Sabiduria pa un Bida Rekto

17 di febrüari

Lesa pa e Estudio di e Siman Akí:

Salmo 119:1–16; Salmo 90; Juan 3:16; Salmo 95:7–11; Salmo 141; Salmo 128.

Versíkulo di Memoria:

“Asina anto, siña nos konta nos dianan, pa nos por presentá na Bo un kurason yen di sabiduria” (Salmo 90:12, NKJV).

Manera nos a mira, e grasia di Dios ta proveé pordon di piká, i e ta krea un kurason nobo den e pekador arepentí, ku awor ta biba pa medio di fe.

E Palabra di Dios ta proveé tambe instrukshonnan pa un bida rekto (Salmo 119:9–16). Warda e lei di Dios di ningun manera ta un wardamentu legalista di reglanan sino bida den un relashon íntimo ku Dios, un bida yen di bendishon (Salmo 119:1,2; Salmo 128).

Sinembargo, bida di un hende hustu no ta sin tentashonnan. Tin biaha e naturalesa astuto di piká por tenta e hustu (Salmo 141:2–4) i asta e por kai pa e tentashon ei. Dios ta permití momentonan di prueba pa e fieldat (òf infidelidat) di Su yunan ser revelá klaramente. Si e yunan di Dios pone atenshon na instrukshon i amonestashon di Dios, nan fe lo ta purifiká i nan konfiansa den Señor fortalesé. Ta haña sabiduria pa un bida rekto a traves di e dinámika di bida ku Dios meimei di tentashonnan i desafionan. Pues, e orashon ku Dios lo a siña nos pa konta nos dianan pa asina nos por haña un kurason di sabiduria (Salmo 90:12), ta reflehá un kompromiso kontinuo di kana den fieldat na Señor.

* Studia e lès di e siman akí pa prepará pa Sabat, 24 di febrüari.

Lesa Salmo 119:1–16, 161–168. Kon nos mester warda e mandamentunan di Dios, i kua ta e bendishonnan ku ta bini di hasi esei?

Beibel ta deskribí un bida diario di fe komo un peregrinashon (“kaminata”) ku Dios riba Su kaminda di hustisia. Ta mantené e bida di fe a traves di kana “den e lei di Señor” (Salmo 119:1) i a traves di kana “den e lus di Bo semblante” (Salmo 89:15). Esakinan di ningun manera ta dos kaminda diferente. Kana den lus di Dios su presensia ta impliká mantené e lei di Dios. Di igual manera, kana “den e lei di Señor” ta envolví buska Dios ku henter bo kurason (Salmo 119:1,2,10).

Ser “sin mancha riba e kaminda” ta un otro manera ku e Salmonan ta deskribí e bida rekto (Salmo 119:1). “Sin mancha” ta deskribí un sakrifisio “sin ningun defekto” ku ta aseptabel pa Dios (Eks. 12:5). Di mes manera, bida di e individuo rekto, ku ta un sakrifisio bibu (Rom. 12:1), ta di ta sin ta manchá pa amor pa piká. Un bida dediká na Dios ta tambe un “kaminda perfekto”, loke ta nifiká ku e persona ta asumí un direkshon korekto den bida ku ta agradabel pa Dios (Salmo 101:2,6; lesa tambe Salmo 18:32).

Warda e mandamentunan di Dios no tin nada di aber ku un wardamentu legalístiko di reglanan divino. Al kontrario, e ta konsistí di “bon komprendementu” di e diferensia entre korekto i robes i bon i malu (Salmo 111:10; lesa tambe 1 Kron. 22:12), i ta envolví henter e persona, no solamente akshonnan eksterno. Ser “sin mancha”, wardando e mandamentunan di Dios i buskando Dios ku henter bo kurason, ta aktitutnan inseparabel den bida (Salmo 119:1, 2).

E mandamentunan di Dios ta un revelashon di e boluntat di Dios pa mundu. Nan ta instruí hende riba kon bira sabí i pa biba den libertat i pas (Salmo 119:7–11,133). E salmista ta deleitá den e lei pasobra e lei ta sigur’é di e fieldat di Dios (Salmo 119:77,174).

“Esnan ku ta stima Bo lei tin gran pas, i nada no ta hasi nan trompeká” (Salmo. 119:165). E imágen di trompeká ta deskribí fayo moral. Manera e lampi na pia di e salmista (Salmo 119:105), e Palabra di Dios ta protegé nos di tentashonnan (Salmo 119:110).

Kon Kristu a demostrá e poder di Dios su Palabra den Su bida (Mat. 4:1–11)? Kiko esaki mester bisa nos tokante e poder ku ta bini di un kurason establesé riba obedesé e lei di Dios?

Lesa Salmo 90, Salmo 102:11, i Salmo 103:14–16. Kua ta e situashon delikado di hende?

Eksistensia humano kaí ta djis un damp den lus di eternidat. Mil aña den bista di Dios ta “manera un warda di anochi”, ku tabata dura tres òf kuater ora (Salmo 90:4). Kompará ku tempu divino, un bida humano ta bula bai (Salmo 90:10). Esun di mas fuerte entre hende ta análogo na e mata di mas débil (Salmo 90:5,6; Salmo 103:15,16). Sinembargo, asta e bida kòrtiku ei ta yená ku molèster i doló (Salmo 90:10). Asta hende sekular, ku no ta kere den Dios, ta yora i lamentá e brevedat di bida, spesialmente den kontraste ku e eternidat ku tin eifó i ku, nan sa, ta menasá di sigui sin nan.

Salmo 90 ta pone e situashon delikado di hende den konteksto di Dios su kuido pa hende komo nan Kreador. Señor tabata e lugá di biba di Su pueblo den tur generashon (Salmo 90:1,2). E palabra hebreo ma‘on, “lugá di biba”, ta deskribí Señor komo lugá di skonde òf refugio di Su pueblo (Salmo 91:9).

Dios ta restringí Su rabia hustu i ta ekstendé Su grasia di nobo. E salmista ta sklama: “Ta ken ta komprendé e poder di Bo rabia ...?” (Salmo 90:11), ku ta impliká ku niun hende hamas a eksperensiá e efekto kompletu di e rabia di Dios kontra piká, i asina tin speransa pa hende pa arepentí i haña sabiduria pa un bida rekto.

Sabiduria den Beibel ta deskribí no solamente inteligensia sino reverensia pa Dios. E sabiduria ku nos tin mester ta di sa kon “konta nos dianan” (Salmo 90:12). Si nos por konta nos dianan, ta nifiká ku nos dianan ta limitá i ku nos sa ku nan ta limitá. Biba sabí ta nifiká biba ku un konsiensia di fragilidat di bida ku ta hiba na fe i obediensia. Ta haña e sabiduria akí solamente a traves di arepentimentu (Salmo 90:8,12) i e donnan di Dios di pordon, kompashon, i mizerikòrdia (Salmo 90:13,14).

Nos problema fundamental no ta surgi di e echo ku nos ta kreá komo sernan humano, sino di piká i di loke piká a obra den nos mundu. Ta mira su efektonan destruktivo tur kaminda i den tur hende.

Danki na Hesus, sinembargo, a traha un kaminda pa nos for di nos situashon humano delikado (Juan 1:29, Juan 3:14–21). Di otro manera, nos lo no tabatin speransa mes.

No importá kon rápido nos bida ta pasa, kua promesa nos tin den Hesus? (Lesa Juan 3:16.) Ki speransa nos lo tabatin sin djE?

Lesa Salmo 81:7, 8; Salmo 95:7–11; i Salmo 105:17–22. Kiko prueba divino ta envolví den e tekstonan akí?

Meriba ta e lugá kaminda Israel a tèst Dios a traves di desafiá Su fieldat i poder pa proveé pa nan nesesidatnan (Eks. 17:1−7; Salmo 95:8,9). Salmo 81 ta hasi un birada intrigante i ta interpretá e mesun evento komo e momento ora Dios a tèst Israel (Salmo 81:7). I, a traves di nan desobedensia i falta di konfiansa (Salmo 81:11), e pueblo a faya e prueba di Dios.

E referensia na Meriba ta transmití un dòbel mensahe. Di promé, e pueblo di Dios no mester ripití e erornan di generashonnan pasá. En kambio, nan mester konfia Dios i kana den Su kaminda (Salmo 81:13). Di dos, aunke e pueblo a faya e prueba, Dios a bini na nan reskate ora nan tabata den problema (Salmo 81:7). E grasia salbador di Dios den pasado ta duna un siguransa di e grasia di Dios na generashonnan nobo.

Salmo 105 ta mustra ku e pruebanan tabata Dios su medionan di tèst e konfiansa di Hose den e Palabra di Dios tokante su futuro (Gén. 37:5−10, Salmo 105:19). E Tsarap hebreo, “proba”, den versíkulo 19 ta transmití un sentido di “purga”, “refinashon”, òf “purifikashon”. Pues, e meta di e prueba di Dios di e fe di Hose tabata pa kita kualke duda den e promesa di Dios i pa fortalesé e konfiansa di Hose den e guia di Dios.

E meta di disiplina divino ta pa fortalesé e yunan di Dios i pa prepará nan pa kumplimentu di e promesa, manera ta mustra den e ehèmpel di Hose (Salmo 105:20−22).

Sinembargo, rechaso di e instrukshon di Dios ta resultá den terkedat kresiente i biramentu duru di kurason di un persona tèrko.

“Dios ta rekerí obediensia pronto i inkuestionabel di Su lei; pero hende ta na soño òf paralisá pa e engañonan di Satanas, ku ta sugirí èksküsnan i pretekstonan, i ta vense nan eskrúpulonan, bisando manera el a bisa Eva den e hòfi: ‘Siguramente boso lo no muri.’ Desobedensia no solamente ta hasi kurason i konsenshi di esun kulpabel duru, sino e tin tendensia di korumpí e fe di otronan. E loke tabata parse mashá robes pa nan na prinsipio, gradualmente ta pèrdè su aparensia siendo konstantemente nan dilanti, te ora finalmente nan kuestioná si e ta realmente piká i inkonsientemente ta kai den e mesun eror.”—Ellen G. White, Testimonies for the Church, tomo 4, p. 146.

Kua tabata bo mes eksperensia ku kon piká ta hasi e kurason duru? Dikon e pensamentu ei mester hiba nos na e krus, kaminda nos por haña poder pa obedesé?

Lesa Salmo 141. Pa kiko e salmista ta resa?

Salmo 141 ta un orashon pa protekshon for di tentashonnan for di paden i for di pafó. E salmista no ta solamente peligrá pa e mañanan di e malbado (Salmo 141:9,10) sino ta tentá tambe pa aktua meskos ku e malbado. E promé punto débil ta dominio propio den papiá, i e salmista ta resa pa Señor pone un vigilante na porta di su lepnan (Salmo 141:3). E imágen akí ta referí na e vigilansia di portanan di stat ku, den tempunan bíbliko, tabata protehá e stat.

E tentashon ta tambe si e yu di Dios lo sede na e konseho di e hustu òf laga e delikadesanan di e malbado sedusié (Salmo 141:4,5). E salmista ta deskribí su kurason komo un menasa prinsipal pasobra ta ei e bataya real ta tuma lugá. Solamente orashon insesante di konfiansa total i dedikashon na Dios por salba e yu di Dios for di tentashon (Salmo 141:2).

Lesa Salmo 1:1 i Salmo 141:4. Kon ta deskribí e karakter progresivo i astuto di tentashon akinan?

Salmo 141:4 ta deskribí e naturalesa progresivo di tentashon. Na promé lugá, e kurason ta inkliná pa ku maldat. Na di dos lugá, e ta praktiká aktonan malbado (e nifikashon na hebreo ta suprayá e karakter repititivo di e akshon). Na di tres lugá, e kurason ta kome di e delisianan di e malbado, es desir, e ta aseptá nan práktikanan malbado komo algu deseabel.

Di mes manera, den Salmo 1:1 e tentashon ta bini pa prevení e yu di Dios di kana den e kaminda di Señor, poniendo ku e ta kana ku e malbado, ta para riba e kaminda di pekadornan, i, finalmente, ta sinta huntu ku esnan ku menospresio. Pekador, malbado, i ku menospresio: nos no mester ta meskos ku nan òf laga nan alehá nos for di Señor.

E Salmonan ta deskribí e karakter progresivo, seduktor, i astuto di tentashon, loke ta suprayá e echo ku solamente total dependensia riba Señor por sigurá un hende su viktoria. E Salmonan ta enfatisá e importansia di e palabranan ku un hende ta papia, i ta skucha, meimei di tentashon. E final di tantu e malbado komo e hustu mester siña e hendenan pa buska sabiduria di Dios (Salmo 1:4–6, Salmo 141:8–10). Sinembargo, den tur dos Salmo, e hustifikashon final di e yunan di Dios ta permanesé den futuro. Esaki ta nifiká ku ta yama e kreyentenan pa konfia Dios ku pasenshi i spera riba djE.

Lesa Salmo 1:1–3, Salmo 112:1–9, i Salmo 128. Ki bendishonnan ta primintí pa esnan ku ta honra Señor?

Di e hopi bendishonnan primintí na esnan ku ta honra Señor, pas ta kisas un di esnan di mas grandi. Salmo 1 ta deskribí e hustu pa medio di un komparashon di un palu plantá kant’i awa, ku ta duna fruta na su tempu i ku su blachi no ta marchitá (Salmo 1:3; Jer. 17:7,8; Ezek. 47:12). E komparashon akí ta identifiká e fuente di tur bendishon, es desir, biba den e presensia di Dios den Su santuario i disfrutá relashon sin interupshon i amoroso ku Dios. Diferente for di e malbado, ku ta deskribí komo bagas, sin stabilidat, lugá, i futuro, e hustunan ta manera un palu di fruta ku rais, un lugá serka di Dios i bida eterno.

Salmo 128:2, 3 ta transmití e bendishonnan di e reino mesiániko, kaminda sinta bou di bo mes palu di wendrùif i palu di figu ta un símbolo di pas i prosperidat (Mik. 4:4). E bendishon di pas riba Herusalèm (Salmo 122:6−8; Salmo 128:5,6) ta transmití speransa den e Mesias ku lo terminá ku maldat i restourá pas den mundu.

“Den Beibel ta yama e herensia di esnan salbá ‘un pais’. Hebreonan 11:14–16. Aya e Wardadó selestial ta guia Su tou na fuentenan di awa bibu. E palu di bida ta produsí su fruta tur luna, i e blachinan di e palu ta pa servisio di e nashonnan. Tin riunan ku ta kore pa semper, kla manera kristal, i banda di nan palunan ku ta zoya ta tira na sombranan riba e kamindanan prepará pa esnan redimí di Señor. Aya e sabananan ekstenso ta hincha bira serunan di bunitesa, i e serunan di Dios ta halsa nan tòpnan haltu. Riba e sabananan pasífiko ei, banda di e riunan bibu ei, e pueblo di Dios, asina tantu tempu peregrino i bagamundu, lo haña un hogar.”—Ellen G. White, The Great Controversy, p. 675.

Tèstamènt Nobo ta deskribí e kumplimentu di e speransa ei den e segundo binida di Kristu i e kreashon di un mundu nobo (Mat. 26:29, Revelashon 21). P’esei, miéntras esnan hustu ta risibí hopi bendishon den e bida akí, e plenitut di Dios su fabor ta spera nan ora e reino di Dios ta kompletamente restourá na fin di tempu.

Dikon e krus, i loke a sosodé aya, ta garantia di e promesanan hañá den Tèstamènt Nobo di loke Dios tin reservá pa nos? Kon nos por haña konsuelo for di e promesanan ei asta awor?

Den e tempunan moderno akí, haña sabiduria no ta parse di ta asina deseabel manera atkerí felisidat. Hende lo ke ta mas bien felis ku sabí. Sinembargo, nos por ta berdaderamente felis i biba un bida pleno sin sabiduria divino? E Salmonan ta bisa klaramente ku nos no por. E bon notisia ta ku no ta pidi nos pa skohe entre sabiduria i felisidat. Sabiduria divino ta trese felisidat outéntiko.

Un simpel ehèmpel di e lenguahe hebreo por ilustrá e punto akí. Na hebreo, e palabra “paso” na plural (’ashurey ) ta zona hopi manera e palabra “felisidat” (’ashrey ). Aunke nos ta falta e asosiashon akí den tradukshonnan ingles, e ta transmití un mensahe poderoso: “pasonan” ku ta tene na e kaminda di Dios ta hiba na un bida “felis” (Salmo 1:1, Salmo 17:5, Salmo 37:31, Salmo 44:18, Salmo 89:15, Salmo 119:1). Den Beibel, ni sabiduria ni felisidat ta un konsepto apstrakto, sino un eksperensia real.

Ta haña nan den relashon ku Dios, ku ta konsistí di honra, alabá, haña fortalesa den, i konfia Dios. Salmo 25:14 ta bisa ku “E komunion íntimo di SEÑOR ta ku esnan ku ta tem'E, i E lo hasi nan konosé Su aliansa”.

“Gradisí Dios pa e imágennan kla ku El a presentá na nos. Laga nos agrupá e siguransanan bendishoná di Su amor, pa nos wak nan kontinuamente: E Yu di Dios bandonando e trono di Su Tata, bistiendo Su divinidat ku humanidat, pa E por a reskatá hende for di e poder di Satanas; Su triunfo na nos fabor, habriendo shelu pa hende, revelando na vishon humano e kamber di presensia kaminda e Deidat ta desvelá Su gloria; e rasa kaí halsá for di e pos di ruina den kua piká a hundié, i tresé atrobe den konekshon ku e Dios infinito, i a soportá e prueba divino a traves di fe den nos Redentor, bistí ku e hustisia di Kristu, i eksaltá na Su trono—esaki ta e imágennan ku Dios ke pa nos kontemplá.”—Ellen G. White, Steps to Christ, p. 118.

Preguntanan pa Diskushon:

Kon e Palabra di Dios por bira e fuente di plaser di un hende i no meramente instrukshon? Kon alimentá riba e Palabra di Dios ta relashoná ku permanesé den Hesu-Kristu, e Palabra (Juan 1:1; Juan 15:5,7)?

Kiko ta pasa ora hende, konsientemente i konstantemente, rechasá e siñansa di Dios (Salmo 81, Salmo 95)? Dikon bo ta kere ku esei ta sosodé?

Dikon e kaminda di e malbado tin biaha por parse mas deseabel ku e konseho di e hustu (Salmo 141)? Es desir, kon nos ta dil ku e aparente echo ku hopi biaha e malbado parse ta bai asina bon?