E Problema di Maldat

Lesa pa e Estudio di e Siman Akí:

Versíkulo di Memoria:

“I Dios lo seka tur lágrima for di nan wowo; lo no tin morto mas, ni tristesa, ni yoramentu. Lo no tin doló mas, pasobra e kosnan anterior a pasa bai” (Revelashon 21:4, NKJV).

Kisas e problema di mas grandi ku kristianismo ta enfrentando ta e problema di maldat, kon pa rekonsiliá e echo ku Dios ta perfektamente bon i amoroso, huntu ku e echo di maldat den e mundu akí. Den términonan kòrtiku, si Dios ta totalmente bon i todopoderoso, dikon tin maldat, i asina tantu di dje tambe? Esaki no ta simplemente un problema akadémiko sino algu ku ta molestiá hopi hende profundamente i ku ta stroba algun di yega na konosé i stima Dios.

“Pa hopi mente e orígen di piká i e motibu di su eksistensia ta un fuente di gran perplehidat. Nan ta mira e obra di maldat, ku su resultadonan teribel di aflikshon i desolashon, i nan ta kuestioná kon tur esaki por eksistí bou di e soberania di Un ku ta infinito den sabiduria, den poder, i den amor. Aki tin un misterio di kua nan no ta haña ningun splikashon.”—Ellen G. White, The Great Controversy, p. 492.

Hopi ateo ta identifiká e problema di maldat komo e motibu pa kua nan ta ateo. Pero manera nos lo mira den e siman akí i den e simannan benidero, e Dios di Beibel ta totalmente bon, i nos por konfi’E, asta apesar di e maldat ku ta infektá nos mundu kaí asina tantu.

“Kuantu tempu mas, o Señor?”

E problema di maldat ta ser ekspresá no solamente den kontekstonan kontemporáneo sino tambe den Skritura mes.

Lesa Job 30:26, Jeremias 12:1, Jeremias 13:22, Malakias 2:17, i Salmo 10:1. Kon e tèkstnan akí ta trese e problema di maldat na promé plano di eksperensia humano?

E tèkstnan akí ta lanta hopi pregunta ku ainda ta serka nos awe. Dikon ta parse ku e malbadonan ta prosperá i esnan ku ta hasi malu ta benefisiá di nan maldat, kisas no semper pero tòg sufisiente biaha? Dikon e hustunan ta sufri asina tantu? Unda Dios ta ora maldat ta tuma lugá? Dikon tin biaha Dios ta parse di ta leu for di nos, asta skondí?

Loke sea nos bisa tokante e preguntanan akí i e problema di maldat mas generalmente, nos mester ta sigur di no bagatelisá maldat. Nos no mester purba resolvé e problema dor di minimisá e tipo, òf kantidat, di maldat ku tin den mundu. Maldat ta masha malu, i Dios ta odi’é asta mas ku nos. Pues, nos lo por uni na e gritu ku ta zona den henter e Skritura komo kontesta riba e hopi maldatnan i inhustisianan den mundu: “Kuantu tempu mas, o Señor?”

Lesa Mateo 27:46. Kon bo ta komprondé e palabranan akí di Hesus? Kiko nan ta transmití tokante kon maldat a toka Dios den e formanan di mas impreshonante?

Riba e krus, Hesus Mes a ekspresá e pregunta: “Mi Dios, Mi Dios, pakiko Bo a bandonáMi?” (Mat. 27:46, NKJV). Aki spesialmente nos ta mira ku Dios Mes ta ser toká pa maldat, un bèrdat asombroso poderosamente resaltá den e sufrimentu i morto di Kristu riba krus, kaminda tur e maldat di mundu a kai riba djE.

Pero asta aki tin speransa. Loke Kristu a hasi riba krus a derotá e fuente di maldat, Satanas, i finalmente lo deshasí di maldat kompletamente. Hesus a sita e palabranan ei di Salmo 22:1, i e restu di e salmo ta terminá den triunfo.

Riba e krus, Hesus a wak padilanti na un speransa ku, e momentu ei, E no por a mira. Kon nos por saka konsuelo for di Su eksperensia ora nos, tampoko, no por mira speransa nos dilanti?

“Tin Hopi Kos Ku Nos No Sa”

E fin di historia lo yega ku e triunfo di amor riba maldat. Pero, mientrastantu, hopi pregunta preokupante ta keda. Kon nos por pensa i papia tokante e problema di maldat na un manera ku lo por ta útil?

Lesa Job 38:1–12. Kon Dios su kontesta na Job ta tira lus riba e problema di maldat? Kuantu nos sa i no sa tokante kiko lo por tabata pasando tras di kortina?

Den e relato, Job a sufri hopi i a hasi hopi pregunta e mes tokante dikon asina tantu maldat i sufrimentu a sosodé kuné. El a pidi un oudiensia ku Dios pa asina buska kontesta riba su preguntanan, sin sa ku hopi mas tabata pasando tras di kortina, den e korte selestial (lesa Job 1,2).

Dios su kontesta na Job ta impreshonante. Spesífikamente, “SEÑOR a kontestá Job for di e warwarú, i a bisa: ‘Ken esaki ta ku ta hasi konseho skur ku palabranan sin konosementu?’ ” (Job 38:1,2, NKJV). Un tradukshon ta pon’e asin’akí: “Pakiko bo ta papia asina tantu ora bo sa asina tiki?” (Job 38:2, CEV). I, Dios ta agregá den Job 38:4: “Unda bo tabata ora Mi a pone e fundeshinan di tera? BisaMi, si bo tin komprondementu” (NKJV).

Lesa Job 42:3. Kon e kontesta di Job ta iluminá loke nos mester rekonosé tokante nos propio posishon?

Pa medio di Su kontesta na Job, Dios a duna di konosé na Job ku tin hopi kos ku Job no tabata sa i no tabata komprondé. Meskos ku Job, nos tambe mester rekonosé humildemente ku tin hopi kos ta pasando den mundu, i tras di kortina, ku nos no sa nada di dje. E echo ku nos no sa e kontestanan riba nos preguntanan no ta nifiká ku no tin bon kontestanan òf ku un dia tur kos lo no ser resolvé. Te na e momentu ei, nos mester konfia den e bondat di Dios, ku a ser revelá na nos den asina tantu forma.

E Teista Eséptiko

Dios ta proklamá den Isaias 55:8,9: “ ‘Pasobra Mi pensamentunan no ta boso pensamentunan, ni boso kamindanan no ta Mi kamindanan,’ SEÑOR ta bisa. ‘Pasobra meskos ku e shelunan ta mas haltu ku tera, asina Mi kamindanan ta mas haltu ku boso kamindanan, i Mi pensamentunan ku boso pensamentunan’ ” (NKJV).

Dios su pensamentunan ta muchu mas haltu ku esnan di nos. Nos no por ni imaginá e komplehidatnan di e plan di Dios pa historia. Mirando esaki, dikon nos mester spera di ta den un posishon pa sa kiko ta e motibunan di Dios pa loke E ta hasi òf no ta hasi den vários situashon?

Un manera di aserká e problema di maldat, basá riba rekonosé kon tiki nos sa, ta ser yamá “teismo eséptiko”. E teista eséptiko ta un hende ku ta kere ku Dios tin bon motibunan pa aktua manera E ta hasi, pero mirando nos konosementu limitá, nos no mester spera di ta den un posishon pa sa presis kiko e motibunan ei ta. E teista eséptiko ta eséptiko tokante e kapasidat humano pa ta konsiente di òf pa komprondé totalmente e motibunan di Dios relashoná ku e maldat den e mundu akí. Djis pasobra un hende no por mira, por ehèmpel, mikrobionan ta bula den laira tur rònt di nos, no ta nifiká ku no tin mikrobionan ta bula den laira tur rònt di nos. E echo ku un hende no sa kiko e motibunan di Dios ta, siguramente no ta nifiká ku Dios no tin bon motibunan.

Lesa Salmo 73. Kon e salmista ta aserká e maldat i inhustisia rònt di dje? Kiko e ta mira ku ta pone su komprondementu den un perspektiva diferente?

E salmista tabata profundamente preokupá pa e maldat den mundu. El a wak rònt di dje i a mira e malbadonan ta prosperá. Tur kos tabata parse inhustu. E no tabatin kontesta pa duna. E tabata puntra su mes si tabata bale la pena pa kere den i sirbi Dios. Te ora el a wak den e santuario.

E santuario ta proveé parti di e klave pa e problema di maldat, esta, rekonosé ku tin un Hues hustu ku lo trese hustisia i huisio na Su mes tempu.

E Defensa di Boluntat Liber

Maske kuantu nos no ta komprondé di e kamindanan i pensamentunan di Dios, Skritura ta revelá algun kos ku ta yuda trata e problema di maldat. Un kaminda pa atendé e problema lógiko di maldat ta konosí komo e defensa di boluntat liber.

E defensa di boluntat liber ta e punto di bista ku maldat ta resultado di e mal uso di boluntat liber di parti di kriaturanan. Dios, antó, no ta kulpabel pa maldat, pasobra maldat ta e resultado di kriaturanan ku ta hasi mal uso di e boluntat liber ku Dios a duna nos pa bon motibunan. Sinembargo, dikon Dios lo a duna un boluntat liber asina? Respekto esaki, C. S. Lewis a yega di skirbi ku “boluntat liber, aunke e ta hasi maldat posibel, e ta tambe úniko kos ku ta hasi kualke amor òf bondat òf goso posibel ku ta bale la pena pa bo tin. Un mundu di outomat, di kriaturanan ku ta traha manera mashin, apénas lo tabata bale la pena krea. E felisidat ku Dios ta destiná pa Su kriaturanan di mas elevá ta e felisidat di ta libremente, boluntariamente uní na djE i na otro ... I pa esei nan mester ta liber.”—Mere Christianity (New York: MacMillan, 1960), p. 52.

Lesa Génesis 2:16 i 17. Kon e versíkulonan akí ta demostrá e libertat moral duná na Adam ku Eva?

Dikon manda nan a ménos ku nan tabatin boluntat liber pa kuminsá? Adam i Eva a kome e fruta prohibí, i for di e tempu ei nos planeta a ser yená ku maldat. Den Génesis 4, e siguiente kapítulo despues di e relato di e Kaida, e konsekuensianan teribel di piká ta ser mirá den e asesinato di Abel dor di su ruman hòmber. E relato di e Kaida ta mustra kon e mal uso di e boluntat liber di Adam i Eva a trese piká i maldat den e historia di nos planeta.

Den henter Skritura, nos ta mira e realidat di boluntat moral liber. (Lesa Deut. 7:12, 13; Hos. 24:14, 15; Salmo 81:11–14; i Isa. 66:4.) Tur dia di nos bida, te na un òf otro grado, nos mes ta ehersé e boluntat liber duná na nos dor di nos Kreador. Sin boluntat liber, nos lo no tabata humano rekonosibel. Nos lo tabata mas manera un mashin, òf asta un robot sin mente.

Amor i Maldat?

Dios a duna kriaturanan boluntat liber pasobra e ta nesesario pa amor; mal uso di e boluntat liber akí ta e kousa di maldat. Atrobe, hopi pregunta ta keda. Dios ta pèrmití maldat (pa un tempu), miéntras ku E ta despresi’e apashoná, pasobra ekskluí su posibilidat lo a ekskluí amor, i destruyé prematuramente lo a daña e konfiansa nesesario pa amor.

“Tera tabata skur pa motibu di mal komprondementu di Dios. Pa e sombranan skur lo por a ser iluminá, pa e mundu lo por ser tresé bèk na Dios, e poder engañoso di Satanas mester a ser kibrá. Esaki no por a ser hasí pa medio di forsa. E ehersisio di forsa ta kontrali na e prinsipionan di e gobièrnu di Dios; E ta deseá solamente e servisio di amor; i amor no por ser ordená; e no por ser ganá pa medio di forsa òf outoridat. Solamente atraves di amor, amor ta ser spièrtá. Konosé Dios ta nifiká stim’E; Su karakter mester ser manifestá kontrali na e karakter di Satanas.”—Ellen G. White, The Desire of Ages, p. 22.

Sin boluntat liber, no por tabatin amor, i si Dios ta amor, e ora ei ta parse kla ku e no ta realmente un opshon pa Dios nenga amor òf e libertat nesesario pa amor eksistí. Un hende por a suponé tambe ku, si nos tabata konosé e fin for di prisipio, manera Dios ta hasi, nos lo no tabata ke pa E deshasí di nos libertat. Al fin i al kabo, ken lo ker a biba den un universo sin amor?

Lesa Romanonan 8:18 i Revelashon 21:3,4. Kon e tèkstnan akí por duna nos konfiansa pa konfia den e bondat di Dios, apesar di tur maldat den nos mundu?

Asta ora nos no por mira atraves di e skuridat, Dios por mira e fin for di prinsipio. E por mira, tambe, e felisidat eterno primintí na tur ku ta pone nan fe den Hesus. Di akuerdo ku Romanonan 8:18, “e sufrimentunan di e tempu presente akí no ta digno pa ser kompará ku e gloria ku lo ser revelá den nos” (NKJV). Nos tin e fe i konfiansa pa kere e promesa asombroso akí?

Tambe, asina sagrado, asina fundamental, amor tabata, i e libertat inherente den amor, ku mas bien ku nenga nos esaki, Hesus tabata sa ku e lo a mand’E na e krus, kaminda E lo a sufri grandemente. Sinembargo, El a otorgá e libertat akí na nos di tur manera, sabiendo kiko esei lo a kost’E. Dikon esaki ta un pensamentu asina krusial pa mantené semper nos dilanti?

Lesa Ellen G. White, “Why Was Sin Permitted?”, p. 33–43, den Patriarchs and Prophets.

“Asta ora el a ser tirá for di shelu, Sabiduria Infinito no a destruí Satanas. Ya ku solamente e servisio di amor por ta aseptabel pa Dios, e lealtat di Su kriaturanan mester sosegá riba un konvikshon di Su hustisia i benevolensia. E habitantenan di shelu i di e mundunan, siendo no prepará pa komprondé e naturalesa òf konsekuensianan di piká, e tempu ei no por a mira e hustisia di Dios den destrukshon di Satanas. Si el a ser eliminá mesora for di eksistensia, algun lo a sirbi Dios pa miedu mas bien ku pa amor. E influensia di e gañadó lo no a ser destruí kompletamente, ni e spiritu di rebelion lo a ser eradiká kompletamente. Pa e bienestar di henter universo atraves di siglonan insesante, e mester desaroyá su prinsipionan mas plenamente, pa su akusashonnan kontra e gobièrnu divino por ser mirá den nan berdadero lus pa tur ser kreá, i pa e hustisia i mizerikòrdia di Dios i e inmutabilidat di Su lei por ser poné pa semper mas ayá di tur duda.

“E rebelion di Satanas mester tabata un lès pa e universo atraves di tur era benidero, un testimonio perpetuo di e naturalesa di piká i su teribel resultadonan. E elaborashon di e gobernashon di Satanas, su efektonan riba tantu hende komo angelnan, lo a demostrá kiko mester tabata e fruta di pone outoridat divino un banda. E lo a testifiká ku, ku e eksistensia di e gobièrnu di Dios, e bienestar di tur e kriaturanan ku El a traha ta ligá. Pues, e historia di e eksperimento teribel akí di rebelion mester tabata un protekshon perpetuo pa tur ser santu, pa prevení nan di ser engañá tokante e naturalesa di transgreshon, pa salba nan di kometé piká, i sufri su kastigu.”—Ellen G. White, Patriarchs and Prophets, p. 42,43.

Preguntanan pa Diskushon: