Epílogo: Konosé Hesus i Su Palabra

Enkuentro na Galilea

Lesa Juan 21:1–19. Kua bèrdatnan krusial tin revelá aki, spesialmente tokante e grasia di Dios, i humildat humano?

Juan 20 ta terminá ku e propósito di e buki, ku lo tabata e lugá lógiko pa konkluí, pero tin un kapítulo mas. Kapítulo 21 ta kuminsá ku algun di e disipelnan bèk na Galilea, ku Pedro sugiriendo un anochi riba e lago. Ta parse komo si fuera tempunan bieu a bolbe, i e disipelnan ta bèk na nan ofishi bieu, piskamentu. Pero nan no ta kue nada e anochi ei.

Mainta, un strañero misterioso kantu di laman ta bisa nan pa tira nan reda na banda drechi di e boto. E ora ei nan ta kue asina tantu piská ku nan no por hala e reda. Tabata meskos ku e komienso di nan ministerio huntu ku Hesus (lesa Lukas 5:1–11). Inmediatamente Juan ta rekonosé Hesus i ta bisa Pedro, ku ta bula den awa mesora i ta landa bai kantu.

Hesus ta hasi Pedro tres pregunta, tur tokante amor pa su Maestro. Promé ku e krusifikashon, Pedro a insistí ku e lo a entregá su bida pa Hesus (Juan 13:37). Esei ta e momento ku Hesus a pronostiká su tripel negashon (Juan 13:38). Na e enkuentro akí na Galilea, Pedro no ta hasi su mes e punto di referensia, sino mas bien ta hasié Hesus: “ ‘Señor, Bo sa tur kos; Bo sa ku mi ta stimaBo’ ” (Juan 21:17).

Algun hende ta opservá ku Hesus ta usa e verbo agapaō, ku ta nifiká stima, ora E ta kuestioná Pedro (ku eksepshon di e último biaha), i ku Pedro semper ta kontestá ku phileō, ku ta nifiká stima, pero djis komo amigu. E implikashon ta ku Pedro no a alkansá e tipo mas haltu di amor.

En realidat, e kontesta di Pedro ta enfoká riba humildat. Ku Pedro su frakaso semper su dilanti, ta mas probabel ku e ta usa humildemente un “término inferior”, i no ta riska reklamá demasiado pa su mes. I ta e humildat akí Hesus ta afirmá, i ku ta bira krusial ora E ta restourá Pedro na ministerio. No tin duda, humildat ta un di e kualifikashonnan di mas grandi pa ministerio, pasobra e enfoke e ora ei ta bira Hesu-Kristu, i no e ami.

Pedro su restourashon i ròl komo lider den e iglesia primitivo ta un di e evidensianan di mas fuerte di ku Hesus a lanta for di morto. Lo tabata difísil pa splika e prominensia di Pedro si Hesus no a restour’é na ministerio den presensia di e otro disipelnan.

Dikon humildat ta asina klave den kualke hende ku ta buska pa konosé Señor? Den lus di e Krus, di kiko kualke di nos mester ta orguyoso?

Mantené Bo Bista riba Hesus

Lesa Juan 21:20–22. Kua pregunta a hiba Pedro riba un kaminda robes? Kon Hesus a stret e kaminda?

Hesus a kaba di restourá Pedro na ministerio i a bis’é: “SiguiMi” (Juan 21:19). Tabata probablemente un siguimentu físiko real di Hesus riba playa. I esei ta pasobra Pedro ta bira i ta mira Juan tambe ta sigui Hesus, i e ta puntra tokante Juan. “ ‘Pero Señor, ke tal di e hòmber akí?’ ” (Juan 21:21, NKJV).

Ora Hesus a restourá Pedro na ministerio, El a pronostiká e tipo di morto di Pedro (Juan 21:18). Ta parse ku Pedro tabata kurioso tokante e morto di Juan tambe. Hesus ta bolbe dirigí Pedro su atenshon na e asuntu di siguiE, i no a preokupá tokante loke lo sosodé ku un otro disipel.

Lesa Juan 21:23–25. Kon e deklarashon di Hesus a ser komprondé robes? Kon apòstel Juan a koregí e mal komprondementu ei?

Hende a komprondé robes loke Hesus tabata ke men ora El a bisa: “ ‘Si ta Mi boluntat pa e keda te ora Mi bin, esei no ta bo asuntu. Abo siguiMi!’ ” (Juan 21:22, ESV). Nan a kere ku e tabata nifiká ku Hesus lo a bin bèk promé ku Juan a muri. Segun ku tempu tabata pasa i Juan tabata bira bieu, lo a bira un krísis si e lo a muri (loke, naturalmente, el a hasi) i Hesus no a bin bèk. Juan ta koregí e malinterpretashon akí indikando ku tabata un asuntu di e boluntat di Hesus, no un profesia di loke lo a sosodé.

E idea di enfoká riba Hesus, na lugá di riba otro hende, ta un guia poderoso den restu di e lès di e siman akí. Hesus, i Hesus so, ta nos Salbador. Hende lo desapuntábo inevitablemente, kisas asta hasibo doló, tambe.

E bèrdatnan kubrí di djamars pa djaweps lo sigui riba e tema di komprondé e Palabra di Dios, ku e meta di konosé i sigui Hesus, kende so mester ta nos Maestro i Guia, no opstante e yudansa, konseho, i guia ku otronan kisas por duna nos.

Kuantu biaha otronan, ku bo por tabata atmirá, a desapuntábo? Ki lèsnan, maske kon duru, bo a siña for di e eksperensia ei?

Lus i Skuridat

Lesa Juan 1:4–10; Juan 3:19–21; Juan 5:35; Juan 8:12; Juan 9:5; Juan 11:9,10; i Juan 12:35. Ki gran kontraste ta presente aki, i dikon e kontraste akí ta asina fundamental pa komprondé bèrdat?

Mundu ta den skuridat; e ta evitá e lus i no por, riba su mes, haña su kaminda na e berdadero Dios, e Dios personal di Kreashon, revelashon, i Redenshon.

“Nunka humanidat por, di su mes, alkansá un konosementu di loke ta divino. ‘E ta mes haltu ku shelu; kiko bo por hasi? Mas profundo ku fièrnu; kiko bo por sa?’ Job 11:8. Solamente e spiritu di adopshon por revelá nos e kosnan profundo di Dios, ku ‘wowo no a mira, ni orea a tende, ni a drenta den kurason di hende.’ ‘Dios a revelá nan na nos pa medio di Su Spiritu.’ ”–Ellen G. White, The Desire of Ages, p. 412.

Solamente Hesu-Kristu “a deklar’E” e Tata (Juan 1:18, NKJV). E verbo griego ta exēgeomai, ku ta nifiká “interpretá,” “splika,” òf “eksponé.” Juan ta presentá Hesus komo e Mensahero selestial, Esun ku ta splika kiko ta nifiká konosé Dios. Solamente atraves di Hesus nos por konosé Dios berdaderamente.

Lesa Juan 8:42–44. Kon Hesus ta deskribí e fundeshi falsu riba kua e lidernan religioso di Israel a basa nan fe?

Esnan ku no ta para den e bèrdat ta papia for di nan propio rekursonan. Nan “ta mira” e nifikashon di un teksto solamente for di un perspektiva humano. En kambio, nos mester aseptá ku Kristu ta e lus di mundu i siguiE den nos interpretashon di Su Palabra. En kambio, diabel ta papia for di “su mes rekursonan” (Juan 8:44, NKJV). Si nos no ta kuidadoso i no ta someté den fe i obediensia na Dios, nos ta den peliger di hasi e mesun kos: lesa e teksto basá solamente riba nos mes deseonan, anhelonan, i perspektivanan, loke ta muchu mas fásil pa hasi ku nos lo por realisá.

Kon bo ta reakshoná riba bèrdatnan ku “ta trapa riba bo dede,” kontrali na kon bo mester reakshoná riba e bèrdatnan ei?

Teologia Di “Ariba” òf Di “Abou”

Lesa Juan 4:46–54. Ki problema a trese e ofisial serka Hesus, i kiko tabata e berdadero problema básiko aki?

E hòmber akí a bin serka Hesus, e Lus di mundu, pero el a tuma e desishon pa kere solamente si Hesus a kura su yu. Nos lo por a bisa ku e teologia di e hòmber akí tabata un “teologia di abou”. Teologia di abou ta pone regla- i normanan pa Dios i Su Palabra. Ideanan humano, pa defektuoso i pa limitá i pa suphetivo ku nan ta, ta bira e outoridat final riba kon hende ta interpretá e Palabra di Dios. Ki un trampa peligroso pa kai aden!

Teologia “di ariba”, en kambio, ta respondé pa medio di fe, ku kreensia den Dios i Su Palabra promé (Juan 4:48; Juan 6:14,15; 2 Tim. 3:16). Ora Beibel ser aseptá pa medio di fe, e ta bira su mes intérprete. E filosofia di Skritura, mas bien ku e filosofia di e époka, ta e guia pa komprondé i interpretá Skritura. Puntonan di bista humano mester ta suheto i supordiná na e Palabra di Dios, i no kontrali.

Nos mester kere e palabranan di Skritura si nos ke kere e palabranan di Hesus (Juan 5:46,47). “ ‘Si boso keda den Mi palabra, boso ta berdaderamente Mi disipelnan’ ” (Juan 8:31, NKJV). Si nos ta duda den e Palabra di Dios, Su Palabra no por keda den nos (Juan 5:38). “ ‘Esun ku rechasáMi, i no risibí Mi palabranan, tin e loke ta husg’é: e palabra ku Mi a papia lo husg'é riba e último dia. Pasobra Mi no a papia riba Mi mes outoridat; ma e Tata ku a mandaMi a dunaMi un mandato, kiko Mi mester bisa i kiko Mi mester papia’ ” (Juan 12:48,49, NKJV).

Tende e Palabra di Dios ta mas ku un apsorshon pasivo di informashon. E ta nifiká tambe hasi e boluntat di Dios. I esaki ta e reakshon aktivo riba tende e Palabra. “ ‘Si kualke hende tin deseo di hasi Su boluntat, e lo sa tokante e doktrina, si e ta di Dios òf si Mi ta papia riba Mi mes outoridat’ ” (Juan 7:17, NKJV).

I e tendementu akí, i hasimentu, di e Palabra di Dios ta un ekspreshon di amor p’E. “ ‘Si kualke hende ta stimaMi, e lo warda Mi palabra; i Mi Tata lo stim'é, i Nos lo bin serka dje i Nos lo biba huntu kuné’ ” (Juan 14:23, NKJV).

Kiko ta e relashon entre nos amor pa Hesus i obediensia? Dikon kualke tipo di “obediensia”, no basá riba amor, ta kore peliger di ta legalismo?

Keda den Hesus

Lesa Juan 12:32. Den ki formanan e deklarashon sorprendente akí ta deskribí e outoridat di Hesu-Kristu?

Manera nos a mira durante e lèsnan di e kuartal akí, e Evangelio di Juan ta hala nos serka Hesus, pero solamente si nos ta dispuesto di konosé Dios i hasi Su boluntat. Den henter e Evangelio di Juan, hende ku topa Hesus sea ta aseptá e lus i krese òf ta rechasá e lus i bira siegu. Nikodemo, e muhé na e pos, e ofisial real, e hòmber na e tanki di Betèsda, e 5.000 ku a alimentá ku pan i piská, e rumannan di Hesus, e lidernan religioso, e hòmber ku a nase siegu, Maria i Marta, Pilato, tur a topa ku Hesus i a hasi eskohonan tokante e bèrdat i lus ku El a trese.

Teologia di abou ta kuminsá ku argumentashon humano pa determiná i studia e eksistensia i naturalesa di Dios. E perspektiva humano, defektuoso, kaí, i ku prehuisio, ta haña preferensia riba loke ta Divino, santu, perfekto, i omnisapiente. Teologia di abou ta garantisá pa pone hende dual, manera el a hasi den pasado i lo hasi den futuro (lesa Rev. 14:1–12), ora sabiduria humano, tratando na remplasá loke ta divino, lo purba fòrsa adorashon falsu riba mundu.

Lesa Juan 15:1–11. Kiko ta e sekreto di kresementu i salú spiritual?

E sekreto ta di keda konektá na Hesus. E ta e Palabra di Dios, e Pan di Bida, e Lus di mundu, e Porta di e karnénan, e Bon Wardadó, e Resurekshon i Bida, E Kaminda, Bèrdat, i Bida, i e Berdadero Mata di wendrùif.

E Miembronan di e Deidat i nan Palabra, Beibel, ta manera magnet. Si nan no ser resistí, nan lo hala nos serka nan. “E bos di Dios ta papiando na nos atraves di Su Palabra, i tin hopi bos ku nos lo tende; pero Kristu a bisa ku nos mester tene kuidou ku esnan ku lo bisa: Ata Kristu aki òf ata Kristu aya. Kon nos por sa, antó, ku nan no tin e bèrdat, a ménos ku nos trese tur kos na e Skrituranan?”–Ellen G. White, The Advent Review and Sabbath Herald, 3 di aprel 1888. I despues, nos mester someté nos propio puntonan di bista na esnan presentá den e Palabra di Dios.