Amor di Pakto

Lesa pa e Estudio di e Siman Akí:

Versíkulo di Memoria:

Hopi hende a ser siñá ku e palabra griego agape ta referí na un amor ku ta úniko pa Dios, miéntras ku otro términonan pa amor, manera phileo, ta referí na diferente tipo di amor, mas defisiente ku agape. Algun hende ta pretendé tambe ku agape ta referí na amor unilateral, un amor ku ta duna solamente pero nunka ta risibí, un amor kompletamente independiente di reakshon humano.

Sinembargo, estudio kuidadoso di amor divino den henter Skritura ta mustra ku e ideanan akí, aunke komun, ta robes. Na promé lugá, e término griego agape no ta referí solamente na e amor di Dios sino tambe na amor humano, asta tin biaha amor humano mal dirigí (2 Tim. 4:10). Na di dos lugá, den henter Skritura, hopi término ku no ta agape ta referí na e amor di Dios. Por ehèmpel, Hesus a siña: “ ‘E Tata Mes ta stima [phileo] boso, pasobra boso a stima [phileo] Mi’ ” (Juan 16:27, NASB). Aki, e término griego phileo ta ser usá no solamente pa amor humano sino pa e amor di Dios pa hende. Pues, phileo no ta referí na un tipo di amor defisiente sino na e amor di Dios mes.

Skritura ta siña tambe ku e amor di Dios no ta unilateral sino profundamente relashonal, den sentido ku e ta hasi un diferensia profundo pa Dios si hende ta reflehá Su amor bèk na djE i na otronan, òf nò.

E Amor Eterno di Dios

Skritura ta kla: Dios ta stima tur hende. E versíkulo di mas famoso di Skritura, Juan 3:16, ta proklamá e bèrdat akí: “ ‘Pasobra Dios a stima mundu asina tantu ku El a duna Su úniko Yu, pa ken ku kere den djE no mester bai pèrdí ma tin bida eterno’ ” (NKJV).

Lesa Salmo 33:5 i Salmo 145:9. Kiko e versíkulonan akí ta siña tokante kon leu Dios su bondat amoroso, kompashon i mizerikòrdia ta yega?

Algun hende lo por pensa ku nan no por ser stimá òf ku Dios lo por ta stima tur otro hende pero no nan. Tòg, Beibel ta proklamá konsistentemente ku kada un persona ta ser stimá pa Dios. No tin niun hende ku E no ta stima. I pasobra Dios ta stima tur hende, E ke tambe pa tur hende ser salbá, tambe.

Lesa 2 Pedro 3:9, 1 Timoteo 2:4 i Ezekiel 33:11. Kiko e tèkstnan aki ta siña tokante e deseo di Dios pa salba tur hende?

E versíkulo despues di Juan 3:16 ta añadí: “ ‘Pasobra Dios no a manda Su Yu den mundu pa kondená mundu, ma pa mundu ser salbá pa medio di djE’ ” (Juan 3:17, NKJV). Si tabata keda na Dios so, tur ser humano lo a aseptá Su amor i ser salbá. Sinembargo, Señor lo no fòrsa Su amor riba niun hende. Hende ta liber pa aseptá òf rechasá esaki.

I aunke algun sí ta rechasá esei, Dios nunka ta stòp di stima nan. Den Jeremias 31:3, E ta proklamá na Su pueblo: “ ‘Sí, Mi a stima boso ku un amor eterno; p’esei ku mizerikòrdia mi a hala boso’ ” (NKJV). Na otro kaminda, Beibel ta siña frekuentemente ku e amor di Dios ta dura pa semper (lesa, por ehèmpel, Salmo 136). E amor di Dios nunka ta kaba. E ta eterno. Esaki ta difísil pa nos komprondé pasobra hopi biaha nos ta haña ku ta fásil pa no stima otro hende, no ta bèrdat?

Sinembargo, si nos komo individuo por a siña eksperensiá e realidat di e amor ei, esta, pa konosé pa nos mes e amor di Dios, kon diferente nos lo por biba i trata otro hende.

Amor di Pakto

Hopi biaha Beibel ta deskribí e relashon di amor spesial di Dios ku nos dor di usa metáforanan di famia òf afinidat, partikularmente metáforanan di e amor entre un esposo i esposa òf di un bon mama pa su yu. E metáforanan akí ta ser usá partikularmente pa deskribí e relashon spesial entre Dios i Su pueblo di pakto. Esaki ta un relashon di amor di pakto, ku ta envolví no solamente e amor di Dios pa Su pueblo sino tambe ekspektativanan ku hende lo aseptá e amor akí i lo stim’E (i otro) a kambio.

Lesa Deuteronomio 7:6–9. Kiko e versíkulonan akí ta siña tokante e relashon entre Dios ku ta hasi pakto i Dios su bondat amoroso?

Deuteronomio 7:9 ta deskribí un tipo di amor spesial ku Dios tin ku Su pueblo di pakto, un relashon ku ta parsialmente dependiente di si nan ta keda fiel òf nò. E amor di Dios no ta kondishonal, pero e relashon di pakto ku Su pueblo ta.

E palabra tradusí “bondat amoroso” òf “mizerikòrdia” den Deuteronomio 7:9, ḥesed, mes ta ehèmpel di e aspekto di pakto di amor divino (i hopi mas). E palabra ḥesed ta ser usá hopi biaha pa deskribí e grandesa di e mizerikòrdia, bondat i amor di Dios. Entre otro, ḥesed ta referí na e bondat amoroso, òf amor firme, pa un otro denter di un relashon di amor resíproko eksistente. Tambe e ta inisiá un relashon asina ku e ekspektativa ku e otro partido lo demostrá e bondat amoroso akí a kambio.

Dios su ḥesed ta demostrá ku Su bondat amoroso ta sumamente konfiabel, firme i duradero. Tòg, na mes momento, e resepshon di e benefisionan di ḥesed ta kondishonal, dependiente riba e boluntat di Su pueblo pa obedesé i pa mantené nan parti di e relashon (lesa 2 Sam. 22:26, 1 Reinan 8:23, Salmo 25:10, Salmo 32:10, 2 Krón. 6:14).

Dios su amor firme ta e base di tur relashon amoroso, i nunka nos por a igualá e amor ei. Dios no solamente libremente a duna nos eksistensia sino tambe den Kristu El a entregá Su mes libremente pa nos. “ ‘Ningun hende tin un amor mas grandi ku esaki, ku duna su bida pa su amigunan’ ” (Juan 15:13, NKJV). No tin duda, e ekspreshon di mas grandi di e amor di Dios a ser revelá ora Señor “a humiliá Su mes i a bira obediente te na e punto di morto, asta e morto di krus” (Fil. 2:8, NKJV).

Relashon Kondishonal

Dios ta yama i ta invitá kada persona den un relashon di amor íntimo kunE (lesa Mat. 22:1–14 ). Respondé apropiadamente riba e yamada akí ta envolví obedesé e mandato di Dios pa stima Dios i pa stima otronan (lesa Mat. 22:37–39). Si un hende ta disfrutá di e benefisionan di e relashon akí ku Dios ta dependé di si e ta disidí libremente pa aseptá òf rechasá Su amor.

Lesa Oseas 9:15, Jeremias 16:5, Romanonan 11:22 i Hudas 21. Kiko e tèkstnan akí ta siña tokante si e benefisionan di e amor di Dios por ser rechasá, asta pèrdí?

Den e tèkstnan akí i otronan, disfrutá di e benefisionan di un relashon di amor ku Dios ta ser deskribí konstantemente komo kondishonal riba e kontesta humano na Su amor. Sinembargo, nos no mester kometé e eror di pensa ku Dios realmente ta stòp di stima niun hende. Manera nos a mira, e amor di Dios ta eterno. I, ounke Oseas 9:15 ta inkluí Dios bisando di Su pueblo: “ ‘Lo Mi no stima nan mas’ ”, ta importante pa kòrda ku mas despues den e mesun buki Dios ta deklará di Su pueblo: “ ‘Lo Mi stima nan libremente’ ” (Os. 14:4, NKJV). Oseas 9:15 no por nifiká ku Dios ta stòp di stima Su pueblo kompletamente. E mester referí, en kambio, na e kondishonalidat di algun aspekto òf benefisio partikular di un relashon di amor ku Dios. I kon nos ta respondé riba Su amor ta krusial pa e relashon akí sigui.

“ ‘Esun ku tin Mi mandamentunan i ta warda nan, e ta esun ku ta stimaMi. I esun ku stimaMi lo ser stimá pa Mi Tata, i Ami lo stim’é i manifestá Mi mes na dje’ ” (Juan 14:21, NKJV). Di mes manera, Hesus ta proklamá na Su disipelnan: “ ‘E Tata Mes ta stima boso, pasobra boso a stimaMi i a kere ku Mi a bini di e Tata’ ” (Juan 16:27, NASB).

E tèkstnan aki i otronan ta siña ku mantené e benefisionan di un relashon salbador ku Dios ta dependé di si nos lo aseptá e amor di Dios (ku ta envolví boluntat pa ta vehíkulonan di e amor ei tambe). Atrobe, esaki no ta nifiká ku e amor di Dios ta stòp un dia. Mas bien, meskos ku nos no por stòp solo di bria pero por kòrta nos mes kita for di e rayonan di solo, nos no por hasi nada pa stòp e amor eterno di Dios, pero finalmente nos por rechasá un relashon ku Dios i, asina, kòrta nos mes kita for di loke e ta ofresé, spesialmente e promesa di bida eterno.

Mizerikòrdia Pèrdí

E amor di Dios ta eterno i semper inmeresí. Sinembargo, hende por rechas’é. Nos tin e oportunidat pa aseptá òf rechasá e amor ei, pero solamente pasobra Dios ta stima nos libremente ku Su amor perfekto i eterno promé ku kualke kos ku nos hasi (Jer. 31:3). Nos amor pa Dios ta un kontesta riba loke ya a ser duná na nos asta promé ku nos a pidié.

Lesa 1 Juan 4:7–20, ku énfasis spesífiko riba versíkulonan 7 i 19. Kiko esaki ta bisa nos tokante e prioridat di e amor di Dios?

Dios su amor semper ta bin promé. Si Dios no a stima nos promé, nos lo no por a stim’E a kambio. Miéntras ku Dios a krea nos ku e kapasidat pa stima i pa ser stimá, Dios Mes ta e base i Fuente di tur amor. Nos tin e eskoho, sinembargo, si nos lo asept’é i despues refleh’é den nos bida. E bèrdat akí ta ser ilustrá den e parabel di Kristu di e sirbidó ku no ta pordoná (lesa Mat. 18:23–35).

Den e parabel, nos por mira ku no tabatin ningun manera ku e sirbidó hamas por a paga bèk loke e tabata debe e doño. Di akuerdo ku Mateo 18, e sirbidó tabata debe su doño 10.000 talento. Un talento tabata suma masoménos 6.000 denario. I un denario tabata loke un trahadó promedio lo a ser pagá pa un dia di trabou (kompará ku Mat. 20:2). Pues, lo a tuma un trahadó promedio 6.000 dia di trabou pa gana un talento. Suponé, despues di a konta e dianan liber, ku un trahadó promedio lo por a traha 300 dia pa aña i, asina, gana 300 denario den un aña. Pues, lo a tuma un trahadó promedio masoménos 20 aña pa paga bèk un talento, ku tabata konsistí di 6.000 denario (6.000/300 = 20). Pa por gana 10.000 talento, antó, un trahadó promedio lo mester a traha 200.000 aña. Den poko palabra, e sirbidó nunka por a paga e debe akí bèk. Tòg, e doño a sinti kompashon pa su sirbidó i a pordoná su debe grandi libremente.

Sinembargo, ora e sirbidó pordoná akí a nenga di pordoná e debe muchu mas chikitu di 100 denario di un di su kompañeronan di servisio i a laga tir’é den prizòn pa motibu di e debe, e doño a keda konmoví ku rabia i a revoká su pordon mizerikòrdioso. E sirbidó a pèrdè e amor i pordon di su doño. Aunke Dios su kompashon i mizerikòrdia nunka ta kaba, un hende finalmente por rechasá, asta pèrdè, e benefisionan di Dios su kompashon i mizerikòrdia.

Bo a Risibí Pòrnada; Duna Pòrnada

Meskos ku e sirbidó nunka por a paga su debe na su doño, nos nunka por paga Dios bèk. Nunka nos por a gana òf meresé e amor di Dios. “Dios ta demostrá Su mes amor pa ku nos, den e echo ku miéntras nos tabata pekador ainda, Kristu a muri pa nos” (Rom. 5:8, NKJV). Ki amor maravioso! Manera 1 Juan 3:1 ta bisa: “Mira ki amor e Tata a otorgá na nos, ku nos por ser yamá yunan di Dios!” (NKJV). Sinembargo, loke nos por i mester hasi ta: reflehá e amor di Dios na otronan mas tantu ku posiblemente nos por. Si nos a risibí un kompashon i pordon asina grandi, kuantu mas nos mester otorgá kompashon i pordon na otronan? Kòrda ku e sirbidó a pèrdè e kompashon i pordon di su doño pasobra el a keda sin duna nan na su kompañero di servisio. Si nos ta stima Dios berdaderamente, nos lo no keda sin reflehá Su amor na otronan.

Lesa Juan 15:12, 1 Juan 3:16, i 1 Juan 4:7–12. Kiko e pasashinan akí ta siña tokante e relashon entre e amor di Dios, nos amor pa Dios, i amor pa otronan?

Djis despues di Juan 15:12, Hesus a bisa Su disipelnan: “ ‘Boso ta Mi amigunan si boso hasi loke Mi ta ordená boso’ ” (Juan 15:14, NKJV). I kiko Hesus a ordená nan? Entre otro, Hesus a ordená nan (i nos) pa stima otronan meskos ku E tabata stima nan. Aki i otro kaminda, Señor ta ordená nos pa stima Dios i pa stima otro.

Den un palabra, nos mester rekonosé ku nos a ser pordoná un debe infinito, unu ku nunka nos por paga bèk, un debe pagá solamente na e krus pa nos. P’esei, nos mester stima i alabá Dios i biba ku amor i grasia pa ku otronan. Manera Lukas 7:47 ta siña, esun ku ser pordoná hopi ta stima hopi, pero “ ‘na esun ku ser pordoná poko, e mes ta stima poko’ ” (NKJV). I ken entre nos no ta realisá kuantu el a ser pordoná?

Si stima Dios ta enserá ku nos ta stima otronan, nos mester kompartí e mensahe di Dios su amor, tantu ku palabra komo ku echo, ku urgensia. Nos mester yuda hende den nan bida diario aki i awor, i tambe trata pa ta un kanal di e amor di Dios i mustra hende na Esun ku ta ofresé nan e promesa di bida eterno den un shelu nobo i un tera nobo, un kreashon kompletamente nobo for di e mundu akí, ku ta asina dañá i ruiná pa piká i morto, e frutanan tristu di rechasá e amor di Dios.

Lesa Ellen G. White, “The Privilege of Prayer,” p. 93–104, den Steps to Christ.

“Mantené bo deseonan, bo gosonan, bo tristesanan, bo preokupashonnan i bo temornan dilanti di Dios. Bo no por karg’E; bo no por kans’E. Esun ku ta konta e kabeinan di bo kabes no ta indiferente na e deseonan di Su yunan. ‘Señor ta yen di kompashon, i di tierno mizerikòrdia.’ Santiago 5:11. Su kurason di amor ta ser toká pa nos tristesanan i asta pa nos ekspreshonnan di nan. Hiba na djE tur loke ta konfundí e mente. Nada ta muchu grandi pa E karga, pasobra E ta sostené mundunan, E ta goberná riba tur e asuntunan di universo. Nada ku di algun manera ta koserní nos pas ta muchu chikitu pa E nota. No tin ningun kapítulo den nos eksperensia muchu skur pa E lesa; no tin konfushon muchu difísil pa E klara. Ningun kalamidat por sosodé ku esun di mas ménos di Su yunan, ningun ansiedat molestiá e alma, ningun gozo alegrá, ningun orashon sinsero skapa for di e lepnan, di kua nos Tata selestial no ta opservá, òf den kua E no ta tuma interes inmediato. ‘E ta sana esnan di kurason kibrá, i ta mara nan heridanan.’ Salmo 147:3. E relashonnan entre Dios i kada alma ta asina distinto i kompletu komo si fuera no tabatin un otro alma riba tera pa kompartí Su vigilansia, ni un otro alma pa ken El a duna Su Yu stimá.”—Ellen G. White, Steps to Christ, p . 100.

Preguntanan pa Diskushon: