E Ora di Gloria: E Krus i Resurekshon

Kiko ta Bèrdat?

Den Juan 18:28–32, e huisio di Hesus no ta ser deskribí den detaye. E enfoke ta riba Hesus ku ta ser tresé dilanti di Ponsio Pilato.

Lesa Juan 18:33–38. Tokante kiko Pilato i Hesus a papia?

E gobernadó ta puntra Hesus si E ta e rei di hudiunan (Juan 18:33). Ta e promé referensia na e título akí pero lo no ta e último. Hesus ta puntra Pilato si e ta puntrando esaki riba su mes òf otronan a bisa ku E tabata. Su pregunta ta kambia e ròlnan pa e gobernadó, puntrando si e ta komprondé ta ku ken e ta papiando. E lesadó sa kaba ku Hesus ta e Rei. E gobernadó lo sa?

Pilato ta kontestá ku su mes pregunta: “ ‘Mi ta hudiu? Bo mes nashon i saserdotenan prinsipal a entregábo na mi. Kiko Bo a hasi?’ ” (Juan 18:35, NKJV). Tabata un elushon, ankrá den iritashon pa motibu di e aplikashon estrikto di e pregunta di Hesus. Tabata e promé paso di e gobernadó pa alehá su mes for di e bèrdat, lagando prehuisio blòkia su persepshon.

Hesus ta kontestá ku Su reino no ta di e mundu akí (Juan 18:36). Pilato e ora ei, atentamente, ta dedusí ku Hesus ta afirmá sí di ta un rei (Juan 18:37). Esaki ta hiba na e splikashon importante di Hesus ku El a nase pa duna testimonio di e bèrdat i ku tur hende ku ta “ ‘di e bèrdat’ ” ta tende Su bos (Juan 18:37).

E ora ei Pilato ta puntra: “ ‘Kiko ta bèrdat?’ ” (Juan 18:38, NKJV). Pero e no ta warda riba e kontesta. En kambio, e ta bai pafó pa purba salba Hesus di e multitut.

Bèrdat ta un tema den e Evangelio di Juan. Komo e Palabra eterno (logos, Juan 1:1–5), Hesus ta e Lus i e Bèrdat. Tur esaki ta den kontraste ku skuridat i eror. E ta yen di grasia i bèrdat (Juan 1:14). Grasia i bèrdat a bin pa medio di djE (Juan 1:17). Juan Boutista a testifiká di e bèrdat (Juan 5:33). Hesus a afirmá ku Su Tata ta “berdadero” (Juan 7:28). Hesus Mes a tende e bèrdat di Su Tata (Juan 8:40). Hesus ta “e kaminda, bèrdat, i bida” (Juan 14:6). E Palabra di Dios ta “bèrdat” (Juan 17:17). Apesar di su pregunta, Pilato a pèrdè su oportunidat pa konosé e bèrdat pa motibu di su prehuisio, su desishonnan anterior, i e preshonnan riba dje.

Kon bo ta komprondé e idea di Hesus komo e Bèrdat?

Ata e Hòmber!

Lesa Juan 18:38–19:5. Kon Pilato a purba persuadí e hendenan pa pidi pa liberashon di Hesus?

Pilato no a warda riba un kontesta di Hesus tokante bèrdat. En kambio, el a bai pafó bèk pa purba persuadí e hendenan. Dor di dialogá ku nan na lugá di djis laga Hesus bai liber, Pilato a pone su mes den un desbentaha. E lidernan religioso a rekonosé ku nan por a manipulá e gobernadó atraves di e multitut.

Pilato ta referí na un kustumber di laga un prizonero bai liber den tempu di Pasku i ta puntra si e hendenan ke pa e libra “e Rei di hudiunan”. Sorprendentemente, i bastante irónikamente, e hendenna ta pidi pa liberashon di un bandidu yamá Barabas mas bien ku e Hesus inosente.

Awor e burla i bèrgwensa di Hesus ta kuminsá. E sòldánan romano ta flèktu un korona di sumpiña, ta bistiE un mantel püs, i ta sigui bin dilanti i, den forma di chèrchi, ta salud’E komo Rei di hudiunan. E tipo akí di saludo dor di sòldánan lo tabata similar na e forma ku nan tabata kumindá e emperador, pero aki e tabata ser hasí pa hasi bofon.

Hungando ku e kompashon di e pueblo, parse ku Pilato ta buskando un manera pa libra Hesus. E ta trese Hesus pafó ku e korono di sumpiña i e mantel püs bistí. E esena, ku Juan no ta komentá riba dje, ta desplegá Hesus ku trahe real di gañagaña bistí, i e gobernadó bisando e hendenan: “ ‘Ata e hòmber!’ ” (Juan 19:5, ESV). Esaki ta kòrda e lesadó riba e palabranan di Juan Boutista den Juan 1:29, ESV: “ ‘Ata, e Lamchi di Dios, ku ta kita piká di mundu!’ ” Ta iróniko ku e gobernadó pagano ta presentá e Mesias bistí ku e trahe real akí dilanti di Israel.

Sinembargo, manera Juan 19:6–16 ta mustra, e multitut pa pidi pa krusifikashon di Hesus, basá riba Su afirmashon di ta e Yu di Dios. Esaki ta spanta Pilato, ku ta trata mas ainda di regla Hesus su liberashon. Pero e lidernan ta seya e destino di Hesus afirmando ku libr’E ta nifiká oponé Cesar. Nan sa ku Pilato su lealtat na Cesar lo a nifiká ku e no por a libra un hende ku ta reklamá e mesun ròl. E lidernan ta bisa ku nan no tin niun otro rei sino Cesar. Asina, nan odio profundo di Hesus tabata mas grandi ku nan aspirashonnan nashonal. Pa deshasí di e Hesus akí, nan tabata dispuesto pa sakrifiká derechonan riba outonomia nashonal.

Ki spantoso. Un gobernante pagano ke libra Hesus miéntras e lidernan spiritual di e nashon, ku mester a rekonos’E, ker a krusifik’E en kambio! Ki lèsnan nos por saka for di esaki pa nos mes?

“Ta Kumplí”

Manera Juan 19:17–22 ta mustra, Pilato a skirbi un inskripshon na latin, griego, i hebreo ku tabata bisa: “ ‘Hesus di Názarèt, Rei di hudiunan’ ” (Juan 19:19, ESV). E lidernan religioso ker a kambi’e. Pilato no ker a sa nada di esei, i e inskripshon a keda, un testigu silensioso di e bèrdat tokante Hesus i un di e señalnan ku Hesus a ser koroná komo Rei na e krus. Ata Hesus aki, berdaderamente nan Rei, e Rei di hudiunan, kologando na un krus manera un kriminal komun.

“Un poder mas haltu ku Pilato òf e hudiunan a dirigí e ponementu di e inskripshon ei riba kabes di Hesus. Den e providensia di Dios e tabata pa insitá pensamentu, i investigashon di e Skrituranan.”—Ellen G. White, The Desire of Ages, p. 745.

Lesa Juan 19:25–27. Kua esena emoshonante tokante mama di Hesus a tuma lugá na e krus?

Entre esnan ku tabata para na pia di e krus e dia ei tabatin Juan, e disipel stimá, huntu ku Maria, mama di Hesus, i otronan. Hopi aña promé, Simeon a pronostiká e eksperensia akí mes ora Hose i Maria a hiba Hesus na e tèmpel pa dedik’E (kompará ku Lukas 2:34,35). Awor den Su momentonan di morto, Hesus ta papia ku Su mama: “ ‘Muhé, ata bo yu!’ ” Na Juan E ta bisa: “ ‘Ata bo mama!’ ” (Juan 19:26,27, NKJV).

Lesa Juan 19:28–30. Kiko ta nifikashon di e último palabranan di Hesus: “Ta kumplí”?

E verbo griego teleō (terminá, kompletá, realisá) den Juan 19:28 (“tur kos a ser kumplí awor”, ESV) ta e mesun verbo manera a ser usá den versíkulo 30 (“Ta kumplí”). Ademas, un palabra relashoná, teleioō (terminá, hasi perfekto) ta paresé tambe den versíkulo 28 den referensia na e kumplimentu di Skritura (“pa kumpli ku Skritura”, ESV). Maske kon hororoso e esena ta, tur kos tabata ser kumplí, lográ, i kompletá.

Ora Hesus ta bisa: “Ta kumplí” E ta kompletando, kumpliendo, e obra ku e Tata a dun’E pa hasi.

E Graf Bashí

Lesa Juan 20:1–7. Kiko ta e importansia pa nos tokante loke ta ser deskribí den e versíkulonan akí?

Hesus a muri lat riba un djabièrnè atardi i a resusitá trempan riba djadumingu. Pa motibu ku Sabat tabata serka ora El a ser derá (Juan 19:42), e proseso di entiero a ser hasí purá i no kompleto. Maske kuantu nan tabata stima Hesus, Su siguidónan a warda e dia di Sabat i no a bai na e graf (kompará ku Marko 16:1, Lukas 23:56). Despues di Sabat, un kantidat di muhé a kumpra speserei pa hiba na e graf djadumingu mainta. Pa nan sorpresa, e piedra a ser kitá, i e graf tabata bashí.

Maria Magdalena tabata un di esnan ku a bin trempan na e graf. El a kore pa konta Pedro i Juan loke el a mira. E dos hòmbernan a kore bai aya. Juan a kore mas duru ku Pedro i a yega promé. El a sak abou, wak paden i a mira e pañanan di lino ku kua Hesus a ser lorá, poné ei. Pero e no a bai paden.

Pedro, sinembargo, a bai paden i a mira e pañanan di lino poné ei. Tambe el a mira e lensu ku tabata riba kabes di Hesus, pero e no tabata huntu ku e sobrá pañanan. E tabata doblá i poné un kantu.

Lesa Juan 20:8–10. Kiko tabata e nifikashon di e lensu doblá?

Despues ku Pedro a drenta den e graf, Juan tambe a drenta. Juan 20:8 ta bisa ku el a drenta, a mira, i a kere. Dikon mira e pañanan di graf poné ei i e lensu poné apart, doblá, lo a hiba Juan na kere ku Hesus a resusitá for di morto?

Pa kontestá e pregunta akí, ta nesesario pa reflekshoná dikon e graf lo tabata bashí na promé lugá. E kontesta di mas típiko lo tabata ladronnan di graf. Pero e splikashon akí ta faya pa tres motibu. Na promé lugá, Mateo ta bisa nos ku e graf tabata ser vigilá (Mat. 27:62–66), loke ta hasi robo di graf improbabel. Na di dos lugá, ladronnan di graf generalmente ta hòrta kosnan di balor, no kurpanan ku ta putri. Na di tres lugá, ladronnan di graf ta hasi purá i no ta dobla pañanan di graf. Nada straño, antó, ku ora Juan a mira e lensu doblá, el a kere ku Hesus a lanta for di morto.

Hesus i Maria

Lesa Juan 20:11–13. Kiko a sosodé aki ku ta mustra dikon Maria Magdalena ainda no a komprondé nifikashon di e graf bashí?

E último referensia na Maria den e teksto promé ku esaki ta ora e ta konta Pedro i Juan tokante e graf bashí (Juan 20:2). Nan a kore bai na e graf, i el a bin bèk aya un poko mas despues. Despues ku Pedro i Juan a inspekshoná e graf, nan a bandon’e. Pero Maria a bin bèk i, yorando, el a keda ei. Sin duda el a yora hopi durante e último par di dianan. I awor, esaki tambe? El a sak abou, i a wak paden.

Pa su sorpresa, tabatin dos angel na blanku den e graf, ku tabata sinta kaminda e kurpa di Hesus a ser poné. Nan a puntr’é: “ ‘Muhé, dikon bo ta yora?’ ” (Juan 20:13, NKJV). Su kontesta doloroso tabata ku nan a bai ku su Señor, i e no tabata sa unda nan a pon’E.

Lesa Juan 20:14–18. Kiko a kambia tur kos pa Maria?

Atraves di wowonan nublá di lágrimá, Maria a bira i a mira un hende pará su tras. Ku palabranan similar na esnan di e angelnan, e Strañero ta puntra: “ ‘Muhé, pakiko bo ta yora? Ken bo ta buskando?’ ” (Juan 20:15, NKJV). E ta kere ku e ta papiando ku e hardinero i ta pidi su yudansa pa haña e kurpa di Hesus.

E Strañero ta bisa un palabra: “Maria”. Tabata un revelashon di un palabra ku a kambia mundu. Diripiente, e Maria sorprendé ta rekonosé ku e Hesus resusitá ta papiando kuné i ta rekonos’E. Hesus ta insistí pa e no ten’E, ya ku E mester subi bai serka Su Tata. Pero su tarea ta pa bai i bisa e disipelnan ku E ta subi bai “ ‘serka mi Tata i boso Tata, i na Mi Dios i boso Dios’ ” (Juan 20:17, NKJV). Maria a kumpli ku su mishon. El a bisa e disipelnan ku el a mira Señor i tambe el a konta tur e otro detayenan ku El a kompartí kuné (Juan 20:18).

Lesa 1 Korintionan 15:12–20. Di akuerdo ku Pablo, di kiko nos fe kristian ta sirbi si Kristu no a resusitá?