E Misterio di e Evangelio

29 di yüli

Lesa pa e Estudio di e Siman Akí:

Efesionan 3; Job 11:5–9; Ezek. 43:13–16; Amos 7:7,8; Rev. 11:1,2.

Versíkulo di Memoria:

“Awor na Esun ku ta poderoso pa hasi tur kos muchu mas abundantemente di loke nos ta pidi òf pensa, segun e poder ku ta obra den nos, na djE sea gloria den e iglesia i den Kristu Hesus den tur generashon pa semper i semper. Amèn.” (Efesionan 3:20,21, NKJV).

Den Efesionan 3, Pablo ta habri ku un tema ku ya el a toka anteriormente: “ku e paganonan ta ko erederonan i miembronan di e mesun kurpa, i ko partisipantenan di e promesa den Kristu Hesus pa medio di e evangelio” (Efe. 3:6). I aunke esei kisas no ta un gran sorpresa pa e iglesia awe, komponé den su mayoria di paganonan, e tabata algu ku tabata parse radikalmente nobo pa hopi di su lesadónan den e tempu ei.

Pablo despues ta sigui ku su palabranan inspirá, segun ku e apòstel ta reflekshoná riba su pashon pa prediká e evangelio di Hesus na e paganonan.

Nos ta siña tambe di su difikultatnan aktual ora e ta ekstendé e ministerio ei, difikultatnan ku ta inkluí tempu den un prizòn romano.

I tambe nos ta tende su kompromiso na e misterio meimei di e evangelio, e misterio ku, den iglesia, paganonan ta riba mesun nivel ku nan rumannan hudiu. Nos ta eksperensiá su eksitashon pa e iglesia i su mishon kósmiko. Nos ta skucha ora e ta hasi orashon, alabando Dios pa ekspresá Su grasia a traves di e iglesia.

Den kòrtiku, nos ta inspirá pa djòin Pablo den su pashon pa e evangelio.

* Studia e lès di e siman akí pa prepará pa Sabat, 5 di ougùstùs.

Lesa Efesionan 3. Segun ku bo ta hasi esei, identifiká un òf mas tema prinsipal. Kua puntonan prinsipal Pablo ta enfatisá?

Efesionan 3 ta desplegá un struktura interesante. Pablo ta kuminsá e kapítulo ku e palabranan akí: “Pa e motibu akí ami, Pablo, prizonero di Kristu Hesus pa motibu di boso, paganonan” (Efe. 3:1). Despues, e ta interumpí pa loke ta resultá di ta un desviashon largu enfoká riba su trabou komo apòstel na e paganonan (Efe. 3:2–13). Despues di e paréntesis, e ta señalá un regreso na su moda di pensa original, ripitiendo e frase: “Pa e motibu akí” (Efe. 3:14), ku versíkulonan 14–21 ku ta proveé su informe di orashon interumpí.

Den Efesionan 3:1 Pablo ta identifiká su mes komo “prizonero di Kristu Hesus” su forma di argumentá ku, aunke e por ta keda den koutiverio romano i ta parse di ta bou di outoridat di e imperio romano, tin un propósito divino mas profundo ta tumando lugá den su bida. E no ta e prizonero di Roma sino “e prizonero di Kristu Hesus”! (kompará Efe. 4:1).

Pablo su menshon di su “sufrimentu” (Efe. 3:13), i su menshon mas despues di su kadenanan (Efe. 6:20), ta sugerí ku e no ta bou di aresto domisiliario relativamente konfortabel (kompará Echonan 28:16) ma ta den prizòn. Siendo den prizòn den siglo unu i den un sèl romano tabata spesialmente desafiante. E imperio romano no tabata manehá prizònnan bon organisá ku fasilidatnan sanitario i servisio di kuminda regular. De echo, e imperio tabatin tiki nesesidat pa prizònnan ya ku no tabata usa enkarselashon komo un medio di kastigu. Tabata pone hende den prizòn solamente miéntras nan tabata spera riba huisio òf ehekushon. Tabata spera pa prizoneronan proveé pa nan mes i tabata dependiente riba famianan i amigunan pa supli kuminda i otro nesesidatnan.

Pablo su preokupashonnan kisas ta sentra riba e impakto emoshonal di su enkarselashon riba kreyentenan, ya ku ser un prizonero tabata un desgrasia sosial ekstremo den konteksto di un kultura di honor i bèrgwensa. E lo por tin miedu kisas ku algun hende lo puntra: “Kon Pablo por ta e apòstel i mensahero di e Kristu eksaltá i ta un prizonero despresiá?” Asina e ta reformulá su enkarselashon, yudando kreyentenan mir’é komo parti di Dios Su plan. E ta sufriendo pa nan (“sufri pa boso”) i loke parse di ta un fuente di bèrgwensa lo resultá, de echo, di ta pa nan “gloria” (Efe. 3:13).

Kon nos por siña konfia Dios i Su kamindanan meimei di loke por ta sirkunstansianan mashá difísil?

Kua ta e misterio ku tabata konfiá na Pablo? Efe. 3:1–6.

Segun ku bo ta studia Efesionan 3:1–6, nota lo siguiente:

Di promé, Pablo ta skirbi e parti di e karta akí spesífikamente na kreyentenan pagano den e iglesianan di kas di Efeso (Efe. 3:1).

Di dos, Pablo ta afirmá di ta resipiente di algu ku e ta kalifiká “e mayordomia di e grasia di Dios,” duná na dje “pa boso”, pa kreyentenan pagano (Efe. 3:2). E mayordomia akí, òf e ministerio di grasia akí, ta Pablo su forma di deskribí e mandato duná na dje pa prediká e evangelio (“e grasia di Dios”) na e paganonan (kompará Efe. 3:7,8).

Di tres, Pablo ta afirmá ku a revelá un misterio na dje, un tópiko ku ya el a skirbi di dje den e karta (lesa spesialmente Efe. 1:9,10; Efe. 2:11–22), e “misterio di Kristu” (Efe. 3:3,4). Pablo no ta deseá pa komprend’é komo e inventor di e evangelio, sino e ta reklamá sí un ministerio duná di Dios pa proklam’é.

Di kuater, Pablo no ta su so den a haña revelashon avansá tokante e misterio akí, komo ku e Spiritu tambe a revel’é na Kristu su “apòstel- i profetanan santu” den un forma ku ta surpasá e revelashon di Dios Su plan na generashonnan anterior (Efe. 3:5). E palabra profetanan akinan probablemente ta referí na esnan ku ta poseé i ta ehersé e don di profesia meimei di iglesianan di kas kristian primitivo mas bien ku e profetanan di Tèstamènt Bieu. E misterio, ku un tempu tabata skondí, awor a bira loke kisas nos por yama un “sekreto habrí.”

Finalmente, e ta deklará: “E misterio akí ta ku e paganonan ta ko erederonan i miembronan di e mesun kurpa, i ko partisipantenan di e promesa den Kristu Hesus pa medio di e evangelio” (Efe. 3:6).

Pablo ta pashoná tokante e evangelio i spesialmente tokante e manera ku ta ekspres’é den e iglesia, ku ta komponé di tantu hudiu komo pagano. E dos gruponan akí a bira e blòkinan di konstrukshon di Dios Su komunidat nobo, Su marka nobo di komunidat, e iglesia (lesa Efe. 2:14–16). Nos lo por bisa ku awor nan ta transformá di ta enemigu na bira “ko eredero,” “miembronan di e mesun kurpa” (inkluí den un solo kurpa, e kurpa di Kristu), i “ko partisipante” di e promesa di e evangelio (lesa Efe. 3:6).

Kua, si tin kualke, aktitutnan, kisas asta bou di superfisie, kisas bo por tin, ku ta kontradesí e inklushon siñá pa e evangelio? Kon bo ta deshasí di nan?

Kiko Pablo ta bisa tokante Dios i e akshonnan di Dios den Efesionan 3:7–13?

Pablo atrobe ta reklamá di ta un “sirbidó” pa medio di “e don di e grasia di Dios” (Efe. 3:7, ESV; kompará Efe. 3:1,2). E don akí, meskos ku e evangelio mes, no ta otorgá pa motibu di e balor di e reseptor, sino pa medio di e grasia di Dios. Pablo ta suprayá e punto akí deskribiendo su mes komo “esun di mas ménos entre tur e santunan” (Efe. 3:8).

Tin un avanse interesante den Pablo su outo-komprenshon ku ta notabel segun ku nos ta move a lo largu di e kartanan di Pablo den e órden ku nan tabata skirbí. Mas promé, e ta reklamá su status komo un apòstel divinamente nombrá (Gal. 1:1). Mas despues, sinembargo, e ta introdusí su mes komo “esun di mas menos di e apòstelnani, kende no ta digno pa wòrdu yamá apòstel.” (1 Kor. 15:9). Aki, den Efesionan, e ta mira su mes komo “esun di mas ménos entre tur e santunan” (Efe. 3:8). Finalmente, e ta deskribí su mes komo e pekadó “di mas grandi” òf “esun di promé” (1 Tim. 1:15).

Kisas e liña di pensamentu akí pa Pablo por yuda splika e sita famoso akí pa Ellen G. White: “Mas serka bo yega serka Hesus, mas defektuoso lo bo parse den bo mes bista; pasobra bo bista lo ta mas kla, i lo bo mira bo imperfekshonnan den kontraste amplio i distinto ku Su naturalesa perfekto.”—Steps to Christ, p. 64.

Despues Pablo ta sigui. Den Efesionan 3:10 e ta skirbi: “pa e sabiduria multiforme di Dios awor por bira konosí pa medio di e iglesia na e gobernantenan i outoridatnan den e lugánan selestial. Ken ta e “gobernantenan i outoridatnan den e lugánan selestial” menshoná akinan? Kon e iglesia ta anunsiá Dios Su sabiduria “multiforme” na nan? Aunke Efesionan 3:10 no ta deskribí e naturalesa di e podernan, ta parse mihó pa tuma nan komo esnan malbado deskribí den mas detaye den Efesionan 6:11, 12. Si ta asina, e komposishon di e iglesia, unifikando hudiunan i paganonan komo un tempu partinan hopi dividí di humanidat, ta bira un anunsio yamativo pa e “gobernantenan i outoridatnan den e lugánan selestial” demoniako akí di Dios Su plan pa futuro, “pa reuní tur kos den shelu i riba tera, i pone Kristu na kabes (Efe. 1:10). Ta pone nan na altura ku Dios Su plan ta na kaminda i nan kondena ta sigurá. E naturalesa mes di un iglesia unifiká ta señalá nan derota final.

Si bo propio kongregashon tabata tuma Pablo su “deskripshon di trabou” di e iglesia den Efesionan 3:10 na serio, kon kisas e lo por a kambia e manera ku abo i bo rumannan di iglesia ta relashoná ku otro?

Kompará Pablo su petishon di orashon anterior, Efesionan 1:16–19, ku su súplika pa kreyentenan den Efesionan 3:14–19. Den ki formanan e dos petishonnan ta similar?

Tras di e tradukshonnan ingles di Efesionan 3:14, 15 tin un wega di palabra importante. Ora Pablo bisa ku e ta dobla su rudia dilanti di “ e Tata, di Kende henter e famia den shelu i riba tera ta haña su nòmber”, e ta eksplorando e konekshon fonétiko entre e palabra griego pa Tata, patēr, i e término pa famia, patria. Den Efesionan, Pedro ta selebrá e naturalesa integral di Dios Su plan di salbashon, ku ta enbolbí tur kos (Efe. 1:9,10) pa tur tempu (Efe. 1:21). I aki e ta reklamá ku “tur famia den shelu i riba tera” ta pertenesé na e “Tata.” Tur famia (patria) ta haña su nòmber serka e Tata (patēr). Esei ta hopi bon notisia!

Reflekshoná riba e pensamentu akí: Bo famia, apesar di su imperfekshonnan i fayonan, ta pertenesé na Dios. Bo famia no ta den e gara kruel di destino, sino den Dios Su mannan kuidadó. Dios ta stima famianan imperfekto. Nan ta karga e nòmber divino. Nan ta karga e marka di Su propiedat.

Den Efesionan 3:16–19 Pablo ta pidi Dios pa duna kreyentenan un eksperensia spiritual abundante marká pa fortalesa interior a traves di presensia di e Spiritu (Efe. 3:16), intimidat ku Kristu, kende ta deskribí tambe komo bibando den nan (Efe. 3:17), i un identidat spiritual establesé i sigur (“teniendo rais bon pegá i fundá den amor,” Efe. 3:17).

Segun ku Pablo ta trata na ofresé alabansa na Dios pa e alkanse amplio di bendishonnan ofresé na kreyentenan, e ta inkluí no tres dimenshon, sino kuater, “hanchura i largura i haltura i profundidat” (Efe. 3:18). E no ta identifiká klaramente na kiko e dimenshonnan akí ta apliká, aunke nan ta deskribí opviamente e sais enorme di algu importante. Esaki ta laga un pùzel interesante pa studiantenan di Beibel. E dimenshonnan akí ta deskribí Dios Su sabiduria (kompará Job 11:5–9, ku ta usa kuater dimenshon), Dios Su poder (kompará Efe. 3:16,17), òf, kisas, e tèmpel spiritual di Efesionan 2:19–22 (kompará Ezek. 43:13–16, ku ta usa kuater dimenshon; Amos 7:7, 8; Rev. 11:1,2)? Por ta mihó pa wak e kuater dimenshonnan akí komo deskribiendo e inmensidat di “e amor di Kristu” (Efe. 3:19), mirando e frase “komprendé . . . e hanchura i largura i haltura i profundidat” (Efe. 3:18) komo paralelo na e siguiente frase, “pa konosé e amor di Kristu” (Efe. 3:19; kompará Rom. 8:35–39). Kon ku nos mira su palabranan, nan ta bon notisia.

Pablo ta konkluí su informe di orashon ku un doksologia, un deklarashon poétiko kòrtiku di alabansa na Dios. Pa kiko e ta alabá Dios? Efe. 3:20, 21.

Pablo a bin ta registrando su orashonnan pa kreyentenan (Efe. 3:14–19). Awor e ta hasi orashon direktamente i poderosamente. Pablo su doksologia ta lanta dos pregunta:

1. E pasashi ta elevá e iglesia di forma inapropiá, poniendo e riba mesun nivel ku Kristu, den e frase “Ku pa semper E haña gloria den iglesia i den Kristu-Hesus” (Efe. 3:21)? Miéntras Pablo ta altamente interesá den e iglesia na Efeso, ta evidente ku Kristu ta e Salbador di e iglesia ya ku ta Kristu ta esun ku ta biba den kurason di kreyentenan (Efe. 3:17). Den e doksologia Pablo ta alabá Dios pa e salbashon ofresé na e iglesia pa medio di Kristu-Hesus.
2. E frase “den tur generashon pa semper i semper” (Efe. 3:21) ta deskribí un futuro sin fin, mará na tera, pa e iglesia, ku e regreso di Kristu posponé? Efesionan ta ekshibí un espektativa fuerte pa futuro. Por ehèmpel, Efesionan 4:30 ta wak den direkshon di “e dia di salbashon final”. Tambe, kreyentenan lo eksperensiá Kristu Su poder soberano sin límite den “e era benidero”. Mester lesa e doksologia di Pablo komo un selebrashon di Kristu Su poder sin fin ehersé na fabor di kreyentenan.

Ora nos repasá e di dos informe di orashon di Pablo (Efe. 3:14–21; kompará Efe. 1:15–23), nos ta mira Pablo hañando fortalesa den e ekspanshon kósmiko di e Tata Su kuido (Efe. 3:14,15), e disponibilidat pronto di Spiritu Santu (Efe. 3:16), e asosiashon di Kristu Mes (Efe. 3:17), i e infinidat di e amor sin límite di Kristu (Efe. 3:18,19). Esaki ta asina bèrdat ku e ta imaginá su mes kreyentenan yená “ku e plenitut kompleto di Dios” (Efe. 3:19) i ta selebrá e realidatnan spiritual akí den alabansa, atrobe maraviando pa e abundansia di Dios Su poder riba oferta na e santunan (Efe. 3:20,21).

Ki ora ku nos sinti e preshon di problemanan, tentashonnan, òf dudanan, nos por bira na e relato optimista akí di Pablo su orashonnan. E apòstel enkarselá ta lanta nos vishon na e horizonte grandioso di Dios Su propósitonan i grasia, rekordando nos ku, loke sea nos sirkunstansianan aktual ta, nos ta partísipenan den Dios Su plan final (Efe. 1:9,10), i Su poder ta obrando den nos.

Kua bendishonnan di Dios ta spesialmente di balor pa bo? Praktiká komponé un orashon di alabansa pa asina alabá Dios pa nan.

Ellen G. White, “Modern Revivals,” den The Great Controversy, p. 461–478.

“Kon nos por harmonisá nos kondishon spiritual chikitu ku e presentashon di nos teksto [Efe. 3:14–19] ku ta deskribí e plenitut di konosementu ku ta nos privilegio di poseé? Kon Shelu por wak riba nos, ku tabatin tur bentaha spiritual i temporal pa nos lo por a krese den grasia, ora nos no a mehorá nos oportunidatnan? E apòstel no a skirbi e palabranan akí pa tormentá nos, pa gaña nos, òf pa lanta nos espektativanan solamente pa nos keda desapuntá den nos eksperensia. El a skirbi e palabranan akí pa mustra nos loke nos por i mester ta, si nos lo tabata erederonan di e reino di Dios. Kon nos por ta obreronan huntu ku Dios, si nos tin un eksperensia chikitu? Nos tin un konosementu di e privilegio di e kristian, i mester buska e komprendementu spiritual profundo ei den e kosnan di Dios ku Señor tabatin deseo pa nos tin.

“Nos ta kere e Beibel realmente? Nos ta kere realmente ku nos por optené e konosementu di Dios ku ta presentá nos dilanti den e teksto akí? Nos ta kere kada palabra ku ta sali for di boka di Dios? Nos ta kere e palabranan ku e profetanan i apòstelnan a papia, pa medio di Hesu-Kristu, kende ta e outor di tur lus i bendishon, i den ken tur rikesa i plenitut tin su sede? Nos ta kere realmente den Dios, i den Su Yu?”—Ellen G. White, The Advent Review and Sabbath Herald, 1e di òktober 1889.

Preguntanan pa Diskushon:

Kompará e doksologia di Pablo den Efesionan 3:20, 21 ku otro doksologianan den Tèstamènt Nobo— Rom. 11:33–36; Rom. 16:25–27; Fil. 4:20; 2 Pe. 3:18b; Judas 24,25. Kua temanan òf ideanan ta move a lo largu di e pasashinan akí? Kon nos lo por adoptá e aktitut di alabansa i adorashon ku nan ta ilustrá?

Kompará Pablo su kuater usonan di e palabra griego plēroma (“plenitut”) den Efesionan (Efe. 1:10, 23; Efe. 3:19; Efe. 4:13). Dikon bo ta kere ku e idea akí ta importante pa Pablo?

Di tur e akshonnan di Dios ku Pablo ta alabá den Efesionan 3, kua ta mas inspirador pa bo? Dikon?

Pablo ta konkluí e promé mitar di Efesionan meskos ku el a kumins’é (Efe. 1:3–21), usando e lenguahe di orashon i alabansa. E ta regosihá den Dios Su poder, presente den bida di kreyentenan pa medio di Kristu i e Spiritu (Efe. 3:16–21). Kon nos, manera Ellen G. White a skirbi akiriba, por eksperensiá e poder akí mihó den nos bida?