Lesa Revelashon 22:11,12; Daniel 12:1,2; Jeremias 30:5–7. Kua eventonan ta tuma lugá djis promé ku e Segundo Binida?

E klousura di probashon humano ta ser siguí pa un tempu di angustia “ ‘manera nunka tabatin desde ku tabatin un nashon te na e tempu ei’ ”. Revelashon 16 ta deskribí shete último plaga ku lo ser bashá riba e mundu malbado. Pero, manera ku e plaganan ku a kai riba Egipto, e pueblo di Dios lo ser protehá di nan. Paga tinu riba e promesa den Daniel: “ ‘I den e tempu ei bo pueblo lo ser liberá, tur hende ku ser hañá skirbí den e buki’ ” (Dan. 12:1, NKJV). Esaki mester ta refiriendo na e “buki di bida” (lesa Fil. 4:3; Rev. 13:8; Rev. 20:12,15; Rev. 22:19). Si nos a keda fiel na Hesus, nos nòmbernan lo no ser pagá for di e buki di bida (Rev. 3:5).

Lesa 1 Juan 3:1–3; Juan 8:29; Juan 14:30. Kiko ta e úniko preparashon sufisiente pa e tempu di angustia benidero?

Den e tempu di angustia, e pueblo di Dios tin un relashon personal ku Hesus asina profundo, ku nada no por kambi’e. Nan deseo perfekto ta pa agrad’E den tur kos pa asina, atraves di e obra di Spiritu Santu, nan lo ta mes puru ku E ta puru. No tabatin nada den kurason di Hesus ku tabata reakshoná riba e engañonan di Satanas. Nos tambe por reflehá e aspekto akí di Su karakter.

Lesa Salmo 27:5; Salmo 91:1–11; Revelashon 3:10–12. Kua promesanan trankilisante Dios ta duna nos pa e tempu di angustia?

Tin algun hende ku a mal komprondé e konsepto di biba atraves di e tempu di angustia sin un mediadó. Hesus ta stòp Su mediashon den e santuario selestial ora tur hende a tuma nan desishon final pa òf kontra djE. Pero esaki no ta nifiká ku nos ta nos so durante e tempu akí, konfiando den nos propio forsa. Hesus a sigurá nos ku E lo ta ku nos semper (Mat. 28:20). Fe ta konfia ora e no por mira i ta kere asta ora e mundu rònt di nos ta kai den otro. Durante e tempu di angustia nos fe ta fortalesé i nos anhelo pa eternidat ta oumentá, di manera ku nos úniko deseo ta di biba ku Hesus pa semper.

Lesa Juan 14:1–3; Tito 2:11–14. Den lus di e desafionan di futuro i e tempu di angustia benidero, dikon e versíkulonan akí ta asina alentador?

Hesus su palabranan, “ ‘No laga boso kurason bira intrankil’ ”, ta Su garantia ku E lo no bandoná nos nunka i ta bini bèk pa hiba nos kas. E mundu akí no ta nos hogar. Un mihó dia ta biniendo. Un biaha den kada 25 versíkulo, Tèstamènt Nobo ta papia di e regreso di nos Señor. Ora dianan ta skur i e leinan opresivo di un poder di iglesia-estado ta menasá nos bida, e promesa di Hesus su binida ta yena nos kurason ku speransa. Esaki ta e “speransa bendishoná” ku a inspirá e pueblo fiel di Dios den tur generashon.

Lesa Revelashon 6:15–17; Isaias 25:8,9. Kompará e aktitut di esnan salbá i esnan pèrdí revelá den e versíkulonan akí. Kiko ta splika e diferensia entre e dos mentalidatnan akí?

E malbadonan ta realisá e konsekuensianan horibel di piká miéntras e hustunan a aseptá e provishonnan maravioso di grasia. Rebelion kontra Dios ta hiba na miedu, kulpa, kondena, i finalmente pèrdida eterno. Nos kontesta riba Su grasia salbador ta hiba na pordon, pas, i goso eterno na Su glorioso regreso.

Lesa Revelashon 15:3,4; Revelashon 19:7. Kon e redimínan lo respondé riba e glorioso salbashon proveé asina generosamente pa medio di Kristu?

“E krus di Krsitu lo ta e siensia i e kantika di e redimínan durante henter eternidat. Den Kristu glorifiká nan lo kontemplá Kristu krusifiká. . . . Ku e Hasidó di tur mundu, e Arbitro di tur destino, lo a pone Su gloria un banda i humiliá Su mes pa amor pa hende, semper lo spiérta e atmirashon i adorashon di universo.”—Ellen G. White, The Great Controversy, p. 651.

Lesa Revelashon 12:17; Revelashon 17:13, 14; Revelashon 19:11-16. Paga tinu kuidadosamente riba e progreshon di e versíkulonan akí. Kiko e progreshon den e versíkulonan akí ta bisa tokante e último guera di tera i e viktoria final di Kristu?

Revelashon 19 ta terminá ku un deskripshon dramátiko di e regreso di Hesus i e destrukshon di e malbadonan. Pero e storia no a kaba. Revelashon 20 ta introdusí nos na un periodo ku ta dura 1.000 aña, konosí komo e “milenio”.

Lesa Revelashon 20:1–3. Kiko ta Satanas su destino ora Hesus regresá?

E lenguahe figurá den Revelashon 20:1–3 ta simbóliko. Satanas no ta literalmente mará ku un kadena i será den un pos. Pa 1.000 aña e ta limitá na e tera bandoná i despoblá akí, mará pa e sirkunstansianan ku e mes a krea. Den 2 Pedro 2:4 nos ta lesa ku Satanas i su angelnan tabata reservá pa kastigu pa medio di “kadenanan di skuridat”. Satanas lo ta limitá na tera pa medio di un kadena di sirkunstansianan, sin niun hende pa tenta. Pa 1.000 aña e lo mira e desolashon, destrukshon i desaster ku su rebelion a krea.

E palabra griego tradusí “pos sin fondo” ta e mesun palabra for di kua nos ta haña nos palabra papiamentu “abismo”. E ta tambe e mesun palabra uzá den e Septuaginto, e tradukshon griego di Tèstamènt Bieu, pa deskribí e tera na Kreashon. “I tera tabata sin forma, i bashí; i tabatin skuridat riba e profundidat” (Gen. 1:2, NKJV). Den e Septuaginto, e palabra “profundidat” akinan ta e palabra griego abyssos, “abismo”. E ta deskribí un tera desolá. E “pos sin fondo” no ta un kueba supteráneo òf un abismo enorme un kaminda eifó den universo. Satanas su obra di piká i destrukshon, huntu ku e tremendo káos ku ta presedé e Segundo Binida, a trese tera bèk na un masa skur i desorganisá meskos ku su kondishon na prinsipio di Kreashon.

Lesa Jeremias 4:23–26; Jeremias 25:33. Kon e profeta bíbliko ta deskribí e esena akí?

Aki e profeta ta enfatisá e destrukshon katastrófiko na e segundo binida di Kristu i ku niun persona ta ser lagá bibu riba tera durante e periodo di mil aña akí. Satanas i su angelnan malbado ta ser lagá pa kontemplá e desaster kousá pa su rebelion. Henter universo ta rekonosé di nobo ku pago di piká ta morto. Dios ta trata ku e problema di piká pa asina e lo no bolbe surgi nunka mas (Nah. 1:9). Tin tres forma prinsipal ku Dios ta hasi esaki. Di promé, E ta revelá Su amor ilimitá, deseo pashoná, i esfuersonan implakabel pa salba humanidat. Di dos, E ta revelá Su hustisia, honestidat, i rektitut. Di tres, E ta permití universo mira e resultadonan final di piká i rebelion.

Lesa Revelashon 20:4–6. Kiko e hustunan ta hasiendo durante e 1.000 añanan, i dikon e ta importante?

Durante e milenio, e hustunan lo tin un oportunidat pa opservá personalmente e hustisia i amor di Dios den e forma kon El a trata ku e problema di piká. Ken no tin preguntanan ku nan lo tabatin gana di hasi Dios tokante un kantidat di kos? Awor, durante e milenio den shelu, e redimínan por hasi e preguntanan ei. Si un ser kerí òf un amigu será no ta den shelu, esnan salbá tin oportunidat di komprondé e desishonnan di Dios mihó. Di un forma nobo, mas fuerte ku nunka promé, e redimínan lo kapta e intentonan poderoso di Dios pa salba tur persona ku a yega di biba. Nan lo realisá di nobo ku tur hende ku ta pèrdí a pèrdè shelu pa motibu di nan mes rechaso personal di Kristu. Solamente e ora ei Dios ta trese huisio final: e di dos morto, ku ta destrukshon eterno, riba esnan pèrdí.

Lesa Revelashon 20:7–9. Kon e 1.000 añanan ta finalisá? Kiko ta destino di Satanas i su siguidónan?

Pa 1.000 aña Satanas no tabatin niun hende pa tenta òf gaña. E i su angelnan tabata nan so pa reflekshoná riba e konsekuensianan mortal di piká. Na final di e milenio, e mortonan malbado ta ser resusitá pa enfrentá e huisio i risibí nan rekompensa final (Rev. 20:5).

Awor akí Satanas tin un ehérsito enorme di siguidó. Aunke Satanas a sufri derota tras derota den e gran konflikto, e ta sinti su mes animá ora e mira e enorme multitut di esnan pèrdí. No kla ainda pa terminá su rebelion, e ta sali pa gaña e “nashonnan” akí. Satanas ta inspirá nan pa hasi un último gran esfuerso pa tumba Dios i establesé nan propio reino. E término “Gog i Magog” ta ser uzá pa simbolisá Satanas i esnan no salbá di tur siglo. Satanas i su siguidónan ta rondoná “e kampamentu di e santunan i e stat stimá (Rev. 20:9).

Na final di e milenio, no solamente tur e malbadonan ta ser resusitá na bida, sino e Stat Santu, Herusalèm Nobo, ta baha na tera for di shelu (Rev. 21:2)! E santunan tabata biba i reina ku Hesus den e Herusalèm Nobo durante e milenio. Awor, na final di e 1.000 añanan, e stat ta baha na tera huntu ku Dios, Hesus, e angelnan, i tur e redimínan. Tur hende ta presente pa e bataya final di e gran konflikto. Piká ta na punto di ser eradiká un biaha i pa semper!

Kiko e momento di e huisio final ta bisa tokante e karakter di Dios?

Lesa 2 Korintionan 5:10; Romanonan 14:10,11; Revelashon 20:11–15. Kiko nan ta bisa tokante dikon e malbadonan ta ser resusitá atrobe?

Pa resolvé e problema di piká pa asina maldat no surgi nunka mas, tur hende mester ta konvensí ku Dios tabata rekto i hustu den tur Su kamindanan. Finalmente, tur rudia lo dobla i rekonosé e hustisia di Dios den e gran konflikto, asta Satanas i su angelnan malbado, i ku nunka tabatin niun hustifikashon pa rebelion kontra Dios. Tuma nota di e persepshon akí di Ellen G. White: “Asina ku ku e bukinan di registro ser habrí, i wowo di Hesus wak riba e malbadonan, nan ta bira konsiente di tur piká ku nan a yega di kometé. Nan ta mira eksaktamente unda nan pianan a desviá for di e kaminda di puresa i santidat, presis kon leu orguyo i rebelion a hiba nan den violashon di e lei di Dios. E tentashonnan seduktivo ku nan a enkurashá pa medio di indulgensia den piká, e bendishonnan trosé, e mensaheronan di Dios despresiá, e spièrtamentunan rechasá, e olanan di mizerikòrdia rechasá pa e kurason tèrko i impenitente, tur ta aparesé manera skirbí ku lèternan di kandela. . . .

“Henter e mundu malbado ta para inkriminá dilanti di e tribunal di Dios riba akusashon di altu traishon kontra e gobièrnu di shelu. Nan no tin niun hende pa pleita nan kaso; nan ta sin diskulpa; i e sentensia di morto eterno ta ser pronunsiá kontra nan.”— The Great Controversy, p. 666, 668.

Lesa Revelashon 20:9; Salmo 37:20; Malakias 4:1,2. Ki persepshonnan e pasashinan akí ta duna nos tokante e destrukshon final di piká i pekadornan i e rekompensa di e hustunan?

E bon notisia ta ku Satanas i su angelnan malbado lo ser destruí den e lago di kandela. Piká i pekadornan lo ser konsumí. Di akuerdo ku Revelashon 20:9, nan lo ser devorá, destruí, i no tormentá eternamente. E siguiente versíkulo ta uza e ekspreshon: “pa semper i semper”. Dependiendo di e konteksto, e palabra “pa semper” no semper ta nifiká “sin fin” pero, te ora algu a terminá kompletamente. (Lesa Eks. 21:6; 1 Sam. 1:22,28; Judas 1:7; i 2 Pe. 2:4–6.) Pa esnan pèrdí, e destrukshon mes, no e akto di destruí, ta eterno. Dios no ta e torturadó eterno.

Na final, unu di dos eternidat ta spera nos tur. Esnan pèrdí, desafortunadamente, ta risibí e “pago” ku nan a gana: morto eterno. Dikon, antó, nos úniko speransa di no haña loke nos meresé, ku ta morto, ta ser hañá den konfia den e hustisia di Hesus?

“Aya e sabananan enorme ta hincha bira serunan di bunitesa, i e serunan di Dios ta elevá nan tòpnan haltu. Riba e sabananan pasífiko ei, banda di e korientenan bibu ei, e pueblo di Dios, asina tantu tempu peregrino i vagabundo, lo haña un hogar. . . .

“Aya, mentenan inmortal lo kontemplá, ku deleite inagotabel, e maravianan di poder kreador, e misterionan di amor redentor. Lo no tin un enemigu kruel i engañoso pa tenta pa lubidá Dios. Tur fakultat lo ser desaroyá, tur kapasidat oumentá. Atkerimentu di konosementu lo no kansa e mente òf agotá e energianan. Einan e empresanan di mas grandi por ser hibá a kabo, e aspirashonnan di mas haltu alkansá, e ambishonnan di mas haltu realisá; i ainda lo surgi halturanan nobo pa surpasá, maravianan nobo pa atmirá, bèrdatnan nobo pa komprondé, ophetonan fresku pa invoká e podernan di mente i alma i kurpa.”—Ellen G. White, The Great Controversy, p. 675, 677.

“Ku plaser inekspresabel e yunan di tera lo drenta den e goso i e sabiduria di sernan no kaí. Nan ta kompartí e tesoronan di konosementu i komprondementu atkerí durante siglonan den kontemplashon di e obra di Dios. Ku vishon kla nan ta konsiderá e gloria di kreashon: solonan i lunanan i sistemanan ku, tur den nan órden apuntá, ta bulando rònt di e trono di e Deidat. Riba tur kos, for di esun di mas chikitu te na esun di mas grandi, nòmber di e Kreador ta skirbí, i den nan tur tin e rikesanan di Su poder desplegá.”— The Great Controversy, p. 677, 678.

“E gran konflikto a terminá. Piká i pekadornan no tei mas. Henter universo ta limpi. Un sla di harmonia i alegria ta bati atraves di e enorme kreashon. For di djE, ku a krea tur kos, ta kore bida i lus i alegria, atraves di e reinonan di espasio ilimitá. For di e atom di mas chikitu te na e mundu di mas grandi, tur kos, animá i no animá, den nan beyesa nunka bisto i goso perfekto, ta deklará ku Dios ta amor.”— The Great Controversy, p. 678.

Preguntanan pa Diskushon:

Dikon bo ta kere ku Dios a permití piká sigui asina tantu tempu? Na mes momento, niun ser humano ta sufri den e mundu akí mas largu ku su mes eksistensia akinan. Es desir, niun hende ta sufri mas ku su propio bida. Kon kòrtiku un bida humano ta, kompará ku e míles di añanan di piká? Kon e perspektiva akí lo por yuda nos dil ku e kuestion di maldat difísil akí?

Kon e periodo di mil aña, konosí komo e milenio, ta pas den e plan di salbashon? Pensa riba loke e ta bisa tokante e karakter di Dios: te ora tur e redimínan lo a haña chèns pa mira e hustisio i rektitut i amor di Dios, e huisio final, kastigu final, lo bin riba esnan pèrdí.