Ofrendanan pa Hesus

21 di yanüari

Lesa pa e Estudio di e Siman Akí:

2 Kor. 9:6,7; Deut. 16:17; Salmo 116:12-18; 1 Kron. 16:29; Marko 12:41-44; Marko 14:3-9.

Teksto di Memoria:

“Kiko lo mi rindi na Señor pa tur Su benefishinan pa ku mi? Lo mi hisa e kopa di salbashon, i yama riba e nòmber di Señor. Lo mi kumpli ku mi votonan na Señor awor den presensia di henter Su pueblo” (Salmo 116:12-14, NKJV).

Además di diesmo, tin e ofrendanan, ku ta bin di e 90 porshento ku ta keda den nos poseshon despues ku nos debolbé nos diesmo na Dios. Aki ta kaminda generosidat ta kuminsá. E pueblo di Dios tabata duna diferente tipo di ofrenda, manera ofrendanan di piká, duná komo kontesta riba e grasia di Dios, òf ofrendanan di gradisimentu, duná pa rekonosé e protekshon di Dios, i bendishonnan di salú, prosperidat i poder sostenedó. Tambe tabatin ofrendanan pa e pobernan, i ofrendanan pa konstruí i mantené e kas di adorashon.

Ora nos konsiderá e magnitut di e donnan ku Dios ta duna nos, nos ta kuminsá mira nos dunamentu komo mas ku djis asfaltá e lugá di parker òf kumpra batanan pa koro. Nos ta trese nos ofrendanan komo kontesta riba loke Dios a hasi pa nos, spesialmente den e sakrifisio di Hesus. “Nos ta stim’E pasobra El a stima nos promé” (1 Juan 4:19, NKJV). E iglesia, e ora ei, sea e ta lokal, asosiashon, òf mundial, ta usa nos donashonnan pa avansá e kousa di Dios. E siman akí nos lo repasá loke Beibel tin di bisa tokante ofrendanan komo parti di nos maneho di e negoshi di Dios riba tera.

* Studia e lès di e siman akí pa prepará pa Sabat, 28 di yanüari.

Nos ta stima Dios pasobra El a stima nos promé. Nos dunamentu ta den kontesta riba su regalo maravioso na nos, Hesus. De echo, ta bisa nos: “Señor no tin mester di nos ofrendanan. Nos no por enrikes’E ku nos donashonnan. E salmista ta bisa: ‘Tur kos ta bini di Bo, i di Bo mes nos a duna Bo’ Sinembargo, Dios ta permití nos pa demostrá nos apresio di Su miserikòrdianan pa medio di esfuersonan apnegá pa ekstendé e mesun kos na otronan. Esaki ta e úniko manera den kua ta posibel pa nos manifestá nos gratitut i amor na Dios. E no a proveé ningun otro.” — Ellen G. White, Counsels on Stewardship, p. 18.

Ora nos someté “nos” plaka na Hesus, en realidat e ta fortalesé nos amor p’E i pa otronan. Por lo tantu, plaka por ta un berdadero poder pa bon. Hesus a pasa mas tempu papiando tokante plaka i rikesa ku tokante kualke otro tema. Un versíkulo den kada seis den Mateo, Marko, i Lukas ta tokante plaka. E bon notisia ta ku Dios por libra nos di mal uso i amor pa plaka.

Lesa Mateo 6:31-34 i Deuteronomio 28:1-14. Kiko Dios ta primintí di hasi pa nos si nos obedes’E? Ta egoismo di nos parti pa reklamá e promesanan di Dios?

Nos ofrendanan ta un evidensia di nos boluntat pa sakrifiká nos mes na Dios. Nan por ta un eksperensia profundamente spiritual, un ekspreshon di e echo ku nos bida ta kompletamente entregá na Dios komo nos Señor. Pa nos, manera un dicho ta bisa, e ta “pone nos plaka kaminda nos boka ta”. Bo por bisa ku bo stima Dios, pero ofrendanan generoso ta yuda revelá (i asta fortalesé) e amor ei.

Un ofrenda ta bini di un kurason ku ta konfia den un Dios personal ku konstantemente ta proveé pa nos nesesidatnan segun ku E ta mira ta mihó. Nos ofrendanan ta basa nan mes riba e konvikshon ku nos a haña seguridat di salbashon den Kristu. Nan no ta un rekonsiliashon òf un búskeda pa Dios su aseptashon. Mas bien, nos ofrendanan ta kore for di un kurason ku a aseptá Kristu pa medio di fe komo e úniko i sufisiente medio di grasia i redenshon.

Lesa 2 Korintionan 9:6,7. Kiko Señor ta bisando nos aki? Kiko ta nifiká duna manera un hende “proponé den su kurason” (NKJV)? Kon nos ta siña duna ku alegria?

Lesa Deuteronomio 16:17. Ki kriterio Dios ta duna komo base pa e kantidat di nos ofrendanan?

Nos ofrendanan ta un rekonosementu i un ekspreshon di nos gratitut na Dios pa Su abundante donnan di bida, redenshon, mantenshon, i konstante bendishonnan di hopi tipo. Asina, manera nos a mira den e pasashi akiriba, e kantidat di nos ofrendanan ta basá riba loke Dios a bendishoná nos kuné. “Pasobra tur hende ku a duna hopi, di dje lo rekerí hopi” (Lukas 12:48, NKJV).

Lesa Salmo 116:12-14. Kon nos ta suponé di kontestá e pregunta hasí den versíkulo 12? Kon plaka ta pas den e kontesta?

Kon nos lo por a paga Dios bèk pa tur Su bendishonnan na nos? E kontesta simpel ta nunka nos lo por a hasi esei. Parse ku e mihó kos ku nos por hasi ta ser generoso ku e kousa di Dios i yuda nos próhimonan. Ora Hesus a manda Su disipelnan bai riba un biahe mishonero El a bisa nan: “Pòrnada boso a risibí, duna pòrnada” (Mat. 10:8, NKJV). Nos ofrendanan ta kontribuí na desaroyo di un karakter manera di Kristu. Di e manera ei nos ta kambia di egoismo pa amor; nos mester ta preokupá pa otronan i e kousa di Dios manera Kristu tabata.

Laga nos kòrda semper ku “Dios a stima asina tantu..., ku El a duna” (lesa Juan 3:16, NKJV). Al kontrario, mes sigur ku dia ta sigui anochi, mas nos tesorá pa nos mes, mas egoista nos lo bira den nos kurason, i mas miserabel nos lo sinti tambe.

Trese un ofrenda na Señor ta un deber kristian ku implikashonnan spiritual i moral. Neglishá esaki ta hasi daño spiritual na nos mes, kisas mas ku nos ta realisá tambe. Ademas di esei, ta keda na nos pa determiná ki kantidat nos ta duna i ki entidat ta risibí nos ofrendanan.

Kiko bo ofrendanan i bo aktitut tokante duna nan, ta bisa tokante bo relashon ku Dios?

Beibel no ta duna nos un órden di servisio pa adorashon. Pero parse ku tin a lo ménos kuater kos presente den servisionan di adorashon. Den Tèstamènt Nobo e lista akí ta inkluí estudio/predikamentu, orashon, músika, i diesmo i ofrendanan.

Tres bia kada aña tur e hòmbernan (i famianan) di Israel mester a presentá dilanti di Señor na Herusalèm. I “nan lo no aparesé dilanti di Señor ku man bashí” (Deut. 16:16, NKJV). Den otro palabra, parti di e eksperensia di adorashon tabata e debolbementu di diesmo i duna ofrendanan. Tabata Pasku, Pentekòste i e Fiesta di tabernakel ku e yunan di Dios tabata trese nan diesmonan i ofrendanan. Ta difísil imaginá bo ku un hende ta bin na e fiestanan ei man bashí.

Den otro palabra, pa Israel antiguo, e dunamentu di nan diesmo i ofrendanan tabata un parti sentral di nan eksperensia di adorashon. Adorashon, berdadero adorashon, no ta solamente ekspresá nos gradisimentu i gratitut na Dios den palabra i kantikanan i orashon, sino tambe ekspresá e gradisimentu i gratitut ei na Dios tresiendo nos ofrendanan na kas di Señor. Nan tabata hib’é na e tèmpel; nos ta tres’é na iglesia riba Sabat (a lo ménos komo un forma pa debolbé nos diesmo i ofrendanan), un akto di adorashon.

Lesa 1 Krónikanan 16:29; Salmo 96:8,9; i Salmo 116:16-18. Kon nos ta apliká e prinsipionan ekspresá aki na nos propio eksperensia di adorashon?

Komo yunan di Dios, ku tin e responsabilidat di manehá Su asuntunan riba tera, ta un privilegio, un oportunidat, i un responsabilidat di trese nos ofrendanan. Si Señor a duna nos yunan pa kria p’E, nos mester kompartí ku nan e goso di hiba diesmo i ofrendanan na Sabat Skol i servisionan di iglesia. Den algun lugá, hendenan ta debolbé nan diesmo online òf a traves di otro medionan. Kon ku nos hasié, debolbementu di diesmo i ofrendanan ta parti di nos eksperensia di adorashon ku Dios.

Kua tabata bo propio eksperensia ku e ròl di debolbé diesmo i ofrendanan komo parti di adorashon? Kon e práktika ta impaktá bo relashon ku Dios?

Lesa Marko 12:41-44. Sea nos ta riku òf nò, ki mensahe nos por saka for di e storia akí? Kua ta e prinsipio ku esaki ta siña nos, i kon nos por aplik’é na nos propio eksperensia di adorashon?

Hesus i Su disipelnan tabata den e patio di e tèmpel kaminda e kahanan di tesoreria tabata situá, i E tabata wak esnan ku tabata tresiendo nan ofrendanan. E tabata sufisiente serka pa mira ku un biuda a duna dos moneda di koper. El a pone tur loke e tabatin aden. “Pero Hesus a komprendé su motivashon. E tabata kere ku e servisio di tèmpel tabata ordená pa Dios, i e tabata ansioso pa hasi lo máksimo pa sosten’é. El a hasi loke e tabata por, i su akto mester tabata un monumento na su memoria a lo largu di tur tempu, i su goso den eternidat. Su kurason a bai huntu ku su donashon; su balor tabata kalkulá, no pa balor di e moneda, sino pa e amor pa Dios i e interes den Su obra ku a inspirá e akshon.” — Ellen G. White, Counsels on Stewardship, p. 175.

Un otro punto mashá importante ta ku esaki ta e úniko ofrenda ku Hesus hamas a elogiá, un ofrenda pa un iglesia ku tabata na punto di rechas’E, un iglesia ku a desviá grandemente for di su yamada i mishon.

Lesa Echonan 10:1-4. Dikon un senturion romano a risibí bishita di un angel selestial? Kua dos di su akshonnan a nota den shelu?

Aparentemente, no solamente ta tende nos orashonnan den shelu, sino tambe ta tuma nota di e motivashon di nos ofrendanan. E pasashi ta nota ku Cornelio tabata un dunadó generoso. “Pasobra kaminda bo tesoro ta, ei bo kurason lo ta tambe” (Mat. 6:21, NKJV). E kurason di Cornelio tabata sigui su ofrendanan. E tabata kla pa siña mas tokante Hesus. Orashon i limosna ta konektá djaserka i ta demostrá nos amor pa Dios i nos próhimo, e dos gran prinsipionan di e lei di Dios: “Lo bo stima Señor bo Dios ku henter bo kurason, ku henter bo alma, ku tur bo forsa, i ku tur bo mente,” i “bo próhimo manera bo mes” (Lukas 10:27, NKJV). E promé ta revelá su mes den orashon, e di dos den limosna.

Investigashon a demostrá ku solamente masoménos 9 porshento di aktivonan di hende ta líkido i por kontribuí nan komo un ofrenda na kualke momento. Kèsh, kuenta koriente, plaka di spar, fondonan di merkado monetario, etc, ta konsiderá generalmente aktivonan líkido, a lo ménos pa esnan ku ta poseé kosnan manera esaki. Mayoria di nos aktivonan, masoménos 91 porshento, ta “invertí” den biennan inmóbil, manera nos kasnan, nos bestianan di kria (si nos ta biba na kunuku), òf otro artíkulonan no líkido.

Por ilustrá e diferensianan den e porsentahenan di aktivonan líkido i no líkido poniendo 1.000 sèn den dos diferente bòter di glas, ku 10 sèn representando kada punto di porsentahe. Por lo tantu, lo bo tin 90 sèn den un bòter chikitu representando e 9 porshento aktivonan líkido i 910 sèn den un bòter grandi di un kuart galòn representando e 91 porshento di aktivonan no líkido.

Mayoria hende ta duna nan ofrendanan òf kontribushonnan for di e bòter chikitu, for di nan aktivonan líkido. Esaki ta loke nan tin riba nan kuenta koriente òf den nan pòtmòni. Pero ora un hende realmente bira eksitá tokante algu, nan ta duna for di e bòter grandi. Beibel ta konta hopi storia asina.

Lesa Marko 14:3-9 i Juan 12:2-8. Ken ta e personahenan prinsipal na e fiesta di Simon? Kua tabata e balor di e regalo di Maria? Dikon el a ungi Hesus na e momento akí?

E regalo di Maria tabata bal 300 denario, pago di henter un aña. E tabata, mas probablemente, un regalo di “bòter grandi”. Despues di e insidente akí Hudas a traishoná Hesus pa un tiki mas ku un tersera parti di e kantidat ei, un regalo di “bòter chikitu”, 30 pida plata (Mat. 26:15). Mester di berdadero amor i kompromiso pa duna ofrendanan di bòter grandi, di nos invershonnan. Pero ora nos bira kudisioso, manera Hudas, nos por bende nos alma pa kasi nada.

Ta menshoná e obra i e aktividatnan di Barnabas 28 bia den Tèstamènt Nobo. Nos konos’é primeramente komo kompañero di apòstel Pablo i komo un gran mishonero. Pero e fundeshi pa tur esaki ta establesé den e promé pasashi kaminda ta menshon’é. Den Echonan 4:36,37 nos ta lesa di su dunamentu, berdaderamente, un ofrenda di “bòter grandi”. Ki un ehèmpel poderoso di e palabranan di Kristu: “Pasobra kaminda bo tesoro ta, ei bo kurason lo ta tambe” (Mat. 6:21, NKJV).

Dikon dunamentu ku sakrifisio ta mes importante pa e dunadónan komo pa e resipientenan?

E buki di registro selestial di memoria tambe ta nota e fidelidat finansiero di e miembronan di famia di Dios. “E angel registradó ta hasi un registro fiel di kada ofrenda dediká na Dios i poné den e tesoreria, i tambe di e resultado final di e medionan otorgá asina. E wowo di Dios ta opservá kada sèn dediká na Su kousa, i di e boluntat òf falta di boluntat di e dunadó. E motivo di dunamentu tambe ta registrá. Esnan apnegá i konsagrá ku ta duna bèk na Dios e kosnan ku ta di djE, manera E ta rekerí di nan, lo ta rekompensá di akuerdo ku nan obranan. Aunke nan gasta e medionan konsagrá asina di forma kiboká, di manera ku e no ta kumpli ku e ophetivo ku e dunadó tabatin na bista, e gloria di e Dios i salbashon di almanan, esnan ku a hasi e sakrifisio ku sinseridat di alma, ku bista únikamente riba e gloria di Dios, lo no pèrdè nan rekompensa.” — Ellen G. White, Testimonies for the Church, tomo. 2, p. 518.

“Dios ta deseá pa hende hasi orashon i plania pa avanse di Su obra. Pero, meskos ku Cornelio, nos mester uni orashon ku dunamentu. Nos orashonnan i nos limosnanan mester subi dilanti di Dios komo un konmemorashon. Fe sin obra ta morto; i sin un fe bibu ta imposibel pa agradá Dios. Miéntras nos ta hasi orashon, nos mester duna tur loke posiblemente nos por, tantu di nos trabou komo nos medionan, pa kumplimentu di nos orashonnan. Si nos pone nos fe den práktika, Dios lo no lubidá riba nos. E ta marka kada akto di amor i apnegashon. E lo habri kamindanan a traves di kua nos por mustra nos fe pa medio di nos obranan. — Ellen G. White, Atlantic Union Gleaner, 17 di yüni 1903.

Preguntanan pa Diskushon:

Kon hasi orashon i duna ta bai huntu? Es desir, kon hasi orashon lo por yuda bo sa pa kiko duna, ki ora, i kuantu duna?

Un revista famoso na Estádos Unídos a papia tokante hóbennan profeshonal na Wall Street ku tabata gana asina tantu sèn i tòg tabata asina miserabel, asina bashí, asina yen di angustia i preokupashon. Un di nan, un atministradó di portafolio, a bisa: “Kiko ta importá despues ku mi muri si mi a hasi un ganashi di un porshento èkstra den mi portafolio?” Ki lèsnan nos por saka for di e storia akí tokante kon duna, asta duna ku sakrifisio, por ta asina benefisioso spiritualmente pa e dunadó, den sentido ku e ta yuda libra nos for di e “engaño di rikesa” (Mat. 13:22)?

Den e sita di Ellen G. White aki riba, nota e parti tokante fondonan ku ta usa “di forma kiboká”. Dikon ta importante pa esnan di nos ku ta duna tene su punto den mente?