E Pakto i e Plan

Lesa pa e Estudio di e Siman Akí:

Versíkulo di Memoria:

“Asina Moises a bin i a konta e pueblo tur e palabranan di SEÑOR i tur e huisionan. I henter e pueblo a kontestá ku un bos i a bisa: ‘Tur e palabranan ku SEÑOR a bisa, nos lo hasi’ ” (Eksodo 24:3, NKJV).

Komo nan Dios, Kreador i Redentor, Señor tabata deseá di ta ku Su pueblo i biba meimei di nan. El a krea nos pa ta den komunion estrecho kunE. Sinembargo, si relashonnan signifikante ku otro hende por ser konstruí solamente ku tempu i esfuerso, meskos ta bèrdat ku nos relashon vertikal ku Dios. E por ta un eksperensia edifikante i yen di kresementu, pero solamente si nos pasa tempu kunE. Den términonan práktiko, esaki ta nifiká studia Su Palabra (Dios ta papia ku nos), hasi orashon (habri nos kurason na Dios), i duna testimonio na otronan tokante e morto, resurekshon i regreso di Kristu (partisipá den e mishon di Dios). Segun ku Dios ta bendishoná nos, nos lo ta un kanal di bendishon pa otronan.

E enfoke mester ta riba Dios, no riba nos mes (Hebr. 12:1,2). Ora nos konektá kunE, Dios por empoderá nos pa sigui Su siñansanan, loke ta nifiká obediensia na Su Palabra. No ta nada straño ku e generashon di tempu di fin di e siguidónan di Kristu ta ser deskribí komo hendenan “ku ta warda e mandamentunan di Dios i e fe di Hesus” (Rev. 14:12, NKJV).

E ta simpel, realmente: nos ta stima Dios, i, pa motibu di e amor ei, nos ta obedes’É.

E Buki i e Sanger

Lesa Eksodo 24:1-8. Ki ròlnan e lesamentu di e Palabra di Dios i e sprengumentu di sanger ta hunga den e ratifikashon di e pakto entre Dios i Su pueblo?

E Dios bibu di Beibel ta e Dios di relashonnan. E elemento importante pa nos Señor no ta un kos òf un agènda sino e persona. Pues, Dios ta paga hopi atenshon na hende, i e propósito prinsipal di Su aktividatnan ta pa edifiká un relashon personal ku hende. Al fin i al kabo, un Dios ku “ta amor” lo mester ta un Dios ku sí ta preokupá tokante relashonnan, pasobra kon por tin amor sin relashonnan?

Hesus a bisa: “I Ami, ora Mi ser halsá for di tera, lo mi hala tur hende serka Mi” (Juan 12:32, ESV). Dios no ta interesá solamente den nos komportashon étiko, doktrina korekto, òf den un sèt di akshonnan korekto, sino, riba tur kos, den un relashon íntimo i personal ku nos. Tur dos institushon di Kreashon (Génesis 1,2) ta tokante relashon: e promé tokante e relashon vertikal ku Dios (e Sabat) i e di dos tokante e relashon horizontal entre hende (matrimonio).

E ratifikashon di e pakto na Sinai tabata pa reforsá e relashon spesial ku Dios tabata ke tin ku Su pueblo. Den e seremonia, e hendenan a grita dos biaha ku nan lo a obedesé Dios den tur loke E tabata rekerí. “Tur loke SEÑOR a bisa, nos lo hasi,” nan a proklamá (Eks. 24:3, NIV). Nan tabata ke men esei tambe, pero nan no tabata konosé nan kebrantamentu, fragilidat i falta di poder. E sanger di e pakto a ser isprengu riba e pueblo, indikando ku solamente pa medio di e méritonan di Kristu Israel por a sigui e instrukshonnan di Dios.

Nos no ke aseptá ku nos naturalesa humano ta frágil, débil i kompletamente pekaminoso. Nos tin un tendensia inherente pa ku maldat. Pa por hasi bon, nos mester tin yudansa di pafó di nos mes. E yudansa akí ta bini solamente di ariba, di e poder di e grasia di Dios, di Su Palabra, i di Spiritu Santu. I asta ku tur esaki na nos disposishon, nos ta hasi maldat asina fásil, no ta bèrdat?

Ta p’esei un relashon personal estrecho ku Dios tabata mes esensial pa e hendenan e tempu ei, na Sinai, ku e ta pa nos awe.

“Tur loke SEÑOR a bisa, nos lo hasi” (Eks. 24:3, NIV). Kuantu biaha bo a bisa e mesun kos, solamente pa frakasá? Kiko ta e úniko solushon?

Mirando Dios

Lesa Eksodo 24:9-18. Ki eksperensia asombroso e yunan di Israel a ser duná aki?

Despues di e restablesementu firme di e pakto ku Dios, Moises a bolbe subi Sinai. Na kuminsamentu di e subida akí, Moises no tabata su so. E tabatin e kompania ekselente di 73 lider israelita. Pa e lidernan, esaki tabata e eksperensia kumbre: nan a mira Dios (teofania), i dos biaha e teksto ta suprayá e realidat asombroso akí. Tambe tabata un momentu pa e lidernan, dor di kome huntu, pa seya e pakto ku Dios. Esaki tabata un bankete, i e Dios di Israel tabata nan Anfitrion. E lidernan akí tabata profundamente honrá pa Dios.

Den Medio Oriente durante tempu bíbliko (i te na sierto grado awe), kome huntu tabata un gran eksperensia, gran honor, i privilegio. E tabata ofresé pordon i tabata forma un laso di amistat. E tabata enserá t’ei pa otro i keda huntu den tempu di krísis i problema. Dor di kome huntu, nan tabata primintí otro, sin palabra, ku si algu mester pasa ku un partido, e otro lo tabata obligá di bin i yuda. Ser invitá na un komementu tabata un trit spesial ku no tabata ser ekstendé na tur hende.

Mientrastantu, nenga un invitashon tabata un di e pió tiponan di insulto. E persepshon akí ta yuda nos komprondé e storianan den Tèstamènt Nobo den kua Hesu-Kristu tabata ser kritiká fuertemente pa kome ku pekadornan (Lukas 5:30). Ora kreyentenan ta selebrá e Sena di Señor, nan ta establesé e laso estrecho akí tambe ku otro kreyentenan ku ta pekador meskos ku nan mes. Durante e sena akí, nos ta selebrá e pordon i salbashon ku nos tin den Hesus (lesa Mat. 26:26–30, Marko 14:22–25, 1 Kor. 11:23–29).

Trágikamente, algun di e hòmbernan ku a subi ku Moises a kai despues den piká i a pèrdè nan bida (lesa Lev. 10:1,2,9). Aunke nan tabatin un eksperensia asina profundo ku Dios einan, nan no a ser transformá òf kombertí dor di e eksperensia ei. Ki un lès poderoso tokante kon poseshon di bèrdat i privilegionan sagrado no ta nifiká kombershon outomatikamente. Despues di a eksperensiá loke nan a hasi, e hòmbernan akí mester tabata e últimonan pa a hasi loke nan lo a hasi trágikamente despues.

Poder pa Obedesé

Lesa Ezekiel 36:26–28. Kon obediensia ta tuma lugá den nos bida?

Na tres okashon, e israelitanan a deklará fervientemente ku nan lo a obedesé Dios (Eks. 19:8; Eks. 24:3,7). Obediensia ta importante, asta si Beibel ta siña ku nos, sernan humano, ta débil, kibrá, frágil i pekaminoso. E bèrdat tristu akí a ser revelá no solamente atraves di e historia di Israel antiguo sino pa medio di e historia di henter Su pueblo.

Kon, anto, nos por sigui Dios fielmente?

E bon notisia ta ku loke Dios ta ordená, E ta empoderá nos pa hasi. E yudansa ku no ta paden di nos ta bini di pafó, i ta pone ku nos por hasi loke Dios ta rekerí. E ta Su obra. Den e núkleo di su resúmen teológiko den Ezekiel 36:26,27, profeta Ezekiel ta hasi e punto akí masha kla. Ta Dios so por hasi un transplante di kurason, i E ta hasi esaki dor di kita nos kurason di piedra i remplas’e ku un kurason sensitivo di karni. Manera Hosue a rekordá su oudiensia: “Boso no por sirbi SEÑOR” (Hos. 24:19, NIV).

Nos por disidí di sigui Dios; esei ta nos ròl. Nos tin ku hasi e eskoho, e eskoho di momentu pa momentu pa someté na djE. I esei ta pasobra nos no tin e poder pa kumpli ni sikiera ku nos eskoho konsiente pa sirbiE. Pero ora nos duna nos debilidat na Dios, E lo hasi nos fuerte. Pablo ta bisa: “Ora mi ta débil, e ora ei mi ta fuerte” (2 Kor. 12:10, NKJV).

Tuma nota di e “Mi” divino den Ezekiel 36:24–30: Dios ta reuní, limpia, kita, duna, pone i movebo pa warda Su lei kuidadosamente. Loke E ta hasiendo, abo lo hasié. E ta identifiká ku bo, i si bo asosiá estrechamente kunE, Su hasimentu lo ta bo hasimentu. E union entre Dios i abo lo ta dinámiko, poderoso i bibu.

Atrobe, e énfasis den e pasashi akí ta riba Dios su hasimentu. E tradukshon literal ta bisa: “Lo Mi duna Mi Spiritu den boso, i lo Mi hasi pa boso kana den Mi statutonan i warda Mi leinan, i boso lo hasi.” Dios ta ordená hende pa obedesé i despues ta duna e poder pa obedesé. Loke Dios ta rekerí di Su pueblo, semper E ta yuda nan hasi. Obediensia ta un don di Dios (no solamente nos prestashon òf logro), meskos ku hustifikashon i salbashon ta Su donnan tambe (Fil. 2:13).

Meimei di Su Pueblo

Dios tabata siña Su pueblo atraves di vários medio, i un di nan tabata pa medio di e santuario. Tur su sirbishinan tabata mustra na Hesus; nan tabata lèsnan ophetivo den e plan di salbashon, ku lo a ser realisá pa medio di Hesus, hopi siglo despues.

Lesa Eksodo 25:1-9. Ki bèrdatnan krusial, práktiko i teológiko ta ser mirá den e versíkulonan akí?

Aunke Dios tabata guia e israelitanan i tabata serka di nan kaba, El a instruí Moises pa konstruí un santuario:

“E ora ei laga nan traha un santuario pa Mi, i lo Mi biba meimei di nan” (Eks. 25:8, NIV). Dios ker a mustra nan di forma tangibel ku enbèrdat E tabata huntu ku nan. Aunke nan a hasi kos robes hopi bes, E no a bandoná nan, i “despues ku nan a ser tumá atrobe den fabor di Shelu” (Ellen G. White, Patriarchs and Prophets, p. 343), nan a ser duná e mandato divino, i e proseso di konstruí e santuario a kuminsá. Beibel ta sigurá nos ku Dios no ta biba den tèmpel i edifisionan ku hende a traha (Echonan 7:47–50) pasobra E ta mas grandi ku e shelu di shelunan, i shelu no por konten’E. Pablo na Areopagus na Atenas ta deklará: “E Dios ku a traha mundu i tur kos den dje ta e Señor di shelu i tera i no ta biba den tèmpelnan trahá pa man di hende” (Echonan 17:24, NIV). Tambe, Rei Sálomon ta deklará: “Ma di bèrdat Dios lo biba riba tera? Mira, shelu ni e shelu di mas haltu por kontenéBo; kuantu ménos e kas akí ku mi a traha!” (1 Reinan 8:27, ESV). E santuario mester tabata kaminda Dios lo a manifestá Su presensia na nan.

E israelitanan mester a trese un ofrenda boluntario pa konstrukshon di e santuario. Nan mester a duna regalonan presioso i karu, inkluyendo oro, plata, bròns, palu di akasia, vários tipo di paña fini, zeta di oleifi, i speserei. Den Eksodo 25:10–27:21, nos ta ser duná hopi detaye tokante e tabernakel i su sirbishinan. Dios a proveé Moises ku un plan ku ta kontené instrukshonnan spesífiko riba kon konstruí i muebla e tabernakel, inkluyendo e arka di aliansa, e mesa di pan di e Presensia, e kandelar, e altarnan, e kortinanan, e kolónan, i e midínan.

Moises mester a konstruí e tabernakel segun e patronchi ku Dios a mustr’é (Eks. 25:9,40; Eks. 26:30), ku tabata un refleho di e santuario selestial (Hebr. 8:1,2; Hebr. 9:11). E santuario terenal a sirbi un funshon krusial te na morto di Hesus i Su ministerio den e santuario selestial, loke a hasi e santuario terenal nulo i bashí, un bèrdat simbolisá pa e skermentu di e kortina dilanti di e Lugá Santísimo na morto di Kristu (Mat. 27:51, Marko 53:8).

Yená Ku e Spiritu di Dios

Dios a instruí Moises riba kada detaye komo preparashon pa e sirbishinan di tabernakel. Saserdotenan mester a bisti paña saserdotal, pero e sumo saserdote tabata bisti un efòd spesial, ku tabata kontené e nòmbernan di e yunan di Israel. Tambe e tabata bisti un pechero, ku tabata kontené e Urim i Thummim i mester tabata riba su kurason (Eksodo 28). Tur saserdote mester a ser konsagrá (Eksodo 29). Otro artíkulonan ku mester a ser prepará kuidadosamente tabata e altar di sensia, e baki pa laba, e zeta di unshon, i e sensia (Eksodo 30).

Lesa Eksodo 31:1-18. Ki yudansa spesial Dios a duna pa asina tur e detayenan di e tabernakel i sirbishinan relashoná kuné por a ser prepará i konstruí na un manera bunita i apropiá?

Pa promé biaha den e Skrituranan, hende ta lesa ku Dios lo a yena un persona ku e Spiritu di Dios. Kiko esei ta nifiká? Bezalel a ser empoderá pa traha artístikamente riba e tabernakel. E tabata yená, es desir, ekipá ku abilidatnan nobo, komprondementu i konosementu riba e artesania nesesario. Ademas, Dios a duna Aholiab i hopi otro artesano e mesun Spiritu pa yuda den e trabou akí.

Meimei di tur e kreatividat akí, e Sabat di Dios ta ser presentá komo un señal entre Dios i Su pueblo ku Señor ta hasi nan santu. E ta nifiká ku e wardamentu di e di kuater mandamentu ta asosiá ku santifikashon. Mas despues Ezekiel a opservá: “Mi a duna nan mi Sabatnan, komo un señal entre Ami i nan, pa nan por sa ku Ami ta SEÑOR kende ta santifiká nan” (Ezek. 20:12, ESV).

E Sabat ta un rekordatorio ku Señor no ta solamente nos Kreador (Gén. 2:2,3), Redentor, i Dios (Deut. 5:15; Marko 2:27,28) sino tambe Esun Santu. E ta transformá hende pa medio di Su presensia; pa medio di Su Spiritu i Palabra, nan ta krese pa reflehá un karakter amoroso, bondadoso, apnegá i pordonadó.

E regalo kulminante ku Dios a duna Moises tabata e Dekálogo (Eks. 31:18). Dios Mes a skirbi i duna e dos tablanan di piedra ku e dies preseptonan (Eks. 31:18, Deut. 9:9–11). E tablanan akí mester a ser poné den e Lugá Santísimo i paden di e arka di aliansa, ku tabata bou di e propisiatorio (Eks. 25:21).

Lesa Ellen G. White, “The Tabernacle and Its Services,” p. 343–353, den Patriarchs and Prophets.

E tabernakel tabata un lugá spesial kaminda ekspiashon tabata ser realisá pa e pikánan konfesá di e pueblo di Dios. E tabata e lugá kaminda, enbèrdat, henter e plan di salbashon a ser revelá, i den algun detaye, tambe, na e yunan di Israel miéntras nan tabata den desierto. Hustifikashon, santifikashon i huisio, tur tabata ser siñá einan. Tur sakrifisio di animal tabata mustra na e morto di Hesus, e pordon di pikánan, i, finalmente, e eliminashon di pikánan. I, tambe, huntu ku e sakrifisionan tabatin e presensia di e lei di Dios, e norma di hustisia.

“E lei di Dios, wardá denter di e arka, tabata e gran regla di hustisia i huisio. E lei ei tabata pronunsiá morto riba e transgresor; pero riba e lei tabatin e propisiatorio, riba kua e presensia di Dios tabata ser revelá, i for di kua, pa medio di e ekspiashon, pordon tabata ser otorgá na e pekador arepentí. Pues den e obra di Kristu pa nos redenshon, simbolisá pa e sirbishi di santuario, ‘mizerikòrdia i bèrdat a topa; hustisia i pas a sunchi otro.’ Salmo 85:10.”—Ellen G. White, Patriarchs and Prophets, p. 349.

Preguntanan pa Diskushon: