E Testimonio di e Samaritanonan

E Esenario di e Enkuentro

Lesa Juan 4:1–4. Kiko tabata e kuestion di fondo ku a hiba Hesus atraves di Samaria?

E fariseonan a deskubrí ku e disipelnan di Hesus tabata batisando mas hende ku esnan di Juan Boutista tabata batisá. E situashon akí por a krea tenshon entre e siguidónan di Juan i esnan di Hesus. E disipelnan di Juan, naturalmente, tabata yalurs riba e reputashon i státus di nan maestro (kompará ku Juan 3:26–30). E kontesta impreshonante di Juan tabata ku e mester bira ménos, pero Hesus mester oumentá (Juan 3:30). Probablemente pa evitá konfrontashon, Hesus a sali for di Hudea pa bai Galilea. Samaria tabata proveé e ruta di mas direkto entre e dos lugánan ei, pero e no tabata e úniko ruta posibel. Hudiunan deboto lo a tuma e kaminda mas largu, i bai pariba atraves di Perea. Pero Hesus tabatin un mishon na Samaria.

Lesa Juan 4:5–9. Kon Hesus a usa e oportunidat akí pa habri un diálogo ku e muhé na e pos?

E pos di Jacob tabata situá nèt banda di Sikem, miéntras ku Sikar, di unda e muhé tabata, tabata masoménos un mia leu (1.5 km). Hesus a sinta banda di e pos miéntras Su disipelnan a bai den stat pa kumpra kuminda. E no tabatin akseso na e awa fresku di e pos. Ora e muhé a bin saka awa, El a pidié algu di bebe.

Den Juan 3, tabata sorprendente ku Nikodemo, un gobernante di e hudiunan i un rabi, lo a rebahá su mes pa bini serka Hesus. El a bini anochi pa evitá ku nan ta deskubrié. Pero, den Juan 4, e muhé ta skonde den pleno lus di dia, kisas pa evitá kontakto ku otro muhénan ku tabata bini sea na kuminsamentu òf final di dia ora tabata mas fresku. Despues di tur kos, dikon el a kana un kaminda asina largu pa kue awa, i meimei di dia ora tabata kayente? Loke sea tabata e motibu pa e ta einan, topa ku Hesus lo a kambia su bida.

Kua esena ta desplegá despues? Un maestro hudiu ta ser kompará ku un muhé samaritano di mal reputashon. Ki un kontraste! I tòg, den e konteksto eksakto akí, un enkuentro remarkabel ta desaroyá.

Kua ta algun di e tabúnan den bo propio kultura ku por a stroba bo testimonio na otronan? Kon nos ta siña superá nan? Trese bo kontesta na klas riba Sabat.

E Muhé na e Pos

Lesa Juan 4:7–15. Kon Hesus ta usa e enkuentro akí pa kuminsá testifiká na e muhé akí?

“E odio entre hudiu- i samaritanonan a impedí e muhé di ofresé bondat na Hesus; pero e Salbador tabata tratando di haña e yabi na e kurason akí, i ku e takto nasí di amor divino, El a pidi, no a ofresé, un fabor. E oferta di un fabor por a ser rechasá; pero konfiansa ta lanta konfiansa.”—Ellen G. White, The Desire of Ages, p. 184.

Manera tabata e kaso ku Su enkuentro ku Nikodemo, Hesus sa kiko tin den kurason di e muhé. Komo reakshon riba su sorpresa ku un hudiu lo a pidi un fabor asina di un samaritano, Hesus ta bai direktamente na e punto. “ ‘Si bo tabata konosé e don di Dios, i ta ken ta bisabo: “DunaMi algi di bebe”, lo bo a pidiÉ, i E lo a dunabo awa bibu’ ” (Juan 4:10, NKJV).

E reakshon di e muhé tabata meskos ku esun di Nikodemo, ku a puntra: “ ‘Kon e kosnan akí por ta?’ ” (Juan 3:9, NKJV) den konteksto di un nasementu nobo. El a puntra: “ ‘Bo no tin nada pa saka kuné, i e pos ta hundu. Unda antó bo ta haña e awa bibu ei?’ ” (Juan 4:11, NKJV). Den tur dos kaso, Hesus tabata mustrando nan (unu, un maestro hudiu prominente; e otro, un muhé samaritano di karakter dudoso) e bèrdatnan spiritual trasendente ku kada un mester a tende i komprondé. Den kada kaso, Hesus tabata bisando nan tur dos básikamente e mesun kos: nan tabatin mester di un eksperensia di kombershon.

Kiko ta e fondo di Tèstamènt Bieu di e deklarashon di Hesus tokante awa bibu? (Jer. 2:13, Zak. 14:8).

Awa ta nesesario pa bida; hende no por eksistí sin awa, i asina awa por ta tambe un imágen poderoso i apropá di bida eterno. Pa e motibu ei Hesus ta bisa: “ ‘Ken ku bebe di e awa ku lo Mi dun'é, lo no haña set nunka. Pero e awa ku lo Mi dun'é lo bira den dje un fuente di awa ku ta brota pa bida eterno’ ” (Juan 4:14, NKJV).

Lesa Juan 7:37,38. Kiko Hesus ta bisando nos den e versíkulonan akí, i kon nos ta eksperensiá loke E ta primintiendo aki?

“Señor, Dunami e Awa Akí”

“ ‘E ora ei lo Mi sprengu awa limpi riba boso, i boso lo ta limpi; lo Mi purifiká boso di tur boso impuresa i di tur boso ídolonan. Lo Mi duna boso un kurason nobo i pone un spiritu nobo den boso; lo Mi saka e kurason di piedra for di boso karni i duna boso un kurason di karni. Lo Mi pone mi Spiritu den boso i pone boso kana den Mi statutonna, i boso lo warda Mi huisionan i hasi nan’ ” (Ezek. 36:25–27, NKJV).

Kon Ezekiel 36:25–27 ta reflehá e bèrdatnan ku Hesus tabata tratando na duna Nikodemo i e muhé na e pos?

Den tur dos kaso, Hesus tabata tratando na alkansá e hendenan akí ku bèrdatnan spiritual, asta aunke El a usa ilustrashonnan di e mundu natural pa hasi esei.

Na prinsipio, niun di dos persona a komprondé kiko Hesus tabata ke men. Kon, Nikodemo a puntra, un hende por nase atrobe? Es desir, kon e por bai bèk den matris di su mama? Nikodemo tabata funshonando klaramente na un ivel mundano i terenal, aunke Hesus tabata mustrand’é klaramente den direkshon di bèrdat spiritual. E muhé akí tambe a tuma e palabranan di Hesus tokante awa den un sentido literal ora Hesus tabata papiando klaramente tokante algu spiritual.

E kontesta di e muhé riba Hesus su oferta di awa bibu tabata: “ ‘Dunami e awa akí, pa mi no haña set, ni bin aki pa saka awa’ ” (Juan 4:15). El a rasoná ku e awa ku Hesus tabata ofresé lo a evitá biahenan na e pos, i asina redusí e rísiko di enfrentá otronan. Ta sorprendente ku e kombersashon a kambia asina rápido for di Hesus ku ta pidi algu di bebe na e muhé ku ta pidi E pa algu di bebe.

Lesa Juan 4:16. Kon Hesus a reakshoná riba e petishon di e muhé?

Di forma abrupto Hesus ta kambia e tópiko di diskushon, i ta bisa e muhé pa bai yama su esposo i bini bèk. Dikon e kambio diripiente den tópiko? E akshonnan di e muhé tabata indiká evashon. Hesus por a lesa su kurason. E mester enfrentá su situashon pa haña sanashon. “Promé ku e alma akí por a risibí e regalo ku E tabata anhelá di otorgá, e mester a ser hibá na rekonosé su piká i su Salbador.”—Ellen G. White, The Desire of Ages, p. 187.

E Revelashon di Hesus

Lesa Juan 4:16–24. Kiko Hesus a hasi pa mustra e muhé akí ku E tabata konosé su sekretonan di mas profundo, i kon el a reakshoná?

E lus tabata blèndu demasiado pa wak direktamente den dje. Miéntras e muhé a rekonosé Hesus komo un profeta, e ta bolbe praktiká evashon. E ta hasi Hesus un pregunta di kontroversia religioso entre hudiu- i samaritanonan: e lugá apropiá pa adorá.

Komo kontesta, Hesus a indiká ku e samaritanonan no tabata sa kiko nan ta adorá. Nan adorashon tabata un síntesis di hudaismo i paganismo. E hudiunan tabata adorá e Dios ku ta revelá Su mes, un otro atmishon importante pa un samaritano.

Adorashon di e berdadero Dios no ta mará na un lugá. E diskushon, pa e motibu ei, tokante un lugá di adorashon tabata irelevante na e kombersashon. Pasobra Dios ta spiritu, i esnan ku ta ador’E mester hasi esaki den spiritu i den bèrdat. E muhé a aseptá e bèrdat kla, transmití di Hesus, i tabata kla pa mas.

Lesa Juan 4:25,26. Kon Hesus a revelá Su identidat na dje?

Den tur kuater Evangelio, esaki ta e úniko pasashi promé ku Su huisio den kua Hesus ta deklará klaramente na un hende ku E tabata e Mesias. I El a hasié, no na un ke otro multitut grandi òf personahe importante, sino na un muhé samaritano anónimo, e so, na e pos di Jacob. E ta interesá den kualke alma solitario ku ta sinti su mes separá.

I asina, na e muhé akí, ku no tabata solamente di un kultura straño pero tampoko tabata di e karakter moral di mas haltu, Hesus ta revelá abiertamente ken E ta. I, despues di a revelá Su konosementu di su sekretonan di mas skur na dje, E ta duna e muhé akí tambe un gran motibu pa kere den djE.

Kiko e storia akí lo mester bisa nos tokante dikon e evangelio mester basha e bareranan abou ku sernan humano ta krea ku otro?

E Testimonio di e Samaritanonan

Lesa Juan 4:27–29. Ki akshon sorprendente e muhé a tuma?

E diskushon di Hesus ku e muhé a ser interumpí ku yegada di e disipelnan. Aunke nan tabata sorprendí ku E tabata papia ku un muhé, nan no a kuestion’E. En kambio, nan a urgiE pa kome.

E muhé, mientrastantu, a laga su tinashi atras i a kore bai den siudat pa kompartí ku otronan loke el a kaba di eksperensiá ku Hesus.

Lesa Juan 4:30–42. Kiko a pasa despues di e enkuantro akí, i kiko e ta siña nos tokante kon e evangelio por ser plamá?

Ta parse straño ku e storia di Hesus tokante un kosecha lo a interumpí e storia di kombershon di hopi hende den e siudat. Pero Juan ke pa nos mira kon Hesus a komprondé loke tabata pasando. Kompartí e plan di salbashon ku un samaritano tabata muchu mas importante p’E ku kome. Hiba almanan na salbashon tabata Su propósito, i El a usa e okashon akí pa siña Su disipelnan e urgensia di kompartí e evangelio ku tur hende, asta ku esnan ku no ta meskos ku nan.

Tin hopi puntonan kulminante den e Evangelio di Juan. Siguramente Juan 4:39–42 ta entre nan. Hopi di e samaritanonan a kere pa motibu di e testimonio di e muhé: “ ‘El a bisa mi tur loke mi a yega di hasi’ ” (Juan 4:39, NKJV).

E samaritanonan a pidi Hesus pa keda huntu ku nan. Resultado tabata ku hopi mas hende a kere pa motibu di e Palabra di Hesus. “E ora ei nan a bisa e muhé: ‘Awor nos o ta kere, no pa motibu di loke bo a bisa, pasobra nos mes a tend'É i nos sa ku enberdat E ta e Kristu, e Salbador di mundu’ ” (Juan 4:42, NKJV).

Kiko e storia akí mester bisa nos tokante kon poderoso e testimonio di asta un persona por ta? Kon poderoso bo ta komo un testigu di loke Hesus a hasi den bo bida?