Mishon na Esnan den Nesesidat

18 di novèmber

Lesa pa e Estudio di e Siman Akí:

Lukas 5:17–26; Juan 5:1–9; Deut. 10:19; Lev. 23:22; Mat. 25:34–40; Juan 15:13.

Versíkulo di Memoria:

“I e Rei lo kontestá i bisa nan: ‘Di bèrdat Mi ta bisa boso, tur loke boso a hasi pa un di esnan di mas chikitu di e rumannan aki di Mi, ta pa Mi boso a hasié’ ” (Mateo 25:40, NKJV).

Lukas 5:17–26 ta proveé hopi ilustrashon dikon Dios ta yudando esnan den nesesidat. Tin bia Dios ta usa otronan pa yuda nos, òf E ta usa nos pa yuda otronan. E trabou akí por ta desafiante, pero e ta trese gran rekompensanan. Ora nos yuda otronan den nesesidat, nos ta modelando e ministerio di Hesu-Kristu. Tin bia ta fásil pa bisa ken ta den nesesidat di yudansa; na otro momentonan ta difísil pa sa. Loke sea e situashon ta, nos ta yamá pa ta yudadónan di Dios pa tur hende den nesesidat, independientemente di nan pasado.

Beibel ta kurashá nos pa hala serka di strañeronan, i ora nos gana nan konfiansa nos por siña mihó maneranan di yuda nan haña Hesus.

Den e lès di e siman akí, nos tópiko, “Mishon na Esnan den Nesesidat”, ta mustra ku Dios tin un plan pa alkansá esnan ku por ta den nesesidat den un kantidat di forma. Nan nesesidatnan por ta físiko, emoshonal, finansiero, òf asta sosial: es desir, algun por ta konsiderá komo marginá di nan komunidat òf famia. Loke sea nan nesesidatnan ta, nos mester ta kla pa hasi loke nos por pa yuda. Esaki ta e parti sentral di loke ta nifiká di ta un kristian i loke mishon mester inkluí.

* Studia e lès di e siman akí pa prepará pa Sabat, 25 di novèmber.

Un storia poderoso den e Evangelionan ta revelá loke algun hòmber a pasa den pa trese un persona den nesesidat, probablemente un amigu, serka Hesus. Nos por siña di loke a pasa akinan tokante e trabou duru ku e lo por tuma tin bia pa ministrá na esnan den nesesidat.

Lesa Lukas 5:17–26 (lesa tambe Mat. 9:1–8, Marko 2:3–12). Kua ta algun di e lèsnan ku nos por saka for di e storia akí tokante mishon i ministerio?

Ora nan a tres’é serka Hesus, e hòmbernan akí a asumí e responsabilidat di kuida nan amigu. Dios ta yamando nos pa ta meskos ku e amigunan di e hòmber akí, pa guia esnan den nesesidat na Hesu-Kristu. E trabou akí ta rekerí fe, akshon, pasenshi, i un disponibilidat, si mester, pa no ta konvenshonal. E hòmbernan a bin serka Hesus pero a topa bareranan. Nan no por a trese nan amigu indefenso serka Hesus a traves di medionan tradishonal. Nan no a entregá; en kambio, nan a haña un forma inovativo pa haña e hòmber serka Hesu-Kristu. Bahando nan amigu for di e dak! Sinembargo, di akuerdo ku Lukas, Hesus a aprobá loke nan a hasi (lesa Lukas 5:20).

Hesus su deseo ta pa nos trese nos amigunan indefenso serka djE. Beibel ta referí na Hesus komo e Gran Dòkter ku ta anhelá pa pordoná i kura esnan ku ta sufriendo, ken sea nan ta.

Ellen G. White ta desafiá nos pa yuda esnan indefenso: “No warda pa bisa bo bo deber. Habri bo wowo i mira ken ta rònt di bo; hasi bo mes konosí ku esnan indefenso, afligí, i den nesesidat. No skonde bo mes pa nan, i no trata na ekskluí nan nesesidatnan. Ken ta duna e pruebanan menshoná den Santiago, di ta poseé religion puru, sin mancha ku egoismo òf korupshon? Ken ta ansioso pa hasi tur loke ta den nan poder pa yuda den e gran plan di salbashon?”—Testimonies for the Church, tomo 2, p. 29.

Hesus Mes ta demostrá kon yuda esnan indefenso i ta yamando nos pa hasi e mesun kos. Promé, nos ta bira nan amigu; despues nos ta siña tokante nan nesesidatnan; finalmente, nos ta guia nan na Hesus, kende ta e Uniko ku por yuda nan. Esaki ta loke e hòmbernan den e storia akí a hasi; nos mester hasi mesun kos den kualke situashon ku nos haña nos mes. Yuda guia hende na e úniko ku por salba nan: Hesus.

Ken rònt di bo, aworakí mes, mester di algun yudansa? Kiko bo ta bai hasi pa nan?

Kiko e siguiente storianan ta siña nos tokante e ministerio na esnan den nesesidat?

Ellen G. White ta proveé un proseso di sinku paso di e método di Hesus den kon ministrá, spesialmente na esnan den nesesidat: “E método di Kristu so lo duna berdadero éksito den alkansá e hendenan. E Salbador a meskla ku hende manera un ku tabata deseá nan bon. El a demostrá Su simpatia na nan, a ministrá na nan nesesidatnan, i a gana nan konfiansa. Despues El a bisa nan: ‘Sigui Mi.’ ”—The Ministry of Healing, p. 143.

Di promé, nos mester meskla ku esnan indefenso, pasa tempu konosiendo nan, i komprendé nan nesesidatnan ku e intenshon di hasi bon pa nan. Wak kiko Hesus a hasi ku e paralítiko na e tanki di awa. Hesus tabata einan, meimei di “un multitut di hende malu, siegu, lam, paralisá” (Juan 5:3).

Di dos, nos mester mustra simpatia. Esaki por ta desafiante den algun kaso pa motibu di deskonfiansa, i pasobra tin bia hende ta usa amabilidat komo un medio di gana konfiansa di un hende ku nan ta abuzá di dje despues. No opstante, Dios ta yamando nos pa mustra simpatia sin spera nada bèk.

E di tres paso ta pa ministrá na nan nesesidatnan. Esaki ta enbolbí mas ku djis palabranan. Ta tuma akshon pa ministrá na nesesidatnan di un amigu òf un strañero. Hesus a papia ku e paralítiko, a puntra kiko e tabata ke, i despues a obra un milager na su fabor. Den e storia di e hòmber poseí pa un “spiritu impuru”, Hesus a tuma kontròl kompletu di e situashon, hasiendo pa e hòmber indefenso loke e no por a hasi pa su mes.

E di kuater paso ta di gana nan konfiansa. Ora nos ministrá na hende, ora nos yuda nan, nan lo siña konfia nos i loke nos bisa nan, i asina ora nos papia ku nan tokante Hesus, nan lo ta mas habrí pa skucha. Hesus no tabata ke djis kura nan físikamente; E tabata ke pa nan tin bida eterno den djE (lesa Juan 10:10).

E último paso ta pa yuda guia nan na Hesus, un akto ku ta rekerí fe di tantu abo komo esun ku bo ta yuda.

Generalmente nos no por hasi e tipo di milagernan ku Hesus a hasi. Pero kon ta maneranan ku ainda nos por ministrá na esnan ku tin mester di yudansa?

E tópiko di imigrantenan i refugiadonan a bira un tema hopi debatí, spesialmente pasobra tin asina tantu di nan awendia. Sea ta desplasá pa guera, òf desasternan natural, òf pa e speransa di un mihó futuro ekonómiko, a saka miónes rònt mundu for di nan kasnan i nan ta den nesesidat desesperá di ayudo.

Den Mateo 2:13, 14 , Hesus tabata un refugiado. Su mayornan terenal, Hose i Maria, tabata fòrsá pa hui for di Bètlehèm den anochi i buska refugio na Egipto pa skapa di e man asesino di Heródes. Beibel no ta bisa nada tokante nan eksperensia na Egipto, pero no ta difísil pa imaginá ku e tabatin su desafionan, kisas algun di e mesun desafionan ku refugiadonan ta enfrentá awendia tambe. De echo, un poko paralelo na kon e famia di Hesus a buska asilo den un tera strañero, hopi mòslem, budista, hindú, kristian, i personanan no religioso ta buskando asilo den teranan nobo awe tambe.

Generalmente papiá, ta mas fásil pa sera amistat ku individuonan di nos mes kultura i grupo di idioma pasobra nos ta kompartí hopi kos en komun. Ta mas desafiante, sinembargo, pa haña puntonan en komun ku imigrantenan i refugiadonan ku ta mustra diferente for di nos i no ta papia nos mes idioma, ku no ta kompartí e mesun balornan religioso i no ta kome kuminda similar. E evangelio ta yama nos pa sali for di nos zonanan konfortabel étniko, nashonal, i kultural i aserká esnan den nesesidat, independientemente di kon diferente for di nos kisas nan por ta.

Lesa Deuteronomio 10:19, Salmo 146:9, Romanonan 12:13, i Levítiko 23:22. Kua ta e tema importante akinan pa nos kòrda?

Kon nos por ministrá na imigrantenan i refugiadonan? E ta difísil pasobra, den algun pais, kisas no ta polítikamente korekto pa meskla ku òf yuda e hendenan akí. Tòg nos mester hasi loke nos por, ora nos por, pa ministrá na e hendenan akí, ku seguramente a pasa a traves di tempunan hopi difísil i ta den nesesidat di nos yudansa. Por lo tantu, te na kualke grado ku nos por, nos mester yuda.

Kuminsá ku orashon, despues buska informashon riba imigrantenan i refugiadonan. Hopi lugá tin organisashonnan ku ta kuida nan. Bo por kuminsá traha ku un di e organisashonnan, òf kisas Sabat Skol di bo iglesia lokal por kuminsá un ministerio pa imigrantenan òf refugiadonan.

Asta si ta solamente un kantidat chikitu, kiko bo por hasi pa yuda kualke imigrante òf refugiado ku bo konosé?

Ken meimei di nos no a eksperensiá kon heridá nos mundu ta realmente? Sea nos ta biba den un ambiente di rikesa i materialismo, òf ta biba den un ambiente di pobresa i nesesidatnan material, no ta importá. Hendenan ta heridá, sufri, ta lucha. Tur loke hende tin ku hasi, por ehèmpel, ta lesa tokante e kantidat asombroso di plaka gastá riba antidepresivo den e mundu oksidental kada aña, pa komprendé ku rikesa material so no ta yega ni serka di garantisá felisidat òf pas.

“E Spiritu di SEÑOR ta riba Mi, pasobra El a ungiMi pa prediká evangelio na e pobernan; El a mandaMi pa proklamá libertat na e prezunan, i restorashon di bista na e siegunan, pa duna libertat na esnan ku ta wòrdu oprimí” (Lukas 4:18).

Kiko esaki ta siña nos tokante loke Hesus a hasi i kiko nos, tambe, den nos mes esfera, mester ta hasiendo pa esnan den nesesidat rònt di nos?

Dios ta yamando nos pa supli e nesesidatnan di tur hende, aunke nos no sa ki ora òf si nan un dia lo aseptá Hesus. Aunke alkansá nan pa Hesus ta e fundeshi di nos mishon, nos mester yuda esnan den nesesidat puramente pasobra nan tin mester di ayudo. Nos ta yuda nan pasobra nos a aseptá Hesus komo nos Señor, i esei ta loke E ta yama nos pa hasi.

E ehèmpel di Hesus di purba supli e nesesidatnan di tur hende ta un prinsipio bíbliko pa sigui. Nos no sa si tur hende ku El a yuda a asept’E òf nò.

Pa berdaderamente yuda otronan, nos mester bira konsiente di nan nesesidatnan. Kada kultura tin su propio manera di mustra kon trata un amigu. Na India, ta kustumber pa sirbi kuminda òf un kos di bebe ora ta entretené bishitantenan. Ta mas fásil pa duna un strañero plaka simbóliko ku pa konsolá un amigu ku a kaba di pèrdè un ser kerí. Loke bo amigu por tin mester por ta mas ku plaka òf kosnan físiko. Hopi bia bo apoyo komprensivo durante e tempu di un pèrdida importante lo por ta muchu mas útil.

E prinsipio importante di ta yudadó di Hesus na nos amigunan ta kuminsá promé ku e meta di mustra amor apnegá pa ku nan, komprendé nan nesesidatnan promé, promé ku kuminsá ofresé yudansa. Proveé e yudansa ku nan tin mester, aunke bo no sa si nan ta kla pa sigui Hesus.

Lesa Mateo 25:34–40. Kua ta e mensahe pa nos akinan?

Manera nos tur sa, i sa muchu bon, e nesesidatnan nunka ta kaba. Si bo ta dispuesto pa yuda otronan, lo bo tin hopi oportunidat. Sea ta amigunan serkano òf refugiadonan leu, hende ta den nesesidat, i nos mester hasi loke nos por, ora nos por, pa yuda. A lo largu di henter Su ministerio terenal, Hesus a yuda esnan ku no por a yuda nan mes. Den algun kaso, El a tuma e inisiativa i a bai serka esnan den nesesidat; den otro kasonan, manera ku e hòmbernan ku a baha e paralítiko for di dak pa asina tres’é serka Hesus, amigunan a tuma inisiativa.

“Ni un hende no tin amor mas grandi ku esaki, ku un hende ta duna su bida pa su amigunan.” (Juan 15:13). Kon nos ta apliká e prinsipio akí den nos ministerio na otronan?

Un famia mishonero a sirbi seis aña na Trinidad i Tobago. E promé tres añanan nan a biba den un komunidat hindú i mòslem predominante. Hopi hindú tabata reklamá ku kristiannan tabata rechasá nan invitashon na e sirbishi di Akshon di Grasia anual. Un dia e kristiannan akí a asistí na un sirbishi di Akshon di Grasia di un amigu hindú nobo. Nan a hasi esaki siguiendo ehèmpel di Hesus: E tabata bishitá Su amigunan ora nan tabata invit’E na nan selebrashonnan spesial. De echo, hinduismo ta siña ku bishitantenan òf amigunan ta trese bendishonnan na e hogar di e anfitrion.

Laga nos hasi un intento pa kuminsá sera un amistat e siman akí siendo un bendishon pa un hende. Promé, evaluá bo konteksto, komunidat, pueblo, òf siudat. Bo sa di kualke refugiado òf imigrante ku ta biba einan? Ke tal di e hendenan ku ta biba den bo kaya? Bo konosé nan tur? Independientemente di bo situashon, sera amistat ku un strañero no ta un tarea fásil. Laga nos resa i pidi Dios yudansa. E konosé tur hende i konosé e strañero ku bo por bira su amigu. Kòrda, e meta ta pa ta nan amigu asina ku bo por yuda guia nan na Dios pa yudansa.

Desafio: Siña tokante strañeronan òf personanan no kristian ku ta biba den bo pais. Joshuaprojects.org ta un bon lugá pa hasi enkuesta di gruponan di persona no alkansá den bo kultura.

Lesa Arthur White, “A Few Days at Long Point,” Ellen G. White: The Australian Years: 1891–1900, tomo 4, p, 100–104.

E eskritornan di Evangelio a registrá ehèmpelnan di Hesus su práktika di konstruí brùgnan ku hendenan di otro kulturanan pa asina salba nan (Mat. 8:28–34, Marko 5:1–20). Di mes manera, ta yama nos tambe pa sera amistatnan i ministrá na hendenan di otro kulturanan tambe. E morto di Kristu tabata pa tur hende, independientemente di rasa, nashonalidat, rikesa, òf pasado. Esaki ta un punto ku nos no mester lubidá nunka. “i E mes ta e propisiashon pa nos pikánan, i no pa di nos so, ma tambe pa esnan di henter mundu” (1 Juan 2:2).

“Hòmber- i muhénan no ta kumpliendo ku e diseño di Dios, ora nan ta simplemente ekspresá afekshon pa nan propio sírkulo di famia, . . . miéntras nan ta ekskluí di nan amor esnan ku nan lo por a konsolá i bendishoná aliviando nan nesesidatnan. . . .”

“Ora Señor ta pidi nos pa hasi bon pa otronan pafó di nos hogar, E no ke men ku nos afekshon pa kas mester disminuí, i ku nos lo stima nos famianan òf nos pais ménos pasobra E ta deseá pa nos ekstendé nos simpatia. Pero nos no mester limitá nos afekshon i simpatia denter di kuater muraya, i enserá e bendishon ku Dios a duna nos asina ku otronan lo no benefisiá huntu ku nos den nos goso.”—Ellen G. White, The Advent Review and Sabbath Herald, 15 di òktober 1895.

E responsabilidat duná na nos pa ta un bendishon pa esnan pafó di nos zona konfortabel, sea nan ta di un otro kultura òf djis un persona indefenso, ta un mandato no negosiabel di Hesu-Kristu Mes (Echonan 1:8, Marko 11:17).

Preguntanan pa Diskushon:

Kua ta bo mes zona konfortabel, i dikon bo mester ta dispuesto pa stap pafó di dje ora ta nesesario?

Kua ta e implikashonnan di e insidente ora a yama Hesus “ ‘un hòmber golos i un buraché, un amigu di publikano i pekadó’ ” (Mat. 11:19)? Kiko Hesus tabata hasiendo ku lo a trese e akusashon ei, i kiko e ta siña nos tokante mishon?

Te na ki grado un kristian mester enbolbí den e selebrashonnan di no kreyentenan? Kon kristiannan lo por hasi esei sin komprometé prinsipionan bíbliko?