Spera riba Señor

23 di mart

Lesa pa e Estudio di e Siman Akí:

Salmo 27:14; Rom. 8:18–25; Salmo 131; Mat. 18:3; Salmo 126; Salmo 92; Marko 16:1–8; 2 Pe. 1:19.

Versíkulo di Memoria:

“Spera riba SEÑOR; sea fuerte i E lo fortalesé bo kurason, sí, spera riba SEÑOR” (Salmo 27:14, NKJV).

Nos a yega e último siman den estudio di e Salmonan di e kuartal akí. E biahe spiritual a hiba nos a traves di e eksperensia di rèspèt dilanti di e Kreador, Rei, i Hues mahestuoso; a traves di e goso di liberashon divino, pordon, i salbashon; a traves di momentonan di sumishon den tristesa i lamento; i a traves di e glorioso promesanan di Dios su presensia eterno i e antisipashon di e adorashon universal interminabel di Dios. E biahe ta sigui, sinembargo, miéntras nos ta biba den e speransa di e binida di Señor, ora nos anhelo pa Dios lo haña su kumplimentu final. Si tin un último palabra ku nos por saka for di e Salmonan, e mester ta “spera riba Señor”.

Spera riba Señor no ta un espera bano i desesperá di bo tempu. En kambio, spera riba Señor ta un akto yen di konfiansa i fe, un konfiansa i fe revelá den akshon. Spera riba Señor ta transformá nos nochinan skur ku e espektativa di e mainta briante (Salmo 30:5, Salmo143:8). E ta fortalesé nos kurason ku speransa renobá i pas. E ta motivá nos pa traha mas duru, tresiendo e bòshinan di abundante kosecha for di e kamponan mishonero di Señor (Salmo 126:6, Mat. 9:36–38). Spera riba Señor nunka lo bergonsá nos, sino lo keda rekompensá rikamente, pasobra Señor ta fiel na tur Su promesanan (Salmo 37:7–11,18,34; Salmo 71:1; Salmo 119:137, 138).

* Studia e lès di e siman akí pa prepará pa Sabat, 30 di mart.

Lesa Salmo 27:14; Salmo 37:7, 9, 34; Salmo 39:7; Salmo 40:1; Salmo 69:6; Galationan 5:5, i Romanonan 8:18–25. Kiko e tekstonan akí ta implorá e pueblo di Dios pa hasi?

Kisas un di e tenshonnan di mas grandi di bida ta e tenshon di warda. No importá ken nos ta, unda nos ta biba, kua ta nos stashon den bida, nos tur tin biaha mester warda riba kosnan. For di warda den rei den un tienda te na warda pa tende un pronóstiko médiko, nos ta warda, ku no semper nos gusta hasi, bèrdat?

Ke tal, anto, di spera riba Dios? Nos ta haña e noshon di spera riba Señor no solamente den e Salmonan sino e ta abundá den henter Beibel. E palabra operativo den tur esaki ta perseveransia. Perseveransia ta nos kompromiso supremo di rechasá di sukumbí na tin miedu di desapunto ku, di algun manera, Dios lo no kumpli. Dios su yu dediká lo spera, sabiendo ku siguransa ku Dios ta fiel i esnan ku spera riba djE por konfia ku si nos laga nos situashon den Su man, nos por ta sigur ku E lo resolv’e pa nos bon, asta si na e momento ei no nesesariamente nos ta mir’e asina.

Spera riba Señor ta mas ku djis perseverá. E ta un anhelo profundo pa Dios ku ta kompará ku set intenso den un tera seku (Salmo 63:1). E salmista ta spera riba hopi bendishon di Dios, pero su anhelo pa ser halá mas serka su Dios ta surpasá kualke otro deseo i nesesidat den bida.

Manera nos ta lesa den Pablo, den e pasashi maravioso akí den Romanonan, Dios i henter kreashon ta sperando riba e renobashon di mundu i e enkuentro bendishoná di Dios i Su pueblo na fin di tempu. E ta skirbi: “Pasobra e kreashon ta spera ku gran antisipashon riba e revelashon di e yunan di Dios” (Rom. 8:19).

Ki un promesa inkreibel!

Sinembargo, miéntras nos ta sperando riba e último salbashon i reunion ku Dios, asta miéntras “henter e kreashon ta keha i ta sufri e dolónan di parto” (Rom. 8:22), ainda Señor ta biba huntu ku Su pueblo awor, a traves di Spiritu Santu.

Mientrastantu, nos ta yamá pa duna testimonio (Echonan 1:4–8) di e plan di salbashon, ku lo kulminá den un kreashon nobo. E kreashon nobo ei ta, finalmente, loke nos ta sperando riba dje, e último kumplimentu di nos speransanan komo kristiannan atventista, ku su nòmber mes, atventista, ta kontené e idea di e speransa ku nos ta spera riba dje. Nos ta spera, pero nos sa ku no ta en bano. E morto i resurekshon di Kristu, na e promé binida, ta nos garantia di Su segundo binida.

Kua ta algun kos ku bo ta sperando riba dje di Dios? Kon nos ta siña spera den fe i den konfiansa, spesialmente ora loke nos ta resando p’e no a yega ainda?

Lesa Salmo 131. Kiko e salmo akí ta siña nos tokante nos relashon ku Dios?

E pueblo di Dios ta biba den un mundu ku ta aflihí e fielnan, un mundu yen di tentashon i problema pa kasi tur hende. Un konvikshon refreská ku e ta un yu di Dios i dependiente riba Dios pa su bida ta konsolá e salmista i ta hib’é na konfesá ku su orguyo no tin balor. E engaño di orguyo ta ku e ta pone esnan orguyoso bira egoséntriko i inkapas pa wak mas ayá di nan mes. Esnan orguyoso asina ta bira siegu pa e realidat mas haltu di Dios.

En kambio, e hustunan ta halsa nan bista na Dios (Salmo 123:1,2). E rekonosementu di Dios su grandesa ta hasi nan humilde i liber di ambishon egoista i bano. E salmista ta konfesá ku e no ta buska “asuntonan grandi” ni “kosnan muchu difisil” (Salmo 131:1). E ekspreshonnan akí ta deskribí e obranan di Dios den e mundu ku ta mas ayá di komprenshon humano. Siensia moderno a mustra nos ku asta e kosnan “di mas simpel” por ta inkomprendiblemente kompliká i muchu mas ayá di nos komprendementu, a lo ménos pa awor. De echo, tin un gran ironia: mas nos siña tokante e mundu físiko, mas grandi e misterionan, ku ta aparesé nos dilanti, ta.

Mientrastantu, e metáfora den Salmo 131:2, “manera un mucha kitá for di pechu ta drumi serka [su] mama”, ta un imágen poderoso di un hende ku ta haña trankilidat i ku ta keda ketu den brasa di Dios. E ta mustra na e relashon amoroso ku un mucha tin ku su mama na vários etapa den e bida hóben di e yu ei.

A traves di kita nos for di pechu di ambishon i orguyo insupstansial, Dios ta introdusí nos na e nutrishon di kuminda sólido, ku ta pa “hasi e boluntat di Esun ku a mandaMi, i pa kumpli ku Su trabou” (Juan 4:34, tambe Hebr. 5:12–14). E konfiansa manera di un mucha deskribí den Salmo 131 ta fe maduro ku difikultatnan di bida a purba i tèst i a haña ku Dios ta fiel i berdadero na Su Palabra.

E atenshon di e salmista na final ta bai na bienestar di e pueblo di Dios. Finalmente, nos ta yamá pa uza nos eksperensia ku Dios pa fortalesé Su iglesia. Es desir, di loke nos a siña, personalmente, di e fieldat i bondat di Dios, nos por kompartí ku otronan ku, pa kualke motibu, ainda ta lucha ku nan fe. Nos testimonio tokante Kristu por ta asta denter di iglesia mes, kaminda hopi hende mester konos’E pa nan mes.

“ ‘Di bèrdat Mi ta bisa boso, si boso no kombèrtí i bira manera mucha, boso lo no drenta e reino di shelu’ ” (Mat. 18:3). Kiko Hesus ta bisando nos aki? Kiko e idea akí ta impliká?

Lesa Salmo 126. Kiko ta duna e pueblo di Dios fortalesa i speransa? Kiko ta bisa aki, den e konteksto akí, ku nos por apliká na nos propio bida awe?

E liberashonnan milagroso di Señor den pasado ta un fuente inagotabel di inspirashon pa e pueblo di Dios i nan fuente di speransa pa futuro. E liberashon di pasado tabata asina grandi ku por a deskribié komo un eksperensia di un soño ku a bira realidat (Isa. 29:7,8). Nota ku e generashon ku ta alabá Señor den Salmo 126 pa Su liberashon di pasado di Su pueblo for di koutiverio (Salmo 126:1) ta aktualmente den koutiverio (Salmo 126:4).

Sinembargo, e goso i alivio pasá ta rebibá a traves di kantikanan i apropiá den eksperensia presente. E generashonnan nobo ta mantené historia bíbliko bibu kontando nan mes komo presente entre esnan ku a mira e eventonan personalmente. Pues, un fe bibu ta apresiá e gran obranan di Dios pa Su pueblo den pasado komo algu ku Señor a hasi pa nos, i no simplemente kosnan ku Señor a hasi solamente pa nan (e generashonnan pasá di kreyentenan).

De echo, e rekuerdo di pasado ta stimulá speransa renobá pa presente. E imágen di “e koridanan di awa na Negèv” (Salmo 126:4) ta un metáfora poderoso di Dios ku ta aktua di ripiente i poderosamente na fabor di Su pueblo. E parti ekstremo sùit di Huda tabata un region di desierto seku. E riunan tabata forma di ripiente i yena ku awanan ku ta kore despues di yobidanan pisá durante e temporada di áwaseru. E áwaseru trempan i lat tabata hunga un ròl krusial den e éksito di e aña agríkola (Deut. 11:14, Deut. 28:12). Di forma similar, e imágen di sembra ku awa na wowo i kosechá ku goso (Salmo 126:5,6) ta un promesa poderoso di direkshon divino for di un presente difísil na un futuro felis.

Final di e temporada di kosecha tabata e momento ora e peregrinashon hebreo antiguo tabata trese e frutanan di e temporada na e tèmpel di Dios na Herusalèm (Eks. 34:22,26). E motibu di e kosecha tabata proveé un lès spiritual potente na e hendenan den e tempu ei. Meskos ku e trabou duru di sembra i kuida e kamponan, hòfinan i kunukunan di wendrùif ta keda rekompensá ku e goso di un kosecha abundante, asina e pruebanan presente di e pueblo di Dios lo keda koroná ku e goso di salbashon na fin di tempu. E imágen di e gran kosecha ta mustra na Dios su restourashon di Su reino riba tera na e segundo binida di Kristu (Amos 9:13−15, Mat. 9:37). Aki tambe, sinembargo, e tema di spera ta lanta. Manera ku e kosecha, nos mester spera pa mira e fruta i resultadonan di nos trabou.

Reflekshoná riba algun biaha ku klaramente i indiskutiblemente bo a mira Señor obrando den bo bida òf den bida di otronan. Kon bo por saka speransa for di e eksperensianan ei pa kualke kos ku lo bo por ta pasando a traves di dje awor?

Lesa Salmo 92. Kua dos aspektonan di e dia di Sabat e kantika akí ta destaká pa e dia di Sabat?

E alabansa di Dios pa e gran obranan di Su man (Salmo 92:4,5) i e deskripshon di e hustunan ku parse Eden (Salmo 92:12−14) klaramente ta mustra na Kreashon, e promé aspekto ku e Sabat ta konmemorá. E salmo ta eksaltá Señor tambe pa Su viktoria riba enemigunan komo e Dios di hustisia (Salmo 92:7−15) i asina ta reforsá e di dos tema di Sabat, redenshon for di maldat (Deut. 5:12−15). Pues, Salmo 92 ta eksaltá Dios pa Su kreashon pasá i sosten presente di mundu, i e ta mustra na e speransa di tempu di fin den pas i órden eterno i divino.

E hendenan por gosa di sosiegu di Sabat pasobra Dios ta e “Haltísimo” (Salmo 92:1); Su posishon superior riba e lugánan haltu ta dun’E un bentaha sin igual riba nan enemigunan.

Sinembargo, aunke E ta e Haltísimo, Señor fásilmente ta rèk abou pa reskatá esnan ku yama riba djE. E obra di kreashon di Señor i spesialmente redenshon di e kreashon ei mester inspirá hende pa adorá Dios i stim’E. Despues di tur kos, biba den un kreashon kaí, sin e speransa di redenshon, no ta nada pa ta partikularmente emoshoná di dje. Nos ta stima, nos ta sufri, nos ta muri, i ta hasi esei sin niun speransa. P’esei, nos ta alabá Señor, no solamente komo nos Kreador sino tambe komo nos Redentor.

“Zeta fresku” ta transmití e salmista su deboshon renobá komo Su sirbidó konsagrá di nobo (Salmo 92:10). Tabata hasi e unsion ku zeta pa konsagrashon di hendenan eligí manera saserdotenan i reinan (Eks. 40:15, 1 Sam. 10:1). Sinembargo, e salmista a skohe un palabra hebreo inkomun, balal, pa deskribí su unsion ku no típikamente ta deskribí unsion di e sirbidónan di Dios sino ta denotá “mesklamentu” di zeta ku otro partinan di e sakrifisio (Eks. 29:2; Lev. 2:4, 5). E salmista su uso úniko di balal ta impliká ku e salmista ta deseá di presentá su mes komo un sakrifisio bibu na Señor i konsagrá henter su mes na Dios (Rom. 12:1).

No ta sorprendente pa haña pensamentunan tokante konsagrashon den un salmo ku ta dediká na e Sabat, pasobra e Sabat ta e señal ku Señor ta santifiká Su pueblo (Eks. 31:13). E imágennan di palunan di koko i di seda di Líbano ta deskribí e pueblo di Dios kresiendo den fe i berdadero apresio di Dios su maravioso propósitonan i amor. E Sabat ta e señal di e aliansa eterno di Señor ku Su pueblo (Ezek. 20:20). Pues, e sosiegu di Sabat ta esensial pa e pueblo di Dios pasobra e ta empoderá nan pa spera ku konfiansa riba Señor pa kumpli ku tur Su promesanan di pakto (Hebr. 4:1–10).

Lesa Salmo 92 atrobe. Ki gran speransa ta ofresé nos aki, i kon nos por, asta aworakí, haña konsuelo den loke e ta bisa?

Lesa Salmo 5:3, Salmo 30:5, Salmo 49:14, Salmo 59:16, Salmo 92:2, Salmo 119:147, 2 Pedro 1:19, i Revelashon 22:16. Ki momento di dia ta deskribí simbólikamente komo e momento di redenshon divino, i dikon?

Den e Salmonan, mainta ta típikamente e momento ora ta antisipá e redenshon di Dios. Mainta ta revelá e fabor di Dios, ku ta terminá e anochi largu di desesperashon i problema (Salmo 130:5,6). Den Salmo 143, e liberashon di Dios lo bira e skuridat di morto presente (Salmo 143:3) den e lus di un mainta nobo (Salmo 143:8), i ta den e pos (Salmo 143:7) den biba den “e tera di rektitut” (Salmo 143:10).

Lesa Marko 16:1–8. Kiko a sosodé riba e mainta ku ta papia di dje aki, i dikon esei ta asina importante pa nos?

E mainta di resurekshon di Hesu-Kristu a habri e kaminda pa e mainta eterno di e salbashon di Dios pa tur ku kere den Su nòmber. E disipelnan di Hesus a eksperensiá e fortalesa kompletu di e promesa den Salmo 30:5: “yoramentu por dura un anochi, ma un gritu di alegria ta bin ora dia ta habri”, ora nan a topa e Señor resusitá. Ta solamente pa medio di e fabor i amor inkondishonal di Dios nos yoramentu ta transformá den legria (Salmo 30:5,7).

Manera e strea di mardugá ta anunsiá e nasementu di un dia nobo, asina fe ta anunsiá e realidat nobo di bida eterno den e yunan di Dios (2 Pe. 1:19). Ta yama Hesus e strea di mardugá briante (Rev. 22:16), kende nos ta spera ku ansiedat pa establesé Su reino den kua lo no tin mas nochi, maldat, i morto (Rev. 21:1–8,25). Al final, mas ku kualke otro kos, esaki ta loke nos ta sperando riba dje ora nos ta papia tokante spera riba Señor. I, siguramente, ta bale la pena warda.

“Riba e graf di sker di Hose, Kristu a proklamá den triunfo: ‘Ami ta e resurekshon, i e bida.’ Solamente e Deidat por a papia e palabranan akí. Tur ser kreá ta biba pa medio di e boluntat i poder di Dios. Nan ta reseptornan dependiente di e bida di Dios. For di e serafin di mas haltu te na e ser animá di mas humilde, tur ta yena nan mes for di e Fuente di bida. Solamente E ku ta unu ku Dios por a bisa, Mi tin poder pa duna Mi bida, i Mi tin poder pa tum’e atrobe. Den Su divinidat, Kristu tabata poseé e poder pa kibra e lasonan di morto.”—Ellen G. White, The Desire of Ages, p. 785.

Morto, ta bisá, ta grabá den nos sèlnan na nasementu. Aunke e ta bèrdat, a lo ménos pa nos sernan kaí, kiko e resurekshon di Hesus a primintí nos tokante e temporalidat di morto? Dikon nos no mester lubidá nunka kon temporal morto ta pa nos?

Lesa Ellen G. White, “Growing Up Into Christ,” p. 67–75, den Steps to Christ.

E Salmonan ta ekspresá apelashonnan ferviente pa spera riba Señor. “Sosegá den SEÑOR, i warda ku pasenshi riba djE” (Salmo 37:7). Ora spera ta parse nos fèrfelu, insigur, i solitario, nos mester kòrda riba e disipelnan riba e dia di Hesus su asenshon na shelu (Echonan 1:4–11). Hesus a subi na shelu dilanti di nan bista, miéntras nan a keda atras pa warda pa E bini bèk riba un dia deskonosí den futuro. Ken a yega di eksperensiá un anhelo mas intenso pa risibí bendishon di Dios awor, ku e disipelnan riba e dia ei? Siguramente nan a anhelá: “Señor, hiba nos huntu ku Bo awor.” Sinembargo, nan a haña instrukshon pa spera riba e promesa di e Tata i riba e regreso di Hesus. Si nos ta kere ku e disipelnan tabata yená ku desesperashon i desapunto, nos lo ta sorprendí. Nan a bai bèk Herusalèm i a hasi eksaktamente loke Hesus a bisa nan, nan a warda riba e don di Spiritu Santu i despues a prediká e evangelio na e mundu ku poder (Echonan 1:12–14, Echonan 2).

E mandato di nos Señor pa spera riba djE ta unu imposibel a ménos ku E hasi Su obra den nos a traves di Spiritu Santu. Niun kantidat di entusiasmo humano hamas lo resistí e tenshon ku spera lo imponé riba nos ser frágil. Solamente un kos lo soportá e tenshon, i esei ta di keda den Hesu-Kristu, es desir, un relashon personal kunE. “Si Kristu ta biba den boso kurason, anto, E lo obra den nos ‘tantu pa kier komo pa hasi segun Su bon boluntat’ Filipensenan 2:13. Nos lo traha manera El a traha; nos lo manifestá e mesun spiritu. I asina, stimando E i kedando den djE, nos lo ‘krese den tur aspekto den djE, Kende ta e kabes, esta, Kristu.’ Efesionan 4:15.”—Ellen G. White, Steps to Christ, p. 75. Miéntras nos ta sigui spera riba Señor, nos lo haña pas i satisfakshon den e Salmonan. Nos orashonnan i kantikanan ta kaminda e kurason di Dios i nos kurason ta topa diariamente.

Preguntanan pa Diskushon:

Dikon spera ta signifikante den nos bida spiritual? Diskutí e eksperensianan di spera di algun héroe bíbliko di fe. Kon spera a purifiká i fortalesé nan fe? (Rom. 4:19–22, Hebreonan 11).

Kua ta e fin di nos speramentu? (Salmo 37:34–40). Es desir, kiko ta primintí nos ora tur kos ta, finalmente, resolvé? Ki speransa nos ta haña den e tekstonan akí, por ehèmpel, tokante e hustisia ku tabata hasi falta asina tantu tempu den e bida akí?

Dikon, asina leu ku ta konserní e mortonan, i asina leu ku nan propio eksperensia ta bai (Ekl. 9:5), nan speramentu riba Hesus ta kasi kla? Ki speransa nos por saka for di e kontesta?