Sorprendí pa Grasia

Lesa pa e Estudio di e Siman Akí:

Versíkulo di Memoria:

“Pa medio di fe e prostituta Rahab no a peresé huntu ku esnan ku no a kere, ora el a risibí e spionnan ku pas” (Hebreonan 11:31, NKJV).

Dikon mi a hasi esaki atrobe?” Kisas nos tur a yega di pronunsiá e palabranan akí. Al fin i al kabo, historia no solamente ta ripití su mes, sino humanidat en general tambe ta hasié, i nos mes en partikular. Kuantu biaha nos ta ripití e mesun erornan!

Israel tin un di dos chèns di drenta e Tera Primintí, i Josué ta tuma e mishon akí na serio. E promé paso ta pa tin un komprondementu kla di loke nan ta enfrentá. E ta manda dos spion bai pa trese informashon balioso p’é tokante e tera: su sistema di defensa, preparashon militar, suministro di awa, i e aktitut di e poblashon enfrente di un forsa invasor.

Un hende lo pensa ku e promesa di Dios di duna e tera na e israelitanan no a rekerí ningun esfuerso di nan. Sinembargo, e siguransa di sosten divino no ta surpasá responsabilidat humano. Israel ta para na frontera di Canaan pa di dos biaha. Ekspektativanan ta haltu, pero e último biaha ku Israel tabata na frontera i tabatin e mesun tarea, el a resultá den un frakaso horibel.

E siman akí, nos lo eksplorá dos di e storianan di mas fasinante di e buki di Josué i deskubrí nan relevansia pa nos fe awe. E grasia di Dios tin posibilidatnan infinito pa sorprendé nos.

Segundo Oportunidat

Lesa Josué 2:1, huntu ku Numbernan 13:1-2,25-28 i 33; i Numbernan 14:1-12. Dikon Josué lo a kuminsá e mishon di konkistá e Tera Primintí dor di manda spion?

E lugá for di kua e dos spionnan ta ser mandá, Acacia Grove (NKJV), ta ser yamá “Shittim” den e teksto hebreo, i e ta rekordá nos di dos episodio negativo di e historia di Israel.

E promé ta un otro storia di spion (lesa Numbernan 13) ku e mesun elementonan esensial: e enkargo di e spionnan; e invashon sekreto di e spionnan den teritorio enemigu; e regreso di e spionnan; e rapòrt di e spionnan riba nan deskubrimentunan; i e desishon pa aktua basá riba e rapòrt.

E otro insidente na Shittim ta representá un di e violashonnan di e pakto mas desafiante i idólatra dor di e israelitanan, ora, riba instigashon di Balaam, nan a kometé un libertinahe ku e muhénan moabita i a adorá nan diosnan (Num. 25:1-3, Num. 31:16). Den e konteksto akí, e nòmber Shittim ta krea un tenshon eksepshonal pa loke ta trata e resultado di henter e storia. Lo e ta un otro frakaso na frontera di e Tera Primintí? Of lo e hiba na e kumplimentu tan sperá di e promesa antiguo?

Lesa Juan 18:16-18,25-27, i Juan 21:15-19. Ki paralelonan bo ta deskubrí entre e di dos chèns duná na Israel komo nashon i na Pedro komo persona?

Dios ta un Dios di segundo oportunidat (i mas!). Beibel ta yama e segundo oportunidat (i mas!) “grasia.” Grasia ta simplemente risibí loke nos no meresé. E siñansa di Beibel ta yen di e konsepto di grasia (kompará ku Rom. 5:2, Efe. 2:8, Rom. 11:6). Dios mizerikòrdiosamente ta ofresé tur hende e posibilidat di un komienso nobo (Tito 2:11-14). Pedro mes a eksperensiá e grasia akí i a urgi e iglesia pa krese den grasia (2 Pe. 3:18). I e notisia ta bira mihó ainda: nos ta haña muchu mas ku un segundo oportunidat, no ta bèrdat? (Unda nos lo tabata si nos no tabata haña esaki?)

Pensa riba e eksperensia di e israelitanan, ora nan a haña un segundo oportunidat pa drenta Canaan, i riba e grasia ekstendé na Pedro despues ku el a nenga su Señor. Kiko e insidentenan akí mester siña nos tokante kon nos mester ekstendé grasia na esnan ku tin mester di dje?

Balor na Lugánan Inesperá

Lesa Josué 2:2-11, Hebreonan 11:31, i Santiago 2:25. Kiko e tekstonan akí ta bisa nos tokante Rahab?

Sentral den e storia di Rahab ta e mentira ku a ser kontá pa protehá e spionnan. Ora nos konsiderá su mentira, nos tin ku realisá ku e tabata enkapsulá den un sosiedat ku tabata ekstremadamente pekaminoso, loke finalmente a hiba na e desishon di Dios pa husga e sosiedat ei (Gen. 15:16, Deut. 9:5, Lev. 18:25-28). Miéntras ku ta bèrdat ku Tèstamènt Nobo ta elogiá su fe, un análisis kuidadoso di e referensianan di Tèstamènt Nobo na e akto di Rahab ta revelá ku niun ta apoyá tur kos tokante di dje, i niun ta validá su mentira.

Hebreonan 11:31 ta konfirmá su fe ora el a tira su suerte ku e spionnan en bes di skohe pa tene duru na un kultura korupto. Santiago 2:25 ta elogiá su oferta di alohamentu na e dos spionnan israelita i pa duna nan instrukshon riba kon regresá atraves di un ruta safe. Meimei di un kultura dekadente i korupto i Rahab su propio estilo di bida pekaminoso, Dios, den Su grasia, a mira un chispa di fe pa medio di kua E por a salb’é. Dios a usa loke tabata bon den Rahab, ku tabata fe manifesto den djE i den su eskoho pa pertenesé na Su pueblo, pero nunka a elogiá tur loke el a hasi. Dios a balorá Rahab pa su kurashi eksepshonal, pa su fe balente, pa ta un agente di salbashon i pa a skohe e Dios di Israel.

Despues di a mira kiko tabata pasando, el a deklará: “Pasobra SEÑOR boso Dios, E ta Dios den shelu ariba i riba tera abou” (Jos. 2:11, NKJV). Ta signifikante pa tende un muhé kananeo rekonosé ku Yahweh ta e úniko Dios, spesialmente riba un dak kaminda, den su religion pagano, orashonnan tabata ser ofresé generalmente na loke nan tabata kere ku tabata deidatnan selestial.

E ekspreshon di Rahab ta ser hañá anteriormente solamente den konteksto di e derecho eksklusivo di Dios pa risibí adorashon (Eks. 20:4, Deut. 4:39, Deut. 5:8). Su palabranan ta duna testimonio di un eskoho konsiente i premeditá pa rekonosé ku e Dios di e israelitanan ta e úniko berdadero deidat. Su konfeshon ta demostrá su komprondementu di e relashon estrecho entre e soberania di Dios i e huisio bou di kua Jeriko ta kondená.

Su eskoho moral ta rekonosé ku, den lus di e huisio di Yahweh, tabatin solamente dos posibilidat: pa sigui den rebelion kontra djE i ser anikilá, òf pa skohe pa someté den fe. Dor di skohe e Dios di e israelitanan, Rahab a bira un ehèmpel di loke por tabata e destino di tur e habitantenan di Jeriko si nan a bira na e Dios di Israel pa mizerikòrdia.

Lealtat Nobo

Lesa Josué 2:12-21 i Eksodo 12:13-22,23. Kon e tekstonan na Eksodo ta yudabo komprondé e akuerdo entre e spionnan i Rahab?

E akuerdo di Rahab ta hopi kla: bida pa bida i bondat pa bondat. E palabra cḥesed (Jos. 2:12), “bondat amoroso,” tin un rikesa di nifikashon ku ta difísil pa ekspresá ku un solo palabra den otro idiomanan. E ta referí prinsipalmente na lealtat di pakto, pero e ta karga tambe e noshon di fieldat, mizerikòrdia, benevolensia, i bondat.

E palabranan di Rahab ta rekordá tambe Deuteronomio 7:12, kaminda Yahweh Mes a hura di warda Su cḥesed pa ku Israel. “E ora ei lo sosodé, pasobra bo ta skucha na e huisionan akí, i warda i hasi nan, ku SEÑOR bo Dios lo warda pa ku bo e aliansa i e mizerikòrdia [cḥesed] ku El a hura na bo tatanan” (Deut. 7:12, NKJV).

Ta interesante pa bisa ku, e mesun kapítulo (Deuteronomio 7) ta preskribí e maldishon (cḥerem) riba e kananeonan. Ata Rahab akí, un kananeo ku ta bou di e maldishon, i tòg e ta reklamá, pa medio di su fe emergente, e promesanan ku a ser duná na e israelitanan. Komo resultado, e ta ser salbá.

E promé imágen ku inevitablemente ta bini na mente relashoná ku e kombersashon di e spionnan ku Rahab ta e Pasku na Eksodo. Einan, pa e israelitanan por a ser protehá, nan mester a keda paden di nan kasnan i marka e kozein di porta di nan kasnan ku e sanger di e lamchi di sakrifisio.

“Awor e sanger lo ta un señal pa boso riba e kasnan kaminda boso ta. I ora Mi mira e sanger, lo Mi pasa boso forbei; i e plaga lo no ta riba boso pa destruí boso ora Mi dal e tera di Egipto” (Eks. 12:13, NKJV; lesa tambe Eks. 12:22-23). “Pa medio di obediensia e pueblo mester a duna evidensia di nan fe. Pues tur ku ta spera di ser salbá atraves di e méritonan di e sanger di Kristu mester realisá ku nan mes tin algu di hasi pa sigurá nan salbashon. Miéntras ku ta Kristu so por redimí nos for di e kastigu di transgreshon, nos mester bira for di piká pa obediensia. Hende mester ser salbá pa medio di fe, no pa medio di obranan; sinembargo, su fe mester ser demostrá atraves di su obranan.”—Ellen G. White, Patriarchs and Prophets, p. 279.

Den e kaso ei, e sanger tabata un señal ku a salba nan for di e angel destruktor di Dios. Manera Dios a spar bida di e israelitanan durante e último plaga na Egipto, e israelitanan mester a salba Rahab i su famia ora destrukshon a yega Jeriko.

Balornan Konfliktivo

Lesa Josué 9:1-20. Kiko ta e similaridatnan i diferensianan entre e storia di Rahab i esun di e gibeonitanan? Dikon nan ta signifikante?

E kapítulo akí di Josué ta kuminsá ku informá nos ku e reinan kananeo ku normalmente tabata goberná riba stat-estadonan chikitu a disidí di krea un koalishon kontra e israelitanan. Kontrali na esei, e habitantenan di Gibeon a disidí di establesé un pakto ku Israel.

Pa gaña e israelitanan pa sera un pakto ku nan, e gibeonitanan a rekurí na e plan di ta embahadornan for di un pais strañero. Segun Deuteronomio 20:10-18, Dios a hasi un distinshon entre e kananeonan i e hendenan ku tabata biba pafó di e Tera Primintí.

E palabra tradusí komo “ku astusia” por ser usá ku un nifikashon positivo, denotando prudensia i sabiduria (Prov. 1:4; Prov. 8:5-12), òf negativamente, implikando intenshon kriminal (Eks. 21:14, 1 Sam. 23:22, Salmo 83:3). Den kaso di e gibeonitanan, tras di nan akshon traishonero tin un intenshon ménos destruktivo di preservashon propio.

E abla di e gibeonitanan ta remarkablemente similar na esun di Rahab. Tur dos ta rekonosé e poder di e Dios di Israel, i tur dos ta rekonosé ku e éksito di Israel no ta simplemente un hazaña humano. Kontrali na otro kananeonan, nan no ta rebeldiá kontra e plan di Yahweh pa otorgá e tera na e israelitanan, i nan ta atmití ku Señor Mes ta kore ku e nashonnan akí dilanti di Israel. E notisia di e liberashon for di Egipto, i e viktorianan riba Sihon i Og, ta insitá tantu Rahab komo e gibeonitanan pa buska un aliansa ku e israelitanan. Sinembargo, en bes di rekonosé plenamente nan boluntat pa someté na e Dios di Israel, manera Rahab ta hasi, e gibeonitanan ta rekurí na un triki.

E lei di Moises a hasi provishonnan pa siña e boluntat di Dios den kasonan manera esaki (Num. 27:16-21). Josué mester a puntra pa e boluntat di Señor i evitá e engaño di e gibeonitanan.

E deber fundamental di un lider teokrátiko, i di kualke lider kristian, ta pa buska e boluntat di Dios (1 Kron. 28:9; 2 Kron. 15:2; 2 Kron. 18:4; 2 Kron. 20:4). Dor di neglishá esaki, e israelitanan tabata obligá sea pa violá e kondishonnan fundamental di konkistá e tera òf pa kibra un huramentu hasí den nòmber di Señor, loke tabata igualmente obligatorio.

Grasia Sorprendente

Lesa Josué 9:21-27. Kon e solushon di Josué a kombiná hustisia ku grasia?

Asta si e pueblo di Israel ker a ataká e gibeonitanan, nan lo no a ser pèrmití pa bai p’e pa motibu di e huramentu ku e gobernantenan di e kongregashon a hura. E lidernan israelita a aktua segun e prinsipio ku un huramentu, tanten ku e no ta envolví mal komportashon òf intenshon kriminal (Huesnan 11:29-40), ta obligatorio, asta si e ta hiba na daño personal di un hende.

Den Tèstamènt Bieu, ta prudente promé ku hasi un huramentu, i kumplimentu di bo huramentu, ta ser mirá komo birtutnan di esun piadoso (Salmo 15:4; Salmo 24:4; Ekl. 5:2-6). Pa motibu ku e huramentu a ser hasí den nòmber di SEÑOR, e Dios di Israel, e lidernan no por a kambia esaki.

Ku e huramentu solèm tumá dor di e lidernan di Israel, e destino di Israel tabata indisolublemente konektá na esun di e gibeonitanan. De echo, pa medio di nan designashon komo kòrtadónan di palu i kargadónan di awa pa e kas di Dios (Jos. 9:23), e gibeonitanan a bira parti integral di e komunidat di adorashon di Israel. E kontesta di Josué, kontrali na e veredikto di e gobernantenan di Israel, ku a dekretá supordinashon pa “henter e kongregashon” (Jos. 9:21, NKJV), a transformá e maldishon den un potensial bendishon pa e gibeonitanan (kompará ku 2 Sam. 6:11).

E historia siguiente di Gibeon ta duna testimonio di e privilegionan religioso haltu ku e stat tabata disfrutá di dje, komo tambe di nan lealtat na e pueblo di Dios. E promesa ku Israel a hasi a keda válido atraves di generashonnan, di manera ku ora e israelitanan a regresá for di e koutiverio babilóniko, e gibeonitanan tabata entre esnan ku a yuda rekonstruí Jerusalèm (Neh. 7:25). Nan akshonnan lo tin konsekuensianan eternamente positivo pero solamente pa motibu di e grasia di Dios.

Kiko lo por a pasa si e gibeonitanan a revelá nan identidat i a pidi mizerikòrdia manera Rahab a hasi? Nos no sa, pero nos no por deskartá e posibilidat ku asta un konsulta di e boluntat di Dios por a resultá den un eksonerashon di e gibeonitanan for di destrukshon. E propósito final di Dios no ta pa kastigá pekadornan sino pa mira nan arepentí i pa otorgá nan Su mizerikòrdia (kompará ku Ezek. 18:23 i Ezek. 33:11). E triki di e Gibeonitanan mester ser persibí komo un apelashon na e mizerikòrdia di Dios, na Su karakter amabel i hustu. Tabata e rechaso di e kananeonan pa arepentí i nan desafio di e propósitonan di Dios ku a hiba na e desishon pa nan destrukshon (Gen. 15:16). Dios a honra e rekonosementu di Su supremasia dor di e gibeonitanan, komo tambe nan deseo pa pas mas bien ku rebelion, i nan boluntat pa bandoná idolatria i pa adorá e úniko Dios berdadero.

Lesa Ellen G. White, “Crossing the Jordan,” p. 482, 483, den Patriarchs and Prophets.

Despues di e storia akí di Rahab i e spionnan, e restu di Tèstamènt Bieu ta ketu tokante di dje te ora e surgi atrobe den e genealogia di Hesus. Ta ser deklará ku el a bira esposa di Salomon, di e tribu di Judá, e antepasado di Boaz, i e suegra di un otro muhé remarkabel menshoná den e mesun genealogia, Ruth (Mat. 1:5; kompará ku Ruth 4:13-21). Pa medio di su fe den Dios, e prostituta di Jeriko, kondená na destrukshon total, ta bira un konekshon signifikante den e liña real di David i un antesesor di e Mesias. Esaki ta loke Dios por logra pa medio di fe, asta si kisas e por ta solamente e tamaño di un simia di mòster (Mat. 17:20, Lukas 17:6).

“I su kombershon [di Rahab] no tabata un kaso isolá di e mizerikòrdia di Dios pa ku idólatranan ku a rekonosé Su outoridat divino. Meimei di e tera un pueblo numeroso, e gibeonitanan, a renunsiá nan paganismo i a uni ku Israel, kompartiendo den e bendishonnan di e pakto.

“Ningun distinshon pa motibu di nashonalidat, rasa, òf kasta, ta ser rekonosé dor di Dios. E ta e Kreador di henter humanidat. Tur hende ta di un famia pa medio di kreashon, i tur ta un pa medio di redenshon. Kristu a bini pa basha tur muraya di partishon abou, pa habri tur kompartimento di e tèmpel, pa kada alma por tin akseso liber na Dios. Su amor ta asina hanchu, asina profundo, ku e ta penetrá tur kaminda. E ta saka for di influensia di Satanas esnan ku a ser engañá dor di su engañonan, i ta pone nan denter di alkanse di e trono di Dios, e trono rondoná pa e arko iris di promesa. Den Kristu no tin ni hudiu ni griego, katibu ni liber.”—Ellen G. White, Prophets and Kings, p. 369,370.

Preguntanan pa Diskushon: