E Tabernakel

Lesa pa e Estudio di e Siman Akí:

Versíkulo di Memoria:

“E ora ei e nubia a tapa e tènt di reunion, i e gloria di SEÑOR a yena e tabernakel.... Pasobra e nubia di SEÑOR tabata riba e tabernakel di dia, i kandela tabata riba dje anochi, den bista di henter e kas di Israel, durante tur nan biahenan” (Eks. 40:34,38, NKJV).

E tarea prinsipal di e pueblo di Dios den Tèstamènt Bieu (komo tambe pa nos awe) tabata pa biba den relashon estrecho ku Señor; pa adorá i sirbiE; i, tambe, pa presentá e kuadro korekto di Dios na otronan (Deut. 4:5–8).

Den e Hòfi di Eden, Adam i Eva a skonde pa Dios pasobra nan piká a pone nan tin miedu di djE. Pekaminosidat ta pone hende tin miedu di Dios di forma natural, i e miedu akí ta trose nos interpretashon di Su karakter. E bon notisia ta ku Dios ta dal e promé paso pa superá e kiebro akí i, riba Su inisiativa, E ta drecha e abismo i e relashon kibrá. E ta yama e pekador bèk serka djE: “Unda bo ta?” (Gen. 3:9, NKJV).

Pues, nos mishon prinsipal ta pa presentá e karakter korekto di Dios i Su aktonan amoroso i hustu na esnan rònt di nos. Ora hende ta atraé na Dios i ta konvensí di Su amor apnegá pa ku nan, nan lo duna nan bida na djE i obedesé loke E ta bisa nan hasi, sabiendo ku esei ta pa nan mes bon.

E santuario a demostrá e serkania di Dios na humanidat i a revelá e bèrdatnan di mas grandi na nan, ku ta kon E ta salba esnan ku ta bini serka djE den fe.

E Sabat di Señor

Maske kuantu esnan ku ta kontra di e Sabat di e di shete dia argumentá, falsamente, ku e tabata pa e hudiunan so (e di shete dia a ser apartá i santifiká den Eden [lesa Gen. 2:1–3]); òf nan ta argumentá, falsamente, ku e hudiunan a tende di dje pa promé biaha na Sinai (e hudiunan tabata warda e Sabat promé ku Sinai [lesa Eks. 16:22–29]), no tin duda ku e Sabat tabata masha hopi un parti di bida di e pueblo hebreo for di kuminsamentu.

Lesa Eksodo 35:1-3. Ki bèrdat a ser ripití na e pueblo akinan den konteksto di konstrukshon di e santuario?

E Sabat i su mensahe tabata, ta, i semper lo ta tokante Dios, ken E ta i kiko Su obranan poderoso ta. E Sabat ta rekordá nos di Su aktonan kreativo i salbador i ta enfoká nos atenshon riba Dios, kende ke biba huntu ku Su pueblo. Di e manera akí, e Sabat i e santuario ta mustra den e mesun direkshon: e presensia di Dios den nos bida.

E Sabat di e iglesia di Tèstamènt Bieu ta transmití un mensahe múltiple. Un hende por resumí su esensia den sinku punto krusial:

1. Dios ta e Kreador, i Beibel ta habri ku e proklamashon impreshonante i di piedra di skina akí (Gen. 1:1). E monumentu konmemorativo bibu di e kreashon di Dios ta e Sabat (Gen. 2:2,3; Eks. 20:8–11). For di e bèrdat akí, Dios komo nos Kreador, tur otro bèrdat bíbliko ta sali.
2. E Mesias lo bini, i e speransa akí ta sentra riba e promesa di Dios di e Simia, kende lo a vense e kolebra (Satanas) i trese viktoria riba maldat.
3. Dios lo establesé Su reino, i e Sabat ta su antisipo.
4. Salbashon ta bini di Señor, i e pueblo di Dios ta testifiká ku Dios ta nan Salbador i Redentor i ku salbashon ta bini komo resultado di Su grasia i Su grasia so.
5. Dios ta e Hues supremo di tur hende. Esnan ku persistentemente ta desafi’E i neng’E lo no tin futuro, ma E ta duna bida eterno libremente na esnan ku ta siguiE.

Hudiunan tin un dicho: Mas ku Israel a warda Sabat, Sabat a warda Israel. Aunke nos komo atventistanan probablemente lo no a ekspres’e asina, ki ròl importante e Sabat tin den bida di nos famia di iglesia?

Ofrendanan i e Spiritu

Lesa Eksodo 35:4–36:7. Ki lèsnan importante tin aki pa nos awe?

Un abundansia di vários materialnan presioso tabata nesesario pa traha e tabernakel, i esei a ser lográ mediante donashonnan generoso di e pueblo di Dios, ku a duna for di fondo di nan kurason, boluntariamente i ku goso. Nan a duna oro, plata, bròns, lino fini, piedranan presioso, telanan úniko, palu di akasia, zeta di oleifi, speserei, i hopi otro artíkulonan nesesario. Hende a duna nan trabou tambe pasobra hopi opheto spesífiko mester a ser trahá atraves di nan trabou artístiko i diligente riba e tènt òf su mobilario. Tambe, sastrenan mester a tehe paña pa e saserdotenan, ku lo tabata sirbi den e tabernakel, i pa e sumo saserdote, kende su bistínan masha elaborá tabata inkluí un pechero i turbante.

Dios a bendishoná e israelitanan abundantemente pa medio di e regalonan ku e egipsionan a duna nan na nan salida for di Egipto. Awor tabata nan oportunidat pa duna ofrendanan di gratitut pa e liderazgo mizerikòrdioso i poderoso di Dios, i nan kurason a ser konmoví pa kumpli ku e trabou akí na Su gloria.

E pueblo tabata dunando ku asina goso i abundansia ku Moises a ser bisá: “E pueblo ta tresiendo mas ku sufisiente” (Eks. 36:5, NIV). Asina, Moises mester a stòp nan donashonnan “pasobra loke nan tabatin kaba tabata mas ku sufisiente pa hasi tur e trabou” riba e tabernakel (Eks. 36:7, NIV).

Pa medio di e guia di Spiritu Santu, Dios a ekipá i empoderá e pueblo pa konstruí e tabernakel ku eksaktitut. Bezalel, Aholiab, i otronan tabata “yená . . . ku e Spiritu di Dios” (Eks. 35:31, NKJV ), loke ta nifiká ku nan tabata dotá ku abilidatnan, sabiduria, i konosementu artístiko pa hasi tur e trabou perfektamente. E tabata un proyekto enorme i mester a ser kreá eksaktamente di akuerdo ku e modelo ku Dios a mustra Moises.

Ta signifikante ku e don di Spiritu Santu tabata relashoná ku e diferente kapasidatnan i abilidatnan di hende, ku mester a ser usá den konstrukshon di e tabernakel. Pa ta yená ku e Spiritu no ta un proseso mágiko i no ta nifiká ku forsanan spiritual spesial ta denter di hende. Pa avansá e kousa di Dios i kumpli ku Su mishon, Dios ta empoderá Su siguidónan pa kumpli ku Su ophetivonan i pa hasié bon.

E Tabernakel Konstruí

Blader dor di Eksodo 36:8–39:31. Dikon bo ta kere ku instrukshonnan asina eksplísito a ser duná? Kiko esaki ta siña nos tokante kon Dios ta preokupá ku kada detaye?

Moisés a konstruí e tabernakel kuidadosamente, i e instrukshonnan ku el a risibí riba Seru Sinaí a ser implementá diligentemente. E teksto bíbliko ta enumerá lo siguiente:

1. e tabernakel ku su diferente telanan, kortinanan i partinan (Eks. 36:8–38);
2. e arka (Eks. 37:1–9);
3. e mesa pa e pan di presentashon (Eks. 37:10–16);
4. e kandelar (Eks. 37:17–24);
5. e altar di sensia (Eks. 37:25–29);
6. e altar di ofrenda kimá (Eks. 38:1–7);
7. e baki pa laba (Eks. 38:8);
8. e plenchi (Eks. 38:9–20); i
9. e material usá pa e tabernakel (Eks. 38:21–31).

Eksodo 39 ta sigui ku e deskripshonnan di e efòd, pechero i otro piesanan di paña saserdotal.

E sirbishinan di e tabernakel tabata lèsnan ophetivo visual di e evangelio, demostrando henter e plan di redenshon di Dios. E vários seremonianan tabata deskribí

1. kon Dios ta aboresé i ta trata ku piká,
2. kon E ta salba hende arepentí,
3. kiko ta e destino di e malbadonan, i
4. kon E lo sigurá un futuro glorioso ku lo ta sin maldat.

Dos sirbishi diferente pero estrechamente relashoná a ser realisá den e santuario durante aña: esun diario i esun anual. E ministerio di dos fase akí tabata ilustrá kon Dios ta trata piká i ta salba pekadornan. Pa medio di e sirbishinan di santuario diario, Dios a sigurá esnan ku a arepentí ku El a pordoná nan pikánan i mizerikòrdiosamente a ofresé nan salbashon. Pa risibí e don di salbashon akí, un sakrifisio mester a ser hasí, i e sakrifisionan akí tabata mustra na e morto di e Mesias, kende su sanger “ta limpia nos di tur piká” (1 Juan 1:7, NKJV). Konfeshon di piká i aseptá e mantel di hustisia di Kristu tabata na sentro di e don akí (Salmo 32:1,2). Di e manera akí, e pekador arepentí tabata ser sigurá pordon i por a regosihá den salbashon.

E sirbishi anual, realisá riba e Dia di Ekspiashon, tabata demostrá kon Dios ta eradiká piká, ta resolvé e problema di piká, i ta sigurá e futuro sin piká (Levítiko 16, Juan 1:29). Aktualmente, e ministerio dòbel di Kristu den e santuario selestial ta un otro ekspreshon di e obra di Dios pa nos (Hebr. 7:25) i lo trese e solushon final pa e problema di maldat (Dan. 7:13,14, 22,27; Dan. 8:14; Rev. 21:4).

E Presensia di Dios den e Tabernakel

Lesa Eksodo 40:1-38. Kon e israelitanan tabata diserní e presensia di Dios?

E último kapítulo di Eksodo (Eksodo 40) ta deskribí e dedikashon di e tabernakel i e regalo di e Dekálogo. E dedikashon di e tabernakel tabata e suseso kulminante di Israel na Sinai.

E gloria di Dios ta Su santidat, Su karakter, i Su presensia amoroso, ku ta bondat mes (Eks. 3:5; Eks. 33:18,19). Su presensia a yena e tabernakel i tabata visibel komo e nubia, e gloria di Shekinah. E buki di Eksodo ta terminá ku e énfasis riba e presensia guiadó di Dios, den e nubia di Señor di dia, i den e nubia di kandela anochi. Na un manera masha real i poderoso, e pueblo hebreo mester a eksperensiá no solamente e realidat di Dios sino tambe Su presensia serkano i permanente segun ku E tabata guia nan.

Moises a lanta e tabernakel riba e promé dia di e promé luna den e di dos aña (Eks. 40:2,17). Tambe el a konsagrá tur kos, inkluso Aaron i su yu hòmbernan na e saserdosio (Eks. 40:9,13–15), ku zeta di unshon. El a pasa dor di e Lugá Santísimo, e Lugá Santu, i e patio, dedikando nan tur na Señor. Pa medio di e proseso akí, el a inougurá e sirbishinan pa henter e santuario (tambe lesa Num. 7:1). Solamente durante e inougurashon di e tabernakel Moises por a drenta e Lugá Santísimo; despues di esei, e sumo saserdote so por a ministrá einan tur aña riba e Dia di Ekspiashon (Lev. 16:2,17).

Na tres okashon, e teksto bíbliko ta deklará ku e trabou tabata kla:

1. na fin di e siman di Kreashon, Dios ta enfatisá e finalisashon di Su obranan kreativo (Gen. 2:1–3);
2. na finalisashon di e tabernakel, e teksto bíbliko ta deklará: “Asina Moises a terminá e trabou” (Eks. 40:33); i
3. e ta ser ekspresá tambe ora Salomon a terminá e trabou riba e tèmpel (1 Reinan 7:51).

E konekshon akí entre e Kreashon i e santuario di Israel ta mustra riba e dimenshon kósmiko, e tempu ora Señor lo biba huntu ku e redimínan riba e tera nobo den e Jerusalèm Nobo, ku ta “e Tabernakel di Dios” (Rev. 21:2, 3; kompará ku Rev. 22:1–4).

E echo ku Dios a yena e tabernakel ku Su presensia (Eks. 40:34) tabata e gran kulminashon di e susesonan ku a kuminsá ku nasementu di Moises i a sigui ku e derota di e diosnan egipsio durante e 10 plaganan, ku e huida for di Egipto, ku e derota di e ehérsito egipsio, i, finalmente, ku e revelashonnan di Dios riba Seru Sinai.

Hesus a Biba Huntu Ku Humanidat

Lesa Juan 1:14. Kon e enkarnashon di Kristu ta ser kompará ku e tabernakel?

E enkarnashon di Hesus ta un misterio komo tambe un siensia eksklusivo ku e redimínan lo studia durante henter eternidat. Apòstel Juan ta deklará ku Kristu, dor di tuma riba Su mes nos kurpa, a revelá ku E ta biba huntu ku nos na un manera tangibel. Hesus aki den karni ta parse e Dios di Tèstamènt Bieu, kende a biba huntu ku e israelitanan den e tabernakel na Sinai i den desierto segun ku nan tabata biaha pa e Tera Primintí.

Durante Su enkarnashon, Hesus a biba huntu ku humanidat. Ki un konseshon insondabel! E Dios eterno ta baha bin serka nos, komo un di nos, pa asina sigurá nos ku E ta berdaderamente “Immanuel, Dios ku nos.”

Den Mateo 18:20, Hesus a bisa ku si dos òf tres ta reuní den Su nòmber, E lo ta einan meimei di nan. Kristu ta huntu ku Su pueblo pa medio di e presensia di Spiritu Santu. Kristu ta invitá Su siguidónan pa ta den relashon estrecho kunE: “Mira, Mi ta para na porta i ta bati. Si kualke hende tende Mi bos i habri porta, lo Mi drenta serka dje i kome kuné, i e ku Mi’ ” (Rev. 3:20, ESV).

Lesa Revelashon 21:1–3. Kiko ta ser presentá na nos aki?

E Jerusalèm Nobo lo baha for di shelu na tera, i Juan ta deklará: “Mira, e tabernakel di Dios ta serka hende, i E lo biba serka nan, i nan lo ta Su pueblo. Dios Mes lo ta ku nan i lo ta nan Dios” (Rev. 21:3, NKJV). No tin tèmpel den e Jerusalèm Nobo (Rev. 21:22) pasobra henter e stat ta e tèmpel, e santuario di Dios. E largura, hanchura, i haltura di e stat ta igual (Rev. 21:16) meskos ku e tabata ku e Lugá Santísimo den e santuario, ku tabata den forma di un kubo, ku tur banda igual. Pa eternidat, den un mundu sin piká, morto, òf sufrimentu, nos lo biba den e presensia inmediato di nos Dios.

Lesa Ellen G. White, “The Tabernacle and Its Services,” p. 353–358, den Patriarchs and Prophets.

“E konstrukshon di e santuario a ser presedé pa un akto divino di redenshon, esta, e liberashon di Israel for di e poder opresivo di Egipto. Esaki, na su turno, a ser siguí pa e boluntat di Dios pa drenta den un relashon di pakto permanente ku Su pueblo. E lo tabata nan Dios, i nan lo a bira Su pueblo (Eks. 6:7). E manera ku nan lo a relashoná kunE i ku otro tabata definí dor di e lei di pakto. E tabernakel tabata en bèrdat un lugá di reunion, un lugá kaminda Dios i hende tabata bini huntu. Tabata solamente despues di redenshon i e establesimentu di union permanente ku Dios mediante e pakto ku e pueblo tabatin akseso na Dios den Su lugá di biba.”—Andrews Bible Commentary: Old Testament, “Exodus” (Berrien Springs, MI: Andrews University Press, 2020), p. 226.

Mientrastantu, Ellen G. White ta deskribí e propósito di e sirbishinan di santuario: “Asina den e ministrashon di e tabernakel, i di e tèmpel ku despues a tuma su lugá, e hendenan tabata ser siñá kada dia e gran bèrdatnan relashoná ku e morto i ministerio di Kristu, i un biaha pa aña nan mente tabata ser hibá padilanti na e susesonan final di e gran konflikto entre Kristu i Satanas, e purifikashon final di universo for di piká i pekadornan.”—Patriarchs and Prophets, p. 358.

Preguntanan pa Diskushon: