Lus ta Bria den Skuridat

13 di aprel

Lesa pa e Estudio di e Siman Akí:

Juan 8:44; Prov. 23:23; Echonan 20:27–32; 2 Tes. 2:7–12; Salmo 119:105,116,130,133,160; Prov. 16:25; 2 Kor. 4:3–6

Versíkulo di Memoria:

“E ora ei Jesus a kontestá nan: ‘Pa un poko tempu mas e lus ta meimei di boso. Kana mientras ku boso tin e lus, pa skuridat no sorprendé boso; esun ku ta kana den skuridat no sa unda e ta bai’ ” (Juan 12:35).

Den e último buki di Beibel, Revelashon, ta deskribí diabel komo un dragon i un kolebra (Rev. 12:9). E ta un dragon pasobra e ta deseá di destruí e pueblo di Dios, i un kolebra pasobra e ta uza tur su mentiranan astuto pa gaña nan. Den e añanan despues di e morto di Kristu, Roma imperial a torturá míles, a tira nan pa leonnan, i a kima nan na e staka di kandela, pa motibu ku nan a nenga di adorá nan “deidatnan”. Sinembargo, dilanti di e kastigu kruel akí, hopi a keda fiel, e evangelio a sigui plama, i e iglesia a krese.

Komo resultado, Satanas a kambia su strategia. Desénas di pagano a batisá, pero sin instrukshon kompletu den bèrdat di Beibel. Eror a kore drenta den e iglesia segun ku lidernan tabata meskla e bèrdatnan di Skritura ku kustumbernan popular. E di kuater i di sinku siglo tabata eranan di kompromiso ora preladonan di iglesia a meskla práktikanan pagano ku siñansanan kristian.

Sinembargo, asta den e momentonan di mas difísil di bida, Dios tabata kontinuamente huntu ku Su pueblo. Nan a haña Hesus, “e kaminda, e bèrdat i e bida” i, a traves di e poder di Spiritu Santu, nan a para firme, asta dilanti di preshon aplastante pa sede nan konvikshonnan konsiente. Nan a keda leal na e boluntat revelá di Dios, den Skritura, i a para inkebrantabel pa e bèrdat di Su Palabra, no importá e preshon poné riba nan, sea abiertamente òf sutilmente.

* Studia e lès di e siman akí, basá riba The Great Controversy, kapítulo 3 pa prepará pa Sabat, 20 di aprel.

Kompará Juan 14:6 ku Juan 8:44. Ki kontraste entre e karakter di Hesus i esun di Satanas ta mira den e dos pasashinan akí?

Loke Hesus ta bisa ta bèrdat pasobra E ta e outor di bèrdat. Bèrdat ta prosedé for di kurason di un Dios tur sabí, tur amoroso, i ku sa tur kos. E ta e fundeshi di realidat i di tur bèrdat.

E kambio, Satanas ta un gañadó i tata di mentira. E ta prepará pa uza mentiranan, engaño, mal informashon, i un deformashon di e bèrdat pa despistá e pueblo di Dios. El a gaña Eva den Eden trosiendo bèrdat, kreando duda, i deskaradamente a nenga loke Dios a bisa. E deklarashon di Satanas, “seguramente boso lo no muri”, den konteksto di kome e fruta, tabata un kontradikshon kla di loke Dios a bisa. A lo largu di siglonan Satanas a uza e mesun strategia. E ta mina konfiansa den e Palabra di Dios, ta kontradesí e boluntat revelá di Dios, ta trose Skritura, i tin biaha ta sita Beibel di un manera malu, si esaki ta na su bentaha.

Lesa Proverbionan 23:23, Juan 17:17, i Juan 8:32. Ki similaridat bo ta mira den e pasashinan di Beibel akí tokante e bèrdat di e Palabra di Dios? Kiko ta nan mensahe sentral?

“Satanas tabata sa bon ku e Santu Skrituranan lo a kapasitá hende pa diserní su engañonan i resistí su poder. Tabata pa medio di e palabra ku asta e Salbador di mundu a resistí su atakenan. Riba kada asalto, Kristu a presentá e eskudo di bèrdat eterno, bisando: ‘Ta pará skirbí’. Riba kada sugerensia di e atversario, El a oponé e sabiduria i poder di e palabra. Pa Satanas mantené su influensia riba hende, i establesé e outoridat di usurpadó papal, e mester a tene nan den ignoransia di e Skrituranan. Beibel lo a eksaltá Dios i pone hende finito den nan berdadero posishon; p’esei, mester skonde i suprimí su bèrdatnan sagrado. Iglesia Romano a adoptá e lógika akí. Pa sentenares di aña a prohibí sirkulashon di Beibel. A prohibí e hendenan pa les’é òf tin e den nan kasnan, i saserdotenan i preladonan sin prinsipio tabata interpretá su siñansanan pa sostené nan pretenshonnan. Asina, e papa a yega na ta kasi universalmente rekonosé komo e visegerente di Dios riba tera, dotá ku outoridat riba iglesia i estado.”—Ellen G. White, The Great Controversy, p. 51.

Diskutí maneranan ku Satanas ta trata na trose òf malinterpretá e Palabra di Dios awendia.

Lesa Echonan 20:27–32. Ki spièrtamentunan spesífiko apòstel Pablo a duna e lidernan di iglesia di Efeso tokante e apostasia benidero?

E propósito di Pablo su konseho tabata pa prepará e iglesia pa loke tabata biniendo. Den e pasashinan akí e ta deskribí dos preokupashon prinsipal.

Su promé preokupashon ta ku “lobo brabu lo drenta meimei di boso, ku lo no tin miserikòrdia di e tou” (Echonan 20:29). Ku otro palabra, kreyentenan lo a enfrentá persekushon feros, pero for di paden di iglesia. E profesia akí a kumpli den e promé i di dos siglo. Tabata torturá, enkarselá i kima e kristiannan, ku tabata nenga di adorá e emperador dor di bùig pa e diosnan di Roma, na e staka di kandela.

E apòstel a ekspresá un di dos preokupashon ora el a bisa: “i for di meimei di boso mes lo lanta hòmbernan ku ta papia kosnan pèrvèrso, pa desviá e disipelnan i hasi nan bai nan tras” (Echonan 20:30). Herehia lo a drenta iglesia. Lo a sustituí doktrinanan falsu pa bèrdatnan divino. Práktikanan pagano lo a prevalesé. Den e di kuater i di sinku siglo kompromiso sutil a slùip drenta e iglesia kristian, ku avanse di mishon siendo e probabel hustifikashon. Pero e resultado teribel tabata un desviashon for di bèrdatnan di e Palabra di Dios.

Lesa 2 Tesalonisensenan 2:7–12. Kon apòstel Pablo ta deskribí e apostasia benidero? Kua karakterístikanan nan mester a buska?

Pablo su komentario, “e plan sekreto di maldat ya a kuminsá funshoná kaba” ta signifikante. Asta den tempu di Pablo tabatin un desviashon gradual for di e bèrdat di e palabra di Dios tokante obediensia na e lei di Dios. E desviashon akí lo a floresé den e siglonan mas despues.

Kontrali na e di dos mandamentu, tabata introdusí ídolonan den adorashon kristian. Pa milenionan ídolonan tabata na vanguardia di tur religion pagano. Pa hasi kristianismo mas aseptabel pa paganonan bini den e iglesia kristian, tabata kambia nòmber di e deidatnan komo asina yamá santunan. A adoptá djadumingu, e dia di adorashon pa e dios di solo, gradualmente komo e dia di adorashon kristian na honor di e resurekshon. E dia falsu akí, no sanshoná den Skritura, ta prevalesé te awe.

Ki tipo di kompromisonan nos ta mira drenta iglesia awendia? Mas importante ainda, ki kompromisonan abo lo ta hasiendo? Kisas ta pa medio di meskla bèrdat i eror?

Spiritu Santu ta obra a traves di nos mente. E ta invitá nos pa eksplorá e misterionan di e universo. Manera un hende a deklará adekuadamente: “Komo kristiannan nos no ta chèk nos seleber na porta di iglesia.” No opstante, e genio di rasonamentu humano so ta inkapas di deskubrí e bèrdatnan divino di Skritura. Bèrdat no ta un asuntu di opinion humano. E ta un asuntu di revelashon divino.

Lesa Proverbionan 16:25, Huesnan 21:25, i Isaias 53:6. Kiko nan ta revelá tokante e strategia di engaño di Satanas?

Un di e engañonan di mas efektivo di Satanas ta pa hiba nos na kere ku rasonamentu humano, sin ayudo di Spiritu Santu i sin informashon di e Palabra di Dios, ta sufisiente pa komprendé e boluntat di Dios. Por tin un kaminda ku ta parse korekto pa nos, òf asta pa kulturanan kompletu, pero e por ta totalmente robes den bista di Dios.

Algun aña pasá mi esposa i ami a disidí di kana un tiki den e mondinan serka di e hotèl ku nos tabata keda pasa nochi. Mayoria biaha mi ta bastante bon den direkshon i, despues di a kana pa mas o ménos un ora asina riba vários kaminda, mi tabatin basta konfiansa ku mi por a haña nos kaminda bèk ku tiki difikultat, pero pronto mi a ripará ku nos tabata desesperadamente pèrdí den e mondi. Solo tabata bahando, i mi tabata teme lo pió. Afortunadamente, nos a topa algun otro ekskurshonista ku tabata konosé e kaminda. Nos tabata por lo ménos sinku mia for di kurso pero serka di un kaminda prinsipal. Ya ku nan outo tabata stashoná ei serka, nan a ofresé nos un left bèk na nos hotèl. Deskubriendo un hende ku tabata sa e kaminda i un hende ku tabatin e abilidat di hiba nos bèk na nos destinashon, a hasi tur e diferensia pa nos.

Dios no a laga nos nos so riba nos biahe di tera pa shelu. Spiritu Santu ta mustra nos na e sagrado Skrituranan ku ta hiba nos kas bèk. Bèrdat i eror, korekto i robes, bon i malu, por komprendé esakinan korektamente solamente den lus di e Palabra di Dios. E loke ta kontradesí Dios i Su Palabra ta eror, i eror semper ta peligroso; e loke ta den harmonia ku Dios ta bèrdat i bondat. Ki importante ta pa nos hasi e Palabra di Dios nos árbitro final di bèrdat i moralidat.

Dikon e mente humano sin ayudo di Spiritu Santu ta inkapas di deskubrí bèrdat divino? Diskutí e relashon entre rason humano i revelashon divino. Kon rason realmente ta yuda nos komprendé revelashon divino? Por ehèmpel, lesa Daniel 2, un profesia ku ta kubri historia mundial for di tempu di Babilonia te na futuro. Kon un profesia manera esaki ta apelá poderosamente na rason humano?

Lesa 2 Korintionan 4:3–6. Kiko ta nifiká “e dios di e mundu aki a siega mente di esnan ku no ta kere” (2 Kor. 4:4)? Kon a siega nan bista? Kon ta habri bista?

E palabra griego pa “mente” den e pasashi akí ta noema. Literalmente e ta nifiká nos persepshon òf fakultat mental. The SDA Bible Commentary ta hasi un deklarashon aklaratorio tokante e versíkulo akí. “E bataya entre Kristu i Satanas ta un bataya pa e mente di hende. (Rom. 7:23,25; 12:2; 2 Kor. 3:14, 11:3; Fil. 2:5, 4:7,8). Satanas su trabou prinsipal ta di siega òf skuresé mente di hende. E ta hasi esaki impidiendo nan estudio di e Palabra di Dios, trastornando e podernan di nan mente pa medio di e eksesonan di kurpa i alma, okupando e mente totalmente a traves di e kosnan di e bida akí, i apelando na orguyo i eksaltashon propio.”—Tomo 6, p. 854.

E falta di konosementu di parti di esnan pèrdí no ta pasobra nan no por a sa. Ta pasobra nan no ker a sa. Hopi tabatin tur oportunidat pa konosé bèrdat, pero a skohe pa no kere, i Satanas a siega nan bista. E reino di Satanas ta un reino di skuridat. Manera The SDA Bible Commentary ta añadí: “E evangelio ta e úniko medio a traves di kua por eksponé Satanas su plannan i engañonan diabóliko, i a traves di kua hende por mira e kaminda di skuridat na lus.”—Tomo 6, p. 854. E esensia di e mensahe di Tèstamènt Nobo ta e bida, morto, i resurekshon di Hesus. Hesus ta na e núkleo di e evangelio i ta e sentro di Skritura. Tur Skritura ta testifiká di djE (Juan 5:39).

Lesa Juan 1:4,5,9 i 14. Kon e versíkulonan akí ta deskribí Hesus? Nota partikularmente Juan 1:14.

Durante e promé siglonan di e iglesia kristian, e kreyentenan di Tèstamènt Nobo tabata totalmente komprometé na Kristu komo Esun ku tabata e lus den nan skuridat. Nan tabata redimí pa Su grasia, transformá pa Su poder, i motivá pa Su amor. Asta morto no por a kibra nan laso di lealtat na Kristu. Nan tabata rekonosé e engañonan di diabel den e lus glorioso di e evangelio. Kristu semper tabatin hòmber- i muhénan ku, pa medio di Su grasia, a para ku kurashi pa Su bèrdat. Den e promé siglonan akí, e lus di Kristu su amor, grasia, i bèrdat tabata bria a traves di e skuridat.

“E mesun spiritu di odio i oposishon na e bèrdat a inspirá e enemigunan di Dios den tur siglo, i e mesun vigilansia i fieldat tabata rekerí den Su sirbidónan. E palabranan di Kristu na e promé disipelnan ta aplikabel na Su siguidónan te na fin di tempu: ‘I loke Mi ta bisa boso, Mi ta bisa tur: ‘Keda alerta!’ Marko 13:37.”—Ellen G. White, The Great Controversy, p. 56, 57.

Den hopi parti di mundu, spesialmente kaminda hende tin akseso liber na e Beibel, Satanas a uza otro medionan pa debilitá su influensia. Un manera mashá efektivo tabata a traves di vários esfuerso sientífiko òf asta erudishon bíbliko, ku tin biaha ta kue posishonnan ku, si aseptá nan, lo a mina konfiansa den e Palabra di Dios. Por ehèmpel, aunke e buki di Daniel ta data su mes na mas ku 500 aña promé ku Kristu, hopi erudito ta fech’é, en kambio, te na meimei di siglo 2 promé ku Kristu. Nan ta argumentá ku mester a skibié na e tempu ei; di otro manera e profeta lo tabata bisando e futuro ku eksaktitut, i esei no por sosodé. P’esei, nan ta argumentá, Daniel no tabata skirbí ora e ta bisa ku e tabata sino, mas bien, sentenáres di aña mas despues. Desafortunadamente, e mentira akí tokante e Beibel ta un di hopi ku eruditonan di Beibel moderno ta trata na imponé riba nos. I mas desafortunadamente ainda, hopi hende ta aseptá e eror akí pasobra, despues di tur kos, eruditonan di Beibel ta siñ’é. Nada straño ku Pablo ta spièrta nos: “Saminá tur kos; tene duru na loke ta bon” (1 Tes. 5:21).

Preguntanan pa Diskushon:

Referí na e sita den lès di djamars i despues konsiderá lo siguiente: Kon Satanas ta uzando métodonan similar awendia pa, di forma sutil, mina outoridat di e Skrituranan?

Kua ta nos salvaguardianan di mas grandi kontra malinterpretá e Palabra di Dios?

E gran intento di Satanas den e gran konflikto entre bon i malu ta di daña e karakter di Dios i present’E komo un tirano outoritario i sin amor. Kon e malbado ta purba hasi esaki i kiko ta e reakshon di Dios riba su mentiranan?

Apòstel Pedro ta afirmá ku “ningun profesia di Skritura no ta un asunto di interpretashon personal” (2 Pe. 1:20). Kon nos por ta sigur ku nos no ta trose e nifikashon di Skritura pa alkansá nos mes finnan? Dikon esaki lo por ta mas fásil pa hasi ku nos ta realisá, i kon nos mester arma nos mes kontra e práktika akí? Kon nos por arma nos mes kontra dje?