Fin di e Mishon di Dios

23 di desèmber

Lesa pa e Estudio di e Siman Akí:

Rev. 1:1–7; 1 Pe. 2:9; Rev. 14:6–12; Lukas 11:23; 1 Tim. 2:4; Rev. 21:1–4.

Versíkulo di Memoria:

“Komo ku tur e kosnan aki lo wòrdu destruí di e manera aki, ki sorto di hende boso mester ta den un kondukta santu i deboto, sperando i purando e binida di e dia di Dios ...” (2 Pedro 3:11,12, NKJV).

E buki di Revelashon ta yena e mente ku esenanan di e fin. E episentro di e buki ta trata ku e konflikto kósmiko entre Kristu i Satanas. Satanas a pèrdè su gara legal riba tera, i awor e ta persiguí esnan ku ta permanesé leal na Dios. E buki ta kulminá ku e regreso di Hesus pa libra Su yunan, tantu e hustunan bibu komo esnan fiel ku a muri desde e kaida di Adam i Eva. E buki ta mustra nos, tambe, e destrukshon di Satanas i e malbadonan pa medio di kandela, i Hesus su establesimentu di Su reino eterno riba tera hasí nobo.

Studiantenan di Revelashon ta eksplorá ku entusiasmo i ta buska pa identifiká e señalnan i eventonan predesí ku ta marka historia di iglesia for di siglo 1 A.D. te na nos dia den fin di tempu. Nan tin rason pa hasié, tambe.

Sinembargo, den e último lès di e kuartal akí, nos lo mira ku Revelashon ta un buki mishonero enfoká riba un Dios mishonero ku ta yamando nos pa ta un iglesia mishonero. Nos yamada pa proklamá “bèrdat presente” na e mundu lo eksistí te ora ku tur a hasi eskoho pa òf kontra Dios.

* Studia e lès di e siman akí pa prepará pa Sabat, 30 di desèmber.

E promé liñanan di Revelashon ta indiká na e lesadó ku e buki akí ta enfoká riba e mishon di Dios.

Lesa Revelashon 1:1–7. Den ki forma bo ta mira evidensia ku Revelashon ta enfoká riba e mishon di Dios den e último dianan?

Despues di a revelá den e promé versíkulonan ku Hesus ta e fuente di Revelashon, Revelashon 1:4, 5 ta referí na tur tres miembro di e Deidat, ku ta trahando uní pa salba sernan humano. E Tata ta esun eterno kende tabata i ta i tin ku bin. Ta menshoná Spiritu Santu, kende ta obrando poderosamente meimei di e iglesianan di promé siglo. Despues Juan ta rekordá e status di Hesu-Kristu, e “testigu fiel”, “e primogénito di e mortonan” (Rev. 1:5), kende ta poseé propiedat legal di e planeta akí. E intento di Satanas pa usa e tera akí pa establesé su reino ta ruiná. Ademas di e viktoria di Dios riba Satanas, e sanger dramá di nos Kreador ta laba nos kulpa i bèrgwensa.

Lesa Revelashon 1:6 i 1 Pedro 2:9. Kiko e títulonan pa esnan redimí den e versíkulonan akí ta nifiká?

E enfoke di Dios su mishon no ta simplemente pa lastra hendenan ku ta peresé hiba na un lugá sigur. E salbashon di Dios ta ofresé un status nobo i honorabel, pasobra e imágen di Dios ta ser restourá den nos. Esnan redimí ta bira realesa (reinan) pasobra nos ta relashoná pa sanger ku e Rei di universo a traves di e sanger dramá di Hesus. Awor, komo miembronan di famia real, nos ta uni ku e mishon di e famia real den salbashon di otro sernan humano. Esaki ta hasi nos saserdotenan! Esaki ta hasi nos saserdotenan! Kristu a konstituí Su iglesia komo “reino” i su miembronan individual “saserdotenan”. Pa ta un miembro di e reino ta: ser saserdote.

Den Revelashon 1:7 nos ta haña e urgensia di mishon: Hesus ta biniendo, i e nashonnan lo lamentá pasobra nan ta pèrdí. Dios ta anhelá na esnan ku ta alehá for di djE.

E buki di Revelashon ta habri, despues, ku e mishon di Dios pa sernan humano.

No solamente Dios a krea nos, sino El a redimí nos, i na un preis asina asombroso tambe. Dikon e bèrdat akí mester duna nos asina tantu speransa, no importá nos situashon aktual?

E buki di Revelashon ta duna nos un representashon poderoso i gráfiko di e tema di e gran konflikto, kisas di forma mas dramátiko deskribí den Revelashon 12:12: “Pa e motibu akí, regosihá, O shelunan i boso ku ta biba den nan. Ai di tera i laman, pasobra diabel a baha bin serka boso ku gran furia, sabiendo ku ta ked'é solamente un poko tempu mas”. Ta difísil pa imaginá kon kualke hende por komprendé kualke kos den Skritura aparte di e motibu di e gran konflikto, ku lo kulminá den e último dianan.

Lesa Revelashon 14:6–12. Kiko ta deskribí aki, i kiko e versíkulonan akí tin di aber ku nos mishon i mensahe?

Sentral na mishon, e mishon di Dios, tin e mensahe, e mensahe di Dios: e evangelio. E mensahe, den un sentido real, ta e mishon. Mester spièrta mundu tokante loke ta biniendo riba dje, i lo fòrsa tur hende pa hasi un eskoho, un eskoho sea pa bida òf pa morto.

“Esun ku no ta ku Mi ta kontra Mi; i esun ku no ta rekohé huntu ku Mi ta plama” (Lukas 11:23). Kiko Hesus ta bisando aki ku ta trata asina direktamente ku nos mishon?

E mensahenan di e tres angelnan di Revelashon 14 ta forma e núkleo, e kurason, di loke a yama nos komo atventistanan di shete dia pa proklamá na e mundu. Sentral na dje, fundamental na dje, tin dos tema: “e evangelio eterno” (Rev. 14:6) i adorashon di e Kreador. E dos temanan akí ta aparesé den e deskripshon akí di e santunan: “At'aki e pèrseveransia di e santunan ku ta warda e mandamentunan di Dios i nan fe den Hesus” (Rev. 14:12). No importá kiko mas nos hasi, tur e bon ku nos hasi yudando otronan, nunka nos mester pèrdè nos yamada spesial i mishon for di bista, kua ta pa proklamá na un mundu pèrdí e speransa hañá den e “evangelio eterno”, komo tambe pa spièrta mundu di loke lo bin riba dje un dia.

“ ‘Esun ku no ta ku Mi ta kontra Mi’ ” (Lukas 11:23). Kon bo ta komprendé loke Hesus ta bisando nos aki? Dikon e palabranan akí mester pone nos saminá unda nos kurason ta realmente?

Hesus a bisa Su disipelnan i nos: “ ‘P'esei, bai i hasi tur e nashonnan disipel di Mi, i batisá nan den nòmber di e Tata i di e Yu i di e Spiritu Santu, i siña nan pa kumpli ku tur loke Mi a ordená boso; i mira, Mi ta ku boso semper, te na fin di mundu’ ” (Mat. 28:19, 20). Esaki ta e Gran Komishon, i den hopi forma e mensahe di e tres angelnan, ku un yamada pa “tur nashon i tribu i lenga i pueblo” (Rev. 14:6), ta simplemente e ekspreshon di e “bèrdat ku boso tin awor” (2 Pe. 1:12) di e Gran Komishon.

Lesa 1 Juan 4:8, 2 Pedro3:9, 1 Timoteo 2:4, i Génesis 12:3. Dikon tur grupo di hende ta importá pa Dios?

E amor di Kristu ta pa henter humanidat, sin niun grupo di hende ekskluí. Kontrali na e teologia ku ta siña ku Kristu a muri solamente pa un élite predestiná, Beibel ta kla ku e morto di Kristu tabata pa tur hende, independientemente di rasa, etnisidat, òf kualke otro faktor. Si bo ta un ser humano, Kristu a muri pa bo. Punto. E úniko pregunta ku ta keda pa tur hende ta: Kon bo ta respondé na Su morto?

Ora Hesus regresá, lo tin solamente dos kampo habrí: esnan ku a someté na e outoridat di Satanas a traves di institushonnan religioso i polítiko manera mustrá den Revelashon 13 i 17, i esnan ku a someté totalmente na Hesu-Kristu, ku nan fe a manifestá pa medio di nan wardamentu di “e mandamentunan di Dios” (Rev. 14:12).

Desde prinsipio, sernan humano tabatin evidensia di kon Dios ta i di Su forma di hustisia i amor (Rom. 1:18–21). P’esei lo husga tur ser humano for di siglonan pasá basá riba kon nan a koperá ku Dios i a biba nan bida, independientemente di kuantu nan a i no a komprendé (Rom. 2:11–16).

Pero den e tempu akí di fin, tin un polarisashon kresiente, i lo no respetá libertat di konsenshi mas. Lo preshoná hende pa aliniá nan mes ku e partido di Satanas. Ta urgente pa proklamá e evangelio i eksponé e notisia serio tokante e strategianan di Satanas. I di esei eksaktamente e mensahenan di e tres angelnan i nos mishon ta trata.

Reflekshoná riba e echo ku Kristu a muri pa bo personalmente. Kiko posiblemente lo por a pone bo pensa ku kualke kos ku bo a hasi, no importá kon malu, lo no por a paga sufisientemente p’e pa medio di e morto di Kristu riba krus?

Kiko ta éksito den mishon? Nos lo por ta tentá pa pensa ku esaki ta hopi boutismo, iglesianan grandi, i tasanan di kresementu rápido. Nos lo por ta sinti ku éksito ta konsistí di drenta tur tribu i grupo di hende riba tera ku e bèrdat i ku nos por aseler’é usando radio, internèt, i televishon. Miéntras tur esaki por ta bon, nos mester kòrda loke Pablo a skirbi na e komunidat di fe na Korinto: “Ami a planta, Apolos a muha, ma ta Dios a duna kresementu” (1 Kor. 3:6). Den otro palabra, nos enfoke mester ta riba e proseso; Dios su enfoke lo ta riba e kresementu.

Ya nos a mira ku e opheto di Dios su mishon ta pa salba esnan pèrdí den tur grupo di hende riba tera, hasiendo nan disipelnan leal di Hesus kende ta enbolbí den Su mishon.

Lesa e siguiente tekstonan. Kiko nan ta bisa nos tokante e karakter di esnan ku bira siguidónan di Hesus?

Disipelnan di Hesus ta puru, permanesiendo leal na Hesus manera un brùit puru lo tabata na su prometido. Nan ta sigui Hesus miéntras E ta guia nan pa medio di e bos chikitu di Spiritu Santu. Esaki ta inkluí guia nos den obra mishonero pa otronan. No tin engaño den e disipelnan akí. Duda debilitante, siñansanan falsu, òf inmoralidat no ta desviá nan. I nan no ta sinti nan mes moralmente superior na otronan. Nan ta rekonosé ku nan ta imperfekto, rekiriendo Dios su grasia i miserikòrdia purifikadó. Ora nan komprendé esaki, nan ta habrí tambe pa risibí korekshon i instrukshon di otro kreyentenan. Eksito den mishon ta resultá den hasi e tipo di disipel akí.

Kiko ta nifiká pa ta un “bírgen puru pa Kristu” (2 Kor. 11:2)? Kon nos, komo pekadornan, por ta esaki dilanti di Dios i mustra otronan pa bira bírgennan puru pa Kristu tambe?

Lesa Revelashon 21:1–4 i Revelashon 21:22–22:5. Kiko e esena deskribí akinan ta?

Ki un paraiso e tera nobo lo ta! Morto i piká lo a bai, Satanas i maldat destruí. Nos lo topa nos Salbador amoroso i reuní ku sernan kerí. I e tera nobo lo ta poblá ku representantenan for di tur etnisidat i idioma.

E Hunta di Mishon di Asosiashon General a aprobá estadístikanan di Mishon Global ku por usa pa determiná ku sea un pueblo ta alkansá òf no alkansá. Un “pueblo alkansá” ta unu ku tin kantidatnan i rekursonan adekuá pa testifiká efektivamente na restu di e grupo, sin rekerí asistensia eksterno; e tin servisionan di adorashon, Beibelnan, i otro literatura den nan lenga materno; i tin lidernan di iglesia indígena ku por testifiká na restu di e pueblo sin traha a traves di un traduktor.

Un “pueblo no alkansá” ta unu ku no tin un komunidat indígena di atventistanan kreyente ku kantidatnan i rekursonan adekuá pa testifiká efektivamente na nan mes grupo, sin asistensia di pafó di nan kultura.

Kada iglesia i konferensia lokal mester determiná e pueblo den nan komunidat ku mester alkansá. Awor ta e momento pa invertí den Dios su mishon di hasi disipel den tur pueblo, purando e regreso di nos Salbador i, al final, biba huntu ku nan den e shelu nobo i tera nobo ku ta primintí na nos aki.

Desafio: Kon bo ta purando e regreso di Kristu? Bo ta plantando simianan di speransa den kurason di esnan ku mester tende e bon notisia? Bo ta “muhando” kreyentenan nobo yudando nan siña loke ta nifiká biba un bida di obediensia leal na Kristu? Resa pa oportunidatnan pa komuniká e promesa di e tera hasí nobo ku e hendenan riba bo lista di orashon diario.

Desafiá: Algun di bo “disipelnan” por ta kla pa aseptá Kristu. Esaki ta inkluí uni na un iglesia òf grupo di kreyente. Pone bo mes den su lugá i imaginá bo asistiendo na bo iglesia pa promé bia. Ki tipo di eksperensia lo e tabatin? Kon prepará bo iglesia ta pa duna bonbiní i disipulá hendenan nobo? Bo ta habrí pa kuminsá gruponan nobo di kreyentenan, no solamente edifiká bo mes iglesia eksistente? Krea un strategia pa dil ku áreanan débil. Kompartí bo pensamentunan ku bo liderazgo di iglesia, i traha huntu ku nan pa implementá un plan pa bira un iglesia, ku ta hasi disipel di un manera mas intenshonal.

“E gran plan di redenshon ta resultá den trese e mundu kompletamente bèk den fabor di Dios. Tur loke a pèrdè a traves di piká, ta restourá. No solamente hende sino e tera ta redimí, pa ta e lugá di biba eterno di esnan obediente. Pa seis mil aña Satanas a lucha pa mantené poseshon di tera. Awor e propósito original di Dios den su kreashon ta kumplí. ‘E santunan di e Haltísimo lo tuma e reino, i ta poseé e reino pa semper, asta pa semper i semper.’ ”—Ellen G. White, Patriarchs and Prophets, p. 342.

Pero promé ku esei por bira realidat, ta nos deber pa ta sosio di Dios den Su mishon pa alkansá mundu ku e mensahe di spièrtamentu, pa asina hende por aseptá i ta parti di Dios su promesa di rekreashon.

“Mi ta anhelá pa mira masha hopi trahadó na trabou pa esnan ku no konosé e evidensianan di nos fe. Hopi a risibí gran lus a traves di tende e mensahenan di e tres angelnan, i awor nan mester proklamá e mensahenan akí den tur parti di mundu. Mi ta deseá di hasi mi parti pa habri kaminda pa otronan karga e lus di bèrdat. Ku Señor por yuda nos bisti e armadura. E kreyentenan mester uni den e obra solèm di duna e último nota di spièrtamentu na e mundu.”—Ellen G. White, Karta 390, 1907 (no publiká).

A lo largu di e kuartal akí nos a studia vários aspekto i tema relashoná ku e mishon di Dios. E siman akí nos a konkluí nos estudio eksplorando e klavenan di Revelashon pa komprendé kon un relashon restourá ku Dios ta, i el a kulminá ku un vishon di e mishon kumplí, e rekreashon i restourashon di e tera. Miéntras ta bèrdat ku e destrukshon di piká i sufrimentu lo ta e dianan di mas angustioso di historia di tera, Dios ta tira nos vishon te na un tempu mas ayá di e destrukshon akí i ta proveé konsuelo i ánimo den e promesa di e tera restourá.

Preguntanan pa Diskushon:

Kiko ta e “evangelio eterno”? Dikon e ta “eterno”? I dikon loke e ta siña mester ta fundamental pa nos mishon?

Dikon nos tin asina un énfasis riba e mensahe di e tres angelnan? Kon bo ta reakshoná riba e argumento ku nos mester focus riba Hesus i no riba algu asina supuestamente “negativo” manera e mensahenan akí, ku ta inkluí spièrtamentunan hopi fuerte?

Kon e kuartal akí a yuda bo komprendé no solamente e importansia di mishon mihó sino kon abo i bo iglesia lo por partisipá mihó den dje, kua ta loke a yama nos pa hasi?