Mishon na Mi Próhimo

11 di novèmber

Lesa pa e Estudio di e Siman Akí:

Lukas 10:25–37; 2 Tim. 3:16; Santiago 2:17–22; Mat. 22:37–40; Gal.5:14; Mik. 6:6–8.

Versíkulo di Memoria:

“I el a kontestá i a bisa: ‘Stima Señor, bo Dios, di henter bo kurason, ku henter bo alma i ku tur bo forsa, i ku henter bo mente; i bo próhimo manera bo mes’ ” (Lukas 10:27, NKJV).

Nos tur konosé e teksto: “ ‘Stima Señor, bo Dios, di henter bo kurason, ku henter bo alma i ku tur bo forsa, i ku henter bo mente’ ” (Lukas 10:27). Sinembargo, nos amor pa Dios por bira superfisial si nos bisa ku nos stima Dios ma no ta obedes’E. Nos ta kere ku nos stima Dios, pero kon nos ta demostrá e amor akí den nos bida diario? Stima Dios ta rekerí kompromiso total di nos kurason, alma, kurpa, i mente, diariamente. Kualke hende por bisa ku e stima Dios; hasiendo esei, sinembargo, ta rekerí esfuerso konsiente.

Sinembargo, aunke stima Dios ta bon i importante, Dios ke tambe pa nos stima otronan, pasobra nos amor pa otronan ta reflehá nos amor pa Dios, i e ta hasi esei den un forma poderoso i mashá real. Promé Juan 4:20 ta deklará “Si un hende bisa: ‘Mi ta stima Dios,’ pero e no ta stima su ruman, e ta un gañadó! Pues si un hende no por stima su ruman, ku e ta mira, e no por stima Dios, ku e no a mira, tampoko.” Pablo ta bisa tambe den Galatanan 5:14 ku “Pasobra henter e Lei ta keda kumplí den un solo palabra, esta: ‘Stima bo próhimo manera bo mes’ ”.

E siman akí nos lo ta siñando kon nos por apliká e lès akí den nos bida.

* Studia e lès di e siman akí pa prepará pa Sabat, 18 di novèmber.

Ken nos ta? Dikon nos ta aki? Kiko ta sosodé ora nos muri? Kiko ta nos destino final? Esaki nan ta, den hopi forma, e preguntanan di mas importante ku sernan mortal, sernan ku sa ku nan ta mortal (uster i galiña ta, pero nan no sa esei), por hasi. I, den e Evangelio di Lukas, un hende ta bin serka Hesus ku loke ta, de echo, e pregunta di mas krusial di tur.

Lesa Lukas 10:25. Kiko e eksperto di lei akí a puntra, i dikon el a puntr’é?

Aunke kon serio e pregunta mes ta, Beibel ta deklará klaramente ku el a bin pa tèst Hesus. Nos sa ku tin bia algun hende por bin ku duda, asta inkredulidat, i, por ta, ni ta serio den nan puntramentu, pero por a alkansá nan ainda. Esaki ta presisamente kon Hesus a atendé ku e eksperto di lei, aunke E tabata sa ku e promé intenshonnan di e hòmber no tabata genuino. Sinembargo, pa e eksperto di lei i e oudiensia, e pregunta akí tabata un punto di salida ku Hesus por a usa pa kurashá nan pa skrudiñá nan propio kurason. Asta konosiendo e motibunan di e eksperto di lei, Hesus no tabata bai ignor’é òf no ta respetuoso na dje.

Al final, kua pregunta por tabata mas importante ku esun akí? “Kiko lo mi hasi pa heredá bida eterno?” No importá kiko nos ritualnan òf práktikanan religioso ta, tras di nan tur tin e pregunta krusial akí. Kontrali na esun akí, kiko mas realmente ta importá pa sernan ku ta deskribí nan bida komo “neblina ku ta paresé pa un poko tempu i despues ta disparsé” (Santiago 4:14)? Pa kiko e úniko otro opshon pa bida eterno ta morto eterno?

Lesa 1 Korintionan 15:30–32. Kiko Pablo ta asentuá aki ku ta suprayá e importansia di bida eterno?

Aunke kon dudoso su motibunan ta, e eksperto di lei a hasi un pregunta krusial, i Hesus, semper vigilante pa usa kualke i tur oportunidat pa mishon, a probechá di dje pa alkansá almanan.

Kon nos tambe por ta konsiente pa probechá di kualke oportunidatnan ku bin den nos direkshon pa duna testimonio, asta si e sirkunstansianan no ta ideal?

Beibel ta bisa nos ku e eksperto di lei a bin pa tèst Hesus, pero Hesus tabata sa kiko su intenshonnan tabata. De echo, Dios konosé e anhelonan i deseonan di nos kurason mas ku nos mes. I nos seguramente no konosé e kurason òf motibunan di esnan ku ta kuestioná nos, bèrdat?

Tin bia hendenan di otro religionnan ta kuestioná nos tokante nos fe. Por ehèmpel, nos amigunan mòslem ta hasi nos preguntanan relashoná ku e divinidat di Hesus, manera: “Unda den Beibel Hesus a bisa ku E ta Dios?” òf “Dikon bo ta bisa ku tin un Dios ora bo tin tres persona den e Trinidat?” Aunke esakinan parse di ta preguntanan provokativo, tòg e nesesidat sinsero pa Hesus por ta genuino i por representá un anhelo profundo òf bashí di esnan ku ta hasi e preguntanan. Nos no konosé nan kurason; nos no mester. Simplemente nos mester ministrá na otronan lo mihó ku nos por, apesar di nan motibunan di mas profundo.

Lesa Mateo 26:56; Echonan 17:11; 1 Korintionan 15:3, i 2 Timoteo 3:16. Kon e versíkulonan akí ta yuda nos komprendé e kontesta di Hesus na e eksperto di lei den Lukas 10:26?

Tin bia nos ke kontestanan pero no ta hasi esfuerso nos mes pa haña nan. Hesus a bisa: “ ‘Kiko ta pará skirbí den Lei? Kiko bo ta lesa den dje?’ ” (Lukas 10:26). Hesus a mustra na un aspekto hopi importante di siñamentu. Na lugá di solamente skucha na loke otronan tin di bisa nos, nos mester lesa e Skrituranan (e Palabra di Dios) pa nos mes. E kontestanan tei kaba, i Spiritu Santu ta obra den nos kurason pa impreshoná riba nos loke nos mester hasi.

Dios a duna nos Su Palabra. Den dje, nos por haña tur e bèrdat ku nos mester sa tokante kon nos ta suponé di biba, tokante kon nos ta suponé di trata otronan, i tokante kon nos por “heredá bida eterno”. Sigur, tin un ròl pa maestronan i pastornan, pero al final, nos mester bai na e Beibel pa e bèrdatnan ku ta importá. “Bo palabra ta un lampi na mi pia i un lus na mi kaminda” (Salmo 119:105, NKJV). E versíkulo akí no ta djis poesia; e ta bèrdat sagrado, mustrando nos na e Palabra di Dios i su importansia pa e kreyente.

Hesus, e Palabra di Dios hasí karni, semper a mustra hende bèk na e Palabra Skirbí. Kiko esaki mester bisa nos tokante e importansia di Beibel i dikon nos mester rechasá kualke rasonamentu filosófiko òf teológiko ku ta mengua nos konfiansa den e Beibel?

Lesa Lukas 10:27, 28. Kiko tabata kontesta di e eksperto di lei riba su mes pregunta?

E eksperto di lei a hasi e pregunta, i e mes a duna e kontesta: “ ‘Stima Señor bo Dios ku henter bo kurason. . .’ i ‘bo próhimo manera bo mes’ ” (Lukas 10:27).

Kiko tabata Hesus su kontesta? El a bisa: “ ‘Bo a kontestá bon’ ” (Lukas 10:28). Hesus a sigui desafi’é pa hasi algu kuné, i a bisa: “ ‘hasi esaki i lo bo biba’ ” (Lukas 10:28).

Pa mayoria kreyente, duna e kontesta korekto tokante doktrina i fe no ta dje difísil ei. E desafio, en kambio, ta bin ora di hasi loke nan sa ku ta korekto i sigui loke nan ta kere. Un kantidat di hende ku, aunke nan sa sufisiente pa salba, lo bai pèrdí pasobra nan no a obedesé loke nan tabata sa. Ta asina serio e asuntu akí ta. Solamente sa tokante stima Dios i bo próhimo no ta sufisiente. Bo mester hasié!

Lesa Santiago 2:17–22. Kon e versíkulonan akí ta paralelo na loke Hesus a bisa e eksperto di lei?

Si nos stima Dios, nos lo lesa Su Palabra, nos lo resa, nos lo warda Su mandamentunan, i nos lo ta obediente na Su bos “di henter nos kurason.” Si mi bisa ku mi stima otronan, pero mi no ta preokupá pa otronan den iglesia, òf si mi ignorá e nesesidatnan di otronan kaminda mi por yuda, ki bon mi fe ta? Kristianismo no ta djis un sèt di distinto kreensianan; e ta un manera di biba.

“Si un ruman hòmber òf ruman muhé ta sin paña i den nesesidat di e kuminda di kada dia, i un di boso bisa nan: ‘Bai na pas, tene bo kurpa kayente i yena bo barika,’ i sinembargo, boso no ta duna nan loke ta nesesario pa nan kurpa, kiko esei ta bal?’ ” (Santiago 2:15,16).

Kuantu bo ta preokupá tokante bienestar di otronan? Kuantu bo ta sigui e palabranan di Pablo: “no buska boso interes personal so, ma buska tambe interes di otronan.” (Fil. 2:4)? Pa grasia di Dios, kon bo por siña preokupá mas pa otronan?

Lesa Mateo 22:37–40. Kiko loke Hesus Mes a bisa akinan ta kompará ku Su kontesta na e eksperto di lei, den Lukas 10:27, 28?

Di akuerdo ku Mateo 22:37–40, Hesus a mustra kla ku e ekspreshon diario di kreensia berdadero ta dependé di e dos mandamentunan akí. I Lukas 10:27, 28 ta mustra kla ku si un persona hasi e dos kosnan akí, e ora ei e lo tin bida eterno.

“Amor ta e prinsipio fundamental di e gobièrnu di Dios den shelu i tera, i e mester ta e fundeshi di e karakter di e kristian. Esaki so por hasi i manten’é firme. Esaki so por kapasit’é pa resistí prueba i tentashon.”—Ellen G. White, Christ’s Object Lessons, p. 49.

Lesa Galationan 5:14; Mikeas 6:6–8; i 1 Juan 4:20, 21. Kon e versíkulonan akí ta reforsá loke Hesus a bisa nos?

Di akuerdo ku Pablo, “Pasobra por resumí henter Lei di Moises den esun mandamentu akí: ‘Stima bo próhimo manera bo mes’ ” (Gal. 5:14). Pa Pablo, por mira stima Dios di un manera práktiko ora por ilustrá e amor ei den e forma kon nos ta trata otronan. Aunke el a deklará ku “ ‘Ma e hende hustu lo biba pa medio di fe’ ” (Rom. 1:17), tòg biba pa medio di fe no ta algu ku ta skondí, deskonosí òf invisibel pa otronan. Pablo, Mikeas, i Juan ta pone kla ku obranan práktiko ta demostrá e realidat di fe ku nos ta reklamá.

Den 1 Korintionan 13 Pablo a deklará ku hopi énfasis ku si un hende reklamá di tin gran konosementu, òf di ta hasi gran obranan, òf di tin gran fe, òf asta di entregá su bida, pero no tin amor, e ora ei e persona ei a bira manera “un gòn gòng ku ta zona òf un simbal ku ta resoná” (1 Kor. 13:1).

Wak e sita di Ellen G. White akiriba. Nota kiko e ta bisa tokante kon solamente den amor hende por keda firme i soportá tentashon. Kon e idea akí ta demostrá ku e mandato pa stima no ta salbashon pa medio di obranan, sino en kambio, un ekspreshon di e fe ku nos tin den Hesus?

Ora Hesus a elogiá e abogado pa a duna e kontesta korekto, El a bisa: “Hasi esaki i lo bo biba” (Lukas 10:28), i asina El a toka e sentro mes den kurason di e hòmber. Duna tur e kontestanan korekto tabata fásil pa e abogado, pero hasi e kosnan ei tabata un problema 2.000 aña pasá, i ainda e ta un problema pa hopi di nos awendia. E abogado ker a kue Hesus den trampa i broma di su konosementu. El a hasi un pregunta di siguimentu: “I ta ken ta mi próhimo?” (Lukas 10:29).

Lesa Lukas 10:30–37. Kon lo bo a resumí e nifikashon di Hesus den e storia akinan?

Tin hende rònt di nos ku otronan a trata inhustu? Nos a hasi loke sea ku nos tabata por pa yuda nan?

Ta bèrdat ku tin biaha pastornan, ansianonan, i miembronan no ta yuda esnan ku mester di yudansa. Tin biaha hendenan di un otro fe por ta mas amabel pa ku hende den komunidat ku nos ta. Nos por papia tokante ser amabel, sinembargo otronan por supli e nesesidatnan di hende ku nos no ta dirigí nos mes na dje. Si nos fe ta nifiká kualke kos, nos mester alkansá i yuda esnan den nesesidat.

Hesus a konkluí e storia di e bon samaritano puntrando ken meimei di e tres tabata berdaderamente un próhimo pa e persona ku tabatin mester di yudansa.

“Por lo tantu, a kontestá e pregunta: ‘Ken ta mi próhimo?’ pa semper. Kristu a mustra ku nos próhimo no ta nifiká simplemente un di e iglesia òf fe na kua nos ta pertenesé. E no tin referensia na rasa, koló, òf distinshon di klase. Nos próhimo ta tur persona ku tin mester di nos yudansa. Nos próhimo ta kada alma ku ta heridá i lastimá pa e atversario. Nos próhimo ta tur hende ku ta propiedat di Dios.”—Ellen G. White, The Desire of Ages, p. 503.

Desafio: Kuminsá resa diariamente pa un hende ku ta diferente for di bo, òf asta pa un hende ku kisas bo no gusta personalmente.

Desafiá: Skibi por lo ménos tres nòmber di bo konosínan (no atventista); identifiká nan nesesidatnan (emoshonal, físiko, sosial) i konsiderá kon bo por ministrá personalmente na e nesesidatnan ei. Kiko bo por hasi práktikamente pa nan den e siman benidero?

Lesa Ellen G. White “The Good Samaritan,” p. 497–505, den The Desire of Ages.

Tin hopi hende ku hamber, den nesesidat, i maltratá den nos mundu awe. Bo por hasi bo parti, aunke kon “chikitu” kisas e por parse di ta. Nos no ta bai resolvé tur e problemanan di mundu promé ku Hesus regresá. No a yama nos pa hasi esei. Pero te na e momento ei, nos trabou por ta mes básiko ku yuda un hende ku bo konosé ku no tin sufisiente kuminda; òf e por ta di yuda un miembro den iglesia ku ta enfrentando inhustisia, asta dògmatismo, ku ta keda un problema real den nos mundu, asta awe.

“Religion puru i sin mancha dilanti di e Tata ta esaki: ‘Bishitá e wérfanonan i biudonan den nan aflikshon, i warda su mes sin mancha di e mundu.’ Bon obranan ta e fruta ku Kristu ta rekerí nos pa karga: palabranan amabel, aktonan di benevolensia, di konsiderashon pa e pobernan, esnan den nesesidat, esnan aflihí. Ora kurasonnan simpatisá ku kurasonnan kargá ku deskurashamentu i verdrit, ora e man repartí na esnan den nesesidat, ora bisti esnan sunú, duna e strañero bonbiní na un asiento den bo salòn i un lugá den bo kurason, angelnan ta yega hopi serka, i un nota di kontesta ta reakshoná den shelu. Kada akto di hustisia, miserikòrdia, i benevolensia ta hasi melodia den shelu. E Tata, for di Su trono, ta kontemplá esnan ku hasi e aktonan di miserikòrdia akí, i ta konta nan huntu ku Su tesoronan di mas presioso. ‘I nan lo ta di Mi, e Señor di ehérsitonan ta bisa, den e dia ku lo Mi prepará Mi hoyanan.’ Ta konsiderá kada akto miserikòrdioso na esnan den nesesidat, esnan ku ta sufri, manera kos ku ta na Hesus a hasié. Ora bo yuda e pobernan, simpatisá ku esnan aflihí i oprimí, bira amigu di un huérfano, bo ta trese bo mes den un relashon mas serka ku Hesus.”—Ellen G. White, Testimonies for the Church, tomo 2, p. 25.

Preguntanan pa Diskushon:

Kon nos por sigurá ku nos ta komprendé ku e mandato di Dios pa stima Dios i otronan no ta salbashon pa medio di obranan? Ora nos konsiderá ken Hesus ta, i loke El a hasi pa nos riba e krus (lesa Fil. 2:5–8), dikon e idea ku kualke kos ku nos por hasi pa gana òf meresé salbashon ta un eror asina grandi? Kon nos por siña distinguí entre traha pa salbashon, loke ta un eror fatal, i revelá den nos bida e salbashon ku ya nos tin den Hesus?

Kon nos por siña rekonosé algun di e prehuisionan inherente ku kisas nos por tin pa ku esnan ku ta diferente for di nos?

Otro for di e pasashinan studiá den e lès di e siman akí, kua otro sosten di Skritura bo ta haña pa e nesesidat di demostrá amabilidat na otronan, no importá ken nan ta?