Kiko Mas Mi Por A Hasi?

Lesa pa e Estudio di e Siman Akí:

Versíkulo di Memoria:

“P’esei Pilato a bis’E: ‘Bo ta un rei antó?’ Hesus a kontestá: ‘Bo a bisa korektamente ku Mi ta un rei. Pa e motibu akí Mi a nase, i pa e moitbu akí Mi a bin den mundu, pa Mi por duna testimonio di e bèrdat. Tur hende ku ta di e bèrdat ta tende Mi bos’ ” (Juan 18:37, NKJV).

Algun aña pasá, un storia di mucha perspikas a keda imprimí den e revista Guide. E storia ta enfoká riba un mucha hòmber ku yama Denis, un huérfano ku tabata biba komo un yu di kriansa ku un famia den tempu medieval. Denis ta odia e rei di su tera pashonadamente pasobra, ora su mayornan tabata malu, e sòldánan di e rei a bai kuné, i nunka mas el a mira nan. Ta despues numa el a haña sa ku e rei a separá nan pa asina spar e bibunan di tur e horornan di e Plaga Pretu. E bèrdat tokante e rei ta libra Denis di e odio ku el a tesorá kasi henter su bida. E rei semper, i den tur kaso, a aktua pa amor pa su pueblo.

Hopi hende ta mira Dios awe un poko manera Denis a mira e rei. E maldat ku nan a presensiá òf eksperensiá ta hiba nan na odia òf deskartá Dios. Unda Dios ta ora tin sufrimentu? Si Dios ta bon, dikon tin asina tantu maldat? E konflikto kósmiko ta tira lus riba e asuntu krusial akí, pero ta keda hopi pregunta. Sinembargo, ora tur nos intentonan pa kontesta no ta satisfasé, nos por wak Hesus riba krus i mira den djE ku Dios por ser konfiá, asta ku tur e preguntanan ku ta keda sin kontesta pa awor.

Kristu e Vensedor

Ounke tin un enemigu na trabou ku Kristu Mes ta referí na dje komo e “gobernante (usurpadó) di e mundu akí,” e berdadero rei di universo ta Hesu-Kristu. Hesus ta gana e viktoria pa nos, i den djE nos por tin viktoria, asta meimei di difikultat i sufrimentu. En bèrdat, e obra di Kristu ta kontrarestá e enemigu na kada okashon.

Nos a mira ku Skritura ta deskribí diabel komo:

1. E gañadó di henter mundu for di prinsipio (Rev. 12:9, Mat. 4:3, Juan 8:44, 2 Kor. 11:3, 1 Juan 3:8);
2. E kalumniadó i akusadó di Dios i Su pueblo den shelu (Rev. 12:10; Rev. 13:6; Job 1, 2; Zak. 3:1, 2; Judas 9); i
3. E gobernante usurpadó di e mundu akí (Juan 12:31, Juan 14:30, Juan 16:11, Echonan 26:18, 2 Kor. 4:4, Efe. 2:2, 1 Juan 5:19).

Lesa Juan 18:37. Kiko esaki ta bisa nos tokante e obra di Kristu pa kontrarestá e engañonan di e enemigu? Kiko ta nifiká ku Hesus ta Rei?

Aunke Skritura ta siña ku Satanas ta e arkigañadó, kalumniadó, akusadó i gobernante usurpadó di e mundu akí, e ta siña tambe ku Hesus ta e vensedó riba Satanas den tur manera:

1. Hesus a bin “na mundu, pa duna testimonio di e bèrdat” (Juan 18:37, NASB);
2. Pa medio di e krus, Hesus a demostrá, di forma supremo, e hustisia i amor perfekto di Dios (Rom. 3:25,26; Rom. 5:8), refutando asina e akusashonnan kalumnioso di diabel (Rev. 12:10, 11); i
3. Hesus lo destruí finalmente e reino di diabel, ku “sa ku su tempu ta kòrtiku” (Rev. 12:12, ESV; kompará ku Rom. 16:20), i Kristu “lo reina pa semper i semper” (Rev. 11:15, NLT).

Na final, no ta importá kiko Satanas hasi, e ta un enemigu derotá kaba, i e klave pa nos ta pa reklamá e viktoria di Kristu pa nos mes tur dia, momentu pa momentu, i tambe pa reklamá e promesanan ku e Krus a ofresé nos.

Den e gran konflikto, nos sa kua banda ta gana. Kon nos eskohonan diario ta impaktá na kua banda nos ta kaba finalmente? Kon nos por sigurá ku nos ta na e banda ganadó asta awor akí?

E Hustu i e Hustifikadó

Na tur okashon, e obra di Kristu ta deshasí e obra di diabel. I, di akuerdo ku 1 Juan 3:8, Hesus “a ser revelá pa e propósito akí, pa destruí e obranan di diabel” (1 Juan 3:8, NRSV) i pa “destruí esun ku tin e poder di morto, esta, diabel” (Hebr. 2:14, NRSV). Sinembargo, e derota total di e gobernashon di e enemigu ta tuma lugá den dos fase. Di promé, pa medio di e obra di e Krus, Kristu ta desmenti e akusashonnan di kalumnia di Satanas. I, despues, Satanas i su reino lo ser destruí.

Lesa Romanonan 3:23–26 i Romanonan 5:8. Kiko e pasashinan akí ta revelá tokante e manera ku Kristu ta derotá e akusashonnan di diabel?

Manera nos a mira, e enemigu ta pretendé ku Dios no ta kompletamente hustu i amoroso. Sinembargo, den Kristu, Dios ta proveé e manifestashon final di e hustisia i amor di Dios, i El a hasi esaki pa medio di e Krus. Despues di morto di Hesus, “Satanas a mira ku su disfras a ser ranká kitá. Su atministrashon a ser habrí dilanti di e angelnan ku no a kai i dilanti di e universo selestial. El a revelá su mes komo un asesino. Dor di drama e sanger di e Yu di Dios, el a saka su mes for di e simpatia di e sernan selestial.”—Ellen G. White, The Desire of Ages, p. 761.

Lesa Revelashon 12:10–12 den lus di Génesis 3:15. Kon e pasashi akí ta tira lus riba e nifikashon kósmiko di e viktoria di Kristu na krus?

E historia di redenshon ta proveé evidensia abundante pa nos por tin konfiansa ku Dios semper ta traha pa logra na final loke ta bon pa tur esnan konserní. E Dios di Skritura semper ta hasi loke ta bon i preferibel, mirando e avenidanan disponibel p’E den e gran konflikto (Deut. 32:4, 1 Sam. 3:18, Salmo 145:17, Dan. 4:37, Hab. 1:13, Rev. 15:3, Gen. 18:25).

E Kantika di Mi Stimá

Den formanan asombroso, Dios a manifestá Su amor i hustisia meimei di e konflikto kósmiko. Tòg, algun hende por puntra, Dios mester a hasi mas ku El a hasi pa prevení i/òf kita maldat? Nos a mira un kuadro di konflikto kósmiko ku ta indiká ku Dios a aktua pa asina respetá e boluntat liber ku ta nesesario pa e floresementu máksimo di relashonnan di amor entre E i humanidat. Ademas, aparentemente El a aktua denter di limitashonnan moral, òf reglanan di kompromiso, denter di e konteksto di un disputa kósmiko riba Su karakter, ku por ser resolvé solamente dor di e demostrashon di Su amor.

Lesa Isaias 5:1–4. Ken ta papiando den e versíkulonan akí? Di ken Isaías ta papiando? Ken e kunuku di wendrùif i doño di kunuku di wendrùif ta representá? Kiko ta e nifikashon di e akshonnan di e doño di e kunuku di wendrùif na nòmber di e kunuku di wendrùif? Kiko ta e resultado?

Den e versíkulonan akí, Isaías ta kanta un kantika di su stimá, un kunuku di wendrùif. E doño di e kunuku di wendrùif ta Dios Mes, i e kunuku di wendrùif ta representá e pueblo di Dios (lesa, por ehèmpel, Isa. 1:8, Jer. 2:21). Pero e implikashonnan akinan tambe por ser ekspandé relashoná ku e obra mas amplio di Dios den e mundu akí. Di akuerdo ku e versíkulonan akí, e doño di kunuku di wendrùif (Dios) a hasi tur loke rasonablemente por a ser sperá pa garantisá e floresementu di Su kunuku di wendrùif. E kunuku di wendrùif mester a produsí bon wendrùif, pero el a produsí solamente “wendrùif shimarón”, loke otro tradukshonnan ta referí na dje komo “sin balor”. En bèrdat, e formulashon hebreo aki literalmente por a ser tradusí fruta stinki. E kunuku di wendrùif di Dios ta produsí wendrùif putrí.

Isaias 5:3 ta kambia pa Dios Mes papiando, invitando hende pa “husga” entre E i Su kunuku di wendrùif. I, den Isaias 5:4, Dios Mes ta plantia e pregunta mas importante: “Kiko mas por a ser hasí na Mi kunuku di wendrùif ku Mi no a hasi den dje? Dikon antó, ora Mi a spera ku e lo a duna bon wendrùif, el a produsí wendrùif shimarón?” (NKJV). Kiko mas E por a hasi? Ki fasinante ku E ta asta pidi otronan pa husga loke El a hasi.

Kristu su parabel di e kunuku di wendrùif

Den e parabel di e doño di kunuku di wendrùif, den Mateo 21, Hesus ta kuminsá kaminda Isaías 5 a stòp, tirando lus adishonal riba e karakter i akshonnan di e doño di kunuku di wendrùif na fabor di Su kunuku di wendrùif.

Lesa Mateo 21:33–39 ku partikularmente e pregunta di Isaias 5:4 den mente. Kiko mas E por a hasi ku loke El a hasi?

E promé parti di e parabel di Kristu ta sita direktamente for di e kantika di Isaias 5 tokante e doño di e kunuku di wendrùif i Su kunuku di wendrùif. Despues, Hesus ta agregá, e doño di kunuku di wendrùif “a hür” Su kunuku di wendrùif “na kunukeronan i a bai un pais leu” (Mat. 21:33, NKJV). Sinembargo, ora e doño di kunuku di wendrùif a manda Su sirbidónan (e profetanan) dos biaha pa rekohé e produktonan, esnan ku tabata hür Su kunuku di wendrùif a bati i mata Su sirbidónan (Mat. 21:34–36). Finalmente, El a manda Su Yu (Hesus), bisando: “Nan lo respetá mi yu” (Mat. 21:37, NKJV). Pero nan a asesiná Su Yu tambe, bisando: “ ‘Esaki ta e heredero. Bin, laga nos mat’é i tuma su herensia.’ Asina nan a kohe i a bent’é pafó di e kunuku di wendrùif i a mat’é” (Mat. 21:38, 39, NKJV).

Kiko mas E por a hasi? E Tata a stima nos asina tantu ku El a duna Su Yu stimá (Juan 3:16). Si e konflikto kósmiko ta di e tipo sugerí aki, e no por a ser resolvé prematuramente pa medio di ehersisio di poder divino sino a rekerí promé un demostrashon públiko di e karakter di Dios. E demostrashon akí a ser presentá finalmente den e obra di Kristu (Rom. 3:25, 26; Rom. 5:8). Kiko mas nos por a pidi ku Dios (den Kristu) ta duna Su mes pa muri pa nos pa asina E por hustifiká nos sin, di ningun manera, komprometé Su hustisia i amor perfekto?

E evento di krus ta demostrá ku Dios a hasi tur loke por a ser hasí pa mitigá i eliminá maldat, pero sin destruí e konteksto pa e floresementu di amor genuino. Si tabatin kualke kaminda preferibel disponibel pa Dios, lo E no a skohe esaki? Miéntras ku hende ta sufri grandemente den e konflikto kósmiko akí, Dios Mes ta sufri mas ku tur. Ora nos wak e Krus, nos por, enbèrdat, mira kiko sufrimentu i doló piká a trese pa Dios mes. Sinembargo, asina sagrado e libertat inherente na amor tabata, ku Kristu tabata dispuesto pa soportá esaki na nos fabor.

Vindikashon di e Nòmber di Dios

Finalmente, e nòmber di Dios ta ser vindiká den tur forma. Pa medio di e obra di e Tata, Yu, i Spiritu Santu den e plan di redenshon, e hustisia i amor perfekto di Dios ta ser manifestá mas ayá di kualke duda rasonabel (lesa Rom. 3:25,26; Rom. 5:8).

Lesa Romanonan 3:1–4 den lus di Isaias 5:3,4. Kiko esaki ta siña tokante ku Dios Mes ta ser vindiká den e konflikto kósmiko? Kiko mas E por a hasi ku loke El a hasi?

Den Romanonan 3 i Isaias 5, nos ta mira ku Dios (den sierto sentido limitá) ta invitá simpel kriaturanan pa husga Su karakter, ounke nos no tin derecho òf posishon pa hasi esei. Na final, ora tur e “bukinan” ser habrí, nos lo mira e evidensia ku Dios ta perfektamente hustu i rekto. Dios lo vindiká Su mes dilanti di tur kreashon inteligente.

Lesa Revelashon 15:3 i Revelashon 19:1–6. Kiko e pasashinan akí ta siña tokante e vindikashon di e nòmber di Dios na final? Kiko mas E por a hasi ku loke El a hasi?

Den henter Skritura, Dios ta mustra preokupashon pa Su nòmber. Dikon? Bo no por tin un relashon amoroso profundo ku un hende kende su karakter bo ta odia òf no ta konfia. Si un hende a bisa bo kasá òf futuro kasá mentiranan horibel tokante bo karakter, lo bo a hasi loke bo tabata por pa kontrarestá kualke afirmashon asina, pasobra si kere deklarashonnan asina, nan lo a kibra bo relashon amoroso.

Na final, Dios ta ser vindiká na krus i pa medio di henter e plan di redenshon. Den e huisio pre-Atvènt, Dios ta ser vindiká dilanti di e universo ku ta wak.

Despues, den e huisio despues di Atvènt, durante kua e redimínan lo asta “husga angelnan” (1 Kor. 6:2,3), Dios ta ser vindiká, ya ku e redimínan a haña e oportunidat pa revisá e registronan i wak pa nan mes dikon Dios a aktua manera El a aktua, i ku tur e huisionan di Dios tabata semper i solamente perfektamente hustu i amoroso. Ken entre nos no tin hopi pregunta ku mester di kontesta? Promé ku tur kos ta kla, nos lo haña kontesta riba e preguntanan ei (lesa 1 Kor. 4:5).

Finalmente, tur rudia lo bùig i tur lenga lo konfesá ku Hesus ta Señor (Fil. 2:10,11). Tur esaki ta parti di e vindikashon di e karakter di Dios.

Lesa Ellen G. White, “The Reward of Earnest Effort,” p. 285–288, den Testimonies for the Church, tomo 9.

“Tur loke a konfundí nos den e providensianan di Dios lo ser hasí kla den e mundu benidero. E kosnan difísil pa komprondé lo haña splikashon e ora ei. E misterionan di grasia lo desplegá nos dilanti. Kaminda nos mente finito a deskubrí solamente konfushon i promesanan kibrá, nos lo mira e harmonia di mas perfekto i bunita. Nos lo sa ku amor infinito a ordená e eksperensianan ku tabata parse di mas difísil. Segun ku nos ta realisá e kuido tierno di Esun ku ta pone tur kos obra huntu pa nos bon, nos lo regosihá ku goso ineksplikabel i yen di gloria.”—Ellen G. White, Testimonies for the Church, tomo 9, p. 286.

Preguntanan pa Diskushon: