Parti di e Famia di Dios

31 di desèmber

Lesa pa e Estudio di e Siman Akí:

Gal. 3:26, 29; Salmo 50:10–12; 1 Kron. 29:13, 14; Fil. 4:19; 1 Juan 5:3; Mat. 6:19–21

Teksto di Memoria:

“Mira ki tipo di amor e Tata a otorgá na nos, ku mester yama nos yunan di Dios!” (1 Juan 3:1, NKJV).

Komo kristiannan, un karakterístika asombroso tokante nos relashon ku Dios ta ku E ta konfia nos pa manehá Su asuntunan riba tera. Na prinsipio di historia humano, Dios a delegá eksplísitamente na Adam i Eva e kuido personal di un kreashon perfekto. (Lesa Gen. 2:7–9,15.) For di duna e animalnan nòmber te na kuidamentu di e Hòfi, i te na yenamentu di tera ku yunan, Dios a laga bira konosí ku nos mester traha na Su fabor akinan.

Tambe E ta bendishoná nos ku rekursonan, pero nos ta esnan ku El a konfia pa manehá nan, manera pa kolektá plaka, pa skibi e chèknan, pa hasi e transferensianan elektróniko, pa traha e presupuestonan, òf pa trese nos diesmonan i ofrendanan na iglesia riba Sabat mainta. Dios ta enkurashá nos pa gasta e rekursonan ku El a duna nos pa nos propio nesesidatnan, pa e nesesidatnan di otronan, i pa e avanse di Su obra. Pa inkreibel ku por parse, nos ta esnan ku Dios a konfia ku lanta Su yunan, konstruí Su edifisionan, i eduká e futuro generashonnan.

Den e estudio di e siman akí nos lo eksplorá e privilegionan i responsabilidatnan di ta un parti di e famia di Dios.

* Studia e lès di e siman akí pa prepará pa Sabat, 7 di yanüari.

“Pa e motibu akí mi ta dobla mi rudianan na e Tata di nos Señor Hesukristu, for di ken henter e famia den shelu i tera ta nombrá” (Efe. 3:14,15, NKJV). Ki simbolismo ta ser lantá den e versíkulonan akí, i ki speransa nos ta haña ei?

Trempan den e ministerio di Hesus, E ta deklará: “Di e manera akí, resa: Nos Tata den shelu, santifiká sea Bo nòmber” (Mat. 6:9, NKJV). Mas despues E ta ripití e mesun orashon den privá huntu ku Su disipelnan (Lukas 11:2). Hesus a bisa nos pa yama Su Tata “Nos Tata den shelu.” Ora Hesus a topa ku Maria despues di Su resurekshon, e ker a bras’E. “Hesus a bis’é, ‘No tene mi, pasobra ainda mi no a subi bai serka Mi Tata; pero bai serka Mi rumannan i bisa nan, Mi ta subi bai serka Mi Tata i boso tata, i serka Mi Dios i boso Dios’ ” (Juan 20:17, NKJV).

Pasobra nos tin e mesun Tata ku Hesus, E ta nos Ruman, i nos tur ta rumannan hòmber i muhé den Señor. Hesus a bira miembro di e famia terenal pa asina nos por a bira miembronan di e famia selestial. “E famia di shelu i e famia di tera ta un.”—Ellen G. White, The Desire of Ages, p. 832.

Lesa Eksodo 3:10; Eksodo 5:1; i Galationan 3:26,29. Kiko e versíkulonan akí ta bisa tokante kon Dios ta relashoná ku nos? Dikon esaki mester ta asina alentador?

Kontrali na un bista di kreashon den kua ta konsiderá nos simpel produktonan di leinan natural friu i indiferente, Skritura ta siña no solamente ku Dios ta eksistí, sino tambe ku E ta stima nos i ta relashoná ku nos den un forma asina amoroso ku ta usa e simbolismo di famia hopi bia den Skritura pa deskribí e relashon ei. Sea Hesus yama Israel Mi pueblo òf nos yunan di Dios òf ta referí na Dios komo nos Tata, e punto ta ketu bai mesun kos: Dios ta stima nos di e forma ku miembronan di famia ta suponé di stima otro. Ki bon notisia meimei di un mundu ku, den i di su mes, por ta mashá hostil!

Imaginá bo un mundu den kua nos tabata trata tur hende komo famia. Kon nos por siña relashoná mihó ku tur ser humano komo nos rumannan hòmber i muhé?

Lesa Salmo 50:10–12; Salmo 24:1; 1 Krónikanan 29:13,14; i Hageo 2:8. Kiko ta e mensahe akinan, i kiko e bèrdat akí mester nifiká pa nos i kon nos ta relashoná ku loke sea nos ta poseé?

E buki di 1 Krónikanan, kuminsando ku kapítulo 17, ta registrá e deseo di Rei David pa traha un kas pa Dios. El a kompartí e deseo akí ku profeta Natan, ku a respondé: “Hasi tur loke ta den bo kurason, pasobra Dios ta ku bo” (1 Kron. 17:2, NKJV). Pero e anochi ei e palabra di Dios a bin na Natan i a instruyé pa bisa e rei ku, pasobra e tabata un hòmber di guera, e no por a traha e kas di Dios. Su yu hòmber lo a hasi e trabou en kambio. David a puntra si e por a, a lo ménos, pinta e mapanan i prepará e materialnan di konstrukshon. Ora a otorgá David e petishon akí, el a pasa restu di su bida akumulando un tremendo kantidat di piedra di kap, seder, heru, oro, plata, i bròns “sin midí.” Ora a prepará i a reuní tur e materialnan di konstrukshon na e lugá di konstrukshon, David a yama tur e lidernan di Israel huntu pa un seremonia di alabansa i gradisimentu.

Den 1 Krónikanan 29:13,14, den e orashon públiko di Rei David, ken el a bisa tabata e fuente real di tur e materialnan di konstrukshon ku e i e pueblo a gasta tempu i plaka preparando? Naturalmente, en esensia, el a bisa: “Realmente nos no por tuma krédito pa tur e materialnan spesial akí pasobra nos ta simplemente dunando Bo Bo propio kosnan bèk.”

E punto ta importante pa nos tur, sea riku òf pober (pero spesialmente esnan riku). Pasobra Dios a traha tur kos na prinsipio (lesa Gen. 1:1; Juan 1:3; Salmo 33:6,9), E ta berdaderamente e Doño legal di tur loke ta eksistí, inkluyendo loke sea nos ta poseé, no importá kon duru i diligentemente i honestamente nos a traha p’e. Si no tabata pa Dios i Su grasia, nos lo no tabatin nada, nos lo no tabata nada; de echo, nos lo no a ni eksistí. Por lo tantu, nos mester biba semper ku e realisashon ku, finalmente, Dios ta doño di tur kos ku tin, i ora nos ta alab’E i gradisiE pa Su bondat na nos, nos por mantené e bèrdat importante akí nos dilanti.

“Pero ken mi ta, i ken mi pueblo ta, ku nos mester ta kapas pa ofresé asina boluntariamente asin’aki?” (1 Kron. 29:14, NKJV). Ki prinsipionan bunita ta ser ekspresá den e palabranan akí, i kon nan ta reflehá kon nos aktitut pa ku Dios mester ta i nos aktitut pa ku loke nos ta poseé?

E regalo di mas grandi di Dios na Su yunan ta Hesukristu, kende ta trese e pas di pordon pa nos, grasia pa bida diario i kresementu spiritual, i e speransa di bida eterno.

“Pasobra Dios a stima mundu asina tantu ku El a duna Su úniko Yu, pa ken ku kere den djE no mester peresé sino tin bida eterno” (Juan 3:16, NKJV). “Pero tantu ku risibiE, na nan El a duna poder pa bira e yunan di Dios, asta na esnan ku kere den Su nòmber” (Juan 1:12).

Salbashon, anto, ta e regalo fundamental pasobra, sin e regalo akí, kiko mas nos por a haña di Dios ku a lo largu lo a importá realmente? Loke sea nos tin akinan, un dia nos lo ta morto i a disparsé i asina lo sosodé ku tur hende ku a yega di kòrda nos, i lo lubidá kualke bon ku nos a hasi tambe. Promé ku tur kos, anto, semper nos mester mantené e regalo di e evangelio; es desir, Kristu i E krusifiká (1 Kor. 2:2), den sentro di tur nos pensamentunan.

I tòg, huntu ku salbashon, Dios ta duna nos asina tantu mas. Na esnan ku tabata preokupá tokante nan kuminda i bistimentu, Hesus a ofresé konsuelo ora El a bisa: “Buska promé e reino di Dios i Su hustisia, i lo añadí tur e kosnan akí na bo” (Mat. 6:33, NKJV).

Lesa Salmo 23:1, Salmo 37:25, i Filipensenan 4:19. Kiko e versíkulonan akí ta bisa tokante e provishon di Dios pa nos nesesidatnan diario?

Tambe, ora Hesus a papia ku Su disipelnan tokante bai, El a primintí e regalo di Spiritu Santu pa konsolá nan. “Si boso ta stima Mi, boso lo warda Mi mandamentunan. I lo Mi pidi e Tata, i E lo duna boso un otro Konsolador, pa E keda serka boso pa semper, esta, e Spiritu di bèrdat, Kende e mundu no por risibí, pasobra e no ta mir'E ni konos'E, ma boso konos'E pasobra E ta biba serka boso i lo ta den boso” (Juan 14:15–17). “E lo guia boso den tur bèrdat” (Juan 16:13). E ora ei e Spiritu Mes ta duna donnan spiritual asombroso na e yunan di Dios. (Lesa 1 Kor. 12:4–11.)

En breve, e Dios den ken, “nos ta biba i ta move i ta eksistí” (Echonan 17:28), e Dios ken ta “duna bida, rosea, i tur kos na tur hende” (Echonan 17:25, NKJV), a duna nos eksistensia, e promesa di salbashon, bendishonnan material, i donnan spiritual pa asina nos ta un bendishon pa otronan. Atrobe, kualke poseshonnan material ku nos tin, kualke donnan òf talentonan ku El a bendishoná nos kuné, nos ta den debe den tur forma na e Dunadó den kon nos ta usa e donnan ei.

Nos tur ta disfrutá di e bendishonnan spiritual i temporal i donnan ku Dios ta duna nos. Ki alentador pa sa, tambe, ku nos ta “parti di e famia.”

Lesa Deuteronomio 6:5 i Mateo 22:37. Kiko esaki ta nifiká, i kon nos ta hasié?

Kon lo bo a stima Dios ku “henter bo kurason, ku tur bo alma, i ku henter bo mente” (Mat. 22:37, NKJV)? Kuriosamente, Beibel ta duna nos e kontesta, i e no ta loke mayoria hende ta spera.

Lesa Deuteronomio 10:12,13 i 1 Juan 5:3. Bíblikamente bisá, kua ta nos reakshon korekto den nos relashon di amor ku nos Tata den shelu?

Warda e lei? Obedesé e mandamentunan? Pa hopi kristian, desafortunadamente, e idea di obedesé e lei (spesialmente e di kuater mandamentu) ta legalismo, i nan ta reklamá ku nos ta yamá, simplemente, pa stima Dios i pa stima nos próhimo manera nos mes. Sinembargo, Dios ta kla: nos ta revelá nos amor na Dios i na nos próhimonan dor di, sí, obedesé Su mandamentunan.

“Pasobra esaki ta e amor di Dios, ku nos ta warda Su mandamentunan” (1 Juan 5:3, NKJV). Nos tin kustumber di wak e versíkulo akí manera, bon, nos stima Dios i, p’esei, nos ta warda Su mandamentunan. Esei ta bon. Pero kisas nos por les’é tambe komo “esaki ta e amor di Dios”; es desir, nos ta konosé i eksperensiá e amor di Dios dor di warda Su mandamentunan.

Den Mateo 7:21–27 Hesus a bisa ku esnan ku tende i hasi e palabranan di Dios ta semehante na un konstruktor ku a traha su kas riba e baranka sólido. Esnan ku tende i no obedesé ta semehante na un konstruktor bobo ku a traha su kas riba santu, ku resultadonan desastroso. Tur dos a tende e palabra; un a obedesé, un no a hasié. E resultadonan a hasi e diferensia entre bida i morto.

Pensa riba e konekshon entre stima Dios i obedesé Su lei. Dikon lo ta ekspresá amor pa Dios di e manera ei? Kiko tin tokante warda e mandamentunan ku, en realidat, ta revelá e amor ei? (Indikashon: Pensa riba kiko obedesé Su lei ta kousa.)

“No montoná pa boso mes tesoronan riba tera, kaminda mòt i frus ta destruí i kaminda ladronnan ta kibra drenta i hòrta; pero montoná pa boso mes tesoronan den shelu, kaminda ni mòt ni frus ta destruí i kaminda ladronnan no ta kibra drenta i hòrta. Pasobra kaminda boso tesoro ta, ei boso kurason tambe lo ta” (Mat. 6:19–21, NKJV).

Di kua bèrdatnan krusial Hesus ta papiando aki?

Ken no a yega di lesa storia tras storia di esnan ku a akumulá gran rikesa, solamente pa pèrd’é di un òf otro manera? Nos mundu ta un lugá mashá instabil: guera, krímen, violensia, desasternan natural, kualke kos por bin den un ratu di ora i kita tur loke nos a traha p’e i, kisas, asta loke nos a gana di forma honesto i fiel. E ora ei, tambe, den un ratu di ora, morto ta bin, i asina e kosnan akí ta bira inútil pa nos en todo kaso.

Naturalmente, Skritura nunka ta bisa nos ku ta robes pa ta riku òf pa a akumulá rikesa; en kambio, den e versíkulonan akí Hesus ta spièrta nos pa tene tur kos den perspektiva.

Kiko, sinembargo, ta nifiká montoná tesoro den shelu? E ta nifiká hasi Dios i Su kousa promé ku tur kos den bo bida, na lugá di hasi plaka promé ku tur kos. Entre otro, e ta nifiká usa loke nos tin pa e obra di Dios, pa e avanse di Su reino, pa traha na fabor i otronan, i pa ta un bendishon pa otronan.

Por ehèmpel, ora Dios a yama Abram, El a plania pa usa Abram i su famia pa bendishoná tur e famianan di tera. Dios a bisa Abram, ku “a ser yamá amigu di Dios” (Santiago 2:23, NKJV): “Lo Mi hasi bo un gran nashon; lo Mi bendishoná bo i hasi bo nòmber grandi; i lo bo ta un bendishon. Lo Mi bendishoná esnan ku bendishoná bo, i lo Mi maldishoná esun ku maldishoná bo; i den bo tur e famianan di tera lo ta bendishoná” (Gen. 12:2,3, NKJV).

“Asina anto, esnan ku ta di fe ta bendishoná huntu ku e kreyente Abraham” (Gal. 3:9). Nos tin e mesun desafio presentá na nos ku tabata presentá na dje.

“Plaka tin gran balor, pasobra e por hasi gran kosnan bon. Den man di e yunan di Dios e ta kuminda pa esnan ku hamber, bibida pa esnan ku set, i paña pa esnan sunú. E ta un defensa pa esnan oprimí, i un medio di yudansa pa esnan malu. Pero plaka no ta di mas balor ku santu, solamente si us’é pa proveé pa e nesesidatnan di bida, pa bendishoná otronan, i avansá e kousa di Kristu.”—Ellen G. White, Christ’s Object Lessons, p. 351.

“Pasobra kaminda boso tesoro ta, einan boso kurason lo ta tambe” (Mat. 6:21). Unda bo kurason ta bisa bo ku bo tesoro ta?

“E kurason di Dios ta anhelá na Su yunan ku un amor mas fuerte ku morto. Ora El a entregá Su Yu, El a basha pa nos henter shelu den un regalo. E bida i morto i interseshon di e Salbador, e ministerio di angelnan, e rogamentu di e Spiritu, e Tata obrando ariba i a traves di tur, e interes insesante di sernan selestial, tur ta envolví na fabor di redenshon di hende.”—Ellen G. White, Steps to Christ, p. 21.

“Si bo a renunsiá e ami i a duna bo mes na Kristu, bo ta un miembro di e famia di Dios, i tur kos den kas di e Tata ta pa bo. Tur e tesoronan di Dios ta habrí na bo, tantu e mundu ku awor tei i esun ku tin ku bin. E ministerio di angelnan, e don di Su Spiritu, e trabounan di Su sirbidónan, tur ta pa bo. E mundu, ku tur kos den dje, ta di bo asina leu ku e por hasi bo bon.”—Ellen G. White, Thoughts From the Mount of Blessing, p. 110.

Preguntanan pa Diskushon:

Ku tur e regalonan impreshonante ku Dios ta duna Su yunan, nos ta empeñá pa puntra, manera e salmista a hasi: “Kiko lo mi rindi na Señor pa tur Su benefishinan pa ku mi?” (Salmo 116:12, NKJV). Traha un lista di e bendishonnan i regalonan di Dios na bo den bo bida spiritual i temporal, i sea prepará pa kompartié ku bo klas. Kiko esaki ta siña bo tokante kon gradesidu na Dios bo mester ta realmente?

Aunke nos ta pensa riba Dios, i ku rason, komo nos Kreador, Skritura bes tras bes ta siña ku E ta nos Sostenedó tambe. (Lesa Hebr. 1:3; Job 38:33–37; Salmo 135:6,7; Kol. 1:17; Echonan 17:28; 2 Pe. 3:7.) For di e galaksianan den e kòsmòs te na e batimentu di nos kurason, te na e forsanan ku ta tene e strukturanan atómiko, ku ta komponé tur materia konosí huntu, ta solamente e poder sostenedó di Dios ta mantené nan den eksistensia. Kon e bèrdat bíbliko akí mester yuda nos komprendé kua ta nos obligashonnan pa ku Dios, den sentido di kon nos ta usa loke sea El a duna nos? Kon e realidat akí ta yuda nos mantené nos bida i e propósito di nos bida den perspektiva korekto?

E lès a papia tokante dikon, di tur loke Dios a duna nos, Hesus i e plan di salbashon ta e regalonan di mas grandi. Dikon esei ta bèrdat? Kiko nos lo tabatin si nos no tabatin esei i e gran speransa ku e ta ofresé nos? Un eskritor ateista a deskribí hende komo nada otro sino “pidanan di karni putrí riba wesunan desintegrá.” Dikon, sin e don di evangelio, e lo tabatin rason?