Mishon na esnan Poderoso

25 di novèmber

Lesa pa e Estudio di e Siman Akí:

Daniel 4; 2 Reinan 5:1–19; Juan 3:1–12; Juan 7:43–52; Mat. 19:16–22; Juan 19:38–42.

Versíkulo di Memoria:

“Pasobra ki probecho un hende lo tin si e gana henter mundu, ma pèrdè su alma? Of kiko un hende lo duna en kambio di su alma?” (Mateo 16:26, NKJV).

Aunke e ta skirbí hopi aña pasá, Beibel, e Palabra di Dios, ta revelashon di e bèrdat di Dios pa nos mundu. I entre e hopi bèrdatnan ku e ta revelá tin esun di naturalesa humano, i ku, sea ta den Hudea di siglo shete òf Brasil di siglo bintiun, hende ta básikamente mesun kos: pekadornan den nesesidat di grasia divino.

Esaki ta inkluí esnan riku i poderoso. Esnan riku i poderoso di tempunan bíbliko no ta diferente for di esnan riku i poderoso den tempunan moderno, spesialmente den nan búskeda di rikesa i fama i poder, hopi bia (pero no semper) a kosto di esnan vulnerabel. Sin embargo, Dios ta mes preokupá pa salbashon di e rikunan i esnan poderoso ku E ta pa esnan débil i esnan den nesesidat. Skritura ta proveé algun ehèmpelnan pashoná di personahenan bíbliko ku tabata poderoso, òf riku, òf tur dos, i kon Dios a usa nan pa ta un bendishon pa e nashonnan: Abraham, Isaak, Job, Salomon, i Hosé, pa menshoná un par di ehèmpel.

E siman akí nos lo eksplorá Dios su mishon na e rikunan i esnan poderoso. Biaha huntu ku nos segun ku nos ta mira kon Dios a alkansá algun di e hendenan akí i kon E ta yamando i preparando atventistanan di shete dia pa ta testigunan p’e awendia tambe.

* Studia e lès di e siman akí pa prepará pa Sabat, 2 di desèmber.

Komo atventistanan di shete dia, nos ta kere den loke ta konosí komo “ekspiashon ilimitá”. Esaki ta nifiká ku, kontrali na algun kristian, nos ta kere ku e morto di Kristu tabata pa henter humanidat, no solamente un grupo spesial di esnan predestiná pa Dios pa salbashon. Pasobra Dios “ta deseá pa tur hende wòrdu salbá i yega na konosementu di e bèrdat” (1 Tim. 2:4), Hesus a ofresé Su Mes komo un sakrifisio “pa pordon di nos pikánan, no solamente pa esnan di nos, ma pa piká di henter mundu” (1 Juan 2:2). Ta p’esei “den Kristu El a skohe nos fo'i promé ku El a krea mundu” (Efe. 1:4), asta si no ta tur hende skoh’E a kambio. Ta p’esei, tambe, nos ta topa relatonan den Beibel di tur sorto di hende alkansá pa Dios.

Lesa Daniel 4. Kiko a pasa ku e rei akinan, i kiko esaki ta bisa nos tokante ku salbashon a bin na un di e hòmbernan di mas poderoso di mundu?

Un ehèmpel notabel den Beibel dikon Dios ta alkansá no kreyentenan poderoso ta e storia di Rei Nabukodonosor. Dios a ehekutá Su huisio riba dje den un forma similar ku algun rei israelita (lesa, por ehèmpel, 2 Kron. 32:25, 26; 1 Reinan 14:21–31; 1 Samuel 28). E relato bíbliko di Nabukodonosor, ku a bin bei i a rekonosé e Dios Kreador, ta mustra ku Dios ta preokupá pa esnan riku i poderoso, komo tambe esnan débil i den nesesidat. Den versíkulo 37, e hòmber di mas poderoso riba tera a deklará: “Awor ami, Nabukodonosor, ta alabá, ta halsa i ta onra e Rei di shelu, pasobra tur Su obranan ta bèrdadero i Su kamindanan ta hustu, i E por umiyá esnan ku ta kana den orguyo.” (Dan. 4:37). Si solamente tur e rikunan i esnan poderoso i orguyoso meimei di nos sernan mortal tabata komprendé e bèrdat akí!

Kiko nos por siña di e storia akí? Di promé, Dios ta usa kreyentenan komprometé, manera Daniel, komo un brùg pa alkansá no kreyentenan poderoso. Di dos, Dios por intervení direktamente den e proseso di testifikashon pa asina alkansá no kreyentenan poderoso. Dios a humiá Nabukodonosor pa su orguyo i arogansia. I aunke esaki tabata un storia masha dramátiko, tin hopi otro manera den kua por humiá esnan riku i poderoso i orguyoso.

Asta si nos no ta riku i poderoso segun e normanan di mundu, dikon nos mester ta kuidadoso pa evitá e tipo di arogansia ku e rei akí a manifestá? Dikon e aktitut ei lo por tabata mas fásil di tin ku nos lo por pensa?

Kristu a muri pa tur hende, independientemente di nan trasfondo, rikesa, etnisidat, òf status. Dios ta alkansando no kristiannan poderoso den mundu i ta spera pa nan biba na altura di e lus ku nan tin (lesa Ellen G. White, The Acts of Apostles, p. 416).

Lesa 2 Reinan 5:1–19. Kiko nos por saka for di e storia akí tokante alkansá hende pa Señor?

Den 2 Reinan 5:17–19, Naaman a hasi dos petishon inkomun despues ku Dios a kur’é di lepra. Di promé, el a pidi pa hiba un karga di tera ku dos mula por transportá for di Israel bèk na Siria, pa e propósito di adorá e Dios bibu. El a deklará: “pasobra bo sirbidó lo no ofresé ofrenda kimá mas, ni e lo no ofresé sakrifisio na otro diosnan, sino solamente na SEÑOR” (2 Reinan 5:17). Di dos, Naaman a pidi pèrmit pa hinka rudia huntu ku su rei, aunke e lo no a adorá e diosnan di su rei mas.

Naaman awor tabata un kreyente den e úniko Dios berdadero. Sin embargo, ainda e tabatin kreensianan pagano. Su tumamentu di tera for di Israel tabata indiká ku e no a komprendé e Kreador kompletamente. E por a asumí ku e mester a tuma e tera pasobra den su kosmovishon Dios ta teritorial, meskos ku su diosnan anterior; òf kisas e ker a konstruí un altar ku e tera di Israel? En todo kaso, su kreensia den Dios tabata mesklá ku su kreensianan bieu. E storia di Naaman ta proveé un konteksto pa no kristiannan ku ta bin serka Kristu awendia. Un lès siñá for di e storia di Naaman ta ku kambionan di kosmovishon ta tuma tempu.

E di dos petishon tabata mas preokupante. Dikon Naaman lo a buska pèrmit pa hinka rudia huntu ku su rei i despues pidi Dios pordon’é? E kontesta di e profeta ta proveé un klave: “Bai na pas” (2 Reinan 5:19). Komo un persona poderoso na Siria, Naaman tabatin debernan pa ehekutá ku tabata pone un desafio na su fe nobo. Ta importante pa kreyentenan nobo, spesialmente esnan ku ta bin di otro fe, haña sosten i guia segun ku nan ta dil ku rekerimentunan kultural i sosial di nan bida pasá promé di a bin na fe.

Kòrda, Naaman a bandoná su pais pagano komo un leproso i a regresá komo un hòmber kurá i un disipel di e Dios Kreador. El a kaba di kuminsá su biahe. E tabatin mester di tempu pa krese.

Ki lèsnan nos mester siña for di e storia akí tokante no pusha hende muchu rápidamente, spesialmente esnan ku ta bin di un pasado òf kultura no kristian?

Nikodemo tabata un hòmber studiá. Beibel ta deskribié komo un gobernante di e hudiunan (Juan 3:1). Hesus a referí na dje komo un maestro di Israel (Juan 3:10). E tabatin un bon komprendementu di Beibel i tabatin un hamber spiritual pa Señor. For di perspektiva humano, por a parse manera e tabata un siguidó di Dios. E tabata warda tur e mandamentunan, i e tabata un lider respetá meimei di e hudiunan. E tabata poderoso i riku. Hopi hende ta wak esakinan komo un señal ku Dios a bendishon’é. No opstante, ta resultá ku e aparensianan superfisial tabata solamente esei, aparensianan superfisial.

Lesa Juan 3:1–12. Kiko e storia akí ta revelá tokante e nesesidatnan spiritual di Nikodemo i kon Hesus a atendé ku nan mesora?

Ora Nikodemo a bin serka Hesus, el a trata na mantené e fachada, e status quo. Pero Dios tabata konosé su kurason. Di forma similar, Dios konosé kurason i nesesidatnan di tur esnan riku i poderoso, loke sea ta nan trasfondo. Nikodemo a bin serka Hesus pasobra e siñansanan di Hesus a konden’é. Su orguyo a impidié di abiertamente konfesá Hesu-Kristu komo Señor, pero e anochi ei a kambi’é pa semper. Asta despues di su konvikshon ku Hesus tabata mandá di Dios, ainda e no a rekonosé abiertamente ku e tabata un siguidó di Hesu-Kristu.

Lesa Juan 7:43–52 i Juan 19:39. Kiko e tekstonan akí ta bisa nos tokante Nikodemo i Hesus?

Nos por mira aki den e versíkulonan akí ku Hesus, opviamente, a hasi impakto grandi riba Nikodemo. El a trata na proteg’E ora Hesus tabata bibu i despues honra Hesus despues ku Hesus tabata morto. No tin duda, Hesus a alkansá Nikodemo, ku, asta den su konosementu i sabiduria gabá, tabatin un gran nesesidat di e Salbador, manera nos tur tin nesesidat.

Dikon nos mester ta kuidadoso di e trampa di pensa ku pasobra “nos tin e bèrdat” (kua nos tin), e ora ei e konosementu di e bèrdat akí so ta sufisiente pa salba nos? Kuantu alma lo bai pèrdí, ku tabatin mas ku sufisiente konosementu, asta di e mensahenan di e tres angelnan, pa ta salbá?

Lesa Mateo 19:16–22. Ki lèsnan nos por siña for di e storia akí, den kua, kontrali na Nikodemo, un persona no a aseptá Hesus?

Hesus su interakshon ku e hóben riku ta mustra ki un trampa peligroso rikesa por ta. Wak e palabranan akí: “I atrobe Mi ta bisa boso, ta mas fásil pa un kamel pasa dor di wowo di un angua, ku pa un hende riku drenta e reino di Dios’ ” (Mat. 19:24). Esaki, naturalmente, no ta nifiká ku esnan riku no por salba, sino solamente ku, si e hendenan akí no ta kuidadoso, nan rikesa berdaderamente por ta un impedimentu pa salbashon.

Al final, e rikunan i e pobernan ta enfrentá e mesun destino: graf. Esaki ta nifiká ku e rikunan ta den mes nesesidat desesperá di salbashon ku kualke otro hende. Kualke otro kos ku plaka por kumprá, e no por kumpra dispensashon di morto. E dispensashon ei ta bin solamente komo un regalo, ofresé libremente pa Hesus na ken sea lo reklam’é pa medio di fe. “ ‘Ami ta resurekshon i bida, esun ku kere den Mi, lo biba asta si e muri’ ” (Juan 11:25).

Lesa Lukas 19:1–10. Kiko a hasi e diferensia den e storia akí, kontrali na esun tokante e hóben riku?

Zakeo a reakshoná riba Hesus den un forma ku, desafortunadamente, e hóben riku no a hasi. Nota, Hesus no a bisa Zakeo pa bende loke e tabatin i duna na e pobernan, manera El a hasi ku e gobernante hóben riku. Hesus mester tabata sa presis kon pegá na su plaka e hóben riku tabata, pa kua motibu Hesus a bisa loke El a bis’é. Al kontrario, aunke nos no sa tur loke nan a papia ora Hesus tabata den su kas, Hesus opviamente a konvensé Zakeo i e tabata sa ku e mester a hasi algun kambio den su bida, spesialmente pa loke ta relashoná ku su rikesa.

“Pasobra ki probecho un hende lo tin si e gana henter mundu, ma pèrdè su alma? Of kiko un hende lo duna en kambio di su alma?” (Mat. 16:26). Kiko e palabranan akí mester bisa nos tur?

Hesus tabata sa kon sera amistat ku esnan poderoso. Hopi di e hendenan akí tabata atmir’E i respet’E i, na mes momento, hopi tabata despresi’E tambe. E hendenan poderoso den Beibel ku a bin serka Hesus pa yudansa seguramente tabata sinti ku E tabata preokupá pa nan. Tambe, hopi di esnan riku i poderoso no a bin abiertamente serka Hesus mesora; nan a warda te ora nan tabata sigur ku Hesus tabata berdaderamente e Yu di Dios. Esei tabata e kaso ku tantu Nikodemo komo Hosé di Arimatea.

Lesa Mateo 27:57–60 (lesa tambe Marko 15:43–47; Lukas 23:50–53, i Juan 19:38–42). Kiko e relato akí ta bisa nos tokante kon Señor a usa un hòmber riku ku klaramente Hesus a impaktá?

Te na e momento akí nos no a tende nada di Hosé di Arimatea. Di ripiente e hòmber riku akí ta aparesé, kasi for di nada, i ta us’é pa yuda kumpli ku profesia. Dios a usa i lo sigui usa e rikunan pa Su propósitonan. P’esei, nos mester tin un mishon na nan tambe.

Unda kuminsá por ta un di e fasenan di mas difísil ora ta sera amistat ku hendenan poderoso. En general, ta mihó no buska nan; laga nan bin serka bo. Hesus a hasi esaki; nan a bira un testimonio na Su mensahe, kurashon, i poder for di Dios. Nan a konvensé nan mes tras di kortina ku E ta berdaderamente e Yu di Dios.

Hendenan poderoso lo trata na bira sosio ku ministerio genuino pa un kantidat di motibu. Nan ke ta parti di algu bon ku ta kambiando bida di hende. Esaki ta un manera ku nan sa ku e por kambia nan bida tambe. E ta proveé un forma sutil pa esnan riku i poderoso haña e yudansa ku nan tin mester sin públikamente revelá nan nesesidatnan.

E di dos fase ta pa kuminsá un ministerio genuino komo un avenida pa esnan riku i poderoso pa ta parti di Dios su ministerio. Tuma algun tempu pa invertí den bida di esnan riku i poderoso den bo sosiedat.

Desafio: Agregá un hende na bo lista di orashon diario ku ta den un posishon di poder, no ta un kreyente, i ta un hende ku, tempu tempu, bo por bin den kontakto kuné.

Desafiá: Dirigí un karta òf mail na un hende den un posishon di poder, asta si ta un hende ku lo bo no a topa nunka, i bisa e persona ei ku bo ta resando p’e.

Lesa Ellen G. White, “Ministry to the Rich,” The Ministry of Healing, p. 209–216; “Captive Maid Shows Concern for Naaman,” Reflecting Christ, p. 337.

Hesus su amor ta meskos pa e pobernan manera e ta pa e hendenan riku i poderoso den mundu. El a muri pa prensnan komo tambe pa e pobernan. Hesus tabata sa e manera di mas efektivo di alkansá nan kurason. El a spièrta nos ku “ta mas fásil pa un kamel pasa dor di wowo di angua, ku pa un hende riku drenta e reino di Dios” (Marko 10:25). Ta desafiá nos e siman akí pa alkansá individuonan poderoso i riku ku e evangelio di Hesu-Kristu. Nan ta mes tantu den nesesidat di salbashon ku kualke otro hende, asta si, desafortunadamente, nan, kisas, no por realis’é pa motibu di e “seguridat” ku nan ta kere ku nan rikesa ta ofresé.

“Ta bisa hopi tokante nos deber na e pobernan neglishá; no mester duna algun atenshon na e rikunan neglishá? Hopi ta wak e klase akí komo sin speransa. . . . Míles di hende riku a bai den nan graf sin a atvertí nan. Pero pa indiferente ku nan por parse, alma di hopi entre e rikunan ta kargá.”—Ellen G. White, The Ministry of Healing, p. 210.

Preguntanan pa Diskushon:

Hesus a kibra bareranan di kasta i klase ora E tabata ministrá na e rikunan i e pobernan durante Su ministerio terenal. Kon nos komo atventistanan ta manehá e tema akí, esun di e diferensia entre e riku i e pober, ku ta asina ankrá den tur nos sosiedatnan?

Hesus a bisa lo siguiente: “ ‘I esun ku simia a wòrdu sembrá riba djé meimei di mata di sumpiña ta e hende ku ta tende e palabra, i e preokupashonnan di e mundu aki i e engaño di rikesa ta hoga e palabra, i e ta keda sin duna fruta’ ” (Mat. 13:22). Kiko bo ta kere Hesus tabata ke men ku “rikesa ta gañ’é”? Dikon no nesesariamente nos mester ta riku pa rikesanan gaña nos?

Den klas, pasa riba e pregunta hasí na final di e estudio di djamars tokante e echo ku konosé e bèrdat no ta mesun kos ku ta salbá p’e. Dikon esaki ta un distinshon asina krusial pa nos hasi? Si konosé e bèrdat so no ta loke ta salba nos, kiko ta salba nos?

Kua otro motibunan bo por pensa riba dje dikon e hóben riku a rechasá Hesus miéntras Zakeo a asept’E?