Adorashon Ku No ta Kaba Nunka

16 di mart

Lesa pa e Estudio di e Siman Akí:

Salmo 134; Isa. 42:10–12; Rev. 14:3; Salmo 15; Salmo 101:1–3; Salmo 96; Rev. 14:6–12; Juan 4:23,24.

Versíkulo di Memoria:

“Lo mi kanta na SEÑOR tanten ku mi ta biba; lo mi kanta alabansa na mi Dios mientras ku mi tin bida” (Salmo 104:33, NKJV).

Segun ku nos eksperensia di e grasia i poder di Dios ta oumentá, nos tin e impulso pa puntra huntu ku e salmista: “Kiko lo mi duna SEÑOR pa tur Su benefisionan na mi?” (Salmo 116:12). E kontesta inevitabel ta pa dediká bo bida pa ta fiel na Dios.

Den e Salmonan, Israel no ta simplemente un nashon, sino “e gran asamblea” (Salmo 22:22,25; Salmo. 35:18). Esaki ta revelá Israel su vokashon prinsipal pa alabá Dios i pa duna testimonio tokante djE na otro nashonnan, pasobra Señor ke pa henter mundu uni ku Su pueblo den adorashon. E pueblo di Dios ta identifiká ku e hustu ku ta adorá Señor i ku su speransa ta den djE i Su amor.

Ta persibí adorá Señor den kongregashon komo adorashon ideal. Esaki no ta nifiká ku orashon i alabansa di e individuo den Israel ta asumí un nifikashon sekundario. Al kontrario, e adorashon individual di Dios ta alimentá e adorashon komunitario ku alabansa renobá (Salmo 22:22,25), miéntras na su turno adorashon individual ta desaroyá su total potensial den estrecho relashon ku e komunidat. Ta yama e komunidat ku ta adorá tambe “e hendenan rekto i den e asamblea” (Salmo 111:1). E fielnan konosé Dios (Salmo 36:10) i ta konosí pa Dios (Salmo 37:18), i e eksperensia akí ta penetrá den tur aspekto di nan eksistensia.

* Studia e lès di e siman akí pa prepará pa Sabat, 23 di mart.

Lesa Salmo 134. Unda ta ofresé e adorashon akinan? Kua ta e resultado di e adorashon di Señor?

Salmo 134 ta rekordá e bendishon pastoral di Aaron den Numbernan 6:24−26 (tambe Salmo 67:1) i ta destaká bendishon komo e prinsipio supyasente i resultado di e relashon entre Dios i Israel. E hendenan ta bendishoná Dios den e santuario, i Dios ta bendishoná Su pueblo for di Sion. E bendishon ta ekstendé na henter bida pasobra Señor ta Kreador di shelu i tera. E menshon di Sion komo e lugá di bendishonnan spesial ta suprayá Señor su laso di pakto ku Su pueblo. Ta di e manera akí ku denter di e pakto di grasia ku Israel ta ehersé e privilegio di bendishoná Señor i ta bendishoná p’E.

Lesa Salmo 18:1; Salmo 36:1; Salmo 113:1; Salmo 134:1, 2; i Salmo 135:1, 2. Kon ta deskribí e adoradónan akinan?

Hopi biaha e Salmonan ta deskribí e adoradónan komo e sirbidónan di Señor. “... ku ta sirbi anochi den e kas di SEÑOR” (Salmo 134:1) probablemente ta referí na e warda di anochi di e levitanan (1 Kron. 9:23−27) òf na e alabansa ku e levitanan tabata ofresé na Dios, tantu di dia komo anochi (1 Kron. 9:33).

Pasobra e israelitanan tabata adorá e Dios invisibel, kende no por a representá den forma di niun imágen, e santuario tabata sirbi pa reflehá e gloria di Señor i proveé un ambiente sigur pa hendenan pekaminoso aserká nan Rei santu. Señor Mes ta inisiá e enkuentro akí i Su statutonan i dekretonan ta regul’é.

“I biniendo serka djE manera serka un piedra bibu, rechasá pa hende, ma skohí i presioso den bista di Dios, boso tambe, manera piedranan bibu, ta wòrdu edifiká komo un kas spiritual pa un saserdosio santu, pa ofresé sakrifisionan spiritual ku ta aseptabel pa Dios pa medio di HesuKristu” (1 Pe. 2:4,5). Loke nos ta mira akinan, den e palabranan di Pedro, ta un ekspreshon di Tèstamènt Nobo di e mesun ideanan presentá den e salmonan akí, esun di e pueblo di Dios, awor un saserdosio santu, ku ta ofresé alabansa i gradisimentu na nan Señor Hesu-Kristu, nan Kreador i Redentor, pa tur e bon kosnan ku El a hasi pa nan.

Komo kreyentenan di Tèstamènt Nobo, nos tambe tin un ròl saserdotal den sentido ku nos ta yamá pa media e bon notisia di e evangelio na e mundu. Kua ta e maneranan di mas efektivo ku nos por hasi esaki?

Lesa Salmo 33:3, Salmo 40:3, Salmo 96:1, Salmo 98:1, Salmo 144:9, i Salmo 149:1. Kua ta e tema komun den e tekstonan akí?

E Salmonan ta konvoká hende pa kanta un “kantika nobo”. Kiko ta un “kantika nobo” aki? E rason pa e “kantika nobo” ta e rekonosementu fresku di Señor su mahestat i soberania riba e mundu i gratitut pa Su kuido i salbashon komo e Kreador i Hues di tera. Liberashon for di enemigunan i for di morto, i Dios su fabor spesial pa ku Israel, ta algun di e motibunan mas personal pa kanta “un kantika nobo”. Miéntras otro kantikanan tambe ta alabá Señor pa Su bondat amoroso i maravianan, e “kantika nobo” ta un kantika spesial, ku ta ekspresá goso rebibá i promesa di deboshon renobá na Dios. E eksperensia nobo di liberashon divino ta inspirá e hendenan pa rekonosé Señor komo nan Kreador i Rei. E temanan komun den e Salmonan ku ta konta di “un kantika nobo” ta konfiansa den Dios, alabansa di Su obranan maravioso, i liberashon for di aflikshon, entre otro.

Lesa Isaias 42:10–12, Revelashon 5:9, i Revelashon 14:3. Kiko nos por konkluí tokante e “kantika nobo” for di e tekstonan bíbliko akí?

Ta deskribí e pueblo di Dios, Israel, den términonan kariñoso komo “un pueblo serka di djE [Dios]” (Salmo 148:14), loke ta impliká ku di henter Kreashon, Israel tin e status di mas spesial, i pues e ta mas obligá i privilegiá pa alabá Dios. Asina Beibel ta enkurashá kreyentenan di tur generashon pa kanta un kantika nobo den alabansa di nan Redentor, ku ta karga nan testimonio úniko tokante salbashon den e sanger di e Lamchi. Un “kantika nobo” por deskribí un kantika fresku ku niun hende a yega di tende promé, un kantika ku ta konmemorá un eksperensia bibu di e grasia di Dios den bida di un hende. E “kantika nobo” por ekspresá tambe speransa, den kua kaso ta demostrá e nobedat di e kantika den antisipashon di e eksperensia úniko i sin igual di e mahestat di Dios den futuro. Berdadero adorashon ta bai mas ayá di sakrifisio i ofrenda i ta reflehá un relashon bibu ku Dios ku semper ta fresku i dinámiko. Den un sentido, bo por bisa simplemente ku e “kantika nobo” ta un ekspreshon nobo, asta kada dia, di nos amor i apresio pa loke Dios a hasi pa nos.

Reflekshoná riba e bendishonnan di Dios den bo bida. Si bo mester a kanta un kantika nobo, kua e lo tabata?

Lesa Salmo 15. Ken ta e hendenan digno di adorá den presensia di Dios?

E kontesta duná den e salmo akí ta e resúmen di e rekerimentunan ya duná den e lei di Dios i e profetanan: esnan ku nan akshonnan (“obranan di hustisia”) i karakter (“den su kurason”) (lesa Deut. 6:5, Mik. 6:6–8) ta un refleho di Dios. E santuario tabata un lugá santu, i tur kos den dje, inkluyendo e saserdotenan, tabata konsagrá. Pues, santidat ta un rekerimentu obligatorio pa drenta den presensia di Dios. E santidat di Israel mester tabata integral, uniendo adorashon ku étika i ehersé den tur aspekto di bida. A duna e lei na e pueblo di Dios pa kapasitá nan pa kumpli ku nan potensial di mas grandi, p.e., biba komo un reino di saserdotenan. E saserdosio real ta inkluí un bida di santidat den presensia di Dios i hiba e bendishonnan di pakto na otro nashonnan.

Lesa Salmo 24:3–6 i Salmo 101:1–3. Kiko ta nifiká pa ta santu?

“Un kurason perfekto” ta e kualidat di mas grandi di e adoradó dilanti di Dios. E palabra hebreo tamim, “perfekto”, ta transmití e noshon di “integridat” i “totalidat”. Un mata di wendrùif “perfekto” ta kompleto, intakto, i saludabel (Ezek. 15:5). Animalnan ofresé komo sakrifisio mester tabata tamim, òf sin mancha (Lev. 22:21–24). Diskurso “perfekto” ta totalmente berdadero (Job 36:4). Un “kurason perfekto” pues ta un “kurason puru” (Salmo 24:4) òf un kurason di integridat (Salmo 15:2). E ta buska Dios (Salmo 24:6) i ta restourá pa medio di Dios su pordon (Salmo 51:2–10). Un bida intachabel ta sali for di rekonosementu di e grasia di Dios i Su hustisia. Grasia Divino ta inspirá i ta kapasitá e sirbidónan di Dios pa biba den temor di Señor, loke ta nifiká biba den komunion sin opstákulo ku Dios i den sumishon na Su Palabra. Un testimonio di un bida deboto i piadoso ta trese alabansa na Dios i no na e mes. Nota ku ta duna mayoria rekerimentu den Salmo 15 den términonan negativo (Salmo 15:3–5). Esaki no ta trata di gana fabor di Dios sino tokante evitá e kosnan ku lo a separá nos for di Dios.

Kon nos por hasi eskohonan konsiente pa evitá e kosnan ku ta pusha nos for di Dios? Kua ta algun di e kosnan ei, i kon nos por evitá di hasi nan?

Lesa Salmo 96. Kua múltiple aspektonan di adorashon ta menshoná den e Salmo akí?

Adorashon ta inkluí kanta na Señor (Salmo 96:1,2), alabá Su nòmber (Salmo 96:2), proklamá Su bondat i grandesa (Salmo 96:3,4), i trese regalonan na Su tèmpel (Salmo 96:8). Ademas di e karakterístikanan familiar akí di adorashon, Salmo 96 ta destaká un aspekto di adorashon no dje opvio ei, es desir, e dimenshon evangéliko den proklamashon di e reino di Señor na otro pueblonan (Salmo 96:2,3,10).

Sinembargo, kanta, alabá, trese regalo, i proklamá e evangelio no ta akshonnan separá sino nan ta ekspreshonnan variá di adorashon. E proklamashon di Dios su salbashon na tur nashon ta duna supstansia na alabansa i kontenido na adorashon. Nota kon e motibunan pa adorashon ta koinsidí ku e mensahe proklamá na otro pueblonan: “pasobra SEÑOR ta grandi” (Salmo 96:4), “Pasobra tur e diosnan di e pueblonan ta ídolo, ma ta SEÑOR a traha e shelunan” (Salmo 96:5), “SEÑOR ta reina” (Salmo 96:10), i “pasobra E ta bin; pasobra E ta bin pa huzga tera” (Salmo 96:13). Pues, e meta di evangelisashon ta pa uni otro pueblonan ku e pueblo di Dios, i finalmente henter kreashon den adorashon di Señor (Salmo 96:11–13).

Adorashon ta resultá di e rekonosementu interior di ken Señor ta, es desir, Kreador, Rei, i Hues (Salmo 96:5,10,13). Adorashon pues ta envolví rekordá Dios su aktonan di pasado (kreashon), selebrá Su maravianan presente (Dios ku ta sostené e mundu i Su reinado presente), i antisipando Su futuro echonan (huisio di tempu di fin i un bida nobo den un shelu i tera nobo).

Huisio den e Salmonan ta nifiká restourashon di e órden divino di pas, hustisia, i bienestar den un mundu aktualmente kargá ku inhustisia i sufrimentu. Pa e motibu ei, henter tera ta hubilá den antisipashon di e huisionan di Dios (Salmo 96:10–13, Salmo 98:4–9). E echo ku Señor ta un Hues hustu mester motivá hende adishonalmente pa ador’E den santidat i “temblamentu”, i mester atvertí nan pa no tuma adorashon na un manera liviano (Salmo 96:9). Adorashon ta envolví tantu inmenso goso komo konfiansa (Salmo 96:1,2, 11−13) i temor i rèspèt santu (Salmo 96:4,9).

E apelashon universal di Salmo 96 pa adorá e Kreador i e Hues ta reflehá den Dios su último proklamashon di evangelio na e mundu, e mensahe di e tres angelnan di Revelashon 14:6–12. Den hopi forma ta parse ku e salmo akí ta inkorporá e mensahe di tempu di fin akí: kreashon, salbashon (“evangelio eterno”), adorashon, i huisio. Tur tei.

Kompará e salmo akí ku e mensahe di e tres angelnan (Rev. 14:6–12). Den ki formanan e ta siña e mesun bèrdatnan básiko ku e mensahe di tempu di fin ku nos mester proklamá na e mundu?

Lesa Salmo 40:6–8, Salmo 50:7–23, i Salmo 51:16–19. Kua asuntu importante e tekstonan akí ta atendé? Dikon Dios no tin delisia den e sakrifisionan ku El a preskribí den Su Palabra (Eks. 20:24)?

Meskos ku e profetanan, e salmistanan ta desaprobá vários mal uso di adorashon. Nan punto prinsipal den e versíkulonan akí no ta Señor su repugnansia pa e sakrifisionan i fiestanan di Israel sino e motibunan pa tal repugnansia: e distansia fatal entre adorashon i spiritualidat.

Dios no ta reprendé Su pueblo pa nan sakrifisionan i ofrendanan kimá sino pa nan maldat i aktonan di inhustisia ku nan a hasi den nan bida personal (Salmo 50:8,17–21). E Salmonan no ta predikando kontra sakrifisio i adorashon sino kontra sakrifisio bano i adorashon bashí, demostrá den e inhustisia di e adoradónan akí.

Ora e unidat entre e ekspreshon eksterno di adorashon i e motivashon interno korekto pa adorashon kai den otro, ritualnan generalmente ta bira mas importante den i di nan mes ku e eksperensia aktual di hala serka Dios. Es desir, e formanan di adorashon ta bira un fin den nan mes, kontrali na e Dios na ken e ritualnan ei ta suponé di mustra i revelá.

Lesa Juan 4:23,24. Ki asuntu Hesus ta tratando aki, ku ta pas eksaktamente ku loke e Salmonan pa awe ta spièrtando di dje?

Sakrifisio so no ta sufisiente. Ki bon e sakrifisionan akí tabata si kurason di esnan ku tabata ofresiendo nan no tabata yená ku repentimentu, fe, i un tristesa pa piká? Solamente ora e ta kompañá pa repentimentu i sinsero gradisimentu e sakrifisionan di toro por a agradá Dios komo “sakrifisionan di hustisia” (Salmo 51:19, lesa tambe Salmo 50:14). Hesus, sitando Isaias, a ekspres’e asin’aki: “E pueblo aki ta onraMi ku nan lepnan, ma nan kurason ta leu for di Mi” (Mat. 15:8). E problemanan ku e salmistanan tabata mira tabata e mesun problemanan ku Hesus tabata topa ku algun di e hendenan, spesialmente e lidernan, durante Su ministerio terenal.

Kon nos por sigurá nos mes ku nos, komo atventistanan, ku tur e lus i konosementu akí, no ta kai den e trampa di pensa ku solamente konosé bèrdat i pasa a traves di e ritualnan di e bèrdat ta sufisiente?

Lesa Ellen G. White, “How to Pray,” p. 39–42, den A Call to Stand Apart.

Sentral na adorashon tabatin e nesesidat pa repentimentu, berdadero repentimentu: “Repentimentu ta inkluí tristesa pa piká i un biramentu bèk for di dje. Nos lo no renunsiá piká a ménos ku nos mira su pekaminosidat; te ora nos bira bai for di dje di kurason, lo no tin un kambio real den nos bida.

“Tin hopi hende ku ta faya di komprendé e berdadero naturalesa di repentimentu. Multitutnan ta tristu ku nan a peka i asta ta hasi un reformashon eksterno pasobra nan tin miedu ku nan mal komportashon lo trese sufrimentu riba nan mes. Pero esaki no ta repentimentu den sentido bíbliko. Nan ta lamentá e sufrimentu mas bien ku e piká. Asina e fèrdrit di Esou tabata ora el a mira ku el a pèrdè e derecho di yu mayó pa semper. Balaam, paralisá pa e angel pará riba su kaminda ku spada saká, a rekonosé su kulpa pa e no pèrdè su bida; pero no tabatin niun repentimentu outéntiko pa piká, niun kombershon di propósito, niun repudio di maldat. Hudas Iskariote, despues di e traishoná su Señor, a sklama: ‘Mi a peka dor di traishoná sanger inosente.’ Mateo 27:4.”—Ellen G. White, Steps to Christ, p. 22, 23.

“Aunke Dios no ta biba den tèmpelnan trahá ku man, tòg E ta honra e reunionnan di Su pueblo ku Su presensia. El a primintí ku ora nan bini huntu pa busk’E, pa rekonosé nan pikánan, i pa resa un pa otro, E lo reuní ku nan pa medio di Su Spiritu. Pero esnan ku reuní pa ador’E mester pone tur kos malu un banda. A ménos ku nan ador’E den spiritu i bèrdat i den e beyesa di santidat, nan binimentu huntu lo ta en bano. Di esnan asina Señor ta deklará: ‘E pueblo aki ta onraMi ku nan lepnan, ma nan kurason ta leu for di Mi.’ Mateo 15:8, 9. Esnan ku ta adorá Dios mester ador’E ‘den spiritu i bèrdat; pasobra ta hendenan asina e Tata ta buska pa ador'E.’ Juan 4:23.”—Ellen G. White, Prophets and Kings, p. 50.

Preguntanan pa Diskushon:

Kua ta e adoradó su ofrenda di mas grandi na Dios (Salmo. 40:6–10; Rom. 12:1,2) ?

Kon adorashon individual i komunitario ta relashoná ku otro? Dikon nos mester di tur dos realmente? Kon kada un ta mehorá e otro?

Hopi hende ta komprendé ku adorashon ta relashoná solamente ku orashon, kantamentu di himnonan, i estudio di Beibel i literatura spiritual. Miéntras e aktividatnan akí ta esensial pa adorashon, adorashon ta limitá na nan? Duna algun ehèmpel di otro formanan di adorashon.

Ellen G. White a skirbi: “No mester mira Su servisio komo un ehersisio angustioso i ku ta hasi e kurason tristu. Mester ta un plaser pa adorá Señor i pa tuma parti den Su obra.”— Steps to Christ, p. 103. Kon adorashon di Señor por bira un plaser?