Lesa Eksodo 25:8,9; Eksodo 25:4; Hebreonan 8:1–6. Kua dos santuarionan ta reprodusí den e versíkulonan akí?

Segun ku e promé atventistanan tabata profundisá nan mes den e Skrituranan den e lunanan despues di 1844, nan a komprondé ku tin dos santuario menshoná den Beibel: esun ku Moises a konstruí i e gran original den shelu. E palabra “santuario”, manera ta uz’e den Beibel, ta referí, na promé lugá, na e tabernakel konstruí dor di Moises, komo un patronchi òf “tipo” di kosnan selestial; i, na di dos lugá, na e “berdadero tabernakel” den shelu, na kua e santuario terenal tabata mustra. Na e morto di Kristu, e servisio típiko a pèrdè su importansia. E “berdadero tabernakel” den shelu ta e santuario di e pakto nobo. I komo ku e profesia di Daniel 8:14 ta kumpli den e era akí, e santuario na kua e ta referí mester ta e santuario di e pakto nobo.

“Na final di e 2.300 dianan, na 1844, no tabatin un santuario riba tera pa hopi siglo. Asina, e profesia ‘Pa dos mil tresshen dia; e ora ei e santuario lo wòrdu purifiká’ indudablemente ta mustra na e santuario den shelu.”—Ellen G. White, The Great Controversy, p. 417.

E santuario den desierto tabata un makèt òf patronchi di e santuario selestial. E servisionan den e santuario terenal tabata prefigurá Dios su plan divino di salbashon. Kada sakrifisio ofresé tabata representá e sakrifisio di Hesus riba e krus di Kalvario (lesa Juan 1:29). Atraves di e sakrifisio di Kristu nos ta liber di e kondena di piká. Pordon ta di nos. Nos kulpa ta disparsé ora nos aseptá e sakrifisio di Kristu na nos fabor i konfesá nos pikánan (1 Juan 1:9). Hesus no ta solamente e Lamchi ku a muri pa nos, sino tambe e Saserdote ku ta biba pa nos.

Hebreonan 7:25 ta splika: “Pesei tambe E por salba te den ekstremo esnan ku ta bin serka Dios pa medio di djE, ya ku semper E ta biba pa hasi interseshon pa nan”. E ta kita e kulpa di piká i ta salba nos for di e poder di piká (Rom. 8:1–4; 2 Kor. 5:21). E ministerio di Hesus den e santuario selestial ta pa nos. Komo resultado di Su interseshon, e gara riba piká riba nos bida a kibra. Nos no ta bou di sklabitut mas òf sklavisá na nos naturalesa pekaminoso. Den Kristu nos ta liber, liber di e kondena di piká i liber di e kontrol di piká. Ora nos ta tene na Kristu pa medio di fe, nos tin siguransa di salbashon.

Kiko ta nifiká pa bo sa ku Hesus ta den shelu ministrando na bo fabor, loke ta nifiká ku E ta einan intermediando pa bo? Dikon bo tin mester di un Mediadó na bo fabor? Dikon e bèrdat akí ta bon notisia?

Lesa Levítiko 16:21; Lev. 16:29–34; Levítiko 23:26–32; Hebreonan 9:23–28. Dikon e Dia di Ekspiashon tabata asina importante den Israel antiguo?

E saserdotenan tabata ministrá tur dia di aña, pero riba e Dia di Ekspiashon, yamá Yom Kippur na hebreo, bista di henter Israel tabata bira den direkshon di e santuario. Levítiko 16 i 23 ta duna instrukshonnan eksplísito pa e Dia di Ekspiashon. Tur aktividat regular tabata stòp. Tur hende tabata yuna. Miéntras e sumo saserdote tabata drenta den e presensia di Dios pa nan den e Lugá Santísimo, e hendenan tabata saminá nan kurason. Nan tabata buska Dios den humildat i konfeshon sinsero.

Kualke hende ku no tabata “aflihí” riba e Dia di Ekspiashon lo a ser “kòrta kitá afó”, lo no tabata parti mas di e pueblo skohí (Lev. 23:27,29). Riba e Dia di Ekspiashon, e sumo saserdote tabata hiba e sanger di e kabritu di Señor den e santuario i, despues di a sprengu e riba e propisiatorio, tabata apliká e sanger na e kachunan di e altar di oro i di e altar di bròns, purifikando henter e santuario kompletamente. Ora el a pone “un fin na rekonsiliashon”, e sumo saserdote tabata pone su mannan riba e kabritu bibu i konfesá e pikánan di Israel. Despues e tabata ser hibá den desierto pa ta separá for di e kampamentu pa semper (Lev. 16:20–22).

E sanger tabata keda transferí den e santuario durante e servisionan diario, mustrando e registro di piká (Jer. 17:1) i Dios tumando responsabilidat pa su disposishon final. Awor, riba e Dia di Ekspiashon, tabata transfirié pafó di e santuario i tabata pon’e riba kabes di e kabritu di skapatorio Azazel, ku ta representá Satanas i ta revelá su responsabilidat final pa e problema di piká.

Tabata hiba e kabritu akí leu den desierto pa asina, na final di e Dia di Ekspiashon, Dios tabatin un santuario limpi i un pueblo limpi. Den e santuario selestial Kristu ta ministrá pa nos, promé den e Lugá Santu, i awor, den e Lugá Santísimo for di 1844, na final di e 2.300 dianan.

Nos lo pasa dor di e gran huisio akí pa motibu di Hesus, nos Supstituto. Manera Ellen G. White a bisa, nos ta “hustifiká pa medio di Su hustisia, den kua nos no tabatin parti.”— The Desire of Ages, p. 25. Komo resultado di e hustisia akí, akreditá (imputá) na nos, nos ta aflihí nos alma, ku ta un biramentu for di piká. Esei ta nifiká ku nos no a yega na un aseptashon kómodo di maldat, ni nos ta diskulpando òf teniendo duru na pikánan tesorá. En kambio, nos ta kresiendo den grasia i bibando un bida di santidat.

Kiko ta nifikashon di e Dia di Ekspiashon den nos bida awe? Dikon e mester hasi un diferensia den e manera ku nos ta biba?

Kompará Daniel 7:9, 10; Revelashon 14:6, 7. Kua ta e similaridat entre e dos pasashinan akí?

E huisio ta un tema prominente den henter Beibel. “Pasobra Dios lo trese tur obra na huisio, inkluyendo tur kos sekreto, sea bon òf malu” (Ekl. 12:14, NKJV). Hesus a mustra Su skuchadónan na un futuro tempu di huisio, ora “kada palabra vano ku hende nan papia, e lo duna kuenta di dje riba e dia di huisio” (Mat. 12:36, NKJV). Apòstel Pablo ta añadí: Dios lo “trese na klaridat e kosnan skondí di skuridat, i lo manifestá e intenshonnan di kurason” (1 Kor. 4:5, NKJV). E mensahero angelikal a bisa Juan: “E ora di Su [di Dios] huisio a yega” (Rev. 14:7, NKJV).

Lesa Revelashon 22:10–12. Ora Hesus regresá, kiko ta destino di henter humanidat? Ki deklarashon kla ta hasi na Juan?

Ya ku Hesus ta bini pa repartí Su rekompensanan final, mester tin un huisio promé ku esei, pa mustra ken lo risibí kua rekompensa ora E bini. Ora Kristu regresá, no tin un di dos chèns. Tur ser humano tabatin sufisiente informashon pa tuma nan desishon final i irevokabel pa òf kontra Kristu.

Lesa Mateo 25:1–13. Dikon Hesus ta relashoná di forma asina diferente ku e dos diferente gruponan di kreyente?

“Ora e obra di investigashon lo terminá, ora a saminá i a disidí e kasonan di esnan ku den tur siglo a profesá di ta siguidónan di Kristu, e ora ei, i no te e ora ei, tempu di grasia lo sera, i lo sera porta di mizerikòrdia. Pues, den un frase kòrtiku: ‘Esnan ku tabata kla a drenta huntu kunE den e kasamentu: i e porta a sera,’ ta hiba nos atraves di e ministrashon final di e Salbador, te na e momento ora e gran obra pa salbashon di hende lo ta kompletá.”— Ellen G. White, The Great Controversy, p. 428.

Nos no mester tin miedu di e huisio. Atraves di Kristu, pordon ta di nos, libertat di kulpa ta di nos, poder pa biba un bida deboto ta di nos, i viktoria final ta di nos.

Lesa Hebreonan 4:14–16 i Hebreonan 10:19–22. Ki siguransa i invitashon divino e versíkulonan akí ta duna kada un di nos?

Pablo su punto aki den Hebreonan ta “tene duru”, “bin ku kurashi”, “nunka entregá”, enfoká bo fe riba Hesus, nos gran Sumo Saserdote. Den Hesus, nos tin tur loke nos mester. Pa medio di fe nos por drenta den e santuario selestial atraves di e “kaminda nobo i bibu” ku Hesus a habri pa nos.

Ora nos wak den e plenchi, nos ta mira sanger riba e kachunan di e altar di bròns. Den e Lugá Santu nos ta mira sanger riba e kachunan di oro di e altar di sensia. Nos ta kontemplá e sanger di sprengu riba e kortina dilanti di e propisiatorio.

E sanger di Hesus ta prepará e kaminda na kada paso. Esaki ta duna nos speransa, ya ku nos por tin reunion ku Dios solamente si Hesus pordoná nos i kita nos pikánan. E mizerikòrdia di Dios ta infinito, pero asina Su hustisia tambe ta. I hustisia no por aseptá e sakrifisio di Kristu komo ekspiashon pa nos infrakshonnan a ménos ku Hesus garantisá promé pa pordoná nos pikánan i despues kita nan.

Lesa Revelashon 11:19. Den konteksto di e gran konflikto, dikon e vishon akí ta signifikante? Kon e ta mustra e konekshon inseparabel entre e lei i e evangelio?

Aki, den e brio deslumbrante i gloria enorme di e presensia di Dios, den e sala di trono di e universo, na pia di e trono di Dios, nos ta deskubrí e lei di Dios den e arka di aliansa. Aki, den e Lugá Santísimo, Dios su hustisia i mizerikòrdia ta keda revelá. Ningun poder terenal por kambia e lei di Dios pasobra, entre otro, e ta ankrá den e arka di aliansa den shelu. Hebreonan 8:10 ta bisa: “ ‘Pasobra esaki ta e aliansa ku lo Mi sera ku e kas di Israel despues di e dianan ei, Señor ta bisa: lo Mi pone Mi leinan den nan mente, i skirbi nan riba nan kurason; i lo Mi ta nan Dios, i nan lo ta Mi pueblo’ ” (NKJV). Oranos drenta, pa medio di fe, den e santuario selestial, nos ta haña pordon pa nos pikánan di pasado i poder pa biba un bida obediente atraves di Kristu, kende a muri pa nos i ta skirbi e lei den nos kurason. Hesus ta salba nos te “den ekstremo” (Hebr. 7:25, NKJV). Hesus ta salba nos totalmente i kompletamente, di e kastigu di piká i di su poder.

Dikon e interseshon di Hesus ta un notisia asina inkreiblemente bon? Miéntras nos ta para dilanti di e lei komo e norma di hustisia, ki speransa nos lo tabatin sin e evangelio?

Lesa Hebreonan 10:9–14. Ki diferensia e pasashi akí ta revelá entre e ministerio di e saserdote den e santuario terenal i e ministerio di Hesus den e santuario selestial?

Un bia i pa semper, Kristu a muri riba e krus komo un sakrifisio perfekto pa piká. Su ministerio saserdotal den e santuario selestial ta santifiká nos. Awor ku El a drenta den e Lugá Santísimo, E ta para komo nos Abogado den e huisio (lesa 1 Juan 2:1). “Kristu a ser ofresé un biaha pa semper komo un sakrifisio pa kita e pikánan di hopi hende. E lo bini atrobe, no pa atendé ku nos pikánan, sino pa trese salbashon na tur esnan ku ta spera ansiosamente riba djE” (Hebr. 9:28, NLT). Atraves di Su sakrifisio i mediashon, a regla kuenta ku piká. Awor E ta bini atrobe pa esnan ku “ta stima Su aparishon” (2 Tim. 4:8).

Lesa Hebreonan 6:19,20. Dikon E ta invitá nos pa siguiE, i kiko nos ta deskubrí ora nos sigui?

“E interseshon di Kristu na fabor di hende den e santuario aki riba ta mes esensial na e plan di salbashon ku Su morto riba e krus tabata. Pa medio di Su morto El a kuminsá e obra ei ku, despues di Su resurekshon, El a asendé pa kompletá den shelu. Pa medio di fe nos mester drenta denter di e velo, ‘kaminda e predesesor a drenta pa nos.’ Hebreonan 6:20 (NKJV). Ei e lus di e krus di Kalvario ta reflehá. Ei nos por haña un persepshon mas kla den e misterionan di redenshon. E salbashon di hende ta ser lográ na un kosto infinito pa shelu; e sakrifisio hasí ta igual na e demandanan di mas amplio di e lei kibrá di Dios. Hesus a habri kaminda na e trono di e Tata, i atraves di Su mediashon e deseo sinsero di tur ku bini serka djE den fe por ser presentá dilanti di Dios.”—Ellen G. White, The Great Controversy, p. 489.

E plan di salbashon ta un plan kompleto pa resolvé e gran konflikto i reskatá e planeta akí for di gara di Satanas. E bida di Hesus a revelá e amor di Dios na un mundu den nesesidat i un universo ku ta opservá. Su morto a revelá kon horibel piká ta i a proveé salbashon pa henter humanidat. Su interseshon den e santuario selestial ta proveé e benefishinan di ekspiashon na kada un ku rèk man den fe pa risibí nan.

Kon e morto di Kristu riba e krus ta relashoná ku Su interseshon den e santuario selestial, i dikon e huisio ta asina nesesario pa e plan di salbashon?

Nota kon ta deskribí e obra di Hesus pa nos den e huisio i nos ròl: “Hesus no ta diskulpá nan pikánan, sino ta mustra nan penitensia i fe, i, reklamando pordon pa nan, E ta hisa Su mannan heridá dilanti di e Tata i e angelnan santu, bisando: Mi konosé nan na nòmber. Mi a graba nan den Mi plantanan di man. ‘E sakrifisionan di Dios ta un spiritu kibrá, un kurason kibrá i repentí; esakinan, o Dios, Bo no ta despresiá.’ Salmo 51:17, NKJV. I na e akusadó di Su pueblo E ta deklará: ‘Señor reprendé bo, o Satanas; asta e Señor ku a skohe Herusalèm ta reprendé bo.’ ”—Ellen G. White, The Great Controversy, p. 484.

“E echo ku e pueblo rekonosé di Dios ta keda representá komo pará dilanti di Señor den pañanan shushi mester hiba na humildat i skrudiñamentu profundo di kurason di parti di tur ku ta profesá Su nòmber. Esnan ku en efekto ta purifikando nan alma dor di obedesé e bèrdat lo tin un opinion di mas humilde di nan mes. Mas djaserka nan wak e karakter impekabel di Kristu, mas fuerte nan deseo lo ta di ta konforme Su imágen, i ménos nan lo mira puresa òf santidat den nan mes. Pero aunke nos mester realisá nos kondishon pekaminoso, nos mester konfia riba Kristu komo nos hustisia, nos santifikashon, i nos redenshon. Nos no por kontestá e akusashonnan di Satanas kontra nos. Kristu so por hasi un defensa efektivo na nos fabor. E por silensiá e akusadó ku argumentonan fundá no riba nos méritonan, sino riba esnan di E mes.”—Ellen G. White, Testimonies for the Church, tomo 5, p. 471, 472.

“Nos ta bibando awor den e gran Dia di Ekspiashon. Den e servisio típiko, miéntras e sumo saserdote tabata hasiendo ekspiashon pa Israel, tur tabata ser rekerí pa aflihí nan alma atraves di arepentimentu di piká i humiliashon dilanti di Señor, pa no kòrta nan kita for di meimei di e pueblo. Di mes manera, tur ku ke konservá nan nòmber den e buki di bida mester, den e poko dianan ku a keda di nan prueba, aflihí nan alma awor dilanti di Dios pa medio di duele pa piká i berdadero arepentimentu.”— The Great Controversy, p. 489, 490.

Preguntanan pa Diskushon:

Ki emoshonnan ta lanta na e pensamentu ku Hesus ta hisando Su mannan heridá pa nos dilanti di e Tata? Dikon esaki ta nos úniko speransa den e huisio?

Nos ta bibando den e Dia di Ekspiashon. Ekspiashon ta e obra di Dios pa salba pekadornan pèrdí. Dikon, antó, kualke dia dediká na e obra di Dios pa salba pekadornan lo mester ta bon notisia?

Opservá loke Ellen G. White a skibi: “Kristu so por hasi un defensa efektivo na nos fabor. E por silensiá e akusadó ku argumentonan fundá no riba nos méritonan, sino riba di E mes.”— Advent Review and Sabbath Herald, 2 di yanüari 1908. Kon bo por hasi e speransa akí di bo mes?