Mishon na esnan No Alkansá: Parti 2

9 di desèmber

Lesa pa e Estudio di e Siman Akí:

1 Reinan 11:1–6; Mat. 4:23–25; Mat. 15:22–28; Marko 7:24–30; Echonan 10:34, 35; Mat. 8:10.

Versíkulo di Memoria:

“E ora ei Hesus a kontestá i a bis'é: "O muhé, bo fe ta grandi; laga sosodé ku bo manera bo ta deseá." I su yu muhé a kura mesora.” (Mateo 15:28, NKJV).

For di prinsipio, un Dios amoroso a buska Su yunan pèrdí (Gén. 3:9); i, te dia di awe, e mesun Dios amoroso ainda ta buskando pa alkansá esnan pèrdí (lesa Rev. 14:6–12), inkluyendo esnan pèrdí den e siudatnan. Na 2018, Nashonnan Uní a publiká su último deskubrimentunan, ku ta bisa ku 55 porshento di poblashon di e planeta ta biba den áreanan urbano, i esaki lo krese (si tempu dura) te na 68 porshento pa 2050. Nos no tin eskoho: nos mester testifiká na esnan den e siudatnan.

Sinembargo, hopi di e pueblo di Dios ta aktua manera Jonás a hasi ora Dios a yam’é pa testifiká na un siudat: pa kualke motibu, nan ta hui for di e tarea. “Pasobra tur loke a wòrdu skirbí promé aya a wòrdu skirbí pa nos instrukshon, pa dor di pèrseveransia i e enkurashamentu di Skrituranan nos por tin speransa” (Rom. 15:4). Esei ta inkluí loke a skirbi tokante Jonás.

Ora E tabata aki, Hesus a ministrá no solamente na esnan den e siudatnan di Israel sino na esnan den regionnan strañero tambe; es desir, na esnan pafó di e nashon hudiu i e pueblo skohí.

E siman akí nos lo studia e storia di Beibel di Kristu su mishon na Tiro i Sidon i saka lèsnan pa apliká na nos bida awe.

* Studia e lès di e siman akí pa prepará pa Sabat, 16 di desèmber.

Nos ta lesa ku Hesus a saka su disipelnan for di Genesarèt (Mat. 14:34) i “a retirá bai na e distrito di Tiro i Sidon” (Mat. 15:21). Dikon El a hiba nan di Galilea pa e lugánan pagano akí? E ta guia Su disipelnan riba e biahe di kampo akí na e fronteranan di e regionnan strañero akí pa asina nan por siña, na e lugá, loke nan no por a siña asina fásil na Galilea. E ker a siña Su disipelnan lèsnan ku lo a yuda nan pa nan yamada pa alkansá tur grupo di hende, inkluyendo hendenan di siudat.

Lesa Huesnan 3:1–6, 1 Reinan 5:1–12, i 1 Reinan 11:1–6. Kon e tekstonan akí ta yuda nos komprendé un tiki di e trasfondo di e siudatnan akí?

For di Huesnan 3:1–6, nos ta mira ku Dios tabata usa e hendenan antiguo akí pa tèst fe di e israelitanan. Desafortunadamente, e pueblo di Dios a faya e tèst, tambe, a lo ménos den e kaso akí: “i nan a tuma nan yu muhénan pa nan mes komo esposa, i a duna nan mes yu muhénan na nan yu hòmbernan, i a sirbi nan diosnan.” (Huesnan 3:6). Asina, for di prinsipio, e pueblonan akí tabata un piedra di trompeká pa Israel.

Den 1 Reinan 5:1–11, nos por mira e relashon será entre e sidonitanan i e hebreonan. Aunke riba un nivel, e lasonan ekonómiko tabata mutuamente benefisioso, sin duda ainda e paganismo i idolatria di nan sosionan komersial tabata influensiá e hebreonan negativamente.

Promé Reinan 11:1–6 ta revelá presis kon negativo e influensia ei a bira finalmente: Rei Salomon a kasa ku un prensès sidonita, ku a desvi’é. “Pasobra Salomon a sigui tras di Astoret, e diosa di e sidonionan” (1 Reinan 11:5).

Sinembargo, apesar di e historia di paganismo i idolatria, i nan influensia negativo riba e nashon skohé, Hesus ainda tabata hiba Su disipelnan na e lugánan akí. Di e forma akí El a introdusí nan den mishon urbano interkultural, konfrontando nan prehuisio i intoleransia, i a modelá pa Su siguidónan un mishon urbano holístiko na tur kultura i nashonalidat.

Hopi desafio e mishonero urbano atventista ta enfrentá, entre nan ta inkluí preokupashonnan di salú i medioambiente. Otronan lo tabata inkluí e kosto haltu di bibienda, rasismo, fanatismo, nashonalismo, i restrikshonnan riba libertat religioso i ekspreshon. No opstante, apesar di e opstákulonan akí, nos mester traha pa e siudatnan.

Kiko bo por hasi pa yuda esnan enbolbí den ministerio urbano?

Apesar di desafionan, eksterno i interno, Hesus amablemente ta ekstendé e yamada na nos pa Su mishon den e siudatnan.

Lesa Mateo 9:35–38. Kiko esaki ta siña nos tokante mishon na e multitutnan, unda ku nos topa nan?

Hesus tabata konmoví ku kompashon pa e multitutnan, manera ta haña den siudatnan. Lukas 19:41 ta deskribí kon Hesus a yora riba Herusalèm. Kisas nos no por komprendé e profundidat di e amor di Hesus pa Su yunan, asta pa e “masanan sin kara” ku ta biba den e siudatnan. Ta p’esei den Mateo 9:38 Hesus ta bisa nos pa resa, pa asina nos motibunan i kurason por ta meskos ku di djE.

Lesa Mateo 4:23–25. Ora Hesus a kuminsá Su ministerio? for di kua lugánan geográfiko e hendenan tabata bini?

Den Mateo 4:25 e multitutnan ku tabata sigui Hesus tabata bini di Galilea, di e dies siudat-estadonan di e Dekápolis te na ost; di Herusalèm; i di Hudea te na zùit. Ademas di Samaria, kua region tabata falta? E region di kosta di Tiro i Sidon, parti di Fenisia, banda di Laman Mediteráneo i nortwèst di Galilea. Awor nos ta mira pa kiko Hesus a bai na e área akí! E biahe akí na e region di Tiro i Sidon tabata un di e biahenan mishonero interkultural di Hesus.

“Despues di e enkuentro ku e fariseonan, Hesus a retirá Su mes di Capernaum, i krusando Galilea, a dirigí Su mes na e region montañoso na e fronteranan di Fenisia. Ora El a wak den direkshon wèst, E por a mira, ekstendé riba e sabana abou, e siudatnan antiguo di Tiro i Sidon, ku nan tèmpelnan pagano, nan palasionan magnífiko i merkadonan di komersio, i e hafnan yená ku barku.”—Ellen G. White, The Desire of Ages, p. 399.

Kon nos por yuda hende mira kon inútil, den i di nan mes, “nan palasionan magnífiko i merkadonan di komersio” ta, i dikon nan tin mester di Hesus?

Eruditonan bíbliko ta kere ku a skirbi e Evangelio di Mateo spesífikamente pa un oudiensia hudiu, i ku a skirbi Marko ku primeramente un oudiensia pagano den mente. Ta útil pa mantené e distinshon akí nos dilanti miéntras nos ta studia e Evangelionan.

Lesa Mateo 15:22–28 i Marko 7:24–30. Ki diferensianan bo ta mira den kon a deskribí e muhé?

Nota kon Mateo ta deskribí e mama akí, usando su nashonalidat òf rasa: kanaanita. Spiritu Santu ta guia Marko pa usa términonan adishonal pa deskribí e mama akí komo “un griego” òf “un pagano” i despues ta duna informashon adishonal: “nasé na Fenisia den pais Siria”, e úniko bia ku ta usa e término akí den Beibel.

Konsiderá kon e storia akí den Mateo 15 lo a impaktá e oudiensia primario premirá ku nan trasfondo i kosmovishon. E oudiensia di Mateo lo a mira e mama akí komo un pagano despresiá. Esaki ta bin di e eksperensia históriko di e pueblo hudiu ku e kanaanitanan komo un grupo di hende ku ta adorá ídolonan, ku nan estilo di bida i práktikanan malbado pa largu tempu tabata un piedra di trompeká pa nan nashon. Asta e disipelnan di Kristu no a konsiderá e posibilidat ku e muhé akí tabatin fe i tabata parti di e reino di Dios!

Den Marko 7, Marko su oudiensia di paganonan lo tabatin un reakshon diferente for di esun di Mateo. E paganonan no tabatin e mesun eksperensia manera e hudiunan tabatin ku e kanaanitanan. En kambio, e paganonan lo a identifiká ku e muhé akí, “un griego, un sirofenisia pa nasementu” (NKJV). Hesus a kura un di nan mes! Pa e paganonan, lo a konsiderá e muhé akí komo un mama stimá ku tabata preokupá tokante fe di su yu muhé i tabata ke pa e Maestro kur’é, independientemente di e trasfondo étniko i nashonal di e mama akí.

“Kristu no a kontestá e muhé su petishon inmediatamente. El a risibí e representante akí di un rasa despresiá manera e hudiunan lo a hasi. Den esaki E tabata ke pa Su disipelnan lo a keda impreshoná ku e manera friu i insensitivo den kua e hudiunan lo a trata un kaso asina, manera Su resepshon di e muhé a demostrá, i e manera miserikòrdioso den kua E lo tabata ke pa nan lidia ku un angustia asina, manera ta manifestá pa Su konseshon posterior di su petishon.”—Ellen G. White, The Desire of Ages, p. 400.

Lesa 1 Juan 2:2. Kiko e teksto akí mester bisa nos tokante kon nos tur ta meskos dilanti di Dios?

Den e besindario no alkansá di e siudatnan, tin hopi hende ku ta anhelá pa speransa. Durante tempu di Kristu, kiko a prevení e pueblo di Dios di trese speransa di e Mesias na siudatnan strañero manera Tiro i Sidon? Nashonalismo, orguyo, i prehuisio a siega e pueblo di Dios pa e oportunidatnan pa mira esnan mas serka di nan ku tabata anhelá pa e speransa predesí pa e profesianan di e Promé Atvènt. Awe den e siudatnan, tin hopi grupo di poblashon ku ken Hesu-Kristu ke Su pueblo kompartí e “speransa bendishoná” di e Segundo Atvènt (Tito 2:13). I meskos ku Hesus no tabata preokupá kiko nan nashonalidat òf rasa tabata, nos tampoko mester hasi esei.

Lesa Echonan 10:9–16, 28, 34, 35. Kon lo bo a resumí e lès ku Spiritu Santu ta siña akinan?

Miéntras e tabata warda riba almuerso, Pedro a haña un vishon di un bufèt kompletu riba dak, ku un paña di mesa yená ku animalnan i paranan impuru. Tres biaha a bis’é den e vishon akí pa lanta i kome. Dios a usa e vishonnan akí pa konfrontá Pedro su orguyo religioso i intoleransia kontra e paganonan. Finalmente Pedro a komprendé e bèrdat akí: “Di bèrdat mi ta komprendé awor ku Dios no ta hasi distinshon di persona, ma den tur nashon e hende ku ta tem'E i ku ta hasi hustisia ta aseptabel p'E” (Echonan 10:34,35).

Ku e antesedentenan akí, laga nos reflekshoná riba nos storia pa lèsnan di Tiro i Sidon. Wak Hesus atrobe i Su interakshon ku e mama. Ki lèsnan e disipelnan a siña for di e ekskurshon akí ku tambe tabata relashoná ku e vishon di Pedro? Kon nos por apliká esakinan na nos bida awe i na e yamada di último dia di Kristu na Su mishon na e siudatnan? Kua prehuisionan ta stroba nos di mira e nesesidatnan di siudadanonan? Kua oportunidatnan Dios a proveé na nos den e siudatnan, pa ekspandé nos komprenshon di mishon, i konfrontá kuidadosamente nos intoleransia, nashonalismo, i orguyo spiritual?

Ku pasenshi Hesus a siña Su disipelnan, ku no tabata komprendé kompletamente ku Dios su gran plan di salbashon tabata pa henter e famia humano, no solamente un nashon òf grupo étniko rural. Spiritu Santu por yuda nos vense nos prehuisio i toleransia pa asina kompletá nos mishon na e siudatnan.

Lesa Galatanan 2:11–13. Kiko esaki mester siña nos tokante kon difísil por ta pa purifiká nos di e prehuisionan ku a siña nos for di infansia?

Den Lukas 18:8, Hesus ta hasi e pregunta akí na final di un di Su parabelnan: “ ‘Sinembargo , ora ku e Yu di Hende bin, lo E haña fe riba mundu?’ ”. Komo disipelnan di Kristu awe, nos mester mira loke Hesus ta buskando. Den e storia akí, nos por mira ku Hesus ta buskando fe ku ta bria asta meimei di skuridat.

Lesa Mateo 8:10, 13; Mateo 9:2; Mateo 20:29–34; Marko 2:5; Marko 10:46–52; i Lukas 18:35–43. Den e pasashinan akí, ken Hesus ta deskribí ku tin fe?

E lista akí ta inkluí hendenan ku fe ku a bria asta den siudatnan skur. Na Capernaum, Hesus ta enfatisá vários hende ku fe. Den Mateo 8:10, 13, nos ta mira un senturion pagano kombertí ku gran fe. Nos ta topa kuater amigu yená ku fe, ku a kibra e dak pa trese nan amigu paralisá serka Hesus (Mat. 9:2, Marko 2:5). Den Marko 10 nos ta topa e hòmber ku anteriormente tabata siegu, Bartimeo, ku su fe ta bria kla den Yériko.

Na mes momento, nos lo a spera ku meimei di e pueblo di Dios lo tabatin un gran fe. Sinembargo, asta den e siudat natal di Hesus, Názarèt, tiki fe, òf asta inkredulidat apsoluto, tabata e faktor limitante pa e ministerio di Kristu. Meimei di Su disipelnan, vários biaha Hesus a bisa di Israel: “O abo, [hende] di poko fe” (Mat. 6:30, Mat. 8:26, Mat. 14:31, Mat. 16:8) . I den Mateo 17:17 Hesus ta sklama: “O generashon inkrédulo i pèrvèrso”!

Un lès ku nos por apliká na dje awe ta ku ta haña fe den lugánan inesperá: den e siudatnan meimei di strañeronan, paganonan, i hendenan ku diferente religion. Den humildat, nos mester bai den e siudatnan manera Hesus a hasi, buskando esnan ku, ora presentá nan e bèrdat, lo respondé ku un fe salbador den Hesus. I di bèrdat nan ta eifó.

Desafio: Habri bo kurason den orashon pa un porshon di fe mas grandi ku kua bo ta kompartí bo amor pa esnan serka i leu.

Desafiá: Kon bo a yega na konosé Hesus i e presioso mensahenan di e tres angelnan? Traha un lista di tres bendishon spiritual ku bo a eksperensiá for di Hesus den bo bida personal. Prepará pa kompartí e konseptonan akí ku bo klas di Sabat Skol.

“Entre esnan ku e hudiunan tabata yama pagano tabatin hòmbernan ku tabatin un mihó komprendementu di e profesianan di Skritura tokante di e Mesias ku e maestronan na Israel tabatin. Tabatin algun ku tabata spera riba Su binida komo un libertador for di piká. Filósofonan a hasi esfuerso pa studia e misterio di ekonomia hebreo. Pero e intoleransia di e hudiunan a stroba plamamentu di e lus.”—Ellen G. White, The Desire of Ages, p. 33.

“Señor Hesus, e Salbador poderoso, a muri pa e almanan akí. E por lanta nan for di nan indiferensia, E por spièrta nan simpatianan, E por suavisá nan kurason, E por revelá na nan alma e bunitesa i poder di e bèrdat. E Maestro obrero ta Dios, i no hende finito; i tòg E ta yama hende pa ta agentenan a traves di ken E por impartí lus na esnan den skuridat. Dios tin hoyanan den tur e iglesianan, i no ta na nos pa hasi denunsia drástiko di e mundu religioso profeso, ma den humildat i amor, presentá na tur e bèrdat manera e ta den Hesus. Laga hende mira piedat i deboshon, laga nan kontemplá semehansa di Kristu den karakter, i nan lo ser halá na e bèrdat. . . . Nan mester halsa Hesus, e Redentor di mundu; nan mester ekstendé e palabra di bida.”—Ellen G. White, The Advent Review and Sabbath Herald, 17 di yanüari 1893.

Preguntanan pa Diskushon:

Lesa e palabranan di Ellen G. White aki riba respekto esnan di otro fe: “Dios tin hoyanan den tur e iglesianan, i no ta na nos pa hasi denunsia drástiko di e mundu religioso profeso.” Den otro palabra, kon nos por mustra hende e eror di nan kamindanan miéntras, na mes momento, no denigrá e hendenan personalmente?

Ki sorto di komportashon ta rekerí di un kristian pa konstruí brùgnan ku hendenan den e siudat (i frankamente, kualke otro kaminda) ku no konosé Dios?

“ ‘Sinembargo , ora ku e Yu di Hende bin, lo E haña fe riba mundu?’ ” (Lukas 18:8). Kiko Hesus ke men ku e pregunta retóriko akí? Kua ta e diferensia entre fe i kreensia? Dikon kisas por haña hende, ku tin e kreensia korekto, ku falta di fe ora Hesus regresá?