Riba Ken e Finnan a Bin

Lesa pa e Estudio di e Siman Akí:

Versíkulo di Memoria:

“Awor tur e kosnan akí a sosodé ku nan komo ehèmpel, i nan a ser skirbí pa nos spièrtamentu, riba ken e finnan di siglonan a bin. P’esei laga esun ku ta kere ku e ta pará, tene kuidou pa e no kai” (1 Korintionan 10:11,12, NKJV).

Beibel ta yená ku relatonan di e pueblo di Dios ku ta mustra na eventonan den futuro i ku ta kontené klavenan pa yuda nos komprondé bèrdat presente. De echo, algun di e relatonan ei ta prefigurá eventonan di último dia ku detaye sorprendente, dunando nos un fundeshi mas amplio pa komprondé e profesianan di Daniel i Revelashon klaramente.

Sin violá e libertat di konsenshi individual, Dios por dirigí perfektamente e eventonan ku lo sosodé den e último dianan, eventonan ku El a revelá na e profetanan. Algun di e storianan importante akí ta opvio, pasobra Tèstamènt Nobo ta referí na nan spesífikamente ora e ta deskribí eventonan di último dia: Sodoma i Gomora, e Diluvio, etc. Otronan ta rekerí pensamentu i eksplorashon kuidadoso pa asina por saka for di nan e bèrdatnan ku a ser duná na nos den e Palabra di Dios.

Durante e próksimo par di simannan, nos lo ta buskando entre un kantidat di storianan klave pa asina mira kiko nan lo por tin di bisa tokante eventonan manera e Segundo Binida, e huisio investigativo, e krísis final, i mas. I, atraves di tur esaki, nos ta haña Kristu komo e sentro, pasobra E mester ta e fundeshi komo tambe e meta final di tur nos esfuersonan profétiko.

E Furia di e Lamchi

Lesa Revelashon 6:12-17. Konsiderá e detayenan di e reakshon di e hendenan akí ora nan a mira e eventonan di último dia tuma lugá diripiente. Kiko bo ta nota tokante nan reakshon?

Ta interesante pa nota ku e pèrdínan no ta grita: “Kiko esaki ta?” òf “Ken ta tras di esaki?” Ta parse ku nan sa kiko ta pasando. Nan ta referí na Hesus komo e Lamchi, loke lo a rekerí sa algu di e storia di Kristu. Tambe nan ta parse konsiente ku “e gran dia di Su furia a yega,” i ku nan ta atrapá den un posishon desesperá: “Ken por para?” (Rev. 6:17, NKJV).

Promé ku e fin, e evangelio ta ser hibá na tur nashon riba tera (Mat. 24:14), i e mensahenan di e tres angelnan ta ser entregá na henter e planeta. I tòg, lo tin hende ku ta ser kohé for di base, no pa falta di informashon sino pa motibu di nan rechaso pa kere i pa obedesé. Esaki lo ta e motibu ku hendenan asina ta bai pèrdí den e último dianan.

Lesa Mateo 24:36–44. Ki lèsnan Hesus ta bisa nos ku nos mester ta sakando for di e storia di Noe?

Hesus ta mustra riba e storia di e Diluvio pa atvertí nos ku Su segundo binida lo bin komo un sorpresa pa hopi hende. Manera ku e Segundo Binida, e Diluvio no a bin komo un sorpresa pa mundu pa motibu di un falta di informashon. Noe a prediká pa 120 aña na un mundu ku a nenga di kere. Tur a ser bisá kiko tabata bai pasa. Simplemente nan no a kere.

Miéntrastantu, hopi hende ta sigurá nan mes ku, pasobra periodonan largu di tempu a pasa, ta nifiká ku e profesianan ta falsu. Usando e storia di Diluvio komo konteksto, Pedro ta skirbi “ku hasidónan di bofón lo bin den e último dianan, kanando di akuerdo ku nan mes pashonnan, i bisando: ‘Unda e promesa di Su binida ta? Pasobra for di tempu ku e tatanan a muri, tur kos ta sigui manera nan tabata for di prinsipio di kreashon’ ” (2 Pe. 3:3,4, NKJV). Segun ku kada aña ta pasa, e sintimentu akí lo solamente krese.

Den e eksperensia di kada persona, e segundo binida di Hesus (òf den algun kaso, e di tres binida) nunka ta mas ku un momentu despues di morto, i nos tur sa kon rápidamente bida ta pasa bai. Kon e perspektiva akí lo por yuda nos dil ku e “retraso”?

Evangelisashon di Noe

Pedro ta kòrda nos ku hopi hende lo no ta prepará pa e regreso di Kristu pasobra nan “ta lubidá boluntariamente” (2 Pe. 3:5, NKJV) loke a pasa na e Diluvio. Awendia, aunke mundu tin un memoria kolektivo di un diluvio grandi (un kantidat asombroso di kultura global ta konta e storia di un diluvio devastador, for di e griegonan antiguo te na e mayanan), e storia di Noe ta awe kisas un di e relatonan di Beibel mas ridikulisá. Manera a ser pronostiká, mundu ta poniendo e storia un banda komo un mito, no importá kon klaramente i eksplísitamente e ta ser deskribí den Tèstamènt Bieu i referí na dje numeroso biaha den Tèstamènt Nobo.

Hesus a bisa ku e situashon mundial lo a parse “e dianan di Noe” den Mateo 24:37–39. Kompará e pasashi akí ku Génesis 6:1–8. Kua tabata e kondishonnan moral ku a hiba na e Diluvio? Ki paralelonan ta eksistí entre e dos tempunan?

Tin un otro lès importante pa e pueblo remanente di último dia di Dios ku ta surgi for di estudio kuidadoso. Hebreonan 11:7 ta bisa nos ku Noe “a prepará un arka pa salbashon di su kas, pa medio di kua el a kondená mundu i a bira heredero di e hustisia ku ta di akuerdo ku fe” (NKJV).

Imaginá bo ta prediká pa mas ku un siglo sin nada pa mustra riba dje sino bo mes famia den e arka. Si Noe lo tabata un evangelista moderno, nos lo por tabata tentá pa konsider’é un frakaso: dékadanan di predikashon i loke lo a parse di ta sin resultado.

Afortunadamente, na e momentu akí, hopi parti di mundu ta masha reseptivo na e mensahenan di e tres angelnan. Alkanse evangelístiko, e predikashon di nos mensahe di remanente úniko, ta proba di ta inkreiblemente efektivo hopi kaminda, i hopi hende ta yegando na konosé Señor. Nos no a yega na e punto ainda kaminda no tin resultado, aunke nos a ser bisá ku e momentu ta yegando ku “e tempu di prueba lo sera, i e porta di mizerikòrdia lo ser será. Pues den esun frase kòrtiku: ‘Esnan ku tabata prepará a drenta huntu kuné na e kasamentu, i e porta a ser será,’ nos ta ser hibá atraves di e ministerio final di e Salbador, te na e momentu ku e gran obra pa salbashon di hende lo ser kompletá.”—Ellen G. White, The Great Controversy, p. 428.

Te na e momentu ei, nos tin un obra pa hasi komo un iglesia.

E Storia di Sodoma i Gomora

Tin un otro storia klave di Tèstamènt Bieu na kua Pedro ta hasi referensia direkto ora e ta deskribí eventonan di último dia: e destrukshon di Sodoma i Gomora. E statnan di e sabana tabata legendario pa nan maldat i a bira e promé ehèmpel di sentronan di poblashon destruí pa kandela for di shelu.

Lesa 2 Pedro 2:4–11, Hudas 5–8, i Ezekiel 16:46–50, i tuma nota di tur e detayenan. Kua tabata e kondishonnan moral ku a hiba na destrukshon di e statnan akí, i ki paralelonan ta eksistí awe?

E spièrtamentu ofresé na e hendenan di e último dianan di e planeta akí pa medio di e relato di Sodoma i Gomora ta kla: finalmente, e malbadonan tambe lo ser destruí pa kandela, manera deskribí asina kla den Revelashon 20. Piká ta remarkabelmente engañoso den sentido ku e ta siega nos pa e estado di nos mes kurason, ta tapa nos transgreshonnan bou di un kapa di aprobashon propio, miéntras ku e maldat kometé dor di otronan hopi bes ta keda opvio pa nos. Den e mesun kapítulo ku Dios a papia tokante kuantu amor El a basha riba Su nashon, E tin ku atvertí e nashon tambe ku, miéntras e no a kometé e mesun pikánan (Ezek. 16:47), el a bira realmente mas malbado ku Sodoma.

Israel tabata “hunga prostituta” (Ezek. 16:41), kometiendo adulterio spiritual. Imaginábo e sorpresa di e pueblo di Dios ora nan a tende ku nan tabata mas malbado ku hendenan ku tabata legendario pa nan maldat.

Esaki no ta nada nobo, no solamente ku Israel antiguo sino ku henter humanidat. Den Romanonan 1:18–32, Pablo ta presentá un lista largu di maldat humano ku por a ser skirbí basá riba korantnan di awendia. Pablo su deskripshon di piká pagano no tabata destiná pa krea sintimentunan di superioridat meimei di e hudiunan sino pa asina e pueblo di Dios finalmente por a komprondé e seriedat di nan mes pikánan. Natan a hasi e mesun kos ora el a papia ku David: el a konta e storia di un hòmber riku ku a hòrta un lamchi for di un hòmber pober. E storia akí “a lanta” David su rabia “grandemente” (2 Sam. 12:5, NKJV), pasobra e inhustisia tabata parse opvio; asta e ora ei, a tuma Nathan su deklarashon: “Abo ta e hòmber!” (2 Sam. 12:7, NKJV) pa pone David mira su mes den e storia.

Ta importante pa kòrda ku Beibel no ta dirigí prinsipalmente na e mundu pafó sino na e pueblo di Dios mes. Ora nos mira e pikánan horibel di otronan deskribí den un pasashi manera Revelashon 13 òf 17, e ta un spièrtamentu ku nos tambe por kai den e mesun trampa.

E Hues di Henter Tera

Djis promé ku e destrukshon di Sodoma, tin un storia kurioso ku ta tuma lugá riba e sabananan di Mamre. Dios, kompañá pa dos angel, ta aparesé na Abraham. Ora Abraham mira nan, e ta invitá e bishitantenan selestial na un komementu, i ta na e punto akí Dios ta primintí ku Abraham i Sara lo haña un yu hòmber ku lo hiba na e Mesias. Hesus, enbèrdat, a bini di e liña di Abraham (kompará ku Gal. 3:16). Despues, diripiente, e storia ta pasa pa e asuntu di e statnan malbado di e sabana.

Lesa Génesis 18:17-32. Kiko nos ta siña for di e versíkulonan akí tokante e karakter di Dios i e manera ku finalmente E ta plania pa dil ku maldat riba nos planeta?

Dios no debe nos un splikashon, pero E ta skohe pa no skonde Su motibunan i plannan pa e rasa humano. “Siguramente Señor Dios no ta hasi nada,” profeta Amos ta bisa nos, “a ménos ku E revelá Su sekreto na Su sirbidónan e profetanan” (Amos 3:7, NKJV).

Promé ku Dios destruí Sodoma i Gomora, E ta deklará ku e úniko kos korekto pa hasi ta informá Abraham di loke ta na punto di pasa, tokante loke e por spera pronto di ta testigu di dje.

Dios ta keda huntu ku Abraham miéntras e dos angelnan ta bai na e stat malbado pa yama esnan ku lo pone atenshon na nan spièrtamentu. Un hende no por keda sin pensa riba e angelnan profétiko ku ta hasi e mesun tarea den e último dianan, yamando esnan di e pueblo di Dios ku ta biba na Babilonia pa sali for di dje (Rev. 14:6–12, Rev. 18:1–4). Segun ku e spièrtamentu final ta ser emití, Dios ta diskutí ku Abraham loke ta na punto di pasa, i E ta someté Su mes boluntariamente na e preguntanan di e patriarka.

“Ku e keda leu di Bo pa hasi un kos manera esaki, pa mata e hustu huntu ku e malbado,” Abraham ta komentá, i despues ta puntra: “E Hues di henter tera lo no hasi hustisia?” (Gén. 18:25, NKJV). Abraham no ta solamente eksaminando e kaso di Sodoma, sino tambe e ta eksaminando e karakter di Dios. Di mes manera, promé ku e fin yega, Dios ta habri e bukinan di shelu (Rev. 20:4,11–15) i ta pèrmití nos investigá e evidensia promé ku finalmente E trese kandela abou riba tera. Es desir, nos lo tin mil aña pa haña un kantidat di pregunta kontestá ku, pa awor, ta keda sin kontesta.

E Huisio Pre-Atvènt

E deskripshon di huisio hañá den Daniel 7 ta duna nos un bista tras di e velo, na un oportunidat impreshonante pa mira kon Dios ta resolvé e problema di piká miéntras ku ainda E ta redimí esnan ku ta deseá di biba den un relashon di pakto kunE.

Lesa e deskripshon di e huisio investigativo proveé den Daniel 7:9,10,13,14,22,26, i 27. Kiko ta e enfoke prinsipal den e huisio? Kiko ta e veredikto duná na final di e proseso? Kiko esaki ta bisa nos tokante e plan di salbashon?

No tin duda ku e rasa humano ta ser huzgá pa Dios. Eklesiastés 12:14 ta sigurá nos ku “Dios lo trese tur obra na huisio” (NKJV), i Pablo ta rekordá nos ku nos no mester huzga otro, pasobra “nos tur lo para dilanti di e trono di huisio di Kristu” (Rom. 14:10). Dios, naturalmente, no tin mester di registronan pa sa ken ta ser salbá òf bai pèrdí, pero angelnan, ku a bin ta eksaminá e plan di salbashon tur e tempu (1 Pe. 1:12), naturalmente lo tabatin preguntanan. Nan tabata testigunan di e rebelion di Satanas i a mira un tersera parti di e angelnan di shelu ser ekspulsá for di shelu (Rev. 12:4), i awor Dios ta trese nos den Su presensia. Dios ta habri e bukinan i ta pèrmití e santunan mira tur kos.

E storia di Abraham ku ta supliká pa Sodoma i Gomora, un tipo di e huisio, ta ofresé nos un persepshon importante den huisio. E pikánan di Sodoma tabata ser investigá opviamente; Dios ta menshoná ku e maldat di e stat a dun’e asina un reputashon ku e gritu kontra dje tabata grandi (Gén. 18:20). Pero no tabata solamente Sódoma i Gomora a ser investigá promé ku nan destrukshon. Dios a habri porta tambe pa Abraham studia si Dios tabata aktuando hustu òf nò den Su desishon pa destruí e malbadonan.

Miéntrastantu, ken ta aparesé meimei di e huisio selestial, den Daniel 7, sino “e Yu di hende,” Hesus (Dan. 7:13; lesa tambe Mat. 20:28), ken su aparensia ta e úniko motibu pakiko e huisio akí ta “hasí na fabor di e santunan di e Haltísimo” (Dan. 7:22, NKJV). Su hustisia perfekto so ta hiba Su pueblo atraves di huisio.

Lesa Ellen G. White, “The Flood,” p. 101, 102, den Patriarchs and Prophets.

“E sumo saserdote no por defendé su mes ni su pueblo di e akusashonnan di Satanas. E no ta pretendé ku Israel ta liber di kulpa. Bistí ku pañanan sushi, ku ta simbolisá e pikánan di e pueblo, ku e ta bisti komo nan representante, e ta para dilanti di e Angel, konfesando nan kulpa, sinembargo mustrando riba nan arepentimentu i humiliashon, i dependiendo riba e mizerikòrdia di un Redentor ku ta pordoná piká. Den fe e ta reklamá e promesanan di Dios.... “E akusashonnan di Satanas kontra esnan ku ta buska Señor no ta ser provoká pa malkontentu pa motibu di nan pikánan. E ta regosihá den nan karakternan defisiente; pasobra e sa ku solamente pa medio di nan transgreshon di e lei di Dios e por optené poder riba nan. Su akusashonnan ta surgi únikamente for di su enemistat ku Kristu. Pa medio di e plan di salbashon, Hesus ta kibra e gara di Satanas riba e famia humano i ta reskatá almanan for di su poder....

“Den su mes forsa, hende no por enfrentá e akusashonnan di e enemigu. Den paña mancha ku piká, konfesando su kulpa, e ta para dilanti di Dios. Pero Hesus, nos Abogado, ta presentá un súplika efektivo na fabor di tur ku, pa medio di arepentimentu i fe, a komprometé e wardamentu di nan alma na djE. E ta defendé nan kousa, i pa medio di e argumentunan poderoso di Kalvario, ta vense nan akusadó. Su obediensia perfekto na e lei di Dios a dun’E tur poder den shelu i riba tera, i E ta reklamá di Su Tata mizerikòrdia i rekonsiliashon pa hende kulpabel.”—Ellen G. White, Prophets and Kings, p. 583–586.

Preguntanan pa Diskushon: