E Nashonnan: Parti 2

Lesa pa e Estudio di e Siman Akí:

Versíkulo di Memoria:

“Sea ketu, i sa ku Ami ta Dios; lo Mi ser halsá meimei di e nashonnan, i lo Mi ser halsá riba tera!” (Salmo 46:10, NKJV).

Atraves di siglonan, algun hende a argumentá ku Dios tabata ke e Kaida, ku tabata Su intenshon pa hende baha den piká i morto i asina hib’É, den persona di Hesus, na e krus. Despues di tur kos, kon otro E por a desplegá asina poderosamente i gráfikamente e profundidat di Su amor pa humanidat ku dor di muri riba e krus pa nan? Brevemente bisá, e pensamentu ta, Dios tabatin mester pa humanidat kai.

Esei ta un posishon horibel i mizerabel pa tuma. Nunka tabata Dios su intenshon pa ni Satanas òf humanidat kai. E rebelion di Satanas, i despues di humanidat, tabata un tragedia di konsekuensia inmenso, i nos goso den djE lo a permanesé kompleto si nos promé mayornan lo no a kai.

E siman akí, nos lo sigui wak e problemanan kousá pa e Kaida i e deseo pa gobièrnu humano kontrali na gobernashon di Dios. E bèrdatnan akí ta ser revelá poderosamente den e buki di Daniel, ku ta mustra ku Dios tabatin rason ora El a spièrta Su pueblo tokante kiko lo a pasa ora nan a bira bai for di djE i a skohe monarkanan terenal en kambio. Esaki ta eksaktamente loke nan a haña: monarkanan terenal i pekadornan ku ta dominá riba pekadornan, nunka un bon kombinashon.

E Promé Mandamentu

E Hòfi di Eden tabata un klas pa e promé pueblo di Dios, un lugá kaminda nan interakshon ku e kreashon lo a, sin fin, siña nan i nan desendientenan mas tokante e Kreador. “E pareha santu no tabata solamente yunan bou di e kuido paternal di Dios,” Ellen G. White a señalá, “sino studiantenan ku tabata risibí instrukshon for di e omnisapiente.... E misterionan di e universo visibel, ‘e obranan maravioso di djE ku ta perfekto den konosementu’ (Job 37:16), a pèrmití nan un fuente inagotabel di instrukshon i delisia.”— Patriarchs and Prophets, p. 50,51.

Lesa Génesis 2:9–17. Kua tabata e promé mandamentu, un prohibishon, ku Dios a duna humanidat, i dikon e tabata asina importante?

E promé uso di e verbo rais tswh, “manda,” ku Dios a duna hende tabata den Génesis 2:16 i 17, e mandato pa no kome di e palu di konosementu di bon i malu. Kon algun konosementu por ser prohibí? No ta útil semper pa eksperensiá i pa sa mas?

No di akuerdo ku Skritura: Dios tabatin intenshon di eduká Su pueblo profundamente miéntras E tabata spar nan di e sufrimentu a largo plaso ku algun konosementu lo a kousa, manera loke lo a pasa mas despues ora hende a skohe pa goberná nan mes mas bien ku ser goberná pa Señor Mes.

Milenionan despues, ora Israel a pidi pa un rei, Señor a eksponé e konsekuensianan (manera nos a deskubrí siman pasá), i El a informá Su pueblo ku e desishon pa kita for di Su gobernashon direkto lo a dura te na fin di tempu.

Segun ku e reinan di Israel a bira progresivamente mas malbado, e pueblo di pakto di Dios a bira asina mundano i asina alehá for di nan propósito ku El a duna nan ainda mas di loke nan tabata ke: gobièrnu humano. Aserká e buki di Daniel ku e trasfondo akí den mente por ta aklaratorio. No solamente e marcha di imperionan, deskribí den e vishonnan di e buki, ta un akusashon di “e nashonnan”, e paganonan, e ta tambe un akusashon di e frakasonan di Israel, nan rechaso pa sigui Su mitswot (mandamentunan). Siglonan di sumishon, en bes di e libertat ku a ser duná pa promé biaha den Eden, lo a bira un klas nobo den kua kurasonnan dispuesto por a presensiá e kontraste impreshonante entre e reinonan di e mundu akí i e reino di Dios.

Pensa riba e tiponan di konosementu, asta awor, ku lo tabata mihó pa hopi di nos no sa. Kon esaki ta yuda nos komprondé kiko tabata prohibí den Eden?

Daniel 2

Tabata durante e koutiverio babilóniko, pa medio di profeta Daniel, ku Dios a presentá e deskripshonnan di mas konvinsente ku nos tin di e relashon entre Su pueblo i e reinonan di e mundu akí. Su pueblo no tabata outónomo mas; awor nan lo tabata kosechando e konsekuensianan di nan eskohonan. (I, kisas, siña di nan?)

Lesa Daniel 2:31–35, ku ta duna un bista panorámiko amplio di historia di mundu te na fin di tempu. Ki bèrdatnan importante nos por siña for di e profesia asombroso akí?

Na fin di siglo diesnuebe, hopi hende tabata mustra un konfiansa nobo den progreso humano. E Eksposishon di Paris (1900), por ehèmpel, tabata un ekshibishon remarkabel di optimismo tokante futuro. Sigur, ku tur nos avansonan teknológiko i sientífiko, hopi di e pió problemanan di humanidat lo a kaba! Segun ku humanidat a drenta siglo binti, entre hopi pensadó tabatin e gran optimismo akí ku idealnan di Ilustrashon, manera perfektibilidat humano i e poder di rason, lo a introdusí un era nobo maravioso pa humanidat.

Promé Guera Mundial, sinembargo, a kibra e soñonan ei rápidamente, i pa fin di siglo binti, nos a pèrdè mas ku 200 mion hende pa motibu di guera. Nos por a avansá den sentido teknológiko, pero siguramente no den sentido moral. Pa parafraseá Martin Luther King Jr., nos tin misilnan guiá pero hòmbernan mal dirigí. I esei ta un kombinashon masha spantoso.

Hopi studiante di profesia a nota ku e metalnan den Daniel 2 ta move di mas balioso pa ménos balioso: oro ta devaluá na plata, plata ta devaluá na bròns, i bròns na heru, te ora nos terminá ku solamente heru i klei.

Charles Darwin, Karl Marx, i otro pensadónan di siglo diesnuebe a purba di konvensé nos ku humanidat, di algun manera, ta subi, ku nos ta evolushonando biológikamente i sosialmente. I aunke, di algun manera, eksistensia humano a mehorá (por lo ménos na un nivel físiko), ken realmente ta wak padilanti na e futuro di e mundu akí, manera e ta ser goberná i manehá awor, ku hopi optimismo tokante pas, siguridat, i prosperidat?

Daniel 7

E soño di Daniel 2 a ser presentá pa promé biaha na un rei babilóniko. E vishon di Daniel 7, en kambio, a ser presentá na un profeta hebreo, un miembro di e pueblo di pakto di Dios.

Daniel ta ser mustrá e mesun tema ku Nabukodonosor pero for di un perspektiva diferente. En bes di un estatua, e ta mira un seri di nashon ta surgi for di laman, e resultado di bientu ku ta sakudí e awa. E nashonnan akí tabata den un estado kontinuo di pleitu, kousando un kambio perpetuo den poder entre nan. Pasashinan manera Salmo 65:5–8; Isaías 17:12 i 13; i Jeremías 46:7 i 8 ta usa e analogia di diluvio- i olanan pa deskribí e tumulto entre e nashonnan.

Al kontrario, e Tera Primintí a eksistí, por lo ménos pa un periodo di tempu, komo un isla di pas i siguridat meimei di un laman di reinonan pagano, un nashon sagrado establesé riba e fundeshi sólido di e gobièrnu di Dios, kontrali na e nashonnan rebelde rònt di dje.

Lesa Daniel 7:1–3. Tin hopi moveshon den e esena akí. Ki lèsnan nos por saka for di e imágennan akí, manera e bestia ku a sali promé for di laman?

Daniel ta wak e káos di gueranan pagano for di kantu di kosta, ora diripiente e bestianan ta kuminsá aparesé riba tera, den su teritorio! Problemanan pagano awor a bira problemanan di su pueblo. Nan a skohe pa biba manera paganonan, pues awor nan lo a biba ku (i bou di) paganonan. Kuminsando ku dominio babilóniko, e pueblo di pakto di Dios nunka mas a gosa di outonomia kompleto òf duradero.

E pèrdida akí di outonomia pa e pueblo di Dios awe lo persistí te na fin di tempu, ora ku Kristu finalmente ta ser restourá na Su lugá legítimo komo nos Rei. Den Tèstamènt Nobo, e pueblo di Dios a sigui sufri bou di dominio di e Imperio Romano i despues bou di e persekushonnan di e kachu chikitu, e susesor di Roma pagano.

Aunke, histórikamente, algun nashon tabata mihó ku otro, i algun era tabata mas pasífiko ku otro, e gran mayoria di e historia di nashonnan, pueblonan, i imperionan tabata bai simplemente di un tragedia pa otro, di un opresor pa otro. I hopi biaha tur esaki ta ser hasí bou di gobernantenan ku ta reklamá solamente e mihó intenshonnan pa nan mes hendenan. Ki un kontraste ku e gobernashon ku Dios tabata ke pa Su pueblo, si solamente nan lo a skohe esaki.

Entre Tera i Laman

E imágennan di tera i laman den Beibel, spesialmente pa profesia, por ta masha instruktivo. Konsiderá e kaso di e símbolonan di tera i laman den profesia bíbliko, ku tin un kontraste skèrpi.

“Simbólikamente, ora tera i laman ser poné banda di otro, tera hopi bes ta representá e mundu ordená, òf asta e tera di Israel, miéntras ku laman ta referí na e nashonnan pagano ku ta menas’é meskos ku laman ta menasá tera.”—Beatrice S. Neall, “Sealed Saints and the Tribulation,” [Santunan Seyá i e Tribulashon] den Symposium on Revelation, buki 1, ed. Frank B. Holbrook (Silver Spring, MD: Instituto di Investigashon Bíbliko, Asosiashon General di Adventistanan di e di Shete Dia, 1992), p. 260.

Segun e pensamentu akí, tera ta un lugá di stabilidat, establesé riba e gobernashon di Dios; laman ta representá e inkietut instabil di nashonnan, establesé riba orguyo humano.

Ku e idea ekspresá aki riba komo fondo, lesa Revelashon 12:15,16 i Revelashon 13:1,11. Tuma nota di e diferensia entre awa i tera. Kon nan ta ser usá, i kiko nan por siña nos tokante kon komprondé profesia?

Tuma nota ku e dragon ta usa awa pa persiguí e muhé (e iglesia). Manera nos a mira, den profesia awa hopi biaha ta simbolisá gobièrnunan mundano i e inkietut i káos ku hopi biaha ta kompañá nan. P’esei, nos por mira kon Satanas por a usa e masanan, impulsá pa nan lidernan, pa persiguí e pueblo di Dios durante gran parti di historia di iglesia.

Tambe, Atventistanan di e di Shete Dia a komprondé ku Revelashon 12:16 ta referí na e migrashon di kreyentenan persiguí pa e Mundu Nobo. Si nos komprondementu di tera i laman ta korekto, kiko esaki ta bisa tokante e fundashon di e repúblika merikano?

Nos por konsider'é di ta “e tera” di e mesun manera ku e “Tera Primintí” tabata, un lugá apartá pa e pueblo di Dios? Esaki por ta e motibu pakiko e bestia di tera ta parse manera un lamchi promé? Aunke Merka nunka tabata e “Israel Nobo” manera algun di su promé fundadornan tabata ke mir’é, pa hopi tempu e tabata un tera di libertat religioso pa miónes di hende na mundu ku tabata religiosamente oprimí.

Desafortunadamente, e bestia manera lamchi akí un dia lo papia “manera un dragon” (Rev. 13:11, NKJV). Estádos Unídos, ku pa hopi tempu tabata un faro di libertat religioso pa esnan persiguí, lo bira e persiguidó religioso dominante! Esaki ta un otro ehèmpel di loke a sosodé ora humanidat a skohe pa goberná su mes en bes di ser goberná pa Dios.

Profesia Atrobe

E iglesia remanente a nase den e Mundu Nobo, hustamente kaminda esnan ku tabata buska libertat religioso a hui durante siglonan diesshete i diesocho. Mirando e opstákulonan religioso i polítiko di hopi tempu ku tabata eksistí otro kaminda, ta di duda ku e lansamentu di e movemento akí lo tabata mes rápido òf poderoso na algun otro lugá ku e tabata den e tera nobo ku a bira Estádos Unídos.

Lesa Revelashon 10:1–11, ku ta deskribí e nasementu di e movemento. Buska algun di e elementonan ku nos a studia, manera “e nashonnan,” tera, i laman. Aplikando prekoushon apropiá pa asina bo no lesa muchu hopi den e pasashi, ki posibel persepshonnan bo por haña den e relato akí?

E angel ta grita ku un bos duru, meskos ku e tres angelnan di Revelashon 14 i e angel di Revelashon 18 ta hasi. Esaki ta un momentu urgente den historia ora e trabou di e iglesia remanente ta ser establesé na benefisio di “hopi pueblo, nashon, lenga i reinan” (Rev. 10:11, NKJV).

E angel tin un “buki chikitu” tené, probablemente e buki di Daniel (lesa Dan. 12:4), ku ta habrí pa promé biaha den hopi generashon. E tin un pia riba laman i un otro riba tera. Esaki lo por ta un referensia na e idea ku e mensahe ta kubri e globo, tantu e Mundu Bieu komo e Nobo. E lo por ta tambe un referensia na e idea ku e mensahe akí ta pa tur nashon: esnan ku ta biba riba tera i esnan ku ta biba den e laman “pagano”.

E mundu, porfin, lo ser iluminá ku e gloria di Dios, i e mensahenan final di Revelashon 14 ta ser hibá na tur hende. Manera ku Israel, nos mandato komo iglesia ta pa prediká e evangelio “den henter mundu komo un testimonio na tur e nashonnan, i e ora ei e fin lo yega” (Mat. 24:14, NKJV).

Dios ta pushando historia humano den direkshon di su gran konklushon: e fin di imperionan humano i e entronisashon permanente di Kristu. Lesa Daniel 2:34,35,44,45. Beibel ta hasié perfektamente kla, sin ningun ambigwedat, ku tur e reinonan mundano akí lo ser eradiká, sin laga niun rastro di nan i nan herensia mahos, i lo ser remplasá pa e reino eterno di Dios, kaminda piká, sufrimentu, malesa, maldat, i morto lo no surgi nunka mas.

Lesa Ellen G. White, “The Tower of Babel,” p. 117–124, den Patriarchs and Prophets.

“ ‘Mi a mira un shelu nobo i un tera nobo: pasobra e promé shelu i e promé tera a pasa bai.’ Revelashon 21:1. E kandela ku ta kima e malbadonan ta purifiká e tera. Tur rastro di e maldishon ta ser barí bai. Ningun fièrnu ku ta kima eternamente lo kòrda esnan reskatá riba e konsekuensianan teribel di piká.

“Un rekuerdo so ta keda: nos Redentor semper lo karga e markanan di Su krusifikashon. Riba Su kabes heridá, riba Su kustia, Su mannan i pianan, tin e úniko rastronan di e obra kruel ku piká a hasi. E profeta ta bisa, mirando Kristu den Su gloria: ‘E tabatin rayonan briante saliendo for di Su kustia: i einan Su poder tabata skonde.’ Habakuk 3:4, márgen. E kustia perforá ei for di unda tabata kore e koriente kòrá ku a rekonsiliá hende ku Dios, tin e gloria di e Salbador, einan ‘Su poder ta skondí.’ ‘Poderoso pa salba,’ atraves di e sakrifisio di redenshon, E tabata pues fuerte pa ehekutá hustisia riba esnan ku a despresiá e mizerikòrdia di Dios. I e muestranan di Su humiliashon ta Su honor di mas haltu; atraves di e siglonan eterno e heridanan di Kalvario lo mustra Su alabansa i deklará Su poder.”—Ellen G. White, The Great Controversy, p. 674.

Preguntanan pa Diskushon: