Tur Kos Nobo

24 di desèmber

Lesa pa e Estudio di e Siman Akí:

2 Pe. 3:13; Rev. 21:3,22; 1 Juan 3:2,3; 1 Pe. 1:22; Isa. 25:8; Rev. 22:3–5.

Teksto di Memoria:

“Despues Esun ku tabata sinta riba e trono a bisa: ‘Mira, Mi ta hasi tur kos nobo.’ I El a bisa mi: ‘Skibi, pasobra e palabranan akí ta berdadero i fiel’ ” (Revelation 21:5, NKJV).

Skritura ta duna nos e speransa akí: "Ma di akuerdo ku Su promesa nos ta spera riba shelunan nobo i un tera nobo, den kua hustisia ta biba” (2 Pe. 3:13, NASB).

Pa algun, sinembargo, e promesa di "un shelu i un tera nobo" (Rev. 21:1) ta parse manera un fantasia, storianan kontá pa esnan den poder ku tabata usa e speransa di un bida despues di morto pa yuda mantené e masa na liña. E idea ta: Aunke kosnan ta difísil pa bo awor akí, un dia lo bo haña bo rekompensa den shelu, òf algu similar.

I aunke algun persona a usa e futuro speransa presentá den Beibel di e manera ei, nan abuzu no ta kambia e bèrdat di e promesanan ku nos tin tokante e shelunan nobo i e tera nobo.

Den e último dianan, hasidónan di chèrchi lo ridikulisá nos speransa bendishoná (2 Pe. 3:3–7). Pero por a mira nan chèrchinan, manera a pronostiká, komo mas evidensia ku loke ku Beibel ta bisa ta bèrdat, pasobra nan ta hasiendo chèrchi manera Beibel a pronostiká ku nan lo a hasi.

Durante e siman akí nos lo reflekshoná riba e promesa glorioso di un shelu nobo i un tera nobo, inkluyendo e tèmpel selestial, e presensia di Dios, e fin di morto i lágrima, i, finalmente, e triunfo final di e amor di Dios.

*Studia e lès di e siman akí pa prepará pa Sabat, 31 di desèmber.

Pa algun siguidó di filosofia griego, e idea ku algu ta físiko ta nifiká ku e ta malu. Ta p'esei pa nan ta inkonsebibel pa pensa riba un shelu real ku hende real den futuro. Den e pensamentu akí, pa e ta un shelu i ta bon, e mester ta un estado puramente spiritual, liber di e manchanan ku nos ta haña den e mundu físiko akinan. Si algu ta material, nan ta afirmá, e no por ta spiritual; i si algu ta spiritual, e no por ta material. En kambio, Beibel ta papia di shelu den términonan konkreto, pero sin e limitashonnan imponé pa e presensia di piká.

Lesa Isa. 65:17–25; Isaias 66:22,23; 2 Pedro 3:13; i Revelashon 21:1–5. Kua ta e mensahe final di e pasashinan akí?

E buki di Isaias ta proveé bistanan interesante riba kon tera lo tabata si Israel, komo nashon, a permanesé fiel na nan pakto ku Dios (Isa. 65:17–25; Isa. 66:22,23; kompará ku Deuteronomio 28). Henter e ambiente ku su vários ekspreshonnan di bida lo a krese mas i mas den direkshon di e plan original di Dios, es desir, promé ku entrada di piká.

Sinembargo, e plan ei no a materialisá manera a spera. Despues a establesé un plan nobo, pero awor ku e iglesia, komponé di hudiunan i paganonan di tur nashon (Mat. 28:18–20, 1 Pe. 2:9). Mester bolbe lesa e profesianan di Isaias for di perspektiva di e iglesia (2 Pe. 3:13, Rev. 21:1–5).

"Den Beibel ta yama e herensia di esnan salbá ‘un pais.’ Hebreonan 11:14–16. Einan, e Wardadó di karné selestial ta hiba Su tou na fuentenan di awanan bibu. E palu di bida ta duna su fruta tur luna, i e blachinan di e palu ta pa utilidat di e nashonnan. Tin riunan ku ta kore eternamente, kla manera kristal, i banda di nan palunan ku ta zuai ta tira nan sombra riba e kamindanan prepará pa e redimínan di Señor. Aya e yanuranan ekstenso ta hincha i bira serunan bunita, i e serunan di Dios ta elevá nan tòpnan haltu. Riba e yanuranan trankil ei, banda di e riunan bibu ei, e pueblo di Dios, asina tantu tempu peregrino i bagamundu, lo haña un hogar.”—Ellen G. White, The Great Controversy, p. 675.

Hopi eskritor sekular, sin e speransa di eternidat manera ta present’é den Skritura, a lamentá e falta di sentido di eksistensia humano. Aunke nan ta robes tokante futuro, dikon ta difísil pa argumentá ku nan punto tokante e falta di sentido di bida sin un speransa futuro? Trese bo kontesta na klas riba Sabat.

Algun hende ta papia di shelu mes komo e santuario di Dios. Pero e buki di Revelashon ta referí na un santuario/tèmpel spesífiko denter di e Herusalèm nobo, kaminda e trono di Dios i e laman di glas ta situá (Rev. 4:2–6, Rev. 7:9–15, Rev. 15:5–8). Aya e gran multitut di santunan di tur nashon, tribu, pueblo, i lenga lo adorá Dios pa semper. (Rev. 7:9–17).

Kompará Revelashon 7:9–15 ku Revelashon 21:3,22. Kon nos por harmonisá e deskripshon di e gran multitut di e redimínan ku ta sirbi Dios "di dia i anochi den Su tèmpel" (Rev. 7:15, NKJV) ku e deklarashon ku Juan "no a mira niun tèmpel" den e Herusalèm Nobo (Rev. 21:22, NKJV)?

E santuario/tèmpel selestial semper tabata e lugá kaminda e ehérsitonan selestial ta adorá Dios. Pero ku e aparishon di piká, e santuario ei a bira tambe e lugá for di kua ta ofresé salbashon na humanidat. "Ora e problema di piká terminá, e santuario selestial lo bolbe na su funshon original. Den Revelashon 21:22, Juan e Reveladó ta reportá ku e no a mira un tèmpel den e siudat mas, pasobra Señor Dios Todopoderoso i e Lamchi ta su tèmpel. Pero esei ta nifiká ku no tin un kas di Señor mas kaminda Su kriaturanan por bini i tin kompañerismo spesial kunE? Di ningun manera!”—Richard M. Davidson, "The Sanctuary: 'To Behold the Beauty of the Lord," den Artur Stele, ed., The Word: Searching, Living, Teaching, tomo 1 (Silver Spring, MD: Biblical Research Institute, 2015), p. 31.

E buki di Revelashon ta duna atenshon spesial na Esun ku nan ta adorá i esnan ku ta ador'É. E adorashon selestial ta sentrá riba Dios i e Lamchi (Rev. 5:13, Rev. 7:10). Manera semper, i manera e mester ta, Kristu ta e enfoke di e adorashon.

E adoradónan ta esnan "ku a sali for di e gran tribulashon; nan a laba nan pañanan i a hasi nan blanku den e sanger di e Lamchi". (Rev. 7:14, NIV). Nan ta testigunan bibu di e poder redentor i transformadó di Dios. Nan ta kanta alabansanan na Dios pa ken E ta i pa loke El a hasi pa nan.

Revelashon 21:3 ta bisa: "Mira, e tabernakel di Dios ta ku hende, i E lo biba huntu ku nan, i nan lo ta Su pueblo. Dios Mes lo ta huntu ku nan i ta nan Dios" (NKJV). E versíkulonan akí ta reflehá numeroso otro pasashinan (Jer. 32:38, Ezek. 37:27, Zak. 8:8, Hebr. 8:10). Kiko ta nifiká pa nos aworakí, ku ainda ta aki riba tera, ku Dios lo ta nos Dios, i nos lo ta Su pueblo? Kon nos ta biba e asombroso bèrdat akí awor?

Beibel ta bisa ku Dios "ta biba den lus inaksesibel" (1 Tim. 6:16, NRSV), i ku "hamas niun hende a mira Dios" (Juan 1:18, 1 Juan 4:12, NRSV). Esaki ta nifiká ku e santunan den shelu nunka lo mira Dios e Tata? En apsoluto. Ta evidente ku no mira Dios ta referí na e sernan humano despues di e Kaida, pasobra tin vários indikashon den Skritura ku e santunan realmente lo mir'E den shelu.

Lesa Mateo 5:8; 1 Juan 3:2,3; i Revelashon 22:3,4. Kiko e pasashinan akí ta bisa nos tokante e privilegio supremo di mira Dios?

E mesun apòstel Juan ku a deklará ku "niun hende hamas a mira Dios" (Juan 1:18 i 1 Juan 4:12, NRSV) tambe ta deklará ku "nos lo mir'E manera E ta" (1 Juan 3:2,3, NKJV) i "mira Su kara" (Rev. 22:3,4, NKJV). Por ta diskutibel si e pasashinan akí ta referí na Dios e Tata òf na Kristu. Pero tur duda ta bai den lus di e propio deklarashon di Kristu: "Bendishoná ta esnan puru di kurason, pasobra nan lo mira Dios" (Mat. 5:8, NKJV). Ki un privilegio lo ta pa e redimínan adorá Dios den Su tèmpel! Pero e privilegio supremo di tur kos lo ta pa mira Su kara.

"E pueblo di Dios ta privilegiá di tin komunion habrí ku e Tata i e Yu. 'Awor nos ta mira den un spil, skur asina.' 1 Korintionan 13:12. Nos ta kontemplá e imágen di Dios reflehá, manera den un spil, den e obranan di naturalesa i den Su tratonan ku hende; pero e ora ei nos lo mir'E kara kara, sin un velo meimei di nos. Nos lo para den Su presensia i kontemplá e gloria di Su kara.”—Ellen G. White, The Great Controversy, p. 676, 677.

Nota den algun di e versíkulonan pa awe e vínkulo entre puresa i mira Dios. "Esnan puru di kurason" lo mira Dios; esun ku lo mira Dios "ta purifiká su mes, meskos ku E ta puru" (1 Juan 3:3, NKJV). Loke e versíkulonan akí ta revelá ta ku Dios mester hasi un trabou den nos pa yuda prepará nos pa shelu.

Aunke, na final, e morto di Hesus a garantisá nos derecho na shelu, nos lo pasa a traves di un proseso di purifikashon akinan i awor ku lo yuda prepará nos pa nos hogar eterno. I sentral na e proseso di purifikashon ta obediensia na Su Palabra.

Lesa 1 Pedro 1:22. Kon e teksto akí ta revelá na nos e vínkulo entre obediensia i purifikashon? Kiko obediensia tin, ku e ta purifiká nos? Kon, spesífikamente, Pedro ta bisa ku nos obediensia lo manifestá su mes?

E teoria di un alma inmortal, sufriendo eternamente den un fièrnu ku ta kima pa semper, ta kontradesí e siñansa bíbliko ku den e shelu i e tera nobo lo no tin "morto mas, ni tristesa, ni yoramentu" (Rev. 21:4, NKJV). Si e teoria di un fièrnu ku ta kima eternamente tabata bèrdat, e ora ei e "di dos morto" lo no a eradiká piká i pekadornan for di e universo, sino solamente lo sera nan den un fièrnu eterno di doló i yoramentu. Ademas: den e kaso akí e universo nunka lo a restourá su mes kompletamente na su perfekshon original. Pero alabá sea Señor ku Beibel ta pinta un kuadro kompletamente diferente!

Lesa lsaias 25:8, Revelashon 7:17, i Revelashon 21:4. Ki konsuelo i speransa e pasashinan akí por trese pa nos mei mei di e pruebanan i sufrimentu den e mundu aktual akí?

Bida por ta hopi duru, inhustu, kruel. E brasa friu di morto violentemente a ranka algun hende, asina kerí pa nos, for di nos. Of otro hendenan ta yega di forma sutil den nos bida, hòrta nos sintimentunan, i despues ta bai komo si fuera nada no a pasa. Kon teribel ta pa un hende, ku nos a stima i konfia, traishoná nos.

Tin momentunan ora, ku un kurason kibrá, nos por asta puntra nos mes si ta bale la pena biba. Apesar di nos penanan, sinembargo, Dios semper ta ansioso pa seka mas tantu lágrima posibel for di nos bandanan di kara. Pero algun di nos lágrimanan di mas pisá lo sigui basha te na e dia glorioso ei ora morto, lamento, i yoramentu lo stòp di eksistí (Rev. 21:1–5).

Nos por konfia ku den e huisio final Dios lo trata kada un ser humano ku hustisia i amor. Tur nos sernan kerí ku a muri den Kristu lo resusitá for di morto pa ta huntu ku nos pa tur eternidat. Esnan ku ta indigno di bida eterno lo stòp di eksistí finalmente, sin tin ku biba den un shelu "desagradabel" òf den un fièrnu ku ta kima eternamente. Nos konsuelo di mas grandi ta derivá di e forma hustu ku Dios ta trata tur hende. Ora morto stòp di eksistí definitivamente, esnan redimí lo grita yen di goso: "Unda, o morto, bo viktoria ta? Unda, o morto, bo pui ta?" (1 Kor. 15:54,55, NRSV).

Señor a primintí ku den e shelu nobo i e tera nobo ku E lo a krea, “lo no kòrda e kosnan anterior, ni nan lo no bin na mente” (Isa. 65:17, NIV). Esaki no ta nifiká ku shelu lo ta un lugá di pèrdida di memoria, sino mas bien ku e pasado lo no mina e goso duradero di shelu.

Ken no a yega di sinti e estragonan inhustu di eksistensia humano akinan? Spesialmente den e momentonan malu ei, kon nos por siña konfia, i te na e grado posibel, regosihá den e bondat i amor di Dios?

Lesa Revelashon 22:3–5. Kon nos por tin siguridat ku nos lo ta entre esnan ku lo tin e nòmber di Dios skibí riba nos frenta? Of, nos por ta sigur?

Despues di e rebelion di Lucifer i e kaida di Adam i Eva, Dios por a destruí e dos pekadornan. Sinembargo, komo un ekspreshon di amor inkondishonal pa Su kriaturanan, Dios a establesé un plan miserikòrdioso pa salba tur esnan ku aseptá loke E ta ofresé. Esaki ta loke ta konosí komo e "plan di salbashon", ku, aunke e tabata eksistí asta promé ku e kreashon di tera (Efe. 1:3,4; 2 Tim. 1:9; Tito 1:2; Rev. 13:8), a ser presentá pa promé biaha na humanidat den Eden, djis despues di e Kaida. Despues a revel’é mas tantu ainda den e tiponan i sombranan di e servisio di santuario hebreo (Eksodo 25). I despues a dun’é su máksimo ekspreshon den bida, morto, i resurekshon di Hesus (lesa Rom. 5).

Den sentro di e plan di salbashon tin e promesa di bida eterno, basá riba e méritonan di Hesus, na tur ku aseptá, pa medio di fe, e gran provishon proveé na e krus. Promé ku e krus, despues di e krus, salbashon semper tabata pa medio di fe, i nunka pa medio di obra, maske kuantu obra ta un ekspreshon di nos salbashon.

Pablo a skibi tokante Abraham, ku tabata eksistí hopi tempu promé ku e binida di Kristu, komo un ehèmpel di salbashon pa medio di fe: "Pasobra si a hustifiká Abraham pa obra, e tin algu pa broma di dje, pero no dilanti di Dios. Pasobra kiko Skritura ta bisa? ‘Abraham a kere Dios, i a kont’é pa hustisia’ ” (Rom. 4:2, 3, NKJV). Kon e versíkulonan akí ta yuda nos komprendé di kiko salbashon pa medio di fe ta trata?

Pues, nos por tin e siguransa di salbashon si nos a aseptá Hesus, a someté nos mes na djE, i a reklamá Su promesanan, inkluyendo esnan di un un bida nobo awor den djE, i si nos sostené totalmente riba Su méritonan i nada mas. Abraham a kere, a kont’é komo hustisia p’e; e ta funshoná meskos ku nos.

Esaki, anto, ta loke ta nifiká tin Su nòmber skibí riba nos frenta. Si nos tin e skibí einan aworakí i nos no apartá for di djE, e ora ei lo e ta skibí den e shelunan nobo i tera nobo tambe.

Lesa Ellen G. White, “The Controversy Ended,” p. 674–678, den The Great Controversy; “The Earth Made New,” p. 133–145; “Heaven Is a School,” p. 146–158; “It Will Not Be Long,” p. 159–166; “Heaven Can Begin Now,” p. 167–176; “The Music of Heaven,” p. 177–184; “A Call for Us to Be There,” p. 185–192, den Heaven.

"E krus di Kristu lo ta e siensia i e kantika di esnan redimí durante tur eternidat. Den Kristu glorifiká nan lo kontemplá Kristu krusifiká. Nunka nan lo lubidá ku Esun ken Su poder a krea i a sostené e innumerabel mundunan a traves di e inmensidat di espasio, e Stimá di Dios, e Mahestat di shelu, Esun ken e kerubin- i serafinnan briante tabata deleitá pa adorá, a humiá Su Mes pa halsa hende kaí; ku El a karga e kulpa i bèrgwensa di piká, i e skondementu di kara di Su Tata, te ora e aflikshonnan di un mundu pèrdí a kibra Su kurason i a aplastá Su bida riba e krus di Kalvario. Ku e Hasidó di tur e mundunan, e Arbitro di tur destino, mester a pone Su gloria un banda i humiá Su mes pa amor pa hende, pa semper lo spièrta atmirashon i adorashon di e universo.”—Ellen G. White, The Great Controversy, p. 651.

"E gran konflikto a terminá. No tin mas piká i pekadornan. Henter e universo ta limpi. Un pulso di harmonia i alegria ta bati a traves di e enorme kreashon. For di Esun kende a krea tur kos, ta brota bida i lus i alegria, a lo largu di e ekstenshon di espasio ilimitá. For di e atom di mas chikitu te na e mundu di mas grandi, tur kos, animá i no animá, den nan beyesa kla i goso perfekto, ta deklará ku Dios ta amor.”—Ellen G. White, The Great Controversy, p. 678.

Preguntanan pa Diskushon:

Vários kristian sekularisá ta biba nan bida komo si fuera e mundu akí lo dura pa semper (Lukas 12:16–21). Kon nos por balansá nos idealnan terenal ku nos prioridatnan selestial? Kon nos por protegé nos mes kontra loke Hesus a atvertí nos di dje den Lukas 12?

Si shelu ta kuminsá akinan, kiko nos mester hasi pa transformá nos hogarnan i nos bida personal den ekspreshonnan chikitu di prinsipionan selestial?

Meditá riba e pregunta hasí na final di e lès di djadumingu. Kiko ta e lógika tras di e pesimismo di esnan ku no ta kere den bida eterno? Na mes momento, tambe, algun di personanan akí, no opstante, ta parse di ta biba un bida bastante "felis", asta sin ekspresá ningun speransa futuro. Kon bo ta pensa ku nan ta hasi esei? Es desir, kon nan lo por ta rashonalisá bida, asta ku satisfakshon, sin e promesa di algu mas ayá di e bida akí?