Kuidou ku Kudishi

25 di febrüari

Lesa pa e Estudio di e Siman Akí:

Isa. 14:12-14; Efe. 5:5; Hosue 7; Juan 12:1-8; Echonan 5:1-11; 1 Kor. 10:13.

Versíkulo di Memoria:

“Pone atenshon i kuidou ku kudishi, pasobra hende su bida no ta konsistí di e abundansia di e kosnan ku e ta poseé” (Lukas 12:15, NKJV).

A definí kudishi komo un deseo eksesivo pa rikesa òf poseshonnan ku realmente no ta pertenesé na bo. Kudishi ta un problema grandi, grandi sufisiente, de echo, pa ta na nivel di gañamentu, hòrtamentu, òf asesinato; e ta asina dañino ku Dios a skohe pa atvertí kontra dje den Su gran lei moral. "No kudishá kas di bo próhimo; no kudishá esposa di bo próhimo, ni su sirbidó hòmber, ni su sirbidó muhé, ni su buey, ni su buriku, ni nada ku ta pertenesé na bo próhimo" (Eks. 20:17).

Frekuentemente ta menshoná kudishi huntu ku pikánan horibel, ku lo tene un hende for di e reino di Dios. " Of boso no sa ku e inhustunan lo no eredá e reino di Dios? No laga nan gaña boso; ni fornikadó, ni adoradó di dios falsu, ni adúltero, ni sodomita, ni homoseksual, ni ladron, ni esnan golos pa plaka, ni buraché, ni blasfemadó, ni estafadó lo no eredá e reino di Dios" (1 Kor. 6:9,10).

Kudishi, na altura di ekstorshon, idolatria, fornikashon i adulterio? Esei ta loke e teksto ta bisa, i e siman akí nos lo wak ehèmpelnan di kon malu e ta i kiko nos por hasi pa vens'é.

* Studia e lès di e siman akí pa prepará pa Sabat, 4 di mart.

Hopi biaha e pregunta ta surgi, i ta komprendibel, tokante kon piká a lanta den e universo di Dios. Nos ta komprendé kon, a lo ménos un poko. I den fondo, tabata pa motibu di kudishi. Kisas kudishi, anto, ta e piká original definitivo.

Lesa Isaias 14:12-14. Kua klavenan ta duna einan tokante e kaida Lucifer? Kon kudishi a hunga un ròl krusial den e kaida ei?

"No satisfecho ku su posishon, aunke honrá ariba di e ehérsito selestial, el a riska kudishá homenahe debí solamente na e Kreador. Na lugá di trata na hasi Dios supremo den e afekshonnan i lealtat di tur ser kreá, tabata su empeño pa sigurá nan servisio i lealtat na e mes. I kudishando e gloria ku kua e Tata infinito a investí Su Yu, e prens di angelnan akí a aspirá na poder ku tabata prerogativa di Kristu so.” — Ellen G. White, Patriarchs and Prophets, p. 35.

Lesa Efesionan 5:5 i Kolosensenan 3:5. Ku kiko Pablo ta igualá kudishi, i dikon?

Ki fasinante ta ku dos biaha Pablo ta igualá kudishi ku idolatria. Hende ta praktiká idolatria ora nan ta adorá, es desir, dediká nan bida na algu otro ku no ta Dios, algu kreá mas bien ku e Kreador (Rom. 1:25). Kudishi por ta, anto, ke algu ku nos no mester tin, i ker e asina tantu ku nos deseo p’e, mas bien ku Dios, ta bira e enfoke di nos kurason?

Sin duda, Lucifer no tabata sa promé na unda su deseonan robes lo a hib'é. E por ta mesun kos ku nos. E mandamentunan kontra kudishi, esun mandamentu ku ta trata solamente ku pensamentunan, por stòp nos di aktonan ku lo hiba na violashon di otro mandamentunan tambe. (Lesa, por ehèmpel, 2 Samuel 11)

Lesa 1 Timoteo 6:6,7. Kon enfoká riba loke Pablo ta skirbi aki por yuda protegé nos di kudishi?

Tabata probablemente un di e momentonan di mas grandioso den historia di Israel. Despues di 40 aña di dual den desierto, finalmente nan tabata drentando e Tera Primintí. A traves di un milager dramátiko, e yunan di Israel a krusa Riu Jordan den su etapa di marea haltu, riba tera seku. E krusamentu riba tera seku akí tabata asina impreshonante ku kurason di e reinan pagano na Kanaan a dirti, i nan no tabatin spiritu pa bringa (Jos. 5:1).

E promé desafio real den e konkista di Kanaan tabata e siudat rondoná ku muraya i fortifiká di Jeriko. Niun hende tabata sa kiko hasi pa derotá e habitantenan di Jeriko, ni sikiera Josué. Komo kontesta riba e orashon di Josué, Dios a revelá e plan pa destrukshon di e siudat, kua nan a sigui. Pero despues kosnan a tuma un birada definitivamente malu.

Lesa Josué 7. Kiko a pasa despues di e viktoria poderoso na Jeriko, i ki mensahe nos mester saka for di e storia akí pa nos mes?

Unabes konfrontá, Akan a atmití loke el a hasi, bisando ku el a "kudishá” e artíkulonan ei. A usa e palabra hebreo tradusí einan "kudishá", chmd, algun kaminda den Beibel di un manera mashá positivo. E mesun rais ta aparesé den Daniel 9:23, por ehèmpel, ora Gabriel a bisa Daniel ku e tabata un hòmber "hopi stimá".

Den e kaso akí, sinembargo, e chmd akí tabata mal notisia. Apesar di e mandato kla pa no sakia pa nan mes for di e siudatnan kapturá (Jos. 6:18,19), Akan a hasi eksaktamente esei, tresiendo mal fama riba henter e nashon. De echo, despues di e derota na Ai, Josué tabatin miedu ku "e kananeonan i tur e habitantenan di e tera lo tende esaki, i rondoná nos, i kita nos nòmber for di tera. E ora ei, kiko lo Bo hasi pa Bo gran nòmber?" (Jos. 7:9, NKJV). Den otro palabra, Señor ker a usa e gran viktorianan akí komo parti di laga e nashonnan rònt di nan sa di Su poder i Su obra meimei di Su mes pueblo. Nan konkista tabata bai ta (di un manera diferente) un testimonio na e nashonnan di e poder di Jahweh. Naturalmente, despues di e frakaso na Ai, ademas di e pèrdida di bida humano, e tesimonio ei tabata komprometé. Den e kaso akí, sinembargo, e chmd akí tabata mal notisia. Apesar di e mandato kla pa no sakia pa nan mes for di e siudatnan kapturá (Jos. 6:18,19), Akan a hasi eksaktamente esei, tresiendo mal fama riba henter e nashon. De echo, despues di e derota na Ai, Josué tabatin miedu ku "e kananeonan i tur e habitantenan di e tera lo tende esaki, i rondoná nos, i kita nos nòmber for di tera. E ora ei, kiko lo Bo hasi pa Bo gran nòmber?" (Jos. 7:9, NKJV). Den otro palabra, Señor ker a usa e gran viktorianan akí komo parti di laga e nashonnan rònt di nan sa di Su poder i Su obra meimei di Su mes pueblo. Nan konkista tabata bai ta (di un manera diferente) un testimonio na e nashonnan di e poder di Jahweh. Naturalmente, despues di e frakaso na Ai, ademas di e pèrdida di bida humano, e tesimonio ei tabata komprometé.

Pensa riba kon fásilmente Akan por a hustifiká su akshonnan: bon, ta un kantidat asina chikí kompará ku henter sobrá di e botin. Niun hende lo sa, i ki daño e por hasi? Ademas, mi famia mester di e plaka. Kon nos por protehá nos mes for di e tipo di rashonalisashon peligroso akí?

Un di e storianan di mas trágiko den Beibel ta esun di Hudas Iskariote. E hòmber akí tabatin un privilegio ku solamente 11 otro hende den henter historia di mundu tabatin: di tabata ku Hesus tur ora i a siña bèrdatnan eterno direktamente for di e Maestro Mes. Ki tristu ta ku hende ku nunka tabatin nada djaleu paresido na e oportunidatnan ku Hudas tabatin lo ta salbá, miéntras Hudas, nos sa, awor ta destiná pa destrukshon eterno.

Kiko a sosodé? Por haña e kontesta den un palabra: kudishi, e deseo di su kurason.

Lesa Juan 12:1-8. Kiko Maria a hasi ku a atraé asina tantu atenshon durante e bankete? Kon Hudas a reakshoná? Dikon? Kua tabata e kontesta di Hesus?

E skual amabel di e Salbador riba Hudas su remarke kudisioso a hib'é na bandoná e bankete i bai direktamente na e palasio di e sumo saserdote, kaminda Hesus su enemigunan tabata reuní. El a ofresé pa traishoná Hesus entregá den nan man pa un suma muchu mas chikitu ku Maria su regalo (Lesa Mat. 26:14-16).

Kiko a pasa Hudas? Despues ku e tabatin asina tantu oportunidat maravioso, asina tantu privilegio skars, pakiko e lo a hasi algu asina malbado? Di akuerdo ku Ellen G. White, Hudas "tabata stima e Gran Maestro, i tabata deseá di ta kunE. El a sinti un deseo di kambio den karakter i bida, i el a spera di eksperensiá esaki a traves di konektá su mes ku Hesus. E Salbador no a rechasá Hudas. El a dun'é un lugá entre e diesdos. El a konfi'é pa hasi e trabou di un evangelista. El a dot'é ku poder pa kura esnan malu i saka demoño. Pero Hudas no a yega na e punto di someté su mes kompletamente na Kristu.” — The Desire of Ages, p. 716.

Al final, nos tur tin defektonan di karakter ku, si nos someté, nos por vense pa medio di e poder di Dios ku ta obra den nos. Pero Hudas no a someté kompletamente na Kristu, i e piká di kudishi, ku e por a vense den e poder di Kristu, a vens'é en kambio, ku resultadonan trágiko.

Ken meimei di nos no ta lucha ku kudishi riba un òf otro kos? Den e kaso akí, loke e tabata kudishá tabata plaka, i e kudishi ei, un problema di e kurason, a hib'é na hòrta (Juan 12:6), ku finalmente a hib'é na traishoná Hesus.

Ki un lès spantoso pa nos tur tokante e peliger ku kudishi por trese. Loke ta parse manera un kos chikí, un simpel deseo di e kurason, por hiba na kalamidat i na pèrdida eterno.

Tabata un tempu emoshonante pa ta un miembro di iglesia. Despues di e gran dramamentu di Spiritu Santu riba e dia di Pentekòste, e apòstelnan tabata predikando e evangelio ku poder, i míles tabata uni na e iglesia.

"I ora nan a kaba di hasi orashon, e lugá kaminda nan a bin huntu a wòrdu sakudí, i nan tur a wòrdu yená ku Spiritu Santu i a kuminsá papia e palabra di Dios ku tur frankesa. I e multitut di esnan ku a kere tabata di ún kurason i ún alma; i ni un di nan no tabata bisa ku loke tabata pertenesé na dje tabata di dje, ma tur kos tabata propiedat komun pa nan" (Echonan 4:31,32).

Ki privilegio Ananias i Safira tabatin, siendo parti di e iglesia primitivo, mir'é krese, i mira e manifestashon di Spiritu Santu di un manera asina opvio. "Ni no tabatin niun hende meimei di nan ku tabatin falta di algu; pasobra tur ku tabata propietario di terenonan òf kasnan tabata bende nan, i trese e produkto di e kosnan ku nan a bende, i tabata pone nan na pia di e apòstelnan; i nan tabata distribuí na kada un segun nan nesesidat" (Echonan 4:34,35, NKJV).

Tabata den e senario akí ku Ananias i Safira, opviamente impreshoná pa loke tabata pasando i nan ker a forma parti di dje, a disidí di bende algun propiedat i kontribuí ku e produkto na iglesia. Te asina leu, asina bon.

Lesa Echonan 5:1-11. Kiko bo ta kere tabata pió, tene parti di e plaka òf gaña di dje? Dikon un kastigu asina severo?

Na prinsipio, tabata parse manera nan tabata sinsero den nan deseo pa duna pa ku e obra. Sinembargo, "despues, Ananias i Safira a hasi Spiritu Santu tristu i a sede na sintimentunan di kudishi. Nan a kuminsá lamentá nan promesa i pronto a pèrdè e influensia dushi di e bendishon ku a keinta nan kurason ku un deseo pa hasi kosnan grandi na fabor di e kousa di Kristu.” — Ellen G. White, The Acts of the Apostles, p. 72. Den otro palabra, aunke nan a kuminsá ku e mihó motibunan, nan kudishi a pone nan a pone un fachada i pretendé di ta loke nan no tabata realmente.

"Un miedu asina grandi a bin riba henter iglesia i riba tur ku a tende e kosnan akí" (Echonan 5:11, NKJV). Despues di e insidente akí, seguramente hende tabata mas kuidadoso ora di debolbé nan diesmo. Pero e relato tristu akí no tabata inkluí den Beibel komo un atvertensia tokante fieldat den debolbé diesmo. En kambio, kiko e ta siña nos tokante unda kudishi por hiba na dje?

Kudishi ta un asuntu di e kurason i, meskos ku orguyo i egoismo, hopi biaha e ta pasa sin bo ripará, loke ta e motibu ku e por ta asina mortal i engañoso. Ta difísil sufisiente pa vense pikánan ku ta opvio: gañamentu,adulterio, hòrtamentu, idolatria, kibramentu d Sabat. Pero esakinan ta aktonan eksterno, kosnan ku nos mester pensa riba dje promé ku nos hasi nan. Pero vense pensamentunan robes? Esei ta bira difísil.

Lesa 1 Korintionan 10:13. Ki promesa ta duna aki, i dikon esaki ta asina importante pa komprendé den konteksto di kudishi?

Kon anto, ku poder di Dios, nos por ta protehá kontra e piká peligrosamente engañoso akí?

1. Tuma e desishon pa sirbi i dependé riba Dios i pa ta parti di Su famia. "skohe pa boso mes awe kende boso lo sirbi: ... ma pa loke ta ami i mi kas, nos lo sirbi SEÑOR " (Jos. 24:15).
2. Ta diariamente den orashon i inkluí Mateo 6:13, "I no hiba nos den tentashon, ma libra nos for di e malbado. Pasobra di Bo e reino ta, i e poder i e gloria, pa semper." Ora bo ta sinti kudishi di algu ku bo sa ku bo no mester tin, resa riba dje, reklamando promesanan den Beibel pa viktoria, manera 1 Korintionan 10:13.
3. Sea regular den estudio di Beibel. "Bo palabra Mi a skonde den mi kurason, pa mi no por peka kontra Bo" (Salmo 119:11, NKJV).

Hesus a trata e problema di ser humano ku piká. A tent’E riba tur punto ku ta tenta nos riba dje. I pa poder pa resistí, El a pasa anochinan kompletu den komunion di orashon ku Su Tata. I Hesus no a bandoná e tera akí te ora El a tantu traha e kaminda pa medio di ehèmpel i despues a primintí poder pa hasi posibel pa tur persona biba un bida di fe i obediensia, pa desaroyá un karakter manera di Kristu.

"Buska SEÑOR miéntras por hañ’E, yama riba djE miéntras E ta serka. Laga e malbado bandoná su kaminda, i e inhustu su pensamentunan; lag’é bolbe serka SEÑOR, i E lo tin miserikòrdia kuné; i serka nos Dios, pasobra E lo pordoná abundantemente" (Isa. 55:6,7, NKJV).

Kua, si tin, tabata e konsekuensianan di kudishi den bo bida? Kua lèsnan bo a siña? Kiko lo bo mester siña di nan ainda?

Den e konkista di Jeriko, Akan no tabata e úniko hòmber ku a hiba plata i oro bèk na e kampamentu di Israel. Hosue a bisa e hòmbernan pa trese bèk e plata i oro i artíkulonan di bròns i heru na e lugá di warda tesoro di e kas di Dios (Jos. 6:19,24). Mester a kima tur otro kos. Akan, sinembargo, tabata e úniko hòmber ku a keda ku algu pa su mes. "Di e miónes di Israel tabatin solamente un hòmber ku, den e ora sòlèm di triunfo i di huisio, a tribi di violá e mandamentu di Dios. E bista di e mantel kostoso di Shinar a eksitá Akan su kudishi; asta ora el a tres'é kara kara ku morto el a yam'é 'un mantel di Babilonia masha bon’. Un piká a hiba na un otro, i el a apropiá di e oro i plata dediká na e tesoreria di Señor, el a hòrta Dios di e promé frutanan di e tera di Kanaan.” — Ellen G. White, Patriarchs and Prophets, p. 496.

Den Pablo su lista di señalnan di e último dianan, e promé dos elementonan ta envolví nos aktitut pa ku plaka i poseshonnan. "Pero sa esaki, ku den e último dianan lo bini tempunan peligroso: Pasobra hende lo bira stimadó di nan mes, stimadónan di plaka [kudishi]" (2 Tim. 3:1,2, NKJV). Egoismo i amor pa plaka ta deskripshonnan signifikante di humanidat den e último dianan, nos dianan.

Preguntanan pa Diskushon:

Lesa 1 Timoteo 6:6-10: "Awor piedat ku satisfakshon ta gran ganashi. Pasobra nos no a trese nada den e mundu akí, i ta sigur ku nos no por bai ku nada. I si nos tin kuminda i paña pa bisti, ku esakinan nos lo ta satisfecho. Pero esnan ku ta deseá di ta riku ta kai den tentashon i un trampa, i den hopi deseonan bobo i dañino, ku ta hundi hende den destrukshon i perdishon. Pasobra amor pa plaka ta rais di tur tipo di maldat, pa kua algun a desviá di fe den nan kudishi, i a traspasá nan mes ku hopi doló" (NKJV). Den klas, papia di ehèmpelnan di esnan ku, pa motibu di amor pa plaka, a "traspasá nan mes [i otronan] ku hopi doló." Tin hopi ehèmpel, bèrdat? Kon nos por haña e balanse korekto, sabiendo ku nos mester di plaka pa sali padilanti pero no kai den e trampa ku Pablo ta atvertí nos di dje aki?

Kua ta otro kosnan, ademas di plaka, ku nos por kudishá?

Kua ta e diferensia entre un deseo legítimo pa algu i kudishi? Ki ora un deseo legítimo pa algu lo por kambia bira kudishi?