Lesa Revelashon 11:19, Eksodo 25:16, Eksodo 31:18, i Revelashon 12:17. Kiko e versíkulonan akí ta indiká ku tabatin den e Arka di Aliansa den e Lugá Santísimo di e santuario?

E Dia di Ekspiashon tabata un dia di huisio. Henter Israel tabata ser ordená pa partisipá den e evento akí pa medio di repentimentu, saminashon di alma, i apstenshon di tur trabou (lesa Lev. 23:29–31). Riba e dia akí so e sumo saserdote lo a drenta den e Lugá Santísimo pa hasi ekspiashon pa piká. Ei, den e apartamento te mas paden di e santuario, tabatin e Arka di Aliansa. Denter di e arka tabatin e lei di e Dies Mandamentunan di Dios, skirbí riba tablanan di piedra. Tabata yama e tapa di oro di e arka e propisiatorio, kaminda tabata sprengu sanger pa purifiká e santuario di piká. E presensia di Dios tabata ser manifestá den e gloria Shekinah riba e propisiatorio. Kada sakrifisio ofresé tabata revelá e mizerikòrdia di Dios pa ku sernan humano pekaminoso, pero e Dia di Ekspiashon ta mustra ku piká ta ser rekordá te na e dia di huisio (Hebr. 10:3) i ku e por a ser kitá realmente solamente atraves di fe den e sanger di Kristu pa purifiká di piká (1 Pe. 1:18,19). Einan, den presensia di Dios, mizerikòrdia i hustisia ta kombiná di forma magnífiko.

Miéntras apòstel Juan tabata wak den e santuario selestial, el a mira “e tèmpel di Dios . . . habrí” i e “arka di Su aliansa” revelá (Rev. 11:19). The Great Controversy ta añadí e komentario akí: “Denter di e lugá santísimo, den e santuario den shelu, e lei divino ta ankrá sagradamente, e lei ku Dios Mes a pronunsiá meimei di e dòndernan di Sinai i a skirbi ku Su mes dede riba e tablanan di piedra. E lei di Dios den e santuario den shelu ta e gran original, di kua e preseptonan inskribí riba e tablanan di piedra i registrá pa Moises den e Pentateuko, tabata un kopia infalibel. Esnan ku a yega na komprondé e punto importante akí a ser hibá asina na mira e karakter sagrado i inkambiabel di e lei divino.”—Ellen G. White, The Great Controversy, p. 434.

Segun ku e promé kreyentenan atventista tabata studia e siñansa di Beibel riba e santuario, nan a realisá e nifikashon di e lei di Dios i e Sabat den kurason di e lei di Dios. Nan a rasoná ku, si e lei di Dios tabata ser representá den e Arka di Aliansa den e santuario selestial, siguramente e no por a ser abolí na e krus.

Pensa riba e Sabat, ku, na mil mia pa ora, ta yega serka nos tur siman sin eksepshon. Kiko esei mester bisa nos tokante e importansia di e doktrina di Kreashon? Kua otro doktrina tin un rekordatorio asina poderoso, i rekurente?

Lesa Mateo 5:17, 18; Salmo 111:7, 8; Eklesiastés 12:13, 14; 1 Juan 5:3; Proverbionan 28:9. Kiko e pasashinan di Beibel akí ta siña tokante e relashon kristian ku e lei?

Atventistanan di e di Shete dia ta sigui den e pasonan di e reformadónan protestant ku tabata defendé e santidat di e lei di Dios. Nota e afirmashon poderoso akí di John Wesley: “E lei ritual òf seremonial ku Moises a entregá na e yunan di Israel, ku ta kontené tur e mandatonan i ordenansanan ku tabata relashoná ku e sakrifisionan bieu i servisio di e tèmpel, nos Señor en bèrdat a bin pa destruí, pa disolvé i abolí totalmente. . . . Pero e lei moral, kontené den e Dies Mandamentunan, i apliká pa e profetanan, E no a kita. No tabata intenshon di Su binida pa revoká niun parti di esaki. Esaki ta un lei ku no por ser kibrá nunka, ku ‘ta para firme komo e testigu fiel den shelu.’ . . . Kada parti di e lei akí mester permanesé na vigor, riba henter humanidat, i den tur époka; komo no dependiendo ni riba tempu òf lugá, òf kualke otro sirkunstansia suseptibel na kambio, sino riba e naturalesa di Dios i e naturalesa di hende, i nan relashon inkambiabel na otro.”—“Upon Our Lord’s Sermon on the Mount,” Discourse V, John Wesley’s Sermons: An Anthology (Nashville, TN: Abington Press, 1991), p. 208, 209.

Kompará Eksodo 34:5–7; Romanonan 7:11, 12; Salmo 19:7–11; Salmo 89:14; Salmo 119:142, 172. Kiko e versíkulonan akí ta bisa nos tokante e relashon entre e lei di Dios i e karakter di Dios?

Ya ku e lei di Dios ta un kopia di Su karakter, e fundeshi di Su trono, i e base moral pa humanidat, Satanas ta odi’e. “Niun hende por a keda sin mira ku si e santuario terenal tabata un figura òf patronchi di esun selestial, e lei depositá den e arka riba tera tabata un kopia eksakto di e lei den e arka den shelu; i ku un aseptashon di e bèrdat enkuanto di e santuario selestial tabata enbolbí un rekonosementu di e afirmashonnan di e lei di Dios i e obligashon di e Sabat di e di kuater mandamentu. Aki tabatin e sekreto di e oposishon amargo i determiná pa e eksposishon harmonioso di e Skrituranan ku tabata revelá e ministerio di Kristu den e santuario selestial.”—Ellen G. White, The Great Controversy, p. 435.

Kua ta e motibunan ku hende ta duna hopi biaha pa argumentá ku nos no ta obligá mas pa warda e Dies Mandamentunan? Kiko bo ta kere ku tin realmente su tras?

Lesa Revelashon 14:6, 7; Revelashon 4:11; Génesis 2:1–3; Eksodo 20:8–11. Kua ta e relashon entre Kreashon, Sabat, i e lei di Dios?

Kreashon ta papia di nos balor den bista di Dios. Nos no ta nos so den e universo, un partíkula di stòf kósmiko, ni nos no ta un aksidente genétiko. Ku otro palabra, e senario sientífiko komun di orígennan di bida, ku a ser rekohé dor di medionan di komunikashon i kultura popular, ta presentá un bista di nos orígennan ku den tur forma ta inkompatibel ku e relato bíbliko.

Nos ta aki pasobra Hesus a krea nos. I E ta digno di nos adorashon no solamente pasobra El a krea nos, sino tambe pasobra El a redimí nos. Kreashon i Redenshon ta e núkleo di tur berdadero adorashon. P’esei, e Sabat ta vital pa komprondé e plan di salbashon. E Sabat ta papia di e kuido di un Kreador i e amor di un Redentor.

Na konklushon di e siman di kreashon, Dios a sosegá den e beyesa i mahestat di e mundu ku El a traha. El a sosegá tambe komo un ehèmpel pa nos. E Sabat ta un pousa semanal pa alabá Esun ku a traha nos. Ora nos ta adorá riba Sabat, nos ta habri nos kurason pa risibí e bendishon spesial ku El a pone riba e dia ei so, i riba niun otro dia.

E Sabat ta mustra nos na un Kreador ku ta stima nos demasiado hopi pa bandoná nos ora nos a desviá for di Su propósito pa nos. E Sabat ta un símbolo eterno di nos sosiegu den djE. E ta un señal spesial di lealtat na e Kreador (Ezek. 20:12,20). E ta un símbolo di sosiegu, no di obranan; di grasia, no di legalismo; di siguransa, no di kondena; di dependé riba Dios pa salbashon, no riba nos mes. Berdadero sosiegu di Sabat ta e sosiegu di grasia den e brasanan amoroso di Esun ku a krea nos, Esun ku a redimí nos, i Esun ku ta biniendo atrobe pa nos.

E mensahe di Revelashon 14, Dios su mensahe di tempu di fin pa mundu, ta yama hende pa sosegá den Su amor i kuido kada Sabat. E ta yama nos pa rekordá Esun ku a krea nos i dun’E gloria. Warda Sabat ta tambe un laso di konekshon entre e perfekshon di Eden i e gloria di e shelunan nobo i e tera nobo ku ta bai bin. E ta kòrda nos ku un dia e splendornan di Eden lo ser restorá.

Mayoria atventista di e di shete dia a enfrentá e akusashon di ta legalista, i e akusashon ei generalmente ta konektá ku nos wardamentu di Sabat. Diskutí e Sabat komo un símbolo di redenshon i hustifikashon pa medio di fe. Dikon obedesé e mandato di Dios pa sosegá lo a hiba hende na pensa ku nos ta tratando di habri nos kaminda pa shelu?

Lesa Revelashon 12:12; Revelashon12:17; Revelashon 13:7. Kon e tekstonan akí ta revelá e furia di Satanas? Dikon diabel ta asina rabiá ku Dios su pueblo di tempu di fin?

Revelashon ta deskribí e konflikto kósmiko entre Kristu i Satanas atraves di siglonan. E ta kulminá ku e atake final di Satanas riba e pueblo di Dios. Revelashon 13 ta introdusí e dos aliadonan di e dragon, e bestia di laman i e bestia di tera. E dos podernan akí ta uni kuné pa hasi guera kontra e pueblo di Dios.

Lesa Revelashon 13:4,8,12,15 i Revelashon 14:7,9-11. (Lesa tambe Rev. 15:4; Rev. 16:2; Rev. 19:20; Rev. 20:4; Rev. 22:9.) Kua tema prinsipal ta paresé den tur e versíkulonan akí?

Paga tinu riba e kontraste. Sea hende ta adorá e Kreador òf nan ta adorá algu otro. E Kreador ta digno di adorashon (Rev. 5:9). E konflikto entre Kristu i Satanas a kuminsá den shelu tokante adorashon: “Lo mi subi mas ariba ku e halturanan di e nubianan; lo mi ta meskos ku e Haltísimo” (Isa. 14:14, NKJV). Satanas tabata ke e adorashon ku ta pertenesé solamente na e Kreador. Di akuerdo ku Revelashon 13, e ta logra atraves di e aktividat di e bestia di tera (Rev. 13:4).

Un komparashon ku Daniel 7 ta mustra ku e bestia di tera akí ta mesun kos ku e kachu chikitu ku “ta purba kambia tempunan i leinan” i ta ehersé outoridat pa 1.260 “dia” profétiko, es desir, pa 1.260 aña (Dan. 7:25; kompará Rev. 13:5; lesa lès 6). E úniko parti di e lei Dios, e Dies Mandamentunan, ku ta trata ku tempu, ta e di kuater mandamentu. E iglesia akí a trata na kambia e dia di adorashon di djasabra, e di shete dia, pa djadumingu, e promé dia di siman.

Pa un poder terenal trata na kambia e dia di adorashon, e Sabat di e di shete dia, ku Dios Mes a duna komo un señal di Su outoridat (Eks. 31:13; Ezek. 20:12; Ezek. 20:20), ta un intento pa poderá di e outoridat divino na e nivel di mas básiko posibel. Riba e punto akí, e ora ei, tin e enfoke di e konflikto final riba adorashon berdadero i falsu.

Pa e motibu akí, Revelashon ta identifiká e hendenan ku ta fiel na Dios komo esnan “ku ta warda e mandamentunan di Dios” (Rev. 12:17; Rev. 14:12). Esaki ta inkluí e Sabat di e di shete dia, no djadumingu. Esnan ku ta rechasá e último yamada di e tres angelnan pa adorá Dios riba Su dia santu (Isa. 58:13) i ku ta adorá e bestia riba su Sabat falsifiká, djadumingu, lo risibí e marka di e bestia (lesa lès 11).

Den Revelashon 14:7, e promé angel ta grita ku un bos duru: “ ‘Teme Dios i duna gloria na djE, pasobra e ora di Su huisio a yega; i adorá Esun ku a traha shelu i tera, laman i fuentenan di awa’ ” (NKJV). E apelashon di shelu ta pa nos duna nos lealtat supremo i adorashon sinsero na e Kreador den lus di huisio inminente.

E di dos angel ta deklará: “ ‘Babilonia a kai, a kai, e gran siudat ei, pasobra el a hasi tur nashon bebe di e biña di e rabia di su fornikashon ” (Rev. 14:8, NKJV). Babilonia ta representá un sistema religioso apóstata kaí, ku a rechasá e mensahe di e promé angel na fabor di un sistema di adorashon falsu. Ta p’esei Revelashon 14:9–11 ta spièrta kontra adorá “e bestia i su imágen”. Dos eskoho opuesto ta ser presentá aki: adorashon di e Kreador òf adorashon di e bestia. Kada persona riba planeta Tera lo tuma nan desishon final i irevokabel riba ken tin nan lealtat total, Hesus òf Satanas.

Lesa Revelashon 14:12. Kua ta e dos karakterístikanan ku ta identifiká esnan ku ta nenga di adorá e bestia? Dikon tur dos ta di vital importansia?

Dios lo tin un pueblo di tempu di fin ku ta leal na djE apesar di e oposishon di mas grandi i e persekushon di mas feros den historia di mundu. Atraves di e don di hustisia di Kristu, nan lo biba un bida obediente i yená ku grasia. Adorá e Kreador ta para den oposishon direkto ku adorá e bestia i ta keda ekspresá den warda e mandamentunan di Dios. E konflikto final akí riba lealtat na Kristu òf lealtat na e poder di e bestia ta sentrá riba adorashon, i den núkleo di e gran konflikto akí entre bon i malu tin e Sabat.

E siguidónan komprometé akí di e Salbador lo no tin solamente fe “den” Hesus, ma nan lo tin tambe e fe “di” Hesus. E fe di Hesus ta un fe asina profundo, asina konfiá, asina komprometé, ku tur e demoñonan den fièrnu i tur e pruebanan riba tera no por sakudié. Ta un fe ku ta konfia ora e no por mira, ta kere ora e no por rasoná dikon, i ta spera ora e no por komprondé. E “fe di Hesus” akí mes ta un regalo ku nos ta risibí pa medio di fe. E lo yuda nos superá e krísis ku tin nos dilanti. Ora e krísis final kuminsá i nos ta enfrentá un bòikòt ekonómiko, persekushon, enkarselashon, i morto mes, e fe di Hesus lo yuda nos superá e último oranan di tera te ora Hesus bini bèk.

Kon Dios ta preparando bo fe awe pa loke ta biniendo den futuro?

“Pa falta di testimonio di Beibel na nan fabor, hopi a insistí, ku persistensia inkansabel, lubidando kon e mesun rasonamentu a ser usá kontra Kristu i Su apòstelnan: ‘Dikon nos gran hòmbernan no ta komprondé e asuntu di Sabat? Pero poko ta kere manera boso ta kere. No por ta ku boso ta korekto i ku tur e hòmbernan sabí den mundu ta robes.’

“Pa refutá argumentonan asina solamente tabata nesesario sita e siñansanan di e Skrituranan i e historia di e trato di Señor ku Su pueblo den tur époka.”—Ellen G. White, The Great Controversy, p. 455.

“Kristiannan di generashonnan pasá tabata warda djadumingu, suponiendo ku, hasiendo asina, nan tabata wardando e Sabat di Beibel; i awor tin berdadero kristiannan den tur iglesia, sin hasi eksepshon di e komunion katóliko romano, ku ta kere sinseramente ku djadumingu ta e Sabat di institushon divino. Dios ta aseptá nan sinseridat di propósito i nan integridat Su dilanti. Pero ora wardamentu di djadumingu lo ser imponé pa medio di lei, i mundu lo ser iluminá respekto obligashon di e berdadero Sabat, e ora ei, ken ku lo violá e mandato di Dios, pa obedesé un presepto ku no tin outoridat mas haltu ku esun di Roma, lo honra asina papado riba Dios. E ta dunando homenahe na Roma i na e poder ku ta imponé e institushon ordená pa Roma. E ta adorando e bestia i su imágen. Miéntras hende e ora ei ta rechasá e institushon ku Dios a deklará di ta e señal di Su outoridat, i honra na lugá di esei e loke Roma a skohe komo e señal di su supremasia, nan lo aseptá asina e señal di lealtat na Roma, ‘e marka di e bestia.’ I ta te ora presentá e asuntu klaramente dilanti di e pueblo, i nan ta haña nan mes obligá di skohe entre e mandamentunan di Dios i e mandamentunan di hende, esnan ku sigui den transgreshon lo risibí ‘e marka di e bestia.’ ”—Ellen G. White, The Great Controversy, p. 449.

Preguntanan pa Diskushon:

Mundu ta kambiando asina rápidamente, asina dramátikamente. Dikon nos mester ta vigilante semper pa asina e eventonan di último dia no gara nos sin ta prepará?

Kon un komprondementu di e huisio i e lei di Dios ta harmonisá ku e echo ku nos ta salbá pa grasia so?

Kua ta maneranan ku bo por testifiká na esnan ku no ta kapta e nifikashon di e berdadero Sabat i sinseramente ta warda djadumingu, e promé dia di siman?

Ki peligernan ta eksistí den e union di e podernan di iglesia i estado? Kon, komo kristiannan, nos mester relashoná nos mes ku gobièrnu?