E Fuente di Bida

Den djE Tabatin Bida

Den Juan 1:1 e apòstel ta deklará klaramente ku Hesus ta Dios, e Yu divino. Konsekuentemente, den Juan 1:4, “Den djE tabatin bida, i e bida tabata e lus di hende” (NKJV), e referensia na bida aki mester ta bida divino, outoeksistensia eterno no derivá. Pasobra E tin bida denter di Su mes, E por entregá Su bida i tum’e bèk (Juan 10:17). I, pasobra E tin bida paden, E por duna bida na esun ku E ke (Juan 5:21; kompará ku Juan 14:19).

E palabra bida (zoē) ta aparesé 36 biaha den e Evangelio di Juan, masoménos 25 porshento di e usonan den Tèstamènt Nobo. Den Juan 1:4,5, ademas di ta referí na e Fuente di bida riba nos planeta, e palabra ta vinkulá tambe na salbashon. Den henter restu di Juan, e idea akí di bida (zoē) ta ser ekspresá mayoria biaha komo bida eterno, e promesa di salbashon (lesa Juan 3:15,16,36; Juan 4:14,36; Juan 6:27,40,47,54,68; Juan 10:27,28). Pues, Esun ku a duna bida na Kreashon ta e Mesun ku ta trese salbashon, bida eterno, na un mundu pèrdí.

Pakiko Hesus a bini na e tera akí? Juan 1:29; Juan 3:16; Juan 6:40; Juan 10:10; Juan 12:27.

“ ‘Manera Moises a halsa e kolebra den desierto, asina tambe e Yu di Hende mester ser halsá, pa ken ku kere den djE no mester peresé ma haña bida eterno’ ” (Juan 3:14,15, NKJV).

Meskos ku e kolebra di bròns a tuma lugá di e israelitanan ku a ser mordé dor di kolebranan, asina Hesus a tuma nos lugá, nos ku a ser batí pa piká. El a tuma e kastigu ku tabata di nos pa asina nos lo por tabatin e bida ku tabata di djE.

Kristu ta deseá tambe pa nos tin bida i tin e mas abundantemente (Juan 10:10). Pues, pasobra “tur ku a asept'E, nan El a duna derecho di bira yu di Dios, esnan ku a kere den Su nòmber: ku a nase, no di sanger, ni di boluntat di e karni, ni di boluntat di hende, sino di Dios” (Juan 1:12,13, NKJV).

Kristu a bini pa revelá e Tata na nos. Pasobra, “niun hende a mira Dios na niun momento. E úniko Yu, kende ta den skochi di e Tata, E a dun’E di konosé” (Juan 1:18). Ora nos mira e karakter di Hesus, nos por mira e karakter di e Tata.

Kiko nos por siña for di e bida di Hesus tokante e karakter di e Tata? Dikon e revelashon akí ta asina bon notisia?

E Palabranan di Bida Eterno

Lesa Juan 6:61–68. Ora Hesus a puntra e disipelnan si nan lo a bandon’E, kiko tabata nifikashon di e kontesta di Pedro?

E palabranan di Pedro tokante “bida eterno” ta sekundá un tema ku ta kore den henter e Evangelio di Juan. Un konsentrashon di fraseologia tokante bida eterno ta aparesé den Juan 6, den konteksto di e alimentashon di e 5.000 (Juan 6:27,40,47,54,68). Hesus ta bisa ku E ta e Pan di Bida (Juan 6:35), loke ta nifiká ku Su bida, Su morto, i Su resurekshon ta e fuente di salbashon eterno.

E frase bida eterno òf su ekivalente ta paresé por lo ménos 17 biaha den e Evangelio di Juan. E término akí no ta referí na un eksistensia spiritu, òf na bira parti di un ser eterno, òf na un otro konsepto etéreo. Mas bien, e ta referí na e poder ei ku ta duna bida ku ta trese salbashon i nifikashon na nos eksistensia awor i na bida sin fin ora nos Señor bini bèk. Meskos ku Hesus a bira karni, asina e resurekshon ku Hesus ta papia di dje ta tuma lugá den tempu i espasio i den un kurpa físiko. E ta un resurekshon for di morto, un renobashon di e bida ku nos tabatin un tempu den Eden.

Kon nos ta risibí bida eterno? Juan 3:15,16; Juan 5:24; Juan 6:40,47; Juan 8:31; Juan 12:46; Juan 20:31.

Pa medio di fe so nos ta kere ku Hesu-Kristu a bini pa biba i pa muri na nos fabor. E fe akí ta bini na nos komo un regalo, pero nos mester skohe konsientemente pa someté nos mes na Hesus, pa arepentí, i pa reklamá Su sanger pa pordon i purifikashon di piká.

Ora Hesus a puntra Pedro si e tambe tabata pa bai, e kontesta di Pedro: “ ‘Señor, serka ken nos lo bai? Abo tin e palabranan di bida eterno!’ ” (Juan 6:68, NKJV), ta enserá e esensia di salbashon i kon nos ta opten’e. E no ta bini di filosofia, historia, siensia, tur disiplina humano. E ta bini di Hesus, kende, pa motibu ku E ta poseé bida eterno den Su mes, ta ofres’e gratuitamente na tur ku, ora nan respondé na Spiritu Santu, lo asept’e.

Kon e promesa di tin bida eterno ta impaktá e manera kon nos ta mira nos bida temporal aki? Kon e lo mester impaktá e manera kon nos ta mir’e?

Kere i Nasementu Nobo

Lesa Juan 1:12,13. Kua ta e pasonan deskribí aki tokante bira un kristian?

Juan a skirbi su Evangelio pa asina nos lo a kere den Hesus i pa ora nos kere, nos por tin bida eterno den Su nòmber (Juan 20:31). Den Juan 1:12,13, e proseso akí ta ser deskribí den dos paso. Di promé, nos ta risibiE, esta, kere den djE. Di dos, E ta duna nos outoridat òf poder pa bira yunan di Dios, deskribí den versíkulo 13 komo ser engendrá dor di Dios. Pues, tin un aspekto humano i divino di bira un kristian. Nos mester aktua ku fe, risibiE, i ta habrí na e lus, pero E ta esun ku ta regenerá e kurason.

De echo, fe mes ta un don di Dios ku ta bini pa medio di tende Su Palabra (Rom. 10:17). “Pa nos por tin un fe berdadero i duradero den Kristu, nos mester konos’E manera E ta ser representá den e palabra.”—Ellen G. White, Fundamentals of Christian Education, p. 433. “E Spiritu ku ta operá riba i ta iluminá e mente humano, ta krea fe den Dios.”—Ellen G. White Comments, The Seventh-day Adventist Bible Commentary, tomo 7, p. 940.

Esnan ku kere òf aseptá e Yu komo e Mesias ta risibí bida eterno. Juan ta enfatisá tambe aseptá òf kere e Palabra ku Hesus a papia (Juan 5:24,38,47). Ta e ròl di Spiritu Santu pa trese konvikshon (Juan 16:7,8; kompará ku Rom. 8:16).

Lesa Romanonan 8:16. Ki prinsipio tokante salbashon den Hesus ta ser hañá aki?

Fe, fe bíbliko, basá riba e obra di Spiritu Santu den nos kurason, ta e fundeshi di nos fe. “Fe ta ... e gran bendishon, e wowo ku ta mira, e orea ku ta tende.”–Ellen G. White, In Heavenly Places, p. 104. E aserkamentu humanista na fe ta deklará ku nos mester haña un fundeshi, e kriterionan pa fe, i despues kere. En kambio, e aserkamentu bíbliko ta deklará ku fe ta e fundeshi, un regalo di Dios (Efe. 2:8, 1 Kor. 1:17–24, 1 Kor. 2:1–6). Nos ta kuminsá ku e fundeshi di fe, i despues, for di ei, nos ta krese den komprondementu i grasia.

Si un hende lo a puntra bo riba kiko bo fe ta basá, kon lo bo a kontestá?

Rechasá e Fuente di Bida

Algun di e relatonan di mas tristu den henter Skritura ta tuma lugá den e Evangelio di Juan. “E lus ta bria den skuridat, i e skuridat no a komprond’e.... [E lus] tabata den mundu, i mundu a ser trahá pa medio di djE, i mundu no a konos’E. El a bini Su mes kas, i Su hendenan no a risibiE” (Juan 1:5,10,11, NKJV). E “AMI TA” a ser rechasá dor di hopi di Su mes hendenan.

Nada straño ku Pablo ta spièrta despues: “No tira bo konfiansa afó” (Hebr. 10:3, NKJV). Manera nos a mira bes tras bes, Kristu a ser rechasá pasobra hende no a aseptá Su Palabra.

“E forma di pensa humanista kontemporáneo ta kuminsá ku duda. Hende ta kuestioná tur kos pa asina determiná kiko ta bèrdat. E loke sobrebibí e kandela di interogatorio krusá nan ta aseptá komo konosementu sólido manera un baranka, un kos riba kua bo ta pone bo fe. Algun hende ta apliká e mesun método na Beibel, kuestionando tur kos for di un perspektiva sientífiko, históriko, sikológiko, filosófiko, arkeológiko, òf geológiko, pa asina determiná kiko ta bèrdat den Beibel. E método mes ta kuminsá ku i ta sigui riba duda den verasidat di Skritura. Kristu a puntra: ‘Ora Yu di hende bini, lo E haña fe riba mundu realmente?’ (Lukas 18:8).”—E. Edward Zinke and Roland Hegstad, The Certainty of the Second Coming, (Hagerstown, MD: Review and Herald Publishing Association, 2000) p. 96.

Lesa Numbernan 13:23–33. Kiko a hasi e diferensia entre e dos relatonan ku e spionnan a trese bèk tokante Kanaan?

E piká di e hebreonan ora nan tabata na Kadesh Barnea tabata ku nan a duda e Palabra di Dios. Dios a pidi nan pa subi bai i tuma poseshon di e tera. Diesdos spion a ser mandá Kanaan pa spioná e tera. Nan a bini bèk ku dos relato. E mayoria a duna un relato negativo. Tin gigantenan den e tera, statnan rondoná ku muraya, armanan ku nos no a mira nunka promé, i ehérsitonan bon entrená. En kambio, nos tabata esklabonan den e tera di Egipto ku poko eksperensia militar. Dies spion a vota nò, basá riba e evidensia abrumador for di punto di bista humano. Dos spion a vota sí, basá riba nan fe den e poder abrumador di e Palabra di Dios.

Kon nos ta evitá di hasi e mesun tipo di eror ku a ser hasí aki? I sinembargo, kon nos ta evitá presunshon tambe, hasiendo algu bobo pero kere ku nos ta hasiendo e boluntat di Dios i, pa e motibu ei, no por faya?

Kondena

“Ken ku kere den djE no ta ser kondená, ma ken ku no kere ta kondená kaba, pasobra e no a kere den e nòmber di e úniko Yu di Dios.... Tur hende ku hasi maldat ta odia lus, i lo no bini den e lus pa miedu ku [su] aktonan lo ser eksponé. Pero ken ku ta biba pa medio di bèrdat ta bin den e lus (Juan 3:18–21”, NIV; kompará ku Juan 1:10).

Dikon hende ta yega na huisio? Juan 3:18,36; Juan 5:24,38; Juan 8:24; Juan 12:47.

E rechaso di Hesu-Kristu, e Lus di mundu, ta laga nos habrí pa duda i pa e tentashonnan di diabel. E ta nifiká bira for di lus na skuridat.

Eva a haña lus riba kon relashoná ku e palu meimei den e hòfi. Satanas a tent’é pa kuestioná e lus. El a tèst e palabra di Dios dor di rasoná ku un Dios di amor lo no a destruí e kriaturanan ku El a krea. El a konfia tambe riba e datonan di su sentidonan. E kolebra a kome di e fruta i awor tin poder pa papia. Kisas e kolebra tin rason. Si mi partisipá di e fruta, mi por bira meskos ku Dios! Engañá, el a bira bai for di e lus. I su esposo a skohe e mesun kaminda.

Lesa Mateo 4:1–4. Kua prinsipionan Kristu a usa den e desierto di tentashon pa kombatí e engañonan di Satanas?

Kristu tabatin na Su disposishon e mesun hèrmènt di pensamentu humanista ku Adam i Eva, e antediluvianonan, i Israel na Kadesh Barnea a usa. E por a puntra dikon un Dios di amor lo a laga Su Yu den desierto pa 40 dia i anochi sin kuminda i protekshon. E por a determiná tambe di proba Su kualidat di Yu dor di kambia piedranan den pan! En kambio, El a kontestá ku e Palabra di Dios. El a operá riba nivel di kosnan selestial mas bien ku riba patronchinan di pensamentu terenal. Kon fásilmente E por a rashonalisá Su kaminda na un desishon robes, loke asina tantu hende, asta hendenan di fe, ta hasi hopi biaha.