Motivashon i Preparashon pa Mishon

4 di novèmber

Lesa pa e Estudio di e Siman Akí:

Lukas 24:1–12; Lukas 24:36–49; Echonan 1:12–26; Hebr. 10:24,25; Echonan 2:1–41; 1 Kor. 11:1.

Versíkulo di Memoria:

“ ‘Esakinan ta Mi palabranan ku Mi a papia ku boso mientras ku Mi tabata serka boso ainda, ku tur kos ku ta pará skirbí tokante di Mi den e Lei di Moisés i e Profetanan i e Salmonan mester wòrdu kumplí.’ ” (Lukas 24:44, NKJV).

Pablo a skibi na e Filipensenan: “Algun, di bèrdat, ta prediká Kristu pa motibu di envidia i pleitu, ma algun tambe for di bon boluntat; e últimonan aki ta hasié ku tur amor, sabiendo ku mi a wòrdu poní pa defensa di evangelio; e proménan ta proklamá Kristu pa motibu di interes personal i no ku sinseridat, i ta pensa di hasi mi kadenanan mas pisá. Kiko anto? Solamente ku di tur manera, sea pa pretenshon òf den bèrdat, Kristu ta wòrdu proklamá; i den esaki mi ta regosihá. Sí, lo mi sigui regosihá” (Fil. 1:15–18).

Palabranan poderoso! Sea ta pa “motibu insinsero òf pa motibu sinsero,” ta prediká Kristu, i esei ta loke ta importá pa Pablo. Idealmente, sinembargo, nos motibunan pa prediká Kristu, pa mishon, pa alkansá otronan ku e bon notisia, mester ta pa amor, i pa bèrdat, i no pa ambishon egoista, envidia, òf pleitu.

Kiko, anto, ta algun di e motivashonnan pa prediká Kristu, i kiko ta algun di e maneranan ku nos por prepará pa hasi esaki?

E siman akí nos lo wak algun evento den e iglesia primitivo ku por duna nos guia riba e partinan krusial akí di mishon.

* Studia e lès di e siman akí pa prepará pa Sabat, 11 di novèmber.

Lesa Lukas 24:1–12. Kua tabata e kontesta di esnan ku a tende tokante e Kristu resusitá?

Djadumingu mainta trempan, despues di morto di Hesus, Lukas ta bisa ku algun muhé a bai na e graf. Nan tabatin spesereinan huntu ku nan, pues ta probabel ku nan tabata bai atendé ku e kurpa di Hesus awor ku Sabat a pasa. Sperando di haña un graf seyá ainda, nan tabata di shòk di haña e graf bashí. Insigur kiko hasi, nan tabatin miedu ora dos hòmber den bistí lombrante a aparesé. Sinembargo, e hòmbernan tabatin un mensahe pa nan. Rekordando nan di e palabranan di Hesus, nan a bisa e muhénan ku Hesus en bèrdat a resusitá manera El a bisa ku E lo a hasi. Loko di kontentu ku e notisia, nan a bolbe rápidamente na e lugá kaminda e disipelnan i hopi di e otro siguidónan di Hesus tabata kedando i a konta loke nan a mira i a tende, pasobra nan no por a kontené nan eksitashon. Es desir, nan tabata kompartiendo ku otronan loke nan a siña di Kristu.

Bo por imaginá bo kon e muhénan mester a sinti? Nan a kaba di tin un eksperensia inkreibel, unu ku seguramente a yena nan ku asombro, pero e disipelnan a yama nan eksperensia “storianan, kos di loko” i no ker a kere nan. Por lo tantu, no sigur si kere e muhénan òf nò, Pedro a kore bai na e graf pa mira pa su mes.

Pa Pedro, i pa hopi di nos, tin un duda pa aseptá algu simplemente pasobra un hende a bis’é. Aunke Pedro a skucha e muhénan, e no por a kompartí den nan eksperensia te mas despues. Na promé instante, tur loke el a eksperensiá tabata un graf bashí, i esei, Lukas ta bisa, simplemente a lag’é “atmirá ” (Lukas 24:12). Su eksperensia na e graf no tabata mesun kos ku esun di e muhénan.

Independientemente di e kontesta di Pedro, tan pronto ku e muhénan akí a tende e notisia tokante Hesus, nan ker a kompartié ku otronan. Ki motivashon mas grandi pa mishon por tin ku laga otronan sa tokante loke Hesus a hasi pa nan? Ki motibu mas grandi ku plama e bon notisia di salbashon den Hesus, e úniko speransa ku kualke di nos tin?

Naturalmente, nos tin mester di un eksperensia personal ku Dios nos mes promé ku nos por kompartié ku otronan. Nos deseo pa kompartí ku otronan loke nos stima asina tantu mester ta un parti krusial di nos motivashon pa mishon. Al final, nos no por kompartí loke nos mes no tin, bèrdat?

Kua ta algun di e eksperensianan ku bo tabatin ku e realidat di Dios i Su amor? Dikon e momentonan akí tabata asina presioso pa bo, i kon nan ta motivá bo pa aserká otronan ku e bon notisia?

Lesa Lukas 24:36–49. Kiko a sosodé akinan, i dikon esaki tabata un eksperensia asina vital pa e apòstelnan?

Ta interesante ku na promé instante e disipelnan no a kere pa miedu. E ora ei, despues di a mira Hesus i ta sigur ku E tabata realmente bibu, nan no a kere di alegria (Lukas 24:41). Bo a yega di sinti ku algu tabata demasiado bon pa ta bèrdat? Esaki tabata e eksperensia di e disipelnan i e otronan den e aposento haltu.

I Hesus a laga nan ku solamente e eksperensia akí, sinembargo, e ora ei, ora El a bai, nan fe lo no a dura. Ku tempu e poder di e eksperensia lo por a bira vago; nan lo a lubidá, òf kuminsá, kisas, asta kuestion’é. Asina, Hesus no a stòp di mustra nan Su sikatrisnan i kome piská nan dilanti. En kambio, e ora ei El a hiba nan den e Palabra i a mustra nan e fundeshi profétiko pa Su obra i ministerio. Es desir, no importá kon grandi e eksperensia ku nan tabatin kunE tabata, ainda Hesus tabata ke pa nan fe ta ankrá den e Palabra di Dios.

“ ‘Esakinan ta Mi palabranan ku Mi a papia ku boso mientras ku Mi tabata serka boso ainda, ku tur kos ku ta pará skirbí tokante di Mi den e Lei di Moisés i e Profetanan i e Salmonan mester wòrdu kumplí’ ” (Lukas 24:44).

Aki tambe nos ta haña un motivashon poderoso pa testifiká, pa mishon: e Palabra di Dios. Hesus tabata sa ku pa konsolidá e eksperensia di e disipelnan, nan mester a komprendé pa kiko E mester a muri i kiko Su resurekshon tabata nifiká. Nan mester a kambia nan kosmovishon for di un reino polítiko i terenal na e gran solushon pa piká i e viktoria di Kristu riba morto. E evangelio tabata asina tantu mas ku logra soberania polítiko pa Israel. E tabata revelá Kristu su viktoria riba Satanas i garantisá ku un dia lo a destruí tur maldat den mundu, ku lo a krea e tera di nobo, i ku Dios lo tabata meimei di Su pueblo. El “a habri nan huisio ” (Lukas 24:45) pa asina nan por a komprendé e bèrdatnan akí, ku nan mester a kompartí ku e mundu.

No por sostené nos eksperensianan ku Hesus sin e fundeshi di Su Palabra, inkluyendo e profesianan ku ta mustra na e historia i eventonan ku ta hiba na, i inkluyendo, e promé i segundo binida di Kristu. Ku e bèrdatnan akí firmemente komprendé, nos por ta kla i motivá pa mishon.

Kon bon ankrá bo ta den e profesianan ku ta mustra na Kristu, tantu Su promé komo segundo binida? Spesialmente den e último dianan, dikon nos mester ta ankrá den e Palabra di Dios, inkluyendo e profesianan, i dikon komprendé nan ta asina krusial, spesialmente pa mishon?

Lukas 24 ta terminá ku e asenshon di Hesus na shelu (Lukas 24:50–53). Pero esei no ta final di e storia. E outor, Lukas, ta sigui, skibiendo e buki di Echonan. Djis promé ku Hesus a subi na shelu, El a duna e disipelnan un mishon, un promesa, i instrukshonnan inmediato pa warda na Herusalèm riba “poder for di ariba” (Lukas 24:49; lesa tambe Echonan 1:4–8).

Hesus a instruí e disipelnan pa warda na Herusalèm te ora El a kumpli ku Su promesa di manda e Promesa di e Tata (Spiritu Santu), ku lo a empoderá nan pa ta testigunan na Herusalèm, Hudea, Samaria, i mas ayá.

Lesa Echonan 1:12–26. Kiko e disipelnan, awor alrededor di 120 hòmber i muhé, tabata hasiendo miéntras nan tabata wardando?

Hesus a duna e disipelnan un mishon kla: nan mester tabata testigunan p’E na e mundu. Asina, miéntras nan tabata warda, nan tabata prepará pa nan mishon na dos manera. Di promé, Lukas ta bisa ku nan a sigui den orashon i súplika uní. No tabatin duda den ningun di nan mente tokante kiko tabata e mishon ku Hesus a duna nan, i nan kada un a aseptá e mishon ei. Esaki a inspirá nan pa uni den orashon. Lukas no ta kompartí tokante kiko nan tabata resa, pero ta mas sigur ku nan tabata resando pa sabiduria, fortalesa, i kurashi pa kumpli ku e mishon huntu. Ki un ehèmpel pa nos.

E di dos kos ku nan a hasi miéntras nan tabata warda tabata prepará logístikamente pa nan mishon. Hudas a entregá Hesus pa ehekushon i despues a tuma su mes bida. Esaki a laga un vakatura meimei di e diesdos. Asina, miéntras nan tabata warda, e disipelnan a buska guia di Dios i a skohe un remplaso. En realidat, e disipelnan tabata organisando nan mes i planiando e komienso di nan mishon. Den tumamentu di e desishonnan akí, Pedro a hunga un ròl di liderazgo. Niun hende a desafiá su moveshon; nan tur a mira sabiduria di Dios den dje. Tabtin un komprendementu i un konfiansa ku Dios tabata aktuando i obrando i moviendo meimei di nan. Nan tempu di warda no tabata inaktivo sino tabata yená ku propósito i akshon impulsá pa mishon.

Miéntras nos ta warda riba e dramamentu di Spiritu Santu pa yuda nos kompletá e gran mishon di Dios, nos mester uni pa enkurashá otro (Hebr. 10:24,25), resando pa e Spiritu Santu di Dios. Tambe, nos mester ta aliniando nos mes i nos iglesia ku Dios su prioridat, salbamentu di esnan pèrdí.

Kon bo por siña spera riba Señor i no pèrdè fe entretantu? Mientrastantu, miéntras bo ta warda, kon bo por usa bo tempu mihó, manera e disipelnan a hasi aki?

Echonan 2 ta registrá e dramamentu di Spiritu Santu na Pentekòster. Segun ku e siguidónan di Hesus tabata resando, lenganan di kandela a para riba nan kabes. Nan a rekonosé ku a duna nan e promesa primintí di Spiritu Santu.

Lesa Echonan 2:1–41. Kiko a sosodé ku e disipelnan komo resultado di risibí Spiritu Santu na Pentekòster?

E disipelnan a kuminsá papia den otro lenganan “manera e Spiritu tabata duna nan pa papia” (Echonan 2:4). Loke ta krusial aki ta ku Dios a empoderá kada persona pa benefisio di no kreyentenan. E bendishon no tabata meramente pa nan mes bon. E no tabata un bendishon pa hasi nan apto pa shelu òf un bendishon pa hasié mas fásil pa hasi negoshi den un lenga strañero. Dios a duna e bendishon pa kumpli ku Su mishon na esnan pèrdí. Awe Dios ta yama kada un di Su siguidónan pa usa nan donnan personal pa bon di Su mishon na no kreyentenan. Nos a haña donnan: ki yamada na mishon mas grandi ku pa usa loke a duna nos pa alkansá otronan?

E dramamentu di Spiritu Santu a resultá den e echo ku hopi di e hendenan a arepentí di nan rechaso di e Mesias, pasobra seguramente algun di nan tabata na Herusalèm ora El a muri. Pensa riba e poder akinan: Pedro a akusá algun di nan di a krusifiká e Kristu. Opviamente, nan a realisá loke nan a hasi i, siendo konvensí, nan a grita: “Rumannan, kiko nos mester hasi??” (Echonan 2:37).

I sinembargo, asta nan por a risibí pordon. Pedro a bisa nan: “ ‘Repentí, i laga kada un di boso wòrdu batisá den e nòmber di Hesukristu pa pordon di boso pikánan; i boso lo risibí e don di Spiritu Santu’ ” (Echonan 2:38).

Trahando huntu, den harmonia ku Spiritu Santu i otro, e siguidónan di Hesus akí a prediká arepentimentu i pordon di piká—asta pa esnan ku por tabata direktamente enbolbí den krusifiká Hesus! Esei ta poder di e evangelio. Si e mensahe ei no ta motivá nos na mishon, kiko lo hasié? Nos ta yamá pa plama e evangelio na e mundu, un mundu pekaminoso, kaí, i korupto ku hende pekaminoso, kaí, i korupto. Nos trabou no ta pa husga; nos trabou ta pa duna testimonio di e poder salbador di Hesus.

Dikon e idea ku a ofresé salbashon na asta algun di esnan ku tabata kómplise den e morto di Kristu mester (1) enkurashá nos pa nos propio alma, i (2) enkurashá nos pa duna testimonio na otronan, no importá kon malu nan ta parse di ta?

Lesa Echonan 2:41–47. Ki tipo di kuadro di e iglesia primitivo ta presente akinan?

Echonan 2 ta terminá ku un bunita kuadro di kon e iglesia primitivo tabata. Echonan 2:41 ta bisa ku esnan ku a batisá “a wòrdu añadí na nan”. Nos lo por a lesa esaki pa bisa ku un hende a hasi e kálkulo i a añadí e kantidat di kreyente nobo na e kantidat di kreyentenan eksistente i a establesé un total nobo di miembresia pa e grupo. Pero esei ta un komprendementu superfisial. Skondí den e palabranan tin e idea ku e kreyentenan resien batisá a bira parti di e grupo komo igual.

Mientrastantu, un funshon sentral di e iglesia kristian primitivo tabata disipulado. Segun ku tabata añadí miembronan nobo, tabata disipulá nan na tres manera. Di promé, e apòstelnan tabata sigui siña nan pa medio di nan doktrina i komunion. E palabranan “doktrina” i “komunion” den e teksto akí literalmente ta nifiká “instrukshon” i “kamaraderia”. E predikamentu di e apòstelnan tabata konfrontá kreensianan inkorekto i a ofresé splikashonnan nobo pa loke hende tabata mirando i eksperensiando. Pero e no tabata siña nan kon biba e bèrdat nobo ei den nan bida. Mas bien, e aplikashon di bèrdat na un hende su bida tabata tuma lugá den relashon komo parti di e grupo. Tabata disipulá kreyentenan nobo kuidadosamente i intenshonalmente a traves di siñamentu direkto, komo tambe pa medio di partisipashon den bida diario di e otro kreyentenan, tur bou di supervishon i liderazgo di e apòstelnan spiritualmente maduro i ankrá.

Predikashon pober ta bisa hende kiko hasi pero no kon hasié. Sinembargo, asta si un hende lesa bukinan di instrukshon òf skucha predikashinan ku ta splika kon hasi kosnan, no tin supstituto pa mira hende hasié i despues imitá nan. Pablo tabata sa esaki i a instruí su siguidónan pa imit’é manera el a imitá Hesus (1 Kor. 11:1). Ora hende por mira bo i e realidat di bo eksperensia ku Kristu, e lo influensiá nan tambe.

Desafio: Pensa riba un hende den bo bida ku bo ta deseá pa ta un kreyente. Resa tur dia pa e tin un eksperensia personal ku Hesus.

Desafiá: Ken bo ta disipulando i guiando den un relashon ku Hesus? Buska maneranan pa tres’é den komunion ku otro kreyentenan.

Nos trabou mishonero mester bin di amor profundo i gratitut pa loke Hesus a hasi i ta hasiendo den nos bida. Kualke otro motivashon ta robes. Mantené bo mes sumergí den e Palabra i den sintonia ku e Palabra ta e klave pa alkanse i evangelismo eksitoso.

“Nos bida mester ta ligá na e bida di Kristu; nos mester saka konstantemente for di djE, e Pan bibu ku a baha for di shelu, sakando di un fuente semper fresku, semper dunando su abundante tesoronan. Si nos mantené Señor semper nos dilanti, permitiendo nos kurason brota den gradisimentu i alabansa na djE, nos lo tin un freskura kontinuo den nos bida religioso. Nos orashonnan lo tuma forma di un kombersashon ku Dios manera nos lo a papia ku un amigu. E lo papia Su misterionan na nos personalmente. Hopi bia lo bin na nos un sentido gososo dushi di e presensia di Hesus. Hopi bia nos kurason lo kima denter di nos segun ku E ta hala serka pa tin komunion ku nos manera El a hasi ku Enòk. Ora esaki en bèrdat ta e eksperensia di e kristian, ta mira den su bida un simplisidat, un humildat, mansedumbre, i humildat di kurason, ku ta mustra na tur ku e ta asosiá kuné ku e tabata ku Hesus i a siña di djE.”—Ellen G. White, Christ’s Object Lessons, p. 129, 130.

“No por tin kresementu òf fertilidat den e bida ku ta sentrá den e ami. Si bo a aseptá Kristu komo un Salbador personal, bo mester lubidá bo mes, i purba yuda otronan. Papia di e amor di Kristu, konta [otronan di Su morto apnegá na nan fabor]. . . . Segun ku bo ta risibí e Spiritu di Kristu, e Spiritu di amor desinteresá i trabou pa otronan, lo bo krese i produsí fruta. . . . Bo fe lo oumentá, bo konvikshonnan profundisá, bo amor hasí perfekto.”— Christ’s Object Lessons, p. 67, 68.

Preguntanan pa Diskushon:

Kon bo ta komprendé e palabranan di Pablo den Filipensenan tokante Kristu siendo prediká pa envidia, kontienda, òf ambishon egoista? Kon nos por sigurá ku nos mes no ta kulpabel di hasi presis esei?

Kiko tabata bo propio eksperensia personal ku e realidat di Dios i e amor di Dios? Es desir, basá riba bo propio eksperensianan, bo por a prediká na otronan ku sinseridat i honestidat tokante e bondat i amor di Dios? Kiko bo testimonio lo tabata?

Kiko tabata bo eksperensia di warda riba Señor, i kiko el a siña bo tokante konfia den djE i tokante fe en general?