Monumentonan Konmemorativo di Grasia

Lesa pa e Estudio di e Siman Akí:

Versíkulo di Memoria:

“Pasobra SEÑOR boso Dios a seka e awanan di Jordan pa boso te ora boso a krusa, meskos ku SEÑOR boso Dios a hasi ku Laman Kòrá, ku El a seka pa nos te ora nos a krusa, pa tur e pueblonan di tera por sa ku e man di SEÑOR ta poderoso, pa boso por teme SEÑOR boso Dios pa semper” (Josué 4:23-24, ESV).

E agente polisial a duna señal. John mester a hala para kantu. E ofisial a pidi su reibeweis, i, na e momentu ei, John a realisá ku el a laga su pòtmòni, ku su reibeweis, den ofisina. John a splika kiko a pasa, i e ofisial a puntr’é tokante su trabou. John a kontestá ku e tabata un profesor. Segun ku e ofisial a duna John un prosèsverbal, el a bis’é pa no pensa riba dje komo un but.

“E ta kuota eskolar,” el a bisa. “Ora hende ke siña algu, nan ta paga kuota eskolar. Esaki ta bo kuota eskolar pa siña pa no lubidá bo reibeweis ora di stür. Pasa un bon dia, profesor!”

Komo sernan humano, nos tin tendensia di lubidá kosnan ku no ta konstantemente den nos bista. Nos ta lubidá di kontestá yamadanan di telefon, kontestá emailnan, muha e matanan, manda deseonan di kumpleaño, etcetera. E lista por sigui. Lubidá riba nos nesesidatnan spiritual, sinembargo, por tin konsekuensianan mas severo ku simplemente risibí un but, spesialmente pasobra nos ta tratando ku loke ta, literalmente, nos destino eterno.

Laga nos studia e krusamentu di Jordan dor di e hebreonan i mira kiko nos por siña for di nan eksperensianan.

Krusando Jordan

Lesa Josué 3:1-5 i Numbernan 14:41-44. Dikon Dios a pidi e israelitanan pa prepará spesialmente pa loke tabata bai pasa?

Esaki ta e promé biaha ku e arka di aliansa ta ser menshoná den e buki di Josué. Te na e punto akí den e narativo di Tèstamènt Bieu, e arka a aparesé den konteksto di e santuario (Eks. 40:21), den e biahe di Israel for di Sinai (Num. 10:33-36) i na e intento frakasá pa kuminsá e konkista di Canaan (Num. 14:44). E tabata e opheto di mas sagrado den e santuario israelita i tabatin tres opheto, kada un ekspresando Israel su relashon spesial ku Dios:

E arka i e preparashonnan pa krusa Jordan a rekordá Israel ku nan no tabata drentando Canaan na nan mes manera i tempu. E konkista lo tabata eksitoso solamente si nan a sigui e kaminda i tempu di Dios. Dios, kende ta ser deskribí komo entronisá ariba di e kerubinnan ku tabata kubri e arka di testimonio (Eks. 25:22, Num. 7:89) i kende su moveshonnan ta ser identifiká ku e moveshonnan di e arka, ta drenta Canaan dilanti di e israelitanan komo Esun ku ta guia e konkista.

E término tradusí “santifiká” (Jos. 3:5) òf “konsagrá” (ESV) ta referí na un proseso di purifikashon similar na loke e saserdotenan tabata sigui promé ku nan tabata kuminsá nan sirbishi den e santuario (Eks. 28:41, Eks. 29:1) i loke e pueblo di Israel tabata realisá promé ku e revelashon di Dios na Sinai (Eks. 19:10-14). E konsagrashon akí tabata envolví e ponementu di piká un banda i e kitamentu di tur impuresa ritual. E mesun mandamentu ta aparesé den Numbernan 11:18, relashoná ku un milager inminente di Dios. Un preparashon asina tabata ser rekerí tambe promé ku batayanan tabata ser bringá den un guera (Deut. 23:14). Promé ku Dios por bringa pa Israel den bataya, nan mester mustra nan lealtat na djE i konfia den djE komo nan Komandante. E milager di krusa Jordan tabata bai proba na e israelitanan ku e promesa di Señor pa kore ku e hendenan akí for di e tera por a ser konfiá. Esun ku por a sigurá un pasashi seku atraves di Jordan por a otorgá nan tambe e regalo di e tera.

Dios no ta parti Jordan semper. Su intervenshonnan no ta semper asina opvio. Kon bo ta kere ku nos por desaroyá e preparashon spiritual pa eksperensiá i diserní e intervenshonnan di Dios na nos fabor?

E Dios Bibu di Maravianan

Lesa Josué 3:6-17. Kiko e krusamentu milagroso di Jordan ta bisa nos tokante e naturalesa di e Dios ku nos ta sirbi?

E krusamentu di Riu Jordan ta ser deskribí den Josué 3:5 pa medio di e palabra hebreo niphla’ot, “milagernan, maravianan,” ku normalmente ta referí na e aktonan poderoso i sobrenatural di Dios ku ta demostrá Su singularidat (Salmo 72:18, Salmo 86:10). Despues, e israelitanan a meditá riba e aktonan akí i, komo resultado, a alabá Señor (Salmo 9:1) i a proklam’E meimei e nashonnan (Salmo 96:3). E plaganan na Egipto (Eks. 3:20, Mik. 7:15), e krusamentu di Laman Kòrá, komo tambe e guia di Dios den desierto (Salmo 78:12-16) a ser kontá komo maravianan asina.

E outornan di Beibel tabata sa i a testifiká di e echo ku e Dios ku a krea mundu nunka tabata limitá òf restringí pa Su kreashon. Nada ta imposibel (Hebr. “demasiado maravioso”) pa E logra (Jer. 32:17). Su nòmber i Su naturalesa ta maravioso (Huesnan 13:18), i E ta mas ayá di nos komprondementu. Kontrali na e diosnan di e otro nashonnan, ku no por salba (Salmo 96:5, Isa. 44:8), e Dios di Beibel ta un “Dios bibu,” aktivo i bibu, kende su siguidónan por konfi’E den antisipashon di Su intervenshonnan na nan fabor.

Profeta Zakarias a usa e mesun término (for di e mesun rais ku niphla’ot) ora el a imaginá un futuro pa Israel despues di e eksilio babilóniko. El a mira ku Jerusalèm lo a ser rekonstruí kompletamente ku hende bieu sintando den e kayanan di e stat i muchanan hòmber i muhé ta hungando einan. Na e habitantenan aparentemente inkrédulo di e kapital ku ainda ta desplegá e señalnan di su destrukshon, Zakarias a deklará: “Asina SEÑOR di ehérsitonan ta bisa: 'Si ta maravioso den bista di e remanente di e pueblo akí den e dianan ei, e mester ta maravioso tambe den Mi bista?' SEÑOR di ehérsitonan ta deklará. Asina SEÑOR di ehérsitonan ta bisa: 'Mira, lo Mi salba Mi pueblo for di e pais di pariba i for di e pais di pabou, i lo Mi trese nan pa biba meimei di Jerusalèm' ” (Zak. 8:6-8, ESV).

Kòrda

Lesa Josué 4. Dikon Dios a pidi e israelitanan pa traha un monumento?

E propósito di e piedranan akí ta pa bira un “señal.” E término hebreo ’ot hopi biaha ta ser asosiá ku e palabra “maravia” i por referí na aktonan milagroso hasí dor di Dios (wak e estudio di ayera), manera e plaganan riba Egipto (Eks. 7:3, Deut. 4:34). E por karga tambe e nifikashon di “símbolo” òf “representashon,” komo un señal eksterno di un realidat mas profundo òf trasendente. Por ehèmpel, e arko iris ta un “señal” di e pakto (Gén. 9:12-13); e sanger riba e kozeinnan di porta di e kasnan israelita tambe ta ser yamá un “señal” (Eks. 12:13); i mas signifikante ainda, e Sabat ta un “señal” di Kreashon i di e presensia santifikador di Dios (Eks. 31:13-17; Ezek. 20:12).

Aki, e señal ta funshoná komo un rekordatorio, rekordando kada siguiente generashon di e milager di e krusamentu. E término rekordatorio (zikkaron) ta bini di e palabra zakar, “kòrda,” ku ta indiká mas ku un akto pasivo di kòrda algu. E ta impliká un kòrdamentu siguí pa un akshon korekto (Deut. 5:15, Deut. 8:2). E lantamentu di monumentonan di piedra (Gen. 28:18-22) i ritualnan ku a provoká preguntanan (Eks. 12:26-27; Deut. 6:20-25) tabata komun den Tèstamènt Bieu. En bes di ripití e milagernan bes tras bes, Dios ta establesé monumentonan ku ta lanta e memoria di Su aktonan grandi i ta provoká kontestanan signifikante. P’esei, e señal mester tei “pa semper,” implikando e nesesidat pa warda e milager akí di Señor den e memoria kolektivo di Su pueblo perpetuamente.

E pregunta potensial di futuro generashonnan ta signifikante pasobra e ta formulá na un manera personal: “Kiko e piedranan akí ta pa bo?” Kada generashon nobo mester internalisá i komprondé e nifikashon di e piedranan akí pa nan mes personalmente. E fe den un Dios ku ta hasi milager por ser tené bibu solamente si kada generashon redeskubrí e nifikashon di e aktonan poderoso di Yahweh pa nan mes. Un fe asina lo hasi un diferensia grandi entre biba fielmente tradishonnan basá riba Beibel, i tradishonalismo, e religion morto di e generashon bibu deprivá di su balor i fervor original. Al final, nos tin ku hasi nos fe basá riba Beibel di nos mes. Niun hende, spesialmente nos antepasadonan, por kere pa nos.

Olvido

Lesa Josué 4:20-24 den lus di e siguiente versíkulonan: Huesnan 3:7; Huesnan 8:34; Salmo 78:11; Deut. 8:2-18; Salmo 45:17. Dikon tabata asina importante pa kòrda e echonan poderoso di Señor?

Nota e kambio den persona den Josué 4:23. E awanan di Jordan ta ser referí na dje komo awanan ku a seka dilanti di “boso,” esta, dilanti di tur e israelitanan ku a kaba di krusa Jordan. Kontrali na esei, ta ser bisá ku Laman Kòrá a seka dilanti di “nos,” esnan ku tabata presente ainda for di e promé generashon i ku a eksperensiá e Eksodo. E dos susesonan eksperensiá dor di dos diferente generashon tabata similar den nifikashon, loke a pone ku e di dos generashon, pa medio di e testimonio di nan mayornan, por a redeskubrí e mesun nifikashon di e krusamentu di Jordan pa nan mes.

Generalmente, nos ta persibí olvido komo un rasgo normal di tur ser humano. Sinembargo, olvido den sentido spiritual por hiba na konsekuensianan serio.

Asta awe, si nos ke mantené nos identidat komo un pueblo ku un yamada i mishon pekuliar, nos lo mester krea okashonnan pa refreská tantu nos memoria spiritual individual komo korporativo pa asina mantené den enfoke di unda nos ta bini, ken nos ta, i pa kiko nos ta aki. Lesa 1 Korintionan 11:24-25 i Juan 14:26. Dikon nos mester kòrda semper kiko Kristu a hasi pa nos? Kiko mas ta importá realmente sin dje?

Ellen G. White a komprondé klaramente ku sin guia nos mes konstantemente den e lus di e aktonan i revelashon di pasado di Dios, siguramente nos lo pèrdè e motivashon pa kumpli ku nos mishon den futuro: “Nos no tin nada di teme pa futuro, eksepto ora nos lubidá e manera ku Señor a guia nos, i Su siñansa den nos historia di pasado.”— Ellen G. White, Life Sketches, p. 196.

Mas ayá di Jordan

El a kombertí laman den tera seku;
Nan a pasa atraves di e riu na pia.
Einan nos lo regosihá den djE (Salmo 66:6, NKJV).

Tantu e krusamentu di Laman Kòrá komo di Jordan ta markadónan di un era nobo den historia bíbliko, i tur dos ta karga nifikashon simbóliko (lesa Salmo 66:6, Salmo 114:1-7, i 2 Reinan 2:6-15). Ya kaba den Tèstamènt Bieu tin tekstonan ku ta konektá e dos eventonan di krusamentu i ta rekonosé un nifikashon, ku ta mustra mas ayá di e konfigurashonnan original. Den Salmo 66, e salmista a selebrá e akto redentor di Dios den su bida (Salmo 66:16-19) dor di referí na e ehèmpelnan históriko di e krusamentu di Laman Kòrá i di Jordan.

Salmo 114 tambe ta mara e dos eventonan huntu, no pasobra e outor no a mira un diferensia kronológiko entre nan, sino pa motibu di e nifikashon teológiko ku e dos krusamentunan ta kompartí. Pues, tur dos evento ta ser mirá komo kontribuyendo na un kambio den e státus di Israel, un biaha di sklabitut pa libertat, despues di nómada sin tera pa nashonalidat. Den e salmonan akí, e ehèmpelnan di e dos krusamentunan ta ilustrá e kambio den státus di e outor for di opreshon, pobresa, impotensia, i humiliashon pa siguridat, bienestar, salbashon, i dignidat.

Ta tambe na e Jordan ku e traslado di Elias ta tuma lugá den e konteksto di un milager similar na esun registrá den Josué. Pa Elias, e krusamentu a trese e kambio di státus di mas signifikante den su bida: el a ser hibá shelu. Pa Eliseo, e kambio ta importante tambe: e asistente di e profeta (1Reinan 19:21) ta bira e profeta di e nashon (2 Reinan 2:22).

Lesa Mateo 3:16-17 i Marko 1:9. Kon e eskritornan akí di Tèstamènt Nobo ta impliká un nifikashon spiritual i simbóliko di Riu Jordan?

E ministerio terenal di Hesus, komo e Representante di Israel, ta sigui e patronchi di e historia di Israel antiguo. Hesus ta pasa dor di e eksperensianan di “Laman Kòrá” i “Jordan”. E ta ser yamá for di Egipto despues di un dekreto di morto (Mat. 2:14-16), ta pasa 40 dia den desierto (Mat. 4:2) similar na e 40 añanan di Israel antiguo, i, komo un transishon for di Su bida privá pa Su ministerio públiko, E ta ser batisá den Jordan (Mat. 3:16-17; Marko 1:19).

Despues, Hebreonan 3-4 ta rekonosé e nifikashon simbóliko di e krusamentu di Jordan i ta presentá e entrada den Canaan komo un prefigurashon di e “sosiegu di grasia” ku kristiannan ta drenta pa medio di fe.

Lesa Ellen G. White, “Crossing the Jordan,” p. 483,484, den Patriarchs and Prophets.

“Studia kuidadosamente e eksperensianan di Israel den nan biahenan pa Canaan. Studia e di tres i di kuater kapítulo di Josué, ku ta registrá nan preparashon pa i pasashi riba Jordan den e tera primintí. Nos mester tene e kurason i mente den entrenamentu, dor di refreská e memoria ku e lèsnan ku Señor a siña Su pueblo antiguo. E ora ei pa nos, manera El a destiná ku e mester ta pa nan, e siñansanan di Su Palabra semper lo ta interesante i impreshonante.”—Ellen G. White Comments, The SDA Bible Commentary, tomo 2, p. 994.

“Israel moderno ta den un peliger mas grandi di lubidá Dios i ser hibá den idolatria ku Su pueblo antiguo tabata. Hopi ídolo ta ser adorá, asta dor di wardadónan profeso di Sabat. Dios a enkargá Su pueblo antiguo spesialmente pa tene kuidou ku idolatria, pasobra si nan mester ser hibá for di sirbi e Dios bibu, Su maldishon lo a sosegá riba nan, miéntras ku, si nan a stim’E ku henter nan kurason, ku henter nan alma, i ku tur nan forsa, E lo a bendishoná nan abundantemente den makutu i den tienda, i lo a kita malesa for di meimei di nan.”—Ellen G. White, Testimonies for the Church, tomo 1, p. 609.

Preguntanan pa Diskushon: