Kon Dios ta Reskatá Nos

15 di yüli

Lesa pa e Estudio di e Siman Akí:

Efe. 2:1–10; Efe. 5:14; Rom. 5:17; Efe. 5:6; 2 Tim. 1:7.

Versíkulo di Memoria:

“Ma Dios, siendo riku den miserikòrdia, pa motibu di Su gran amor ku kual El a stima nos, asta tempu ku nos tabata morto den nos transgreshonnan, a hasi nos bibu huntu ku Kristu” (Efesionan 2:4,5, NKJV).

Riba 14 di òktober 1987, Jessica McClure di diesocho luna bieu tabata hungando den kurá patras di su tanta ora el a kai bintidos pia den un pos bandoná. Su situashon a atraé media for di rònt mundu te na Midland, Texas. Un oudiensia global tabata wak “Baby Jessica” drumiendo, yorando, kantando, i gritando pa su mama. Nan a wak segun ku obreronan di emergensia tabata pòmp airu fresku manda abou den e pos.

Finalmente, sinkuentiocho ora despues di Jessica su kaida, e oudiensia mundial a wak miéntras tabata libra Jessica for di e pos di ocho inch ku a atrap’é pa mas ku dos dia. E potrèt di fotógrafo Scott Shaw ku a gana e Premio Pulitzer a kapturá e momento: un kabel di reskate ta kòrta e karanan preokupá di Jessica su libertadónan ku ta mira abou na e bulto lorá na kurason di e drama, Baby Jessica.

No tin nada tan emoshonante ku un bon storia di reskate, i Pablo, den Efesionan 2:1–10, ta duna nos un bista djaserka i personal di e mishon reskate di mas grandioso, di mas drástiko di tur tempu, Dios Su esfuerso pa reskatá humanidat. E drama di e storia ta oumentá pa motibu ku nos sa ku nos no ta djis mirónes di un otro hende su reskate sino testigunan di esun di nos mes.

* Studia e lès di e siman akí pa prepará pa Sabat, 22 di yüli.

Lesa Efesionan 2:1–10. Kiko ta e idea prinsipal ku Pablo ta dunando nos aki tokante loke Hesus a hasi pa nos?

Pablo ya a deskribí e salbashon duná na kristiannan (Efe. 1:3–14, 15–23) i a konta, den kòrtiku, e storia di e kreyentenan na Efeso (Efe. 1:13). Den Efesionan 2:1–10, Pablo lo konta awor nan storia di kombershon den mas detaye, ku un enfoke mas personal. E ta kompará nan eksistensia pekaminoso di pasado (Efe. 2:1–3) ku e bendishonnan di Dios Su salbashon, ku e ta deskribí komo un partisipashon den e resurekshon, asenshon, i eksaltashon di Kristu (Efe. 2:4–7), i e ta selebrá e base di e salbashon ei den e grasia i obra kreativo di Dios (Efe. 2:8–10).

Ta resumí e tres sekshonnan akí di e pasashi debidamente den e frasenan di Efesionan 2:5:

1. “nos tabata morto den nos transgreshonnan”;
2. [Dios] “a hasi nos bibu huntu ku Kristu”;
3. “pa medio di grasia di Dios boso ta salbá”.

Den Efesionan 2:1, 2, Pablo ta enfatisá e realidat tristu di e eksistensia di kombershon previo di su oudiensia notando ku nan tabata spiritualmente morto, praktikando transgreshonnan i pikánan komo nan patronchi regular di bida (Efe. 2:1) i tabata dominá pa Satanas (Efe. 2:2). Ya ku Pablo ta skirbi na hende bibu, e ta referí na nan komo un tempu “morto” den sentido metafóriko (kompará Efe. 5:14). Sinembargo, nan situashon tabata hopi real i teribel ya ku un tempu nan tabata separá for di Dios, e Fuente di bida (kompará Kol. 2:13, Rom. 5:17, Rom. 6:23).

Reflehando riba e bidanan pasá di su oyentenan, Pablo ta identifiká dos fuente eksterno ku tabata dominá nan. Esun promé di esakinan ta “e kaminda di e mundu akí” (Efe. 2:2), e kustumbernan i komportashon den e sosiedat mas amplio di Efeso ku a deformá bida humano den rebelion kontra Dios.

Ta deskribí Satanas den dos forma komo e di dos forsa eksterno ku tabata dominá nan eksistensia previo. E ta “e prens di e poder di laira” (Efe. 2:2) debí ku ta identifiká “laira” (òf “e lugánan selestial”) komo e lugá di podernan sobrenatural, inkluyendo esnan maligno (kompará Efe. 1:3, Efe. 3:10, Efe. 6:12). Tambe, e ta aktivo riba tera ya ku e ta “e spiritu ku ta obra awor den e yunan di desobedensia” (Efe. 2:2).

Kiko e versíkulonan akí ta siña tokante e realidat di e gran konflikto? Na mes momento, kon nos por saka konsuelo i speransa den e konosementu ku Hesus tabata viktorioso i ku nos por kompartí den Su viktoria awor?

“Nos tur tambe tabata biba ántes meimei di nan [esnan desobediente], den e pashonnan di nos karni, kumpliendo ku e deseonan di karni i di mente, i tabata di naturalesa yunan di furia, meskos ku e otronan” (Efe. 2:3).

Apart for di e intervenshon di Dios, eksistensia humano ta dominá no solamente pa e forsanan eksterno menshoná den Efesionan 2:2, sino tambe pa esnan interno: “e pashonnan di nos karni, kumpliendo ku e deseonan di e kurpa i e mente” (Efe. 2:3; kompará Santiago 1:14,15; 1 Pe. 1:14).

Kiko Pablo ke men ora e deklará ku su oyentenan tabata un tempu “di naturalesa yunan di furia, meskos ku e otronan” (Efe. 2:3)? Kompará Efesionan 2:3 ku Efesionan 5:6.

E realidat presente di un bida pèrdí ta sufisiente preokupante, pero su implikashonnan di último dia ta ainda mas spantoso. Sernan humano, siendo “di naturalesa yunan di furia, meskos ku e otronan” (Efe. 2:3) ta para bou di e menasa di Dios Su huisio na fin di tempu.

E frase “di naturalesa yunan di furia” ta mustra na un otro realidat alarmante tambe. Miéntras ainda nos ta kargadónan di e imágen di Dios, nos a bin komprendé ku tin algu profundamente trosé den nos. Bibando e bida kristian, anto, no ta djis un asuntu di vense un òf dos mal kustumber, òf superá kualke “transgreshonnan i pikánan” (Efe. 2:1) ku aktualmente ta menasando. Nos no ta djis lucha ku pikánan sino ku piká. Nos ta inkliná pa ku rebelion kontra Dios i pa ku destrukshon propio. Hende, outomátikamente, ta koutivá den un patronchi di komportashon pekaminoso i outodestruktivo, siguiendo e mandatonan di Satanas (Efe. 2:2) i nos propio deseonan pekaminoso natural (Efe. 2:3). Kreyentenan un tempu tabata “di naturalesa yunan di furia.”

Ta importante pa nota ku Pablo ta uza tempu pasado, nos tabata di naturalesa “yunan di furia” (Efe. 2:3). Esaki no ta nifiká ku un inklinashon inherente pa ku maldat no ta un realidat mas pa kreyentenan. Pablo ta dediká un porshon konsiderabel di su karta, Efesionan 4:17–5:21, spièrtando ku aktonan pekaminoso, ankrá den un naturalesa pekaminoso, ta keda un menasa pa kristiannan. E ta nifiká sí, sinembargo, ku e “ami bieu” akí no mester dominá e kreyente mas, ku pa medio di e poder di Kristu por “pone boso bida di ántes un banda” i “biba manera hende nobo, kreá segun imágen di Dios, hende ku ta biba un bida rekto i hustu” (Efe. 4:22–24).

Ken no a yega di eksperensiá presis kon korupto nos mes naturalesa ta, asta despues ku nos a duna nos mes na Hesus? Kiko esaki mester siña nos tokante kon importante ta pa nos tene duru na djE, tur momento di nos bida?

“Ma Dios, siendo riku den miserikòrdia, pa motibu di Su gran amor ku kual El a stima nos” (Efe. 2:4). Aki, ku dos palabra poderoso, “Ma Dios,” Pablo ta bira for di su kuadro tristu di e bidanan pasá di su oudiensia (Efe. 2:1–3) na e realidat nobo, yená ku speransa, ku ta marka nan bida komo kreyentenan (Efe. 2:4–10).

Den ki sentido kreyentenan ta partisipá den e resurekshon, asenshon, i eksaltashon di Kristu? Ki ora e partisipashon akí ta tuma lugá? Efe. 2:6,7.

Nos a nota ku Efesionan ta un karta saturá ku Kristu enfatisando e solidaridat di kreyentenan ku Kristu. Den Efesionan 2:5 i 6, Pablo ta ekstendé e tema akí ora e ta desplegá tres verbo kompuesto pa lòs e bèrdat sorprendente ku, a traves di Dios Su inisiativa, kreyentenan mes ta partisipá den eventonan importante di historia di salbashon ku ta konsentrá riba e Mesias, Hesus.

Kreyentenan ta:

1. ko-resusitá ku Kristu;
2. ko-lantá ku Kristu (kua Pablo probablemente ta uza pa indiká e partisipashon di kreyentenan den Kristu Su asenshon na shelu);
3. ko-sintá ku Kristu “den e lugánan selestial,” ku ta nifiká ku kreyentenan ta partisipá den Kristu Su “sintamentu” riba e trono di e kòsmòs. Nan ta ko-eksaltá ku Kristu.

Pa apresiá e poder di Pablo su argumento, nos mester wak bèk na Efesionan 1:19–23 i kòrda ku den Su morto, resurekshon, asenshon, i eksaltashon, Kristu ta gana viktoria riba tur poder maligno i spiritual, esnan mes ku un tempu tabata dominá e bida di kreyentenan. Den e resurekshon, asenshon, i eksaltashon di Hesus, a remplasá e podernan akí, aunke ainda nan ta aktivo i menasante pa bida humano, minusiosamente. E kòsmòs a kambia. Realidat a kambia. Kreyentenan no ta simpel espektadornan di e eventonan akí sino nan ta personalmente i íntimamente envolví den nan. Ku nos ta ko-resusitá, ko-asendé, i ko-eksaltá ku Hesus ta habri henter un seri di posibilidatnan pa nos. Nos tin derechi di bira for di un eksistensia dominá pa demoño na un bida di abundansia i poder spiritual den Kristu (2 Tim. 1:7).

“Pasobra Dios no a duna nos un spiritu di kobardia, pero di poder, amor i dominio propio” (2 Tim. 1:7). Kon e versíkulonan ku nos a wak awe ta yuda nos komprendé loke Pablo ta skirbi akinan?

Kompará Dios Su planiamentu pa salbashon den Efesionan 1:3, 4 ku e resultadonan eterno di e plan ei deskribí den Efesionan 2:7. Kua ta e elementonan i metanan esensial di Dios Su “plan di salbashon”?

Seremonianan di graduashon ta selebrashonnan maravioso, sea pa skol preparatorio òf un Ph.D. Un graduashon ta marka un logro importante, pa move na un fase diferente di bida òf karera. Ta importante pa nos komo kreyentenan komprendé un bèrdat profundo di e evangelio: nos no ta gradua nunka for di grasia. Nunka tin un selebrashon ku nos a haña nos Ph.D. den grasia òf a gradua di nos nesesidat di dje.

Pablo ta afirmá e bèrdat akí den Efesionan 2:7, i ta enfatis’é ku un kronologia ekstenso. Dios a aktua den pasado den Kristu pa redimí nos, asina identifikando nos ku Su Yu, Hesu-Kristu, pa nos ta aktualmente ko-partisipantenan den Su resurekshon, asenshon, i eksaltashon (Efe. 2:4–6). E plan di Dios, sinembargo, no ta kaba ku un pasado yená ku grasia i un presente bañá den miserikòrdia. Dios Su plan, ankrá den konsehonan divino den tempu inmemorial (Efe. 1:4), ta ekstendé pa semper den futuro. E ta inkluí tur “e siglonan ku ta bin” (Efe. 2:7). Su plan pa e futuro eterno ta fundá riba e mesun prinsipio ku Su akshonnan den pasado i presente, e prinsipio di grasia. “Den e tempu benidero,” Dios ta wak padilanti na demostrá “e rikesa inmenso di su grasia ... basá riba e bondat ku El a mustra nos den Kristu-Hesus” (Efe. 2:7).

Pablo ta pensa riba e grasia di Dios komo un tesoro òf fortuna di balor inkalkulabel (kompará Efe. 1:7, Efe. 3:8) for di kua kreyentenan por saka pa satisfasé kualke nesesidat. E generosidat grandioso akí di Dios pa ku nos ta bira un ekshibishon elokuente, eterno, i kósmiko di Su grasia.

“Ora Hesus a bin biba serka nos, E mester a revelá Dios tantu na hende komo na angelnan. . . . Pero no a duna e revelashon akí solamente pa Su yunan mortal. Nos mundu chikitu ta e buki di lès di universo. Dios Su propósito maravioso di grasia, e misterio di amor redentor, ta e tema den kua ‘angelnan ta deseá di wak,’ i e lo ta nan estudio a lo largu di siglonan sin fin. Tantu e sernan redimí komo esnan kaí lo haña den e krus di Kristu nan siensia i nan kansion. Lo mira ku e gloria ku ta bria den e kara di Hesus ta e gloria di amor apnegá.”—Ellen G. White, The Desire of Ages, p. 19, 20.

Bolbe lesa Efesionan 2:1–10, i focus riba Pablo su konklushon den versíkulonan 8–10. Kua puntonan e ta enfatisá segun ku e ta konkluí e pasashi?

Den Efesionan 2:1–3, Pablo ta dokumentá ku e salbashon di e kreyentenan na Efeso no ta tuma lugá pa motibu di nan bon komportashon òf kualidatnan atraktivo. Ora e storia kuminsá, nan ta spiritualmente morto. No tin niun chispa di bida òf balor den nan (Efe. 2:1). Nan tabata kompletamente vensé pa piká (Efe. 2:1). Nan no ta ekshibí niun inisiativa personal pero Satanas mes, i nan propio pashonnan básiko i engañonan mental ta guia nan rònt (Efe. 2:2,3).

Deskonosí pa nan, nan ta den un posishon muchu mas pió ku simplemente ta sin bida spiritual òf birtut. Den kompania di henter humanidat, nan ta e enemigunan di e Dios berdadero i ta moviendo den direkshon di un dia di destino i huisio divino. Nan ta “yunan di furia, meskos ku e sobránan” (Efe. 2:3).

Na lugá di ta ankrá den nan mes kualidatnan, nan salbashon ta ankrá den e amor ineksplikabel di Dios, un amor ku no por splika basá riba niun balor den e opheto di e amor ei. Den miserikòrdia i amor, Dios ta aktua na nan fabor den Kristu Hesus (Efe. 2:4), resusitando nan for di morto spiritual. Pa motibu di Dios Su intervenshon, nan ta eksperensiá un ruta asombroso ku ta sigui e trayektoria di Hesus Mes. For di e profundidat ekstremo di morto spiritual total i sklabitut desintegrá, a resusitá nan i a transferí nan na e “lugánan selestial” i a pone nan sinta huntu ku Kristu riba e trono kósmiko (Efe. 2:5,6). E intervenshon divino, manera welek akí, sinembargo, no ta un fenómeno temporal. E tin berdadero poder ku ta keda, durabilidat eterno, pasobra Dios tin intenshon di ekshibí Su grasia pa ku nan den Kristu Hesus a traves di tur eternidat (Efe. 2:7).

Den su konklushon di Efesionan 2:1–10, versíkulonan 8–10, Pablo ta bai bèk riba e tereno akí, deseando di sigurá ku su punto ta pega: e salbashon di kreyentenan ta un obra divino, no unu humano. E no ta originá den nos sino den e don di Dios. Niun ser humano por broma di a inspir’é (Efe. 2:8,9). Ora nos ta para den e grasia di Dios, nos kreyentenan ta eksibishonnan di Su grasia, i solamente di Su grasia. Nos ta Su obranan maestro, kreá pa Dios “den Kristu Hesus” (Efe. 2:10).

Dikon ta asina importante pa nos komprendé ku nos salbashon ta di Dios i no ta ankrá den nos propio balor òf esfuersonan?

Fundamental pa e Epestel na e Efesionan tin e storia ku hopi bia ta ripití parsialmente òf referí na dje den dje. E eventonan prinsipal den e narativo ta esakinan:

1. Dios Su eskoho di e pueblo “promé ku fundashon di mundu” (Efe. 1:4,5,11).
2. Nan eksistensia pèrdí di pasado (Efe. 2:1–3,11,12; Efe. 4:17–19, 22; Efe. 5:8).
3. E intervenshon di Dios den Kristu pa salba nan (Efe. 1:7, 8; Efe. 2:4–6, 13–19; Efe. 4:1,20,21; Efe. 5:2,8,23,25,26).
4. Nan aseptashon di e evangelio (Efe. 1:12,13 i impliká otro kaminda). Despues di tabata “sin speransa” (Efe. 2:12), awor nan ta poseé “esun speransa” den direkshon di kua kreyentenan ta move (Efe. 4:4; kompará Efe. 1:18).
5. E bida presente di e destinatarionan komo disipelnan. Aunke nan ta biba den un tempu kargá ku peliger i e oposishon di e podernan maligno, nan por yama riba e fuentenan ofresé pa nan Señor eksaltá (Efe. 1:15–23, Efe. 2:6, Efe. 3:14–21, Efe. 4:7–16, Efe. 6:10–20).
6. Den e futuro kulminashon di historia, e Spiritu Su ròl komo “garantia” (Efe. 1:13,14), òf “seyo” (Efe. 4:30), ta alkansá kumplimentu. Den e momento kulminante akí, lo rekompensá e destinatarionan pa nan fieldat ora nan tuma poseshon di e “herensia” ya otorgá na nan den Kristu (Efe. 2:7; Efe. 6:8,9); i, pa medio di nan fe den Kristu, lo otorgá nan un lugá den e siglo benidero sentrá den Kristu (Efe. 1:21; Efe. 2:7, 19–22; Efe. 4:13, 15; Efe. 5:27).

Preguntanan pa Diskushon:

E storia fundamental di Efesionan (lesa akiriba) no ta djis e storia di kreyentenan den siglo 1. E ta nos propio storia. Kua di e pasonan òf fasenan prinsipal di e storia ei ta duna bo mas speransa na e momento akí?

Dikon bo ta kere ku Pablo ta rekordá e pasado di su oudiensia asina frekuentemente, invitando nan pa reflekshoná riba nan bida promé ku kombershon?

Kompará Pablo su resúmen di e evangelio den Efesionan 2:8–10 te na su resúmen anterior den Romanonan 1:16, 17. Kua temanan similar ta paresé? Den kua formanan nan dos ta diferente?

Miéntras e bon obranan di kreyentenan no ta hunga niun ròl den nan redenshon, den sentido ku nunka nan no por duna hende mérito di salbashon dilanti di Dios, ki parti importante nan ta hunga den Dios Su plannan pa kreyentenan? Efe. 2:10.