Fundeshinan pa Profesia

Lesa pa e Estudio di e Siman Akí:

Versíkulo di Memoria:

“Tambe mi a tende e bos di Señor, bisando: ‘Ken lo Mi manda, i ken lo bai pa Nos?’ E ora ei mi a bisa: ‘Atami aki! Mandami’ ” (Isaias 6:8, NKJV).

Dios Su derecho di goberná universo ta fundá riba Su posishon komo e Kreador di tur kos (Rev. 4:1) i tambe riba Su karakter. Ta ora nos deskubrí e karakter hustu di Dios nos ta kuminsá komprondé kon i dikon sernan humano pekaminoso ta falta e gloria di Dios (Rom. 3:23).

E siman akí nos ta bai mas leu den e vishon di e sala di trono i konsiderá kon e rasa humano ta relashoná ku un Dios santu i kon e sakrifisio di Kristu ta restourá nos i ta trese nos serka di e trono. Dios ta plania pa restourá nos, no solamente komo individuonan sino tambe komo un rasa, pa nos revelá un biaha mas Su gloria na restu di e kreashon. Dor di listra e restu di Beibel, nos por haña klavenan importante ku ta yuda nos komprondé i kuminsá apresiá e yamada haltu ku Dios a ekstendé na nos, un rasa di pekadornan pordoná i redimí.

Rebelion humano, finalmente i pa semper, lo ser terminá. I, mas ku esei, Dios Su karakter amoroso, Su karakter apnegá, lo bria ainda mas briante ku e tabata den Su diseño original pa humanidat. Aunke Dios nunka tabatin intenshon pa humanidat kai, pa medio di e Krus, e karakter amoroso di Dios a ser ekshibí na un manera remarkabel.

Atami Aki, Mandami

Añanan pasá, un iglesia a disidí di renobá un bodega antikuá pa krea un sala di kompañerismo nobo. Un di e promé kosnan ku nan a hasi tabata instalá lusnan nobo, keriendo ku nan lo a hasi e espasio parse mas bunita. Unabes ku nan a ser instalá, sinembargo, e espasio tabata parse pió ainda, pasobra lusnan briante tin un manera di revelá defektonan.

E vishon impreshonante di Isaias di e trono di Dios a lag’é dolorosamente konsiente di su fayonan. “Ai di mi,” el a lamentá, “pasobra mi ta ruiná! Pasobra mi ta un hòmber di lepnan impuru, i mi ta biba meimei di un pueblo di lepnan impuru, pasobra mi wowonan a mira e Rei, e SEÑOR di ehérsitonan” (Isa. 6:5, NKJV). Nos lo a sinti meskos si diripiente nos lo a ser kompañá pa bai den e presensia di Señor. E lus ta sufisiente briante pa kita tur nos diskulpanan. Den presensia di Dios, nos ta sinti ku nos ta pèrdí. Isaías a hiba e sorpresa di su bida.

Lesa Isaias 6:6–8. Isaías tabata sa ku piká ta nifiká ku nos ta “ruiná.” E pago di piká ta morto. Pero en bes di laga nos na e konsekuensianan di piká, un Dios di amor ta hala nos mas serka. Kiko tabata e resultado di e reunion akí, i dikon e ta importante?

Isaías a ser purifiká di su piká ora un serafin a kohe un karbon for di e altar i a mishi ku su boka kuné. Esaki tabata probablemente e altar di sensia, kaminda interseshon tabata ser hasí dor di i pa e pueblo di Dios (lesa Rev. 8:3,4). Su pikánan a ser pordoná, i awor e tabata ser konsiderá apto pa para den presensia di Dios, pero, mas ku esei, el a ser enkargá tambe pa representá Dios na mundu.

Interesantemente, e palabra “serafin” ta nifiká “esun ku ta kima.” Nota e deskripshon di Hesus di e ministerio di Juan Boutista den Juan 5:35: “E tabata e lampi sendí i briante, i boso tabata dispuesto pa un tempu pa alegrá den su lus” (NKJV). Aunke, naturalmente, Juan mes tabata un pekador ku tin mester di grasia i salbashon, su ministerio a mustra riba e Uniko ku por a trese grasia i salbashon.

Hesus a bin komo e representashon perfekto di e gloria di e Tata, i Dios a manda un profeta, un pekador, ku a realisá un tarea similar komo un di e serafinnan di shelu.

Ta despues ku Isaias tabata sa ku su piká a ser purifiká, el a bisa: “Atami aki! Mandami” (Isa. 6:8, NKJV). Kon kada un di nos, nos pikánan purifiká dor di e sanger di Hesus, por reakshoná manera Isaias a hasi aki?

E Dos Kerubinnan

Asina ku nos promé mayornan a ser ekspulsá for di e Hòfi, Dios a ofresé e speransa di Mesias (Gen. 3:15). Despues El a establesé un símbolo poderoso na e portanan di Eden: dos kerubin ku un lus briante, ku ta kinipí, entre nan. Nos no mester pèrdè for di bista ku e esena akí ta parse e arka di aliansa asina tantu, un símbolo di e trono di Dios (Eks. 25:18).

Lesa Génesis 3:21-24. Ki trabou e kerubinnan tabatin, i dikon?

Miéntras ku e kerubinnan sigur a haña e responsabilidat pa prevení pekadornan di tin akseso na e palu di bida (Gén. 3:22), nan tabata tambe un símbolo di speransa, di promesa, ku un dia hende lo a ser restourá na Paradeis. “E Hòfi di Eden a keda riba tera hopi tempu despues ku hende a bira un ser ekspulsá for di su kamindanan agradabel. E rasa kaí a ser permití pa hopi tempu pa kontemplá e hogar di inosensia, nan entrada blòkiá solamente dor di e angelnan vigilante. Na e porta di Paradeis, vigilá pa kerubin, e gloria divino a ser revelá. Aki Adam i su yunan tabata bin pa adorá Dios. Aki nan a renobá nan votonan di obediensia na e lei ei di kua e transgreshon a saka nan for di Eden. Pero den e restitushon final, ora lo tin ‘un shelu nobo i un tera nobo’ (Revelashon 21:1), e mester ser restourá mas gloriosamente dòrná ku na prinsipio.”—Ellen G. White, Patriarchs and Prophets, p. 62.

E formulashon den Génesis 3:24 tambe ta interesante: Beibel ta indiká ku Dios “a pone” e kerubinnan na ost di Eden, i e palabra hebreo original usá ta shakan, e palabra rais pa e “tabernakel” sagrado (lesa Eks. 25:9, Num. 3:26), kaminda e presensia di Dios tabata biba meimei di Su pueblo. Aunke e término komun Shekinah, pa e presensia di Dios, no ta aparesé den Beibel, e tambe ta basá riba e palabra akí, hopi biaha tradusí komo “tabernakel.” Un tradukshon literal di shakan por a lesa: “Dios a tabernakel kerubinnan na parti ost di e Hòfi di Eden.”

Den Beibel, kerubinnan ta ser asosiá ku e presensia di Dios (lesa 1 Kron. 13:6, Salmo 80:1, i Isa. 37:16), en partikular ku Su trono, ku ta e lugá kaminda Su nòmber ta ser proklamá. Nos no mester keda sin nota ku e 24 ansianonan ku ta asistí na e trono di Dios den Revelashon 4 i 5 ta kanta Su alabansanan i ta deklará Su derecho di goberná komo Esun ku a krea tur kos (Rev. 4:11). Esaki por yuda nos komprondé e esena di sala di trono i nos ròl komo pekadornan pordoná den relashon ku nos Kreador.

Manera Karbon di Kandela Kimando

Kerubinnan, sea komo sernan bibu (Ezek. 10:8) òf e símbolonan di oro di nan (Eks. 25:18), ta aparesé den henter Tèstamènt Bieu. Hopi biaha nan ta ser deskribí komo pará inmediatamente banda di e trono di Dios, radiando Su gloria na universo. Kerubinnan ta bòrdá tambe den e kortina dilanti di e Lugá Santísimo (Eks. 26:1). Den e buki di Salmonan, e poder supremo di Dios riba kreashon ta ser representá poétikamente komo Dios ku ta ser kargá na laira dor di kerubinnan (Salmo 18:10). Dios a ordená pa e arka di aliansa ser kubrí pa dos kerubin di oro sólido ku nan alanan ekstendé den direkshon di otro (Eks. 25:18–20).

Lesa Ezekiel 1:4–14. Ki similaridatnan bo ta mira entre e pasashi akí i e esenanan deskribí den Isaias 6:1–6 i Revelashon 4:1–11?

Ezekiel ta ser presentá ku un demostrashon impreshonante di e poder di Dios. E ta un esena konfuso pa kuminsá kuné, ku ta kuadra ku e situashon ku e pueblo di Dios a haña nan mes ta biba kuné na e momentu ei: e pueblo skohí, no den e tera di promesa sino den koutiverio babilóniko. Segun ku Ezekiel ta studia e esena poné su dilanti, e ta wak na laira i ta mira e trono di Dios ariba di tur kos.

Tuma nota di e similaridatnan importante ku otro vishonnan di “trono.” E kriaturanan bibu ku Ezekiel ta presensiá tin e mesun kara ku e kriaturanan bibu den e vishon di Juan: un leon, un águila, un bue i un hòmber.

E kriaturanan misterioso ku kuater kara no ta ser menshoná spesífikamente den e deskripshon inisial di Ezekiel; mas despues, den un otro esena di sala di trono (lesa Ezek. 10:1–21), nan ta ser yamá “kerubinnan,” i nos ta haña tambe e karbonnan ku ta kima for di e vishon di Isaias di e serafinnan. Nan ta kompartí e kara di e kriaturanan bibu menshoná den e vishon di Juan.

Ki ora ku nos mira e trono di Dios, sea den e arka di aliansa típiko, ku tabata sirbi komo e lugá di enkuentro di Dios ku Moises (Eks. 25:22), òf e vishonnan impreshonante di e profetanan, e kerubinnan t’ei semper. Nan ta íntimamente mará na e trono di Dios. Tur e kriaturanan di Dios a ser diseñá pa reflehá Su gloria, sea nos ta papiando tokante e rasa humano trahá den Su imágen òf e sernan angelikal ku ta situá inmediatamente banda di Su trono glorioso.

Dios Meimei di Su Pueblo

Siguiendo e guia di e presensia di Dios den e nubia, e israelitanan lo a para den nan biahe pa e Tera Primintí, lanta e tabernakel, i despues e tribunan lo a lanta nan kampamentu rònt di dje, tres tribu na kada banda. E Presensia di Dios lo a baha den e Lugá Santísimo i bai biba meimei di Su pueblo.

Tabatin un tribu dominante na kada un di e kuater bandanan di e tabernakel. Di akuerdo ku Numbernan 2, kua tabata e kuater tribunan dominante akí?

Tuma nota ku kada tribu dominante a bula su mes “standart,” òf bandera spesial, pa indiká ken nan tabata. Miéntras ku e Skrituranan no ta eksplísito ora nan ta deskribí kiko tabatin riba kada bandera, tin un tradishon interesante, basá libremente riba e karakterístikanan tribal deskribí den Génesis 49 i Deuteronomio 33, ku ta asigná un di e kuater karanan na kada un di e kuater puntonan di kompas. “Di akuerdo ku tradishon rabíniko, e bandera di Huda tabata karga e figura di un leon, esun di Ruben e semehansa di un hòmber òf di un kabes di un hòmber, esun di Efrain e figura di un bue, i esun di Dan e figura di un águila; di manera ku e kuater kriaturanan bibu uní den e formanan di kerubín, deskribí dor di Ezekiel, tabata representá riba e kuater banderanan akí.”—Fririch Keil i Franz Delitzsch, Commentary on the Old Testament, (Peabody, MA: Hendrickson, 2011), tomo 1, p. 660.

Ta posibel pa lesa muchu hopi den tradishon, naturalmente, pero tòg ta interesante pa kompará e tradishon antiguo akí ku e deskripshon di Beibel di e Jerusalèm Nobo. Un patronchi interesante ta surgi: tin portanan ku ta representá tres tribu na tur kuater banda di e stat (Rev. 21:12, 13).

E deskripshonnan di tantu e kampamentu di Israel komo e Jerusalèm Nobo ta enfatisá un echo krusial: Dios tin intenshon di hala humanidat serka di Su trono. E buki di Revelashon ta siña nos ku “Señor Dios Todopoderoso i e Lamchi ta su tèmpel” (Rev. 21:22, NKJV).

E Kaida di Lucifer

Ta parse inkomprendibel ku Lucifer un tempu tabata okupá e posishon di kerubin kubridor, okupando un posishon haltu banda di e trono di Dios. Siguramente su eksistensia lo a yuda revelá e gloria di Dios na universo. En bes di esei, el a kuminsá konsiderá su mes gloria, no e gloria di su Kreador; òf, pa ta mas presis, el a kuminsá imaginá ku e no a ser duná e reverensia debí na dje.

Lesa Ezekiel 28:11–17 i Isaias 14:12–14. Kiko a kondusí na e kaida di Lucifer? Kompará e pasashinan akí ku Revelashon 14:1–12. Kon e kontraste entre e kaida di Lucifer i e posishon haltu di humanidat den Kristu ta informá bo komprondementu di loke ta tuma lugá den Revelashon 14?

Tuma nota kon Lucifer a ser kitá for di e seru santu, miéntras e redimínan ta para riba Seru Sion huntu ku e Lamchi di Dios. Ta ser bisá ku Lucifer tabata den Eden; e rasa humano tambe tabata einan un tempu, pero kontrali na e destino di Satanas, humanidat ta ser restourá na Paradeis pa medio di Kristu. (Lesa Rev. 22:1–3.)

Den e konteksto akí, e siguiente sita di Ellen G. White ta masha instruktivo: “Shelu lo triunfá, pasobra e vakaturanan ku a surgi den shelu dor di e kaida di Satanas i su angelnan lo ser yená dor di e redimínan di Señor.”—Advent Review and Sabbath Herald, 29 di mei 1900.

I nan ta einan, den shelu, solamente pa motibu di e evangelio. De echo, e tema di e evangelio, di redenshon, ta ser hañá na un manera gráfiko den e sala di trono den Revelashon 4 i 5. Por ehèmpel, e angelnan ta grita: “Bo ta digno di tuma e ròl i habri su seyonan, pasobra Bo a ser matá, i ku Bo sanger Bo a kumpra pa Dios, personanan di tur tribu i lenga i nashon” (Rev. 5:9, NIV). Ki un kuadro di e evangelio: e morto di Hesus pa redenshon di humanidat!

Tuma nota tambe kon e lenguahe ta reflehá e mensahe di e promé angel, den kua nos ta ser yamá pa prediká “e evangelio eterno . . . na esnan ku ta biba riba tera, na tur nashon, tribu, lenga i pueblo” (Rev. 14:6, NKJV). Ki un representashon poderoso di e plenitut di loke Kristu a hasi pa mundu. No tin un ser humano den henter historia di tera pa ken Kristu no a muri. Kada persona solamente mester siña tokante di dje i skohe pa asept’e.

Lesa Ellen G. White, “The Controversy Ended,” p. 669–671, 676–678, den The Great Controversy.

Satanas, ku un tempu tabata un kerubin ku ta kubri, a trata na destruí konfiansa den e trono di Dios. Dios a permití angelnan kaí pa sigui den nan rebelion pa mustra universo e profundidat di maldat ku ta bini di eksaltashon propio, i miéntras ku Satanas a logra engañá e rasa humano pa uni den su guera kontra Dios, Kristu a derot’é totalmente na e krus, sigurando un lugá pa humanidat kaminda angelnan kaí un tempu tabata. Pekadornan, den Kristu, ta bira públikamente kontra e pretenshonnan di Lucifer. E senario final ta, di algun manera, un revelashon ainda mas grandi di e bondat i amor di Dios, ku tabata eksistí promé ku e kaida di Lucifer. Aunke Dios nunka a ordená ku maldat mester a eksistí, i e ta un tragedia ku konsekuensianan eterno, ora tur kos ta kla, e bondat i amor di Dios lo ser revelá den formanan ku, di otro manera, nunka lo no tabata.

Kristu “ta wak e redimínan, renobá den Su mes imágen, kada kurason kargando e impreshon perfekto di e divino, kada kara reflehando e semehansa di nan Rei. E ta mira den nan e resultado di e trabou di Su alma, i E ta satisfecho. E ora ei, den un bos ku ta alkansá e multitutnan reuní di e hustunan i e malbadonan, E ta deklará: ‘Mira e kompra di Mi sanger! Pa esakinan Mi a sufri, pa esakinan Mi a muri, pa nan por biba den Mi presensia atraves di siglonan eterno.’ I e kantika di alabansa ta subi for di esnan bistí na paña blanku rònt di e trono: ‘Digno ta e Lamchi ku a ser matá di risibí poder, i rikesa, i sabiduria, i forsa, i honor, i gloria, i bendishon.’ Revelashon 5:12.”—Ellen G. White, The Great Controversy, p. 671.

Preguntanan pa Diskushon: