Lès 4
* 19 – 25 di òktober
Testigunan di Kristu komo e Mesias
Sabat, 19 di òktober
Lesa pa e Estudio di e Siman Akí:
Juan 1:19–23; Isa. 40:1–5; Juan 1:29–37; Rom. 5:6; Juan 1:35–39; Juan 1:43–51; Juan 3:1–21.
Versíkulo di Memoria:
“Hesus a kontestá i a bis'é: ‘Siguramente, mi ta bisabo, a ménos ku un hende nase di nobo, e no por mira e reino di Dios’ ” (Juan 3:3, NKJV).
No tin duda, Hesus a proveé hende ku evidensia bíbliko poderoso pa respaldá e afirmashonnan ku E tabata hasi tokante E mes, inkluyendo “Di bèrdat, di bèrdat, Mi ta bisa boso: esun ku kere den Mi, tin bida eterno” (Juan 6:47).
Pero tin mas: kambia awa den biña; alimentá míles ku un par di pan; kura yu hòmber di e ofisial; restourá e hòmber na e tanki di Betèsda; duna bista na esun ku a nase siegu; lanta Lázaro for di morto. E evangelista ta apelá na un variedat di evento, i hende: hudiu, pagano, riku, pober, hòmber, muhé, gobernante, hendenan gewon, eduká, i no eduká, pa duna testimonio di ken Hesus ta.
Juan ta asta mustra na testimonio di e Tata Mes, i na Skritura, i tur ta duna evidensia di Su identidat.
E siman akí ta kuminsá ku e testimonio poderoso di Juan Boutista. Otro testigunan tambe ta subi riba esenario: Andres i Simon Pedro, Felipe i Natanael, i un testigu di mas inesperá: e fariseo Nikodemo. Pero un otro testigu ta para den sombra (e otro disipel ei ku Andres, den Juan 1:35, 40), Juan mes.
Djadumingu
20 di òktober
E Testimonio di Juan Boutista
Manera e lès di siman pasá a ilustrá, e Evangelio di Juan ta kuminsá ku Hesu-Kristu, e Palabra, den Su eksistensia eterno promé ku Kreashon. Pero den e mesun prólogo ei, Juan Boutista ta aparesé komo un testigu pa Hesus. Algun hudiu den tempu di Hesus tabata spera dos mesias, un saserdotal i e otro real. Juan ta siña klaramente ku Juan Boutista no a pretendé di ta un di e mesiasnan akí sino, mas bien, e tabata un testigu di esun Mesias berdadero.
Lesa Juan 1:19–23. Kon Juan Boutista a splika su ministerio i mishon?
E lidernan religioso a manda saserdotenan i levitanan pa puntra Juan ken e tabata. Ku espektativanan mesiániko haltu na Hudea, tabata importante pa Juan Boutista klarifiká su relashon ku e espektativanan ei. E no tabata e Lus, ma el a ser mandá di Dios duna testimonio di e Lus i prepará pa e binida di e Mesias (Juan 1:6–8). Ta p’esei el a kontestá nan di forma mas simpel ku e tabata por, bisando: “Mi no ta e Mesias” (Juan 1:20).
Tambe, Juan tabata batisá ku awa, ma Kristu lo a batisá ku e Spiritu (Juan 1:26,33). Juan no tabata digno pa lòs e strèp di sandalia di Hesus (Juan 1:27). Kristu tabata preferí riba Juan, pasobra E tabata promé ku Juan (Juan 1:30). Hesus tabata e Yu di Dios, i Juan simplemente tabata mustra na djE (Juan 1:34).
Lesa Isaias 40:1–5 i Juan 1:23. Kon Juan ta usa e versíkulonan akí?
Den époka di kamindanan yen di buraku i piedra, tin biaha tabata manda sirbidónan dilanti di e rei pa nivelá e superfisienan di kareteranan i pa eliminá bògtnan skèrpi pa hasi kaminda di e rei liber di opstákulo. Asina, pa kumpli ku profesia, Juan a bini pa asina prepará kurason di e hendenan pa Hesus.
Di ki manera nos, komo atventistanan di e di shete dia, mester hasi e mesun tipo di ministerio ku Juan Boutista a hasi? Kua ta e paralelonan?
Djaluna
21 di òktober
E Lamchi di Dios
E nashon hebreo tabata buskando un Mesias ku lo a libra nan for di Roma. Meta di e Evangelio di Juan tabata pa kambia nan komprondementu di e Mesias pa asina nan por a rekonosé den Hesus e kumplimentu di e profesianan tokante e Rei benidero. E Mesias lo no tabata un gobernante terenal. El a bini pa kumpli ku tur e promesanan di Tèstamènt Bieu tokante E mes, ku tabata inkluí Su sakrifisio propio na fabor di mundu, i pa renobá e relashon entre Dios i Su pueblo.
Lesa Juan 1:29–37. Ki proklamashon Juan Boutista ta hasi tokante Hesus? Ki imágen e ta usa pa deskribiE, i dikon ta asina signifikante pa komprondé ken Hesus tabata i kiko Su mishon lo tabata?
E deklarashon di e Boutista tokante Hesus komo e Lamchi di Dios ta sostené e propósito di e Evangelio di Juan, ku ta pa logra un komprondementu renobá di e obra i naturalesa di e Mesias. Hesus, en realidat, lo tabata e kumplimentu di e promesa di e sistema di sakrifisio, bayendo bèk na e promesa di e Redentor, ku a ser duná pa promé biaha den Génesis 3:15.
“Ora, na e boutismo di Hesus, Juan a mustra na djE komo e Lamchi di Dios, un lus nobo a ser tirá riba e obra di e Mesias. Mente di e profeta tabata dirigí riba e palabranan di Isaias: ‘El a ser hibá manera un lamchi na e abatuar.’ Isa. 53:7.”—Ellen G. White, The Desire of Ages, p. 136.
Lesa Marko 10:45, Romanonan 5:6, i 1 Pedro 2:24. Kon e versíkulonan akí ta yuda nos komprondé e ròl di Hesus komo “e Lamchi di Dios”?
Maske kuantu mas Juan Boutista mester a sa tokante e ministerio di Hesus, e tabata sigur ku Hesus tabata e Mesias primintí, Esun ku a bini komo kumplimentu di profesia.
Konsiderá profundamente e título di Hesus komo “e Lamchi di Dios”. Ki imágennan e ta trese na bo mente, i kon su konekshon na e sistema di sakrifisio di Tèstamènt Bieu ta yuda bo apresiá e gran preis di nos salbashon?
Djamars
22 di òktober
E Dos Disipelnan di Juan
Dos disipel di Juan Boutista tabata pará huntu kuné ora Hesus a kana pasa. Juan a deklará; “ ‘Mira e Lamchi di Dios!’ ” (Juan 1:36, NKJV). E dos disipelnan a skucha e mensahe di Juan tokante e Kristu, ku lo a kumpli ku e profesianan di Tèstamènt Bieu tokante e Mesias benidero. E disipelnan a bai laga Juan pa sigui Hesus, rekonosiendo ku Hesus tabata mas grandi ku Juan Boutista i ku E tabata e kumplimentu di Juan su mensahe.
Lesa Juan 1:35–39. Kiko e dos disipelnan akí a hasi despues di a tende e testimonio di Juan tokante Hesus?
Deseando di ta ku Hesus, nan dos a pasa dia huntu kunE. Ken sa ki kosnan maravioso nan a siña i a eksperensiá e dia ei!
Mester tabata gran kosnan pasobra, no a dura mashá ku nan deseo tabata di kompartí nan eksperensia ku otronan. Andres, un di e dos disipelnan, inmediatamente a haña su ruman hòmber, Simon, i a bisa: “ ‘Nos a haña e Mesias’ (ku ta ser tradusí: e Kristu)” (Juan 1:41, NKJV). Ora Andres a trese su ruman serka Hesus, inmediatamente Hesus a demostrá ku E tabata konos’é, bisando: “ ‘Abo ta Simon, yu di Jonah. Lo bo ser yamá Cephas’ ” (Juan 1:42, NKJV). Hesus tabata konosé i komprondé Pedro. Ku Hesus konosé un persona ta un tema di e Evangelio di Juan. (Mira, por ehèmpel, Juan 2:24,25.)
“Si Juan i Andres tabatin e spiritu inkrédulo di e saserdote- i gobernantenan, nan lo no a ser hañá komo alumonan na pia di Hesus. Nan lo a bini serka djE komo krítikonan, pa husga Su palabranan.... Pero e promé disipelnan akí no a hasi esei. Nan a respondé riba e yamada di Spiritu Santu den e predikamentu di Juan Boutista. Awor nan a rekonosé e bos di e Maestro selestial.... Un iluminashon divino a ser deramá riba e siñansa di e Skrituranan di Tèstamènt Bieu. E temanan multifasétiko di bèrdat a resaltá den lus nobo.”—Ellen G. White, The Desire of Ages, p. 139.
Henter e énfasis di e Evangelio di Juan ta pa trese na klaridat ken Hesus ta, pa asina e bon notisia akí por ser kompartí ku e mundu.
Den ki formanan Kristu, i bo fe den Kristu, a kambia bo bida? Ki otro kambionan lo bo ker a mira tuma lugá ainda?
Djárason
23 di òktober
Felipe i Natanael
Lesa Juan 1:43–46. Kiko e mensahe di Felipe a revelá kaba tokante su fe den Hesus?
Felipe tabata di Betsaida, meskos ku Andres i Pedro. El a haña su amigu Natanael i a kont’é tokante Hesus. Juan Boutista a yama Hesus “e Lamchi di Dios”. Andres a bisa Pedro ku el a haña “e Mesias”. Pero Felipe ta yama Hesus esun ku Moises i e profetanan a skirbi tokante djE i ta añadí e nòmber “Hesus di Nazarèt”. Su referensia na Nazarèt ta provoká un reakshon skèrpi di su amigu.
Ta parse ku Natanael tabatin prehuisio kontra e stat chikitu di Nazarèt. Siguramente un rei lo no a bini for di un lugá apartá for di kaminda asina. Fásilmente prehuisio ta siega bo bista di mira hende pa loke nan ta bal realmente. Ta parse ku Felipe a rekonosé, posiblemente for di kombersashonnan anterior ku Natanael, ku e manera korekto pa trata ku prehuisio no ta un argumentashon filosófiko òf teológiko eksaltá sino mas bien invitá e individuo pa eksperensiá e bèrdat personalmente pa e mes. El a bisa simplemente: “Bin i mira”. I esei ta eksaktamente loke Natanael a hasi. El a bai i a mira.
Lesa Juan 1:47–51. Kon Hesus a konvensé Natanael di ken E tabata, i kiko tabata Natanael su reakshon?
Entre versíkulo 46 i versíkulo 47 ta falta e detaye krusial di e manera kon Natanael a reakshoná riba e invitashon di Felipe. Sinembargo, el a lanta para i a bai mira. Su amistat ku Felipe tabata mas fuerte ku su prehuisio, i su bida lo a kambia for di e momento ei.
Hesus ta bisa palabranan bunita tokante Natanael, i ta yam’é un israelita den ken no tin engaño (Juan 1:47), un gran kontraste for di loke Natanael a bisa tokante Hesus (Juan 1:46). Natanael ta reakshoná ku sorpresa pasobra e no a yega di topa ku Hesus.
Despues Hesus ta referí na e eco di a mir’é bou di un palu di figo, i e deklarashon chikitu akí ta konvensé Natanael. Hesus, pa medio di persepshon divino, a mira Natanael ta hasi orashon, buskando bèrdat bou di e palu ei (lesa Ellen G. White, The Desire of Ages, p. 140,141). E ora ei Natanael ta hasi un konfeshon eksaltá, i ta yama Hesus Rabi, Yu di Dios, i Rei di Israel. Nota kon e revelashon aparententemente chikitu ta hiba na e konfeshon di fe di mas grandioso.
Djaweps
24 di òktober
E Testimonio di Nikodemo
Lesa Juan 3:1–21. Kon e testimonio di Nikodemo ta sostené e tema di e Evangelio di Juan?
Nikodemo tabata un maestro respetá na Israel i un miembro riku di e Sanhedrin. Pa vários motibu su testimonio ta hunga un parti importante den e Evangelio di Juan. El a referí na Hesus komo “Rabi” i a mustra na e señalnan ku Hesus a realisá komo evidensia di Su mishon divino. Pa e motibu ei, asta promé ku Nikodemo a realisá kiko e tabata hasiendo, e tabata dunando evidensia den sosten di e echo ku Hesus tabata e Mesias.
Nikodemo a mira e señalnan mes komo evidensia di e yamada divino di Hesus pero no a mira ku nan tabata mustra na Hesus komo kumplimentu di e profesianan di Tèstamènt Bieu tokante e Mesias. Asina, Nikodemo a bini ku poko duda; na e momento ei e no a rekonosé Hesus ainda komo e Kristu.
Lesa Juan 3:3–21. Kiko Hesus a bisa Nikodemo pa demostrá ku E por a mira stret dor di dje?
Hesus konosé kurason di kada hende. Su reakshon riba Nikodemo por parse abrupto, pero E ta bai direktamente na e asuntu. Aunke e hudiunan tabata kere ku paganonan mester a kombertí, hopi no tabata komprondé ku nan tambe, e pueblo skohí, tabatin mester di un eksperensia di kombershon. Niun hende ta nase salbá, no opstante nan nashonalidat òf e iglesia ku nan a lanta den dje.
Sin duda, e herensia maravioso di e hudiunan, bayendo bèk te na Abraham, tabata ofresé nan hopi bentaha diferente (lesa Rom. 3:1,2). Pero, den i di su mes, esei no tabata sufisiente. Hesus a bisa Nikodemo loke ta inimaginabel, ku e, un maestro i gobernante na Israel, mester nase di nobo for di ariba!
Despues Hesus a konfrontá Nikodemo ku su propio ignoransia spiritual: “ ‘Bo ta maestro di Israel, i no sa e kosnan akí?’ ” (Juan 3:10, NKJV). Kon abo, un maestro elevá di Israel, no por tabata sa e kosnan akí? E reprenshon mester tabata sorprendente. Apesar di kualke pregunta ku Nikodemo tabatin tokante Hesus e momento ei, despues Nikodemo a skohe Su banda huntu ku e siguidónan di Hesus (lesa Juan 19:39).
Kiko ta nifiká “nase di nobo”, i dikon Hesus lo a pone un énfasis asina riba dje?
Djabièrnè
25 di òktober
Mas Estudio:
Lesa Ellen G. White, “Nicodemus,” p. 167–177, den The Desire of Ages.
Nikodemo “a listra e Skrituranan di un forma nobo, no po diskushon di un teoria, sino pa risibí bida pa e alma. El a kuminsá mira e reino di shelu segun ku el a someté su mes na guiansa di Spiritu Santu....
“Pa medio di fe nos ta risibí e grasia di Dios; pero fe no ta nos Salbador. Nos no ta gana nada kuné. E ta e man pa medio di kua nos ta gara na Kristu, i apropiá nos mes di Su méritonan, e remedi pa piká.... Arepentimentu ta bini di Kristu, mes siguramente ku pordon.
“Kon, anto, nos mester ser salbá? ‘Meskos ku Moises a halsa e kolebra den desierto,’ asina e Yu di hende a ser halsá, i tur hende ku a ser gañá i mordé dor e kolebra por wak i biba. ‘Mira e Lamchi di Dios, ku ta kita piká di mundu.’ Juan 1:29. E lus ku ta bria for di e krus ta revelá e amor di Dios. Su amor ta hala nos serka E mes. Si nos no resistí e atrakshon akí, nos lo ser hibá na pia di e krus den arepentimentu pa e pikánan ku a krusifiká e Salbador. E ora ei, pa medio di fe, e Spiritu di Dios lo produsí un bida nobo den e alma. E pensamentu- i deseonan ta ser poné den obediensia na e boluntat di Kristu. E kurason, e mente, ta ser kreá di nobo den imágen di Esun ku ta obra den nos pa someté tur kos na E mes. E ora ei e lei di Dios ta ser skirbí den e mente i kurason, i nos por bisa huntu ku Kristu: ‘Mi t gusta hasi Bo boluntat, o mi Dios.’ Salmo 40:8.”—Ellen G. White, The Desire of Ages, p. 175,176.