Bo Mizerikòrdia ta Alkansá Te na e Shelunan

10 di febrüari

Lesa pa e Estudio di e Siman Akí:

Salmo 136; Salmo 51; Salmo 130; Salmo 113; Salmo 123.

Versíkulo di Memoria:

“Lo mi alabáBo, O Señor, meimei di e pueblonan; lo mi kanta alabansa na Bo meimei di e nashonnan. Pasobra Bo mizerikòrdia ta grandi te na e shelunan, i Bo bèrdat te na e nubianan” (Salmo 57:9,10, NKJV).

E salmistanan ta realisá ku nan ta spiritualmente pober i no tin nada bon pa ofresé na Dios; es desir, nan no tin nada den i di nan mes ku lo a rekomendá nan dilanti di e trono santu di Dios (Salmo. 40:17). Nan ta komprendé ku nan, manera nos tur, tin mester di grasia, e grasia di Dios.

Den algun palabra, nan tin mester di e evangelio.

E Salmonan ta enfatisá e echo ku hende ta totalmente dependiente riba e mizerikòrdia di Dios. Afortunadamente, e mizerikòrdia di Dios ta eterno, manera ta opvio den tantu e kreashon di Dios komo e historia di e pueblo di Dios (Salmo 136). Dilanti di e Dios eterno, bida humano ta mes transitorio ku yerba, pero Dios tin duele di hende i ta renobá nan forsa (Salmo 103:3,5,15), i den djE nan tin e promesa di eternidat.

E pueblo di Dios ta konsolá su mes ku e echo ku Señor ta fiel na Su pakto. E yamamentunan di e pueblo, no importá kon insistente nan ta tin biaha, hopi biaha ta yená ku speransa pasobra nan ta dirigí na nan Tata selestial miserikòrdioso (Salmo 103:13, Salmo 68:5, Salmo 89:26). Eksperensianan fresku di e grasia i amor di Dios ta fortalesé nan resolushon pa adorá i sirbi Dios, i niun hende òf nada mas.

* Studia e lès di e siman akí pa prepará pa Sabat, 17 di febrüari.

Lesa Salmo 136. Kua pensamentu ta prevalesé den e Salmo akí? Unda e salmista ta haña evidensia pa su afirmashon prevalesiente?

Salmo 136 ta konvoká e pueblo di Dios pa alabá Señor pa Su mizerikòrdia manera e ta revelá den kreashon (Salmo 136:4−9) i den historia di Israel (Salmo 136:10−22). “Mizerikòrdia” (hebreo khesed, “amor firme”) ta transmití Dios su bondat i lealtat na Su kreashon i na Su aliansa ku Israel. E Salmo ta mustra ku Dios su poder i grandesa enorme ta basá riba Su amor firme.

Señor ta “e Dios di diosnan” i “Señor di señornan”, ku ta un modismo hebreo ku ta nifiká “e Dios di mas grandi” (Salmo 136:1–3), no ku tin otro diosnan sino ku E ta e úniko Dios.

E gran maravianan di Señor, ku niun hende mas por repliká, ta e demostrashon innegabel di Su dominio (Salmo 136:4). Dios a krea e shelunan, tera, i e astronan, ku e paganonan ta adorá (Deut. 4:19). E Salmonan, sinembargo, ta kita outoridat for di e diosnan pagano, i pa ekstenshon tur fuente di konfiansa humano. Nan ta djis produktonan di kreashon. Nan ta meramente kosnan kreá, no e Kreador, un distinshon krusial.

E imágen di Señor su man fuerte i brasa ekstendé (Salmo 136:12) ta enfatisá e efikasia di e poder di Dios i e dominio amplio di Su mizerikòrdia.

Dios su mizerikòrdia den kreashon i historia mester inspirá Su pueblo pa konfia den djE i pa keda fiel na Su aliansa. Ta ripití e refran “Pasobra Su mizerikòrdia ta pa semper” 26 biaha den e Salmonan, segurando e adoradónan asina ku Señor no ta kambia i lo ripití Su fabornan di pasado na kada generashon nobo. Dios ta kòrda riba Su pueblo (Salmo 136:23) i ta fiel na Su pakto di grasia. E kreensia den Señor su mizerikòrdia eterno ta den sentro di fe bíbliko, ku ta inkluí adorashon alegre i konfiansa, komo tambe reserva i repentimentu.

Salmo 136 (v. 23–25) ta sera ku Dios su kuido universal pa e mundu. E mizerikòrdia di Dios ta ekstendé no solamente na Israel sino na henter kreashon. E Salmo pues ta papia di e universalidat di Dios su grasia salbador i ta amonestá henter mundu pa uni ku Israel su alabansa di Señor (lesa tambe Lukas 2:10, Juan 3:16, Echonan 15:17).

Kon e imágen di Hesus riba e krus, muriendo komo un Sustituto pa nos pikánan, ta revelá di forma mas poderoso e gran bèrdat tokante Dios, ku “Su amor ta pa semper”?

Lesa Salmo 51:1–5. Dikon e salmista ta apelá na e mizerikòrdia di Dios?

Rei David ta drama su kurason dilanti di Señor, pidiendo pa pordon di piká durante e momentonan di mas skur spiritualmente den su bida (2 Samuel 12). Pordon ta e don ekstraordinario di grasia di Dios, resultado di e “multitut di Bo tierno mizerikòrdianan” (Salmo 51:1, NKJV). Rei David ta apelá na Dios pa atendé kuné, no di akuerdo ku loke su piká meresé (Salmo 103:10) sino di akuerdo ku Su karakter divino, es desir, Su mizerikòrdia, fieldat, i kompashon (Salmo 51:1; Eks. 34:6,7).

Lesa Salmo 51:6–19. Kon ta deskribí pordon di piká akinan? Kua ta e meta di pordon divino?

Pordon divino ta envolví mas ku un proklamashon legal di inosensia. E ta produsí un kambio profundo ku ta alkansá e partinan di mas interno di e ser humano (Salmo 51:6, Hebr. 4:12). E ta produsí un kreashon nobo (Salmo 51:10, Juan 3:3–8). E verbo hebreo bara’, tradusí “krea”, ta deskribí poder kreativo divino (Gén. 1:1). Solamente Dios por bara’; solamente Dios por produsí un kambio radikal i duradero den kurason di e persona ku repentí (2 Kor. 4:6).

David ta pidi purifikashon ku hisopo (Lev. 14:2–8, Salmo 51:7). E ta sinti ku su kulpa ta ten’é desterá for di presensia di Señor, di mes manera ku e leproso ta desterá for di e komunidat miéntras e estado di impuresa ta dura (Salmo 51:11). E ta teme ku sakrifisio no por restour’é kompletamente pasobra no tabatin niun sakrifisio ku por a ekspiá pa su pikánan premeditá di adulterio i asesinato (Eks. 21:14, Lev. 20:10).

Solamente grasia divino inkondishonal por a aseptá David su “kurason repentí i kibrá” komo un sakrifisio i restourá David bèk den harmonia ku Dios (Salmo 51:16, 17). Pidiendo purifikashon ku hisopo, e ke bai bèk na e presensia di Dios.

Si Dios por pordoná David pa adulterio, engaño, i asesinato, ki speransa ta eksistí pa bo?

Lesa Salmo 130. Kon ta deskribí e gravedat di piká i speransa pa pekadornan?

E gran aflikshon di e salmista ta relashoná ku e pikánan di e mes i di su pueblo (Salmo 130:3,8). E pikánan di e pueblo ta asina grave ku nan ta menasá di separá e pueblo for di Dios pa semper (Salmo 130:3). Skritura ta papia di e registronan di pikánan ku ta warda pa e Dia di Huisio (Dan. 7:10, Rev. 20:12) i di nòmbernan di pekadornan ku ta kita for di e buki di bida (Eks. 32:32, Salmo 69:28, Rev. 13:8).

E salmista pues ta apelá na e pordon di Dios, ku lo eradiká e registro di pikánan (Salmo 51:1,9; Jer. 31:34; Mik. 7:19). E sa ku “Dios no ta rabiá pa naturalesa. Su amor ta eterno. Su ‘rabia’ ta lanta solamente pa motibu di hende su fayo di apresiá Su amor. . . . E propósito di Su rabia no ta pa heridá, sino mas bien pa sana hende; no pa destruí sino pa salba su pueblo di pakto (lesa Oseas 6:1, 2).”—Hans K. LaRondelle, Deliverance in the Psalms (Berrien Springs, MI: First Impressions, 1983), p. 180, 181. Ta remarkabel ku, ta Dios su disponibilidat pa pordoná piká, i no pa kastigá nan, ku ta inspirá reverensia di Dios (Salmo 130:4, Rom. 2:4). Adorashon outéntiko ta konstruí riba atmirashon di e karakter di amor di Dios, no riba miedu di kastigu.

E yunan di Dios ta yamá pa spera riba Señor (Salmo 27:14, Salmo 37:34). E qawah hebreo, “spera”, ta nifiká literalmente “rèk”, i ta e rais di e palabra hebreo pa “speransa”. Pues, spera riba Señor no ta un sumishon pasivo na sirkunstansianan miserabel sino mas bien un “rèkmentu” yen di speransa òf antisipashon ansioso di e intervenshon di Señor. E speransa di e salmista ta basá no riba su optimismo personal, sino den e Palabra di Dios (Salmo 130:5). Spera fielmente riba Señor no ta en bano, pasobra, despues di e anochi skur, e mainta di liberashon divino ta yega.

Wak kon e súplika personal di e salmista ta bira esun di henter e komunidat (Salmo 130:7,8). E bienestar di e individuo ta inseparabel for di esun di henter e pueblo. Pues, un hende no ta resa solamente pa e mes sino pa e komunidat. Komo kreyentenan, nos ta parti di un komunidat, i loke ta impaktá un parti di e komunidat ta impaktá tur hende.

Pensa riba e pregunta: “Si Abo, SEÑOR, tuma inikidatnan na kuenta, O Señor, ken lo por a keda para?” (Salmo 130:3) . Kiko esei ta nifiká pa bo personalmente? Unda lo bo tabata si Señor tabata kòrda bo pikánan?

Lesa Salmonan 113 i 123. Kua dos diferente aspektonan di e karakter di Dios ta deskribí den e Salmonan akí?

Salmonan 113 i 123 ta alabá tantu e mahestat komo mizerikòrdia di Señor. E mahestat di Señor ta revelá den e grandesa di Su nòmber i den e lugá eksaltá di Su trono, ku ta riba tur nashon i riba e shelunan (Salmo 113:4,5; Salmo 123:1). “Ken ta manera SEÑOR nos Dios” (Salmo 113:5) ta un deklarashon di fe ku niun poder denter òf pafó di e mundu por desafiá e Dios di Israel.

E echo ku Señor ta dispuesto pa “humiá Su mes” òf “ta wak te den fondo abou pa mira shelu i tera” ta ilustrá e halturanan inalkansabel kaminda Señor ta biba (lesa Salmo 113:6, NIV, énfasis añadí). Dios su bibamentu riba haltura no ta previniE di mira loke ta sosodiendo akibou. E mizerikòrdia di Señor ta manifestá su mes den Su disposishon pa ta envolví ku e mundu i pa salba esnan den nesesidat i pober di nan problemanan. Su man generoso opviamente no ta skondí pa Su sirbidónan, aunke Su lugá di biba ta den shelunan leu.

E grandesa i kuido di Dios, ku no por diserní kompletamente den e transendensia asombroso di Dios, ta bira eksplísito den Dios su aktonan di mizerikòrdia i kompashon. Esnan den nesesidat, e pobernan, i esnan oprimí kisas por eksperensiá di bon fuente Dios su poder soberano den e invershonnan notabel ku E por realisá na nan fabor. E Dios eksaltá ta manifestá Su grandesa usando Su poder pa eksaltá esnan abatí. E hendenan ta liber pa aserká Señor pasobra Su mahestat i supremasia soberano no ta kambia e echo ku E ta nan miserikòrdioso Kreador i Sostenedó i ku e hendenan ta Su sirbidónan, Su yunan stimá.

Adorashon ta, por lo tantu, motivá, no solamente pa Dios su grandesa sino tambe pa Su bondat. Alabansa no ta limitá pa tempu i espasio (Salmo 113:2,3). E grandesa i mizerikòrdia di Dios ta keda mihó manifestá den Hesu-Kristu, ku tabata dispuesto pa baha bin abou for di shelu i laga bah’E tan abou manera morto riba krus, pa asina halsa humanidat kaí (Fil. 2:6−8). Aki, den e krus, nos tin e rasonnan di mas grandi posibel pa adorá i alabá Dios pa loke El a hasi pa nos.

Reflekshoná riba e krus i loke a sosodé aya pa bo personalmente. Di kiko Hesus a salba bo? Dikon ta asina importante pa mantené e krus na promé lugá den bo mente?

Lesa Salmo 103. Kon ta deskribí e mizerikòrdia di Dios akinan?

Salmo 103 ta numerá e múltiple bendishonnan di Señor. E bendishonnan ta inkluí “tur Su benefisionan” (Salmo 103:2) pa un bida ku ta floresé (Salmo 103:3−6). E bendishonnan akí ta basá riba e karakter miserikòrdioso di Dios i den Su fieldat na Su aliansa ku Israel (Salmo 103:7−18). Señor ta “kòrda” fragilidat i estado transitorio humano i tin kompashon pa Su pueblo (lesa Salmo 103:13–17).

Kòrda ta mas ku solamente aktividat kognitivo. E ta envolví un kompromiso ku ta ekspresá den akshon: Dios ta libra i ta sostené Su pueblo (Salmo 103:3−13). E imágennan poderoso den Salmo 103:11−16 ta ilustrá e grandesa ilimitá di e grasia di Dios, ku por kompará solamente ku e inmensidat infinito di e shelunan (Isa. 55:9).

Kon, anto, hende mester reakshoná riba e bondat amoroso di Dios?

Na promé lugá, bendishonando Señor (Salmo 103:1,2).

Generalmente ta komprendé bendishon komo un akto di drama benefisionan material i spiritual riba un hende (Gén. 49:25, Salmo 5:12). Pasobra Dios ta e Fuente di tur bendishon, kon sernan humano por bendishoná Dios? Un hende inferior por bendishoná un superior komo un medio di gradisí òf alab’é (1 Reinan 8:66, Job 29:13). Dios ta bendishoná hende dunando nan loke ta bon, i hende ta bendishoná Dios alabando e kos bon den djE; es desir, dun’E reverensia pa Su karakter miserikòrdioso.

Na di dos lugá, rekordando tur Su benefisionan i Su aliansa (Salmo 103:2, 18–22), meskos ku Señor ta rekordá e kondishon humano débil i Su aliansa ku Su pueblo (Salmo 103:3–13). Kòrda ta un aspekto krusial di e relashon entre Dios i Su pueblo. Meskos ku Dios ta kòrda Su promesanan na e hendenan, asina e hendenan ta obligá na kòrda Dios su fieldat i respondé riba Dios ku amor i obediensia.

Ku e idea akí den mente, e palabranan famoso akí di Ellen G. White ta asina apropiá: “Lo tabata bon pa nos pasa un ora refleksivo kada dia den kontemplashon di e bida di Kristu. Nos mester konsider’é punto pa punto, i laga nos imaginashon kapta kada esena, spesialmente esnan na final. Segun ku nos ta reflekshoná riba Su gran sakrifisio pa nos, nos konfiansa den djE lo ta mas konstante, nos amor lo rebibá, i nos lo bira mas profundamente saturá ku Su spiritu. Si nos ke salba al final, nos mes siña e lès di penitensia i humiashon na pia di e krus.”— The Desire of Ages, p. 83.

Lesa Ellen G. White, “The Sinner’s Need of Christ,” p. 17–22, den Steps to Christ.

Den e Salmonan, e bosnan di e pueblo di Dios lo uni komo unu ora nan ta ripití e koro “Su mizerikòrdia ta pa semper” den selebrashon di e amor eterno di Dios (Salmo 106:1; Salmo 107:1; Salmo 118:1–4, 29; Salmo 136). “No alabá Dios lo a nifiká lubidá tur Su benefisionan, no apresiá e donnan di Dios. Solamente esnan ku ta alabá no ta lubidá. Pensa i papia tokante Dios ainda no ta alab’E. Alabansa ta kuminsá ora un hende rekonosé Dios su mahestat i obranan i ta respondé ku adorashon di Su bondat, mizerikòrdia, i sabiduria.”—Hans LaRondelle, Deliverance in the Psalms, p. 178.

E nifikashon di e konfeshon solèm di Dios su mizerikòrdia durabel ta haña nifikashon ainda mas profundo ora nos kòrda ku Dios su khesed, es desir, Su mizerikòrdia i fieldat di pakto, ta para firme i inkambiabel meimei di piká i rebelion humano kontra Dios.

“Nos a peka kontra djE, i no ta meresé Su fabor; sinembargo, E Mes a pone riba nos lepnan e súplika di mas maravioso: ‘No despresiá nos pa kousa di Bo mes nòmber; no desonrá e trono di Bo gloria; rekòrdá, i no anulá Bo aliansa ku nos’ Jer. 14:21. Ora nos bin serka djE konfesando nos indignidat i piká, El a hura Su mes pa pone atenshon na nos súplika. E honor di Su trono ta den wega pa kumplimentu di Su palabra na nos.”—Ellen G. White, Christ’s Object Lessons, p. 148.

Eksperensiando ku Dios tabata miserikòrdioso kuné (Salmo 103:2) ta enkurashá e salmista pa bisa ku “SEÑOR ta hasi hustisia i huisio pa tur esnan ku ta wòrdu oprimí” (Salmo. 103:6; énfasis añadí). Pues, e ophetivo final di e testimonio personal di e salmista, i alabansa di Dios su mizerikòrdia den su bida, ta pa sigurá otronan di e bondat amoroso di Dios, pa asina nan tambe por habri nan kurason na Dios i risibí Su grasia ku ta salba i alabá Dios (Salmo 9:11, 12; Salmo 22:22–27; Salmo 66:16).

Preguntanan pa Diskushon:

Kua ta e implikashonnan práktiko di e echo ku Dios su mizerikòrdia ta eterno pa salbashon di hende? Dikon esaki no ta nifiká ku un hende por sigui peka pasobra e mizerikòrdia ta pa semper?

Kon nos ta rekonsiliá Dios su pordon di nos pikánan ku e idea di e huisio di Dios riba piká?

Kon e ekspreshonnan di e mizerikòrdia di Dios den Tèstamènt Nobo ta pas ku esnan den e Salmonan (Efe. 2:4,5; 1 Tim. 1:16; Tito 3:5; Hebr. 4:16) ?