Rekompensanan di Fieldat

18 di mart

Lesa pa e Estudio di e Siman Akí:

Hebr. 11:6; Isa. 62:11; Rom. 6:23; Juan 14:1-3; Revelashon 21; Mat. 25:20-23; Rom. 8:16-18.

Versíkulo di Memoria:

“Su señor a bis’é: ‘Bon hasí, bon i fiel sirbidó; bo tabata fiel riba algun kos, lo Mi hasi bo gobernante riba hopi kos. Drenta den e goso di bo señor’ ” (Mateo 25:21, NKJV).

Aunke nunka nos por gana salbashon, Beibel ta usa e speransa di rekompensa komo un motivashon pa biba fielmente komo reseptornan indigno di e grasia di Dios, pasobra al final loke sea ku nos risibí ta, semper i únikamente, pa grasia di Dios.

Manera David a skirbi: "E lei di SEÑOR ta perfekto, e ta kombertí e alma; e testimonio di SEÑOR ta fiel, e ta hasi esnan simpel sabí; e statutonan di SEÑOR ta rekto, nan ta alegrá e kurason; e mandamentu di SEÑOR ta puru, e ta iluminá e wowonan; temor di SEÑOR ta limpi, e ta dura pa semper; e huisionan di SEÑOR ta bèrdat i hustu tur huntu. Nan ta mas deseabel ku oro, sí, ku hopi oro fini; mas dushi tambe ku miel i e kas di abeha. Ademas, pa medio di nan a spièrta Bo sirbidó, i den wardamentu di nan tin gran rekompensa" (Salmo 19:7-11, NKJV).

Na vários lugá Beibel ta papia tokante nos rekompensanan, loke a primintí nos pa medio di Kristu despues di e Segundo Binida i e desvio teribel akí ku piká a terminá definitivamente.

Kiko a primintí nos, i ki siguransa nos tin di haña loke a primintí nos?

* Studia e lès di e siman akí pa prepará pa Sabat, 25 di mart.

Lesa Hebreonan 11:6. Kiko e versíkulo akí mester nifiká pa nos? Kon nos mester kontestá riba loke e ta bisa? Lesa tambe Rev. 22:12, Isa. 40:10, i Isa. 62:11. Kiko tur e tekstonan akí ta siña nos?

E rekompensa di Dios pa Su yunan fiel ta úniko i, manera hopi kos spiritual, por ta mas ayá di nos komprendementu finito. "Lenguahe humano ta inadekuá pa deskribí e rekompensa di e hustunan. E lo ta konosí solamente pa esnan ku kontempl’é. Ningun mente finito por komprendé e gloria di e Paraiso di Dios.” — Ellen G. White, The Great Contreversy, p. 674.

Hesus a konkluí e Bienaventuransanan, ku ta habri e Sermon riba Seru, ku e palabranan akí: "Bendishoná boso ta ora nan insultá i persiguí boso, i bisa tur sorto di maldat kontra boso pa Mi kousa. Regosihá boso i sea ekstremadamente kontentu, pasobra grandi ta boso rekompensa den shelu, pasobra asina nan a persiguí e profetanan ku tabata tei promé ku boso" (Mat. 5:11,12, NKJV). Despues di menshoná e personanan di fe den Hebreonan 11, e outor ta kuminsá e siguiente kapítulo splikando dikon Hesus tabata dispuesto pa muri riba e krus.

"P'esei nos tambe, ya ku nos ta rondoná pa un nubia asina grandi di testigunan, laga nos pone un banda tur peso, i e piká ku ta brua nos asina fásil, i laga nos kore ku perseveransia e kareda ku ta poné nos dilanti, mirando na Hesus, e outor i konsumidó di nos fe, ken, pa e goso ku tabata poné Su dilanti, a soportá e krus, a menospresiá e bèrgwensa, i a kai sinta na man drechi di trono di Dios" (Hebr. 12:1,2, NKJV).

Haña rekompensa pa fieldat, sinembargo, no ta mesun kos ku salbashon pa medio di obra. Ken entre nos, òf entre kualke di e personahenan den Beibel, tabatin obranan bon sufisiente pa duna nan kualke mérito dilanti di Dios? Niun, naturalmente. Esei ta henter e punto di e krus. Si nos por a salba nos mes pa medio di obranan, Hesus nunka lo a bai na e krus. En kambio, e mester ta pa medio di grasia. "I si ta pa grasia, e ora ei no ta di obra mas. Ma si e ta di obra, e no ta grasia mas; di otro manera obra no ta obra mas" (Rom. 11:6, NKJV). Rekompensa, en kambio, ta e mero resultado di loke Dios a hasi pa nos i den nos.

Kon nos ta komprendé e diferensia entre salbashon pa grasia i un rekompensa di akuerdo ku obranan? Trese bo kontesta den klas riba Sabat.

Komo sernan humano (i sea nos gusta òf nò), un eternidat ta spera nos. I di akuerdo ku Beibel, e eternidat akí lo bini den un di dos manifestashon, a lo ménos pa kada un di nos individualmente: sea bida eterno òf morto eterno. Esei ta tur kos. No tin kaminda intermedio. Sin pia na kada banda, un tiki di un banda òf e otro. En kambio, ta esun (bida) òf e otro (morto). Esaki berdaderamente ta un kaso di tur òf nada.

Lesa Romanonan 6:23 i Juan 3:16. Kua opshonnan ta presente na nos?

Ta difísil pa imaginá dos eskoho mas rígido òf mas distinto, bèrdat?

Tin chèns ku si bo ta lesando esaki, bo a skohe bida eterno, òf seguramente bo ta pensando riba dje. Dios tin e abilidat úniko pa hasi kualke kos ku E bisa ku E por hasi, kumpli ku tur Su promesanan. Nos parti ta simplemente ker'E, sosegá riba e méritonan di Hesus, i pa fe obedesé Su Palabra.

Lesa Juan 14:1-3. Kua ta e konseho di Señor pa nos den versíkulo 1, i kiko E ta primintí nos den versíkulonan 2 i 3?

Den e último dianan di Su ministerio terenal, Hesus a duna e palabranan maravioso akí di speransa i kurashi na Su disipelnan. E palabranan akí lo a lanta nan spiritu den tempunan di deskurashamentu i prueba. Nan mester hasi mesun kos pa nos. Hesus a bini di shelu, a bai shelu bèk, i a primintí nos: "Lo mi bini atrobe i lo Mi risibí boso serka Mi pa boso por ta ku Mi einan."

I, kisas mas ku kualke otro kos, Kristu su morto riba e krus na Su promé binida ta nos siguransa di mas grandi di Su segundo binida, pasobra sin e Segundo Binida, di kiko Su di promé a sirbi? Mes sigur ku nos ta ku Hesus a muri pa nos riba e krus, ta mes sigur ku nos por ta ku, sí, manera El a primintí: "Lo Mi bini atrobe i risibí boso serka Mi; pa kaminda Mi ta, ei boso por ta tambe" (Juan 14:3, NKJV).

Reflekshoná mas riba e idea ku Kristu su promé binida ta e garantia di Su di dos. Kiko a pasa na e promé binida ku ta hasi e di dos un promesa ku nos por konfia?

E deskripshon bíbliko di e Herusalèm Nobo ta loke Abraham a mira pa medio di fe. "Pasobra e tabata buska un stat ku tin fundeshinan, di kual Dios ta e arkitekto i konstruktor" (Hebr. 11:10). E Herusalèm Nobo ta Dios su obra maestro, konstruí pa esnan ku ta stim'E i ta warda Su mandamentunan. E Herusalèm Nobo lo ta e hogar di e yunan fiel di Dios den shelu durante e milenio i, despues di esei, riba e tera nobo pa eternidat. Tin bon notisia pa esnan ku no gusta paketá òf muda. Dios ta sòru pa tur kos. Juan ta bisa ku el a mira e siudat. "Despues ami, Juan, a mira e siudat santu, Herusalèm Nobo, biniendo abou for di shelu for di Dios, prepará manera un brùit dòrná pa su esposo" (Rev. 21:2, NKJV).

Lesa Revelashon 21. Kua ta algun di e kosnan ku ta primintí nos?

Tin asina tantu kos akinan ku nos mente apénas por komprendé, dañá manera nan ta pa piká, i konosiendo solamente un mundu kaí tormentá pa piká. Pero loke nos por komprendé ta asina yen di speransa.

Na promé lugá, meskos ku Hesus a biba ku nos den e mundu kaí akí ora El a bini den karni, E lo biba ku nos den esun nobo. Ki privilegio e mester tabata pa esnan ku a mira Hesus djaserka i personal! Nos lo tin e oportunidat ei atrobe, solamente awor sin e velo di piká deformando loke nos ta mira.

E ora ei, tambe, kon nos, ku konosé solamente lágrima i tristesa i yoramentu i doló, por komprendé un di e promesanan di mas grandi den henter Beibel: "I Dios lo seka tur lágrima for di nan wowo; i lo no tin mas morto, ni tristesa, ni yoramentu. Lo no tin doló mas, pasobra e promé kosnan a pasa bai" (Rev. 21:4, NKJV). Tur e "promé kosnan" lo a pasa bai, kosnan ku nunka mester tabata aki, pa kuminsá.

Tambe, koriendo for di e trono di Dios tin e riu puru di bida, i na kada banda di e riu tin e palu di bida. E trono di Dios lo ta einan, i "nan lo mira Su kara" (Rev. 22:4, NKJV). Atrobe, esnan redimí lo biba den un serkania ku Dios ku, pa mayoria parti, nos no tin awor.

Lesa Revelashon 21:8, tokante e destino di esnan ku lo enfrentá e di dos morto. Kua piká di esnan deskribí einan Hesus no por a pordoná? Dikon, anto, e hendenan akí ta pèrdí, ora algun ku a hasi e mesun kosnan ta salbá? Kua ta e diferensia krusial entre e dos gruponan akí?

Serka di final di e ministerio di Hesus, Su disipelnan a bini serka djE den privá i a puntra: " Bisa nos, ki tempu e kosnan aki lo sosodé, i kiko lo ta e señal di Bo binida i di e fin di tempu?” (Mat. 24:3). E ora ei Hesus ta tuma dos kapítulo pa kontestá nan preguntanan. Mateo 24 ta konta di señalnan den mundu rònt di nos, manera guera, desaster, etc. Despues Mateo 25 ta papia tokante kondishonnan den iglesia djis promé ku Hesus bini atrobe. Tres storia ta ilustrá e kondishonnan akí, di kua unu ta un parabel di e talentonan, ku ta papia tokante kon Su pueblo a usa e donnan ku Dios a duna nan.

Lesa Mateo 25:14-19. Ken ta esun ku ta biaha pa un pais leu? Na ken E ta konfia Su biennan? Kiko ta nifiká "ahustá kuenta" (lesa Mat. 25:19, NKJV)?

Tin biaha nos ta pensa riba talentonan komo donnan natural manera kanta, papia, etc., pero den e storia similar di e minanan den Lukas 19:12-24, ta deklará plaka i su maneho spesífikamente. Ellen G. White tambe a deklará: "A mustra mi ku no a komprendé e parabel di e talentonan kompletamente. A duna e disipelnan e lès importante akí pa benefisio di kristiannan ku ta bibando den e último dianan. I e talentonan akí no ta representá solamente e abilidat pa prediká i instruí for di e palabra di Dios. E parabel ta apliká na e medionan temporal ku Dios a konfia na Su pueblo.” — Testimonies for the Church, tomo 1. p 197.

Lesa Mateo 25:20-23. Kiko Dios ta bisa na esnan ku tabata manehadónan fiel di plaka ora nan a sostené Su kousa? Kiko ta nifiká "drenta den e goso di bo Señor?" (Mat. 25:23, NKJV)?

Ta bastante natural pa nos pensa ku e otro persona tin mas talento ku nos tin i p'esei e ta mas responsabel na Dios. Den e storia akí, sinembargo, ta e persona ku solamente un talento, ménos plaka, a resultá infiel i a pèrdè e reino. Mas bien ku pensa riba e responsabilidatnan di otronan, laga nos focus riba loke Dios a konfia na nos i kon nos por us'é pa Su gloria.

Kon bon lo bai ku bo ora Dios bin pa “regla kuenta” ku bo?

Despues di Pablo su kombershon, el a hinka su mes kompletamente den e kousa di Kristu. Pa motibu di su edukashon i mente skèrpi, e por tabata mashá eksitoso for di un perspektiva mundano. Meskos ku Moises, Pablo a skohe pa sufri ku e yunan fiel di Dios i pa e kousa di Kristu. El a sufri slanan, piedramentu, prizòn, noufragio, hamber, friu, i mas, manera ta registrá den 2 Korintionan 11:24-33. Kon e tabata kapas di soportá tur esaki?

Lesa Romanonan 8:16-18. Kon e konosementu ku e tabata yu di Dios, tabata un faktor den su fieldat?

E balor ku Pablo a pone riba e rekompensa di e fielnan ta loke a manten'é eksitá pa sufri pa Kristu. El a skirbi for di prizòn: "Rumannan, mi mes no ta konsiderá mi mes di a alkans'é kaba; ma un kos mi ta hasi, lubidando loke ta keda tras i ekstendiendo na e kosnan ku tin padilanti, mi ta aspirá na e meta pa e premio di e supremo yamada di Dios den Kristu Hesus" (Fil. 3:13,14, NKJV).

Lesa 1 Timoteo 6:6-12, ku nos a wak kaba, pero ta bale la pena bini bèk na dje. Kua ta e mensahe krusial den e versíkulonan akí, spesialmente pa nos komo kristian?

For di e perspektiva bíbliko, prosperidat ta: tin loke bo mester ora bo mester di dje. E no ta akumulashon di poseshonnan. Prosperidat ta tambe: reklamá e promesa di Dios den Filipensenan 4:19: " I mi Dios lo proveé tur loke boso tin mester, segun Su rikesa den gloria den Kristu Hesus." Finalmente, prosperidat ta pa ta agradesido pa loke bo tin den Señor i konfia den djE den tur kos.

Dios no ta primintí Su yunan ku nan tur lo ta riku den e biennan di e mundu akí. De echo, E ta bisa ku tur ku biba un bida piadoso lo sufri persekushon. Loke sí E ta ofresé ta mihó ku kualke rikesa mundano. E ta bisa: "Lo Mi supli bo nesesidatnan, i unda ku bo bai lo Mi ta huntu ku bo." E ora ei, na final, E lo duna Su fielnan rikesa berdadero i responsabilidat i bida eterno. Ki un tremendo rekompensa!

Serka di final di su bida Pablo tabata kapas pa bisa: "Pasobra ami ta wòrdu bashá kaba komo un ofrenda di bibida, i mi tempu di bai a yega. Mi a lucha un bon lucha, mi a terminá mi kareda, mi a warda e fe; den futuro ta wardá pa mi un korona di hustisia, kual Señor, e Hues hustu, lo duna mi riba e dia ei; i no na ami so, ma tambe na tur esnan ku a stima Su binida" (2 Tim. 4:6-8). Ku nos tur, pa grasia di Dios, ta kapas pa bisa e mesun kos, i ku e mesun siguransa tambe.

Aki tin un imágen verbal di un famia di iglesia ku ta manehadónan finansieramente fiel di e negoshi di Dios riba tera.

E Vishon di Mayordomia pa Iglesianan Atventista di e di Shete dia Rònt Mundu

Ta un momento den futuro; i pastornan i lidernan di iglesia lokal tabata eksitoso pa krea un ambiente di mayordomia den iglesia. Nan a siña, entrená, sostené, i enkurashá e famia di iglesia den maneho finansiero bíbliko.

Hende ta implementando prinsipionan bíbliko den nan bida. Nan ta kresiendo den generosidat, ta spar riba un base regular pa e kosnan inesperá, i ta saliendo fo'i bou di sklabitut di debe di konsumidó.

Nan estilo di bida ta karakterisá pa moderashon, disiplina i satisfakshon. A eliminá plaka komo e dios rival, i nan ta kresiendo den nan relashon ku e Dios Kreador.

Ta Sabat mainta, i hende ta yegando pa servisionan. Den nan aktitut tin un sentido di pas, un falta di ansiedat riba asuntunan finansiero, un sintimentu generalisá di satisfakshon i gradisimentu.

Konflikto matrimonial riba plaka a disparsé pa gran parti. Nan ta drenta adorashon ku un sentido di antisipashon i ekspektativa di Dios su presensia i obra entre nan.

E ministerionan di iglesia ta totalmente finansiá, i e tin un alkanse fuerte. E ta ekstendé e amor di Kristu den formanan mashá tangibel na esnan den nesesidat.

A hasi fondonan disponibel pa proveé fasilidatnan di iglesia ku ta sostené ministerio maraviosamente i ku ta mantené ku ekselensia.

E pregunta ku nos tin nos dilanti ta: "Kiko Dios ta yamando nos pa hasi ku kualke rekurso ku El a konfia na nos?"

Preguntanan pa Diskushon:

Den klas, papia tokante e kuestion di kon nos mester komprendé dos siñansa bíbliko hopi kla: salbashon pa medio di fe i un rekompensa di akuerdo ku obranan. Kon nos ta harmonisá e dos konseptonan akí?

Dikon siña ta kontentu ku loke nos tin awor no ta nifiká ku nos no por trata na mehorá nos posishon finansiero? Es desir, dikon e ideanan akí no nesesariamente ta den konflikto?

No tin duda ku eternidat ta spera nos. Kua eskohonan nos ta hasi awor, asta kosnan "chikí", ku lo yuda determiná unda nos lo pasa e eternidat ei?