Reglanan di Kompromiso

Lesa pa e Estudio di e Siman Akí:

Versíkulo di Memoria:

“Esun ku peka ta di diabel, pasobra diabel a peka for di prinsipio. Pa e propósito akí e Yu di Dios a ser manifestá, pa E lo por a destruí e obranan di diabel” (1 Juan 3:8, NKJV).

Un narashon poderoso ku ta revelá naturalesa di e konflikto kósmiko por ser hañá den 1 Reinan 18:19–40, Elias riba Seru Karmelo, kaminda Señor ta eksponé e asina yamá “diosnan di e nashonnan.” Sinembargo, tin mas kos tras di kortina tokante e “diosnan” akí ku nan ta simpel produktonan di imaginashon pagano. Tras di e “diosnan” ku e nashonnan rònt di Israel a pensa ku nan tabata adorá tabatin, en realidat, algu otro.

“Nan a sakrifiká na demoñonan, no na Dios, na diosnan ku nan no tabata konosé, na diosnan nobo ku a yega últimamente, ku boso tatanan no tabatin temor di dje” (Deut. 32:17, NKJV). Pablo ta agregá: “E kosnan ku e paganonan ta sakrifiká, nan ta sakrifiká na demoñonan i no na Dios, i mi no ke pa boso tin kompañerismo ku demoño” (1 Kor. 10:20, NKJV).

Tras di e “diosnan” falsu di e nashonnan, antó, tabatin en realidat demoñonan disfrasá. Esaki ta nifiká, antó, ku tur e tèkstnan di Skritura ku ta trata ku idolatria i e diosnan strañero ta tèkstnan di “konflikto kósmiko”.

Ku e fondo akí, e tema di konflikto kósmiko ta ser komprondé mihó. I e bèrdat akí tin implikashonnan masivo pa komprondé mas tokante naturalesa di e konflikto akí i kon e ta tira lus riba e problema di maldat.

Un Angel Retrasá

Manera nos a mira, e “diosnan” falsu di e nashonnan tabata demoñonan disfrasá. I otro kaminda nos ta mira evidensia ku gobernantenan selestial demoniako tin biaha ta tras di gobernantenan terenal. Asta agentenan angelikal, mandá dor di Dios, por ser oponé dor di e forsanan di e enemigu.

Lesa Daniel 10:1–14, ku atenshon spesial na versíkulonan 12 i 13. Kiko e versíkulonan akí ta siña ku ta relevante pa e konflikto kósmiko? Kiko bo ta opiná di ku e angel, mandá pa Dios, a ser “resistí” pa bintiun dia?

Kon por tabata ku un angel, mandá pa Dios, por a ser “resistí” pa tres siman? Siendo todopoderoso, Dios tabata poseé e poder pa respondé na Daniel inmediatamente, esta, si El a skohe pa hasié. Si El a ehersé Su poder pa hasi esei, E por a laga un angel aparesé na Daniel mesora. Sinembargo, e angel ku Dios a manda a ser “resistí” dor di e “prens di e reino di Persia” pa tres siman kompletu. Kiko ta pasando aki?

“Pa tres siman Gabriel a lucha ku e podernan di skuridat, tratando na kontrarestá e influensianan ku tabata traha riba mente di Ciro. . . . Tur loke shelu por a hasi na fabor di e pueblo di Dios a ser hasí. Viktoria a ser optené finalmente; e forsanan di e enemigu tabata bou di kòntrol tur e dianan di Siro, i tur e dianan di su yu Cambyses.”—Ellen G. White, Prophets and Kings, p. 572.

Pa un konflikto asina por tuma lugá, Dios no mester ta ehersiendo tur Su poder. E enemigu mester ser pèrmití algun libertat i poder genuino ku no ta ser kitá kaprichosamente sino ta ser restringí pa algun parameter konosí pa tur dos partido (di kua e detayenan no ta ser revelá na nos). Ta parse ku mester tin parameternan den e konflikto kósmiko ku asta e angelnan di Dios ta operando denter di nan, ku den e próksimo lèsnan lo ser referí na dje komo e “reglanan di kompromiso”.

Den sierto sentido, komprondé e límitenan akí kisas no ta difísil si nos kapta e idea, ku ya a papia di dje, ku Dios ta obra solamente pa amor, i ku amor, no preshon, ta e fundeshi di Su gobièrnu. E idea akí, ku Dios ta obra solamente pa medio di e prinsipionan ku ta emaná for di amor, por yuda nos komprondé e gran konflikto mihó.

Kon bo a eksperensiá e límitenan di traha solamente pa medio di e prinsipionan di amor i no preshon? Ki lèsnan bo a siña tokante e límitenan di poder?

E Dragon di Revelashon

E perspektiva general di gobernantenan selestial den e konflikto kósmiko ta enkapsulá den e buki di Revelashon, kaminda diabel ta ser deskribí komo “e gran dragon” ku ta oponé Dios i “ta gaña henter mundu” (Rev. 12:9, NKJV).

Lesa Revelashon 13:1–8. Kiko esaki ta revelá tokante e alkanse di e hurisdikshon di e dragon?

E dragon (Satanas) no solamente ta hasi guera kontra Dios (Rev. 12:7–9) i Su sirbidónan (por ehèmpel, Rev. 12:1–6), sino e ta ser deskribí komo e gobernante tras di e reinonan terenal ku ta persiguí e pueblo di Dios atraves di siglonan.

E dragon “a duna . . . su poder, su trono, i gran outoridat” na e bestia for di laman (Rev. 13:2, NKJV; kompará ku Rev. 13:5; Rev. 17:13,14). E bestia for di laman akí ta ser “duná un boka ku ta papia gran kosnan i blasfemia, i el a ser duná outoridat pa sigui pa kuarentidos luna” (Rev. 13:5, NKJV).

Asina, Satanas (e dragon) ta duna poder i outoridat di gobernashon na un bestia (un poder religioso-polítiko terenal). E poder akí ta ser ehersé pa asina usurpá e adorashon debí na Dios. E bestia ta blasfemá e nòmber di Dios; e ta hasi guera tambe kontra, i asta ta vense, esnan santu di Dios (santunan), por lo ménos pa un periodo di tempu. E outoridat i hurisdikshon mundial akí ta ser duná na dje dor di e dragon, e gobernante usurpadó di e mundu akí.

Sinembargo, tin límitenan kla riba Satanas i su agensianan, tambe, inkluyendo límitenan temporal. “P’esei regosihá, o shelunan, i boso ku ta biba den nan! Ai di e habitantenan di tera i laman! Pasobra diabel a baha bin serka boso, teniendo gran rabia, pasobra e sa ku e tin poko tempu” (Rev. 12:12, NKJV).

Satanas “sa ku su tempu ta kòrtiku” (Rev. 12:12, ESV), i e eventonan deskribí den Revelashon ta sigui segun liñanan di tempu profétiko, ku ta mustra límitenan spesífiko (lesa Rev. 12:14, Rev. 13:5) na e reinado di e forsanan malbado akí.

En bèrdat, Dios ta triunfá finalmente. “I Dios lo seka tur lágrima for di nan wowo; lo no tin morto mas, ni tristesa, ni yoramentu. Lo no tin doló mas, pasobra e kosnan anterior a pasa bai” (Rev. 21:4, NKJV).

E Kaso di Job

Den e buki di Job, nos ta ser duná algun vishon fasinante den e realidat di e gran konflikto.

Lesa Job 1:1–12 i Job 2:1–7. Ki prinsipionan di e gran konflikto nos ta mira desvelá aki?

Hopi detaye signifikante por ser saká for di e versíkulonan akí. Na promé lugá, ta parse ku tin un tipo di esena di konseho selestial, no meramente un diálogo entre Dios i Satanas; otro sernan selestial ta envolví.

Na di dos lugá, tin sierto disputa ta eksistí, señalá pa e echo ku Dios ta puntra si Satanas a konsiderá Job. Konsiderá Job pa kiko? E pregunta tin sentido den konteksto di un disputa mas grandi i kontinuo.

Na di tres lugá, miéntras Dios ta deklará Jòb sin kulpa, rekto i temeroso di Dios, Satanas ta afirmá ku Jòb ta parse di ta teme Dios solamente pasobra Dios ta proteh’é. Esaki ta igual na kalumnia kontra tantu e karakter di Job komo esun di Dios (kompará ku Rev. 12:10, Zakarias 3).

Na di kuater lugá, Satanas ta alegá ku Dios su protekshon di Jòb (e kurá) ta inhustu i ta hasié imposibel pa Satanas proba su akusashonnan. Esaki ta indiká algun límite eksistente riba Satanas (reglanan di kompromiso), i ku Satanas aparentemente a purba hasi Job daño.

Dios ta reakshoná riba e akusashon di Satanas dilanti di e konsilio selestial dor di pèrmití Satanas pone su teoria na prueba, pero solamente denter di límitenan. Promé e ta duna Satanas poder riba “tur loke e tin”, pero ta prohibí daño personal na Job (Job 1:12, NKJV). Mas despues, despues ku Satanas ta pretendé ku Job ta preokupá solamente pa su mes, Dios ta pèrmití Satanas aflihí Job personalmente, pero Satanas mester spar su bida (Job 2:3–6).

Satanas ta trese numeroso kalamidat kontra e kas di Job, sinembargo, den kada kaso Job ta sigui bendishoná Su nòmber (Job 1:20–22; Job 2:9,10), falsifikando e akusashonnan di Satanas.

Nos ta siña hopi kos aki, manera ku tin reglanan di kompromiso den e konflikto kósmiko. Tin parameternan den e korte selestial denter di kua e akusashonnan lantá kontra Dios por ser resolvé, pero sin ku Dios ta violá e prinsipionan sagrado inherente na amor, e fundeshi di e gobièrnu di Dios i kon E ta goberná e universo i e sernan inteligente den dje.

E esenanan selestial akí den e buki di Job ta ofresé nos vishonnan fasinante den e realidat di e gran konflikto, i kon e ta desaroyá aki riba tera.

E Gobernante (Temporal) di e Mundu Akí

Nos a mira den lèsnan anterior ku, denter di e konflikto kósmiko, Satanas i su sekuasnan temporalmente ta ser duná hurisdikshon signifikante den e mundu akí, limitá di akuerdo ku algun tipo di reglanan di kompromiso.

E reglanan di kompromiso akí ta limitá no solamente e akshonnan di e enemigu, diabel i su sekuasnan, pero nan ta limitá tambe e akshon di Dios pa eliminá òf mitigá e maldat ku (temporalmente) ta kai denter di e hurisdikshon di e enemigu. Ya ku Señor nunka lo kibra Su promesanan, te na e grado ku El a bai di akuerdo ku e reglanan di kompromiso, permitiendo asina algun gobernashon limitá i temporal na diabel, Dios a limitá moralmente Su futuro kurso di akshon (sin disminuí Su forsa bruto).

Lesa Juan 12:31, Juan 14:30, Juan 16:11, 2 Korintionan 4:4, i Lukas 4:6. Kiko e tèkstnan akí ta siña tokante e gobièrnu di e enemigu den e mundu akí?

Tèstamènt Nobo ta presentá un choke di reinonan, e reinonan di lus i skuridat, ku e skuridat biniendo di Satanas i su rebelion. Parti di e mishon di Kristu tabata pa derotá e reino di Satanas: “Pa e propósito akí e Yu di Dios a ser manifestá, pa E por a destruí e obranan di diabel” (1 Juan 3:8, NKJV).

Sinembargo, tin “reglanan” ku ta limitá loke Dios por hasi miéntras e ta keda fiel na e prinsipionan tras di Su gobièrnu. E límitenan akí ta inkluí por lo ménos

1. e otorgamentu di boluntat liber na kriaturanan i
2. e reglanan di pakto di kompromiso, ku nos no ta na altura di dje, a lo ménos awor.

Impedimentunan i limitashonnan asina riba akshon divino tin implikashonnan signifikante pa Dios su abilidat moral pa redusí i/òf eliminá maldat inmediatamente den e mundu akí. Pues, nos ta mira maldat i sufrimentu kontinuo, ku enbèrdat por pone hopi hende kuestioná sea e eksistensia di Dios òf Su bondat. Sinembargo, unabes e fondo di e gran kontroversia ser komprondé, i e límitenan ku Dios a pone riba kon E lo trata ku maldat, nos por komprondé mihó, te na sierto grado, dikon kosnan ta manera nan ta, a lo ménos te na e triunfo final di Dios riba maldat.

Límite- i Reglanan

E konflikto kósmiko ta prinsipalmente un disputa riba e karakter di Dios, kousá pa e akusashonnan kalumnioso di diabel kontra e bondat, hustisia i gobièrnu di Dios. E ta un tipo di demanda di pakto kósmiko.

Un konflikto asina no por ser resolvé pa medio di simplemente poder sino, en kambio, e ta rekerí demostrashon.

Si akusashonnan serio ser tresé kontra un persona na poder, e mihó (i kisas úniko) manera pa derotá e akusashonnan lo tabata pa pèrmití un investigashon liber, hustu i habrí. Si e akusashonnan ta menasá henter e gobièrnu (di amor), nan no por ser simplemente ignorá.

Kiko tur esaki ta nifiká pa komprondé e konflikto kósmiko i relashoná ku e problema di maldat? Si Dios hasi un promesa, lo E yega di kibra esaki? Naturalmente nò. Te asina leu ku Dios ta bai di akuerdo ku reglanan di kompromiso, Su futuro akshon lo tabata (moralmente) limitá. Komo tal, algun maldat por kai denter di e dominio temporal di e reino di skuridat.

Lesa Marko 6:5 i Marko 9:29. Kiko e tèkstnan akí ta desplegá tokante kon asta akshon divino lo por ta integralmente relashoná ku faktornan manera fe i orashon?

Den tur e dos relatonan akí, ta parse di ta eksistí algun límite òf regla di kompromiso, relashoná dinámikamente ku kosnan manera fe i orashon. Otro kaminda nos ta mira abundante evidensia ku orashon ta hasi un diferensia den e mundu akí, habriendo kamindanan pa akshon divino ku, di otro manera, kisas no ta (moralmente) disponibel. Sinembargo, nos no mester kometé e eror di pensa ku fe i orashon ta e úniko faktornan. Probablemente tin hopi otro faktor di kua kisas nos no ta konsiente.

Esaki ta kuadra ku loke nos a mira anteriormente tokante reglanan di kompromiso. Te asina leu ku Dios ta hasi algun kompromiso òf ta bai di akuerdo ku algun regla di kompromiso. Manera nos a bisa, tin sierto reglanan di kompromiso den e gran konflikto ku ta limitá loke Dios por hasi moralmente, a lo ménos pa awor.

Lesa Ellen G. White, “The Power of Satan,” p. 341–347, den Testimonies for the Church, tomo 1.

“Hende kaí ta katibu legal di Satanas. E mishon di Kristu tabata pa reskat'é for di e poder di su gran atversario. Hende ta inkliná, di forma natural, pa sigui e sugerensianan di Satanas, i e no por resistí ku éksito un enemigu asina teribel a ménos ku Kristu, e Konkistadó poderoso, ta biba den dje, guiando su deseonan, i ta dun’é forsa. Dios so por limitá e poder di Satanas. E ta bai bin riba tera, i ta kana pariba pabou den dje. E no ta for di su vigilansia ni un solo momentu, pa motibu di miedu di pèrdè un oportunidat pa destruí almanan. Ta importante pa e pueblo di Dios komprondé esaki, pa nan por skapa di su trampanan. Satanas ta preparando su engañonan, pa den su último kampaña kontra e pueblo di Dios nan no por komprondé ku ta e. 2 Korintionan 11:14: ‘I no ta nada straño; pasobra Satanas mes ta ser transformá den un angel di lus.’ Miéntras ku algun alma engañá ta sostené ku e no ta eksistí, e ta kohe nan prezu, i ta trahando pa medio di nan te na un gran grado. Satanas konosé mihó ku e pueblo di Dios e poder ku nan por tin riba dje ora nan forsa ta den Kristu. Ora nan ta supliká e Konkistadó poderoso humildemente pa yudansa, e kreyente di mas suak den e bèrdat, dependiendo firmemente riba Kristu, por rechasá Satanas i henter su ehérsito ku éksito. E ta demasiado astuto pa bin abiertamente, ku kurashi, ku su tentashonnan; pasobra e ora ei e energianan somnoliente di e kristian lo a lanta, i e lo a dependé riba e Libertador fuerte i poderoso. Pero e ta drenta sin ser persibí, i ta obra disfrasá atraves di e yunan di desobedensia ku ta profesá deboshon.”—Ellen G. White, Testimonies for the Church, tomo 1, p. 341.

Preguntanan pa Diskushon: