henter e armadura di Dios" (Efe.6:13, NKJV) deskribí den Efesionan 6:13–18.

E personifikashonnan i aparishonnan satániko por ta hopi spantoso i engañoso, pero nan no por gaña esnan ku ta protegé pa Dios i ankrá riba e Palabra di Dios. For di un perspektiva doktrinal, esnan ku ta kere den e doktrina bíbliko di e inmortalidat kondishonal di sernan humano sa ku kualke aparishon òf komunikashon ku e mortonan ta di orígen satániko i mester keda rechasá pa medio di e grasia poderoso di Dios. Atrobe, no importá kon poderoso, konvisente, i aparentemente real e manifestashon ta, semper nos mester para firme den e siñansa ku e mortonan ta drumí den graf.

Imaginá bo, sinembargo, pèrdè un ser kerí i despues kere ku e mesun ser kerí akí ta aparesé na bo? I ta ekspresá amor na bo? I bisa bo kuantu nan ta sinti bo falta? I bisa kos ku, sí, solamente nan por tabata sa? I bisa ku awor nan ta den un lugá mihó? Si un hende no ta apsolutamente ankrá den loke Beibel ta siña tokante e estado di e mortonan, pensa kon fásilmente e lo por kai pa e engaño akí. Spesialmente pasobra nan ke ker’é tambe.

Kiko ta nifiká bisti "henter e armadura di Dios"? Den un sentido práktiko di dia pa dia, kon nos ta hasi esaki den kada área di nos bida, no solamente ora nos ta trata ku engañonan di tempu di fin?

Lesa Ellen G. White, “Dealing With False Science, Cults, Isms, and Secret Societies,” p. 602–609, den Evangelism; i “Spiritism,” p. 86–93, den Confrontation.

Ta eksistí un fundashon ku ta afirmá ku e ta kreando teknologia ku lo permití nos hasi kontakto ku esun ku a muri "pa medio di mensahenan di teksto, yamadanan telefóniko, i konferensia pa medio di vidio". Yamando e mortonan PMP (personanan posmaterial), su wèpsait ta afirmá ku ora e sernan humano muri, simplemente nan ta pasa “na un otro fase di eternidat" pero "ta konservá nan konsiensia, identidat, i aspektonan esensial di nan forma físiko anterior." Pero, mas importante ainda, e hendenan di Soulphone ta afirmá ku nan ta desaroyando, den tres fase, teknologia ku lo permití komunikashon entre personanan material i posmaterial.

E promé fase, lo "permití pa manda mensahe di teksto i skirbi na famia, amigu, i ekspertonan posmaterial den tur kampo di ekspertisia." Fase dos ta suponé di "kapasitá papiamentu ku bo sernan kerí ku ta bibando den un otro parti di eternidat." I e di tres fase, e ta bisa, lo habri e kaminda pa “tende i mira esnan ku ta eksperensiando e kampo di tur posibilidat for di un punto di opservashon diferente."

Spesialmente spantoso ta e forma kon nan ta tèst si e morto ku ta komunikando ta realmente esun ku e ta bisa ku e ta. "Por ehèmpel,” e wèpsait ta bisa, "un mayor deskonsolá lo por hasi e siguiente pregunta na un yu hòmber òf muhé ku a kambia di mundu: ‘Bo tabatin un kachó ku yama Snoopy ora bo tabata chikitu? Nos a duna bo un sambèchi pa bo di dies kumpleaño?’" Ki interesante den lus di e atvertensia akí: “Sernan spiritual tin biaha ta aparesé na e personanan den forma di nan amigu ku a muri, i relatá insidentenan konektá ku nan bida i realisá aktonan ku nan a ehekutá ora nan tabata na bida.”—Ellen G. White, Patriarchs and Prophets, p. 684.

Preguntanan pa Diskushon:

Usando e esküs di ta kulturalmente aseptabel, hopi kristian ta aseptá tur loke media ta promové. Kua prinsipionan bíbliko mester guia nos relashon ku media, spesialmente ora nan ta promové konseptonan abiertamente ku nos sa ku ta inkorekto i engañoso (lesa Salmo 101:1–8, Prov. 4:23, Fil. 4:8)?

Kon nos por yuda otro pa vense Satanas su engañonan di tempu di fin sin eksponé nos mes na e influensia engañoso di e mesun engañonan ei?

Hopi kristian a mira e storia ku a yama "Samuel" for di graf komo prueba bíbliko ku e mortonan ta sigui biba. Kiko e relato akí ta siña nos tokante dikon nos no por dependé solamente riba un solo teksto òf storia pa konstruí un doktrina, sino, en kambio, nos mester wak tur loke Beibel ta bisa tokante un tópiko?