Bidanan Formá pa Kristu i Diskurso Inspirá pa Spiritu

12 di ougùstùs

Lesa pa e Estudio di e Siman Akí:

Efe. 4:17–32; Kol. 3:1–17; Zak. 3:3–5; Zak. 8:16; Isa. 63:10; Rom. 8:16,26,27.

Versíkulo di Memoria:

“Enkuanto boso manera di biba di ántes, boso pone un banda e hende bieu ku ta wòrdu korumpí konforme e pashonnan engañoso, i pa boso wòrdu renobá den e spiritu di boso mente, i pa boso bisti e hende nobo, ku a wòrdu kreá segun Dios den hustisia i santidat bèrdadero.” (Efesionan 4:22–24, NKJV).

Jose Antonio tabata biba riba e kayanan di Palma, Spaña, komo un hòmber daklos pa añanan. Ku kabei i barba blanku i bruá, Jose tabata parse mas bieu ku su 57 añanan. Un dia, Salva Garcia, doño di un barberia, a aserká Jose i a proponé un kambio di imágen kompletu.

Ku Jose den e stul di barbero, un tim diligente a kòrta, pinta, i a hinka e bòshinan di kabei i barba den stail. Despues, Jose a haña pañanan nobo den stail. Despues a bin e revelashon! Miéntras Jose tabata sinta dilanti di un spil, lágrimanan a bini. “T’ami esaki ta? Mi ta asina diferente; niun hende ta bai rekonosé mi!” Mas despues el a añadí: “No tabata djis un kambio di aspekto. El a kambia mi bida.”

Den Efesionan 4:17–32, Pablo ta argumentá ku kreyentenan a eksperensiá un transformashon kompletu. Nan a kita nan ami bieu i a brasa nan identidat nobo. Un poko meskos ku e kambio di Jose, sinembargo, esaki no ta un simpel transformashon eksterno. E ta inkluí ser “renobá den e spiritu di boso mente” (Efe. 4:23), tresiendo den bida “hustisia i santidat berdadero” (Efe. 4:24). Esaki ta e kambio di imágen final.

* Studia e lès di e siman akí pa prepará pa Sabat, 19 di ougùstùs.

Kompará Efesionan 4:17–32 ku Kolosensenan 3:1–17. Kon Pablo ta boga pa kreyentenan biba den un forma ku ta enkurashá unidat di iglesia?

Den e sekshon anterior, Efesionan 4:1–16, Pablo su tema tabata unidat di iglesia. Ora nos kompará Efesionan 4:1 ku Efesionan 4:17, nos ta nota kon similar e dos atvertensianan ta tokante kon kana òf biba. E semehansa akí ta sugirí ku Pablo ta referí na e mesun tema, unidat i e estilo di bida ku ta sosten’é, pero for di un punto di bista nobo i inisialmente mas negativo.

Den Efesionan 4:17–24, Pablo ta kompará estilo di bida pagano, ku e ta konsiderá komo unidat debilitá (Efe. 4:17–19), ku patronchinan di bida kristian ku ta nutrié (Efe. 4:20–24). Segun ku nos ta lesa Pablo su krítika skèrpi di e estilo di bida pagano degenerá, nos mester rekordá su konvikshon ku Dios a redimí paganonan pa medio di Kristu i a ofresé asosiashon total den e pueblo di Dios (Efe. 2:11–22, Efe. 3:1–13). Den Efesionan 4:17–19, e ora ei, e ta ofresiendo un deskripshon limitá i negativo di “paganonan den karni” (Efe. 2:11).

Pablo no ta solamente preokupá tokante pikánan òf komportashonnan spesífiko ekshibí pa paganonan. E ta preokupá tokante un patronchi di komportashon ku nan ta ekshibí, un trayektorio desendiente di biba den gara di piká. Meimei di Efesionan 4:17–19 tin un representashon di un spiritualidat enduresé: “den e banidat di nan mente, siendo tapá ku skuridat den nan komprendementu, ekskluí di e bida di Dios” (Efe. 4:17, 18). E spiritualidt enduresé akí ta e fuente di e komprendementu tapá ku skuridat enfatisá na prinsipio di e pasashi (“pa motibu di e ignoransia ku ta den nan, pa motibu di e duresa di nan kurason; nan a pèrdè heful,” Efe. 4:18,19) i e práktika seksual degenerá suprayá na su final (“i a entregá nan mes, sin niun kòntròl, na bisio pa hasi tur klase di impuresa,” Efe. 4:19). Apartá di Dios, nan no sa kon biba, i, separá di Su grasia ku ta salba, nan ta sigui den un spiral desendiente di piká i pervershon.

Kua tabata bo mes eksperensia ku e poder di piká pa sigui ranka un hende direkshon abou den ainda mas piká?

Ora e ta bolbe konta e storia di e kombershon di su oudiensia, kua punto esensial Pablo ta laga nan komprendé? (Efe. 4:20–24).

Despues di a deskribí nan eksistensia pagano anterior (Efe. 4:17–19), Pablo no ta bisa, “Esei no ta e manera ku boso a siña tokante Kristu.” En kambio e ta sklama: “No ta e kosnan ei boso a siña tokante Kristu sí!” (Efe. 4:20). Notando ku e destinatarionan a “tend’E” [Kristu], i a siña “den djE” (Efe. 4:21) òf “p’E” (NKJV), Pablo mas aleu ta boga e adopshon di un bida formá pa Kristu ku e frase “meskos ku bèrdat ta den Jesus” (Efe. 4:21). Pa Pablo, yega na fe ta sentra riba un konekshon personal ku Kristu, unu asina bibu i real ku por deskribié komo “siña Kristu.” Nos ta rekonosé ku e Hesus resusitá i eksaltá ta bibu i presente huntu ku nos. Su siñansanan i ehèmpel ta forma nos i nos ta ehersé lealtat na djE komo nos Señor bibu. Nos ta habri nos bida na Su guiansa i direkshon aktivo a traves di Spiritu i Palabra.

Pablo ta bisa nos ku adopshon di un bida formá pa Kristu ta rekerí tres proseso, ku e ta ekspresá pa medio di imágen di bistimentu:

1. “kita” òf bira for di e kaminda bieu di bida (Efe. 4:22);
2. eksperensiá renobashon interno (Efe. 4:23); i
3. “bisti” e patronchi di bida nobo manera di Dios (Efe. 4:24).

Pablo su metáfora ta reflehá e uso di bistimentu den Tèstamènt Bieu komo un símbolo pa tantu pekaminosidat (p.e., Salmo 73:6; Zak. 3:3,4; Mal. 2:16) komo salbashon (p.e., Isa. 61:10; Ezek. 16:8; Zak. 3:4,5).

Den tempunan antiguo, hòmbernan tabata bisti un túnika te na rudia komo un paña djabou i un mantel pa ofresé protekshon for di solo. Di forma similar, muhénan tabata bisti un túnika i un mantel. E kulturanan reflehá den Beibel tabata esnan di supsistensia. Bistínan tabata presioso i karu, i tabata warda nan pa largu tempu. Lo tabata inusual di tin mas ku un sèt di bistí. E kalidat i estilo di e bistínan ei tabata señalá identidat i markadónan di status tokante e usuario. Kambia un hende su pañanan, interkambiando un sèt di paña pa un otro, tabata un evento inusual i importante (mas bien ku e suseso insignifikante ku e ta den hopi kultura awe). Pablo ta imaginá e kambio den bida di ta mes notabel ku interkambiá un sèt di bistí pa un otro lo tabata den e konteksto di siglo unu akí.

Kua ta e diferensia, e diferensia krusial, entre siña tokante Kristu i siña konosé Kristu?

Kua di Pablo su palabranan di konseho respekto e uso di papiá entre kreyentenan ta esun di mas importante pa bo na e momento akí? Dikon? (Efe. 4:25–29).

Pablo repetidamente ta usa un struktura interesante den Efesionan 4:25–32, ku Efesionan 4:25 ta ilustrá: un mandato negativo (“no gaña otro mas”); un mandato positivo despues (“ ‘Boso kada un, papia bèrdat ku otro’ ”); i despues unu rashonal (“pasobra nos ta miembro di otro,” ku parse ta nifiká “pasobra nos ta miembronan di un kurpa i asina relatá na otro komo partinan di esun kurpa ei”). Pablo su atvertensia pa “papia bèrdat” no ta un invitashon pa konfrontá otro miembronan di iglesia ku un resitashon sin táktika di echonan. Pablo ta referí na Zakarias 8:16, ku ta insitá papiamentu di bèrdat komo un manera di fomentá pas.

Ya ku den Efesionan 4:31 Pablo ta ekstraditá rabia i diskurso rabiá, su palabranan den Efesionan 4:26 no ta proveé pèrmit pa ehersé rabia denter di e kongregashon. Mas bien, Pablo ta konsedé e posibilidat di rabia, miéntras e ta limitá su ekspreshon ku e sentido, “Rabia, ma no hasi piká”.

Pablo parse di ta interumpí su tema di papiamentu ku un mandato negativo tokante ladron: “Laga esun ku ta hòrta, no hòrta mas” (Efe. 4:28). Positivamente, e ladron mester “traha, hasiendo ku su mes mannan loke ta bon” (Efe. 4:28; lesa tambe 1 Kor. 4:12, 1 Tes. 4:11) basá riba loke ta rashonal, “pa e por tin algu pa kompartí ku esun ku ta den nesesidat” (Efe. 4:28). Kisas Pablo ta inkluí e palabra akí tokante ladron akinan pa motibu di e konekshon entre ladronisia i papiamentu engañoso manera ilustrá a traves di e storia di Ananias i Safira den Echonan 5:1–11. Pablo su fe den Kristu su poder transformadó ta asina fuerte ku e ta visualisá ladronnan ku ta bira benefaktornan!

Pablo despues ta ordená, “No laga ningun palabra dañino sali for di boso boka” (Efe. 4:29), ku ta deskribí un palabra destruktivo trahando su kaminda aparentemente persistente den direkshon di e lepnan pa hasi su trabou dañino. Di forma positivo, Pablo ta imaginá su mes ku kualke ekspreshon negativo no ta djis stòp, sino ta remplas’é pa un deklarashon ku ta ekshibí tres kriterio: E

1. “ta bon pa konstruí,”
2. “ta pas ku e okashon,” i
3. ta duna “grasia na esnan ku tende” (Efe. 4:29)

Si solamente tur nos palabranan por tabata asina!

Diskutiendo pikánan di palabra denter di e komunidat kristian, kua atvertensia Pablo ta kompartí tokante presensia di Spiritu Santu ku kreyentenan? Efe. 4:30.

Pablo ta ofresé simultáneamente un spièrtamentu alarmante i un promesa plasentero. Nos pikánan kontra otro den iglesia no ta delitunan menor ku tiki konsekuensia: loke ta hasi Spiritu Santu tristu ta nos mal uso di Dios Su don di abla pa kibra otronan (Efe. 4:25–27,29,31,32). Ku Pablo ta eko Isaias 63:10 ta suprayá e spièrtamentu serio: “Ma nan [Israel] a rebeldiá i a hasi Su Spiritu Santu tristu; p’esei, pa nan El a kambia bira nan enemigu; El a bringa ku nan.

Den un promesa trankilisante, Pablo ta afirmá ku Spiritu Santu ta seya kreyentenan for di e dia ku nan a aseptá Kristu (Efe. 1:13,14) te na “e dia di redenshon” (Efe. 4:30). E relashon di e Spiritu ku e kreyente no ta frágil sino durabel. Ora kreyentenan ignorá e presensia residente di e Spiritu a traves di arma Dios Su don di abla, no ta bisa e Spiritu pa bai sino pa bira fèdrit. E Spiritu tin intenshon di permanesé presente huntu ku kreyentenan, seyando nan komo propiedat i protehá pa Dios, te na e regreso di Kristu.

Pablo ta suprayá e divinidat kompletu di e Spiritu komo “Spiritu Santu di Dios” i ta enfatisá e personalidat di e Spiritu ora e ta deskribí Spiritu Santu komo bira tristu. (Lesa tambe Rom. 8:16,26,27; 1 Kor. 2:10, 13; 1 Kor. 12:11; Gal. 5:17,18.)

Nos mester bai ku kuidou ora ta diskutí e misterio di e Deidat. E Spiritu ta tantu Un ku i distinto for di e Tata i e Yu. “E Spiritu tin Su propio boluntat i ta skohe di akuerdo ku esei. Por hasié tristu i blasfemá kontra djE. Ekspreshonnan asina no ta pas pa un simpel poder òf influensia sino ta karakterístikanan di un persona. E Spiritu e ora ei ta un persona meskos ku abo i ami? Nò, nos ta usa terminologia humano limitá pa deskribí loke te divino, i e Spiritu ta loke sernan humano no por ta nunka.”—Paul Petersen, God in 3 Persons—In the New Testament (Silver Spring, MD: Biblical Research Institute, 2015), p. 20.

Ta “Spiritu Santu di Dios” ta biba den un kontakto asina íntimo ku nos ku ta bisa ku nos akshonnan ta afekt’E. Nos ta kompartí bida ku un miembro di e Divinidat komprometé ku nos den un relashon duradero ku ta seya nos te na fin di tempu. Kiko mester ta nos kontesta di fe riba e bèrdat asombroso akí?

Ora e ta referí na “e dia di redenshon” (Efe. 4:30), Pablo a kaba di invitá su lesadónan pa konsiderá nan usonan di palabra den konteksto di Kristu Su segundo binida. Por komprendé Efesionan 4:31,32, anto, di ta refiriendo na e uso di palabra segun ku nos ta aserká e evento grandioso ei.

Den lus di e regreso di Kristu, kua aktitutnan i komportashonnan, relashoná ku abla, mester deskartá? Kua aktitutnan i komportashonnan mester brasa? Efe. 4:31,32.

Den e último atvertensia di Efesionan 4:17–32, Pablo ta proveé atrobe un mandato negativo, esun aki identifikando seis bisio ku mester “laga” (Efe. 4:31); un mandato positivo pa “ta kariñoso ku otro, miserikòrdioso, pordonando otro” (Efe. 4:32), i unu rashonal. Kreyentenan mester pordoná otro “meskos ku Dios den Kristu tambe a pordoná boso” (Efe. 4:32). E lista di seis bisio ta kuminsá i ta terminá ku términonan general ku ta abarká tur kos, “tur amargura” i “tur malisia.” Meimei di nan ta bin kuater término adishonal: “furia,” “rabia,” “griteria” i “kalumnia” (Efe. 4:31).

E último di esakinan ta tradusí e palabra griego blasphemia, ku papiamentu a fia komo un término tékniko pa degradá papiamentu kontra Dios. Sinembargo, e término griego ta identifiká papiamentu ku ta difamá sea Dios òf otro hendenan komo “kalumnia” òf “papiamentu malu.” Den e lista, aktitutnan (amargura, furia, rabia) parse ta desbordá den papiamentu rabiá (gritamentu, kalumnia”). Básikamente, Pablo ta desabilitá abla kristian. Mester kita e aktitutnan, ku ta kondusí na papiamentu rabiá i e strategianan retóriko ku ta us’é, for di e arsenal kristian. Komunidat kristian lo floresé i lo fomentá unidat di iglesia (kompará Efe. 4:1–16) solamente kaminda pone e kosnan akí un banda.

Papiamentu malu, sinembargo, no mester ta tantu reprimí manera remplasá. Nos kombersashonnan i akshonnan entre e famia di Kristu, i mas ayá di dje tambe, no mester krese for di rabia sino mester ta motivá pa amabilidat, kompashon, i pordon basá riba e norma di mas haltu di tur, e pordon ku Dios a ekstendé na nos den Kristu (Efe. 4:32). Pablo ta presentá “pordon vertikal” (ofresé pa Dios na nos) komo e modelo pa “pordon horizontal” (esun ku nos ta ofresé na otro; kompará Kol. 3:13; Mat. 6:12,14,15).

Pensa riba e poder di bo palabranan. Kon bo por usa nan pa ta edifikante, alentador, i edifikante di fe?

“Laga boso kombersashon ta di tal naturalesa ku boso lo no tin mester di arepentimentu. ‘No hasi Spiritu Santu di Dios tristu, pa medio di ken boso ta seyá te na e dia di redenshon.’ . . . Si bo tin amor den bo kurason, lo bo trata na establesé i edifiká bo ruman den e fe di mas santu. Si un palabra kai ku ta perhudisial pa e karakter di bo amigu òf ruman, no kurashá e papiamentu malu akí. Ta trabou di e enemigu. Kariñosamente kòrda e orador ku e palabra di Dios ta prohibí e tipo di kombersashon ei.”—Ellen G. White, Advent Review and Sabbath Herald, 5 di yüni 1888.

Kon bo kongregashon lo a kambia si abo i kada miembro mester a tuma i biba un promesa ku ta konsistí di tal deklarashonnan manera esnan ku ta sigui?

1. Mi ta deseá pa mi influensia denter di e famia di Iglesia Atventista di Shete dia i mas ayá ta positivo, edifikante, ta edifiká fe, i ta lanta moral (Efe. 4:29).
2. Rekordando Kristu Su yamadanan pa unidat i amor, lo mi dediká mas energia afirmando esnan ku ta hasi i bisa kosnan ku mi ta kere ta bon ku señalá e fayonan di esnan ku mi ta kere ta robes (Juan 13:34,35; Juan 17:20–23; Efe. 4:1–6; 1 Tes. 5:9–11).
3. Ora mi no ta di akuerdo ku un hende, lo mi hasi mi rèspèt pa mi ruman kreyente kla. Lo mi asumí su integridat i kompromiso ku Kristu. Lo mi ofresé mi opinion diferente bondadosamente, no ku lantamentu di bos (Efe. 4:31,32).
4. Lo mi biba ku goso, buskando kada oportunidat pa edifiká i afirmá mi rumannan miembro di iglesia, miéntras mi ta spera e regreso di Kristu (Efe. 4:29, 30; Gal. 6:2; Hebr. 10:24, 25).

Preguntanan pa Diskushon:

Repasá e 11 biahanan den Efesionan ku Pablo ta deskribí e tres miembronan di e Divinidat trahando huntu djaserka pa salbashon di humanidat. Kon e énfasis ripití akí ta informá nos komprendementu di e Divinidat? Efe. 1:3–14, Efe. 1:15–23, Efe. 2:11–18, Efe. 2:19–22, Efe. 3:1–13, Efe. 3:14–19, Efe. 4:4–6, Efe. 4:17–24, Efe. 4:25–32, Efe. 5:15–20, Efe. 6:10–20 (kaminda “Señor,” Efe. 6:10, ta referí na Kristu).

Kon Pablo su konseho tokante abla kristian (Efe. 4:25–32) ta apliká den e siglo di “komunikashon pa medio di kòmpiuter,” ku ta usa demasiado biaha pa tèrmentu sibernétiko i difamashon anónimo, via internèt?