Apostasia i Interseshon

Lesa pa e Estudio di e Siman Akí:

Versíkulo di Memoria:

“E ora ei Moises a bolbe serka SEÑOR i a bisa: ‘O, e hendenan akí a kometé un piká grandi, i a traha pa nan mes un dios di oro! Pero awor, si Bo ke pordoná nan piká, ma si no, mi ta roga, kitami for di Bo buki ku Bo a skirbi’ ” (Eksodo 32:31, 32, NKJV).

Moisés tabata ousente for di e kampamentu di Israel pa solamente 40 dia, i kiko a pasa? E pueblo di Dios a bira for di djE i a adorá un ídolo trahá pa hende, un bisé di oro. Despues di asina tantu señal, eksperensia i milagernan poderoso, kon nan por a hasi esei?

Por tin hopi kontesta, i kisas algun bèrdat den nan tur. E hendenan no a komprondé ken Dios realmente tabata? Of nan eksperensianan poderoso kunE tabata eklipsá dor di nan deseonan karnal i pekaminoso? Nan no tabata apresiá loke Dios a hasi pa nan i, en kambio, a tuma tur kos pa normal? Nan komprondementu tabata nublá, manchá pa nan preokupashonnan di tur dia i pensamentu pekaminoso bieu? Nan tabata simplemente malagradesido pa Dios su akshonnan mizerikòrdioso na nan fabor? Nan a lubidá e aktonan poderoso di Dios asina lihé (Salmo 106:13,21–23)? Of tur kos por tabata kulpa di e liderazgo frakasá di Aaron? “SEÑOR tabata masha rabiá ku Aaron i lo a destruyé” (Deut. 9:20, NKJV). Loke sea tabata e motibunan pa e apostasia teribel akí, ki lèsnan nos por saka for di dje, no solamente tokante pekaminosidat humano sino tokante Dios su amor mizerikòrdioso pa hende, apesar di nan pekaminosidat?

Liderazgo Frakasá

Dios a yama Moises pa pasa tempu kunE. Kuarenta dia i kuarenta anochi kisas por tabata un periodo kòrtiku pa Moises, pero e tabata parse largu, muchu largu, pa e israelitanan. Nan lider visibel tabata ousente. Nan a bira desorientá, impasiente, angustiá, i insigur. Nan ke tabatin un dios visibel ku lo a guia nan, e “diosnan” ku nan a mira henter nan bida den Egipto idólatra.

Lesa Eksodo 32:1-6. Kon tabata posibel pa Aaron su liderazgo frakasá asina espektakularmente?

Aaron no tabata prepará pa e okashon. E no por a probechá di e momentu i hasi loke tabata korekto. En bes di konfia Señor, el a marchitá dilanti di e mayoria. E pueblo a demandá lo impensabel: “Bin, traha un dios pa nos ku lo bai nos dilanti” (Eks. 32:1, NASB), i el a konsentí. Hende boluntariamente a duna oro pa traha e ídolo, i Aaron no solamente no a stòp nan sino, de echo, el a invitá nan pa duna. Despues el a partisipá den e formashon di e dios falsu akí. Despues, e pueblo a deklará: “Esaki ta bo dios, Israel, ku a sakabo for di e tera di Egipto” (Eks. 32:4, NASB). Asina pekaminoso, malbado i dònferstan. Nan a kaba di fabriká e ídolo akí i despues a deklará ku e, e ídolo, a libra nan. No ta asombroso kon deseonan pekaminoso por pervertí nos pensamentu i akshonnan? Hende ta selebrá nan propio kreashonnan, i nan humanidat i moralidat ta bira degradá den e proseso.

“Un krísis asina tabata demandá un hòmber di firmesa, desishon, i kurashi infleksibel; un ku tabata tene e honor di Dios riba fabor popular, seguridat personal, òf bida mes. Pero e lider aktual di Israel no tabata di e karakter akí. Aaron a diskutí débilmente ku e pueblo, pero su basilashon i timides na e momentu krítiko solamente a hasi nan mas determiná. E bochincha a oumentá. Un furia irasonabel i siegu tabata parse di a tuma poseshon di e multitut. Tabatin algun ku a keda fiel na nan pakto ku Dios, pero e mayor parti di e pueblo a uni den e apostasia. Aaron tabata teme pa su mes seguridat; i en bes di para noblemente pa e honor di Dios, el a sede na e demandanan di e multitut.”—Ellen G. White, Patriarchs and Prophets, p. 316,317.

Kon Aaron, un lider, por tabata asina débil? Den ki formanan Aaron lo por a buska pa hustifiká den su mes kurason su akshonnan teribel?

Idolatria i Maldat

Lesa Eksodo 32:6. Unda nan idolatria a hiba nan rápidamente? (Lesa tambe Salmo 115:4-8; Salmo 135:15-18; Isa. 44:9,10.)

E bisé di oro tabata parse e dios di toro egipsio, yamá Apis, òf dios di baka, yamá Hathor. Esaki tabata un transgreshon flagrante di e promé i di dos mandamentu (Eks. 20:3–6). E violashon akí no por a keda sin ser kastigá pasobra abiertamente el a kibra nan relashon ku e Señor bibu. En bes di adorá nan Kreador, e israelitanan a adorá nan mes kreashon, ku no por a mira, tende, hole, papia, kuida, stima òf dirigí.

E òrdu di Kreashon a ser birá: en bes di komprondé ku nan a ser kreá den imágen di Dios, awor nan a traha un dios, ni sikiera den nan mes imágen, loke lo tabata sufisiente malu, pero den imágen di un animal. Esaki tabata e dios ku nan ker a sirbi? Asina, nan a peka grandemente kontra Señor (Isa. 31:7, Isa. 42:17).

Den ki formanan e apostasia di e bisé di oro ta reflehá loke ta skirbí den Romanonan 1:22–27?

Idolatria ta nenga e komprondementu teológiko ku Dios ta Dios i hende ta hende. Idolatria ta eliminá e abismo entre Dios i hende (Ekl. 5:2) i ta kibra e konekshon kunE. Sea e ta flagrante i habrí òf algu skondí den kurason, idolatria ta kibra nos relashon ku Señor lihé i ta hiba na un spiral moral ku ta baha. No ta nada straño ku e teksto ta papia tokante loke nan a hasi e siguiente dia: despues di a ofresé sakrifisio na e ídolo, despues nan a kuminsá fiesta, den loke Ellen G. White a deskribí komo “un imitashon di e fiestanan idólatra di Egipto.”—Patriarchs and Prophets, p. 320.

Hende ta genio den fabriká nan mes ídolonan. Nan ta krea nan mes diosnan, loke ta sufisiente malu, pero despues nan ta bai i sirbi e diosnan ei. E Kreador ta ser remplasá pa kosnan ku, tardi òf trempan, ta hiba na degenerashon moral.

Korumpiendo Nan Mes

Lesa Eksodo 32:7,8. Dikon Dios a manda Moises bèk na e kampamentu di Israel?

Dor di akudí na un ídolo, e israelitanan tabata den e proseso di divorsiá nan mes for di e Dios berdadero, Esun ku a libra nan for di Egipto. Señor a pone e kulpa dirèkt riba nan, bisando ku nan a “korumpí nan mes” (Eks. 32:7, NKJV), asta akreditando e estatua akí di a libra nan for di Egipto. Ki un kontradikshon direkto na loke Dios a bisa nan (Eks. 20:2)! E nengamentu akí di e presensia di Dios i su aktonan poderoso tabata un asuntu serio. Nan pensamentu i sintimentunan tabata distorshoná i kompletamente korumpí.

Pa profeta Ezekiel, idolatria tabata e núkleo di tur e miseria di e pueblo di Dios, i for di einan ta surgi tur otro piká (lesa, por ehèmpel, Ezek. 8:1–18, Ezek. 20:1–44, Ezek. 22:1–12). Hopi biaha nos ta puntra nos mes dikon kreyentenan antiguo tabata asina ingenuo i inkoregibel ora nan tabata envolví den adorá diferente ídolo trahá pa hende. Nos ta basta sigur ku nos lo no a hasi algu asina nunka. Nos ta realmente liber di ídolonan? E ídolonan di awendia por tin diferente forma i figura, sinembargo nan tin un apelashon similar.

Un ídolo ta algu ku ta remplasá Dios, i aunke nos sa ku e no ta korekto, nos ta ador’é tòg, hopi biaha repetidamente. E ta kapta nos imaginashon, afekto, tempu i mente mas ku Dios. E por asta sklabisá nos pensamentu. De echo, nos ta bira loke nos ta kontemplá, i nos lo no lanta mas haltu ku kualke “dios” ku nos ta sirbi.

Si Dios no ta e sentro di bo bida, e ora ei otro diosnan lo yena Su lugá. Si nos no ta disfrutá i kultivá e Presensia bibu di Dios, nos lo disfrutá i dediká nos bida na algu otro òf un otro hende. Loke nos remplasá pa Kristu por tin diferente aparensia: orguyo, egoismo, plaka, poder, sèks, kuminda, televishon, droga, alkohòl, pensamentunan impuru, pornografia, plaser, trabou, deporte, famia, weganan di video, pelíkula, kompra, ideanan, polítika, músika, posishon, título, grado, etsétera. E lista no tin fin.

Nos ta masha kreativo i inventivo den e sentido akí. Nos por kombertí kualke kos ku ta bon, bunita, i signifikante den un ídolo. Idolatria ta ekstremadamente peligroso pasobra e ta transformá nos personalidat, nos manera di pensa, nos afektonan, i nos bida sosial. E ta kambia nos identidat i ta remplasá relashonnan personal genuino ku interakshonnan bashí i finalmente sin sentido ku, na final, no por salba nos.

Dios Su Furia Hustu

Lesa Eksodo 32:9-29. Kiko tabata Moises su reakshon riba e menasa di Dios pa destruí Israel?

Miéntras ku Moises tabata riba Seru Sinai ainda, Dios a bisa ku E lo a destruí e rebeldenan i hasi Moises su desendientenan un gran nashon. Pero esei no tabata loke Moises tabata ke. En kambio, el a supliká Señor, señalando ku e israelitanan no tabata e pueblo di Moises, nan tabata di Dios. E, Moises mes, no a saka nan for di Egipto, sino Dios a hasié pa medio di Su obranan poderoso. I asina Moises a supliká Dios, enfatisando Su promesanan tempran na e tatanan. Moises tabata trahando berdaderamente komo un intersesor entre Dios i humanidat.

Despues ku “SEÑOR a arepentí di e daño ku El a bisa ku E lo a hasi na Su pueblo” (Eks. 32:14, NKJV), Moises a bolbe serka nan. No tin ningun registro, diferente for di loke lo a sosodé den Eksodo 34:29,30, ku su kara tabata bria dor di e presensia di Señor. Probablemente su kara tabata reflehá su rabia.

“Ora Moises a aserká e kampamentu i a mira e bisé i e baliamentu, su rabia a kima i el a tira e tablanan for di su mannan, kibrando nan na pida pida na pia di e seru” (Eks. 32:19, NIV). Kibra e tablanan ku tabata kontené e Dekálogo tabata un señal eksterno di kibra su kontenido. Dios a reprendé Moises pa esei, pero despues El a ordená Moises pa koba dos tabla ku beitel, pa remplasá “e promé tablanan, ku bo a kibra” (Deut. 10:2, NKJV). Dios Mes lo a bolbe skirbi e mandamentunan.

Moises a reprendé Aaron severamente pa a someté na e demandanan di e pueblo. “Kiko e hendenan akí a hasi ku bo, ku bo a hiba nan den un piká asina grandi?” (Eks. 32:21, NIV). Aaron a purba diskulpá su transgreshon dor di

1. kulpa otronan, i
2. pa medio di magia: “Mi a tir’é [e oro] den kandela, i e bisé akí a sali!” (Eks. 32:24, NIV).

Loke a hasi e asuntunan pió tabata ku Aaron mes a ser honrá grandemente dor di Dios, despues di a ser duná hopi privilegio, ku a inkluí bai riba e seru huntu ku Moises i e 70 ansianonan (Eks. 24:1).

Ki un ironia skur! Dor di pretendé ku un milager a sosodé, Aaron ker a gaña su ruman (nota kon un piká ta hiba na un otro; den e kaso akí, idolatria na mentira). Sinembargo, Moises no a ser gañá ora el a mira kon salbahe e pueblo a komportá nan mes. E konsekuensianan negativo tabata evidente, i Moises mester a stòp e rebelion inmediatamente.

Interseshon

Lesa Eksodo 32:30-32. Kon leu Moises a bai den su orashon intersesorio pa pekadornan?

Pa motibu di nan rebelion, kosnan teribel a sosodé den e kampamentu israelita, inkluyendo morto di hopi hende (Eks. 32:28). E siguiente dia, Moises a deklará na e pueblo: “Boso a kometé un piká grandi. Asina, awor mi ta subi bai serka SEÑOR; kisas mi por hasi ekspiashon pa boso piká” (Eks. 32:30, NKJV).

“Moises a bai bèk serka SEÑOR i a bisa: ‘O, ki un piká grandi e hendenan akí a kometé! Nan a traha pa nan mes diosnan di oro. Ma awor, por fabor, pordoná nan piká, pero si no, kitami antó for di e buki ku Bo a skirbi” (Eks. 32:31,32, NIV).

No ta straño ku Moises ta ser konsiderá di ta un tipo di Kristu! Pa motibu di su orashon intersesorio pa pekadornan i su boluntat pa ofresé su propio bida pa nan, siguramente el a reflehá loke Kristu lo a hasi pa nos tur. Ki un kompashon ehemplar pa transgresornan! El a demostrá su dedikashon total na Señor i Su amor sakrifisial pa hende. E buki di Eksodo no ta indiká kon largu Moises a keda ku Señor riba e seru e biaha partikular akí, pero e buki di Deuteronomio ta revelá ku e tabata riba Sinai e biaha akí pa 40 dia (lesa Deut. 9:18).

Den Eksodo 32:32, e palabra tradusí “pordoná” ta di un verbo ku su nifikashon básiko ta “pordoná” òf “karga,” manera den Isaias 53:4, ku ta bisa (tokante Hesus): “Siguramente El a karga nos tristesanan” (NKJV). E ta e mesun verbo, tradusí “pordoná” den Eksodo 32:32, i “karga” den Isaias 53:4. Ki un bista poderoso den e proseso di salbashon i pordon i kiko a kosta Dios pa salba nos.

En bèrdat, Moises tabata pidiendo Señor pa “pordoná” e piká di e pueblo, loke naturalmente ta loke El a hasi na krus miles di aña despues. Eksodo 32:32 ta mustra no solamente e idea di ekspiashon supstitushonario sino tambe ken ta hasi e supstitushon: Dios Mes.

E teksto akí ta mustra kon pordon ta bini. Dios den Kristu a karga nos pikánan, e úniko manera ku nos por a ser pordoná di nan. Ki un ekspreshon poderoso di e plan di salbashon i un demostrashon pa nos i pa e kòsmòs tokante kiko a kosta Dios pa salba nos.

Lesa Ellen G. White, “Idolatry at Sinai,” p. 315–327, den Patriarchs and Prophets.

E lès di e siman akí ta presentá un enfoke spesial riba e obra di Dios den kreyentenan. Señor por hasi den nos “inkontablemente mas ku tur loke nos ta pidi òf imaginá” (Efe. 3:20, NIV). Nos no mester enfoká riba nos mes i satisfasé nos deseonan personal, pasobra esaki ta hiba na idolatria. En kambio, nos atenshon mester ta riba Dios i Su poder. E ta duna e fortalesa, ku ta hiba na un bida nobo i viktorioso (Fil. 4:13; Hudas 1:24,25).

“Amor no ménos ku hustisia a demandá ku pa e piká akí huisio mester ser diktá. Dios ta e vigilante i tambe e soberano di Su pueblo. E ta kòrta kita esnan ku ta determiná riba rebelion, pa nan no hiba otronan na ruina. Ora El a spar e bida di Cain, Dios a demostrá na universo kiko lo tabata e resultado di pèrmití piká keda sin ser kastigá. E influensia ehersé riba su desendientenan pa medio di su bida i siñansa a hiba na e estado di korupshon ku a demandá e destrukshon di henter mundu atraves di un diluvio.... Mas largu hende a biba, mas korupto nan a bira. Asina tabata ku e apostasia na Sinai. A ménos ku kastigu a ser ehekutá rápidamente riba transgreshon, e mesun resultadonan lo a ser mirá atrobe.”—Ellen G. White, Patriarchs and Prophets, p. 325.

Preguntanan pa Diskushon: