Teme Dios i Dun’E Gloria

15 di aprel

Lesa pa e Estudio di e Siman Akí:

Revelashon 14; Gén. 22:12; Ekl. 12:13,14; Kol. 3:1,2; Hebr. 12:1,2; 1 Kor. 3:16,17.

Versíkulo di Memoria:

“At'aki e pèrseveransia di e santunan ku ta warda e mandamentunan di Dios i nan fe den Jesus.” (Revelashon 14:12, NKJV).

Outor danes SØren Kierkegaard a konta un parábola tokante e tempu di fin. El a bai algu asin’aki:

Un kandela a kuminsá tras di esenario den un teater grandi. Un payaso, ku tabata parti di e aktuashon, a sali pa spièrta e oudiensia: Sali pafó; e lugá ta na kandela! E oudiensia a kere ku tabata djis gran wega, parti di e show, esei ta tur kos, i a djis aploudí. El a ripití e spièrtamentu: Sali pafó! Sali pafó! Pero mas enfátikamente el a spièrta nan, mas grandi e aplouso. Pa Kierkegaard, ta asina e mundu ta bai kaba; es desir, na e aplouso general di ingenionan ku ta kere ku ta un wega.

Fin di mundu, i eventonan ku ta hibando na dje, manera nos sa, no ta wega. Mundu ta enfrentá e krísis di mas serio for di e Diluvio. De echo, Pedro mes ta uza e storia di e Diluvio komo un símbolo di e fin, spièrtando ku meskos ku e mundu di antaño a peresé pa medio di awa, den e tempunan di fin, “e shelunan lo pasa bai ku un boroto inmenso, i e elementonan lo wòrdu destruí ku un kalor intenso, i e tera i su obranan lo wòrdu kimá kompletamente” (2 Pe. 3:10, NKJV). Siendo ku a spièrta nos tokante loke ta biniendo, awor nos mester ta prepará p’e tambe.

* Studia e lès di e siman akí pa prepará pa Sabat, 22 di aprel.

E propósito di e buki di Revelashon pa nos generashon ta pa prepará un pueblo pa ta kla pa e pronto regreso di Hesus i pa uni kunE den duna Su mensahe di último dia na e mundu. Revelashon ta revelá e plannan di Dios i ta desenmaskará e plannan di Satanas. E ta presentá Dios su último apelashon, Su mensahe urgente, eterno i universal pa henter humanidat.

Lesa e apelashon urgente di tempu di fin di apòstel Juan den Revelashon 14:7. (Lesa tambe Gén. 22:12; Salmo 89:7; Prov. 2:5; Pred. 12:13,14; Efe. 5:21.) Ki instrukshon spesífiko e ta duna nos?

E palabra griego di Tèstamènt Nobo pa “teme” den Revelashon 14:7 ta phobeo. Ta uz’é aki no den sentido di tin miedu di Dios sino den sentido di reverensia, maravia, i rèspèt. E ta transmití e pensamentu di lealtat apsoluto na Dios i sumishon kompletu na Su boluntat. E ta un aktitut di mente ku ta sentrá riba Dios mas bien ku egoséntriko. E ta kontrali di e aktitut di Lucifer den Isaías 14:13,14, ora e ta bisa den su kurason: “ ‘Lo mi subi na shelu; lo mi hasi mi trono mas haltu ku e streanan di Dios, i lo mi sinta riba e seru di asamblea, na e partinan mas retirá di nòrt. Lo mi subi mas haltu ku e halturanan di e nubianan; lo mi hasi mi mes meskos ku e Haltísimo’ ” (NKJV).

En kambio, e ta e aktitut di Kristu, “Kende, ounke ku E tabata eksistí den e forma di Dios. . . El a umiyá Su mes dor di bira obedesido te na morto, asta morto na un krus” (Fil. 2:6,8) .

E esensia di e gran konflikto ta drai rònt di sumishon na Dios. Lucifer tabata egoséntriko. El a nenga di someté na kualke outoridat eksepto su mes. Mas bien ku someté na Esun riba e trono, Lucifer a deseá di goberná for di e trono. Poné di forma simpel, teme Dios ta pone E promé den nos pensamentu. E ta: renunsiá nos egosentrismo i orguyo i biba un bida totalmente p’E.

I opviamente e mester ta importante pasobra e ta e promé palabranan for di boka di e promé di e tres angelnan.

P’esei, nos mester tene kuidou.

Kiko tabata bo propio eksperensia di teme Dios? Kon lo bo a splika un hende, den un forma positivo, di kon “teme Dios” ta algu bon?

Kiko mas Beibel ta siña nos tokante loke ta nifiká teme Dios?

Lesa Deuteronomio 6:2; Salmo 119:73,74; i Eklesiastés 12:13,14. Kiko e tekstonan akí ta revelá ku ta resultado di “teme Dios”?

E pasashinan akí ta revelá un konekshon entre teme Dios i warda Su mandamentunan. Teme Dios ta un aktitut di rèspèt deboto ku ta hiba nos na obediensia. Shelu su apelashon urgente ta pa esnan, salbá pa grasia, ta obediente na e mandamentunan di Dios (Efe. 2:8–10). Grasia no ta libra nos di obedesé e mandamentunan di Dios. E evangelio ta hasi nos liber di e kondenashon di lei, no di nos responsabilidat pa obedes’é.

Grasia no solamente ta libra nos di e kulpa di nos pasado, sino e ta empoderá nos pa biba bidanan obediente i santu den presente. Apòstel Pablo ta deklará ku “nos a risibí grasia di ta apòstel i asina hiba esnan no hudiu na obediensia n'E dor di nan fe den djE” (Rom. 1:5) .

Tin algun hende ku tin e idea straño ku salbashon pa medio di grasia di algun manera ta ninga e lei di Dios òf ta minimisá e nesesidat pa obediensia. Nan ta kere ku kualke papiamentu tokante obediensia ta legalismo. Nan a deklará: Tur loke mi ke ta Hesus. E pregunta ta: “Kua Hesus?” Un Hesus ku nos mes a fabriká, òf e Hesus di Skritura? E Kristu di Skritura nunka ta guia nos pa bagatelisá Su lei, ku ta e transkripshon di Su karakter. E Kristu di Skritura nunka ta hiba nos na minimisá e doktrinanan di Beibel, ku ta revelá mas klaramente ken E ta i Su plan pa e mundu akí. E Kristu di Skritura nunka ta hiba nos na redusí Su siñansanan na tópikonan piadoso ku no ta esensial. Kristu ta e enkarnashon di tur bèrdat doktrinal. Hesus ta bèrdat enkarná. E ta doktrina bibá.

Revelashon su último apelashon ta yama nos a traves di fe den Hesus pa aseptá e plenitut di tur kos ku E ta ofresé. E ta yama nos pa “teme Dios”, kua nos ta ekspresá pa medio di fe den Su poder redentor pa empoderá nos pa biba bidanan santu i obediente.

Kon Hesus su palabranan akinan, “ ‘No tene miedu di esnan ku por mata kurpa di hende, ma no por mata su alma sí; mas bien tene miedu di Dios ku tin poder pa destruí kurpa i alma den fièrnu’ ” (Mat. 10:28, NKJV), ta yuda nos komprendé loke ta nifiká teme Dios?

Den un era di konsumismo, ora balornan sekular a hasi e ami e sentro, shelu su apelashon ta pa bira for di e tirania di egosentrismo i e sklabitut di importansia outo-eksagerá i pa pone Dios den sentro di nos bida. Pa algun hende, plaka ta e sentro di nan bida. Pa otronan, e ta plaser òf poder. Pa algun, e por ta deporte, muzik, òf entretenimentu. E mensahe di Revelashon ta un yamada kla pa teme, respetá, i honra Dios komo e berdadero sentro di bida.

Lesa Mateo 6:33, Kolosensenan 3:1,2, i Hebreonan 12:1,2. Kiko e pasashinan akí ta bisa nos tokante hasi Dios e sentro di nos bida?

E tema sentral den e konflikto final di tera ta un bataya pa e mente. E ta realmente unu di lealtat, outoridat, i kompromiso na e boluntat di Dios.

E bataya final den e gran konflikto ta entre bon i malu pa kontrolá nos pensamentunan. Apòstel Pablo ta duna nos e amonestashon akí: “Laga tin den boso e aktitut aki ku tabatin tambe den Kristu Hesus” (Fil. 2:5, NKJV). E mente ta e fòrti di nos ser. E ta e fuente di nos akshonnan. E palabra “laga” ta nifiká permití òf skohe. E ta papia di un akto boluntario di e boluntat. E eskoho pa tin e mente di Kristu ta e eskoho pa permití Hesus forma nos pensamentu dor di yena nos mente ku e kosnan di eternidat. Nos akshonnan ta revelá unda nos proseso di pensamentu ta. Teme Dios ta: hasi E di promé den nos bida.

Pensa riba kon fásil, den un sentido, ta pa kontrolá bo pensamentunan, a lo ménos ora bo ta konsiente ku mester kontrolá nan. Hopi bia e problema ta ku, a ménos ku nos hasi un esfuerso konsiente pa reflekshoná riba e kosnan korekto, e “kosnan di ariba, no riba kosnan di tera”, nos mente, kaí i pekaminoso manera e ta, lo inkliná di forma natural den direkshon di e kosnan baho, e kosnan di mundu. P’esei, nos mester, manera Pablo a bisa, skohe a propósito i deliberadamente, usando e don sagrado di boluntat liber, pa meditá riba e kosnan selestial.

“Pa konkluí, rumannan: pensa riba tur loke ta berdadero i noble, hustu i puru, agradabel i honorabel. Si tin kiko ku ta, ku ta bon i ku ta digno di alabansa, pensa riba eseinan” (Fil. 4:8). Kon nos ta siña hasi loke Pablo ta bisa nos akinan? Lesa Efesionan 1:4. Pensa riba kiko ta nifiká ku, asta promé ku e “fundashon di mundu”, a “skohe” bo den Kristu pa tin salbashon den djE. Dikon bo mester haña e bèrdat akí asina alentador?

Un estudio di uzo di e frase den Tèstamènt Bieu “duna gloria na Dios” (Rev. 14:7) ta mustra ku, interesante sufisiente, hopi bia (ma no solamente) e ta aparesé den konteksto di huisio divino (Hos. 7:19; 1 Sam. 6:5; Jer. 13:15, 16; Mal. 2:2), meskos ku e ta hasi den e mensahe di e promé angel tambe (Rev. 14:7). Ta mira e idea akí tambe den Revelashon 19:1,2: “ ‘Aleluya! Salbashon, gloria i poder ta pertenesé na nos Dios; pasobra Su huisionan ta bèrdadero i hustu’ ”.

Lesa 1 Korintionan 3:16,17; 1 Korintionan 6:19,20; i 1 Korintionan 10:31. Kon e pasashinan akí ta yuda nos komprendé un manera ku nos por glorifiká Dios?

Di akuerdo ku apòstel Pablo, nos kurpa ta un santuario, e lugá di biba di e Spiritu di Dios, un tèmpel hasí santu pa e presensia di Dios. E Skrituranan ta duna nos un yamada kla pa glorifiká Dios den tur aspekto di nos bida. Ora Dios ta e sentro di nos bida, nos úniko deseo ta pa dun’E gloria, sea ta ku nos dieta, nos vestuario, nos entretenimentu, òf nos interakshon ku otronan. Nos ta duna gloria na Dios ora nos ta revelá Su karakter di amor na e mundu a traves di nos kompromiso pa hasi Su boluntat. Esaki ta ainda mas importante den lus di e huisio di tempu di fin di tera.

Lesa Romanonan 12:1,2. Ki apelashon apòstel Pablo ta hasi enkuanto di e totalidat di nos eskohonan di bida?

E palabra griego di Tèstamènt Nobo pa kurpanan den e pasashi akí ta somata, ku ta mihó tradusí komo e totalidat kolektivo di ken bo ta, kurpa, mente, i emoshonnan. E tradukshon di Beibel Phillips ta tradusí e ekspreshon “sirbishi rasonabel” komo un “akto di adorashon inteligente”. Den otro palabra, ora bo hasi un kompromiso total pa “teme Dios” i “glorifik’E” den tur loke bo ta hasi, dunand’E bo mente, kurpa, i emoshonnan, esaki ta un akto di adorashon inteligente. I tambe, den lus di e huisio di Dios, tene kuidou pa obedesé ta, enbèrdat, un bon idea.

Pensa riba loke bo ta hasi ku bo kurpa. Kiko bo por hasi pa sigurá ku bo ta, enbèrdat, glorifikando Dios kuné?

“Ata esnan ku ta warda e mandamentunan di Dios, i e fe di Hesus” (Rev.14:12, NKJV). Esaki ta e deskripshon di Dios su pueblo fiel den e último dianan. Sinembargo, e úniko manera ku un hende por warda e mandamentunan di Dios, e tempu aya òf awor, ta pa medio di e fe di Hesus. Nota ku nos teksto no ta bisa “fe den Hesus”, aunke esei ta ekstremadamente importante, pero e ekspreshon akí, “e fe di Hesus”, ta algu mas. E ta e kualidat di fe ku a kapasitá Kristu pa ta viktorioso riba e tentashonnan di mas feros di Satanas. Fe ta un don duná na kada kreyente. Ora nos ehersé e fe ku Spiritu Santu ta pone den nos kurason, e fe ei ta krese. Nos ta vense, no pa medio di nos forsa di boluntat, sino pa medio di e poder di e Kristu bibu ku ta obra a traves di nos. Nos ta vense no pa motibu di ken nos ta sino pa motibu di ken E ta.

Nos por vense pasobra El a vense. Nos por ta viktorioso pasobra E tabata viktorioso. Nos por triunfá riba tentashon pasobra El a triunfá riba tentashon.

Lesa Hebreonan 4:14–16 i Hebreonan 7:25. Kiko ta e medionan di vense i biba bidanan ku ta “teme Dios” i “dun’E gloria”?

Hesus, e Yu divino di Dios, a vense e engañonan di diabel. El a enfrentá tentashonnan konfiando den e promesanan di Dios, sumitiendo Su boluntat na boluntat di e Tata i dependiendo riba poder di e Tata. Ora nos konfi’E, wak E, kere den djE, nos tambe por ta viktorioso. Hesus ta nos tur den tur, i e mensahenan di e tres angelnan ta trata tur di djE. E mensahe di Revelashon ta unu di viktoria, no derota. E ta papia di un pueblo ku, a traves di Su grasia i pa medio di Su poder, ta vense.

Ta uza e palabra “vense”, den un forma òf otro, 11 bia den e buki di Revelashon. Den e vishon di e shete iglesianan ku ta representá e iglesia kristian di promé siglo te na nos tempu, tin kreyentenan den tur generashon ku, Juan ta bisa, a “vense”. Na tempu di fin esnan ku “vense” ta heredá tur kos (Rev. 21:7). Esaki no ta legalismo. E ta viktoria a traves di Hesu-Kristu, kende su bida perfekto di hustisia perfekto, i esei so, ta loke ta duna nan e promesa di bida eterno. E ta fe den akshon. E ta grasia ku ta transformá, ku ta kambia bida i milagroso den bida di e kreyente.

Tin kosnan den bo bida ku bo ta deseá di vense? Kon nos por kambia nos deseonan den akshon? Ki pasonan práktiko nos por tuma pa bira un di e “vensedónan” di Revelashon?

Pensa riba e palabranan maravioso di Pablo den Hebreonan 7:25, ku, papiando tokante Hesus komo nos Sumo Saserdote, ta bisa ku “pa semper E por salba esnan ku ta aserká Dios pa medio di djE”. Salba pa semper. E palabra griego pa “pa semper” ta nifiká “pleno, kompletu, total”. Ta Hesus kende ta salba nos; nos trabou ta pa someté na djE, reklamando Su viktoria pa nos. Nos konfiansa mester ta den djE, no den nos mes.

“Nos por resumí e forsa di e ekspreshon ‘teme Dios’ den Revelashon komo Dios su último yamada na humanidat pa skohe E komo nan Dios glorioso i mahestuoso, . . . kende lo ta viktorioso riba e forsanan di maldat ku ta opon’E i Su plan pa e rasa humano (cf. [Rev.] 14:9–11). E temor akí no ta manifestá su mes, a lo ménos no pa awor (cf., [Rev.] 6:14–17), den teror i temblamentu, sino den sumishon gososo i amoroso na e lei di Dios i na Su adorashon eksklusivo. No mester rekonosé niun otro poder komo digno di un deboshon i lealtat asina. De echo, no tin otro opshonnan, pasobra loke ta mustra su mes na horizonte di e konflikto kósmiko komo posibilidatnan ta akshonnan di podernan demoniako destiná pa ekstinshon (Revelashon 16:13,14; 17:14; 20:11–15). Pa e motibu ei temor di Señor ta un invitashon divino positivo . . . pa tuma Dios su banda den e konflikto kósmiko pa asina para dilanti di Su presensia di mas glorioso, yená ku goso den kompañerismo eterno kunE([Rev.] 21:3–4; [Rev.] 22:3–5).”—Ángel Manuel Rodríguez, “The Closing of the Cosmic Conflict: Role of the Three Angels’ Messages,” p. 27.

Preguntanan pa Diskushon:

Pensa riba e poder inkreibel di Dios, Esun kende a krea i ta sostené henter e kòsmòs. Apénas nos por kapta e idea di e kòsmòs; kon anto nos por sikiera kuminsá kapta su Kreador? Pensa riba kon muchu mas grandi i mas enorme i mas poderoso E ta ku nos. I e Dios akí lo husga nos un dia? Kon e echonan akí ta yuda nos komprendé e idea di e “temor di Dios” i loke e ta nifiká?

Kon nos por evitá legalismo ora nos ta diskutí e konseptonan bíbliko di santidat, vensementu, i viktoria? Dikon nos mester komprendé semper ku tabata e viktoria di Kristu pa nos, na e krus, ku solamente ta keda e fundeshi di nos speransa di salbashon, no importá nos viktorianan (òf asta fayonan) akinan awor?

Dikon, asta ku tur e promesanan di viktoria riba piká, hopi bia nos ta haña nos mes ta faya i no ta biba na e normanan di hustisia ku Hesus Mes a modelá pa nos i ta primintí ku por ta di nos tambe? Ki erornan nos ta kometiendo di no permití Dios hasi e obra den nos ku El a primintí?